ᱵᱮᱵᱷᱟᱨᱤᱭᱟᱹ:Fagu Baskey/sandbox/ᱫᱷᱚᱨᱢᱚ
ᱫᱷᱚᱨᱢᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱫᱷᱚᱨᱢᱚ, ᱡᱟᱦᱟᱸᱭ ᱫᱚ ᱚᱣᱟᱝ ᱮ ᱚᱯᱮᱞ ᱟᱠᱟᱫᱟ, ᱥᱮᱨᱢᱟᱭ ᱥᱤᱨᱡᱚᱱ ᱟᱠᱟᱫᱟ, ᱤᱯᱤᱞ ᱮᱝᱜᱮᱞ ᱮ ᱠᱷᱚᱧᱡᱟ ᱟᱠᱟᱫ ᱠᱚᱣᱟ, ᱱᱚᱣᱟ ᱚᱛᱮᱛ ᱮ ᱛᱮᱭᱟᱨ ᱟᱠᱟᱟᱫᱟ ᱾ ᱡᱟᱦᱟᱸᱭ ᱫᱚ ᱯᱤᱞᱪᱩ ᱛᱮᱠᱤᱱ ᱮ ᱥᱤᱨᱤᱡᱽ ᱟᱠᱟᱫ ᱠᱤᱱ ᱥᱟᱶᱛᱮ ᱟᱹᱠᱤᱱᱟᱜ ᱟᱞᱟᱝ ᱨᱮ ᱨᱚᱲ ᱫᱟᱲᱮ ᱨᱮᱵᱮᱫ ᱟᱫ ᱠᱤᱱᱟ, ᱢᱮᱫ ᱨᱮ ᱧᱮᱧᱟᱢ ᱫᱟᱲᱮ ᱪᱟᱞᱟᱫ ᱠᱤᱱᱟ, ᱞᱩᱛᱩᱨ ᱨᱮ ᱟᱧᱡᱚᱱ ᱫᱟᱲᱮ ᱮᱢᱟᱫ ᱠᱤᱱᱟ ᱾ ᱩᱱᱤ ᱫᱷᱚᱨᱢᱚ ᱜᱚᱥᱟᱸᱭ ᱜᱮ ᱟᱵᱚᱣᱟᱜ ᱞᱟᱭ ᱞᱟᱠᱪᱟᱨ, ᱫᱷᱚᱨᱚᱢ ᱠᱚᱨᱚᱢ, ᱟᱪᱟᱨ ᱵᱤᱪᱟᱹᱨ, ᱨᱟᱭ ᱨᱤᱛ, ᱥᱮᱨᱣᱟ ᱥᱤᱨᱤ ᱯᱤᱞᱪᱩ ᱛᱮᱠᱤᱱ ᱮ ᱞᱟᱹᱭ ᱥᱮᱪᱮᱫᱟᱫ ᱠᱤᱱᱟ; ᱡᱟᱦᱟᱸ ᱫᱚ ᱱᱤᱛᱚᱜ ᱦᱚᱸ ᱟᱵᱚᱣᱟᱜ ᱥᱟᱶᱛᱟ ᱨᱮ ᱡᱤᱣᱤᱫ ᱢᱮᱱᱟᱜ ᱜᱮᱭᱟ ᱾ *** ᱯᱤᱞᱪᱩ ᱛᱮᱠᱤᱱ ᱨᱮᱹᱱ ᱦᱚᱯᱚᱱ ᱟᱜ ᱟᱹᱨᱡᱤ ᱞᱮᱠᱟᱛᱮ ᱫᱷᱚᱨᱢᱚ ᱜᱚᱥᱟᱸᱭ ᱚᱱᱟ ᱠᱚ ᱟᱨᱦᱚᱸ ᱫᱚᱦᱲᱟᱭ ᱞᱟᱹᱭ ᱟᱠᱚ ᱠᱟᱱᱟ ᱫᱷᱚᱨᱚᱢ ᱟᱠᱷᱲᱟ ᱨᱮ ᱾ ᱯᱤᱞᱪᱩ ᱨᱮᱹᱱ ᱦᱚᱯᱚᱱ ᱠᱚ ᱫᱷᱚᱨᱢᱚ ᱫᱚ ᱛᱟᱛᱟ ᱢᱮᱱᱛᱮ ᱠᱚ ᱦᱚᱦᱚᱣᱟᱭ ᱛᱟᱦᱮᱸᱫ ᱾
(ᱢᱤᱫ)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱚᱻ ᱛᱟᱛᱟ ᱞᱟᱹᱭ ᱟᱞᱮ ᱢᱮ ᱠᱟᱛᱷᱟ ᱚᱛ ᱨᱮᱞᱮ ᱡᱟᱱᱟᱢ ᱮᱱᱟ ᱚᱠᱟ ᱞᱮᱠᱟ ᱞᱮ ᱠᱟᱹᱢᱤᱭᱟ ᱪᱮᱞᱠᱟ ᱞᱮ ᱟᱪᱟᱨ ᱵᱮᱵᱷᱟᱨ ᱟ?
ᱛᱷᱩᱢᱟᱱ ᱯᱮᱦᱚ ᱥᱟᱱᱟᱢ ᱛᱮᱦᱚᱵ ᱠᱮᱫᱟᱭ ᱦᱟᱲᱟᱢ ᱛᱷᱤᱨ ᱛᱷᱟᱨ ᱮᱱ ᱠᱚ ᱥᱟᱱᱟᱢ ᱛᱟᱛᱟᱣᱟᱜ ᱠᱟᱛᱷᱟ ᱟᱧᱡᱚᱢ ᱞᱟᱜᱟᱱ ᱾
ᱜᱤᱫᱟᱹᱨ ᱨᱮ ᱟᱵᱟ ᱛᱮᱠᱤᱱ ᱜᱟᱛᱮ ᱜᱟᱯᱟᱛᱮ ᱛᱟᱦᱮᱸ ᱠᱟᱱ ᱠᱤᱱ ᱜᱚᱝ ᱜᱚᱫᱽ ᱠᱤᱱ ᱜᱚᱰᱟᱹᱧ ᱠᱤᱱ ᱤᱧᱤᱧ ᱦᱚᱦᱚ ᱜᱚᱫ ᱟᱹᱠᱤᱱ ᱠᱷᱟᱱ ᱾
ᱞᱟᱹᱭ ᱟᱯᱮ ᱠᱟᱱᱟᱹᱧ ᱱᱚᱶᱟ ᱠᱟᱛᱷᱟ ᱞᱩᱛᱩᱨ ᱵᱤᱫ ᱠᱟᱛᱮ ᱨᱮ ᱵᱟᱵᱟ ᱞᱟᱜᱟᱣ ᱠᱟᱛᱮ ᱢᱚᱱ ᱡᱤᱭᱚᱱ ᱟᱸᱧᱡᱚᱢ ᱯᱮ ᱱᱚᱶᱟ ᱜᱩᱯᱩᱛ ᱠᱟᱛᱷᱟ ᱾
ᱟᱵᱟ ᱛᱮᱠᱤᱱ ᱤᱧ ᱞᱟᱹᱭᱟᱫ ᱠᱤᱱ ᱛᱟᱦᱮᱸᱫ ᱟᱯᱮ ᱫᱚᱦᱲᱟᱹᱧ ᱞᱟᱭ ᱟᱯᱮ ᱠᱟᱱ ᱟᱞᱚᱯᱮ ᱦᱤᱲᱤᱧ ᱢᱚᱴᱷᱮ ᱱᱚᱶᱟ ᱫᱚ ᱟᱪᱮᱫ ᱠᱚᱜᱮ ᱞᱟᱹᱭ ᱟᱠᱚ ᱯᱮ ᱾
ᱠᱟᱹᱢᱤᱧ ᱦᱟᱹᱴᱤᱧ ᱟᱯᱮ ᱯᱩᱭᱞᱩ ᱨᱮᱫᱚ ᱠᱤᱥᱠᱩ ᱠᱚᱫᱚ ᱨᱟᱡᱟᱜ ᱟᱠᱚ ᱠᱟᱨᱵᱟᱨ ᱟᱠᱚ ᱵᱟᱥᱠᱮ ᱫᱚ ᱨᱩᱥᱤᱠᱟᱜ ᱟᱠᱚ ᱴᱩᱰᱩ ᱯᱟᱹᱨᱤᱥ ᱫᱚ ᱾
ᱡᱮᱛᱮ ᱡᱷᱚᱱ ᱢᱟᱨᱟᱝ ᱦᱟᱸᱥᱫᱟᱜ ᱫᱚ ᱡᱚᱛᱚᱣᱟᱜ ᱨᱮᱭᱟᱜ ᱟᱪᱟᱨ ᱵᱤᱪᱟᱹᱨ ᱠᱚ ᱡᱟᱦᱟᱸᱱ ᱱᱮᱭᱟᱶ ᱛᱟᱯᱟᱢ ᱠᱷᱚᱱᱟᱜ ᱨᱟᱡᱽ ᱟᱹᱨᱤ ᱠᱟᱛᱷᱟ ᱥᱚᱞᱦᱮ ᱟᱠᱚ ᱾
ᱢᱩᱨᱢᱩ ᱫᱚᱭ ᱦᱟᱸᱥᱫᱟᱜ ᱥᱩᱛᱩᱜ ᱠᱟᱱ ᱢᱟᱹᱱᱢᱤ ᱛᱟᱞᱟ ᱨᱮ ᱵᱚᱸᱜᱟ ᱠᱟᱱ ᱢᱟᱹᱱ ᱥᱚᱢᱢᱟᱱ ᱦᱚᱸ ᱢᱮᱱᱟᱜ ᱛᱟᱭ ᱵᱟᱸᱜᱟ ᱫᱮᱵᱟ ᱥᱮᱵᱟ ᱠᱟᱹᱢᱤ ᱛᱟᱭ ᱾
ᱤᱧᱤᱧ ᱦᱤᱡᱩᱜ ᱠᱟᱱ ᱟᱯᱮ ᱪᱤᱨᱜᱟᱹᱞ ᱞᱟᱜᱟᱱ ᱤᱠᱷᱟᱹᱱ ᱟᱯᱮ ᱯᱮ ᱛᱷᱤᱨ ᱠᱚᱜ ᱠᱷᱟᱱ ᱤᱱᱠᱟᱹ ᱜᱮᱯᱮ ᱛᱟᱦᱮᱸ ᱠᱚᱜ ᱾ ᱛᱷᱤᱨᱠᱚᱜ- ᱢᱚᱪᱟ ᱨᱮ ᱦᱟᱹᱠᱩ ᱟᱡ ᱛᱮᱫᱚ ᱵᱟᱭ ᱵᱚᱞᱚᱱ ᱾
ᱥᱚᱨᱮᱱ ᱫᱚ ᱠᱚ ᱞᱟᱹᱲᱦᱟᱹᱭᱟ ᱥᱤᱯᱟᱹᱦᱤ ᱠᱚ ᱵᱤᱠᱟᱹᱣᱜ-ᱟ ᱥᱚᱨᱚᱜᱽ ᱠᱚ ᱥᱮᱱᱚᱜ ᱜᱩᱨᱚᱜ ᱠᱷᱟᱱ ᱫᱚ ᱡᱤᱛᱠᱟᱹᱨᱚᱜ ᱠᱷᱟᱱ ᱫᱚ ᱚᱛ ᱠᱚ ᱵᱷᱩᱧᱡᱟᱹᱣ ᱾
ᱦᱮᱢᱵᱽᱨᱚᱢ ᱫᱚᱠᱚ ᱫᱮᱣᱟᱱᱚᱜ-ᱟ ᱦᱩᱰᱤᱧ ᱵᱮᱥᱨᱟ ᱫᱚᱭ ᱱᱟᱹᱪᱱᱤᱜ-ᱟ ᱦᱤᱥᱟᱹᱵᱽ ᱱᱤᱠᱟᱹᱥ ᱛᱮ ᱢᱟᱹᱨᱰᱤ- ᱯᱟᱹᱨᱤᱥ ᱫᱚᱭ ᱠᱤᱥᱟᱹᱬᱚᱜ-ᱟ ᱜᱚᱭ ᱾
ᱧᱩᱬᱩᱡ ᱠᱚ ᱧᱩᱭ ᱞᱮᱠᱟ ᱩᱯᱤ ᱧᱩ ᱡᱚᱝ ᱯᱮ ᱱᱚᱶᱟ ᱠᱟᱛᱷᱟ ᱧᱤᱫᱤᱨ ᱞᱮᱠᱟ ᱵᱩᱱᱩᱢ ᱨᱮ ᱞᱮᱛᱟᱲ ᱵᱟᱝ ᱛᱟᱦᱮᱸ ᱠᱟᱛᱮ ᱯᱷᱩᱨᱜᱟᱹᱞᱚᱜ ᱯᱮ ᱾
ᱨᱚᱦᱚᱲ ᱫᱟᱨᱮ ᱨᱮ ᱫᱟᱜ ᱫᱩᱞ ᱡᱟᱦᱟᱸ ᱨᱟᱹᱥᱠᱟᱹ ᱵᱟᱹᱱᱩᱜ ᱴᱷᱮᱱ ᱜᱮᱭᱟᱱ ᱞᱟᱹᱭ ᱛᱟᱦᱟᱸ ᱨᱮᱝᱜᱮᱡᱚᱜ-ᱟᱭ ᱡᱟᱦᱟᱸᱭ ᱜᱮᱭᱟᱱ ᱩᱱᱤ ᱜᱮ ᱚᱱᱟ ᱪᱟᱞᱟᱭ ᱞᱟᱹᱠᱛᱤ ᱾
ᱩᱫᱷᱟᱹᱨ ᱟᱹᱜᱩᱭᱟᱢ ᱫᱷᱚᱱ ᱯᱟᱹᱪᱩᱜ ᱠᱷᱟᱱ ᱩᱛᱟᱹᱱ ᱯᱟᱹᱪᱩᱜ ᱠᱷᱟᱱ ᱠᱤᱨᱤᱧ ᱟᱹᱜᱩᱭᱟᱢ ᱩᱞᱩᱬ ᱵᱟᱹᱱᱩᱜ ᱠᱷᱟᱱ ᱠᱚᱭ ᱟᱹᱜᱩᱭᱟᱢ ᱵᱤᱨᱫᱟᱹ ᱫᱚ ᱱᱚᱝᱠᱟ ᱵᱟᱭ ᱧᱟᱢᱚᱜ ᱾
ᱪᱚᱬᱮ ᱰᱚᱸᱰᱠᱟ ᱟᱜ ᱠᱟᱛᱷᱟ ᱟᱧᱡᱚᱢ ᱯᱮ ᱪᱟᱨᱟ ᱠᱚ ᱧᱟᱢᱟ ᱫᱤᱞᱚᱝ ᱛᱮᱧ ᱛᱮ ᱪᱚᱬᱮ ᱪᱟᱞᱟ ᱠᱷᱟᱹᱧᱤ ᱠᱚ ᱵᱮᱱᱟᱣ ᱰᱚᱸᱰᱠᱟ ᱯᱟᱹᱶᱨᱤᱭᱟᱹ ᱠᱚ ᱛᱮᱭᱟᱨ ᱴᱩᱠᱩᱡ ᱪᱮᱞᱟᱝ ᱾
ᱫᱷᱚᱨᱚᱢ ᱟᱠᱷᱲᱟ ᱨᱮ ᱢᱮᱱᱟᱜ ᱵᱚᱱᱟ ᱫᱩᱲᱩᱵ ᱠᱟᱛᱮ ᱥᱟᱱᱟᱢ ᱠᱚᱜᱮ ᱫᱤᱞᱟ ᱪᱮᱯᱮ ᱵᱟᱝᱟ ᱱᱚᱝᱠᱟ ᱠᱟᱹᱢᱤ ᱫᱟᱲᱮᱭᱟᱜ-ᱟ ᱯᱮᱪᱮ ᱵᱟᱝᱟ, ᱞᱟᱹᱭ ᱯᱮ ᱾
ᱮᱦᱚ! ᱯᱤᱞᱪᱩ ᱨᱮᱱ ᱯᱩᱛᱟᱹ ᱠᱚ ᱮᱦᱚᱵ ᱠᱷᱚᱱ ᱢᱩᱪᱟᱹᱫ ᱦᱟᱹᱵᱤᱡ ᱮᱠᱮᱱ ᱯᱮ ᱟᱧᱡᱚᱢ ᱠᱮᱫᱟ ᱢᱟ ᱱᱤᱛᱚᱝ ᱫᱚ ᱞᱟᱹᱭ ᱨᱩᱣᱟᱹᱲ ᱯᱮ ᱾
ᱯᱟᱞᱮ ᱵᱟᱞᱮ ᱫᱟᱲᱮ ᱜᱚᱫᱟᱜ ᱯᱟᱞᱮ ᱵᱟᱞᱮ ᱫᱟᱲᱮ ᱜᱚᱫᱚᱜ ᱯᱟᱪᱷᱮ ᱞᱮ ᱦᱤᱲᱤᱧ ᱜᱚᱫᱟ ᱱᱚᱝᱠᱟ ᱠᱚ ᱞᱟᱹᱭ ᱨᱩᱣᱟᱹᱲ ᱠᱮᱫᱟ ᱾
ᱰᱷᱩᱞ ᱛᱟᱛᱟ ᱱᱩᱭᱦᱟᱹᱨ ᱮᱯᱮ ᱰᱷᱚᱰᱟ ᱨᱮ ᱵᱟᱯᱮ ᱧᱩᱨᱩᱜ ᱾ ᱥᱚᱛ- ᱰᱟᱦᱟᱨ ᱛᱮ ᱛᱟᱲᱟᱢ ᱠᱟᱜ ᱯᱮ ᱤᱧ ᱦᱚᱸᱧ ᱛᱟᱦᱮᱸ ᱠᱚᱜ ᱟᱯᱮ ᱥᱟᱶ ᱜᱮ ᱾
ᱱᱟᱯᱟᱭ ᱥᱟᱹᱜᱟᱹᱭ ᱛᱮ ᱛᱚᱞ ᱠᱚᱜ ᱯᱮ ᱱᱮᱭᱟᱶ ᱛᱟᱯᱟᱢ ᱟᱞᱚ ᱟᱜ ᱯᱮ ᱱᱚᱜ-ᱚᱭ ᱱᱚᱝᱠᱟ ᱛᱟᱦᱮᱸᱱ ᱯᱮ ᱱᱚᱝᱠᱟ ᱟᱪᱟᱨ ᱵᱮᱵᱷᱟᱨ ᱯᱮ ᱾
ᱴᱚᱨᱚᱰᱟᱝ ᱫᱚ ᱥᱟᱝᱜᱮ ᱵᱤᱥᱲᱤ ᱛᱮ ᱴᱟᱹᱴᱤ ᱦᱚᱸ ᱥᱟᱝᱜᱮ ᱵᱤᱥᱲᱤ ᱛᱮ ᱴᱮᱱᱟ ᱛᱮᱭᱟᱨ ᱮᱱ ᱥᱟᱝᱜᱮ ᱠᱟᱴ ᱛᱮ ᱱᱚᱝᱠᱟ ᱡᱩᱢᱤᱫᱚᱜ ᱯᱮ ᱚᱠᱚᱭ ᱵᱟᱭ ᱪᱮᱠᱟ ᱠᱮᱯᱮ ᱾
ᱵᱟᱵᱟ ᱱᱚᱝᱠᱟ ᱠᱟᱹᱢᱤ ᱛᱟᱵᱚᱱ ᱯᱮ ᱵᱚᱭᱚᱥ ᱧᱮᱞ ᱠᱟᱛᱮ ᱫᱚ ᱵᱟᱝ ᱵᱚᱦᱚᱜ ᱜᱮᱭᱟᱱ ᱧᱮᱞ ᱠᱟᱛᱮ ᱠᱟᱹᱢᱤ ᱫᱚ ᱱᱚᱝᱠᱟᱹᱧ ᱦᱟᱹᱴᱤᱧᱟᱫ ᱯᱮ ᱾
(ᱵᱟᱨ)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱚᱲᱟᱜ ᱫᱚ ᱩᱡᱟᱹᱲᱚᱜ-ᱟ ᱚᱲᱟᱜ ᱦᱚᱲ ᱡᱩᱫᱤ ᱵᱟᱹᱭᱨᱤᱜ-ᱟ ᱚᱱᱮ ᱴᱮᱸᱜᱚᱡ ᱨᱮ ᱠᱟᱴ ᱢᱮᱥᱟᱭᱮᱱ ᱛᱮ ᱠᱟᱴ ᱥᱟᱱᱟᱢ ᱠᱚ ᱢᱟᱜ ᱚᱪᱚᱜ ᱠᱟᱱ ᱾
ᱛᱟᱦᱮᱸᱱ ᱢᱟ ᱫᱷᱚᱱ ᱟᱱᱮᱡ ᱫᱷᱟᱱᱮᱡ ᱛᱤ ᱨᱮ ᱴᱟᱠᱟ ᱠᱟᱹᱣᱰᱤ ᱯᱮᱨᱮᱡ ᱛᱚᱠᱚᱭ ᱦᱚᱸ ᱵᱟᱭ ᱯᱚᱪᱷᱟᱨ ᱢᱮᱭᱟ ᱢᱤᱫ ᱟᱱᱟ ᱦᱚᱸ ᱡᱩᱫᱤ ᱵᱟᱢ ᱫᱟᱱᱟ ᱾
ᱜᱟᱛᱮ ᱭᱮᱱ ᱵᱟᱝ ᱡᱩᱨᱤᱭᱮᱱᱮ ᱜᱩᱨᱩ ᱭᱮᱱ ᱵᱟᱝ ᱪᱮᱞᱟᱭᱮᱱᱮ ᱜᱩᱨᱚᱜ-ᱟ ᱵᱚ ᱥᱟᱱᱟᱢ ᱜᱮ ᱱᱚᱶᱟ ᱜᱮ ᱥᱟᱹᱨᱤ ᱠᱟᱛᱷᱟ ᱨᱮ ᱾
ᱞᱮᱜᱮᱡ ᱞᱮᱜᱮᱡ ᱛᱟᱢ ᱦᱚᱲᱢᱚ
ᱞᱮᱵᱮᱫ ᱛᱚᱨᱟᱭ ᱞᱮᱧᱡᱮᱫᱚᱜ ᱨᱚ
ᱞᱟᱞᱟᱦᱟ ᱜᱮ ᱠᱷᱟᱱᱮᱢ ᱵᱤᱴᱤ
ᱥᱟᱱᱟᱢ ᱠᱚ ᱢᱮᱛᱟᱢ ᱪᱷᱤ ᱪᱷᱤ ᱾
ᱟᱞᱟᱭᱤᱡ ᱮ ᱧᱟᱢᱟ ᱥᱟᱱᱟᱢ ᱟᱥᱟᱭᱤᱡ ᱫᱚ ᱪᱮᱫ ᱦᱚᱸ ᱵᱟᱭ ᱧᱟᱢ ᱟᱥᱟᱭ ᱠᱷᱟᱱᱮᱢ ᱧᱟᱢ ᱠᱷᱟᱹᱞᱤ ᱫᱩᱠ ᱟᱨ ᱫᱩᱠ ᱥᱩᱢᱩᱝ ᱾
ᱠᱩᱸᱫᱽᱨᱤ ᱵᱤᱞᱤ ᱡᱚᱨᱚᱝ ᱞᱩᱴᱤ ᱠᱩᱱᱟᱹᱢᱤ ᱪᱟᱸᱫᱚ ᱢᱮᱫᱦᱟᱸ ᱴᱤ ᱠᱩᱢᱵᱽᱲᱩ ᱜᱮ ᱠᱷᱟᱱᱮᱢ ᱵᱤᱴᱤ ᱡᱷᱚᱛᱚ ᱠᱚ ᱢᱮᱛᱟᱢ ᱪᱷᱤ ᱪᱷᱤ ᱾
ᱡᱷᱟᱞᱠᱟᱣᱜ ᱡᱩᱫᱤᱢ ᱢᱮᱱᱮᱫ ᱠᱷᱟᱱ ᱡᱤᱭᱚᱱ ᱨᱮ ᱦᱟᱨᱠᱮᱛ ᱥᱟᱦᱟᱣ ᱦᱩᱭᱟᱢ ᱡᱮᱞᱮᱠᱟ ᱥᱚᱱᱟ ᱡᱷᱟᱞᱠᱟᱣᱜ ᱞᱟᱜᱟᱱ ᱥᱮᱸᱜᱮᱞ ᱨᱮ ᱛᱚᱨᱚᱞᱚᱜ ᱦᱩᱭ ᱟᱭ ᱠᱟᱱ ᱾
ᱢᱤᱫᱟᱹᱢ ᱱᱤᱦᱟᱹᱛ ᱮᱢ ᱜᱩᱨᱚᱜ ᱜᱮᱭᱟ ᱢᱮᱛᱟᱢ ᱠᱟᱹᱱᱟᱹᱧ ᱵᱮᱴᱟ ᱮᱭᱟ ᱢᱟᱨᱟᱝ ᱦᱚᱲᱚᱜ ᱢᱮ ᱾ ᱜᱟᱥᱮᱢ- ᱤᱨ ᱠᱮᱫ ᱟᱨ ᱫᱮᱡ ᱮᱱᱮᱢ ᱥᱟᱫᱚᱢ ᱾
ᱤᱧᱟᱜ ᱱᱚᱶᱟ ᱜᱮᱭᱟᱱ ᱜᱟᱛᱷᱟ ᱤᱛᱟᱹ ᱠᱟᱱᱟ ᱜᱮᱭᱟᱱ ᱨᱮᱭᱟᱜ ᱤᱧ ᱴᱷᱮᱱ ᱠᱷᱱᱟᱜ ᱟᱧᱡᱚᱢ ᱞᱟᱹᱜᱤᱫ ᱞᱮᱛᱟᱲ ᱛᱟᱦᱮᱸᱱ ᱯᱮ ᱛᱮᱭᱟᱨ ᱾
ᱥᱚᱛᱮᱢ ᱛᱟᱦᱮᱸᱱ ᱠᱷᱟᱱ ᱞᱮᱛᱟᱲ ᱥᱚᱛᱮᱢ ᱨᱚᱲ ᱠᱷᱟᱱ ᱞᱮᱛᱟᱲ ᱥᱚ ᱛᱮ ᱵᱟᱦᱟ ᱴᱷᱮᱱ ᱵᱷᱟᱶᱟᱨ ᱞᱮᱠᱟ ᱦᱚᱲ ᱠᱚ ᱟᱹᱩᱨᱚᱜ ᱟᱢ ᱴᱷᱮᱱ ᱞᱮᱛᱟᱲ ᱾
ᱦᱟᱞᱟᱝ ᱠᱟᱛᱮ ᱜᱮᱭᱟᱱ-ᱵᱟᱦᱟ ᱦᱟᱛᱟᱝ ᱴᱷᱮᱠᱟ ᱨᱮ ᱫᱚᱦᱚᱭ ᱯᱮ ᱦᱟᱹᱴᱤᱧ ᱟᱠᱚ ᱯᱮ ᱥᱟᱱᱟᱢ ᱛᱟᱹᱦᱩᱸ ᱵᱟᱹᱰᱩᱜ ᱛᱟᱯᱮ ᱾
ᱧᱩᱭᱟᱵᱚ ᱦᱟᱺᱰᱤ ᱨᱟᱱ ᱞᱮᱠᱟ ᱧᱤᱫᱟᱹ ᱨᱮ ᱢᱤᱫᱴᱟᱝ ᱤᱯᱤᱞ ᱞᱮᱠᱟ ᱧᱩᱭᱟᱠᱚ ᱜᱚᱥᱟᱸᱭ ᱠᱚ ᱡᱮᱞᱮᱠᱟ ᱛᱮᱞᱠᱟ ᱜᱮ ᱟᱵᱚ ᱦᱚᱸᱵᱚ ᱧᱩᱭ ᱾
ᱨᱚᱨᱚᱲ ᱦᱚᱲ ᱫᱚ ᱵᱟᱭ ᱢᱚᱦᱟᱱ ᱨᱚᱲ ᱥᱟᱦᱟᱣ ᱦᱚᱲᱮ ᱢᱚᱦᱟᱱ ᱨᱚᱲ ᱡᱟᱦᱟᱸᱭ ᱵᱟᱭ ᱥᱟᱦᱟᱣᱟ ᱩᱱᱤ ᱠᱚ ᱢᱮᱛᱟᱭ ᱚᱜᱮᱭᱟᱱ ᱾
ᱩᱭᱦᱟᱹᱨ ᱮᱯᱮ ᱛᱟᱯᱮ ᱱᱟᱭᱳ ᱩᱭᱦᱟᱹᱨ ᱮᱯᱮ ᱛᱟᱯᱮ ᱵᱟᱵᱟ ᱩᱱᱠᱤᱱ ᱜᱮ ᱠᱟᱱᱟ ᱠᱤᱱ ᱟᱯᱮ ᱨᱮᱱ ᱡᱤᱣᱤᱫ ᱵᱚᱸᱜᱟ ᱾
ᱪᱤᱠᱚᱱ ᱪᱚᱠᱚᱱ ᱪᱚᱨᱚᱠ ᱛᱟᱢ ᱪᱟᱠ ᱪᱚᱠ ᱫᱤᱞᱚᱝ ᱛᱟᱢ ᱪᱩᱨᱤᱛ ᱯᱟᱹᱪᱩᱜ ᱠᱷᱟᱱ ᱫᱚᱱᱟ ᱥᱮᱛᱟ ᱦᱚᱸ ᱵᱟᱭ ᱠᱷᱩᱧᱪᱩᱲᱟᱢ ᱾
ᱫᱷᱟᱹᱨᱛᱤ ᱨᱮᱯᱮ ᱡᱟᱱᱟᱢ ᱮᱱᱟ ᱫᱷᱟᱹᱨᱛᱤ ᱡᱚᱢᱮ ᱮᱢᱟ ᱯᱮ ᱠᱟᱱᱟ ᱫᱷᱟᱹᱨᱛᱤ ᱫᱚᱭ ᱱᱟᱭᱳ ᱠᱟᱱᱟ ᱢᱟ ᱥᱟᱱᱟᱢ ᱜᱚᱰᱟᱭ ᱯᱮ ᱾
ᱮᱴᱟᱜ ᱮᱨᱟ ᱦᱚᱲᱢᱚ ᱡᱚᱴᱮᱫ ᱮᱠᱟᱞ ᱜᱮ ᱢᱟᱱᱟ ᱜᱮᱭᱟ ᱮᱠᱮᱱ ᱟᱯᱱᱮᱨ ᱮᱨᱟ ᱥᱟᱶ ᱛᱤᱨᱤᱯᱩᱨᱩᱥᱚᱜ ᱜᱮ ᱵᱩᱜᱤᱭᱟ ᱾
ᱯᱤᱞᱪᱩ ᱯᱤᱲᱦᱤ ᱟᱯᱮ ᱡᱷᱚᱛᱚ ᱯᱮᱲᱟ ᱯᱮᱲᱟ ᱛᱟᱦᱮᱸᱱ ᱯᱮᱦᱚ ᱯᱚᱥᱲᱟ ᱯᱮᱠᱚ ᱮᱠᱞᱟ ᱮᱠᱞᱟ ᱫᱚ ᱵᱟᱠᱚ ᱨᱟᱹᱯᱩᱫ ᱠᱮ ᱵᱤᱸᱰᱟᱹ ᱠᱟᱰᱮᱡ ᱫᱚ ᱾
ᱰᱷᱚᱰᱟ ᱦᱚᱲ ᱞᱟᱜᱟᱱ ᱮ ᱞᱟᱭ ᱰᱤᱵᱟᱹ ᱡᱩᱞᱩᱜᱟᱜ ᱮ ᱩᱭᱩ ᱩᱠᱩᱭ ᱰᱷᱚᱰᱟ, ᱰᱤᱵᱟᱹ ᱛᱮᱜᱮ ᱵᱷᱟᱹᱭ ᱩᱱᱤᱭᱟᱜ ᱡᱤᱭᱚᱱ ᱱᱟᱥᱚᱜ ᱛᱟᱭ ᱾
ᱱᱟᱪᱟᱨ ᱱᱤᱫᱷᱟᱹᱱ ᱨᱮᱦᱚᱸᱭ ᱡᱟᱦᱟᱸᱭ ᱱᱟᱯᱟᱭ ᱟᱪᱟᱨ ᱵᱮᱵᱷᱟᱨ ᱟᱭ ᱱᱟᱭ ᱱᱟᱯᱟᱭ ᱨᱮᱜᱮ ᱩᱱᱤ ᱫᱚ ᱤᱧᱤᱧ ᱫᱚᱦᱚ ᱠᱟᱭ ᱜᱚᱭ ᱾
ᱴᱮᱨᱟ ᱞᱮᱰᱷᱟ ᱜᱮ ᱨᱮᱦᱚᱸᱭ ᱴᱟᱠᱟ ᱠᱟᱹᱣᱰᱤ ᱛᱮ ᱨᱮᱝᱜᱮᱡ ᱨᱮᱦᱚᱸᱭ ᱴᱷᱤᱠᱟᱜ ᱜᱮ ᱠᱟᱹᱢᱤ ᱡᱟᱦᱟᱸᱭ ᱩᱱᱤ ᱜᱮ ᱤᱧᱟᱜ ᱛᱷᱩᱢ ᱧᱟᱢᱟᱭ ᱾
ᱵᱮᱨᱛᱷᱟ ᱜᱮᱭᱟ ᱵᱷᱟᱹᱜᱤ ᱠᱟᱛᱷᱟ ᱵᱟᱭ ᱞᱟᱜᱟᱣᱜ ᱠᱟᱹᱢᱤ ᱨᱮ ᱡᱩᱫᱤ ᱵᱮᱨᱛᱷᱟ ᱜᱮᱭᱟ ᱫᱷᱚᱱ ᱫᱩᱨᱤᱵᱽ ᱵᱟᱭ ᱞᱟᱜᱟᱣᱜ ᱠᱟᱹᱢᱤ ᱨᱮ ᱡᱩᱫᱤ ᱾
(ᱯᱮ)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱫᱷᱚᱨᱢᱚ ᱜᱚᱥᱟᱸᱭ ᱠᱟᱹᱢᱤ ᱦᱟᱹᱴᱤᱧᱟᱫ ᱠᱚ ᱛᱟᱭᱚᱢ ᱟᱫᱚᱢ ᱠᱚ ᱢᱮᱱ ᱠᱮᱜ-ᱟ, "ᱠᱤᱥᱠᱩ ᱯᱟᱹᱨᱤᱥ ᱫᱚᱠᱚ ᱨᱟᱡᱟᱜ-ᱟ, ᱩᱱᱠᱩ ᱫᱚ ᱢᱟᱨᱟᱝ ᱠᱟᱹᱢᱤ; ᱟᱞᱮ ᱠᱷᱟᱱ ᱦᱩᱰᱤᱧ ᱠᱟᱹᱢᱤ ᱾ ᱢᱩᱨᱢᱩ ᱫᱚ ᱵᱚᱸᱜᱟ ᱫᱮᱵᱟ ᱥᱮᱵᱟ, ᱟᱞᱜᱟ ᱠᱟᱹᱢᱤ; ᱟᱞᱮ ᱠᱷᱟᱱ ᱟᱸᱴ ᱠᱟᱹᱢᱤ ᱾" ᱩᱱᱡᱷᱚᱜ ᱫᱷᱚᱨᱢᱚ ᱜᱚᱥᱟᱸᱭ ᱯᱤᱞᱪᱩ ᱨᱮᱱ ᱦᱚᱯᱚᱱ ᱠᱚᱭ ᱢᱮᱛᱟ ᱠᱚ ᱠᱟᱱᱟ-
ᱚᱠᱟ ᱠᱟᱹᱢᱤ ᱦᱚᱸ ᱵᱟᱭ ᱢᱟᱨᱟᱝ
ᱚᱠᱟ ᱠᱟᱹᱢᱤ ᱦᱚᱸ ᱵᱟᱭ ᱦᱩᱰᱤᱧ
ᱚᱱᱟᱛᱮ ᱡᱟᱦᱟᱸᱱᱟᱜ ᱜᱮᱢ ᱠᱟᱹᱢᱤ
ᱠᱟᱡᱟᱠ ᱥᱟᱹᱦᱤᱡ ᱠᱟᱹᱢᱤ ᱢᱮ ᱾
ᱛᱚᱠᱚᱭ ᱟᱯᱱᱟᱨ ᱟᱭᱳ ᱵᱟᱵᱟ ᱛᱚᱠᱚᱭ ᱟᱯᱱᱟᱨ ᱫᱟᱹᱭ ᱫᱟᱫᱟ ᱛᱚᱠᱚᱭ ᱜᱩᱨᱩ ᱠᱚᱭ ᱚᱢᱟᱱᱛᱤ ᱠᱚ ᱛᱤᱥ ᱦᱚᱸ ᱩᱱᱤ ᱵᱟᱭ ᱥᱮᱬᱟ ᱠᱮᱭᱟ ᱾
ᱜᱩᱲᱫᱟᱹᱣᱜ ᱠᱟᱱ ᱜᱩᱲᱜᱩ ᱫᱷᱤᱨᱤ ᱜᱩᱲᱫᱟᱹᱣ ᱥᱮᱱᱚᱜ ᱟᱨᱦᱚᱸ ᱨᱩᱣᱟᱹᱲ ᱜᱩᱲᱜᱩ ᱞᱮᱠᱟ ᱢᱟᱦᱟᱸ ᱨᱩᱣᱟᱹᱲ ᱚᱠᱛᱚ ᱫᱚ ᱵᱟᱭ ᱨᱩᱣᱟᱹᱲ ᱤᱠᱷᱟᱹᱱ ᱾
ᱞᱮᱱ ᱛᱮᱱ ᱚᱪᱚᱜ ᱨᱮᱦᱚᱸᱭ ᱢᱚᱦᱚᱛ ᱞᱮᱛᱟᱲ ᱮ ᱨᱚᱲ ᱥᱤᱵᱤᱞ ᱜᱮ ᱞᱮᱱ ᱚᱪᱚᱜ ᱨᱮᱦᱚᱸᱭ ᱟᱸᱠ ᱠᱟᱥᱟ ᱨᱟᱥᱟᱭ ᱮᱢᱚᱜ ᱛᱮ ?
ᱟᱨᱡᱟᱣ ᱫᱷᱚᱱ ᱵᱟᱭ ᱵᱷᱩᱧᱡᱟᱹᱣ ᱡᱟᱦᱟᱸᱭ ᱟᱨ ᱡᱟᱣ ᱫᱷᱚᱱ ᱵᱟᱭ ᱦᱟᱹᱴᱤᱧ ᱡᱟᱦᱟᱸᱭ ᱟᱡᱟᱜ ᱫᱷᱚᱱ ᱫᱚ ᱦᱚᱲ ᱠᱚ ᱠᱩᱢᱵᱽᱲᱩᱭ ᱧᱮᱞᱮ ᱨᱟᱥᱟ ᱡᱮᱞᱮᱠᱟ ᱦᱚᱲ ᱠᱚ ᱠᱩᱢᱵᱽᱲᱩᱭ ᱾
ᱠᱟᱹᱢᱤ ᱛᱮᱜᱮ ᱠᱟᱡᱽ ᱫᱚ ᱥᱟᱹᱛᱚᱜ ᱠᱷᱟᱹᱞᱤ ᱵᱷᱟᱹᱵᱤ ᱛᱮᱫᱚ ᱵᱟᱝ ᱠᱩᱠᱢᱩ ᱠᱩᱞ ᱢᱚᱪᱟ ᱨᱮ ᱥᱤᱞᱤᱵ ᱵᱟᱠᱚ ᱵᱚᱞᱚᱱ ᱟᱯᱱᱟᱨ ᱛᱮᱫᱚ ᱾
ᱡᱟᱦᱟᱸᱭ ᱢᱟᱹᱡᱩ ᱡᱟᱶᱟᱭᱟᱜ ᱡᱟᱦᱟᱸᱭ ᱜᱤᱫᱟᱹᱨ ᱟᱵᱟ ᱦᱟᱜ ᱡᱟᱦᱟᱸᱭ ᱟᱪᱮᱫ ᱜᱩᱨᱩᱣᱟᱜ ᱦᱩᱠᱩᱢ ᱵᱟᱠᱚ ᱟᱧᱡᱚᱢ ᱚᱫᱷᱚᱢ ᱠᱚ ᱵᱤᱠᱟᱹᱟᱣᱜ ᱾