ᱱᱟᱭᱠᱮ

ᱟᱹᱛᱩ ᱛᱮᱸᱜᱮᱱ ᱮᱱ ᱛᱟᱭᱚᱢ ᱠᱷᱟᱱ ᱜᱮ ᱟᱹᱛᱩ ᱨᱮ ᱵᱚᱸᱜᱟ ᱵᱳᱨᱳ ᱛᱚᱨᱟᱣ ᱞᱟᱹᱜᱤᱫ ᱛᱮ ᱢᱤᱫ ᱦᱚᱲ ᱵᱚᱸᱜᱟ ᱵᱳᱨᱳ ᱠᱚ ᱛᱩᱞᱩᱡ ᱠᱚ ᱵᱚ ᱵᱟᱪᱷᱟᱣ ᱮᱭᱟ ᱾ ᱩᱱᱤ ᱜᱮ ᱱᱟᱭᱠᱮ ᱢᱮᱱᱛᱮ ᱵᱚ ᱢᱮᱛᱟᱭᱟ ᱾

ᱡᱟᱭᱛᱮᱫ

ᱟᱹᱛᱩ ᱨᱮᱱᱟᱜ ᱱᱟᱭ ᱠᱟᱹᱢᱤ ᱛᱚᱨᱟᱣ ᱦᱚᱲ ᱜᱮ ᱱᱟᱭᱠᱮ ᱫᱚ ᱾ ᱟᱹᱛᱩ ᱴᱚᱞᱟ ᱨᱮ ᱚᱠᱟ ᱞᱮᱠᱟᱛᱮ ᱦᱤᱥᱟᱹᱼᱦᱤᱯᱥᱟᱹ ᱦᱚᱭᱼᱦᱤᱥᱤᱫᱹ ᱨᱚᱜᱽᱼᱟᱡᱟᱨ ᱟᱞᱚ ᱵᱚᱞᱚᱱ ᱠᱷᱟᱹᱛᱤᱨ ᱟᱹᱛᱩ ᱨᱮ ᱢᱤᱫ ᱡᱟᱦᱮᱨ ᱛᱟᱦᱮᱸᱱᱟ ᱾ ᱚᱸᱰᱮ ᱟᱵᱚ ᱨᱤᱱ ᱵᱚᱸᱜᱟ ᱵᱳᱨᱳ ᱵᱚᱱ ᱛᱷᱟᱯᱚᱱ ᱟᱠᱟᱫ ᱠᱚᱣᱟ ᱾ ᱩᱱᱠᱩ ᱠᱚ ᱥᱮᱵᱟ ᱫᱮᱵᱟ ᱠᱚ ᱞᱟᱹᱜᱤᱱ ᱛᱮ ᱢᱤᱫ ᱦᱚᱲ ᱵᱚᱱ ᱵᱟᱪᱷᱟᱣ ᱟᱠᱟᱫ ᱫᱮᱭᱟ ᱾ ᱩᱱᱤ ᱫᱚ ᱱᱟᱭᱠᱮ ᱵᱟᱵᱟ ᱢᱮᱱᱛᱮ ᱵᱚ ᱢᱮᱛᱟᱭ ᱠᱟᱱᱟ ᱾ ᱩᱱᱤ ᱟᱵᱚ ᱟᱹᱛᱩ ᱴᱚᱞᱟᱹ ᱨᱤᱱ ᱟᱨ ᱥᱤᱢᱟᱹ ᱥᱟᱲᱮ ᱨᱤᱱ ᱵᱚᱸᱜᱟ ᱵᱳᱨᱳ ᱠᱚᱭ ᱥᱚᱡᱷᱮ ᱠᱚᱛᱮ ᱟᱵᱚ ᱠᱚ ᱵᱷᱟᱹᱞᱟᱹᱭ ᱨᱮ ᱫᱚᱦᱚ ᱵᱚᱱᱟ ᱾

ᱱᱟᱭᱠᱟ

ᱱᱟᱭᱠᱮ ᱵᱟᱵᱟ ᱛᱤᱱᱟᱹᱜ ᱮ ᱱᱤᱨᱚᱲ ᱟᱨ ᱨᱟᱹᱥᱠᱟᱹ ᱨᱮ ᱵᱚᱸᱜᱟ ᱵᱳᱨᱳ ᱠᱚᱭ ᱫᱚᱦᱚ ᱠᱚᱣᱟ ᱟᱵᱚ ᱦᱚᱸ ᱟᱹᱛᱩ ᱴᱚᱞᱟ ᱨᱮ ᱩᱱᱟᱹᱜ ᱨᱟᱹᱥᱠᱟᱹ ᱟᱨ ᱥᱩᱞᱩᱠ ᱨᱮᱵᱚ ᱛᱟᱦᱮᱸᱱᱟ ᱾ ᱚᱱᱟ ᱤᱫᱤ ᱛᱮ ᱵᱟᱦᱟ ᱥᱚᱦᱨᱟᱭ ᱵᱚᱸᱜᱟ ᱵᱳᱨᱳ ᱠᱚᱵᱚ ᱯᱮᱨᱮᱡ ᱩᱢᱟᱹᱬ ᱠᱚᱣᱟ ᱾

ᱠᱟᱭᱠᱟ

ᱱᱟᱭᱠᱮ ᱵᱟᱵᱟ ᱡᱩᱫᱤ ᱱᱚᱣᱟᱠᱚ ᱡᱩᱛ ᱥᱟᱺᱦᱤᱸᱡ ᱵᱟᱭ ᱛᱚᱨᱟᱣᱟ ᱟᱹᱛᱩ ᱴᱚᱞᱟᱨᱮ ᱨᱚᱜᱽ ᱟᱡᱟᱨ ᱵᱚᱞᱚᱱᱟ ᱟᱨ ᱦᱤᱥᱟᱹ ᱦᱤᱯᱥᱟᱹ ᱦᱚᱸ ᱰᱷᱮᱨᱚᱜᱼᱟ ᱾ ᱟᱹᱛᱩ ᱴᱚᱞᱟ ᱨᱮ ᱥᱩᱞᱩᱠ ᱜᱮ ᱵᱟᱭ ᱛᱟᱦᱮᱸᱱᱟ᱾

ᱢᱩᱪᱟᱹᱫ

ᱟᱵᱚ ᱨᱤᱱ ᱵᱚᱸᱜᱟ ᱵᱳᱨᱳ ᱫᱚ ᱟᱹᱰᱤ ᱠᱚ ᱠᱮᱴᱮᱡᱼᱟ ᱾ᱟᱵᱚ ᱵᱚ ᱥᱮᱵᱟ ᱫᱮᱵᱟ ᱞᱮᱠᱚ ᱠᱷᱟᱱ ᱟᱵᱚ ᱦᱚᱸ ᱦᱟᱹᱥᱤ ᱠᱷᱩᱥᱤ ᱛᱮ ᱚᱠᱛᱚ ᱵᱚ ᱠᱷᱮᱢᱟᱣ ᱠᱮᱭᱟ ᱟᱨ ᱟᱹᱰᱷᱟᱹᱨᱩ ᱵᱟᱹᱰᱷᱟᱹᱨᱩ ᱫᱷᱟᱹᱵᱤᱡ ᱵᱚ ᱵᱟᱦᱟᱣᱜᱼᱟ ᱾