ᱟ.ᱛᱩ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search

ᱢᱟᱹᱱᱢᱤ ᱫᱚ ᱟᱹᱛᱩ ᱫᱤᱥᱚᱢ ᱠᱟᱛᱮ ᱠᱚ ᱛᱟᱦᱮᱸᱱᱟ ᱾ ᱚᱱᱠᱟ ᱜᱮ ᱥᱟᱱᱛᱟᱲ ᱠᱚ ᱞᱟᱹᱜᱤᱫ ᱦᱚᱸ ᱟᱹᱛᱩ ᱫᱤᱥᱚᱢ ᱢᱮᱱᱟᱜᱼᱟ ᱾ ᱥᱟᱱᱛᱟᱲ ᱠᱚ ᱦᱚᱸ ᱟᱹᱛᱩ ᱨᱮ ᱛᱟᱦᱮᱱ ᱞᱟᱹᱜᱤᱫ ᱢᱟᱬᱟᱝ ᱫᱚ ᱟᱹᱛᱩ ᱠᱚ ᱛᱮᱸᱜᱮᱱᱟ ᱾ ᱟᱹᱛᱩ ᱛᱮᱸᱜᱮᱱ ᱢᱟᱬᱟᱝ ᱨᱮ ᱚᱛ ᱦᱟᱥᱟ ᱨᱮᱱᱟᱜ ᱨᱚᱝ, ᱥᱤᱵᱤᱞ, ᱜᱩᱱ, ᱜᱚᱲᱦᱚᱱ, ᱫᱟᱨᱮ, ᱫᱷᱤᱨᱤ, ᱫᱟᱜ, ᱰᱟᱦᱟᱨ ᱠᱚ ᱠᱚ ᱪᱤᱭᱟᱹᱭᱟ ᱾ ᱚᱱᱟ ᱛᱟᱭᱚᱢ ᱫᱚ ᱢᱤᱫ ᱯᱚᱦᱟ ᱛᱤᱨᱤᱞ ᱫᱟᱨᱮ ᱵᱟᱝ ᱠᱷᱟᱱ ᱯᱚᱦᱟ ᱥᱟᱨᱡᱚᱢ ᱫᱟᱨᱮ ᱠᱚ ᱪᱤᱭᱟᱹᱭᱟ ᱾ ᱚᱱᱟ ᱫᱟᱨᱮ ᱵᱩᱴᱟᱹ ᱨᱮ ᱛᱟᱥᱟᱫ ᱠᱚ ᱨᱟᱪᱟᱜ ᱯᱷᱟᱨᱪᱟ ᱠᱟᱛᱮ ᱠᱚ ᱜᱩᱨᱤᱡ ᱯᱷᱟᱨᱪᱟᱭᱟ ᱾ ᱱᱚᱶᱟ ᱡᱟᱦᱟᱸᱭᱮ ᱠᱟᱹᱱᱤᱭᱟ, ᱩᱱᱤᱫᱚ ᱮᱭᱟᱭ ᱢᱟᱦᱟ ᱱᱤᱨᱵᱟᱨ ᱮ ᱛᱟᱦᱮᱸᱱᱟ ᱾ ᱰᱟᱺᱜᱽᱣᱟᱹ ᱠᱚᱲᱟ ᱠᱷᱟᱱ ᱟᱹᱰᱤ ᱱᱟᱯᱟᱭᱚᱜᱼᱟ ᱾ ᱟᱫᱚ ᱚᱱᱟ ᱜᱩᱨᱤᱡ ᱯᱷᱟᱨᱪᱟᱨᱮ ᱢᱟᱨᱟᱝ ᱵᱳᱨᱳ ᱧᱩᱛᱩᱢ ᱛᱮ ᱯᱮ ᱴᱤᱰᱟᱹᱜ ᱥᱤᱸᱫᱩᱨ ᱠᱚ ᱴᱤᱰᱟᱹᱜᱟ ᱾ ᱚᱱᱟ ᱴᱤᱰᱟᱹᱜ ᱥᱤᱸᱫᱩᱨ ᱨᱮ ᱟᱫᱽᱣᱟ ᱯᱩᱸᱰ ᱦᱳᱲᱳ ᱢᱤᱫ ᱪᱩᱯᱩᱫ ᱵᱟᱝ ᱠᱷᱟᱱ ᱯᱮ ᱪᱩᱯᱩᱫ ᱠᱚ ᱪᱩᱨᱩᱡᱼᱟ ᱾ ᱚᱱᱟ ᱫᱚ ᱵᱩᱫᱟᱹ ᱠᱷᱚᱱ ᱱᱟᱥᱮ ᱪᱷᱟᱰᱟ ᱧᱚᱜ ᱨᱮ ᱾ ᱟᱫᱚ ᱚᱱᱟ ᱵᱩᱫᱟᱹ ᱨᱮ ᱢᱤᱫᱴᱟᱹᱝ ᱟᱨᱟᱜ ᱥᱟᱺᱰᱤ ᱵᱟᱝ ᱠᱷᱟᱱ ᱯᱩᱸᱰ ᱥᱟᱺᱰᱤ ᱠᱚ ᱛᱚᱞᱮᱭᱟ ᱾ ᱤᱱᱟᱹᱦᱤᱞᱚᱜ ᱧᱤᱫᱟᱹ ᱫᱚ ᱚᱱᱟ ᱥᱩᱨ ᱨᱮᱠᱚ ᱜᱤᱛᱤᱡ ᱟᱸᱜᱟᱭᱟ ᱾ ᱧᱤᱫᱟᱹ ᱥᱤᱢ ᱥᱟᱺᱰᱤ ᱠᱩᱲᱠᱩᱪᱩᱫ ᱠᱚ ᱟᱛᱮᱱᱟ ᱾ ᱯᱮ ᱫᱷᱟᱣ ᱠᱷᱚᱱ ᱵᱟᱹᱲᱛᱤᱭ ᱠᱩᱲ ᱠᱩᱪᱩᱫ ᱞᱮᱠᱷᱟᱱ ᱟᱹᱰᱤ ᱱᱟᱯᱟᱭᱟ ᱾ ᱚᱱᱟ ᱟᱹᱛᱩ ᱨᱮ ᱨᱚᱲ, ᱞᱟᱸᱫᱽ, ᱮᱱᱮᱡ, ᱥᱮᱨᱮᱧ, ᱛᱷᱩᱛᱤ ᱰᱤᱸᱜᱚᱨ ᱥᱩᱞᱩᱠ ᱨᱮ ᱟᱹᱛᱩ ᱦᱚᱲᱠᱚ ᱛᱟᱦᱮᱱᱟ ᱾ ᱥᱮᱛᱟᱜ ᱟᱸᱜᱟ ᱠᱟᱛᱮ ᱫᱚ, ᱥᱤᱢ ᱤᱞ ᱠᱚ ᱧᱮᱞᱟ ᱾ ᱵᱟᱞᱮ ᱤᱞ ᱧᱩᱨ ᱠᱚᱜ ᱠᱷᱟᱱ, ᱜᱤᱫᱽᱨᱟᱹ ᱩᱢᱮᱨ ᱨᱤᱱ ᱵᱟᱹᱲᱛᱤ ᱠᱚ ᱜᱩᱨᱩᱜᱼᱟ ᱾ ᱦᱟᱲᱟᱢ ᱤᱞ ᱧᱩᱨᱩᱜ ᱠᱷᱟᱱ ᱦᱟᱲᱟᱢ ᱫᱩᱲᱩᱢ ᱠᱟᱛᱮ ᱠᱚ ᱜᱩᱨᱩᱜᱼᱟ ᱾ ᱪᱩᱨᱩᱡ ᱦᱳᱲᱳ ᱛᱤᱱᱟᱹᱜ ᱥᱮᱫ ᱥᱟᱦᱟ ᱠᱚᱜᱼᱟ, ᱤᱱᱟᱹᱜ ᱥᱮᱦᱮᱫ ᱨᱤᱱ ᱵᱚᱸᱜᱟ ᱡᱟᱦᱮᱨ ᱨᱮᱠᱚ ᱨᱟᱠᱟᱵ ᱠᱚᱣᱟ ᱾ ᱵᱚᱸᱜᱟ ᱟᱨ ᱵᱚᱸᱜᱟ ᱧᱩᱛᱩᱢ ᱠᱚᱫᱚ ᱨᱩᱢ ᱠᱟᱛᱮ ᱠᱚ ᱵᱟᱰᱟᱭᱟ ᱾ ᱦᱳᱲᱳ ᱪᱩᱨᱩᱡ ᱴᱷᱮᱱ ᱚᱛ ᱚᱫᱟᱜ ᱠᱷᱟᱱ ᱱᱟᱯᱟᱭᱮ ᱥᱟᱶᱟᱭᱟ ᱾ ᱚᱱᱟ ᱛᱟᱭᱚᱢ ᱡᱟᱦᱮᱨ ᱜᱟᱲᱠᱚ ᱛᱚᱞ ᱟ ᱾ ᱚᱸᱰᱮ ᱵᱚᱸᱜᱟ ᱵᱳᱨᱳ ᱠᱟᱛᱮ ᱾ ᱚᱱᱟ ᱛᱟᱭᱚᱢ ᱚᱲᱟᱜ ᱠᱚ ᱡᱚᱠᱷᱟᱭᱟ ᱾ ᱠᱩᱞᱦᱤ ᱫᱚ ᱵᱚᱸᱜᱟ ᱨᱟᱠᱟᱵ ᱵᱚᱸᱜᱟ ᱦᱟᱹᱥᱩᱨ ᱠᱚ ᱫᱚᱦᱚᱭᱟ ᱾ ᱵᱚᱸᱜᱟ ᱨᱟᱠᱟᱵ ᱠᱩᱞᱦᱤ ᱢᱩᱪᱟᱹᱫ ᱥᱮᱫ ᱨᱮ ᱡᱟᱦᱮᱨ ᱫᱚ ᱛᱟᱦᱮᱱᱟ ᱾ ᱚᱱᱟ ᱥᱟᱦᱟ ᱠᱩᱞᱦᱤ ᱢᱩᱪᱟᱹᱫ ᱨᱮᱜᱮ ᱜᱚᱥᱟᱬᱮ ᱦᱚᱸ ᱛᱟᱦᱮᱱᱟ ᱾ ᱟᱹᱛᱩ ᱯᱷᱟᱨᱪᱟ ᱛᱟᱦᱮᱱᱟ, ᱠᱩᱞᱦᱤᱨᱮ ᱡᱚᱵᱽᱨᱟ ᱵᱟᱠᱚ ᱫᱚᱦᱚᱭᱟ, ᱛᱤᱠᱤ ᱞᱩᱜᱽᱲᱤ ᱴᱟᱰᱟᱛᱮ ᱵᱟᱠᱚ ᱫᱤᱯᱤᱞ ᱯᱟᱨᱚᱢᱟ ᱾ ᱡᱟᱦᱮᱨ ᱨᱮ ᱟᱨᱟᱬ ᱡᱚᱲᱟᱣ ᱰᱟᱝᱜᱽᱨᱟ ᱵᱟᱠᱚ ᱞᱟᱜᱟ ᱯᱟᱨᱚᱢ ᱠᱚᱣᱟ ᱾ ᱪᱷᱩᱛ ᱠᱟᱛᱮ ᱡᱟᱦᱮᱨ ᱵᱚᱠᱚ ᱵᱚᱞᱚᱱᱟ ᱾ ᱟᱨ ᱦᱚᱸ ᱱᱚᱝᱠᱟ ᱟᱹᱱᱟᱹᱨᱤ ᱫᱚ ᱱᱟᱭᱠᱮ ᱵᱟᱵᱟ ᱵᱚᱸᱜᱟ ᱵᱳᱨᱳ ᱴᱷᱮᱱ ᱠᱷᱚᱱ ᱵᱟᱰᱟᱭ ᱠᱟᱛᱮ ᱞᱟᱹᱭ ᱪᱮᱫ ᱟᱠᱚᱣᱟᱭ ᱾

ᱢᱟᱺᱡᱷᱤ ᱢᱟᱯᱟᱹᱧᱡᱤ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱹᱛᱩ ᱨᱮ ᱛᱟᱦᱮᱱ ᱞᱟᱹᱜᱤᱫ ᱠᱷᱟᱱ, ᱨᱟᱭ ᱨᱤᱛ ᱢᱟᱱᱟᱣ ᱠᱟᱛᱮ ᱛᱟᱦᱮᱱ ᱦᱩᱭᱩᱜᱼᱟ ᱾ ᱢᱮᱱᱫᱚᱼᱵᱚᱸᱜᱟ ᱵᱳᱨᱳ, ᱫᱷᱚᱨᱚᱢ, ᱞᱟᱠᱪᱟᱨ ᱠᱚᱨᱮᱱᱟᱜ ᱠᱟᱹᱢᱤ ᱛᱚᱨᱟᱣ ᱦᱩᱭᱩᱜᱼᱟ ᱾ ᱚᱱᱟᱠᱚ ᱠᱟᱹᱢᱤ ᱛᱚᱨᱟᱣ ᱟᱨ ᱧᱮᱞ ᱥᱚᱡᱷᱮ ᱞᱟᱹᱜᱤᱫ ᱟᱹᱛᱩᱨᱤᱱ ᱢᱚᱬᱮ ᱦᱚᱲ ᱠᱚ ᱛᱟᱦᱮᱸᱱᱟ ᱾ ᱩᱱᱠᱩ ᱢᱚᱬᱮ ᱦᱚᱲ ᱫᱚ ᱟᱹᱛᱩ ᱦᱚᱲ ᱛᱮᱠᱚ ᱵᱟᱪᱷᱚᱱ ᱠᱚᱣᱟ ᱾ ᱵᱟᱪᱷᱚᱱ ᱫᱚ ᱥᱮᱨᱢᱟ ᱨᱮᱱᱟᱜ ᱮᱛᱚᱦᱚᱵ ᱪᱟᱸᱫᱚ ᱢᱟᱜᱽ ᱵᱚᱸᱜᱟ ᱢᱩᱞᱩᱜ ᱢᱚᱬᱮ ᱢᱟᱦᱟ ᱢᱟᱜᱽ ᱴᱟᱺᱰᱤ ᱨᱮ ᱢᱟᱜᱽ ᱵᱚᱸᱜᱟᱜ ᱡᱚᱠᱷᱟᱜ, ᱵᱚᱸᱜᱟ ᱪᱟᱵᱟ ᱠᱟᱛᱮ, ᱢᱟᱜᱽ ᱥᱚᱲᱮ ᱡᱚᱢ ᱢᱟᱬᱟᱝ ᱨᱮ ᱢᱟᱺᱡᱷᱤ ᱵᱟᱵᱟ ᱛᱟᱹᱨᱤ ᱨᱮ ᱟᱨ ᱟᱡᱟᱜ ᱫᱮᱞᱟ ᱛᱮᱜᱮ ᱢᱤᱫ ᱴᱷᱮᱱ ᱪᱟᱹᱣᱨᱟᱹ ᱛᱮ ᱫᱩᱲᱩᱵ ᱠᱟᱛᱮᱠᱚ ᱜᱟᱞᱢᱟᱨᱟᱣ ᱟᱠᱚ ᱾ ᱢᱟᱹᱡᱷᱤ ᱵᱟᱵᱟᱭ ᱢᱮᱱ ᱟ, ᱥᱮᱨᱢᱟ ᱯᱩᱨᱟᱹᱣ ᱮᱱᱟ ᱜᱩᱛᱤ ᱠᱟᱹᱲᱢᱤ ᱠᱚᱦᱚᱸᱠᱚ ᱚᱸᱰᱚᱠᱚᱜᱼᱟ ᱾ ᱟᱨᱦᱚᱸ ᱢᱟᱺᱡᱷᱤ ᱵᱟᱵᱟᱭ ᱢᱮᱱᱟ ᱟᱵᱚ ᱫᱚ ᱱᱮᱥᱫᱚ, ᱢᱟᱨᱮ ᱱᱟᱸᱜᱽᱞᱮ ᱥᱮ ᱱᱟᱣᱟ ᱱᱟᱸᱜᱽᱞᱮ ? ᱱᱟᱶᱟ ᱡᱚᱛᱮ ᱥᱮ ᱢᱟᱨᱮ ᱡᱚᱛᱮ ? ᱱᱟᱶᱟ ᱟᱨᱟᱬ ᱥᱮ ᱢᱟᱨᱮ ᱟᱨᱟᱬ ? ᱱᱟᱶᱟ ᱯᱟᱭᱬᱟ ᱥᱮ ᱢᱟᱨᱮ ᱯᱟᱭᱬᱟ ? ᱱᱟᱶᱟ ᱴᱚᱨᱚᱰᱟᱝ ᱥᱮ ᱢᱟᱨᱮ ᱴᱚᱨᱚᱰᱟᱝ ? ᱱᱟᱶᱟ ᱦᱟᱴᱟᱜ ᱥᱮ ᱢᱟᱨᱮ ᱦᱟᱴᱟᱜ ? ᱱᱚᱝᱠᱟ ᱠᱩᱯᱩᱞᱤᱜ ᱟᱠᱚ ᱾ ᱢᱟᱨᱮ ᱠᱚ ᱢᱮᱱᱠᱷᱟᱱ, ᱢᱟᱨᱮᱱ ᱠᱚᱜᱮᱠᱚ ᱛᱟᱦᱮᱱᱟ ᱟᱨ ᱱᱟᱶᱟ ᱠᱚ ᱢᱮᱱᱠᱷᱟᱱ ᱱᱟᱶᱟᱱ ᱠᱚᱠᱚ ᱵᱟᱪᱷᱟᱣ ᱠᱚᱣᱟ ᱾ ᱱᱟᱶᱟᱱ ᱠᱚᱠᱚ ᱵᱟᱪᱷᱟᱣ ᱞᱮᱱᱠᱷᱟᱱ, ᱯᱟᱱ ᱯᱩᱸᱜᱤ ᱠᱚ ᱪᱟᱯᱟᱞᱟ ᱾ ᱱᱟᱭᱠᱮ ᱵᱟᱵᱟ ᱵᱟᱨᱭᱟ ᱯᱟᱱ ᱟᱨ ᱯᱮᱭᱟ ᱯᱩᱸᱜᱤᱭ ᱵᱟᱹᱭ ᱟᱭ ᱾ ᱟᱫᱚ ᱱᱟᱭᱠᱮ ᱵᱟᱵᱟ ᱫᱚ ᱢᱟᱨᱮ ᱢᱟᱺᱡᱷᱤ ᱢᱤᱫᱴᱟᱝ ᱯᱟᱱ ᱟᱨ ᱢᱟᱨᱮ ᱯᱟᱨᱟᱱᱤᱠ ᱢᱤᱫᱴᱟᱝ ᱯᱟᱱ ᱮ ᱮᱢᱟᱭᱟ ᱾ ᱯᱮᱭᱟ ᱯᱩᱸᱜᱤ ᱫᱚ ᱡᱚᱜᱽᱢᱟᱺᱡᱷᱤ, ᱡᱚᱜᱽᱯᱟᱹᱨᱟᱹᱱᱤᱠ ᱟᱨ ᱜᱚᱰᱮᱛ ᱛᱮᱠᱚ ᱪᱟᱞ ᱟᱠᱚᱣᱟᱭ ᱾ ᱢᱟᱨᱮᱱ ᱠᱚ ᱚᱱᱟ ᱯᱟᱱ ᱯᱩᱸᱜᱤ ᱜᱮ ᱱᱟᱣᱟᱱ ᱠᱚᱠᱚ ᱪᱟᱞ ᱟᱠᱚᱣᱟ ᱾ ᱟᱫᱚ ᱠᱚ ᱜᱚᱰ ᱡᱚᱦᱟᱨᱟ ᱾ ᱦᱟᱴᱟᱜ ᱵᱚᱫᱚᱞ ᱫᱚ ᱡᱟᱦᱮᱨ ᱨᱮ ᱵᱚᱸᱜᱟ ᱨᱩᱢ ᱠᱟᱛᱮ ᱵᱚᱸᱜᱟ ᱠᱩᱞᱤ ᱠᱟᱛᱮ ᱠᱚ ᱵᱚᱫᱚᱞ ᱠᱚᱣᱟ ᱾ ᱱᱟᱣᱟᱱ ᱠᱚ ᱱᱟᱣᱟ ᱥᱮᱨᱢᱟ ᱠᱷᱚᱱ ᱠᱟᱹᱢᱤᱠᱚ ᱥᱟᱵᱽ ᱟ ᱾ ᱱᱟᱣᱟ ᱱᱟᱭᱠᱮ ᱫᱚ ᱵᱟᱦᱟ ᱵᱚᱸᱜᱟ ᱠᱷᱚᱱ ᱵᱚᱸᱜᱟᱭ ᱮᱛᱚᱦᱚᱵᱟ ᱾ ᱟᱹᱛᱩ ᱢᱚᱬᱮᱦᱚᱲ ᱢᱮᱱ ᱞᱮᱠᱷᱟᱱ ᱼ ᱢᱟᱺᱡᱷᱤ, ᱡᱚᱜᱽᱢᱟᱺᱡᱷᱤ, ᱯᱟᱹᱨᱟᱹᱱᱤᱠ, ᱡᱚᱜᱽᱯᱟᱹᱨᱟᱹᱱᱤᱠ ᱟᱨ ᱜᱚᱰᱮᱛ ᱾ ᱱᱟᱭᱠᱮ ᱫᱚ ᱢᱟᱯᱟᱹᱧᱡᱤ ᱵᱷᱤᱛᱨᱤ ᱨᱮᱫᱚ ᱵᱟᱠᱚ ᱥᱮᱞᱮᱫ ᱮᱭᱟ ᱾

  • ᱱᱟᱸᱜᱽᱞᱮ= ᱢᱟᱺᱡᱷᱤ
  • ᱡᱚᱛᱮ = ᱡᱚᱜᱽᱢᱟᱺᱡᱷᱤ
  • ᱟᱨᱟᱬ = ᱯᱟᱨᱟᱱᱤᱠ
  • ᱯᱟᱭᱬᱟ = ᱡᱚᱜᱽᱯᱟᱨᱟᱱᱤᱠ
  • ᱴᱚᱨᱚᱰᱟᱝ = ᱜᱚᱰᱮᱛ
  • ᱦᱟᱴᱟᱜ = ᱱᱟᱭᱠᱮ ᱾

ᱱᱚᱝᱠᱟ ᱟᱨ ᱱᱩᱠᱩ ᱟᱱᱛᱮ ᱠᱚ ᱢᱮᱛᱟᱜ ᱠᱟᱱᱟ ᱟᱹᱛᱩ ᱾ ᱢᱤᱫ ᱞᱮᱠᱟᱱ ᱟᱹᱛᱩ ᱨᱮ ᱛᱟᱦᱮᱱ ᱜᱮ ᱠᱚ ᱢᱮᱛᱟᱜᱼᱟ ᱟᱹᱛᱩ ᱾

ᱢᱟᱺᱡᱷᱤᱭᱟᱜ ᱡᱩᱜᱽᱛᱟᱹᱭ ᱟᱨ ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟᱺᱡᱷᱤ ᱫᱚ ᱟᱹᱛᱩ ᱨᱤᱱᱤᱡ ᱠᱤᱥᱟᱹᱬ ᱠᱟᱱᱟᱭ ᱾ ᱟᱡᱟᱜ ᱵᱟᱝ ᱵᱟᱰᱟᱭ ᱨᱮ ᱪᱮᱫ ᱦᱚᱸ ᱵᱟᱝ ᱠᱟᱹᱢᱤ ᱫᱟᱲᱮ ᱜᱚᱜᱼᱟ ᱾ ᱢᱤᱫ ᱢᱟᱺᱡᱷᱤ ᱦᱩᱭᱩᱜ ᱞᱟᱹᱜᱤᱫ ᱫᱚ ᱵᱟᱯᱞᱟ ᱠᱚᱜ ᱞᱟᱹᱠᱛᱤᱭᱟ ᱾ ᱥᱟᱶᱛᱟ ᱨᱮᱱᱟᱜ ᱟᱹᱨᱤᱪᱟᱹᱞᱤ, ᱨᱟᱭᱨᱤᱛ, ᱵᱤᱪᱟᱹᱨ ᱟᱪᱟᱨ, ᱵᱚᱸᱜᱟᱜ, ᱵᱳᱨᱳᱜ, ᱪᱷᱩᱛ, ᱪᱷᱟᱹᱴᱭᱟᱹᱨ, ᱵᱟᱯᱞᱟ, ᱵᱷᱟᱸᱰᱟᱱ, ᱵᱩᱜᱤ, ᱵᱟᱹᱲᱤᱡ, ᱠᱟᱛᱷᱟ ᱵᱟᱰᱟᱭ ᱠᱟᱜ ᱞᱟᱹᱠᱛᱤᱭᱟ ᱾ ᱚᱞ ᱯᱟᱲᱦᱟᱣ ᱠᱚᱜ ᱠᱷᱟᱱ ᱟᱹᱰᱤ ᱱᱟᱯᱟᱭᱟ ᱾

ᱯᱟᱨᱟᱱᱤᱠᱟᱜ ᱠᱟᱹᱢᱤ ᱟᱨ ᱡᱩᱜᱽᱛᱟᱹᱭ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟᱹᱡᱷᱤ ᱵᱟᱭ ᱛᱟᱦᱮᱱ ᱡᱚᱠᱷᱟᱜ ᱯᱟᱨᱟᱱᱤᱠ ᱜᱮ ᱢᱟᱹᱡᱷᱤᱭᱟᱜ ᱠᱟᱹᱢᱤᱭ ᱛᱚᱨᱟᱣᱟ ᱾ ᱡᱩᱠᱛᱟᱹᱭ ᱫᱚ ᱢᱟᱹᱡᱷᱤ ᱞᱮᱠᱟᱜᱮ ᱾

ᱡᱚᱜᱽᱢᱟᱺᱡᱷᱤᱭᱟᱜ ᱡᱩᱜᱽᱛᱟᱹᱭ ᱟᱨ ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟᱺᱡᱷᱤ ᱟᱨ ᱯᱟᱨᱟᱱᱤᱠ ᱞᱮᱠᱟᱜᱮ ᱡᱚᱜᱽᱢᱟᱺᱡᱷᱤ ᱦᱚᱸ ᱟᱹᱛᱩᱨᱮ ᱦᱚᱯᱚᱱ ᱠᱚ ᱞᱟᱹᱜᱤᱫ ᱮ ᱠᱟᱹᱢᱤᱭᱟ ᱾ ᱱᱩᱭᱫᱚ ᱮᱱᱮᱡ ᱥᱮᱨᱮᱧ ᱨᱤᱱᱤᱡ ᱠᱤᱥᱟᱹᱬ ᱠᱟᱱᱟᱭ ᱾ ᱫᱷᱚᱨᱚᱢ ᱟᱠᱷᱲᱟ ᱨᱮ ᱞᱟᱜᱽᱬᱮ ᱮᱱᱮᱡ ᱨᱤᱱᱤᱡ ᱟᱹᱭᱩᱨᱤᱭᱟᱹ ᱠᱟᱱᱟᱭ ᱾ ᱰᱟᱦᱟᱨ,ᱨᱤᱸᱡᱟᱹ,ᱞᱟᱜᱽᱬᱮ,ᱵᱟᱦᱟ,ᱢᱟᱜ ᱢᱚᱬᱮ,ᱫᱚᱝ,ᱯᱷᱤᱨᱠᱟᱹᱞ ᱮᱢᱟᱱ ᱮᱱᱮᱡ ᱠᱚᱨᱮ ᱡᱚᱜᱽᱢᱟᱺᱡᱷᱤ ᱜᱮ ᱠᱚᱲᱟ ᱠᱩᱲᱤ ᱠᱚᱭ ᱟᱹᱭᱩᱨ ᱠᱚᱣᱟ ᱾ ᱮᱴᱟᱜ ᱟᱹᱛᱩ ᱮᱱᱮᱡ ᱠᱚ ᱪᱟᱞᱟᱜ ᱨᱮᱦᱚᱸ ᱡᱚᱜᱽᱢᱟᱺᱡᱷᱤ ᱜᱮᱭ ᱟᱹᱭᱩᱨ ᱠᱚᱣᱟ ᱾ ᱛᱩᱢᱫᱟᱜ ᱴᱟᱢᱟᱠ ᱨᱮᱱᱟᱜ ᱡᱚᱜᱟᱣ ᱡᱚᱛᱚᱱ ᱦᱚᱸ ᱟᱡᱟᱜ ᱠᱟᱹᱢᱤ ᱠᱟᱱ ᱜᱮᱭᱟ ᱾

ᱡᱚᱜᱽᱯᱟᱨᱟᱱᱤᱠᱟᱜ ᱡᱩᱜᱽᱛᱟᱹᱭ ᱟᱨ ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱡᱚᱜᱽᱯᱟᱨᱟᱱᱤᱠ ᱫᱚ ᱡᱚᱜᱽᱢᱟᱺᱡᱷᱤ ᱵᱟᱝ ᱛᱟᱸᱦᱮᱱ ᱨᱮ ᱩᱱᱤᱭᱟᱜ ᱠᱟᱹᱢᱤᱭ ᱛᱚᱨᱟᱣᱟ ᱾ ᱩᱱᱤᱫᱚ ᱢᱤᱫ ᱵᱟᱯᱞᱟ ᱠᱚᱲᱟᱭ ᱦᱩᱭ ᱠᱚᱜᱼᱟ ᱾

ᱜᱚᱰᱮᱛᱟᱜ ᱡᱩᱜᱽᱛᱟᱹᱭ ᱟᱨ ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱹᱛᱩᱨᱮ ᱢᱤᱫ ᱜᱚᱰᱮᱛᱮ ᱛᱟᱦᱮᱱᱟ ᱾ ᱩᱱᱤᱭᱟᱜ ᱯᱚᱫᱽ ᱫᱚ ᱦᱟᱹᱱᱠᱩ ᱠᱚᱨᱮ ᱠᱷᱚᱱ ᱦᱩᱰᱤᱧ ᱨᱮᱦᱚᱸ ᱠᱟᱹᱢᱤ ᱫᱚ ᱵᱟᱹᱲᱛᱤ ᱜᱮ ᱛᱟᱭᱟ ᱾ ᱜᱚᱰᱮᱛ ᱫᱚ ᱢᱟᱺᱡᱷᱤ, ᱯᱟᱨᱟᱱᱤᱠ, ᱡᱚᱜᱽᱢᱟᱺᱡᱷᱤ, ᱡᱚᱜᱽᱯᱟᱨᱟᱱᱤᱠ ᱠᱚᱣᱟᱜ ᱟᱸᱫᱮ ᱛᱮ ᱠᱟᱹᱢᱤ ᱟᱭ ᱾ ᱟᱹᱛᱩ ᱨᱮ ᱵᱚᱸᱜᱟᱜ ᱵᱳᱨᱳᱜ, ᱯᱟᱨᱟᱵᱽ, ᱠᱩᱱᱟᱹᱢᱤ, ᱪᱷᱩᱛ ᱪᱷᱟᱹᱴᱭᱟᱨ, ᱜᱚᱡ ᱜᱩᱨ, ᱵᱟᱯᱞᱟ, ᱵᱷᱟᱸᱰᱟᱱ, ᱵᱤᱪᱟᱹᱨ, ᱫᱚᱨᱵᱟᱨ, ᱮᱢᱟᱱ ᱠᱚᱨᱮ ᱟᱹᱛᱩ ᱦᱚᱲᱠᱚ ᱚᱲᱟᱜ ᱫᱟᱬᱟ ᱠᱟᱛᱮ ᱫᱮᱞᱟ ᱟᱠᱚ ᱟᱭ ᱵᱟᱨᱛᱮ ᱟᱠᱚ ᱟᱭ ᱾ ᱜᱚᱰᱮᱛ ᱦᱚᱸ ᱵᱟᱯᱞᱟ ᱠᱚᱜ ᱞᱟᱹᱠᱛᱤ ᱟᱱᱟ ᱾

ᱟᱹᱛᱩᱨᱮ ᱱᱟᱭᱠᱮᱭᱟᱜ ᱡᱩᱜᱽᱛᱟᱹᱭ ᱟᱨ ᱠᱟᱹᱢᱤ

ᱱᱟᱭᱠᱮ ᱟᱹᱛᱩ ᱨᱮᱱᱟᱜ ᱱᱟᱭᱟᱜ ᱜᱮᱭ ᱠᱟᱹᱢᱤᱛᱮ ᱩᱱᱤ ᱫᱚ ᱱᱟᱭᱠᱮ ᱵᱚ ᱢᱮᱛᱟᱭᱟ ᱾ ᱱᱩᱭ ᱫᱚ ᱥᱟᱱᱟᱢ ᱠᱚᱣᱟᱜ ᱫᱩᱠ ᱥᱩᱠ ᱞᱟᱹᱜᱤᱫ ᱵᱚᱸᱜᱟ ᱵᱳᱨᱳ ᱠᱚᱭ ᱯᱮᱨᱮᱡ ᱩᱢᱟᱹᱬ ᱠᱚᱣᱟ ᱾ ᱢᱟᱜᱽ, ᱵᱟᱦᱟ, ᱮᱨᱚᱜ, ᱢᱟᱜ ᱢᱚᱬᱮ, ᱫᱟᱜ ᱥᱮᱸᱫᱽᱨᱟ, ᱟᱹᱥᱟᱹᱲᱭᱟᱹ, ᱦᱟᱹᱨᱭᱟᱹᱲ, ᱱᱟᱹᱶᱟᱹᱭ, ᱥᱚᱦᱨᱟᱭ, ᱤᱨᱥᱤᱫ, ᱵᱟᱯᱞᱟ ᱥᱤᱢ, ᱮᱨᱮ ᱮᱢᱟᱱ ᱵᱚᱸᱜᱟ ᱠᱚᱭ ᱵᱚᱸᱜᱟᱭᱟ ᱾

ᱟᱹᱛᱩᱨᱮ ᱢᱤᱫ ᱜᱩᱨᱩᱣᱟᱜ ᱞᱟᱹᱠᱛᱤ ᱟᱨ ᱠᱟᱹᱢᱤ

ᱟᱹᱛᱩᱨᱮ ᱢᱤᱫ ᱜᱩᱨᱩᱭ ᱛᱟᱦᱮᱸᱱᱟ ᱾ ᱩᱱᱤ ᱫᱚ ᱟᱴᱷᱣᱟᱨ ᱨᱮ ᱢᱟᱱᱛᱟᱨ, ᱡᱷᱟᱲ, ᱫᱟᱥᱟᱭ ᱮᱱᱮᱡ, ᱫᱟᱥᱟᱸᱭ ᱥᱮᱨᱮᱧ ᱮᱢᱟᱱ ᱠᱚᱭ ᱞᱟᱹᱭ ᱟᱠᱚᱣᱟ ᱾ ᱜᱩᱨᱩ ᱞᱮᱠᱟᱛᱮ ᱡᱚᱛᱚ ᱚᱠᱛᱚ ᱨᱮ ᱫᱤᱥᱟᱹᱭ ᱩᱫᱩᱜ ᱟᱠᱚᱣᱟ ᱾

ᱟᱹᱛᱩ ᱨᱮ ᱢᱤᱫ ᱚᱡᱷᱟᱣᱟᱜ ᱞᱟᱹᱠᱛᱤ ᱟᱨ ᱠᱟᱹᱢᱤ

ᱟᱹᱛᱩ ᱨᱮ ᱢᱤᱫ ᱦᱚᱲ ᱚᱡᱷᱟᱭ ᱛᱟᱦᱮᱱᱟ ᱾ ᱩᱱᱤ ᱫᱚ ᱟᱹᱛᱩ ᱵᱟᱹᱲᱤᱡ ᱞᱮᱱᱠᱷᱟᱱ, ᱢᱮᱱᱫᱚᱼᱥᱮᱛᱟᱠᱚ ᱠᱟᱨᱟᱡᱚᱜᱼᱟ, ᱛᱩᱭᱩ ᱠᱚ ᱠᱟᱨᱟᱡᱚᱜᱼᱟ, ᱫᱟᱨᱮ ᱰᱟᱹᱨᱠᱚ ᱟᱹᱣᱲᱤ ᱜᱮ ᱨᱟᱹᱯᱩᱫᱚᱜᱼᱟ, ᱠᱚᱠᱚᱨ ᱮᱢᱟᱱ ᱠᱚᱠᱚ ᱨᱟᱜ ᱵᱟᱲᱟ ᱞᱮᱠᱷᱟᱱ, ᱡᱟᱦᱮᱨ ᱨᱮ ᱛᱟᱦᱮᱱ ᱪᱮᱬᱮ ᱠᱚ ᱦᱚᱯᱚᱱ ᱠᱚ ᱜᱩᱡᱩᱜᱼᱟ, ᱧᱤᱫᱟᱹ ᱰᱟᱹᱝᱜᱽᱨᱤ ᱵᱷᱚᱠᱨᱟᱣ, ᱮᱢᱟᱱ ᱮᱨᱮ ᱠᱚ ᱯᱚᱨᱚᱠ ᱞᱮᱱᱠᱷᱟᱱ ᱟᱹᱛᱩ ᱵᱟᱹᱲᱤᱡ ᱟᱠᱟᱱᱟ ᱢᱮᱱᱛᱮ ᱵᱟᱰᱟᱭᱚᱜᱼᱟ ᱾ ᱟᱹᱛᱩ ᱨᱮ ᱦᱚᱲ ᱦᱚᱸ ᱟᱹᱣᱲᱤ ᱠᱚ ᱨᱩᱣᱟᱹᱜᱼᱟ, ᱰᱟᱹᱝᱜᱽᱨᱤ ᱢᱮᱨᱚᱢ ᱠᱚ ᱵᱮᱢᱟᱨᱚᱜᱼᱟ, ᱱᱚᱶᱟ ᱦᱚᱸ ᱵᱟᱹᱲᱤᱡ ᱮᱨᱮ ᱜᱮ ᱾ ᱚᱡᱷᱟ ᱫᱚ ᱱᱚᱶᱟ ᱠᱚᱨᱮᱱᱟᱜ ᱚᱡᱮ ᱠᱷᱟᱹᱲᱤ ᱠᱷᱚᱱᱴᱟ ᱠᱟᱛᱮ ᱵᱟᱰᱟᱭ ᱠᱟᱛᱮ ᱢᱟᱯᱟᱹᱧᱡᱤ ᱠᱚᱭ ᱞᱟᱹᱭ ᱟᱠᱚᱣᱟ ᱾ ᱚᱱᱟ ᱞᱮᱠᱟᱛᱮ ᱵᱚᱸᱜᱟ ᱵᱳᱨᱳ ᱟᱨ ᱨᱩᱣᱟᱹ ᱵᱟᱠᱷᱨᱟ ᱠᱷᱟᱱ ᱨᱟᱱ ᱠᱚᱭ ᱡᱚᱴᱟᱣ ᱟᱠᱚᱣᱟ ᱾ ᱚᱡᱷᱟᱣᱟᱜ ᱦᱚᱸ ᱴᱚᱞᱟᱨᱮ ᱟᱹᱰᱤ ᱦᱟᱢᱟᱞ ᱠᱟᱹᱢᱤ ᱛᱟᱭ ᱢᱮᱱᱟᱜᱼᱟ ᱾

ᱟᱹᱛᱩ ᱨᱮ ᱱᱟᱹᱯᱤᱛᱟᱜ ᱞᱟᱹᱠᱛᱤ

ᱟᱹᱛᱩᱨᱮ ᱱᱟᱹᱯᱤᱛᱮ ᱛᱟᱦᱮᱸᱱᱟ ᱾ ᱩᱱᱤᱫᱚ ᱜᱚᱡ ᱜᱩᱨ ᱡᱚᱠᱷᱟᱜ, ᱛᱮᱞᱢᱟᱦᱟᱱ, ᱡᱤᱞᱤᱧ ᱰᱟᱦᱟᱨ ᱠᱚᱨᱮ ᱦᱚᱭᱚ ᱢᱩᱰᱨᱟᱹ ᱠᱚᱭ ᱠᱟᱹᱢᱤᱭᱟ ᱾ ᱛᱩᱯᱩᱱ ᱜᱷᱟᱴ ᱪᱟᱞᱟᱜ ᱡᱚᱠᱷᱟᱜ ᱱᱟᱹᱯᱤᱛ ᱜᱮ ᱠᱟᱲᱮ ᱥᱩᱱᱩᱢ ᱢᱚᱬᱮ ᱦᱚᱲ ᱞᱟᱹᱜᱤᱫᱼᱮ ᱥᱟᱵᱽ ᱟ ᱟᱨ ᱜᱷᱟᱴ ᱛᱮ ᱛᱩᱯᱩᱱ ᱮ ᱟᱹᱭᱩᱨ ᱠᱚᱣᱟ ᱾

ᱟᱹᱛᱩᱨᱮ ᱫᱷᱟᱺᱭ ᱵᱩᱰᱷᱤ

ᱟᱹᱛᱩᱨᱮ ᱢᱤᱫ ᱫᱷᱟᱺᱭ ᱵᱩᱰᱷᱤ ᱛᱟᱦᱮᱱᱟ ᱾ ᱩᱱᱤ ᱫᱚ ᱜᱤᱫᱽᱨᱟᱹ ᱡᱟᱱᱟᱢ ᱡᱚᱠᱷᱟᱜ ᱪᱷᱩᱛ ᱮ ᱯᱷᱮᱲᱟᱣᱟ ᱾ ᱦᱚᱭᱚ ᱨᱩᱣᱟᱹᱲ/ᱪᱷᱟᱹᱴᱭᱟᱹᱨ/ᱯᱩᱨ ᱠᱩᱴᱟᱹᱢ ᱡᱚᱠᱷᱟᱜ ᱱᱟᱣᱟ ᱜᱤᱫᱽᱨᱟᱹᱣᱟᱜ ᱧᱩᱛᱩᱢ ᱫᱤᱥᱚᱢ ᱦᱚᱲ ᱴᱷᱮᱱᱮ ᱧᱩᱢ ᱪᱷᱟᱹᱴᱭᱟᱹᱨ ᱟᱭ ᱾