ᱟᱥᱟᱢᱤᱥ ᱯᱟᱹᱨᱥᱤ ᱟᱱᱫᱚᱲ
ᱟᱥᱟᱢᱤᱥ ᱯᱟᱹᱨᱥᱤ ᱟᱱᱫᱚᱲ ᱫᱚ ᱟᱥᱟᱢ ᱯᱚᱱᱚᱛ ᱨᱮ ᱟᱥᱟᱢᱤᱥ ᱯᱟᱹᱨᱥᱤ ᱥᱚᱨᱠᱟᱨᱤ ᱯᱟᱹᱨᱥᱤ ᱟᱨ ᱥᱮᱪᱮᱫ ᱟᱠᱷᱲᱟ ᱠᱚ ᱨᱮ ᱥᱮᱪᱮᱫ ᱦᱚᱨᱟ ᱞᱮᱠᱟ ᱛᱮ ᱵᱮᱣᱦᱟᱨᱚᱜ ᱞᱟᱹᱜᱤᱫ ᱚᱠᱛᱮ ᱚᱠᱛᱮ ᱨᱮ ᱦᱚᱭᱚᱜ ᱠᱟᱱ ᱛᱟᱦᱮᱱ ᱥᱟᱶᱛᱟ ᱟᱹᱨᱤ ᱟᱨ ᱨᱟᱡᱟᱨᱤ ᱟᱱᱫᱚᱲ ᱜᱮ᱾ ᱟᱥᱟᱢᱤᱥ ᱯᱟᱹᱨᱥᱤ ᱥᱚᱨᱠᱟᱨᱤ ᱯᱟᱹᱨᱥᱤ ᱞᱮᱠᱟ ᱛᱮ ᱚᱯᱷᱤᱥ ᱟᱫᱟᱞᱚᱛ ᱠᱚ ᱨᱮ ᱵᱮᱣᱦᱟᱨᱚᱜ ᱞᱟᱹᱜᱤᱫ ᱟᱱᱫᱚᱲ ᱫᱚ ᱑᱙ ᱥᱟᱭᱟᱱᱟᱜ ᱥᱮᱨᱢᱟ ᱠᱚ ᱨᱮ ᱠᱦᱚᱱ ᱜᱮ ᱮᱛᱚᱦᱚᱵ ᱟᱠᱟᱱᱟ᱾ ᱑᱘᱒᱖ ᱥᱮᱨᱢᱟ ᱨᱮ ᱤᱭᱟᱱᱰᱟᱵᱩ ᱥᱚᱱᱫᱷᱤ ᱛᱟᱭᱱᱚᱢ ᱟᱥᱟᱢ ᱫᱚ ᱵᱽᱨᱤᱴᱤᱥ ᱜᱚᱵᱚᱞ ᱨᱮ ᱥᱮᱱ ᱮᱱ ᱛᱟᱭᱚᱢ ᱠᱷᱚᱱ ᱯᱨᱚᱥᱟᱥᱚᱱ ᱟᱞᱜᱟᱜ ᱞᱟᱹᱜᱤᱫ ᱟᱹᱰᱤ ᱟᱭᱢᱟ ᱵᱟᱝᱞᱟᱵᱷᱟᱥᱤ ᱦᱚᱲ ᱟᱥᱟᱢ ᱛᱮ ᱠᱚ ᱟᱹᱜᱩ ᱞᱮᱫ ᱠᱚᱣᱟ᱾ ᱤᱱᱟᱹ ᱠᱟᱛᱷᱟ ᱞᱮᱠᱟ ᱛᱮ ᱜᱮ ᱟᱥᱟᱢ ᱨᱮᱭᱟᱜ ᱦᱤᱠᱮ ᱚᱲᱟᱜ ᱟᱨ ᱥᱚᱨᱠᱟᱨᱤ ᱚᱯᱷᱚᱤᱥ ᱠᱚᱨᱮ ᱵᱟᱝᱞᱟ ᱯᱟᱹᱨᱥᱤ ᱜᱮ ᱞᱟᱲᱪᱟᱲ ᱮᱦᱚᱱᱮᱟ᱾ ᱢᱮᱱ ᱠᱷᱟᱱ ᱱᱮ-ᱦᱚᱲ ᱟᱨ ᱟᱢᱮᱨᱤᱠᱟᱱ ᱵᱮᱯᱴᱤᱥᱴ ᱢᱤᱥᱚᱱᱟᱨᱤ ᱠᱚᱣᱟᱜ ᱠᱩᱨᱩᱢᱩᱴᱩ ᱞᱮᱠᱟ ᱛᱮ ᱟᱥᱟᱢ ᱨᱮ ᱟᱨᱦᱚᱸ ᱟᱥᱟᱢᱤᱥ ᱯᱟᱹᱨᱥᱤ ᱵᱟᱱᱫᱷᱟᱣ ᱨᱩᱣᱟᱹᱲ ᱮᱱᱟ᱾
ᱥᱤᱧᱚᱛ ᱯᱷᱩᱨᱜᱟᱹᱞ ᱛᱟᱭᱱᱚᱢ ᱑᱙᱕᱒ ᱥᱮᱨᱢᱟ ᱠᱷᱚᱱ ᱟᱥᱟᱢ ᱨᱮ ᱟᱥᱟᱢᱤᱥ ᱯᱟᱹᱨᱥᱤ ᱥᱚᱨᱠᱟᱨᱤ ᱯᱟᱹᱨᱥᱤ ᱞᱮᱠᱟ ᱛᱮ ᱟᱨ ᱟᱥᱟᱢ ᱨᱮᱭᱟᱜ ᱥᱮᱪᱮᱫ ᱟᱠᱷᱲᱟ ᱠᱚ ᱨᱮ ᱵᱮᱣᱦᱟᱨ ᱞᱟᱹᱜᱤᱫ ᱢᱤᱫᱴᱮᱱ ᱟᱱᱫᱚᱲ ᱮᱛᱚᱦᱚᱵ ᱞᱮᱱᱟ᱾ ᱯᱟᱹᱨᱥᱤ ᱨᱮᱭᱟᱜ ᱜᱩᱱᱞᱮᱠᱟ ᱛᱮ ᱥᱤᱧᱚᱛ ᱫᱤᱥᱚᱢ ᱠᱚ ᱨᱮᱱᱟᱜ ᱯᱚᱱᱚᱛ ᱠᱚ ᱵᱮᱱᱟᱣ ᱟᱹᱨᱩ ᱟᱹᱱ ᱑᱙᱕᱖ ᱥᱮᱨᱢᱟ ᱨᱮ ᱞᱟᱹᱜᱩ ᱞᱮᱱ ᱛᱮ ᱱᱤᱭᱟᱹ ᱟᱱᱫᱚᱲ ᱟᱨᱦᱚᱸ ᱡᱟᱹᱥᱛᱤ ᱤᱫᱤ ᱞᱮᱱᱟ᱾ ᱯᱟᱹᱨᱥᱤ ᱧᱮᱞ ᱠᱟᱛᱮ ᱯᱚᱱᱚᱛ ᱵᱮᱱᱟᱣᱚᱜ ᱠᱟᱱ ᱧᱮᱞ ᱛᱮ ᱟᱥᱟᱢ ᱥᱟᱦᱤᱛᱭᱚ ᱥᱚᱵᱷᱟ ᱫᱚ ᱟᱥᱟᱢᱤᱥ ᱯᱟᱹᱨᱥᱤ ᱟᱥᱟᱢ ᱨᱮᱭᱟᱜ ᱢᱤᱫ ᱮᱥᱠᱟᱨ ᱥᱚᱨᱠᱟᱨᱤ ᱯᱟᱹᱨᱥᱤ ᱞᱮᱠᱟ ᱛᱮ ᱢᱟᱱᱚᱛ ᱮᱢᱟᱜ ᱞᱟᱹᱜᱤᱫ ᱠᱚ ᱫᱟᱹᱵᱤ ᱞᱮᱫᱟ᱾ ᱱᱤᱭᱟᱹ ᱟᱱᱫᱚᱲ ᱨᱮ ᱟᱭᱢᱟ ᱯᱟᱹᱴᱷᱩᱣᱟᱹ ᱠᱚᱲᱟ ᱠᱩᱲᱤ ᱦᱚᱸ ᱠᱚ ᱥᱮᱞᱮᱫ ᱞᱮᱱᱟ᱾ ᱱᱤᱭᱟᱹ ᱟᱱᱫᱚᱲ ᱨᱮ ᱑᱙᱖᱐ ᱥᱮᱨᱢᱟ ᱨᱮᱭᱟᱜ ᱔ ᱡᱩᱞᱟᱭ ᱦᱤᱞᱚᱜ ᱠᱚᱴᱚᱱ ᱠᱚᱞᱮᱡᱽ ᱨᱮ ᱨᱚᱧᱡᱤᱛ ᱵᱚᱨ ᱯᱚᱡᱟᱨᱤ ᱟᱡᱟᱜ ᱦᱚᱥᱴᱮᱞ ᱨᱮᱭᱟᱜ ᱑᱑᱓ ᱮᱞ ᱨᱩᱢ ᱨᱮ ᱯᱚᱞᱤᱥ ᱦᱚᱛᱮ ᱛᱮ ᱴᱷᱩ ᱜᱚᱡ ᱚᱪᱚ ᱞᱮᱱᱟ᱾ ᱩᱱᱤ ᱥᱟᱪᱶ ᱛᱮ ᱟᱹᱰᱤ ᱟᱭᱢᱟ ᱦᱚᱲ ᱜᱮ ᱱᱤᱭᱟᱹ ᱟᱱᱫᱚᱲ ᱨᱮ ᱠᱚ ᱜᱚᱡ ᱞᱮᱱᱟ᱾ ᱱᱤᱭᱟᱹ ᱫᱚ ᱯᱟᱹᱨᱥᱤ ᱟᱱᱫᱚᱲ ᱦᱚᱸ ᱠᱚ, ᱢᱮᱛᱟᱣᱟᱜ ᱠᱟᱱᱟ ᱟᱨ ᱨᱚᱧᱡᱤᱛ ᱵᱚᱨ ᱯᱚᱡᱟᱨᱤ ᱫᱚ ᱯᱟᱹᱨᱥᱤ ᱟᱱᱫᱚᱲ ᱨᱮᱱ ᱯᱟᱹᱦᱤᱞ ᱥᱚᱦᱤᱫᱽ ᱢᱮᱱ ᱛᱮ ᱢᱚᱱᱛ ᱠᱚ ᱮᱢᱟᱟᱫᱮᱭᱟ᱾ ᱱᱤᱭᱟᱹ ᱟᱱᱫᱚᱲ ᱛᱟᱭᱱᱚ ᱜᱮ ᱟᱥᱟᱢ ᱥᱚᱨᱠᱟᱨᱤ ᱯᱟᱹᱨᱥᱤ ᱟᱹᱱ, ᱑᱙᱖᱐ ᱞᱟᱹᱜᱩ ᱦᱚᱭ ᱞᱮᱱᱟ ᱟᱨ ᱟᱥᱟᱢᱤᱥ ᱯᱟᱹᱨᱥᱤ ᱫᱚ ᱤᱝᱨᱟᱹᱡᱤ ᱯᱟᱹᱨᱥᱤ ᱥᱟᱶ ᱟᱥᱟᱢ ᱨᱮᱭᱟᱜ ᱥᱚᱨᱠᱟᱨᱤ ᱯᱟᱹᱨᱥᱤ ᱢᱮᱱ ᱛᱮ ᱢᱟᱱᱚᱛ ᱠᱚ ᱮᱢᱟᱣᱟᱫᱟ᱾ ᱥᱚᱨᱠᱟ ᱟᱜ ᱱᱤᱭᱟᱹ ᱠᱟᱹᱢᱤ ᱦᱚᱨᱟ ᱟᱭᱢᱟ ᱦᱲᱚ ᱜᱮ ᱠᱚ ᱥᱟᱨᱦᱟᱣ ᱠᱮᱫᱟ ᱢᱮᱱᱠᱷᱟᱱ ᱟᱭᱢᱟ ᱦᱚᱲ ᱜᱮ ᱱᱤᱭᱟᱹ ᱠᱚ ᱵᱤᱨᱩᱫᱽ ᱠᱮᱫᱟ ᱟᱥᱚᱠᱟᱭ ᱛᱮ ᱵᱚᱨᱟᱠ ᱵᱮᱰᱟ ᱨᱮᱱ ᱦᱚᱲ᱾ ᱵᱚᱨᱟᱠ ᱵᱮᱰᱟ ᱨᱮ ᱵᱟᱝᱞᱟ ᱯᱟᱹᱨᱥᱤ ᱟᱱᱫᱚᱲ ᱦᱚᱭ ᱞᱮᱱᱟ ᱛᱮ ᱟᱥᱟᱢ ᱥᱚᱨᱠᱟᱨᱤ ᱯᱟᱹᱨᱥᱤ ᱟᱹᱱ ᱑᱙᱖᱐ ᱨᱮᱭᱟᱜ ᱟᱫᱚᱢ ᱦᱤᱸᱥ ᱥᱩᱫᱽᱨᱟᱹᱣ ᱧᱚᱜ ᱠᱟᱛᱮ ᱟᱨ ᱮᱛᱟᱰᱝ ᱯᱟᱹᱨᱥᱤ ᱨᱚᱨᱚᱲ ᱠᱚᱣᱟᱜ ᱟᱹᱭᱫᱟᱹᱨᱤ ᱠᱚ ᱵᱟᱧᱪᱟᱣ ᱠᱮᱮᱫᱟ᱾ ᱱᱤᱭᱟᱹ ᱥᱟᱶ ᱥᱟᱶ ᱛᱮ ᱵᱚᱨᱟᱠ ᱵᱮᱰᱟ ᱨᱮᱭᱟᱜ ᱦᱚᱱᱵᱚᱛ ᱠᱚ ᱨᱮ ᱵᱟᱝᱞᱟ ᱯᱟᱹᱨᱥᱤ ᱥᱚᱨᱠᱟᱨᱤ ᱯᱟᱹᱨᱥᱤ ᱞᱮᱠᱟ ᱛᱮ ᱢᱟᱱᱚᱛ ᱠᱚ ᱮᱢᱟᱣᱟᱫᱟ᱾