ᱜᱩᱱᱴᱩᱨ ᱦᱚᱱᱚᱛ

ᱜᱩᱱᱴᱩᱨ ᱦᱚᱱᱚᱛ ᱫᱚ ᱥᱤᱧᱚᱛ ᱯᱚᱱᱚᱛ ᱟᱱᱫᱷᱨᱚ ᱯᱨᱚᱫᱮᱥ ᱨᱮᱱᱟᱜ ᱢᱤᱫ ᱦᱚᱱᱚᱛ ᱠᱟᱱᱟ ᱾ ᱱᱚᱶᱟ ᱨᱮᱱᱟᱜ ᱦᱮᱰᱠᱩᱣᱟᱴᱚᱨ ᱫᱚ ᱦᱩᱭᱩᱜ ᱠᱟᱱᱟ ᱜᱩᱱᱴᱩᱨ ᱾ ᱱᱚᱶᱟ ᱨᱮᱱᱟᱜ ᱠᱚᱧᱮ ᱨᱮ ᱵᱚᱝᱜᱚ ᱫᱚᱨᱭᱟ, ᱯᱨᱚᱠᱟᱥᱚᱢ ᱦᱚᱱᱚᱛ, ᱯᱟᱪᱮ ᱥᱮᱦᱮᱫ ᱨᱮ ᱢᱮᱦᱵᱩᱵᱽᱱᱟᱜᱟᱨ ᱦᱚᱱᱚᱛ ᱟᱨ ᱮᱛᱚᱢ-ᱥᱟᱢᱟᱝ ᱨᱮ ᱱᱟᱞᱜᱚᱱᱰᱟ ᱦᱚᱱᱚᱛ ᱢᱮᱱᱟᱜᱼᱟ ᱾

ᱱᱚᱶᱟ ᱴᱷᱟᱶ ᱨᱮ ᱟᱭᱢᱟ ᱱᱟᱜᱟᱢ ᱠᱷᱚᱫᱟ ᱦᱟᱠᱟᱱᱟ ᱾ ᱨᱟᱡᱟ ᱢᱟᱦᱟᱨᱟᱡᱽ ᱚᱠᱛᱚ ᱨᱮ ᱢᱚᱨᱭᱚ, ᱥᱟᱛᱵᱟᱦᱚᱱ, ᱯᱟᱞᱟᱵᱚ, ᱪᱟᱞᱩᱠᱭᱚ, ᱠᱟᱠᱟᱴᱤᱭᱟ, ᱨᱟᱰᱤ ᱨᱟᱡᱟ ᱟᱨ ᱵᱤᱡᱚᱭᱱᱟᱜᱟᱨ ᱨᱟᱡᱟ ᱮᱢᱟᱱ ᱠᱚ ᱥᱟᱥᱚᱱ ᱞᱮᱫ ᱛᱟᱦᱮᱸᱫ ᱾ ᱯᱟᱞᱱᱟᱴᱤ ᱞᱟᱹᱲᱦᱟᱹᱭ ᱫᱚ ᱱᱚᱸᱰᱮ ᱜᱮ ᱦᱩᱭ ᱠᱞᱮᱱ ᱛᱟᱦᱮᱸᱫ ᱤ ᱢᱚᱜᱚᱞ ᱥᱟᱢᱨᱟᱡᱽ, ᱱᱟᱡᱤᱢ ᱟᱨ ᱤᱥᱴ ᱤᱱᱰᱤᱭᱟ ᱠᱩᱢᱯᱟᱹᱱᱤ ᱮᱢᱟᱱ ᱠᱚ ᱛᱟᱭᱚᱢ ᱫᱟᱨᱟᱢ ᱠᱚ ᱥᱟᱥᱚᱱ ᱞᱮᱫ ᱛᱟᱦᱮᱸᱫ ᱾ ᱥᱤᱧᱚᱛ ᱯᱷᱩᱨᱜᱟᱹᱞ ᱮᱱ ᱛᱟᱭᱚᱢ ᱱᱚᱶᱟ ᱫᱚ ᱟᱱᱫᱷᱨᱚ ᱯᱨᱚᱫᱮᱥ ᱨᱮᱱᱟᱜ ᱛᱟᱹᱨᱤ ᱨᱮᱱᱟᱜ ᱢᱤᱫ ᱦᱚᱱᱚᱛ ᱞᱮᱠᱟᱛᱮ ᱛᱟᱦᱮᱸ ᱭᱮᱱᱟ ᱾

ᱠᱟᱹᱣᱰᱤᱭᱟᱹᱨᱤ

ᱪᱟᱥᱵᱟᱥ

ᱱᱚᱸᱰᱮ ᱫᱚ ᱡᱚᱢᱟᱜ ᱞᱮᱠᱟᱛᱮ ᱦᱳᱲᱳ, ᱡᱚᱱᱚᱲᱟ ᱮᱢᱟᱱ ᱪᱟᱥ ᱦᱩᱭᱩᱜ ᱠᱟᱱᱟ ᱾ ᱵᱮᱯᱟᱨ ᱞᱮᱠᱟᱛᱮ ᱟᱨᱚᱸ ᱢᱟᱹᱨᱤᱪ, ᱛᱩᱞᱟᱹᱢ, ᱠᱚᱠᱚᱱᱟᱴ, ᱠᱟᱭᱨᱟ, ᱡᱟᱢ, ᱞᱤᱢᱵᱩ,ᱥᱚᱱᱛᱚᱨᱟ ᱟᱨ ᱡᱟᱰᱟ ᱮᱢᱟᱱ ᱠᱚ ᱪᱟᱥ ᱦᱩᱭᱩᱜ ᱠᱟᱱᱟ ᱾ ᱪᱟᱥ ᱵᱟᱥ ᱠᱟᱹᱢᱤ ᱞᱟᱹᱜᱤᱫ ᱠᱮᱱᱟᱞ ᱠᱟᱛᱮ ᱯᱨᱚᱠᱟᱥᱚᱢ ᱵᱭᱟᱨᱮᱡᱽ, ᱱᱟᱜᱟᱨᱡᱩᱱᱟ ᱯᱨᱚᱡᱮᱠᱴ ᱮᱢᱟᱱ ᱥᱮᱨᱢᱟᱠ ᱪᱟᱥ ᱞᱟᱹᱜᱤᱫ ᱜᱚᱲᱚᱭ ᱮᱢᱟ ᱠᱚ ᱠᱟᱱᱟ ᱾

ᱦᱮᱥᱮᱱ ᱵᱮᱵᱚᱥᱛᱟ

ᱱᱚᱸᱰᱮ ᱚᱛ ᱰᱟᱦᱟᱨ ᱟᱨ ᱡᱤᱞᱤᱧ ᱜᱟᱹᱰᱤ ᱰᱟᱦᱟᱨ ᱠᱚ ᱦᱚᱸ ᱢᱮᱱᱟᱜᱼᱟ ᱦᱟᱭᱫᱽᱨᱟᱵᱟᱫᱽ ᱟᱨ ᱪᱮᱱᱱᱟᱭ ᱥᱟᱶ ᱡᱩᱲᱟᱹᱣ ᱟᱠᱟᱱᱟ ᱾ ᱱᱚᱸᱰᱮ ᱗᱒ ᱠᱤᱞᱚᱢᱤᱴᱚᱨ ᱡᱟᱹᱛᱤᱭᱟᱹᱨᱤ ᱨᱟᱡᱽ ᱰᱟᱦᱟᱨ ᱟᱨ ᱕᱑᱑ ᱠᱤᱞᱚᱢᱤᱴᱚᱨ ᱯᱚᱱᱚᱛ ᱨᱟᱡᱽᱰᱟᱦᱟᱨ ᱢᱮᱱᱟᱜᱼᱟ ᱾

ᱥᱮᱱᱥᱚᱥ

᱒᱐᱑᱑ ᱥᱟᱞᱮ ᱥᱤᱧᱚᱛ ᱨᱮᱱᱟᱜ ᱦᱚᱲ ᱞᱮᱠᱷᱟ ᱡᱚᱠᱷᱟ ᱞᱮᱠᱟᱛᱮ ᱱᱚᱸᱰᱮ ᱔᱘,᱘᱙,᱒᱓᱐ ᱦᱚᱲ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱢᱩᱸᱫᱽ ᱠᱷᱚᱱ ᱒᱔,᱔᱑,᱑᱒᱘ ᱦᱚᱲ ᱠᱚᱲᱟ ᱟᱨ ᱒᱔,᱔᱘,᱑᱐᱒ ᱦᱚᱲ ᱠᱩᱲᱤ ᱢᱮᱱᱟᱜ ᱠᱚᱣᱟ ᱾ ᱥᱮᱪᱮᱫ ᱫᱚᱨ ᱫᱚ ᱠᱚᱲᱟ ᱖᱒ᱹ᱕᱓ ᱟᱨ ᱠᱩᱲᱤ ᱫᱚ ᱗᱑ᱹ᱒᱒% ᱢᱮᱱᱟᱜ ᱠᱚᱣᱟ ᱾

ᱚᱛᱱᱚᱜ

ᱜᱩᱱᱴᱩᱨ ᱦᱚᱱᱚᱛ ᱫᱚ ᱥᱩᱨᱥᱩᱯᱩᱨ ᱓᱓ ᱢᱤᱴᱚᱨ ᱮᱞᱤᱵᱮᱥᱚᱱ ᱨᱮ ᱢᱮᱱᱟᱜᱼᱟ ᱾ ᱢᱤᱫ ᱟᱹᱰᱤ ᱯᱷᱞᱟᱴ ᱴᱷᱟᱶ ᱠᱟᱱᱟ ᱾ ᱱᱚᱸᱰᱮ ᱱᱟᱞᱞᱟᱢᱟᱞᱟᱭ, ᱵᱷᱮᱠᱴᱟᱭᱟᱯᱟᱞᱮᱢ ᱟᱨ ᱠᱚᱱᱰᱟᱵᱷᱤᱰᱩ ᱥᱟᱶᱛᱮ ᱠᱨᱤᱥᱱᱟ ᱰᱮᱞᱴᱟ ᱮᱢᱟᱱ ᱞᱮᱠᱟᱱ ᱵᱩᱨᱩᱩ ᱠᱚ ᱢᱮᱱᱟᱜᱼᱟ ᱾

ᱵᱟᱨᱦᱮ ᱡᱚᱱᱚᱲ

• ᱜᱩᱱᱴᱩᱨ ᱦᱚᱱᱚᱛ