Jump to content

ᱢᱟᱪᱮᱛ ᱢᱟᱦᱟᱸ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱢᱟᱪᱮᱛ ᱠᱚ

ᱡᱮᱜᱮᱛ ᱨᱮᱭᱟᱜ ᱛᱤᱱᱟᱹᱜ ᱜᱟᱱ ᱫᱤᱥᱚᱢ ᱨᱮ ᱢᱟᱪᱮᱛ ᱠᱚ ᱵᱟᱹᱲᱛᱤ ᱞᱮᱠᱟᱛᱮ ᱢᱟᱹᱱ ᱪᱟᱞ ᱟᱠᱚ ᱞᱟᱹᱜᱤᱫ ᱢᱟᱪᱮᱛ ᱢᱟᱦᱟᱸ ᱢᱟᱱᱟᱣ ᱞᱟᱹᱜᱤᱫ ᱥᱟᱯᱲᱟᱣ ᱦᱩᱭᱩᱜ ᱠᱟᱱᱟ ᱾ ᱛᱤᱱᱟᱹᱜ ᱜᱟᱱ ᱫᱤᱥᱚᱢ ᱨᱮᱫᱚ ᱢᱟᱪᱮᱛ ᱢᱟᱦᱟᱸ ᱦᱤᱞᱚᱜ ᱰᱤᱜᱟᱹ ᱛᱟᱦᱮᱸᱱ ᱠᱟᱱᱟ ᱟᱨ ᱛᱤᱱᱟᱹᱜ ᱜᱟᱱ ᱫᱤᱥᱚᱢ ᱨᱮᱫᱚ ᱟᱥᱲᱟ ᱠᱟᱹᱢᱤ ᱛᱟᱦᱮᱸᱱ ᱛᱩᱞᱩᱡ ᱜᱮ ᱢᱟᱪᱮᱛ ᱢᱟᱦᱟᱸ ᱢᱟᱱᱟᱣ ᱦᱩᱭᱩᱜ ᱠᱟᱱᱟ ᱾

ᱵᱷᱟᱨᱚᱛ ᱨᱤᱱᱤᱡ ᱫᱤᱥᱚᱢ ᱜᱚᱢᱠᱮ ᱰᱨ. ᱥᱚᱨᱵᱚᱯᱚᱞᱞᱤ ᱨᱟᱫᱷᱟᱠᱨᱩᱥᱱᱚᱱ ᱟᱜ ᱡᱟᱱᱟᱢ ᱢᱟᱦᱟᱸ ᱕ ᱥᱮᱯᱴᱮᱢᱵᱚᱨ ᱦᱤᱞᱚᱜ ᱵᱷᱟᱨᱚᱛ ᱨᱮ ᱢᱟᱪᱮᱛ ᱢᱟᱦᱟᱸ ᱞᱮᱠᱟᱛᱮ ᱢᱟᱱᱟᱣ ᱦᱩᱭᱩᱜ ᱠᱟᱱᱟ ᱾

ᱟᱥᱲᱟ ᱨᱮ ᱡᱟᱦᱟᱸ ᱛᱤᱱᱟᱹᱝ ᱢᱟᱦᱟᱸ ᱜᱮ ᱠᱩᱥᱤ ᱨᱟᱹᱥᱠᱟᱹ ᱛᱮ ᱠᱷᱮᱢᱟᱣ ᱦᱩᱭᱩᱜᱼᱟ, ᱚᱱᱟ ᱠᱚ ᱵᱷᱤᱛᱨᱤ ᱨᱮ ᱢᱟᱪᱮᱛ ᱢᱟᱦᱟᱸ ᱢᱤᱫᱴᱟᱹᱝ ᱾ ᱢᱟᱪᱮᱛ ᱢᱟᱦᱟᱸ ᱯᱩᱨᱟᱹ ᱵᱷᱟᱨᱚᱛ ᱫᱤᱥᱚᱢ ᱨᱮ ᱢᱮᱱᱟᱜ ᱥᱮᱪᱮᱫ ᱛᱟᱞᱢᱟ ᱠᱚᱨᱮ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜ ᱠᱟᱱᱟ ᱾

ᱨᱟᱫᱷᱟᱠᱨᱤᱥᱱᱚᱱ ᱟᱜ ᱠᱷᱟᱴᱚ ᱡᱤᱭᱚᱱ ᱪᱩᱨᱤᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱨᱟᱫᱷᱟᱠᱨᱤᱥᱱᱚᱱ

ᱨᱟᱫᱷᱟᱠᱨᱤᱥᱱᱚᱱ ᱫᱚ ᱑᱘᱘᱘ ᱥᱟᱞᱮ ᱥᱮᱯᱴᱮᱢᱵᱚᱨ ᱕ ᱢᱟᱹᱦᱤᱛ ᱦᱤᱞᱚᱜ ᱢᱟᱫᱽᱨᱟᱥ ᱨᱮᱭᱟᱜ ᱛᱤᱨᱩᱛᱛᱟᱬᱤ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟ ᱟᱜ ᱧᱩᱛᱩᱢ ᱫᱚ ᱵᱤᱨᱥᱣᱟᱢᱤ ᱯᱩᱨᱳᱦᱤᱛ ᱞᱮᱠᱟ ᱠᱟᱹᱢᱤ ᱠᱟᱛᱮ ᱡᱤᱭᱚᱱ ᱮ ᱪᱟᱞᱟᱣ ᱮᱫ ᱛᱟᱦᱮᱸᱫ ᱾ ᱨᱟᱫᱷᱟᱠᱨᱤᱥᱱᱚᱱ ᱫᱚ ᱵᱷᱮᱞᱞᱚᱨ ᱨᱮᱭᱟᱜ ᱵᱩᱨᱦᱤᱡᱽ ᱵᱤᱨᱫᱟᱹᱜᱟᱲ ᱠᱷᱚᱱ ᱮᱱᱴᱨᱟᱱᱥ ᱟᱨ ᱮᱯ. ᱮ., ᱢᱟᱫᱽᱨᱟᱥ ᱨᱮᱭᱟᱜ ᱠᱮᱨᱮᱥᱛᱟᱱ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱟᱱᱟᱥ ᱨᱮ ᱚᱱᱚᱨᱥ ᱥᱟᱶᱛᱮ ᱯᱩᱭᱞᱩ ᱴᱷᱟᱶ ᱟᱢᱮᱴ ᱠᱟᱛᱮ ᱥᱚᱱᱮᱨ, ᱟᱨ ᱢᱟᱫᱽᱨᱟᱥ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱟᱱᱟᱥ ᱪᱮᱛᱟᱱ ᱨᱮ ᱯᱩᱭᱞᱩ ᱴᱷᱟᱶ ᱟᱢᱮᱴ ᱠᱟᱛᱮ ᱮᱢ. ᱮ. ᱦᱚᱸᱭ ᱥᱟᱹᱛ ᱞᱮᱫᱼᱟ ᱾ ᱯᱟᱲᱦᱟᱣ ᱛᱟᱭᱚᱢ ᱑᱙᱐᱙ ᱥᱟᱞᱮᱨᱮ ᱢᱟᱫᱽᱨᱟᱥ ᱨᱮ ᱯᱨᱮᱥᱤᱰᱮᱱᱥᱤ ᱵᱤᱨᱫᱟᱹᱜᱟᱲ ᱨᱮ ᱢᱟᱪᱮᱛ ᱞᱮᱠᱟᱛᱮ ᱪᱟᱹᱠᱨᱤ ᱡᱤᱭᱚᱱ ᱮ ᱮᱛᱚᱦᱚᱵ ᱞᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱥᱮᱨᱱᱟ ᱥᱚᱭᱫᱟᱯᱮᱴ ᱨᱮ ᱢᱮᱱᱟᱜ ᱴᱤᱪᱟᱨᱥ ᱵᱤᱨᱫᱟᱹᱜᱟᱲ ᱠᱷᱚᱱ ᱮᱞ. ᱴᱤ. ᱦᱚᱸᱭ ᱯᱩᱨᱟᱹᱣ ᱥᱟᱹᱛ ᱞᱮᱫᱼᱟ ᱾

ᱯᱨᱮᱥᱤᱰᱮᱱᱥᱤ ᱵᱤᱨᱫᱟᱹᱜᱟᱲ ᱨᱮ ᱛᱤᱱᱟᱹᱜ ᱥᱮᱨᱢᱟᱭ ᱠᱟᱹᱢᱤ ᱠᱮᱫ ᱛᱟᱭᱚᱢ ᱢᱚᱦᱤᱥᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭᱟᱜ ᱥᱟᱱᱟᱥ ᱯᱟᱦᱴᱟ ᱨᱮ ᱢᱩᱬᱩᱛ ᱢᱟᱪᱮᱛ ᱴᱷᱟᱶ ᱠᱷᱟᱹᱞᱤ ᱜᱮ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ ᱢᱟᱞᱟᱭ ᱟᱜ ᱱᱮᱦᱚᱨ ᱫᱟᱨᱟᱭ ᱛᱮ ᱩᱱᱤ ᱚᱸᱰᱮᱭ ᱥᱮᱞᱮᱫ ᱞᱮᱱᱟ ᱾ ᱑᱙᱒᱑ ᱥᱟᱞᱮᱨᱮ ᱠᱚᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱥᱟᱱᱟᱥ ᱢᱟᱪᱮᱫ ᱞᱮᱠᱟᱛᱮ ᱥᱮᱞᱮᱫ ᱮ ᱦᱟᱛᱟᱣ ᱠᱮᱫᱼᱟ ᱾ ᱵᱟᱹᱭ-ᱵᱟᱹᱭ ᱛᱮ ᱟᱡᱟᱜ ᱢᱟᱹᱱ ᱵᱷᱟᱨᱚᱛ ᱨᱮ ᱵᱟᱹᱲᱛᱤ ᱤᱫᱤ ᱮᱱᱟ ᱾ ᱠᱚᱞᱠᱟᱛᱟ ᱨᱤᱱ ᱦᱚᱲ ᱩᱱᱤ ᱟᱹᱰᱤ ᱵᱟᱹᱲᱛᱤ ᱠᱚ ᱠᱩᱥᱤ ᱟᱫᱮᱭᱟ ᱾

᱑᱙᱒᱖ ᱥᱟᱞᱮᱨᱮ ᱦᱟᱵᱷᱟᱨᱰ ᱡᱮᱜᱮᱫ ᱵᱤᱨᱫᱟᱹᱜᱟᱲ ᱨᱮ ᱥᱟᱯᱲᱟᱣ ᱞᱮᱱ ᱡᱮᱜᱮᱛᱤᱭᱟᱹ ᱥᱟᱱᱟᱥ ᱠᱚᱸᱜᱽᱨᱮᱥ ᱯᱟᱦᱴᱟ ᱠᱷᱚᱱ ᱵᱷᱟᱨᱚᱛ ᱨᱮᱭᱟᱜ ᱥᱟᱱᱟᱥ ᱮ ᱪᱟᱨᱪᱟ ᱞᱮᱜ-ᱟ ᱾ ᱑᱙᱓᱑ ᱥᱟᱞᱮᱨᱮ ᱟᱸᱫᱷᱨᱚ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱠᱩᱞᱯᱚᱛᱤ (Vice Chancellor) ᱟᱜ ᱴᱷᱟᱶ ᱯᱷᱟᱸᱠᱟ ᱜᱮ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ ᱚᱱᱟ ᱴᱷᱟᱶ ᱞᱟᱹᱜᱤᱫ ᱥᱚᱵᱷᱟᱜ ᱞᱮᱠᱟ ᱠᱚ ᱩᱭᱦᱟᱹᱨ ᱠᱮᱫ ᱠᱷᱟ.ᱛᱤᱨ ᱠᱚᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭᱟᱜ ᱯᱨᱚᱯᱷᱮᱥᱚᱨ ᱯᱚᱫᱽ ᱵᱟᱹᱜᱤ ᱠᱟᱛᱮ ᱟᱸᱫᱷᱨᱚ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭᱟᱜ ᱠᱩᱞᱯᱚᱛᱤ ᱴᱷᱟᱶ ᱨᱮ ᱴᱷᱟᱶ ᱮ ᱟᱢᱮᱴ ᱠᱮᱫᱼᱟ ᱾ ᱑᱙᱓᱙ ᱥᱟᱞᱮᱨᱮ ᱵᱟᱨᱟᱬᱚᱥᱤ ᱨᱮᱭᱟᱜ ᱦᱤᱱᱫᱩ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭᱟᱨ ᱠᱩᱞᱯᱚᱛᱤ ᱴᱷᱟᱶ ᱠᱷᱟᱹᱞᱤ ᱜᱮ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ ᱢᱚᱦᱟᱛᱢᱟ ᱜᱟᱺᱫᱷᱤ ᱭᱟᱜ ᱫᱤᱥ ᱦᱩᱫᱤᱥ ᱞᱮᱠᱟᱛᱮ ᱢᱚᱫᱚᱱ ᱢᱚᱦᱚᱱ ᱢᱟᱞᱚᱵᱭᱚ ᱟᱜ ᱱᱮᱦᱚᱸᱨ ᱞᱮᱠᱟᱛᱮ ᱩᱱᱤ ᱱᱚᱶᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱦᱚᱸ ᱠᱩᱞᱯᱚᱛᱤ ᱞᱮᱠᱟᱛᱮ ᱥᱮᱞᱮᱫ ᱮ ᱦᱟᱛᱟᱣ ᱞᱮᱫᱼᱟ ᱾

᱑᱙᱔᱙ ᱥᱟᱞᱮᱨᱮ ᱵᱷᱟᱨᱚᱛ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱡᱚᱵᱟᱦᱚᱨᱞᱟᱞ ᱟᱜ ᱱᱮᱦᱚᱨ ᱞᱮᱠᱟᱛᱮ ᱩᱱᱤ ᱨᱩᱥᱤᱭᱟ ᱨᱤᱱᱤᱡ ᱫᱤᱥᱚᱢ ᱜᱚᱢᱠᱮ ᱞᱮᱠᱟᱛᱮ ᱦᱚᱸᱭ ᱵᱟᱪᱷᱚᱱ ᱮᱱᱟ ᱾ ᱟᱨ ᱚᱠᱥᱯᱷᱚᱨᱰ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱥᱟᱱᱟᱥ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤ ᱨᱮᱭᱟᱜ ᱫᱟᱣ ᱮ ᱟᱢᱮᱴ ᱠᱮᱫᱼᱟ ᱾ ᱨᱩᱥ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱥᱴᱟᱞᱤᱱ ᱥᱟᱶ ᱦᱚᱸ ᱟᱡᱟᱜ ᱟᱹᱰᱤ ᱜᱟᱺᱦᱤᱨ ᱥᱟᱹᱜᱟᱹᱭ ᱛᱟᱦᱮᱸ ᱠᱟᱱᱟ ᱾ ᱑᱙᱕᱒ ᱥᱟᱞᱮᱨᱮ ᱵᱷᱟᱨᱚᱛ ᱨᱤᱱᱤᱡ ᱢᱟᱲᱛᱮ ᱫᱤᱥᱚᱢ ᱜᱚᱢᱠᱮ ᱟᱜ ᱴᱷᱟᱶ ᱟᱢᱮᱴ ᱞᱟᱹᱜᱤᱫ ᱨᱩᱥ ᱮ ᱵᱟᱹᱜᱤᱭᱟᱫᱼᱟ ᱾ ᱨᱩᱥ ᱵᱟᱹᱜᱤᱭᱟᱜ ᱚᱠᱛᱚ ᱨᱮ ᱥᱴᱟᱞᱤᱱ ᱮ ᱢᱮᱱ ᱞᱮᱫᱼᱟ, ᱨᱟᱫᱷᱟᱠᱨᱤᱥᱱᱚᱱ ᱫᱚ ᱢᱤᱫ ᱤᱱᱠᱟᱹᱱ ᱫᱤᱥᱚᱢ ᱫᱩᱞᱟᱹᱲᱤᱭᱟᱹ ᱫᱚᱭ ᱵᱟᱝ ᱠᱟᱱᱟ ᱾ ᱟᱡᱟᱜ ᱨᱤᱫᱟᱹᱭ ᱫᱚ ᱦᱟᱨᱠᱮᱛ ᱮᱴᱠᱮᱴᱚᱬᱮ ᱨᱮ ᱢᱮᱱᱟᱜ ᱠᱚ ᱫᱤᱥᱚᱢ ᱦᱚᱲ ᱞᱟᱹᱜᱤᱫ ᱟᱴᱮᱫ ᱜᱮᱭᱟ ᱾

᱑᱙᱕᱒ ᱠᱷᱚᱱ ᱑᱙᱖᱒ ᱫᱷᱟᱹᱵᱤᱡ ᱢᱟᱲᱛᱮ ᱫᱤᱥᱚᱢ ᱜᱚᱢᱠᱮ ᱞᱮᱠᱟᱠᱮᱭ ᱠᱟᱹᱢᱤ ᱠᱮᱫ ᱛᱟᱭᱚᱢ ᱑᱙᱖᱒ ᱥᱟᱞ ᱢᱮ ᱑᱒ ᱢᱟᱹᱦᱤᱛ ᱦᱤᱞᱚᱜ ᱵᱷᱟᱨᱚᱛ ᱨᱤᱱᱤᱡ ᱫᱚᱥᱟᱨ ᱫᱤᱥᱚᱢ ᱜᱚᱢᱠᱮ ᱞᱮᱠᱟᱛᱮ ᱨᱟᱡᱮᱱᱫᱽᱨᱚ ᱯᱨᱚᱥᱟᱫᱽ ᱤᱡ ᱩᱛᱚᱨᱫᱟᱭᱟᱫᱽ ᱞᱮᱠᱟᱛᱮ ᱨᱟᱫᱷᱟᱠᱤᱥᱱᱚᱱ ᱫᱚᱭ ᱥᱮᱞᱮᱫ ᱮᱱᱟ ᱾ ᱑᱙᱖᱓ ᱨᱮ ᱤᱸᱜᱽᱞᱮᱸᱰ ᱨᱮᱭᱟᱜ ᱡᱚᱛᱚ ᱠᱷᱚᱱ ᱪᱮᱛᱟᱱ ᱥᱤᱨᱯᱷᱟᱹ Order of merit ᱢᱟᱹᱱ ᱛᱮᱠᱚ ᱧᱩᱢ ᱦᱟᱞᱟᱝ ᱠᱮᱫᱮᱭᱟ ᱾

ᱵᱚᱸᱜᱟ ᱫᱤᱥᱚᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱙᱖᱗ ᱥᱟᱞᱮᱨᱮ ᱫᱤᱥᱚᱢ ᱜᱚᱢᱠᱮ ᱴᱷᱟᱶ ᱠᱷᱚᱱ ᱫᱚ ᱵᱤᱫᱟᱹᱭ ᱮ ᱦᱟᱛᱟᱣ ᱠᱮᱫᱼᱟ ᱾ ᱑᱙᱗᱕ ᱥᱟᱞᱮᱨᱮ ᱑᱖ ᱢᱟᱹᱦᱤᱛ ᱦᱤᱞᱚᱜ ᱘᱖ ᱥᱮᱨᱢᱟ ᱵᱚᱭᱚᱥ ᱨᱮ ᱥᱟᱱᱟᱢ ᱵᱷᱟᱨᱚᱛᱤᱭᱟᱹ ᱠᱚ ᱫᱩᱠ ᱫᱟᱨᱦᱟ ᱨᱮ ᱵᱚᱦᱮᱞ ᱚᱴᱚ ᱠᱟᱛᱮ ᱡᱟᱭᱡᱩᱜᱽ ᱞᱟᱹᱜᱤᱫ ᱮ ᱡᱤᱨᱟᱹᱣ ᱥᱟᱹᱨᱤ ᱮᱱᱟ ᱾

ᱨᱟᱫᱷᱟᱠᱨᱤᱥᱱᱚᱱ ᱫᱚ ᱢᱤᱫ ᱜᱮᱭᱟᱱ ᱛᱮ ᱯᱮᱨᱮᱡ ᱥᱟᱨᱮᱲ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱵᱷᱟᱨᱚᱛ ᱠᱷᱚᱱ ᱟᱨᱵᱟᱝ ᱫᱷᱟᱹᱨᱛᱤ ᱨᱮᱭᱟᱜ ᱟᱹᱵᱤ ᱞᱮᱠᱟᱱ ᱫᱤᱥᱚᱢ ᱠᱷᱚᱱ ᱩᱱᱤ ᱟᱹᱰᱤ ᱟᱭᱱᱟ ᱢᱟᱹᱱ ᱢᱟᱱᱚᱛ ᱥᱤᱨᱯᱷᱟᱹ ᱛᱮᱭ ᱧᱩᱢ ᱦᱟᱞᱟᱝ ᱟᱠᱟᱱᱟ ᱾ ᱥᱟᱱᱟᱥ ᱥᱟᱶ ᱡᱩᱲᱟᱹᱭ ᱟᱹᱰᱤ ᱟᱭᱢᱟ ᱞᱮᱠᱟᱱ ᱯᱩᱛᱷᱤ ᱠᱚᱭ ᱯᱟᱲᱦᱟᱣ ᱟᱠᱟᱜᱼᱟ ᱾ ᱩᱱᱤ ᱵᱷᱟᱨᱚᱛ ᱨᱮᱭᱟᱜ ᱨᱩᱯ ᱨᱚᱝ ᱮ ᱢᱟᱨᱥᱟᱞ ᱚᱴᱚ ᱟᱠᱟᱫᱼᱟ ᱾

ᱡᱮᱜᱮᱛ ᱨᱮᱭᱟᱜ ᱟᱹᱰᱤ ᱴᱷᱟᱶᱨᱮ ᱵᱷᱟᱨᱚᱛ ᱨᱮᱭᱟᱜ ᱞᱟᱯᱷᱟᱝ ᱴᱷᱟᱶ ᱮ ᱛᱟᱨᱪᱟ ᱚᱴᱚ ᱟᱠᱟᱫᱼᱟ ᱟᱨ ᱵᱷᱟᱨᱚᱛ ᱪᱮᱛᱟᱱ ᱨᱮ ᱡᱮᱜᱮᱛᱵᱟᱹᱥᱤ ᱠᱚᱣᱟᱜ ᱩᱭᱦᱟᱹᱨ ᱟᱹᱨᱩᱯᱷᱮᱨᱟᱣ ᱨᱮ ᱜᱚᱲᱚ ᱥᱚᱦᱚᱫ ᱮ ᱮᱢ ᱟᱠᱟᱜᱼᱟ ᱾ ᱢᱤᱫ ᱢᱟᱪᱮᱛ ᱞᱮᱠᱟᱛᱮ ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱮᱛᱚᱦᱚᱵ ᱠᱟᱛᱮ ᱡᱚᱛᱚ ᱠᱷᱚᱱ ᱞᱟᱯᱷᱟᱝ ᱴᱷᱟᱶ ᱮ ᱥᱟᱡᱟᱣ ᱥᱚᱵᱷᱟ ᱟᱠᱟᱫ ᱠᱷᱟᱹᱛᱤᱨ ᱢᱟᱪᱮᱛ ᱠᱚ ᱢᱟᱹᱱ ᱢᱟᱱᱚᱛ ᱟᱠᱚ ᱞᱟᱹᱜᱤᱫ ᱟᱡᱟᱜ ᱡᱟᱱᱟᱢ ᱢᱟᱦᱟᱸ ᱫᱚ ᱢᱟᱪᱮᱫ ᱢᱟᱦᱟᱸ ᱞᱮᱠᱟᱛᱮ ᱢᱟᱱᱟᱣ ᱞᱟᱹᱜᱤᱫ ᱩᱱᱤ ᱫᱟᱣ ᱮ ᱮᱢ ᱞᱮᱜᱼᱟ ᱾ ᱵᱷᱟᱨᱚᱛ ᱥᱚᱨᱠᱟᱨ ᱚᱱᱟ ᱟᱯᱱᱟᱨ ᱠᱟᱛᱮ ᱩᱱᱤ ᱠᱷᱟᱞᱤ ᱢᱟᱹᱱ ᱮ ᱪᱟᱞ ᱠᱟᱣᱟ ᱫᱮᱭᱟ ᱚᱱᱟ ᱥᱩᱢᱩᱝ ᱫᱚ ᱵᱟᱝᱼᱟ, ᱵᱷᱟᱨᱚᱛ ᱨᱮᱭᱟᱜ ᱢᱟᱪᱮᱛ ᱨᱤᱛ ᱮ ᱢᱟᱹᱱ ᱢᱟᱱᱚᱛ ᱟᱠᱟᱫᱼᱟ ᱾

ᱢᱟᱪᱮᱫ ᱟᱜ ᱴᱷᱟᱶ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱷᱟᱨᱚᱛ ᱫᱤᱥᱚᱢ ᱨᱮ ᱢᱟᱪᱮᱛ ᱠᱚᱣᱟᱜ ᱴᱷᱟᱶ ᱫᱚ ᱟᱹᱰᱤ ᱜᱮ ᱪᱮᱛᱟᱱ ᱨᱮ ᱾ ᱜᱩᱨᱩ ᱵᱟᱹᱠᱷᱩᱞ ᱨᱮ ᱯᱟᱹᱴᱷᱩᱣᱟᱹ ᱠᱤᱠᱚ ᱚᱞ ᱨᱟᱲᱦᱟᱣᱜ ᱠᱟᱱ ᱛᱟᱦᱮᱸᱫ ᱾ ᱜᱩᱨᱩ ᱴᱷᱮᱱ ᱠᱷᱚᱱ ᱜᱮᱭᱟᱱ ᱟᱢᱮᱴ ᱠᱟᱛᱮ ᱩᱱᱠᱩ ᱟᱠᱚᱣᱟᱜ ᱵᱟᱹᱜᱮᱭᱟᱱ ᱧᱩᱛᱟᱹᱛ ᱠᱚ ᱥᱟᱦᱟ ᱜᱤᱰᱤ ᱠᱟᱜ ᱠᱟᱱ ᱛᱟᱦᱮᱸᱱ ᱾

ᱯᱟᱹᱴᱷᱩᱣᱟᱹ ᱠᱚᱣᱟᱜ ᱵᱟᱹᱜᱮᱭᱟᱱ ᱨᱩᱯ ᱧᱩᱛᱟᱹᱛ ᱥᱟᱦᱟ ᱜᱤᱰᱤ ᱠᱟᱛᱮ ᱜᱮᱭᱟᱱ ᱨᱩᱯ ᱢᱟᱨᱥᱟᱞ ᱪᱟᱞ ᱟᱠᱚ ᱨᱮ ᱢᱟᱪᱮᱛ ᱠᱚ ᱡᱤᱛᱠᱟᱹᱨ ᱠᱚ ᱟᱢᱮᱴ ᱟᱠᱟᱫᱼᱟ ᱾

ᱡᱚᱛᱚ ᱥᱮᱨᱢᱟ ᱜᱮ ᱨᱟᱫᱷᱟᱛᱨᱤᱥᱱᱚᱱ ᱟᱜ ᱥᱚᱱᱚᱛ ᱡᱟᱱᱟᱢ ᱢᱟᱦᱟ ᱫᱚ ᱢᱟᱪᱮᱛ ᱢᱟᱦᱟ ᱞᱮᱠᱟᱛᱮ ᱢᱟᱱᱟᱣ ᱫᱟᱨᱟᱭ ᱛᱮ ᱨᱟᱫᱷᱟᱠᱨᱤᱥᱱᱚᱱ ᱫᱚ ᱟᱹᱰᱤ ᱢᱟᱹᱱ ᱢᱟᱱᱚᱛ ᱜᱮᱭ ᱪᱟᱞᱚᱜ ᱠᱟᱱᱟ ᱾ ᱩᱱᱤ ᱫᱚ ᱥᱟᱹᱨᱤ ᱛᱮᱦᱚᱸ ᱢᱤᱫ ᱢᱟᱪᱮᱫ ᱮ ᱛᱟᱦᱮᱸ ᱠᱟᱱᱟ ᱾ ᱢᱟᱦᱟᱢᱟᱱᱣᱟ ᱟᱜ ᱟᱲᱟᱝ ᱞᱮᱠᱟᱛᱮ "He who by reanimating the old can gain knowledge of the new is fit to be a teacher." ᱩᱱᱤ ᱢᱟᱦᱟ ᱢᱟᱱᱣᱟ ᱟᱜ ᱡᱤᱭᱟᱹᱫ ᱟᱲᱟᱝ ᱨᱟᱫᱷᱟᱠᱨᱤᱥᱱᱚᱱ ᱴᱷᱮᱱ ᱡᱚ-ᱵᱟᱦᱟ ᱟᱠᱟᱱᱟ ᱾

ᱟᱡᱟᱜ ᱵᱟᱹᱢᱩᱪᱟᱹᱫ ᱜᱩᱱ ᱛᱟᱦᱮᱸ ᱠᱟᱣᱟ ᱾ ᱟᱡᱟᱜ ᱜᱮᱭᱟᱱ ᱢᱟᱹᱱ ᱫᱮᱠᱷᱟᱣ ᱟᱹᱪᱩᱨ ᱫᱚ ᱢᱚᱴᱷᱮ ᱜᱮ ᱵᱟᱭ ᱠᱩᱥᱤᱭᱟᱜ ᱛᱟᱦᱮᱸᱫ ᱾ ᱟᱡᱟᱜ ᱠᱷᱟᱴᱚ ᱥᱚᱫᱚᱨ ᱫᱚ ᱩᱱᱤ ᱢᱚᱴᱷᱮ ᱵᱟᱭ ᱦᱤᱫᱤᱡᱚᱜ ᱛᱟᱦᱮᱸᱫ ᱾ ᱩᱱᱤ ᱱᱚᱶᱟ ᱫᱚ ᱟᱹᱰᱤ ᱵᱷᱟᱹᱜᱤ ᱞᱮᱠᱟᱭ ᱵᱟᱰᱟᱭ ᱛᱟᱦᱮᱸᱱ ᱫᱟᱲᱮ ᱟᱨ ᱚᱫᱷᱩᱠᱟᱨ ᱨᱮᱭᱟᱜ ᱫᱚ ᱛᱷᱚᱭ ᱜᱮ ᱵᱟᱹᱱᱩᱜ ᱟᱱᱟ ᱾ ᱜᱚᱨᱚᱵᱽ ᱨᱮᱭᱟᱜ ᱫᱟᱱᱟᱯᱟᱞ ᱞᱟᱛᱟᱨ ᱨᱮ ᱥᱟᱹᱨᱤ ᱛᱮᱫ ᱩᱠᱩ ᱠᱟᱛᱮ ᱛᱟᱦᱮᱸᱱ ᱫᱚ ᱩᱱᱤᱭ ᱦᱤᱨᱠᱟᱹ ᱟᱜ ᱠᱟᱱ ᱛᱟᱦᱮᱸᱱ ᱾

ᱢᱟᱪᱮᱛ ᱫᱚ ᱫᱷᱚᱨᱢᱚ ᱣᱟᱜ ᱨᱩᱯ ᱠᱟᱱᱟ ᱾ ᱟᱡᱟᱜ ᱛᱷᱩᱢ ᱛᱮ ᱯᱟᱹᱴᱷᱩᱣᱟᱹ ᱢᱟᱱᱣᱟᱨᱤ ᱜᱩᱱ ᱮ ᱟᱢᱮᱴ ᱫᱟᱲᱮ ᱡᱟᱝᱼᱟ ᱾ ᱢᱟᱪᱮᱛ ᱫᱟᱭᱟ ᱜᱮ ᱯᱟᱹᱴᱷᱩᱣᱟᱹ ᱫᱚ ᱥᱟᱶᱛᱟ ᱨᱮ ᱞᱟᱯᱷᱟᱝ ᱴᱷᱟᱶ ᱨᱮᱭ ᱫᱩᱲᱩᱵ ᱚᱪᱚ ᱮᱭᱟ ᱾ ᱢᱟᱪᱮᱛ ᱢᱟᱹᱱ ᱫᱚ ᱯᱟᱹᱴᱷᱩᱣᱟᱹ ᱟᱜ ᱯᱟᱞᱟᱴ ᱠᱟᱱᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱟᱦᱨᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]