ᱚᱫᱟᱢ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search

 

ᱚᱫᱟᱢ

ᱚᱫᱟᱢ/ᱩᱫᱟᱢ (ᱤᱝᱞᱤᱥ: otter) ᱫᱚ ᱢᱤᱫ ᱞᱮᱠᱟᱱ ᱯᱟᱭᱨᱟᱜ ᱟᱨ ᱜᱷᱩᱴᱩ ᱨᱮ ᱴᱩᱸᱰᱟᱹᱝ ᱚᱜ ᱡᱟᱱᱣᱟ ᱠᱟᱱᱟ ᱠᱚ ᱾ ᱱᱩᱠᱩ ᱫᱚ ᱜᱟᱹᱰᱭᱟᱹ, ᱱᱟᱹᱭ, ᱱᱟᱞᱟ, ᱜᱟᱰᱟ ᱢᱩᱸᱰᱩ ᱚᱱᱠᱟᱱ ᱫᱟᱜ ᱛᱟᱦᱮᱸᱱ ᱴᱷᱟᱺᱭ ᱨᱮᱜᱮ ᱠᱚ ᱛᱟᱦᱮᱸᱱᱟ ᱾ ᱫᱟᱜ ᱥᱩᱨ ᱨᱮᱭᱟᱜ ᱫᱷᱤᱨᱤ ᱵᱷᱩᱜᱟᱹᱜ, ᱫᱟᱨᱮ ᱨᱮᱦᱮᱫ ᱞᱟᱛᱟᱨ ᱮᱢᱟᱱ ᱠᱚᱨᱮ ᱠᱚ ᱧᱟᱢᱚᱜᱼᱟ ᱾ ᱱᱩᱠᱩ ᱫᱚ ᱫᱟᱜ ᱨᱮᱜᱮ ᱠᱚ ᱯᱟᱭᱨᱟ ᱵᱟᱲᱟᱭ ᱨᱮᱦᱚᱸ ᱚᱛ ᱨᱮ ᱦᱚᱸ ᱠᱚ ᱫᱟᱲᱟᱱ ᱜᱮᱭᱟ ᱾ ᱩᱫᱟᱢ ᱞᱮᱠᱟ ᱚᱛ ᱨᱮ ᱛᱟᱦᱮᱸᱱ ᱡᱟᱱᱣᱟ ᱢᱩᱫᱽ ᱨᱮ ᱮᱴᱟᱜ ᱡᱟᱱᱣᱟ ᱞᱮᱠᱟ ᱫᱟᱜ ᱨᱮ ᱩᱱᱟᱹᱜ ᱵᱟᱝ ᱠᱚ ᱫᱟᱹᱲ ᱠᱮᱭᱟ ᱾ ᱩᱫᱟᱢ ᱟᱜ ᱟᱥᱚᱞ ᱡᱚᱢᱟᱜ ᱫᱚ ᱦᱟᱹᱠᱩ ᱠᱟᱱᱟ ᱠᱚ ᱾ ᱦᱟᱹᱠᱩ ᱥᱟᱥᱟᱵ ᱨᱮ ᱱᱩᱠᱩ ᱫᱚ ᱟᱹᱰᱤ ᱜᱟᱹᱠᱷᱩᱲ (ᱢᱟᱹᱦᱤᱨ) ᱜᱮᱭᱟ ᱠᱚ ᱾ ᱢᱤᱫᱴᱟᱹᱝ ᱡᱟᱹᱲ ᱨᱮᱵᱚᱱ ᱟᱸᱡᱚᱢ ᱟᱠᱟᱫ ᱜᱮᱭᱟ ᱜᱟᱰᱟ ᱯᱟᱨᱚᱢᱚᱜ ᱡᱚᱠᱷᱚᱫ ᱢᱤᱫ ᱦᱚᱲᱟᱜ ᱢᱟᱞᱟ ᱧᱩᱨ ᱮᱱ ᱛᱟᱭᱟ, ᱚᱱᱟ ᱢᱟᱞᱟ ᱢᱤᱫᱴᱟᱹᱝ ᱦᱟᱹᱠᱩᱭ ᱡᱚᱢ ᱠᱮᱫᱼᱟ ᱾ ᱛᱟᱭᱚᱢ ᱛᱮ ᱩᱱᱤ ᱩᱫᱟᱢ ᱫᱚ ᱪᱮᱫ ᱞᱮᱠᱟ ᱡᱚᱛᱚ ᱦᱟᱹᱠᱩᱣᱟᱜ ᱞᱟᱡ ᱮ ᱜᱮᱨ ᱵᱚᱜᱚᱡ ᱞᱮᱫ ᱛᱟᱠᱚᱣᱟ? ᱩᱫᱟᱢ ᱫᱚ ᱚᱥᱴᱨᱮᱞᱤᱭᱟ ᱫᱤᱥᱚᱢ ᱪᱷᱟᱰᱟ ᱠᱟᱛᱮ ᱜᱚᱴᱟ ᱫᱷᱟᱹᱨᱛᱤ ᱨᱮᱜᱮ ᱠᱚ ᱧᱟᱢᱚᱜᱼᱟ ᱾ ᱥᱤᱧᱚᱛ ᱨᱮᱦᱚᱸ ᱟᱭᱢᱟ ᱛᱷᱚᱠ ᱨᱮᱱ ᱢᱮᱱᱟᱜ ᱠᱚᱣᱟ ᱾ ᱩᱫᱟᱢ ᱡᱟᱦᱟᱸ ᱞᱮᱠᱟᱱ ᱦᱚᱲ ᱴᱷᱮᱱ ᱫᱚ ᱵᱟᱠᱚ ᱥᱚᱫᱚᱨᱚᱜᱼᱟ ᱾

 

ᱛᱟᱦᱮᱸᱱ ᱴᱷᱟᱺᱭ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱫᱟᱢ ᱫᱚ ᱟᱥᱚᱠᱟᱭ ᱛᱮ ᱦᱟᱥᱟ ᱨᱮ ᱵᱷᱩᱜᱟᱹᱜ ᱠᱟᱛᱮ ᱠᱚ ᱛᱟᱦᱮᱸᱱᱟ ᱾ ᱱᱚᱶᱟ ᱵᱷᱩᱜᱟᱹᱜ ᱨᱮᱭᱟᱜ ᱢᱤᱫᱴᱟᱹᱝ ᱨᱤᱛ ᱢᱮᱱᱟᱜᱼᱟ ᱾ ᱢᱤᱫ ᱱᱟᱠᱷᱟ ᱵᱷᱩᱜᱟᱹᱜ ᱫᱚ ᱫᱟᱜ ᱥᱮᱫ ᱥᱮᱱᱚᱜᱼᱟ ᱟᱨ ᱢᱤᱫᱴᱟᱹᱝ ᱫᱚ ᱜᱷᱩᱴᱩ ᱨᱮ ᱯᱷᱩᱴᱩᱠ ᱞᱮᱠᱟ ᱛᱟᱦᱮᱸᱱᱟ ᱾ ᱚᱫᱟᱢ ᱢᱤᱫ ᱴᱷᱟᱺᱭ ᱨᱮᱜᱮ ᱠᱚ ᱛᱟᱦᱮᱸᱱᱟ ᱢᱮᱱᱠᱷᱟᱱ ᱡᱚᱢᱟᱜ ᱨᱮᱱᱟᱜ ᱟᱱᱟᱴ ᱦᱩᱭ ᱞᱮᱱ ᱠᱷᱟᱱ ᱴᱷᱟᱺᱭ ᱠᱚ ᱵᱚᱫᱚᱞᱟ ᱾ ᱚᱫᱟᱢ ᱟᱜ ᱟᱥᱚᱞ ᱡᱚᱢᱟᱜ ᱫᱚ ᱦᱩᱭᱩᱜ ᱠᱟᱱᱟ ᱦᱟᱹᱠᱩ, ᱦᱟᱹᱠᱩ ᱥᱮᱸᱫᱽᱨᱟ ᱢᱤᱫ ᱧᱤᱫᱟᱹ ᱨᱮ ᱑᱐-᱑᱕ ᱢᱟᱹᱭᱤᱞ ᱫᱷᱟᱹᱵᱤᱡ ᱠᱚ ᱫᱟᱲᱟᱱᱟ ᱾ ᱚᱲᱟᱜ ᱥᱩᱨ ᱨᱮ ᱱᱟᱹᱭ - ᱱᱟᱞᱟ ᱛᱟᱦᱮᱸᱱ ᱠᱷᱟᱱ ᱟᱞᱜᱟ ᱛᱮ ᱵᱚᱦᱮᱞ ᱫᱟᱲᱮᱭᱟᱜ ᱟᱠᱚ ᱾ ᱚᱫᱟᱢ ᱟᱜ ᱜᱟᱹᱫᱤ ᱥᱮᱸᱫᱽᱨᱟ ᱧᱟᱢ ᱟᱹᱰᱤ ᱟᱞᱜᱟ ᱜᱮᱭᱟ ᱾ ᱟᱥᱚᱠᱟᱭ ᱛᱮ ᱢᱤᱫ ᱴᱷᱟᱺᱭ ᱨᱮᱜᱮ ᱠᱚ ᱤᱡᱼᱟ ᱾ ᱟᱨ ᱱᱚᱶᱟ ᱤᱡ ᱠᱚᱫᱚ ᱵᱷᱩᱜᱟᱹᱜ ᱪᱮᱛᱟᱱ ᱨᱮ ᱰᱷᱤᱯᱤ ᱠᱚᱜᱼᱟ ᱟᱨ ᱦᱚᱸ ᱦᱟᱹᱠᱩ ᱡᱚᱢ ᱚᱠᱛᱮ ᱦᱟᱹᱠᱩᱣᱟᱜ ᱢᱚᱪᱟ ᱠᱷᱚᱱ ᱦᱤᱨᱤᱡ ᱧᱩᱨᱩᱜ ᱡᱟᱝ, ᱪᱩᱯᱤ ᱮᱢᱟᱱ ᱛᱟᱦᱮᱸᱱᱟ ᱾

 

ᱡᱤᱭᱚᱱ ᱪᱟᱨᱠᱷᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱫᱟᱢ ᱫᱚ ᱢᱤᱫ ᱛᱳᱣᱟ ᱧᱩ ᱛᱮ ᱦᱟᱨᱟᱜ ᱡᱟᱱᱣᱟ ᱠᱟᱱᱟ ᱠᱚ ᱾ ᱚᱫᱟᱢ ᱠᱚᱫᱚ ᱞᱚᱞᱚ ᱫᱤᱱ ᱨᱮ ᱵᱟᱹᱲᱛᱤ ᱠᱚ ᱧᱟᱯᱟᱢᱚᱜᱼᱟ, ᱮᱴᱟᱜ ᱫᱤᱱ ᱨᱮᱦᱚᱸ ᱧᱟᱯᱟᱢ ᱫᱚᱠᱚ ᱧᱟᱯᱟᱢᱚᱜ ᱜᱮᱭᱟ ᱾ ᱱᱩᱠᱩ ᱫᱚ ᱫᱟᱜ ᱞᱟᱛᱟᱨ ᱨᱮᱠᱚ ᱧᱟᱯᱟᱢᱚᱜᱼᱟ ᱟᱨ ᱵᱟᱨᱭᱟ ᱠᱷᱚᱱ ᱯᱩᱱᱭᱟᱹ ᱫᱷᱟᱹᱵᱤᱡ ᱠᱚ ᱦᱚᱯᱚᱱ ᱠᱚᱣᱟ ᱾ ᱡᱟᱱᱟᱢ ᱚᱠᱛᱚ ᱨᱮ ᱚᱫᱟᱢ ᱦᱚᱯᱚᱱ ᱰᱟᱴᱟ ᱵᱟᱝ ᱡᱟᱱᱟᱢ ᱛᱟᱨᱟ ᱟᱠᱚᱣᱟ ᱟᱨ ᱢᱮᱫ ᱦᱚᱸ ᱵᱩᱥᱟᱹᱲ ᱵᱟᱝ ᱛᱟᱦᱮᱸᱱ ᱛᱟᱠᱚᱣᱟ ᱾ ᱢᱤᱫ ᱪᱟᱸᱫᱚ ᱛᱟᱭᱱᱚᱢ ᱢᱮᱫ ᱵᱩᱥᱟᱹᱲᱚᱜ ᱮᱦᱚᱵᱚᱜ ᱛᱟᱠᱚᱣᱟ ᱾ ᱱᱚᱝᱠᱟ ᱜᱮ ᱮᱸᱜᱟᱛᱟᱜ ᱟᱹᱭᱩᱨ ᱨᱮᱠᱚ ᱦᱟᱨᱟ ᱵᱩᱨᱩᱜᱼᱟ ᱫᱟᱜ ᱟᱨ ᱚᱛ ᱵᱟᱨ ᱡᱟᱭᱜᱟ ᱨᱮᱜᱮ ᱠᱚ ᱤᱛᱩ ᱠᱚᱣᱟ ᱾ ᱯᱮ ᱪᱟᱸᱫᱚ ᱛᱟᱭᱱᱚᱢ ᱠᱷᱚᱱ ᱦᱚᱯᱚᱱ ᱠᱚ ᱫᱟᱜ ᱨᱮ ᱯᱟᱭᱨᱟᱜ ᱠᱚ ᱮᱦᱚᱵᱚᱜᱼᱟ ᱾ ᱯᱩᱭᱞᱩ ᱨᱮ ᱫᱟᱜ ᱨᱮ ᱠᱚ ᱴᱷᱮᱞᱟᱣ ᱜᱚᱫ ᱠᱟᱠᱚᱣᱟ ᱟᱨ ᱮᱸᱜᱟᱛ ᱛᱮᱫ ᱫᱚ ᱢᱚᱪᱟ ᱨᱮ ᱦᱟᱹᱠᱩ ᱜᱮᱨ ᱠᱟᱛᱮ ᱫᱟᱜ ᱵᱷᱤᱛᱨᱤ ᱠᱚ ᱵᱚᱞᱚᱱᱟ ᱾ ᱮᱸᱜᱟᱛ ᱟᱜ ᱢᱚᱪᱟ ᱠᱷᱚᱱ ᱦᱟᱹᱠᱩ ᱨᱮᱨᱮᱡ ᱞᱟᱹᱜᱤᱫ ᱫᱟᱜ ᱨᱮ ᱵᱚᱞᱚᱱ ᱚᱠᱛᱮ ᱜᱮ ᱯᱟᱭᱨᱟᱜ ᱠᱚ ᱪᱮᱫ ᱟᱠᱚᱣᱟ ᱾ ᱱᱚᱝᱠᱟ ᱜᱮ ᱵᱟᱨ - ᱯᱮ ᱥᱮᱨᱢᱟ ᱛᱟᱭᱱᱚᱢ ᱦᱚᱯᱚᱱ ᱠᱚᱠᱚ ᱥᱮᱬᱟᱜᱼᱟ ᱟᱨ ᱡᱤᱭᱚᱱ ᱡᱩᱨᱤ ᱠᱚ ᱧᱟᱢ ᱡᱚᱝᱟ ᱾