ᱡᱳᱵᱟ ᱢᱩᱨᱢᱩ
| ᱡᱳᱵᱟ ᱢᱩᱨᱢᱩ | |
|---|---|
 | |
| ᱡᱟᱱᱟᱢ | ᱡᱳᱵᱟ ᱢᱩᱨᱢᱩ 1968 (age 56–57) ᱠᱤᱱᱩᱰᱤᱦ, ᱠᱚᱨᱚᱱᱰᱤ, ᱥᱟᱢᱟᱝ ᱥᱤᱝᱵᱷᱩᱢ, ᱡᱷᱟᱨᱠᱷᱚᱸᱰ |
| ᱠᱟᱹᱢᱤ | ᱚᱱᱚᱞᱤᱭᱟ., ᱥᱮᱨᱮᱧ ᱜᱟᱵᱟᱱᱤᱭᱟ., ᱥᱟᱱᱛᱟᱲᱤ ᱯᱷᱤᱞᱢ ᱰᱟᱭᱨᱮᱠᱴᱚᱨ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱤᱨᱯᱷᱟᱹ | ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱥᱤᱥᱩ ᱥᱟᱶᱦᱮᱫ ᱥᱤᱨᱯᱷᱟ. (᱒᱐᱑᱗), ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱥᱤᱨᱯᱷᱟ., ᱟᱨ.ᱟᱨ. ᱠᱤᱥᱠᱩ ᱨᱟᱯᱟᱡᱽ ᱥᱤᱨᱯᱷᱟ. |
| ᱜᱟᱛᱮ | ᱯᱤᱛᱟᱢᱵᱚᱨ ᱦᱟᱸᱥᱫᱟᱜ |
| ᱦᱚᱯᱚᱱ | ᱒, ᱥᱚᱱᱟᱞᱤ ᱦᱟᱸᱥᱫᱟᱜ, ᱞᱟᱞ ᱢᱳᱦᱚᱱ ᱦᱟᱸᱥᱫᱟᱜ |
ᱡᱳᱵᱟ ᱢᱩᱨᱢᱩ (ᱡᱟᱱᱟᱢ ᱺ ᱒᱗ ᱯᱷᱮᱵᱽᱨᱩᱣᱟᱨᱤ ᱑᱙᱖᱘) ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱞᱤᱭᱟ., ᱥᱮᱨᱮᱧ ᱜᱟᱵᱟᱱᱤᱭᱟ., ᱥᱟᱶᱛᱮ ᱥᱟᱱᱛᱟᱲᱤ ᱯᱷᱤᱞᱤᱢ ᱰᱟᱭᱨᱮᱠᱴᱟᱨ ᱠᱟᱱᱟᱭ ᱾ ᱟᱡᱟᱜ ᱥᱟᱶᱦᱮᱫ ᱮᱱᱮᱢ ᱞᱟ.ᱜᱤᱫ ᱛᱮ ᱑᱔ ᱱᱚᱵᱷᱮᱢᱵᱚᱨ ᱒᱐᱑᱗ ᱦᱤᱞᱚᱜ ᱥᱟᱦᱤᱛᱭᱟ ᱮᱠᱟᱰᱮᱢᱤ, ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱥᱤᱥᱩ ᱥᱟᱶᱦᱮᱫ ᱥᱤᱨᱯᱷᱟ. ᱛᱮᱭ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾[᱑]
ᱡᱟᱱᱟᱢ ᱟᱨ ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱡᱳᱵᱟ ᱢᱩᱨᱢᱩ ᱫᱚ ᱒᱗ ᱯᱷᱮᱵᱽᱨᱩᱣᱟᱨᱤ ᱑᱙᱖᱘ ᱥᱟᱞᱮ ᱨᱮ ᱠᱤᱱᱩᱰᱤᱦ, ᱠᱚᱨᱚᱱᱰᱤᱦ ᱟᱹᱛᱩ ᱨᱮ, ᱥᱟᱢᱟᱝ ᱥᱤᱝᱵᱷᱩᱢ ᱦᱚᱱᱚᱛ, ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭ ᱡᱟᱱᱟᱢ ᱟᱠᱟᱱᱟ ᱾ ᱡᱟᱱᱟᱢ ᱵᱟᱵᱟ ᱧᱩᱛᱩᱢ ᱫᱚ ᱪᱷᱳᱴᱮᱨᱟᱢ ᱢᱟᱺᱡᱷᱤ ᱟᱨ ᱟᱭᱳ ᱫᱚ ᱵᱚᱝᱜᱟ ᱛᱟᱞᱟ ᱟᱠᱟᱱ ᱵᱟᱦᱟ ᱢᱩᱨᱢᱩ ᱾ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱠᱚᱨᱚᱱᱰᱤᱦ ᱢᱤᱰᱤᱞ ᱟᱥᱲᱟ ᱠᱷᱚᱱ ᱮ ᱮᱛᱚᱦᱚᱵ ᱞᱮᱫᱼᱟ ᱾ ᱤᱱᱟ. ᱛᱟᱭᱚᱢ ᱫᱚ ᱵᱤᱨᱥᱟ. ᱢᱮᱢᱚᱨᱤᱭᱟᱞ ᱦᱟᱭᱤᱥᱠᱩᱞ, ᱥᱟᱨᱡᱚᱢᱫᱟᱜ ᱨᱮᱭ ᱯᱟᱲᱦᱟᱣ ᱮᱱᱟ ᱾ ᱤᱱᱟ. ᱛᱟᱭᱚᱢ ᱢᱮᱴᱨᱤᱠ ᱫᱚ ᱑᱙᱘᱔ ᱨᱮ ᱟᱨ ᱪᱮᱛᱟᱱ ᱛᱟᱱᱟᱞᱟ ᱫᱚ ᱑᱙᱘᱖ ᱥᱟᱞᱮ ᱨᱮ ᱮᱞ.ᱵᱤ.ᱮᱥ.ᱮᱢ. ᱵᱤᱨᱫᱟᱹᱜᱟᱲ ᱠᱚᱨᱚᱱᱰᱤᱦ ᱠᱷᱚᱱ ᱮ ᱥᱟᱹᱛ ᱞᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱫᱚ ᱜᱟᱺᱵᱷᱟᱹᱨᱤᱭᱟᱹ ᱵᱤᱨᱫᱟ.ᱜᱟᱲ ᱨᱮ ᱢᱟᱪᱮᱛ ᱥᱮᱱᱮᱪᱮᱫ ᱮ ᱵᱷᱩᱨᱛᱤ ᱮᱱᱟ ᱾ ᱤᱱᱟ. ᱛᱟᱭᱚᱢ ᱢᱟᱪᱮᱛ ᱥᱮᱱᱮᱪᱮᱫ ᱮ ᱥᱟ.ᱛ ᱠᱮᱫ ᱥᱟᱶ ᱥᱟᱶᱛᱮ B.A.(Hons.) ᱟᱨ M.A.(NET) ᱥᱟᱱᱛᱟᱲᱤ ᱛᱮ ᱑᱙᱙᱐ ᱟᱨ ᱑᱙᱙᱙ ᱥᱟᱞᱮ ᱵᱷᱤᱛᱨᱤ ᱨᱮ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱨᱟᱺᱪᱤ ᱠᱷᱚᱱ ᱮ ᱥᱟ.ᱛ ᱠᱮᱫᱼᱟ ᱾ ᱱᱳᱝᱠᱟ ᱛᱮ ᱒᱐᱑᱔ ᱥᱟᱞᱮ ᱨᱮ ᱮᱢ.ᱮ. ᱦᱤᱱᱫᱤ ᱛᱮ IGNOU, ᱱᱟᱣᱟ ᱫᱤᱞᱞᱤ ᱠᱷᱚᱱ ᱮ ᱥᱟᱹᱛ ᱠᱮᱫᱼᱟ ᱾ ᱱᱤᱛᱚᱜ ᱫᱚ ᱟᱯᱜᱽᱨᱟᱰᱮᱰ ᱩᱱᱩᱥᱩᱞ ᱟᱥᱲᱟ , ᱞᱚᱠᱥᱢᱤ ᱱᱚᱜᱚᱨ, ᱡᱟᱢᱥᱮᱫᱽᱯᱩᱨ, ᱡᱷᱟᱨᱠᱷᱚᱸᱰ ᱨᱮ ᱥᱚᱨᱠᱟᱨᱤ ᱢᱟᱪᱮᱛ ᱞᱮᱠᱟᱛᱮ ᱠᱟᱹᱢᱤ ᱨᱮ ᱡᱩᱲᱟᱹᱣ ᱢᱮᱱᱟᱭᱟ᱾
ᱡᱩᱦᱩᱲᱟᱹᱣ ᱨᱮ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱡᱳᱵᱟ ᱢᱩᱨᱢᱩ ᱫᱚ ᱟᱭᱢᱟ ᱜᱟᱶᱛᱟ ᱥᱟᱶ ᱦᱚᱸ ᱡᱩᱦᱩᱲᱟᱹᱣ ᱨᱮ ᱢᱮᱱᱟᱭᱟ ᱾ ᱟᱭᱢᱟ ᱜᱟᱶᱛᱟ ᱨᱤᱱᱤᱡ ᱥᱚᱦᱮᱛ ᱞᱮᱠᱟᱛᱮ ᱢᱮᱱᱟᱭᱟ ᱾
- ᱥᱟᱱᱛᱟᱲᱤ ᱫᱤᱥᱟᱹ ᱩᱫᱩᱜ ᱢᱟᱰᱣᱟ ᱥᱟᱦᱤᱛᱭᱚ ᱮᱠᱟᱰᱮᱢᱤ, ᱱᱟᱣᱟ ᱫᱤᱞᱞᱤ ᱨᱤᱱᱤᱡ ᱥᱚᱦᱮᱛ
- ᱠᱮ.ᱠᱮ. ᱵᱤᱨᱞᱟ ᱯᱷᱟᱶᱱᱰᱮᱥᱟᱱ, ᱱᱟᱣᱟ ᱫᱤᱞᱞᱤ ᱨᱤᱱᱤᱡ ᱥᱚᱦᱮᱛ
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟ. ᱜᱟᱶᱛᱟ ᱨᱤᱱᱤᱡ ᱡᱤᱵᱚᱱ ᱵᱷᱩᱨ ᱥᱚᱦᱮᱛ ᱾
- ᱡᱟᱦᱮᱨ ᱛᱷᱟᱱ ᱠᱩᱢᱩᱴ ᱠᱚᱨᱚᱱᱰᱤᱦ, ᱡᱟᱢᱥᱮᱫᱽᱯᱩᱨ ᱨᱤᱱᱤᱡ ᱡᱤᱵᱚᱱ ᱵᱷᱩᱨ ᱥᱚᱦᱮᱛ ᱾
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲ ᱥᱮᱢᱞᱮᱫ ᱵᱮᱛᱠᱩᱸᱫᱽᱨᱤᱰᱟᱹᱦᱤ, ᱡᱷᱟᱲᱜᱨᱟᱢ ᱨᱤᱱᱤᱡ ᱥᱚᱦᱮᱛ ᱾
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ, ᱡᱷᱟᱨᱠᱷᱚᱸᱰ ᱪᱟᱸᱜᱟ ᱨᱤᱱᱤᱡ ᱫᱤᱥᱟᱹ ᱩᱫᱩᱜᱤᱭᱟᱹ ᱾
ᱯᱟᱨᱥᱟᱞ ᱟᱠᱟᱱ ᱯᱩᱛᱷᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱡᱳᱵᱟ ᱢᱩᱨᱢᱩ ᱫᱚ ᱟᱭᱢᱟ ᱯᱩᱛᱷᱤ ᱠᱚᱭ ᱪᱷᱟᱯᱟ ᱯᱟᱨᱥᱟᱞ ᱟᱠᱟᱫᱼᱟ ᱺ-
- ᱵᱟᱦᱟ ᱩᱢᱩᱞ - ᱚᱱᱚᱬᱦᱮ
- ᱵᱮᱣᱨᱟ - ᱠᱷᱟᱴᱚ ᱠᱟ.ᱦᱱᱤ
- ᱚᱞᱚᱱ ᱵᱟᱦᱟ - ᱜᱤᱫᱽᱨᱟ. ᱠᱟ.ᱦᱱᱤ (ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ, ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱥᱤᱥᱩ ᱥᱟᱶᱦᱮᱫ ᱥᱤᱨᱯᱷᱟ. ᱟᱢᱮᱴ ᱟᱠᱟᱫ ᱯᱩᱛᱷᱤ)
- ᱯᱨᱮᱢᱪᱟᱸᱫᱽ ᱟᱜ ᱥᱚᱨᱮᱥ ᱠᱟ.ᱦᱱᱤ ᱠᱚ - ᱛᱚᱨᱡᱚᱢᱟ ᱾
- ᱥᱮᱨᱮᱧ ᱟᱸᱡᱽᱞᱮ - ᱛᱚᱨᱡᱚᱢᱟ ᱾
ᱱᱚᱣᱟ ᱥᱟᱶᱛᱮ ᱵᱟᱨᱭᱟ ᱯᱩᱛᱷᱤ ᱫᱚ ᱯᱟᱨᱥᱟᱞ ᱞᱟ.ᱜᱤᱫ ᱥᱟᱯᱲᱟᱣ ᱨᱮ ᱢᱮᱱᱟᱜᱼᱟ ᱺ-
- ᱛᱤᱨᱞᱟ. - ᱚᱱᱚᱞ
- ᱥᱟᱶᱦᱮᱫ ᱥᱟᱯᱟᱨᱚᱢ - ᱚᱱᱚᱞ
ᱱᱚᱣᱟ ᱠᱚ ᱥᱟᱶᱛᱮ ᱟᱡᱟᱜ ᱟ.ᱰᱤ ᱞᱮᱠᱟᱱ ᱚᱱᱚᱞ, ᱚᱱᱚᱬᱦᱮ, ᱠᱟ.ᱦᱱᱤ ᱮᱢᱟᱱ ᱠᱚ ᱟ.ᱰᱤ ᱜᱟᱱ ᱯᱟᱛᱷᱟᱢ ᱠᱚᱨᱮ ᱞᱮᱛᱟᱲ ᱪᱷᱟᱯᱟ ᱥᱚᱫᱚᱨ ᱟᱠᱟ ᱢᱮᱱᱟᱜᱼᱟ ᱾ ᱯᱟᱛᱷᱟᱢ ᱠᱚ ᱡᱮᱞᱮᱠᱟ :- ᱛᱮᱛᱟᱝ, ᱥᱚᱸᱫᱷᱟᱭᱱᱤ, ᱫᱤᱥᱟ., ᱯᱟᱸᱡᱟ, ᱥᱟᱶᱦᱮᱫ, ᱥᱟᱶᱦᱮᱫ ᱟᱲᱟᱝ, ᱦᱚᱞᱚᱝᱜᱟᱰᱟ, ᱠᱟᱨᱟᱢᱰᱟᱹᱨ, ᱛᱤᱛᱨᱤ, ᱥᱤᱞᱤ, ᱠᱷᱚᱵᱚᱨ ᱠᱟᱜᱚᱡᱽ, ᱢᱟᱱᱛᱟᱨ, ᱜᱩᱨᱩ, ᱟᱦᱞᱟ, ᱭᱩᱫᱷᱨᱟᱛ, ᱟᱢ ᱟᱫᱽᱢᱤ ᱮᱢᱟᱱ ᱾
ᱢᱟᱸᱱ ᱥᱤᱨᱯᱷᱟᱹ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱶᱦᱮᱫ ᱪᱮᱛᱟᱱ ᱨᱮ ᱟᱡᱟᱜ ᱥᱚᱨᱮᱥ ᱠᱟᱹᱢᱤ ᱠᱷᱟᱹᱛᱤᱨ ᱡᱳᱵᱟ ᱢᱩᱨᱢᱩ ᱫᱚ ᱟᱭᱢᱟ ᱢᱟᱹᱱ ᱥᱟᱨᱦᱟᱣ ᱟᱨ ᱥᱤᱨᱯᱷᱟᱹ ᱦᱚᱸᱭ ᱟᱢᱮᱴ ᱟᱠᱟᱫᱼᱟ ᱾
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱟᱨ.ᱟᱨ. ᱠᱤᱥᱠᱩ ᱨᱟᱯᱟᱡᱽ ᱥᱤᱨᱯᱷᱟᱹ (ᱛᱚᱨᱡᱚᱢᱟ ᱚᱱᱚᱬᱦᱮ ᱯᱩᱛᱷᱤ ᱥᱮᱨᱮᱧ ᱟᱸᱡᱽᱞᱮ ᱞᱟ.ᱜᱤᱫ ᱾)
- ᱥᱟᱦᱤᱛᱭᱚ ᱮᱠᱟᱰᱮᱢᱤ, ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱥᱤᱥᱩ ᱥᱟᱶᱦᱮᱫ ᱥᱤᱨᱯᱷᱟᱹ - ᱒᱐᱑᱗ ᱾
- ᱮᱡᱩᱠᱮᱥᱳᱱ ᱰᱤᱯᱟᱴᱢᱮᱴ, ᱜᱚᱵᱷᱚᱨᱢᱮᱴ ᱳᱯᱷ ᱡᱷᱟᱨᱠᱷᱚᱸᱰ, ᱡᱟᱢᱥᱮᱫᱽᱯᱩᱨ ᱵᱞᱚᱠ ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣ ᱾
- ᱡᱟᱦᱮᱨ ᱛᱷᱟᱱ ᱠᱩᱢᱩᱴ ᱠᱚᱨᱚᱱᱰᱤᱦ, ᱡᱟᱢᱥᱮᱫᱽᱯᱩᱨ ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣ ᱾
- ᱦᱚᱞᱚᱝ ᱜᱟᱰᱟ ᱯᱟᱨᱥᱟᱞᱮᱛ, ᱪᱟᱹᱠᱩᱞᱤᱭᱟᱹ ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣ ᱾