ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ
| ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ Majhi Ramdas Tudu | |
|---|---|
 | |
| ᱡᱟᱱᱟᱢ | ᱒ ᱚᱠᱴᱚᱵᱚᱨ ᱑᱘᱕᱔ ᱠᱟᱹᱲᱩᱣᱟᱹᱠᱟᱴᱟ ᱟᱛᱚ, ᱥᱤᱝᱵᱷᱩᱢ, ᱡᱷᱟᱲᱠᱷᱚᱸᱰ, ᱥᱤᱧᱚᱛ |
| ᱜᱩᱨ | ᱑᱒ ᱢᱮ ᱑᱙᱕᱑ (᱙᱖ ᱵᱚᱭᱚᱥ) ᱥᱤᱧᱚᱛ |
| ᱠᱟᱹᱢᱤ | ᱚᱱᱚᱞᱤᱭᱟᱹ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱮᱪᱮᱫ | ᱢᱤᱰᱚᱞ ᱠᱞᱟᱥ |
| ᱡᱤᱭᱚᱱ ᱥᱚᱦᱮᱫ |
|
| ᱦᱚᱯᱚᱱ |
|
ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ (ᱡᱟᱱᱟᱢ: ᱒ ᱚᱠᱴᱚᱵᱚᱨ ᱑᱘᱕᱔-ᱵᱚᱸᱜᱟᱛᱟᱞᱟ: ᱑᱒ ᱢᱮ ᱑᱙᱕᱑[᱑]) ᱫᱚ ᱢᱤᱫ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱞᱮᱠᱟᱛᱮ ᱟᱹᱰᱤ ᱯᱟᱹᱦᱤᱞ ᱠᱷᱚᱱ ᱮ ᱵᱟᱰᱟᱭ ᱟᱹᱜᱩ ᱟᱠᱟᱱᱟ ᱾ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱢᱮᱱᱛᱮ ᱢᱟᱱᱟᱣ ᱨᱮᱭᱟᱜ ᱚᱡᱮ ᱫᱚ ᱟᱡᱟᱜ ᱡᱤᱭᱚᱱ ᱨᱮᱭᱟᱜ ᱜᱚᱱᱚᱝ ᱟᱱ ᱮᱱᱮᱢ "ᱠᱷᱮᱨᱣᱟᱲ ᱵᱚᱝᱥᱟ ᱫᱷᱚᱨᱚᱢ ᱯᱩᱛᱷᱤ" ᱠᱷᱟᱹᱛᱤᱨ ᱜᱮ ᱾ ᱥᱟᱹᱨᱤ ᱜᱮ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜᱼᱟ ᱨᱟᱢᱫᱟᱥ ᱴᱩᱰᱩᱣᱟᱜ ᱱᱚᱶᱟ ᱜᱟᱺᱦᱤᱨ ᱫᱤᱥ ᱦᱩᱫᱤᱥ ᱾ ᱩᱱ ᱯᱟᱹᱦᱤᱞ ᱨᱮ ᱩᱱ ᱢᱟᱨᱟᱝ ᱯᱚᱛᱚᱵ ᱥᱚᱫᱚᱨ ᱫᱚ ᱦᱩᱰᱤᱧ ᱠᱟᱛᱷᱟ ᱵᱟᱝ ᱠᱟᱱᱟ ᱾ ᱟᱹᱠᱤᱞᱟᱱ ᱚᱱᱚᱞᱤᱭᱟᱹ ᱢᱟ ᱠᱟᱱ ᱜᱮᱭᱟ ᱠᱤᱱ , ᱫᱷᱚᱨᱚᱢ ᱫᱩᱞᱟᱹᱲ, ᱡᱟᱹᱛᱤ ᱫᱩᱞᱟᱹᱲ ᱟᱨ ᱢᱟᱹᱱᱢᱤ ᱫᱩᱞᱟᱹᱲ ᱨᱮᱭᱟᱜ ᱜᱩᱱ ᱜᱮᱭ ᱥᱚᱫᱚᱨ ᱚᱴᱚ ᱟᱠᱟᱜᱼᱟ ᱱᱚᱶᱟ ᱯᱚᱛᱚᱵ ᱫᱟᱨᱟᱭ ᱛᱮ ᱟᱵᱚ ᱠᱚ ᱛᱟᱞᱟᱨᱮ ᱾ ᱫᱷᱚᱨᱚᱢ ᱜᱩᱨᱩ ᱞᱮᱠᱟᱛᱮ ᱫᱷᱚᱨᱚᱢ ᱰᱟᱦᱟᱨ ᱨᱮ ᱟᱹᱭᱩᱨ ᱥᱩᱛᱩᱜᱤᱡ ᱯᱟᱹᱦᱤᱞ ᱠᱷᱚᱱ ᱩᱱᱤ ᱜᱮ ᱾ ᱠᱷᱮᱨᱣᱟᱲ ᱵᱚᱝᱥᱚ ᱫᱷᱚᱨᱚᱢ ᱯᱩᱛᱷᱤ ᱫᱚ ᱟᱵᱚ ᱞᱟᱹᱜᱤᱫ ᱟᱹᱰᱤ ᱢᱟᱨᱟᱝ ᱥᱚᱢᱯᱚᱛᱤ ᱠᱟᱱᱟ ᱾
ᱜᱤᱫᱽᱨᱟᱹ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱮᱥᱠᱟ ᱫᱚ ᱒ ᱚᱠᱴᱚᱵᱚᱨ ᱑᱘᱕᱔ ᱥᱟᱞᱮᱨᱮᱭ ᱡᱟᱱᱟᱢ ᱞᱮᱱᱟ ᱾ ᱡᱟᱱᱟᱢ ᱟᱹᱛᱩ ᱫᱚ ᱠᱟᱹᱲᱣᱟᱹᱠᱟᱴᱟ, ᱰᱟᱠ ᱚᱲᱟᱜ - ᱨᱟᱹᱣᱛᱚᱲᱟ, ᱛᱷᱟᱱᱟ - ᱜᱷᱟᱴᱥᱤᱞᱟᱹ, ᱡᱤᱞᱞᱟ - ᱥᱤᱝᱵᱷᱩᱢ, ᱯᱚᱱᱚᱛ ᱫᱚ ᱡᱷᱟᱨᱠᱷᱚᱸᱰ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟᱣᱟᱜ ᱧᱩᱛᱩᱢ ᱫᱚ ᱢᱟᱺᱡᱷᱤ ᱥᱤᱛᱟᱹᱨᱟᱢ ᱴᱩᱰᱩ ᱟᱨ ᱡᱟᱱᱟᱢ ᱟᱭᱳᱣᱟᱜ ᱧᱩᱛᱩᱢ ᱫᱚ ᱢᱚᱡᱽᱫᱩᱨᱤ ᱴᱩᱰᱩ ᱾
ᱨᱟᱢᱫᱟᱥ ᱴᱩᱰᱩ ᱨᱤᱱ ᱫᱚ ᱯᱩᱱᱭᱟᱹ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱨᱟᱢᱫᱟᱥ ᱴᱩᱰᱩ ᱫᱚ ᱢᱟᱨᱟᱝ ᱩᱛᱟᱻᱨᱤᱡ, ᱤᱱᱟᱹ ᱛᱟᱭᱚᱢ ᱫᱚ ᱵᱟᱫᱳ ᱴᱩᱰᱩ, ᱥᱤᱫᱚ ᱴᱩᱰᱩ, ᱟᱨ ᱥᱩᱜᱽᱫᱟᱹ ᱴᱩᱰᱩ ᱫᱚ ᱦᱩᱰᱤᱧ ᱩᱛᱟᱹᱨᱤᱡ ᱾ ᱯᱩᱱ ᱵᱚᱭᱦᱟ ᱜᱮ ᱚᱞᱚᱜ ᱫᱚᱠᱚ ᱫᱩᱲᱩᱵ ᱞᱮᱱᱟ, ᱤᱠᱷᱟᱹᱱ ᱨᱟᱢᱫᱟᱥ ᱵᱟᱹᱜᱤ ᱠᱟᱛᱮ ᱮᱴᱟᱜ ᱵᱚᱭᱦᱟ ᱫᱚ ᱚᱞᱚᱜ ᱫᱚᱠᱚ ᱵᱟᱹᱜᱤᱭᱟᱫᱼᱟ ᱾
ᱨᱟᱢᱫᱟᱥ ᱴᱩᱰᱩ ᱫᱚ ᱛᱟᱱᱟᱞᱟ ᱪᱟᱱᱚᱪ ᱮ ᱥᱟᱹᱛ ᱞᱮᱜᱼᱟ ᱾ ᱠᱷᱮᱨᱣᱟᱲ ᱠᱚ ᱢᱟᱺᱫᱽ ᱨᱮ ᱨᱟᱢᱫᱟᱥ ᱴᱩᱰᱩ ᱫᱚ ᱛᱟᱱᱟᱞᱟ ᱪᱟᱱᱚᱪ ᱮ ᱥᱟᱹᱛ ᱞᱮᱫ ᱠᱷᱟᱹᱛᱤᱨ ᱥᱩᱨ ᱥᱟᱺᱜᱤᱧ, ᱴᱚᱞᱟ ᱯᱟᱲᱟ ᱨᱤᱱ ᱟᱭᱢᱟ ᱦᱚᱲ ᱟᱡ ᱧᱮᱧᱮᱞ ᱠᱚ ᱦᱟᱹᱡᱩᱜ ᱠᱟᱱ ᱛᱟᱦᱮᱸᱱ ᱾ ᱨᱟᱢᱫᱟᱥ ᱴᱩᱰᱩᱭᱤᱡ ᱡᱟᱱᱟᱢ ᱵᱟᱵᱟᱭ ᱜᱩᱨ ᱮᱱ ᱛᱟᱭᱚᱢ ᱜᱷᱟᱨᱚᱸᱡᱽ ᱨᱤᱱᱤᱡ ᱢᱟᱨᱟᱝ ᱦᱚᱯᱚᱱ ᱞᱮᱠᱟᱛᱮ ᱟᱡ ᱜᱮ ᱜᱷᱟᱨᱚᱸᱡᱽ ᱨᱮᱭᱟᱜ ᱡᱚᱛᱚ ᱞᱮᱠᱟᱱ ᱟᱺᱜᱤᱵᱷᱟᱨ ᱜᱚᱜ ᱦᱩᱭ ᱟᱫᱮᱭᱟ ᱾ ᱨᱮᱸᱜᱮᱡ ᱜᱷᱟᱨᱚᱸᱡᱽ ᱡᱤᱭᱚᱱ ᱨᱮ ᱟᱹᱰᱤ ᱞᱮᱠᱟᱱ ᱫᱩᱠ, ᱟᱱᱟᱴ, ᱦᱟᱨᱠᱮᱛ , ᱥᱟᱥᱮᱛ ᱥᱟᱦᱟᱣ ᱠᱟᱛᱮ ᱡᱤᱭᱚᱱ ᱮ ᱠᱷᱮᱢᱟᱣ ᱞᱮᱜᱼᱟ ᱾ ᱨᱟᱢᱫᱟᱥ ᱴᱩᱰᱩ ᱫᱚ ᱠᱟᱹᱲᱣᱟᱹᱠᱟᱴᱟ ᱨᱤᱱ ᱡᱚᱛᱚ ᱦᱚᱲ ᱛᱮ ᱢᱟᱺᱡᱷᱤ ᱞᱮᱠᱟ ᱠᱚ ᱵᱟᱦᱟᱞ ᱠᱮᱫᱮᱭᱟ ᱾ ᱟᱹᱛᱩ ᱦᱚᱲᱟᱜ ᱠᱟᱹᱭᱡᱟᱹ ᱥᱮ ᱵᱟᱜᱟᱯᱟᱱ ᱠᱚᱫᱚ ᱟᱹᱰᱤ ᱱᱟᱯᱟᱭ ᱛᱮᱭ ᱥᱚᱞᱦᱮ ᱥᱟᱹᱛ ᱞᱮᱜᱼᱟ ᱾ ᱟᱹᱛᱩ ᱴᱚᱞᱟ ᱯᱟᱲᱟ ᱨᱮ ᱞᱮᱠᱢᱟᱹᱱ ᱵᱤᱪᱟᱹᱨᱤᱭᱟᱹ ᱞᱮᱠᱟᱛᱮ ᱧᱩᱛᱩᱢ ᱯᱟᱥᱱᱟᱣ ᱮᱱ ᱛᱟᱭᱟ ᱾ ᱤᱱᱟᱹ ᱛᱟᱭᱚᱢ ᱫᱟᱢᱯᱟᱲᱟ ᱚᱧᱪᱚᱞᱟ ᱨᱤᱱᱤᱡ ᱯᱟᱨᱜᱟᱱᱟ ᱞᱮᱠᱟ ᱛᱮᱠᱚ ᱵᱟᱪᱷᱚᱱ ᱠᱮᱫᱮᱭᱟ ᱾ ᱫᱟᱢᱯᱟᱲᱟ ᱚᱧᱪᱚᱞᱟ ᱨᱤᱱ ᱥᱩᱨ ᱥᱩᱯᱩᱨ ᱢᱟᱺᱡᱷᱤ ᱠᱚ ᱥᱟᱶ ᱥᱟᱶᱛᱟ ᱠᱟᱹᱢᱤ ᱨᱮ ᱡᱚᱦᱚᱲ ᱮ ᱛᱟᱦᱮᱸ ᱮᱱᱟ ᱾
ᱯᱷᱩᱨᱜᱟᱹᱞ ᱱᱟᱜᱟᱢ ᱨᱮ ᱨᱟᱢᱫᱟᱥ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱨᱟᱢᱫᱟᱥ ᱴᱩᱰᱩ ᱥᱟᱢᱟᱝ ᱠᱷᱚᱱ ᱵᱟᱝ ᱠᱟᱛᱮ ᱯᱟᱹᱪᱷᱞᱟᱹ ᱠᱷᱚᱱ ᱞᱟᱹᱲᱦᱟᱹᱭ ᱨᱮᱭ ᱥᱮᱞᱮᱫ ᱠᱚᱜᱼᱟ ᱾ ᱡᱮᱢᱚᱱ ᱵᱨᱤᱴᱤᱥ ᱥᱚᱨᱠᱟᱨ ᱟᱞᱚᱭ ᱵᱟᱰᱟᱭ ᱧᱟᱢ ᱢᱟ ᱾ ᱵᱨᱤᱴᱤᱥ ᱠᱚ ᱱᱚᱶᱟ ᱵᱟᱰᱟᱭ ᱧᱟᱢ ᱠᱟᱛᱮ ᱠᱷᱟᱡᱽᱱᱟ ᱡᱟᱣᱨᱟᱭᱤᱡ ᱞᱮᱠᱟᱛᱮ ᱪᱟᱹᱠᱨᱤ ᱠᱚ ᱮᱢᱟ ᱫᱮᱭᱟ ᱾ ᱪᱟᱹᱠᱨᱤ ᱨᱮᱭᱟᱜ ᱠᱟᱹᱢᱤ ᱛᱟᱭ ᱫᱚ ᱛᱟᱦᱮᱸ ᱠᱟᱱᱟ ᱫᱷᱚᱞᱵᱷᱩᱢᱜᱚᱲ ᱨᱟᱡᱤᱥᱴᱮᱰ ᱨᱮ ᱵᱨᱤᱴᱤᱥ ᱞᱟᱹᱜᱤᱫ ᱠᱷᱟᱡᱽᱱᱟ ᱟᱹᱫᱟᱹᱭ ᱟᱨ ᱦᱟᱥᱟ ᱦᱤᱥᱟᱹᱵᱽ ᱵᱮᱥ ᱫᱚᱦᱚᱭ ᱾ ᱵᱨᱤᱴᱤᱥ ᱥᱚᱨᱠᱟᱨᱟᱜ ᱱᱟᱦᱟᱪᱟᱨ ᱟᱵᱚ ᱪᱮᱛᱟᱱ ᱨᱮ ᱵᱟᱭ ᱧᱮᱞ ᱥᱟᱦᱟᱣ ᱫᱟᱲᱮᱭᱟᱫ ᱛᱮ ᱠᱷᱟᱡᱽᱱᱟ ᱟᱹᱫᱟᱹᱭ ᱪᱟᱹᱠᱨᱤ ᱫᱚᱭ ᱵᱟᱹᱜᱤᱭᱟᱫᱼᱟ ᱾ ᱤᱥᱟᱹᱭ ᱫᱷᱚᱨᱚᱢ ᱵᱟᱹᱜᱤ ᱠᱟᱛᱮ ᱥᱟᱨᱱᱟ ᱫᱷᱚᱨᱚᱢ ᱛᱮᱭ ᱨᱩᱣᱟᱹᱲ ᱦᱮᱡ ᱮᱱᱟ ᱾
᱑᱙᱐᱐ ᱥᱟᱞ ᱚᱜᱚᱥᱴ ᱨᱮ ᱢᱩᱸᱰᱟᱹ ᱩᱞᱜᱩᱞᱟᱹᱱ ᱛᱮ ᱨᱟᱺᱪᱤ ᱡᱩᱞᱩᱜ ᱠᱟᱱ ᱛᱟᱦᱮᱸᱱ ᱾ ᱩᱱ ᱡᱚᱦᱚᱜ ᱨᱟᱢᱫᱟᱥ ᱫᱚ ᱵᱨᱤᱴᱤᱥ ᱦᱚᱛᱮᱛᱮ ᱫᱤᱥᱚᱢ ᱵᱟᱹᱭᱨᱤ ᱢᱮᱱᱛᱮᱭ ᱞᱮᱠᱷᱟ ᱚᱪᱚ ᱮᱱ ᱠᱷᱟᱱ ᱡᱤᱣᱤ ᱡᱟᱞᱟ ᱫᱟᱢᱯᱟᱲᱟ ᱠᱷᱚᱱ ᱯᱩᱨᱩᱞᱤᱭᱟᱹ ᱡᱤᱞᱞᱟᱹ ᱨᱮᱭᱟᱜ ᱟᱡᱳᱫᱤᱭᱟᱹ ᱵᱩᱨᱩ ᱨᱮ ᱯᱩᱱ ᱥᱮᱨᱢᱟ ᱠᱷᱟᱴᱟᱣ ᱠᱟᱛᱮ ᱟᱨ ᱦᱚᱸ ᱥᱤᱝᱵᱷᱩᱢ ᱟᱹᱛᱩ ᱫᱤᱥᱚᱢ ᱛᱮᱭ ᱨᱩᱣᱟᱹᱲ ᱥᱮᱱ ᱮᱱᱟ ᱾
ᱪᱚᱠᱨᱚᱫᱷᱚᱨᱯᱩᱨ ᱛᱷᱟᱱᱟ ᱥᱟᱢᱟᱝ ᱢᱤᱫ ᱢᱤᱫ ᱯᱟᱛᱟᱨᱮ ᱠᱷᱮᱨᱣᱟᱲ ᱵᱚᱝᱥᱟ ᱫᱷᱚᱨᱚᱢ ᱯᱩᱛᱷᱤ ᱨᱮᱭᱟᱜ ᱢᱤᱫ ᱦᱟᱹᱴᱤᱧ ᱜᱮᱞᱵᱟᱨ ᱥᱟᱠᱟᱢ ᱨᱮᱭᱟᱜ ᱡᱚᱦᱚᱜ ᱢᱤᱫ ᱯᱩᱞᱤᱥ ᱮ ᱮᱴᱠᱮᱴᱚᱬᱮ ᱠᱮᱫᱮ ᱠᱷᱟᱱ ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ ᱫᱚ ᱢᱤᱫ ᱛᱷᱟᱯᱟ ᱮᱢ ᱠᱟᱛᱮᱭ ᱫᱟᱹᱲ ᱞᱮᱜᱼᱟ ᱾ ᱛᱟᱭᱚᱢ ᱛᱮ ᱥᱟᱵ ᱠᱟᱛᱮ ᱫᱤᱥᱚᱢ ᱵᱟᱹᱭᱨᱤ ᱢᱮᱱᱛᱮ ᱩᱯᱨᱩᱢ ᱠᱟᱛᱮ ᱢᱟᱢᱞᱟ ᱠᱚ ᱡᱚᱲᱟᱣ ᱟᱫᱮᱭᱟ ᱾ ᱱᱟᱦᱟᱪᱟᱨ ᱞᱮᱫᱮᱭᱟᱠᱚ ᱤᱠᱷᱟᱹᱱ ᱪᱮᱫ ᱦᱚᱸ ᱥᱟᱹᱵᱩᱛ ᱵᱟᱝ ᱛᱮ ᱟᱲᱟᱜ ᱠᱟᱫᱮᱭᱟ ᱠᱚ ᱾ ᱜᱚᱴᱟ ᱫᱤᱥᱚᱢ ᱯᱟᱲᱟ ᱜᱮ ᱯᱷᱩᱨᱜᱟᱹᱞ ᱞᱟᱲᱟᱣᱱᱟ ᱵᱟᱠᱷᱨᱟᱭ ᱫᱩᱞ ᱫᱩᱞᱟᱹᱣ ᱞᱮᱜᱼᱟ ᱾ ᱫᱚᱥᱟᱨ ᱫᱷᱟᱹᱨᱛᱤ ᱦᱩᱞ ᱮᱛᱚᱦᱚᱵ ᱮᱱ ᱵᱮᱲᱟᱨᱮ ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ ᱫᱟᱢᱯᱟᱲᱟ ᱠᱷᱚᱱ ᱮ ᱫᱟᱹᱲ ᱞᱮᱜᱼᱟ ᱾ ᱟᱡᱟᱜ ᱛᱚᱞᱟᱥ ᱵᱟᱝ ᱠᱚ ᱧᱟᱢ ᱞᱮᱫ ᱛᱟᱭᱟ ᱾
ᱫᱤᱥᱚᱢ ᱥᱟᱸᱜᱷᱟᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱱᱚᱝᱠᱟ ᱛᱮ ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ ᱫᱚ ᱟᱨᱮ ᱜᱮᱞ ᱵᱟᱨ ᱥᱮᱨᱢᱟ ᱩᱢᱮᱨ ᱨᱮ ᱟᱪᱠᱟ ᱜᱮ ᱜᱷᱟᱨᱚᱸᱡᱽ ᱨᱮᱭᱟᱜ ᱫᱟᱭᱟ ᱫᱩᱞᱟᱹᱲ ᱵᱟᱹᱜᱤ ᱠᱟᱛᱮ ᱡᱩᱜᱤ ᱥᱟᱹᱫᱷᱩ ᱵᱷᱮᱥ ᱛᱮ ᱵᱷᱟᱨᱚᱛ ᱫᱤᱥᱚᱢ ᱨᱮᱭᱟᱜ ᱟᱥᱟᱢ, ᱵᱮᱸᱜᱚᱞ, ᱠᱟᱢᱨᱩᱯ, ᱩᱛᱚᱨᱯᱨᱚᱫᱮᱥ, ᱵᱤᱦᱟᱨ, ᱩᱰᱤᱥᱟ ᱯᱚᱱᱚᱛ ᱠᱚ ᱥᱟᱸᱜᱷᱟᱨ ᱯᱩᱨᱟᱹᱣ ᱠᱟᱛᱮ ᱟᱨ ᱦᱚᱸ ᱵᱮᱸᱜᱚᱞ ᱨᱮᱭᱟᱜ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱟᱡᱳᱫᱤᱭᱟᱹ ᱵᱩᱨᱩ ᱛᱮᱭ ᱦᱮᱡ ᱨᱩᱣᱟᱹᱲ ᱮᱱᱟ ᱾ ᱟᱡᱳᱫᱤᱭᱟᱹ ᱵᱩᱨᱩ ᱨᱮᱜᱮ ᱯᱩᱱ ᱥᱮᱨᱢᱟ ᱞᱮᱠᱟᱭ ᱛᱟᱦᱮᱸ ᱠᱟᱱᱟ ᱫᱷᱮᱭᱟᱱ ᱞᱟᱹᱜᱤᱫ ᱾ ᱫᱷᱮᱭᱟᱱ ᱛᱩᱞᱩᱡ ᱜᱮ ᱟᱡᱟᱜ ᱡᱤᱣᱤ ᱫᱚ ᱩᱰᱩᱠ ᱞᱮᱱ ᱛᱟᱭᱟ ᱾ ᱩᱱ ᱡᱚᱦᱚᱜ ᱫᱚ ᱟᱡᱟᱜ ᱩᱢᱮᱨ ᱟᱨᱮ ᱜᱮᱞ ᱮᱭᱟᱭ ᱥᱮᱨᱢᱟ ᱛᱟᱦᱮᱸ ᱠᱟᱱᱟ ᱾ ᱑᱒ ᱢᱮ ᱑᱙᱕᱑ ᱥᱟᱞᱮᱨᱮ ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ ᱫᱚ ᱟᱵᱚ ᱡᱟᱭᱡᱩᱜᱽ ᱞᱟᱹᱜᱤᱫ ᱱᱚᱶᱟ ᱫᱷᱟᱹᱨᱛᱤᱯᱩᱨᱤ ᱠᱷᱚᱱ ᱮ ᱵᱟᱹᱜᱤ ᱟᱫ ᱵᱚᱱᱟ ᱾ ᱢᱮᱱᱠᱷᱟᱱ ᱟᱡᱟᱜ ᱜᱚᱱᱚᱝ ᱟᱱ ᱮᱱᱮᱢ ᱦᱚᱛᱮᱛᱮ ᱟᱡ ᱫᱚ ᱟᱵᱚ ᱠᱚ ᱛᱟᱞᱟᱨᱮ ᱡᱟᱭᱡᱩᱜᱽ ᱡᱤᱭᱟᱹᱛ ᱜᱮᱭ ᱛᱟᱦᱮᱸᱱᱟ ᱾
ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ↑ "ᱠᱷᱮᱨᱣᱟᱞ ᱵᱚᱝᱥᱚ ᱫᱷᱚᱨᱚᱢ ᱯᱩᱛᱷᱤ ᱚᱱᱚᱞᱤᱭᱟᱹ". Archived from the original on 2019-09-30. Retrieved 2019-09-30.