Jump to content

ᱟᱛᱟᱛᱩᱨᱠ ᱢᱩᱥᱛᱚᱯᱷᱟ ᱠᱟᱢᱟᱞ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱟᱛᱟᱛᱩᱨᱠ ᱢᱩᱥᱛᱚᱯᱷᱟ ᱠᱟᱢᱟᱞ
ᱟᱛᱟᱛᱩᱨᱠ ᱢᱩᱥᱛᱚᱯᱷᱟ ᱠᱟᱢᱟᱞ

ᱟᱛᱟᱛᱩᱨᱠ ᱢᱩᱥᱛᱚᱯᱷᱟ ᱠᱟᱢᱟᱞ

ᱠᱟᱢᱟᱞ ᱟᱛᱟᱛᱩᱨᱠ ᱩᱨᱯᱷ ᱢᱩᱥᱛᱚᱯᱷᱟ ᱠᱟᱢᱟᱞ ᱯᱟᱥᱟ (᱑᱘᱘᱑ - ᱑᱙᱓᱘) ᱫᱚ ᱦᱟᱹᱞᱤ ᱛᱩᱨᱠᱤ ᱨᱤᱱᱤᱡ ᱥᱤᱨᱡᱚᱱᱤᱭᱟᱹ ᱢᱮᱱᱛᱮ ᱦᱚᱸᱠᱚ ᱢᱮᱛᱟᱭᱟ ᱾ ᱛᱩᱨᱠᱤ ᱨᱤᱱᱤᱡ ᱥᱟᱢᱨᱟᱡᱭᱚᱵᱟᱫᱤ ᱥᱟᱥᱚᱠ ᱫᱚᱥᱟᱨ ᱥᱩᱞᱛᱟᱱ ᱚᱵᱽᱫᱩᱞ ᱦᱚᱢᱤᱫᱽ ᱟᱜ ᱯᱟᱥᱟ ᱩᱞᱴᱟᱹᱣ ᱠᱟᱛᱮ ᱚᱸᱰᱮ ᱠᱟᱢᱟᱞᱟᱜ ᱥᱟᱶᱛᱟᱨᱤ, ᱨᱟᱡᱽᱼᱟᱹᱨᱤᱭᱟᱹ, ᱟᱨ ᱠᱟᱹᱣᱰᱤ ᱵᱮᱵᱚᱥᱛᱟ ᱛᱚᱸᱜᱮ ᱫᱚᱦᱚᱭ ᱞᱟᱹᱜᱤᱫ ᱡᱟᱦᱟᱸ ᱦᱩᱞᱥᱟᱹᱭ ᱠᱟᱹᱢᱤ ᱩᱱᱤᱭ ᱛᱚᱨᱟᱣ ᱞᱮᱜᱼᱟ ᱚᱱᱟ ᱱᱟᱜᱟᱢᱮᱛ ᱠᱟᱹᱢᱤ ᱜᱮ ᱩᱱᱤᱭᱟᱜ ᱧᱩᱛᱩᱢ ᱫᱚ ᱢᱮᱱᱮᱛᱟᱱᱟᱜ ᱮ ᱯᱚᱨᱢᱟᱱ ᱞᱮᱜᱼᱟ [᱑][᱒][᱓][᱔]

ᱡᱟᱱᱟᱢ ᱟᱨ ᱜᱤᱫᱽᱨᱟᱹ ᱚᱠᱛᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱟᱢᱟᱞ ᱯᱟᱥᱟ ᱦᱟᱜ ᱡᱟᱱᱟᱢ ᱫᱚ ᱑᱙ ᱢᱮ ᱑᱘᱘᱑ ᱥᱟᱞᱮᱨᱮ ᱥᱮᱞᱳᱱᱤᱠᱟ ᱨᱮᱭᱟᱜ ᱢᱤᱫ ᱪᱟᱹᱥᱤ ᱚᱲᱟᱜ ᱨᱮ ᱦᱩᱭ ᱞᱮᱱᱟ ᱾ ᱩᱱᱤ ᱟᱡ ᱟᱭᱳ ᱣᱟᱜ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱᱟ ᱡᱩᱵᱮᱭᱫᱟ ᱟᱨ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱚᱞᱤ ᱨᱟᱡᱟ ᱛᱟᱦᱮᱸ ᱠᱟᱱᱟ ᱾ ᱚᱞᱤ ᱨᱟᱡᱟ ᱫᱚ ᱥᱚᱞᱳᱱᱤᱠᱟ ᱨᱮᱭᱟᱜ ᱪᱩᱸᱜᱤ ᱚᱯᱷᱤᱥ ᱨᱮ ᱠᱞᱚᱨᱠ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱜᱤᱫᱽᱨᱟᱹ ᱨᱮᱭᱟᱜ ᱧᱩᱛᱩᱢ ᱫᱚ ᱢᱩᱥᱛᱚᱯᱷᱟ ᱛᱟᱦᱮᱸ ᱠᱟᱱᱟ ᱾ ᱡᱟᱱᱟᱢ ᱠᱟᱛᱮ ᱛᱤᱱᱟᱹᱜ ᱥᱮᱨᱢᱟ ᱛᱟᱭᱚᱢ ᱠᱷᱟᱱ ᱜᱮ ᱵᱟᱵᱟ ᱫᱚᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱟᱭᱳ ᱡᱩᱵᱮᱭᱫᱟ ᱫᱚ ᱫᱷᱚᱨᱚᱢ ᱪᱮᱛᱟᱱ ᱨᱮ ᱥᱮᱪᱮᱫ ᱦᱚᱪᱚᱭᱮ ᱞᱟᱹᱜᱤᱫ ᱩᱭᱦᱟᱹᱨ ᱠᱟᱛᱮ ᱢᱚᱫᱚᱨᱥᱮ ᱨᱮᱭ ᱵᱷᱩᱨᱛᱤ ᱠᱟᱫᱮᱭᱟ ᱾ ᱚᱸᱰᱮ ᱟᱡ ᱨᱤᱱ ᱪᱮᱛᱟᱱ ᱪᱟᱱᱚᱪ ᱪᱮᱛᱮᱫᱤᱭᱟᱹ ᱠᱚᱣᱟᱜ ᱟᱡ ᱪᱮᱛᱟᱱ ᱨᱮ ᱦᱟᱞᱵᱟᱞ (ᱨᱮᱜᱤᱝ) ᱠᱮᱫ ᱠᱷᱟᱹᱛᱤᱨ ᱩᱱᱤ ᱫᱚ ᱜᱩᱡᱩᱜ ᱟᱨᱵᱟᱝ ᱜᱚᱡ ᱠᱚ ᱫᱷᱟᱹᱵᱤᱡ ᱮ ᱟᱬᱜᱚ ᱮᱱᱟ ᱾ ᱥᱩᱢᱩᱝ ᱜᱮᱢᱤᱫ ᱥᱮᱨᱢᱟ ᱵᱚᱭᱚᱥ ᱨᱮᱜᱮ ᱩᱱᱤ ᱩᱱᱟᱹᱜ ᱦᱟᱹᱲᱩᱣᱟᱹ (ᱫᱟᱞ ᱯᱟᱦᱟᱨ ᱮᱫᱤᱡ) ᱭ ᱦᱩᱭ ᱮᱱᱟ ᱫᱚ ᱩᱱᱤ ᱚᱸᱰᱮ ᱠᱷᱚᱱ ᱩᱰᱩᱠ ᱜᱤᱰᱤ ᱦᱩᱭ ᱟᱫ ᱠᱚᱣᱟ ᱾ ᱛᱟᱭᱚᱢ ᱛᱮ ᱩᱱᱤ ᱢᱮᱱᱤᱥᱴᱚᱨ ᱨᱮᱭᱟᱜ ᱥᱚᱭᱱᱤᱠ ᱟᱥᱲᱟ ᱨᱮᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱾ ᱤᱠᱷᱟᱹᱱ ᱚᱸᱰᱮ ᱦᱚᱸ ᱩᱱᱤᱭᱟᱜ ᱜᱩᱡᱩᱜ ᱢᱮᱴᱟᱣᱜ ᱨᱮᱭᱟᱜ ᱚᱡᱽ ᱫᱚ ᱛᱚᱸᱜᱮ ᱛᱟᱦᱮᱸ ᱮᱱ ᱜᱮ ᱛᱟᱭᱟ ᱾ ᱤᱠᱷᱟᱹᱱ ᱥᱮᱱᱟ ᱥᱮᱪᱮᱫᱚᱜ ᱨᱮ ᱢᱚᱱᱮ ᱛᱟᱭ ᱞᱟᱜᱟᱣ ᱮᱱ ᱠᱷᱟᱹᱛᱤᱨ ᱩᱱᱤᱭᱟᱜ ᱯᱚᱲᱦᱚᱱ ᱛᱚᱸᱜᱮ ᱛᱟᱦᱮᱸ ᱮᱱᱟ ᱾

ᱥᱮᱱᱟ ᱥᱮᱪᱮᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

The house where Atatürk was born in the Ottoman city of Selanik (Thessaloniki in present-day Greece)
The reconstructed house of Atatürk's paternal grandparents, in the Ottoman village of Kocacık (Kodžadžik in present-day North Macedonia)

ᱠᱚᱲᱟ ᱜᱤᱫᱽᱨᱟᱹ ᱢᱩᱥᱛᱚᱯᱷᱟ ᱦᱟᱹᱲᱩᱣᱟᱹ ᱫᱚ ᱱᱤᱦᱟᱹᱛᱤ ᱜᱮᱭ ᱛᱟᱦᱮᱸ ᱠᱟᱱᱟ ᱤᱠᱷᱟᱹᱱ ᱮᱞᱠᱷᱟ ᱨᱮ ᱩᱱᱤᱭᱟᱜ ᱨᱤᱦᱤᱴ ᱦᱟᱦᱟᱲᱟ ᱜᱮ ᱛᱟᱦᱮᱸ ᱠᱟᱱᱟ ᱾ ᱢᱟᱪᱮᱛᱟᱜ ᱦᱮᱸᱫᱮ ᱯᱟᱴᱟᱨᱮ ᱠᱩᱠᱞᱤ ᱚᱞ ᱵᱟᱲᱟᱭ ᱛᱮᱠᱷᱟᱱ ᱜᱮ ᱩᱱᱤ ᱫᱚ ᱚᱱᱟ ᱢᱚᱪᱟ ᱛᱮᱜᱮ ᱞᱟᱹᱭ ᱠᱟᱛᱮᱭ ᱥᱚᱞᱦᱮ ᱜᱚᱫ ᱠᱟᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟᱨᱮ ᱠᱟᱢᱟᱞ ᱟᱜ ᱜᱟᱱ ᱫᱟᱲᱮ ᱧᱮᱞ ᱠᱟᱛᱮ ᱟᱥᱲᱟ ᱨᱤᱱᱤᱡ ᱮᱞᱠᱷᱟ ᱢᱟᱪᱮᱛ ᱠᱮᱯᱴᱚᱱ ᱢᱩᱥᱛᱚᱯᱷᱟ ᱩᱯᱷᱮᱫᱤ ᱫᱚ ᱧᱩᱛᱩᱢ ᱟᱹᱨᱩ ᱠᱟᱛᱮ ᱠᱟᱢᱟᱞ ᱮ ᱫᱚᱦᱚ ᱠᱮᱫ ᱛᱟᱭᱟ ᱾ ᱤᱱᱟᱹ ᱛᱟᱭᱚᱢ ᱠᱷᱟᱱ ᱜᱮ ᱩᱱᱤ ᱫᱚ ᱠᱟᱢᱟᱞ ᱯᱟᱥᱟ ᱧᱩᱛᱩᱢ ᱛᱮᱭ ᱩᱯᱨᱩᱢ ᱤᱫᱤᱭᱮᱱᱟ ᱾ ᱜᱮᱭᱟᱭ ᱥᱮᱨᱢᱟ ᱵᱚᱪᱷᱚᱨ ᱨᱮ ᱢᱳᱱᱟᱥᱛᱤᱨ ᱨᱮᱭᱟᱜ ᱯᱨᱟᱭᱢᱟᱨᱤ ᱥᱚᱭᱱᱤᱠ ᱟᱥᱲᱟ ᱨᱮ ᱮᱛᱚᱦᱚᱵᱟᱜ ᱥᱮᱱᱟ ᱥᱮᱪᱮᱫ ᱟᱢᱮᱴ ᱠᱮᱫ ᱛᱟᱭᱚᱢ ᱩᱱᱤ ᱫᱚ ᱠᱚᱱᱥᱴᱮᱱᱴᱤᱱᱳᱯᱞ ᱥᱴᱟᱯ ᱵᱤᱨᱫᱟᱹᱜᱟᱲ (ᱣᱟᱨ ᱮᱠᱟᱰᱮᱢᱤ) ᱞᱟᱯᱷᱟᱝ ᱥᱮᱱᱟ ᱥᱮᱪᱮᱫ ᱞᱟᱹᱜᱤᱫ ᱵᱷᱮᱡᱟ ᱦᱩᱭ ᱮᱱᱟ ᱾ ᱤᱱᱟᱹ ᱫᱤᱱ ᱨᱮᱫᱚ ᱠᱚᱱᱥᱴᱮᱱᱴᱤᱱᱳᱯᱞ ᱨᱮ ᱚᱵᱽᱫᱩᱞ ᱦᱚᱢᱤᱫᱽ (ᱫᱚᱥᱟᱨ) ᱨᱤᱡ ᱥᱚᱞᱛᱚᱱᱚᱛ ᱮ ᱛᱟᱦᱮᱸ ᱠᱟᱱᱟ ᱾ ᱟᱨ ᱩᱱᱤ ᱫᱚ ᱥᱩᱞᱛᱟᱱ ᱢᱮᱱᱛᱮ ᱠᱚ ᱢᱮᱛᱟᱭ ᱠᱟᱱ ᱛᱟᱦᱮᱸᱫ ᱾

ᱵᱚᱛᱚᱱ ᱥᱟᱶ ᱥᱟᱹᱜᱟᱹᱭ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱸᱰᱮ ᱩᱱᱤ ᱯᱚᱲᱦᱚᱱ ᱥᱟᱶᱼᱥᱟᱶᱛᱮ ᱵᱟᱹᱲᱤᱡ ᱦᱚᱨ ᱨᱮ ᱫᱟᱬᱟ ᱟᱠᱟᱭ ᱛᱟᱦᱮᱸ ᱮᱱᱟ ᱾ ᱛᱤᱱᱟᱹᱝ ᱫᱤᱱ ᱫᱚ ᱵᱚᱫᱽᱢᱟᱥ ᱛᱮ ᱯᱮᱨᱮᱡ ᱡᱤᱭᱚᱱ ᱮ ᱠᱷᱟᱸᱰᱟᱣ ᱠᱮᱫ ᱛᱟᱭᱚᱢ ᱩᱱᱤ ᱫᱚ ᱵᱚᱛᱚᱱ ᱧᱩᱛᱩᱢᱟᱱ ᱢᱤᱫ ᱫᱟᱱᱟᱝ ᱦᱩᱞᱥᱟᱹᱭ ᱜᱟᱫᱮᱞ ᱨᱤᱱᱤᱡ ᱯᱩᱭᱞᱩ ᱥᱚᱦᱮᱫ ᱮ ᱵᱮᱱᱟᱣ ᱮᱱᱟ ᱟᱨ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱚᱱᱟ ᱨᱤᱱᱤᱡ ᱱᱮᱛᱟ ᱦᱚᱸᱭ ᱵᱮᱱᱟᱣ ᱮᱱᱟ ᱾ ᱵᱚᱛᱚᱱ ᱟᱜ ᱡᱚᱥ ᱢᱤᱫ ᱯᱟᱦᱴᱟ ᱫᱚ ᱥᱩᱞᱛᱟᱱ ᱟᱜ ᱛᱟᱱᱟᱥᱟᱦᱤ ᱟᱨ ᱫᱚᱥᱟᱨ ᱯᱟᱦᱴᱟ ᱫᱚ ᱵᱤᱫᱮᱥ ᱠᱚᱣᱟᱜ ᱥᱚᱰᱚᱡᱚᱱᱛᱨᱚ ᱨᱮᱦᱮᱫ ᱥᱟᱶ ᱢᱩᱪᱟᱹᱫᱽ ᱨᱮᱭᱟᱜ ᱾ ᱢᱤᱫ ᱫᱤᱱ ᱜᱟᱫᱮᱞ ᱟᱜ ᱫᱩᱯᱲᱩᱵ ᱦᱩᱭᱩᱜ ᱠᱟᱱ ᱛᱟᱦᱮᱸᱫ ᱤᱱᱟᱹ ᱚᱠᱛᱚ ᱨᱮ ᱚᱠᱚᱭ ᱫᱟᱱᱟᱝ ᱥᱮᱱᱟ ᱪᱚ ᱥᱩᱞᱛᱟᱱ ᱵᱮᱣᱨᱟᱭ ᱮᱢᱟ ᱫᱮᱭᱟ ᱟᱨ ᱡᱚᱛᱚ ᱯᱟᱹᱭᱛᱟᱹᱨᱤᱭᱟᱹ ᱚᱯᱷᱤᱥᱚᱨ ᱦᱟᱹᱲᱤ ᱠᱟᱛᱮ ᱡᱤᱦᱚᱞ ᱠᱚ ᱵᱷᱮᱡᱟ ᱠᱮᱫ ᱠᱚᱣᱟ ᱾ ᱪᱟᱞᱟᱜ ᱠᱟᱱ ᱠᱟᱱᱩᱱ ᱞᱮᱠᱟᱛᱮ ᱡᱩᱜᱩᱜ ᱥᱟᱡᱟ ᱠᱚ ᱮᱢ ᱫᱟᱲᱮᱭᱟᱠᱚᱣᱟ ᱦᱩᱱᱟᱹᱝ, ᱤᱠᱷᱟᱹᱱ ᱞᱤᱪᱟᱹᱲ ᱩᱨᱦᱟᱹᱨ ᱥᱩᱞᱛᱟᱱ ᱴᱷᱮᱱ ᱵᱚᱛᱚᱨ ᱛᱟᱦᱮᱸ ᱠᱟᱱᱟ ᱫᱚ ᱯᱟᱞᱮ ᱱᱚᱝᱠᱟ ᱞᱮᱠᱷᱟᱱ ᱫᱤᱥᱚᱢ ᱨᱮ ᱦᱩᱞ ᱥᱮᱸᱜᱮᱞ ᱵᱟᱝ ᱡᱩᱞ ᱨᱟᱠᱟᱵ ᱟᱛᱚ ᱾ ᱡᱟᱦᱟᱸ ᱠᱷᱟᱹᱛᱤᱨ ᱢᱩᱪᱟᱹᱫ ᱨᱮ ᱩᱱᱤ ᱫᱚ ᱡᱚᱛᱚ ᱦᱚᱲ ᱤᱠᱟᱹ ᱠᱟᱠᱚ ᱨᱮᱭᱟᱜ ᱮ ᱴᱷᱟᱹᱣᱠᱟᱹ ᱠᱮᱜᱼᱟ ᱾

ᱤᱠᱟᱹ ᱛᱟᱭᱚᱢ ᱦᱚᱸ ᱚᱱᱟ ᱠᱟᱹᱢᱤᱨᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱱᱠᱟ ᱜᱮ ᱮᱴᱟᱜ ᱫᱩᱥᱤ ᱞᱮᱠᱟᱜᱮ ᱠᱟᱢᱟᱞ ᱦᱚᱸ ᱤᱠᱟᱹ ᱨᱮᱠᱚ ᱟᱲᱟᱜ ᱠᱟᱫᱮᱭᱟ ᱾ ᱤᱱᱟᱹ ᱛᱟᱭᱚᱢ ᱥᱩᱞᱛᱟᱱ ᱫᱚ ᱫᱨᱩᱡᱽ ᱡᱟᱛᱤᱭᱟᱜ ᱦᱩᱞᱥᱟᱹᱨ ᱟᱠᱚᱴ ᱞᱟᱹᱜᱤᱫ ᱛᱮ ᱩᱱᱠᱩ ᱫᱚ ᱫᱟᱢᱟᱥᱠᱚᱥ ᱮ ᱵᱷᱮᱡᱟ ᱠᱮᱫ ᱠᱚᱣᱟ ᱾ ᱚᱸᱰᱮ ᱠᱟᱢᱟᱞ ᱫᱚ ᱠᱟᱹᱢᱤ ᱢᱟ ᱟᱹᱰᱤ ᱱᱟᱯᱟᱭ ᱜᱮᱭ ᱠᱟᱹᱢᱤ ᱠᱮᱜᱼᱟ ᱾ ᱤᱠᱷᱟᱹᱱ ᱪᱟᱹᱭᱼᱪᱚᱞᱚᱱ ᱞᱮᱠᱟᱛᱮ ᱠᱚᱥᱛᱟᱱᱛᱤᱭᱟᱸ ᱭ ᱨᱩᱣᱟᱹᱲ ᱮᱱ ᱠᱷᱟᱱ ᱜᱮ ᱩᱱᱤ ᱫᱚ ᱥᱛᱟᱢᱵᱩᱞ ᱨᱮ ᱢᱤᱫ ᱠᱷᱩᱸᱫᱽᱲᱤ ᱦᱟᱛᱟᱣ ᱠᱟᱛᱮ ᱵᱚᱛᱚᱱ -ᱚᱼᱦᱩᱨᱤᱭᱚᱛ ᱯᱟᱨᱴᱤ ᱠᱟᱹᱢᱤᱥᱟᱲᱟ ᱡᱷᱤᱡ ᱠᱟᱛᱮ ᱚᱱᱟᱨᱮ ᱯᱷᱩᱨᱜᱟᱹᱞ ᱨᱮᱭᱟᱜ ᱩᱠᱩ ᱜᱟᱶᱛᱟ ᱨᱮᱭᱟᱜ ᱠᱟᱹᱢᱤᱭ ᱮᱛᱚᱦᱚᱵ ᱠᱮᱜᱼᱟ ᱾ ᱱᱤᱭᱟᱹ ᱚᱠᱛᱚ ᱨᱮ ᱩᱱᱤ ᱱᱚᱶᱟᱭ ᱵᱟᱰᱟᱭ ᱧᱟᱢ ᱠᱮᱜᱼᱟ ᱫᱚ ᱢᱚᱠᱫᱩᱱᱤᱭᱟᱹ ᱨᱮ ᱥᱩᱞᱛᱟᱱ ᱵᱤᱨᱩᱫᱷ ᱠᱟᱛᱮ ᱠᱷᱩᱞᱟᱹ ᱦᱩᱞᱥᱟᱹᱭ ᱦᱩᱭᱩᱜ ᱞᱟᱹᱜᱤᱫ ᱾ ᱚᱠᱛᱚ ᱨᱮᱭᱟᱜ ᱛᱟᱠ ᱵᱟᱪᱷᱟᱣ ᱠᱟᱛᱮ ᱠᱟᱢᱟᱞ ᱫᱚ ᱥᱩᱞᱛᱟᱱ ᱨᱤᱱ ᱯᱷᱟᱹᱫᱽ ᱠᱷᱚᱱ ᱰᱤᱜᱟᱹ ᱦᱟᱛᱟᱣ ᱠᱟᱛᱮ ᱡᱟᱯᱷᱟ, ᱢᱤᱨᱩᱫᱟ, ᱟᱨ ᱮᱛᱷᱮᱱᱥ ᱥᱮᱫ ᱛᱮ ᱨᱩᱯ ᱟᱹᱨᱩ ᱠᱟᱛᱮ ᱦᱩᱞᱥᱟᱹᱭ ᱨᱮᱭᱟᱜ ᱛᱟᱞᱢᱟ ᱥᱚᱞᱳᱱᱤᱠᱟᱭ ᱥᱮᱱ ᱥᱮᱴᱮᱨ ᱮᱱᱟ ᱾ ᱤᱠᱷᱟᱹᱱ ᱚᱸᱰᱮ ᱩᱱᱤ ᱠᱚ ᱪᱤᱱᱦᱟᱹᱣ ᱠᱮᱫᱮᱭᱟ ᱾

ᱟᱯᱚᱱ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱱᱠᱟ ᱢᱟ ᱠᱟᱢᱟᱞ ᱯᱟᱥᱟᱦᱟᱜ ᱡᱤᱭᱚᱱ ᱨᱮ ᱯᱩᱱᱭᱟᱹ ᱠᱩᱲᱤ ᱦᱚᱯᱚᱱ ᱥᱟᱶ ᱩᱱᱤᱭᱟᱜ ᱫᱩᱯᱩᱞᱟᱹᱲ ᱥᱟᱹᱜᱟᱹᱭ ᱛᱟᱦᱮᱸ ᱠᱟᱱᱟ ᱤᱠᱷᱟᱹᱱ ᱵᱟᱯᱞᱟ ᱫᱚ ᱩᱱᱤ ᱠᱷᱟᱹᱞᱤ ᱞᱚᱛᱤᱯᱷᱤ ᱩᱥᱥᱟᱠᱤ ᱥᱟᱶ ᱮ ᱵᱟᱯᱞᱟ ᱮᱱᱟ ᱾ ᱡᱩᱫᱤ ᱦᱚᱸ ᱠᱟᱢᱟᱞ ᱨᱤᱱ ᱢᱤᱫ ᱦᱚᱸ ᱦᱚᱯᱚᱱ ᱵᱟᱠᱚ ᱦᱩᱭ ᱞᱮᱱᱟ ᱟᱨ ᱮᱨᱟ ᱛᱟᱭ ᱵᱤᱱ ᱦᱚᱯᱚᱱ ᱜᱮᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱮᱨᱟᱦᱟᱜ ᱜᱩᱨ ᱛᱟᱭᱚᱢ ᱢᱩᱥᱛᱟᱯᱷᱟ ᱠᱟᱢᱟᱞ ᱯᱟᱥᱟ ᱫᱚ ᱛᱤᱥ ᱦᱚᱸ ᱵᱟᱭ ᱵᱟᱯᱞᱟ ᱞᱮᱱᱟ ᱾ ᱡᱤᱭᱚᱱ ᱨᱮᱭᱟᱜ ᱮᱠᱞᱟ ᱚᱠᱛᱚ ᱥᱟᱦᱟᱭ ᱞᱟᱹᱜᱤᱫ ᱩᱱᱤ ᱜᱮᱯᱮ ᱜᱚᱴᱟᱝ ᱴᱩᱣᱟᱹᱨ ᱜᱤᱫᱟᱹᱨᱟᱭ ᱟᱯᱱᱟᱨ ᱠᱮᱫ ᱠᱚᱣᱟ ᱾ ᱟᱨ ᱩᱱᱠᱩ ᱟᱹᱰᱤ ᱱᱟᱯᱟᱭ ᱛᱮᱭ ᱡᱚᱛᱚᱱ ᱦᱟᱨᱟ ᱠᱮᱫ ᱠᱚᱣᱟ ᱾ ᱱᱩᱠᱩ ᱜᱮᱯᱮ ᱜᱚᱴᱟᱝ ᱜᱤᱫᱽᱨᱟᱹ ᱠᱷᱚᱱ ᱜᱮᱵᱟᱨ ᱦᱚᱲ ᱫᱚ ᱠᱩᱲᱤ ᱜᱤᱫᱽᱨᱟᱹ ᱠᱚ ᱛᱟᱦᱮᱸ ᱠᱟᱱᱟ ᱟᱨ ᱢᱤᱫ ᱦᱚᱲ ᱜᱮ ᱠᱚᱲᱟ ᱜᱤᱫᱽᱨᱟᱹ ᱫᱚᱭ ᱛᱟᱦᱮᱸ ᱠᱟᱱᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  1. "Wayback Machine". web.archive.org. Retrieved 2023-01-30.
  2. "Bitola Top Destinations - Bitola Tourist Info". Bitola Top Destinations - Bitola Tourist Info (in ᱟᱢᱮᱨᱤᱠᱟᱱ ᱟᱝᱜᱽᱨᱮᱡᱤ). Retrieved 2023-01-30.
  3. https://archive.org/details/gov.archives.arc.651784
  4. "Atatürk, Mustafa Kemal | ZBW Press Archives". pm20.zbw.eu. Retrieved 2023-01-30.