ᱠᱚᱵᱟᱰᱤ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search
ᱠᱚᱵᱟᱰᱤ ᱮᱱᱮᱡ ᱨᱮ ᱜᱤᱫᱽᱨᱟᱹ


ᱠᱚᱵᱟᱰᱤ

ᱠᱚᱵᱟᱰᱤ ᱫᱚ ᱢᱤᱫ ᱠᱷᱮᱞ ᱠᱟᱱᱟ, ᱠᱚᱵᱟᱰᱤ ᱧᱩᱛᱩᱢ ᱨᱮᱭᱟᱜ ᱵᱮᱵᱷᱟᱨ ᱫᱚ ᱵᱟᱹᱲᱛᱤ ᱞᱮᱠᱟᱛᱮ ᱩᱛᱚᱨ ᱵᱷᱟᱨᱚᱛ ᱨᱮ ᱛᱟᱦᱮᱸᱱᱟ ᱾ ᱱᱚᱶᱟ ᱠᱷᱮᱞ ᱫᱚ ᱫᱩᱠᱷᱤᱱ ᱥᱮᱫ ᱨᱮ ᱪᱮᱰᱩᱜᱩᱰᱩ ᱟᱨ ᱯᱩᱨᱩᱵᱽ ᱥᱮᱫ ᱨᱮᱫᱚ ᱦᱩ ᱛᱩ ᱛᱩ ᱧᱩᱛᱩᱢ ᱛᱮᱦᱚᱸ ᱩᱯᱨᱩᱢ ᱢᱮᱱᱟᱜᱼᱟ ᱾ ᱱᱚᱶᱟ ᱠᱷᱮᱞ ᱫᱚ ᱵᱷᱟᱨᱚᱛ ᱨᱮᱭᱟᱜ ᱯᱩᱲᱥᱤ ᱫᱤᱥᱚᱢ ᱱᱮᱯᱟᱞ, ᱵᱟᱝᱞᱟᱫᱮᱥ, ᱥᱨᱤᱞᱚᱝᱠᱟ, ᱟᱨ ᱯᱟᱠᱤᱥᱛᱟᱱ ᱨᱮᱦᱚᱸ ᱩᱱᱟᱹᱜ ᱜᱮ ᱦᱚᱲ ᱠᱚ ᱠᱩᱥᱤᱭᱟᱜᱼᱟ ᱾ ᱠᱚᱵᱟᱰᱤ ᱫᱚ ᱵᱟᱸᱜᱽᱞᱟᱫᱮᱥ ᱨᱮᱭᱟᱜ ᱡᱟᱹᱛᱤᱭᱟᱹᱨᱤ ᱠᱷᱮᱞᱚᱸᱰ ᱠᱟᱱᱟ ᱾

ᱱᱤᱭᱟᱹᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱮᱱ ᱜᱚᱫ ᱠᱟᱜ ᱟᱹᱲᱟ ᱨᱮᱫᱚ ᱱᱚᱶᱟ ᱠᱷᱮᱞ ᱫᱚ ᱵᱟᱹᱲᱛᱤ ᱮᱞᱮᱞ ᱟᱢᱮᱴ ᱞᱟᱹᱜᱤᱫ ᱵᱟᱨ ᱜᱟᱫᱮᱞ ᱛᱟᱞᱟᱨᱮ ᱢᱤᱫ ᱦᱮᱯᱨᱟᱣ ᱢᱮᱱᱛᱮ ᱢᱮᱱ ᱜᱟᱱᱚᱜᱼᱟ ᱾ ᱮᱞᱮᱞ ᱧᱟᱢ ᱞᱟᱹᱜᱤᱫ ᱛᱮ ᱢᱤᱫᱴᱟᱹᱝ ᱜᱟᱫᱮᱞᱟᱜ ᱨᱮᱰᱚᱨ (ᱠᱚᱵᱟᱰᱤ ᱠᱚᱵᱟᱰᱤ ᱢᱮᱱᱤᱡ) ᱮᱴᱟᱜ ᱯᱟᱦᱴᱟ ᱪᱟᱞᱟᱣ ᱠᱟᱛᱮ ᱚᱱᱟ ᱯᱟᱦᱴᱟ ᱨᱮ ᱢᱮᱱᱟᱜ ᱠᱚ ᱠᱷᱮᱞᱚᱸᱰᱤᱭᱟᱹ ᱠᱚ ᱡᱚᱴᱮᱫ ᱵᱟᱡᱟᱣ ᱠᱚ ᱨᱮᱭᱟᱜ ᱮ ᱠᱩᱨᱩᱢᱩᱴᱩᱭᱟ ᱾ ᱱᱤᱭᱟᱹ ᱚᱠᱛᱚ ᱨᱮ ᱚᱱᱟ ᱯᱟᱦᱴᱟ ᱜᱟᱫᱮᱞ ᱨᱤᱱ ᱥᱴᱟᱯᱚᱨ (ᱨᱮᱰᱚᱨ ᱥᱟᱥᱟᱵ ᱠᱩᱜ) ᱟᱠᱚ ᱯᱟᱦᱴᱟᱭ ᱦᱮᱡ ᱟᱠᱟᱱ ᱨᱮᱰᱚᱨ ᱥᱟᱵ ᱠᱟᱛᱮ ᱨᱩᱣᱟᱹᱲ ᱠᱷᱚᱱ ᱠᱚ ᱟᱴᱠᱟᱣ ᱫᱚᱦᱚ ᱮᱭᱟ ᱟᱨ ᱡᱩᱫᱩ ᱩᱱᱠᱩ ᱱᱚᱶᱟ ᱠᱩᱨᱩᱢᱩᱴᱩ ᱨᱮᱠᱚ ᱡᱤᱛᱠᱟᱹᱨᱚᱜᱼᱟ, ᱮᱱᱠᱷᱟᱱ ᱚᱱᱟ ᱯᱟᱦᱴᱟ ᱜᱟᱫᱮᱞ ᱱᱚᱶᱟ ᱵᱟᱫᱟᱞ ᱛᱮ ᱮᱞᱮᱞ ᱠᱚ ᱧᱟᱢᱟ ᱾ ᱡᱩᱫᱤ ᱨᱮᱰᱚᱨ ᱡᱟᱦᱟᱸᱭ ᱥᱴᱟᱯᱚᱨ ᱜᱮ ᱡᱚᱴᱮᱫ ᱠᱟᱛᱮ ᱯᱟᱨᱟᱝᱜᱚᱛ ᱥᱟᱶᱛᱮ ᱟᱡ ᱯᱟᱦᱴᱟ ᱜᱟᱫᱮᱞ ᱛᱮᱭ ᱨᱩᱣᱟᱹᱲ ᱦᱟᱹᱡᱩᱜᱼᱟ, ᱮᱱᱠᱷᱟᱱ ᱩᱱᱠᱩ ᱜᱟᱫᱮᱞ ᱢᱤᱫ ᱮᱞ ᱠᱚ ᱧᱟᱢᱟ ᱟᱨ ᱡᱟᱦᱟᱸᱨ ᱥᱴᱟᱯᱚᱨ ᱩᱱᱤᱭ ᱡᱚᱴᱮᱫ ᱟᱠᱟ ᱫᱮᱭᱟ ᱩᱱᱤ ᱫᱚ ᱱᱤᱭᱟᱹᱢ ᱞᱮᱠᱟᱛᱮ ᱠᱚᱴ ᱠᱷᱚᱱ ᱵᱟᱦᱨᱮ ᱩᱰᱩᱠ ᱦᱟᱱᱛᱟᱲᱚᱜ ᱦᱩᱭ ᱟᱭᱟ ᱾

ᱱᱚᱶᱟ ᱨᱮᱭᱟᱜ ᱠᱚᱨᱴ ᱫᱚ ᱰᱚᱡᱽ ᱵᱚᱞ ᱜᱮᱢ ᱤᱱᱟᱹᱜ ᱢᱟᱨᱟᱝ ᱛᱟᱦᱮᱸᱱᱟ ᱾ ᱠᱚᱨᱴ ᱨᱮᱭᱟᱜ ᱡᱚᱠᱷᱟ ᱫᱚ ᱑᱓ ᱢᱤᱴᱟᱹᱨ ᱡᱤᱞᱤᱧ ᱟᱨ ᱑᱐ ᱢᱤᱴᱟᱹᱨ ᱚᱥᱟᱨ ᱛᱟᱦᱮᱸᱱᱟ ᱾ ᱠᱚᱨᱴ ᱨᱮᱭᱟᱜ ᱛᱟᱞᱟᱢᱟᱞᱟ ᱨᱮ ᱢᱤᱫ ᱜᱟᱨ ᱴᱟᱱᱟᱣ ᱠᱟᱛᱮ ᱛᱟᱦᱮᱸᱱᱟ ᱡᱟᱦᱟᱸ ᱫᱚ ᱱᱚᱶᱟ ᱠᱚᱨᱴ ᱵᱟᱨ ᱵᱷᱟᱜᱽ ᱨᱮᱭ ᱦᱟᱹᱴᱤᱧᱟ ᱾

ᱮᱱᱮᱡ ᱨᱮᱭᱟᱜ ᱛᱚᱦᱚᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱚᱵᱟᱰᱤ

ᱠᱷᱮᱞᱚᱸᱰᱤᱭᱟᱹ ᱠᱚ ᱟᱠᱷᱲᱟ ᱛᱮᱠᱚ ᱦᱮᱡ ᱮᱱ ᱛᱟᱭᱚᱢ ᱴᱚᱥ ᱮ ᱡᱤᱛᱠᱟᱹᱨ ᱟᱠᱟᱱ ᱜᱟᱫᱮᱞ ᱡᱚᱛᱚ ᱠᱷᱚᱱ ᱢᱟᱬᱟᱝ ᱨᱮ ᱟᱡᱤᱡ ᱠᱷᱮᱞᱚᱸᱰᱤᱭᱟᱹ (ᱨᱮᱰᱚᱨ) ᱵᱤᱨᱚᱫᱷᱤ ᱟᱠᱷᱲᱟ ᱯᱟᱦᱴᱟᱭ ᱵᱷᱮᱡᱟ ᱮᱭᱟ ᱾ ᱱᱩᱭ ᱨᱮᱰᱚᱨ ᱠᱚᱵᱟᱰᱤ ᱠᱚᱵᱟᱰᱤ ᱢᱮᱱ ᱟᱛᱮᱭ ᱪᱟᱞᱟᱜᱼᱟ ᱟᱨᱥᱟᱢᱟᱝ ᱟᱠᱷᱲᱟ ᱨᱤᱱ ᱠᱷᱮᱞᱚᱸᱰᱤᱭᱟᱹ ᱠᱚ ᱡᱚᱴᱮᱫ ᱠᱚ ᱞᱟᱹᱜᱤᱫ ᱮ ᱨᱤᱠᱟᱹᱭᱟ ᱾ ᱱᱤᱭᱟᱹ ᱚᱠᱛᱚ ᱨᱮ ᱩᱱᱤ ᱱᱚᱶᱟ ᱠᱚᱫᱚ ᱯᱩᱨᱟᱹᱯᱩᱨᱤ ᱫᱷᱮᱭᱟᱱ ᱨᱮ ᱫᱚᱦᱚ ᱦᱩᱭ ᱟᱭᱟ ᱡᱮ ᱟᱡ ᱥᱟᱦᱮᱫ ᱟᱞᱚᱭ ᱴᱷᱟᱠᱮᱫᱽ ᱢᱟ ᱾ ᱡᱩᱫᱤ ᱥᱟᱦᱮᱫ ᱴᱷᱟᱠᱮᱫᱚᱜ ᱞᱮᱠᱟᱭ ᱵᱩᱡᱷᱟᱹᱣᱟ, ᱚᱱᱟ ᱢᱟᱬᱟᱝ ᱨᱮ ᱫᱟᱹᱲ ᱠᱟᱛᱮ ᱟᱡᱟᱜ ᱟᱠᱷᱲᱟ ᱜᱟᱫᱮᱞ ᱛᱮᱭ ᱨᱩᱣᱟᱹᱲᱟ ᱾ ᱟᱨ ᱛᱤᱱ ᱵᱷᱩᱨ ᱩᱱᱤ ᱟᱡᱟᱜ ᱥᱟᱦᱮᱫ ᱟᱴᱠᱟᱣ ᱫᱟᱲᱮ ᱠᱟᱛᱮ ᱠᱚᱵᱟᱰᱤ ᱠᱚᱵᱟᱰᱤᱭ ᱢᱮᱱᱫᱟᱲᱮᱭᱟᱜᱼᱟ, ᱩᱱᱤ ᱟᱡᱟᱜ ᱪᱟᱞᱟᱠ ᱵᱮᱵᱷᱟᱨ ᱛᱮ ᱥᱟᱢᱟᱝ ᱟᱠᱷᱲᱟ ᱨᱤᱱ ᱠᱷᱮᱞᱚᱸᱰᱤᱭᱟᱹ (ᱥᱴᱟᱯᱚᱨ) ᱡᱚᱴᱮᱫ ᱠᱚ ᱞᱟᱹᱜᱤᱫ ᱛᱮᱴᱮᱡ ᱟᱠᱟᱭ ᱛᱟᱦᱮᱸᱱᱟ ᱾ ᱱᱚᱶᱟ ᱵᱮᱲᱟᱨᱮ ᱡᱩᱫᱤ ᱩᱱᱤ ᱮᱴᱟᱜ ᱜᱟᱫᱮᱞ ᱨᱤᱱ ᱠᱷᱮᱞᱚᱸᱰᱤᱭᱟᱹ ᱡᱟᱦᱟᱸᱭ ᱜᱮᱭ ᱡᱚᱴᱮᱫ ᱧᱟᱢ ᱠᱚᱣᱟ, ᱮᱱᱠᱷᱟᱱ ᱡᱚᱴᱮᱫ ᱧᱟᱢ ᱟᱠᱟᱫᱮ ᱠᱷᱮᱞᱚᱸᱰᱤᱭᱟᱹ ᱫᱚ ᱜᱚᱡ ᱮᱱᱟᱭ ᱢᱮᱱᱛᱮ ᱠᱚ ᱢᱮᱱᱟ ᱾ ᱱᱚᱶᱟ ᱵᱮᱲᱟᱨᱮ ᱜᱚᱡ ᱟᱠᱟᱱ ᱠᱷᱮᱞᱚᱸᱰᱤᱭᱟᱹ ᱫᱚ ᱟᱠᱷᱲᱟ ᱠᱷᱚᱱ ᱵᱟᱦᱨᱮ ᱩᱰᱩᱠᱚᱜ ᱦᱩᱭ ᱟᱭᱟ ᱾ ᱟᱨ ᱡᱩᱫᱤ ᱢᱤᱫ ᱦᱚᱲ ᱡᱚᱴᱮᱫ ᱮ ᱠᱩᱨᱩᱢᱩᱴᱴᱩ ᱨᱮ ᱟᱡ ᱜᱮ ᱟᱠᱚ ᱴᱷᱮᱱ ᱮ ᱥᱟᱵ ᱦᱚᱪᱚᱜᱼᱟ, ᱮᱱᱠᱷᱟᱱ ᱟᱡ ᱜᱮᱭ ᱜᱚᱡ ᱮᱱᱟ ᱢᱮᱱᱛᱮ ᱢᱟᱱᱟᱣ ᱦᱩᱭᱩᱜᱼᱟ ᱟᱨ ᱟᱠᱷᱲᱟ ᱠᱷᱚᱱ ᱩᱰᱩᱠᱚᱜ ᱦᱩᱭ ᱟᱭᱟ ᱾ ᱮᱱᱮᱡ ᱨᱮᱭᱟᱜ ᱱᱚᱶᱟ ᱨᱤᱛ ᱫᱚ ᱵᱟᱱᱟᱨ ᱟᱠᱷᱲᱟ ᱨᱤᱱ ᱠᱷᱮᱞᱚᱸᱰᱤᱭᱟᱹ ᱠᱚ ᱵᱟᱠᱷᱨᱟ ᱜᱮ ᱵᱟᱨᱟᱵᱟᱹᱨᱤ ᱛᱚᱸᱜᱮ ᱛᱟᱦᱮᱸᱱᱟ ᱾

ᱱᱚᱝᱠᱟ ᱜᱮ ᱡᱚᱛᱚ ᱜᱟᱫᱮᱞ ᱨᱤᱱ ᱠᱷᱮᱞᱚᱸᱰᱤᱭᱟᱹ ᱯᱟᱹᱨᱤ ᱯᱟᱹᱨᱤ ᱛᱮ ᱢᱤᱢᱤᱫ ᱦᱚᱲ ᱛᱮᱠᱚ ᱥᱮᱱ ᱯᱩᱨᱟᱹᱣᱜᱼᱟ ᱟᱨ ᱡᱟᱦᱟᱸ ᱜᱟᱫᱮᱞ ᱨᱮ ᱵᱟᱹᱲᱛᱤ ᱠᱷᱮᱞᱚᱸᱰᱤᱭᱟ. ᱠᱚ ᱜᱚᱡ ᱥᱟᱨᱮᱡᱚᱜᱼᱟ, ᱚᱱᱟ ᱜᱟᱫᱮᱞ ᱜᱮᱭ ᱡᱤᱛᱠᱟᱹᱨᱚᱜᱼᱟ ᱾

ᱠᱷᱮᱞ ᱨᱮᱭᱟᱜ ᱚᱠᱛᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱱᱠᱟ ᱧᱮᱞ ᱞᱮᱠᱷᱟᱱ ᱫᱚ ᱱᱚᱶᱟ ᱠᱷᱮᱞ ᱒᱐ ᱒᱐ ᱴᱤᱲᱤᱡ ᱨᱮᱭᱟᱜ ᱵᱟᱱᱟᱨ ᱯᱟᱦᱴᱟ ᱨᱮ ᱮᱱᱮᱡ ᱦᱩᱭᱩᱜᱼᱟ ᱾ ᱡᱚᱛᱚ ᱦᱟᱹᱴᱤᱧ ᱨᱮᱜᱮ ᱜᱟᱫᱮᱞ ᱨᱮᱭᱟᱜ ᱟᱠᱷᱲᱟ ᱴᱷᱟᱶ ᱵᱚᱫᱚᱞ ᱟᱠᱟ ᱛᱟᱦᱮᱸᱱᱟ ᱾ ᱟᱨ ᱱᱚᱶᱟ ᱞᱟᱹᱜᱤᱫ ᱩᱱᱠᱩ ᱕ ᱴᱤᱲᱤᱡ ᱞᱟᱹᱜᱤᱫ ᱚᱠᱛᱚ ᱠᱚ ᱧᱟᱢᱟ ᱾ ᱱᱚᱝᱠᱟ ᱦᱚᱸ ᱦᱩᱭ ᱫᱟᱲᱮᱭᱟᱜ-ᱟᱥᱟᱯᱲᱟᱣᱤᱭᱟᱹ ᱱᱚᱶᱟᱨᱮᱭᱟᱜ ᱢᱤᱫ ᱦᱟᱹᱴᱤᱧ ᱨᱮᱭᱟᱜ ᱚᱠᱛᱚ ᱑᱐ ᱟᱨᱵᱟᱝ ᱑᱕ ᱴᱤᱲᱤᱡ ᱦᱚᱸᱭ ᱫᱚᱦᱚ ᱫᱟᱲᱮᱭᱟᱜᱼᱟ ᱾ ᱡᱚᱛᱚ ᱜᱟᱫᱮᱞ ᱨᱮᱜᱮ ᱕/᱖ ᱥᱴᱟᱯᱚᱨ (ᱥᱟᱥᱟᱵ ᱨᱮ ᱯᱟᱹᱨᱩᱠᱷᱤᱭᱟᱹ ᱠᱷᱮᱞᱚᱸᱰᱤᱭᱟᱹ) ᱟᱨ ᱔/᱕ ᱨᱮᱰᱚᱨ (ᱡᱚᱴᱮᱫ ᱠᱟᱛᱮ ᱫᱟᱹᱲ ᱨᱮ ᱪᱩᱦᱩᱞ ᱠᱷᱮᱞᱚᱸᱰᱤᱭᱟᱹ) ᱠᱚ ᱛᱟᱦᱮᱸᱱᱟ ᱾ ᱢᱤᱫ ᱫᱷᱟᱣ ᱨᱮ ᱠᱷᱟᱹᱞᱤ ᱯᱩᱱ ᱦᱚᱲ ᱥᱴᱟᱯᱚᱨ ᱜᱮ ᱟᱠᱷᱲᱟ ᱛᱮ ᱟᱬᱜᱚᱱ ᱞᱟᱹᱜᱤᱫ ᱫᱟᱣ ᱠᱚ ᱮᱢᱟ ᱠᱚᱣᱟ ᱾ ᱡᱟᱦᱟᱸ ᱛᱤᱱ ᱨᱮᱜᱮ ᱥᱴᱟᱯᱚᱨ ᱡᱟᱦᱟᱸᱭ ᱨᱮᱰᱚᱨ ᱜᱮ ᱟᱡᱟᱜ ᱟᱠᱸᱧᱟ ᱠᱷᱚᱱ ᱵᱟᱦᱨᱮ ᱥᱮᱱᱚᱜ ᱨᱮᱭᱟᱜ ᱮ ᱟᱠᱚᱴ ᱮᱭᱟ, ᱩᱱᱤ ᱢᱤᱫ ᱮᱞ ᱮ ᱧᱟᱢᱟ ᱤᱠᱷᱟᱹᱱ ᱡᱩᱫᱤ ᱨᱮᱰᱚᱨ ᱩᱱᱤ ᱡᱚᱴᱮᱫ ᱠᱟᱛᱮ ᱫᱟᱹᱲ ᱡᱚᱝ ᱨᱮᱭ ᱡᱤᱛᱠᱟᱹᱨᱚᱜᱼᱟ ᱮᱱᱠᱷᱟᱱ ᱩᱱᱤᱨᱤᱱ ᱜᱟᱫᱮᱞ ᱮᱞᱮᱞ ᱠᱚ ᱧᱟᱢᱟ ᱾

ᱠᱷᱮᱞ ᱨᱮᱭᱟᱜ ᱥᱟᱯᱲᱟᱣ ᱵᱚᱭᱚᱥ ᱟᱨ ᱩᱡᱩᱱ ᱪᱮᱛᱟᱱ ᱨᱮ ᱴᱷᱟᱹᱣᱠᱟᱹ ᱦᱩᱭᱩᱜᱼᱟ ᱾ ᱤᱠᱷᱟᱹᱱ ᱱᱮᱛᱟᱨ ᱫᱚ ᱵᱟᱹᱲᱛᱤ ᱞᱮᱠᱟᱛᱮ ᱠᱩᱲᱤ ᱦᱚᱯᱚᱱ ᱠᱚᱦᱚᱸ ᱠᱷᱮᱞ ᱨᱮ ᱫᱟᱣ ᱠᱚ ᱦᱟᱛᱟᱣᱮᱜᱼᱟ ᱾

ᱯᱩᱨᱟᱹ ᱠᱷᱮᱞ ᱫᱚ ᱮᱭᱟᱭ ᱦᱚᱲ ᱛᱮ ᱧᱮᱞ ᱡᱚᱛᱚᱱ ᱦᱩᱭᱩᱜᱼᱟ, ᱢᱤᱫ ᱫᱚ ᱨᱮᱯᱷᱚᱨᱤ, ᱵᱟᱨᱭᱟ ᱟᱸᱯᱟᱭᱚᱨ, ᱵᱟᱨᱭᱟ ᱞᱟᱭᱤᱱᱥ ᱢᱮᱱ, ᱱᱤᱫ ᱦᱚᱲ ᱴᱟᱭᱤᱢ ᱠᱤᱯᱚᱨ, ᱟᱨ ᱢᱤᱫ ᱦᱚᱲ ᱫᱚ ᱥᱠᱳᱨ ᱠᱤᱯᱚᱨ ᱾

ᱯᱟᱹᱪᱷᱞᱟᱹ ᱯᱮᱭᱟ ᱮᱥᱤᱭᱟᱭᱤ ᱠᱷᱮᱞ ᱨᱮᱦᱚᱸ ᱠᱚᱵᱟᱰᱤ ᱥᱮᱞᱮᱫ ᱟᱠᱟᱱ ᱠᱷᱟᱹᱛᱤᱨ ᱡᱟᱯᱟᱱ ᱟᱨ ᱠᱚᱨᱤᱭᱟ ᱞᱮᱠᱟᱱ ᱫᱤᱥᱚᱢ ᱨᱮᱦᱚᱸ ᱠᱚᱵᱟᱰᱤ ᱠᱷᱮᱞ ᱠᱩᱥᱤᱭᱟᱜ ᱦᱚᱲ ᱟᱹᱰᱤ ᱠᱚ ᱵᱟᱹᱲᱛᱤ ᱟᱠᱟᱱᱟ ᱾

ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]