ᱠᱚᱞᱮᱱᱫᱽᱨᱚᱱᱟᱛᱷ ᱢᱟᱱᱰᱤ

ᱠᱚᱞᱮᱱᱫᱽᱨᱚᱱᱟᱛᱷ ᱢᱟᱱᱰᱤ
ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ  ᱟᱨ  ᱡᱟᱱᱟᱢ ᱴᱷᱟᱶ	ᱡᱩᱞᱟᱭ ᱔, ᱑᱙᱕᱓(1953-07-04) ᱵᱷᱟᱝᱜᱟᱴᱤᱭᱟ, ᱵᱟᱱᱫᱳᱣᱟᱱ, ᱯᱩᱨᱩᱞᱤᱭᱟᱹ, ᱯᱚᱪᱷᱤᱢ ᱵᱟᱝᱞᱟ
ᱫᱤᱥᱚᱢᱤᱭᱟᱹ	ᱥᱤᱧᱚᱛᱤᱭᱟᱹ
ᱠᱟᱹᱢᱤ	ᱨᱮᱞ ᱵᱤᱵᱷᱟᱜᱽ ᱨᱮᱱ ᱠᱟᱹᱢᱤᱭᱟᱹ
ᱧᱩᱢᱱᱟᱢ	ᱚᱱᱚᱞᱤᱭᱟᱹ, ᱥᱟᱥᱟᱯᱲᱟᱣ
ᱧᱩᱢᱦᱟᱞᱟᱝ ᱠᱟᱹᱢᱤ	"ᱟᱹᱨᱥᱤ", "ᱥᱚᱢᱟᱡᱽ ᱚᱠᱟᱢ ᱤᱫᱤᱭᱤᱧᱟ", "ᱢᱤᱫ ᱛᱷᱚᱯᱮ ᱚᱱᱚᱬᱦᱮᱸ"

ᱚᱱᱚᱞᱤᱭᱟᱹ ᱟᱨ ᱤᱨᱟᱹᱞ ᱜᱮᱞ ᱫᱚᱥᱚᱠ ᱨᱮᱭᱟᱜ ᱥᱟᱶᱦᱮᱫ ᱯᱟᱛᱷᱟᱢ ᱥᱟᱥᱟᱯᱲᱟᱣ ᱨᱮ ᱪᱮᱜᱷᱟᱣᱱᱟ ᱨᱮᱱ ᱦᱚᱨ ᱩᱫᱩᱜᱤᱡ ᱠᱚᱞᱮᱱᱫᱽᱨᱟᱱᱟᱛᱷ ᱢᱟᱱᱰᱤ ᱟᱜ ᱠᱟᱱᱟᱢ ᱫᱚ ᱑᱙᱕᱓ ᱥᱮᱨᱢᱟ ᱨᱮᱭᱟᱜ ᱔ ᱡᱩᱞᱟᱭ, ᱯᱚᱪᱷᱤᱢ ᱵᱟᱝᱞᱟ ᱨᱮᱭᱟᱜ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱨᱮ ᱢᱮᱱᱟᱜ ᱵᱟᱱᱫᱳᱣᱟᱱ ᱥᱩᱨ ᱥᱤᱨᱤᱥᱜᱳᱰᱟ ᱢᱳᱣᱡᱟ ᱨᱮᱭᱟᱜ ᱵᱷᱟᱝᱜᱟᱴᱤᱭᱟ ᱴᱚᱞᱟ ᱨᱮ᱾ ᱟᱯᱟᱛ ᱧᱩᱛᱩᱢ ᱫᱚ ᱢᱚᱱᱳᱦᱚᱨ ᱢᱟᱱᱰᱤ ᱟᱨ ᱟᱭᱳ ᱫᱚ ᱯᱟᱱᱥᱩᱨᱤ ᱢᱟᱱᱰᱤ᱾

ᱥᱮᱪᱮᱫ

ᱠᱚᱞᱮᱱᱫᱽᱨᱚᱱᱟᱛᱷ ᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱵᱷᱟᱝᱜᱟᱴᱤᱭᱟ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱ ᱮᱦᱚᱵ ᱞᱮᱱ ᱛᱟᱭᱟ᱾ ᱚᱱᱟ ᱛᱟᱭᱚᱢ ᱥᱤᱨᱤᱥᱜᱳᱰᱟ ᱡᱩᱱᱤᱭᱟᱨ ᱵᱮᱥᱤᱠ ᱥᱠᱩᱞ ᱠᱷᱚᱱ ᱯᱩᱱᱟᱜ ᱪᱟᱱᱟᱪ ᱯᱟᱥ ᱠᱟᱛᱮ ᱵᱚᱨᱟᱵᱟᱡᱟᱨ ᱨᱮᱭᱟᱜ ᱵᱚᱨᱟᱵᱷᱩᱢ ᱦᱟᱭ ᱥᱠᱩᱞ ᱨᱮᱭ ᱵᱷᱩᱨᱛᱤ ᱞᱮᱱᱟ᱾ ᱱᱚᱸᱰᱮ ᱠᱷᱚᱱ ᱜᱮ ᱒᱙᱗᱕ ᱥᱮᱨᱢᱟ ᱨᱮ ᱪᱮᱛᱟᱱ ᱛᱟᱞᱟᱢᱟ ᱮ ᱯᱟᱥ ᱞᱮᱫᱟ᱾ ᱑᱙᱗᱙ ᱥᱮᱨᱢᱟ ᱨᱮ ᱵᱤᱥᱱᱩᱯᱩᱨ ᱨᱟᱢᱟᱱᱚᱱᱫᱚ ᱠᱚᱞᱮᱡᱽ ᱠᱷᱚᱱ ᱵᱤ.ᱮᱥ.ᱥᱤ ᱮ ᱯᱟᱥ ᱞᱮᱫᱟ᱾

ᱠᱟᱹᱢᱤ

᱑᱙᱘᱐ ᱥᱮᱨᱢᱟ ᱨᱮ ᱠᱚᱞᱮᱱᱫᱽᱨᱚᱱᱟᱛᱷ ᱢᱟᱱᱰᱤ ᱫᱚ ᱵᱷᱟᱨᱚᱛᱤᱭᱚ ᱨᱮᱞ ᱨᱮᱭᱟᱜ ᱮᱠᱟᱣᱩᱱᱴᱥ ᱵᱤᱵᱷᱟᱜᱽ ᱨᱮ ᱠᱟᱹᱢᱤᱭ ᱮᱦᱚᱵ ᱞᱮᱫᱟ᱾ ᱫᱷᱟᱱᱵᱟᱫᱽ ᱨᱮ ᱯᱩᱭᱞᱩ ᱟᱡᱟᱜ ᱠᱟᱹᱢᱤ ᱴᱷᱟᱶ ᱫᱚ ᱛᱟᱦᱮᱸ ᱠᱟᱱᱟ᱾ ᱑᱙᱘᱑ ᱥᱮᱨᱢᱟ ᱨᱮ ᱚᱸᱰᱮ ᱠᱷᱚᱱ ᱩᱪᱟᱹᱲ ᱠᱟᱛᱮ ᱟᱫᱽᱨᱟ ᱛᱮᱭ ᱦᱮᱡ ᱮᱱᱟ᱾

ᱥᱟᱶᱦᱮᱫ ᱪᱟᱨᱪᱟ

ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ ᱟᱜ ᱟᱹᱭᱩᱨ ᱛᱮ ᱯᱩᱨᱩᱞᱤᱭᱟᱹ ᱨᱮ ᱡᱟᱦᱟᱸ ᱥᱟᱶᱦᱮᱫ ᱟᱸᱫᱳᱲ ᱮᱦᱚᱵ ᱞᱮᱫᱟ᱾ ᱚᱱᱟ ᱟᱸᱫᱳᱲ ᱠᱷᱚᱱ ᱜᱮ ᱥᱟᱱᱟᱛᱲᱤ ᱥᱟᱶᱦᱮᱫ ᱨᱮ ᱠᱚᱞᱮᱱᱫᱽᱨᱚᱱᱟᱛᱷ ᱢᱟᱱᱰᱤ ᱫᱚᱭ ᱳᱯᱷᱮᱞ ᱞᱮᱱᱟ᱾ ᱟᱡᱟᱜ ᱯᱩᱭᱞᱩ ᱠᱟᱹᱦᱱᱤ "ᱴᱟᱠᱟ ᱠᱷᱚᱱ ᱫᱚ ᱫᱩᱞᱟᱹᱲ ᱜᱮ ᱢᱟᱨᱟᱝ ᱟ" ᱫᱚ ᱥᱩᱥᱟᱹᱨ ᱰᱟᱦᱟᱨ ᱯᱟᱛᱷᱟᱢ ᱨᱮ ᱪᱷᱟᱯᱟ ᱥᱚᱫᱚᱨ ᱞᱮᱱᱟ᱾ ᱛᱟᱭᱚᱢ ᱛᱮ ᱟᱡᱟᱜ ᱟᱭᱢᱟ ᱠᱟᱹᱦᱱᱤ, ᱚᱱᱚᱬᱦᱮᱸ, ᱚᱱᱚᱞ, ᱜᱟᱭᱟᱱ ᱱᱟᱱᱟᱼᱦᱩᱱᱟᱹᱨ ᱯᱟᱛᱷᱟᱢ ᱠᱚᱨᱮ ᱪᱷᱟᱯᱟ ᱟᱠᱟᱱᱟ᱾ ᱟᱡᱟᱜ ᱚᱞ ᱛᱟᱞᱟ ᱛᱮ ᱥᱟᱶᱛᱟ ᱨᱮᱭᱟᱜ ᱪᱤᱛᱟᱹᱨ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱯᱷᱚᱴᱮᱞ ᱨᱟᱠᱟᱵ ᱟᱠᱟᱱᱟ᱾ ᱥᱟᱶᱛᱟ ᱨᱮ ᱮᱴᱮᱫ ᱥᱤᱢᱟᱹ ᱯᱟᱨᱚᱢ ᱠᱟᱛᱮ ᱢᱟᱱᱣᱟ ᱢᱚᱱᱮ ᱨᱮ ᱪᱮᱜᱷᱟᱣᱱᱟ ᱨᱮᱭᱟᱜ ᱱᱮᱦᱚᱸᱨ ᱮ ᱡᱟᱱᱟᱢ ᱚᱪᱚ ᱞᱮᱫᱟ᱾ ᱩᱱᱤ ᱫᱚ ᱩᱛᱷᱱᱟᱹᱣ ᱨᱮᱭᱟᱜ ᱠᱟᱛᱷᱟ ᱜᱮᱭ ᱞᱟᱹᱭ ᱥᱚᱫᱚᱨ ᱟᱠᱟᱫᱟ᱾ ᱵᱟᱝᱞᱟ ᱯᱟᱹᱨᱥᱤ ᱛᱮᱦᱚᱸᱭ ᱚᱞᱮᱫ ᱛᱟᱦᱮᱸᱱᱟ, ᱟᱡᱟᱜ ᱟᱭᱢᱟ ᱚᱱᱚᱞ ᱵᱟᱝᱞᱟ ᱯᱟᱛᱷᱟᱢ ᱠᱚᱨᱮ ᱦᱚᱸ ᱪᱷᱟᱯᱟ ᱟᱠᱱᱟ᱾

ᱚᱞ ᱯᱚᱛᱚᱵ

• "ᱟᱹᱨᱥᱤ" - ᱑᱙᱙᱔ (ᱛᱩᱢᱟᱹᱞ ᱠᱟᱹᱦᱱᱤ)᱾
• "ᱥᱚᱢᱟᱡᱽ ᱚᱠᱟᱢ ᱤᱫᱤᱭᱤᱧᱟ" - ᱒᱐᱐᱒ (ᱜᱟᱭᱟᱱ)᱾
• "ᱢᱤᱫ ᱛᱷᱚᱯᱮ ᱚᱱᱚᱬᱦᱮᱸ - ᱒᱐᱐᱒ (ᱚᱱᱚᱬᱦᱮᱸ)᱾

ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮ

᱑᱙᱘᱑ ᱥᱮᱨᱢᱟ ᱠᱷᱚᱱ ᱥᱤᱞᱤ ᱧᱩᱛᱩᱢᱟᱱ ᱢᱤᱫ ᱵᱟᱨ ᱪᱟᱸᱫᱚᱠᱤᱭᱟᱹ ᱥᱟᱶᱦᱮᱫ ᱯᱟᱛᱷᱟᱢ ᱨᱮᱱ ᱯᱟᱨᱥᱟᱞᱤᱡ ᱟᱨ ᱥᱟᱥᱟᱯᱲᱟᱣᱤᱡ ᱮ ᱛᱟᱦᱮᱸ ᱠᱟᱱᱟ᱾ ᱛᱟᱭᱚᱢ ᱫᱟᱨᱟᱢ ᱱᱚᱣᱟ ᱫᱚ ᱪᱟᱸᱫᱚᱠᱤᱭᱟᱹ ᱯᱟᱛᱷᱟᱢ ᱦᱩᱭ ᱞᱮᱱᱟ᱾ ᱥᱟᱱᱛᱟᱲᱤ ᱯᱟᱛᱷᱟᱢ ᱞᱮᱛᱟᱲ ᱤᱫᱤᱭ ᱨᱮ "ᱥᱤᱞᱤ" ᱨᱮᱭᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ᱾ ᱥᱟᱶᱦᱮᱫ ᱯᱟᱛᱷᱟᱢ ᱥᱟᱡᱟᱣ ᱥᱟᱯᱲᱟᱣ ᱨᱮ, ᱚᱞ ᱵᱟᱪᱷᱟᱣ ᱨᱮ ᱠᱚᱞᱮᱱᱫᱽᱨᱚᱱᱟᱛᱷ ᱢᱟᱱᱰᱤ ᱟᱡᱟᱜ ᱯᱟᱹᱨᱩᱠᱷᱤᱭᱟᱹ ᱮ ᱩᱫᱩᱜ ᱥᱚᱫᱚᱨ ᱟᱠᱟᱫᱟ᱾

ᱢᱟᱹᱱ

ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱮᱱᱮᱢ ᱠᱷᱟᱹᱛᱤᱨ ᱟᱭᱢᱟ ᱢᱟᱹᱱ ᱟᱨ ᱥᱤᱨᱯᱷᱟᱹ ᱮ ᱦᱟᱢᱮᱴ ᱟᱠᱟᱫᱟ᱾

• ᱑᱙᱙᱒ ᱥᱮᱨᱢᱟ ᱨᱮ ᱵᱷᱟᱨᱚᱛᱤᱭᱚ ᱫᱚᱞᱤᱛ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱯᱟᱦᱴᱟ ᱠᱷᱚᱱ 'ᱟᱢᱵᱮᱫᱽᱠᱚᱨ ᱯᱷᱮᱞᱚᱥᱤᱯ'᱾
• ᱑᱙᱙᱓ ᱥᱮᱨᱢᱟ ᱨᱮ "ᱦᱚᱲ ᱟᱲᱟᱝ" ᱯᱟᱛᱷᱟᱢ ᱠᱷᱚᱱ ᱥᱟᱨᱦᱟᱣ ᱟᱨ ᱥᱤᱨᱯᱷᱟᱹ ᱾

ᱟᱨᱦᱚᱸ ᱟᱭᱢᱟ ᱢᱟᱹᱱ ᱟᱨ ᱥᱤᱨᱯᱷᱟᱹ ᱮ ᱧᱟᱢ ᱟᱠᱟᱫᱟ᱾