ᱡᱤᱞᱤᱧ ᱰᱟᱦᱟᱨ

ᱡᱤᱞᱤᱧ ᱰᱟᱦᱟᱨ

ᱜᱩᱨ ᱟᱠᱟᱱ ᱦᱚᱲᱟᱜ ᱡᱟᱝ ᱵᱟᱦᱟ ᱛᱩᱯᱩ ᱱᱟᱺᱭ ᱜᱷᱟᱴ ᱤᱫᱤ ᱠᱟᱛᱮ ᱛᱩᱯᱩᱭ ᱜᱮ ᱡᱤᱞᱤᱧ ᱰᱟᱦᱟᱨ ᱫᱚᱵᱚᱱ ᱢᱮᱱᱟ ᱾

ᱛᱷᱩᱞᱤ ᱨᱚᱜ

ᱡᱤᱞᱤᱧ ᱰᱟᱦᱟᱨ ᱨᱮᱱᱟᱜ ᱠᱟᱹᱢᱤ ᱥᱟᱹᱜᱩᱱ ᱫᱤᱱ ᱫᱚ ᱢᱟᱜᱽ ᱟᱨ ᱵᱟᱦᱟ ᱵᱚᱸᱜᱟ ᱨᱮ ᱾ ᱱᱮᱰᱟ ᱟᱠᱟᱱ ᱫᱤᱱ ᱨᱮ ᱟᱹᱛᱩ ᱢᱚᱬᱮ ᱦᱚᱲ ᱫᱩᱠ ᱟᱠᱟᱱ ᱦᱟᱹᱭᱟᱹᱛ ᱟᱠᱟᱱ ᱦᱚᱲ ᱚᱲᱟᱜ ᱨᱮ ᱡᱟᱣᱨᱟ ᱠᱟᱛᱮ ᱛᱷᱩᱞᱤ ᱠᱚ ᱨᱚᱜᱟ ᱾ ᱯᱮᱲᱟ ᱯᱟᱹᱦᱬᱟᱹ ᱠᱚ ᱦᱮᱡ ᱥᱮᱴᱮᱨ ᱞᱮᱱ ᱠᱷᱟᱱ ᱥᱟᱡᱟᱣ ᱥᱟᱯᱲᱟᱣ ᱠᱟᱛᱮ ᱱᱟᱶᱟ ᱦᱟᱴᱟᱜ ᱨᱮ ᱜᱩᱨ ᱟᱠᱟᱱ ᱦᱚᱲ ᱟᱨ ᱢᱟᱨᱟᱝ ᱵᱳᱨᱳ ᱠᱚ ᱨᱩᱢ ᱰᱟᱠᱟᱣ ᱠᱤᱱᱟ ᱾ ᱵᱩᱜᱤ ᱵᱟᱹᱲᱤᱡ ᱠᱚ ᱠᱩᱞᱤ ᱡᱤᱸᱜᱟᱹᱥ ᱠᱤᱱᱟ ᱾ ᱟᱨ ᱚᱠᱚᱭᱟᱜ ᱛᱟᱨᱮᱱ ᱛᱮᱭ ᱪᱟᱞᱟᱜᱼᱟ, ᱚᱱᱟ ᱠᱚ ᱠᱩᱞᱤ ᱮᱭᱟ ᱟᱨ ᱫᱟᱱ ᱫᱩᱱᱟᱹ ᱠᱚ ᱮᱢᱟᱭ ᱛᱮᱠᱚ ᱵᱤᱫᱟᱹᱭ ᱠᱟᱹᱠᱤᱱᱟ ᱾

ᱡᱤᱞᱤᱧ ᱰᱟᱦᱟᱨ ᱥᱮᱱᱚᱜ

ᱡᱤᱞᱤᱧ ᱰᱟᱦᱟᱨ ᱦᱚᱨ ᱡᱤᱞᱤᱧ ᱦᱚᱛᱮᱛᱮ ᱦᱚᱨ ᱜᱤᱛᱤᱡ, ᱵᱤᱨ ᱜᱤᱛᱤᱡ, ᱞᱟᱡ ᱦᱟᱹᱥᱩ, ᱵᱚᱦᱚᱜ ᱦᱟᱹᱥᱩ, ᱟᱞᱚ ᱦᱩᱭᱩᱜ ᱢᱟ ᱢᱮᱱᱛᱮ ᱵᱟᱠᱷᱮᱬ ᱠᱟᱛᱮ ᱢᱤᱫ ᱯᱩᱸᱰ ᱥᱤᱢ ᱠᱚ ᱵᱚᱸᱜᱟ ᱮᱭᱟ ᱾ ᱩᱱᱤ ᱥᱤᱢ ᱟᱜ ᱤᱞ ᱫᱚᱠᱚ ᱫᱚᱦᱚ ᱠᱟᱜᱼᱟ ᱾ ᱫᱟᱠᱟ ᱩᱛᱩ ᱠᱚ ᱤᱥᱤᱱ ᱮᱱ ᱠᱷᱟᱱ ᱜᱤᱰᱤᱛᱟᱨᱟ ᱫᱟᱠᱟ ᱠᱚ ᱵᱚᱸᱜᱟᱭᱟ ᱾ ᱟᱨ ᱡᱚᱛᱚ ᱯᱮᱲᱟ ᱦᱚᱲ ᱫᱟᱠᱟ ᱩᱛᱩ ᱠᱚ ᱡᱚᱢ ᱥᱟᱹᱛ ᱞᱮᱠᱷᱟᱱ ᱱᱟᱺᱭ ᱛᱮ ᱪᱟᱞᱟᱜ ᱠᱚ ᱥᱟᱯᱲᱟᱣᱜᱼᱟ ᱾ ᱛᱟᱵᱮᱱ, ᱜᱩᱲ, ᱢᱤᱴᱷᱟᱹᱭ, ᱥᱤᱸᱫᱩᱨ, ᱯᱷᱩᱴᱤᱭᱟᱹᱠᱟᱹᱣᱰᱤ (ᱠᱷᱩᱪᱨᱟᱹ ᱯᱩᱭᱥᱟ.) ᱪᱟᱣᱞᱮ, ᱥᱩᱱᱩᱢ, ᱵᱩᱞᱩᱝ, ᱥᱟᱥᱟᱝ ᱮᱢᱟᱱ ᱢᱤᱫᱴᱟᱹᱝ ᱥᱟᱠᱟᱢ ᱛᱷᱩᱞᱤ ᱨᱮᱠᱚ ᱥᱟᱸᱵᱟᱣ ᱯᱮᱨᱮᱡᱟ ᱾ ᱟᱫᱚ ᱛᱚᱯᱟ ᱟᱠᱟᱫ ᱡᱟᱝ ᱵᱟᱦᱟ ᱟᱹᱛᱩ ᱞᱟᱹᱜᱤᱫ ᱟᱹᱛᱩ ᱨᱤᱱ ᱢᱚᱬᱮ ᱦᱚᱲ ᱟᱛᱮ ᱠᱚ ᱪᱟᱞᱟᱜᱼᱟ ᱾ ᱡᱟᱝ ᱵᱟᱦᱟ ᱠᱚ ᱩᱴᱠᱟᱹᱣ ᱚᱰᱚᱠ ᱠᱮᱫ ᱠᱷᱟᱱ ᱤᱫᱤ ᱛᱟᱨᱟ ᱞᱮᱫ ᱥᱟᱛᱮ ᱨᱮᱱᱟᱜ ᱵᱩᱥᱩᱵ ᱛᱚᱯᱟ ᱴᱷᱟᱶ ᱨᱮᱠᱚ ᱫᱷᱩᱲᱥᱟᱹᱣ ᱡᱮᱨᱮᱫ ᱚᱴᱚ ᱠᱟᱜᱼᱟ ᱾ ᱟᱫᱚ ᱢᱤᱫ ᱢᱚᱦᱰᱟ ᱫᱚᱼᱵᱟᱹᱴᱤ ᱪᱟᱸᱜᱟ ᱰᱟᱦᱟᱨ ᱛᱮᱠᱚ ᱩᱰᱩᱠ ᱦᱟᱹᱡᱩᱜᱼᱟ ᱾ ᱚᱱᱟ ᱪᱟᱸᱜᱟ ᱰᱟᱦᱟᱨ ᱨᱮᱜᱮ ᱯᱮᱭᱟ ᱛᱤᱨᱤᱞ ᱦᱟᱯᱟ ᱛᱮ ᱠᱩᱨᱩᱥ ᱠᱷᱩᱱᱴᱤ ᱠᱚ ᱵᱮᱱᱟᱣᱟ ᱾ ᱟᱨ ᱚᱱᱟ ᱪᱮᱛᱟᱱ ᱨᱮᱫᱚ ᱱᱟᱶᱟ ᱪᱩᱠᱟᱹᱜ ᱠᱚ ᱫᱚᱲᱚᱢᱟ ᱟᱨ ᱛᱷᱩᱞᱤ ᱯᱮ ᱢᱚᱠᱟ ᱠᱤᱪᱨᱤᱫ ᱠᱚ ᱫᱚᱦᱚᱭᱟ ᱟᱫᱚ ᱚᱲᱟᱜ ᱨᱤᱱ ᱠᱩᱲᱤ ᱦᱚᱯᱚᱱ ᱠᱚ ᱥᱮᱱ ᱠᱟᱛᱮ ᱯᱷᱩᱲᱩᱜ ᱛᱮ ᱢᱟᱬᱟᱝ ᱫᱚ ᱛᱟᱝ ᱦᱟᱺᱰᱤ ᱠᱚ ᱫᱩᱞᱟ, ᱫᱚᱥᱟᱨ ᱫᱚ ᱥᱟᱥᱟᱝ ᱫᱟᱜ ᱠᱚ ᱫᱩᱞᱟ, ᱟᱨ ᱛᱮᱥᱟᱨ ᱫᱚ ᱵᱮᱨᱮᱞ ᱫᱟᱜ ᱠᱚ ᱫᱩᱞᱟ ᱾ ᱟᱨ ᱥᱟᱥᱟᱵᱤᱡ ᱫᱚ ᱨᱤᱞ ᱟᱠᱟᱭ ᱛᱟᱦᱮᱸᱱᱟ ᱾ ᱱᱚᱝᱠᱟ ᱡᱚᱛᱚ ᱚᱲᱟᱜ ᱦᱚᱲ ᱠᱚ ᱫᱩᱞ ᱯᱩᱨᱟᱹᱣ ᱥᱮ ᱟᱹᱨᱩᱵ ᱯᱩᱨᱟᱹᱣ ᱞᱮᱠᱷᱟᱱ ᱠᱚ ᱡᱟᱝ ᱵᱟᱦᱟ ᱜᱚᱜᱚᱜᱤᱡ ᱫᱚ ᱢᱤᱫ ᱛᱤᱨᱤᱞ ᱦᱟᱯᱟ ᱥᱟᱵ ᱠᱟᱛᱮ ᱚᱱᱟ ᱠᱩᱨᱩᱥ ᱠᱷᱩᱱᱴᱤ ᱮᱛᱚᱢ ᱠᱚᱧᱮ ᱛᱮ ᱯᱮ ᱫᱷᱟᱣ ᱟᱹᱛᱩᱨ ᱢᱩᱪᱟᱹᱫ ᱠᱟᱛᱮ ᱚᱱᱟ ᱱᱟᱶᱟ ᱪᱩᱠᱟᱹᱜ ᱫᱚᱭ ᱫᱟᱞ ᱨᱟᱹᱯᱩᱫᱟ ᱾ ᱡᱟᱝ ᱵᱟᱦᱟ ᱫᱚ ᱚᱱᱟ ᱥᱟᱥᱟᱝ ᱜᱮᱸᱫᱽᱨᱮᱡ ᱨᱮᱠᱚ ᱜᱷᱮᱸᱴᱟ ᱾ ᱟᱫᱚ ᱜᱚᱜᱚᱜᱤᱡ ᱛᱟᱨᱮᱱ ᱨᱮᱠᱚ ᱜᱚᱜ ᱟᱭᱟ ᱾ ᱯᱮᱫᱷᱟᱣ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱠᱟᱛᱮ ᱨᱟᱹᱥᱠᱟᱹ ᱛᱮ ᱥᱟᱠᱣᱟ, ᱛᱨᱤᱭᱟᱹᱣ ᱚᱨᱚᱝ ᱟᱛᱮ ᱠᱚ ᱥᱮᱱᱚᱜᱼᱟ ᱾ ᱛᱩᱯᱩᱱᱟᱺᱭ ᱜᱷᱟᱴ ᱠᱚ ᱥᱮᱴᱮᱨ ᱠᱮᱫ ᱠᱷᱟᱱ ᱯᱩᱭᱞᱩ ᱛᱮ ᱢᱚᱬᱮ ᱥᱤᱠᱟᱹ ᱠᱟᱹᱣᱰᱤ ᱛᱮ ᱜᱷᱟᱴ ᱠᱚ ᱠᱤᱨᱤᱧᱟ ᱾ ᱟᱨ ᱚᱱᱟ ᱜᱷᱟᱴ ᱨᱮᱠᱚ ᱦᱚᱭᱚ ᱢᱩᱸᱰᱨᱟᱹᱜᱼᱟ ᱾

ᱜᱷᱟᱴ ᱟᱬᱜᱚᱱ

ᱤᱱᱟᱹ ᱛᱟᱭᱚᱢ ᱮᱴᱟᱜ ᱠᱤᱪᱨᱤᱡ ᱵᱚᱫᱚᱞ ᱠᱟᱛᱮ ᱛᱩᱯᱩ ᱜᱷᱟᱴ ᱛᱮᱠᱚ ᱟᱬᱜᱚᱱᱟ ᱾ ᱵᱮᱲᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱯᱮ ᱫᱷᱟᱣ ᱠᱚ ᱰᱩᱵᱩᱡᱚᱜᱼᱟ ᱾ ᱢᱩᱪᱟᱹᱫ ᱨᱮᱫᱚ ᱡᱟᱝ ᱵᱟᱦᱟ ᱛᱷᱩᱞᱤ ᱚᱨ ᱚᱲᱮᱡ ᱠᱟᱛᱮ ᱠᱚ ᱵᱚᱦᱮᱞ ᱜᱚᱫ ᱠᱟᱜᱼᱟ ᱾ ᱟᱨ ᱪᱟᱞᱟᱣ ᱟᱠᱟᱱ ᱥᱟᱶᱛᱮᱱ ᱠᱚᱫᱚ ᱯᱮᱫᱷᱟᱣ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱠᱚ ᱟᱲᱟᱝᱼᱟ ᱾ ᱨᱟᱠᱟᱵ ᱠᱟᱛᱮ ᱫᱟᱜ ᱥᱩᱨ ᱨᱮ ᱥᱟᱨᱡᱚᱢ ᱰᱟᱹᱨ ᱡᱟᱦᱮᱨ ᱫᱟᱨᱮ ᱯᱤᱸᱰ ᱠᱚ ᱵᱮᱱᱟᱣᱟ ᱾ ᱟᱨ ᱚᱸᱰᱮ ᱟᱫᱷᱟᱱ ᱫᱚ ᱥᱟᱠᱟᱢ ᱠᱚ ᱫᱚᱦᱚᱭᱟ ᱾ ᱚᱱᱟ ᱛᱟᱭᱚᱢ ᱯᱮᱭᱟ ᱥᱟᱨᱡᱚᱢ ᱥᱟᱠᱟᱢ ᱪᱚᱠᱷᱨᱟᱫ ᱨᱮ ᱛᱟᱵᱮᱱ, ᱜᱩᱲ, ᱢᱤᱴᱷᱟᱹᱭ ᱠᱚ ᱵᱚᱸᱜᱟᱭᱟ ᱾ ᱩᱱ ᱡᱚᱦᱚᱜ ᱠᱚ ᱵᱟᱠᱷᱮᱬᱟ -- " ᱡᱚᱦᱟᱨ ᱛᱚᱵᱮ ᱟᱢ ᱜᱚᱡ ᱟᱠᱟᱱ ᱜᱩᱨ ᱟᱠᱟᱱᱤᱡ ᱱᱚᱜᱼᱚᱭ ᱟᱞᱮᱞᱮ ᱜᱚᱭᱟ ᱜᱚᱝᱜᱟ ᱮᱫ ᱢᱮᱭᱟ ᱾ ᱟᱞᱮ ᱦᱚᱸ ᱞᱮ ᱩᱢ ᱮᱱ ᱱᱟᱲᱠᱟ ᱮᱱ ᱟᱢ ᱦᱚᱸ ᱩᱢ ᱠᱚᱜ ᱱᱟᱲᱠᱟ ᱠᱚᱜ ᱢᱮ ᱾"

ᱦᱟᱯᱲᱟᱢ ᱠᱚᱦᱚᱸ ᱠᱚ ᱵᱚᱸᱜᱟ ᱟᱠᱚᱣᱟ ᱟᱨ ᱠᱚ ᱵᱟᱠᱷᱮᱬᱟ " ᱜᱚᱭᱟ ᱜᱚᱝᱜᱟ ᱠᱮᱫᱮ ᱟᱞᱮ ᱟᱨ ᱥᱟᱶᱦᱟ ᱛᱤᱭᱚ.ᱜ ᱥᱟᱶᱦᱟ ᱠᱟᱞᱮ ᱯᱮ ᱾" ᱟᱫᱚ ᱟᱨ ᱦᱚᱸ ᱛᱩᱯᱩ ᱚᱠᱛᱮ ᱢᱟᱢᱚᱛ ᱵᱟᱝᱠᱷᱟᱱ ᱛᱮᱧᱟᱝ ᱠᱚ ᱜᱷᱟᱴ ᱠᱷᱚᱱ ᱠᱚ ᱨᱟᱠᱟᱵ ᱮᱭᱟ ᱾ ᱵᱩᱰᱤ ᱠᱤᱪᱨᱤᱡ ᱫᱚ ᱚᱸᱰᱮᱱ ᱠᱚᱜ ᱰᱚᱢ ᱦᱟᱹᱰᱤ ᱠᱚ ᱦᱟᱛᱟᱣᱟ ᱾ ᱯᱷᱩᱴᱤᱭᱟᱹ ᱠᱟᱹᱣᱰᱤ ᱟᱨ ᱥᱟᱠᱚᱢ ᱦᱚᱸᱠᱚ ᱦᱟᱛᱟᱣᱟ ᱾ ᱟᱫᱚ ᱵᱚᱸᱜᱟ ᱥᱟᱨᱮᱡ ᱯᱚᱴᱚᱢ ᱛᱟᱵᱮᱱ ᱡᱚᱛᱚ ᱦᱚᱲ ᱠᱚ ᱦᱟᱹᱴᱤᱧ ᱡᱚᱢᱟ ᱾

ᱱᱚᱝᱠᱟ ᱛᱮ ᱚᱲᱟᱜ ᱛᱮ ᱨᱩᱣᱟᱹᱲ ᱡᱚᱦᱚᱜ ᱦᱚᱸ ᱯᱮᱫᱷᱟᱣ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱᱛᱮ ᱠᱚ ᱠᱟᱠᱞᱮ ᱚᱴᱚ ᱠᱟᱜᱼᱟ ᱾ ᱚᱲᱟᱜ ᱛᱮ ᱥᱮᱴᱮᱨ ᱠᱟᱛᱮ ᱡᱟᱸᱜᱟ ᱠᱚ ᱟᱹᱨᱩᱵ ᱠᱚᱣᱟ ᱾ ᱢᱟᱺᱡᱷᱤ ᱦᱟᱲᱟᱢ ᱦᱚᱨ ᱜᱤᱛᱤᱡ ᱵᱤᱨ ᱜᱤᱛᱤᱡ ᱠᱟᱛᱷᱟᱭ ᱠᱩᱞᱤ ᱡᱤᱜᱟᱺᱥ ᱠᱚᱣᱟ ᱾

ᱤᱱᱟᱹ ᱛᱟᱭᱚᱢ ᱡᱟᱹᱛᱨᱤ ᱥᱤᱢ ᱠᱚ ᱠᱩᱴᱟᱹᱢ ᱠᱚᱣᱟ ᱾ ᱟᱨ ᱯᱮ ᱴᱷᱮᱱ ᱠᱚ ᱦᱩᱸᱰᱟᱹᱭᱟ ᱾ ᱢᱤᱫ ᱫᱚ ᱟᱹᱥᱟᱹᱢᱤ ᱟᱨ ᱵᱟᱨ ᱦᱩᱸᱰᱟᱹ ᱫᱚ ᱢᱤᱫ ᱴᱷᱮᱱ ᱠᱚ ᱴᱷᱮᱞᱟᱣ ᱢᱤᱫᱟ ᱾ ᱟᱨ ᱚᱱᱟ ᱦᱚᱸ ᱯᱮ ᱴᱷᱮᱱ ᱠᱚ ᱦᱩᱸᱰᱟᱹᱭᱟ ᱾ ᱢᱤᱫ ᱫᱚ ᱯᱮᱲᱟ ᱟᱨ ᱵᱟᱨ ᱫᱚ ᱟᱹᱛᱩ ᱜᱟᱶᱛᱟ ᱟᱨ ᱯᱮ ᱦᱟᱹᱴᱤᱧ ᱫᱚ ᱥᱟᱭ ᱯᱩᱲᱥᱤ ᱞᱟᱹᱜᱤᱫ ᱾ ᱚᱱᱟ ᱠᱚ ᱡᱚᱢ ᱠᱟᱛᱮ ᱠᱚ ᱟᱯᱟᱱ ᱟᱹᱯᱤᱱᱚᱜᱼᱟ ᱾

ᱜᱚᱡ ᱟᱠᱟᱱ ᱜᱩᱨ ᱟᱠᱟᱱᱤᱡ ᱵᱚ ᱩᱢ ᱥᱟᱨᱪᱟ ᱠᱮᱫᱮ ᱠᱷᱟᱱ ᱡᱤᱞᱤᱧ ᱰᱟᱦᱟᱨ ᱛᱮᱵᱚ ᱤᱫᱤ ᱠᱮᱫᱮ ᱠᱷᱟᱱ ᱱᱤᱨᱟᱹᱭ ᱱᱟᱯᱟᱭ ᱨᱮᱭ ᱛᱟᱦᱮᱸᱱᱟ ᱟᱨ ᱥᱟᱶᱦᱟ ᱠᱟᱛᱮ ᱫᱷᱚᱨᱢᱚ ᱴᱷᱮᱱ ᱥᱩᱞᱩᱠ ᱨᱮ ᱴᱷᱟᱶ ᱮ ᱧᱟᱢᱟ ᱢᱮᱱᱛᱮ ᱦᱟᱯᱲᱟᱢ ᱠᱚ ᱢᱮᱱ ᱟᱹᱜᱩ ᱟᱠᱟᱜᱼᱟ ᱾

ᱛᱩᱯᱩᱱᱟ.ᱭ ᱜᱷᱟᱴ ᱧᱩᱛᱩᱢ

ᱚ. ᱛᱮᱞ ᱠᱩᱯᱤ ᱜᱟᱹᱭᱟᱹ ᱜᱷᱟᱴ ᱟᱹ ᱛᱤᱨᱭᱳ ᱜᱷᱟᱴ ᱤ. ᱜᱟᱹᱭᱟᱹ ᱜᱷᱟᱴ ᱩ. ᱵᱟᱹᱨᱱᱤ ᱜᱷᱟᱴ ᱮ. ᱫᱚᱢᱟᱞᱤᱭᱟᱹ ᱜᱷᱟᱴ ᱳ. ᱪᱟᱹᱶᱨᱤᱡ ᱜᱷᱟᱴ ᱛ. ᱵᱟᱜᱽᱱᱟ ᱜᱷᱟᱴ ᱠ. ᱦᱟᱴᱠᱩᱸᱰ ᱜᱷᱟᱴ ᱥ. ᱢᱟᱱ ᱜᱷᱟᱴ ᱮᱢᱟᱱ ᱾