ᱠᱮᱥᱚᱱᱟ
ᱥᱤᱧᱚᱛ ᱫᱤᱥᱚᱢ ᱳᱰᱤᱥᱟ ᱯᱚᱱᱚᱛ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱱᱟᱜ ᱨᱚᱨᱩᱶᱟ ᱵᱞᱚᱠ ᱨᱮᱱᱟᱜ ᱢᱤᱫ ᱟᱹᱛᱩ ᱠᱟᱱᱟ ᱠᱮᱥᱚᱱᱟ (English:Kesana, Odia:କେଶନା)[᱑]᱾ ᱱᱚᱣᱟ ᱥᱩᱨ ᱨᱮ ᱢᱮᱱᱟᱜ ᱠᱷᱤᱪᱤᱝ[᱒] ᱠᱤᱪᱚᱠᱮᱥᱣᱚᱨᱤ ᱢᱩᱱᱫᱨᱤ ᱠᱷᱚᱱ ᱓ ᱠᱤᱞᱚᱢᱤᱴᱚᱨ ᱥᱟᱺᱜᱤᱧ, ᱢᱚᱭᱩᱨᱵᱷᱚᱸᱡᱽ ᱨᱮᱱᱟᱜ ᱢᱤᱫ ᱥᱚᱵᱽᱰᱤᱵᱷᱤᱡᱚᱱ ᱠᱚᱨᱚᱱᱡᱤᱭᱟᱹ ᱠᱷᱚᱱ ᱒᱙ᱹ᱕᱐ ᱠᱤᱞᱚᱢᱤᱴᱚᱨ ᱥᱟᱺᱜᱤᱧᱼᱟ ᱾ ᱵᱟᱨᱤᱯᱟᱫᱟ ᱠᱷᱚᱱᱟᱜ ᱑᱒᱙ᱹ᱖ ᱠᱤᱞᱚᱢᱤᱴᱚᱨ ᱥᱟᱺᱜᱤᱧᱼᱟ ᱾ ᱱᱚᱣᱟ ᱨᱮᱱᱟᱜ ᱥᱩᱯᱩᱨ ᱩᱰᱟᱹᱱ ᱰᱟᱹᱦᱤ ᱫᱚ ᱵᱷᱩᱵᱽᱱᱮᱥᱚᱨ ᱠᱟᱱᱟ ᱡᱟᱦᱟᱸ ᱫᱚ ᱒᱗᱐ ᱠᱤᱞᱚᱢᱤᱴᱚᱨ, ᱠᱚᱞᱠᱟᱛᱟ ᱨᱮᱱᱟᱜ ᱩᱰᱟᱝ ᱰᱟᱹᱦᱤ ᱠᱷᱚᱱ ᱦᱚᱸ ᱒᱔᱐ ᱠᱤᱞᱚᱢᱤᱴᱚᱨ ᱥᱟᱹᱜᱤᱧᱼᱟ ᱾ ᱢᱤᱫ ᱦᱚᱥ ᱵᱷᱩᱵᱽᱱᱮᱥᱚᱨ ᱠᱷᱚᱱ ᱠᱚᱨᱚᱡᱤᱭᱟᱹ ᱟᱨ ᱵᱟᱝ ᱡᱚᱥᱤᱯᱩᱨ ᱥᱚᱡᱷᱮ ᱵᱚᱥ ᱛᱮ ᱥᱴᱮᱨ ᱠᱟᱛᱮᱫ ᱠᱮᱥᱚᱱᱟᱭ ᱥᱮᱴᱮᱨ ᱫᱟᱲᱮᱭᱟᱜᱼᱟ ᱾ᱠᱚᱞᱠᱟᱛᱟ ᱠᱷᱚᱱ ᱦᱚᱸ ᱢᱤᱫ ᱦᱚᱲ ᱵᱟᱞᱮᱥᱣᱚᱨ ᱫᱷᱟᱹᱵᱤᱡ ᱴᱨᱮᱱ ᱛᱮ ᱚᱱᱰᱮ ᱠᱷᱳᱱ ᱠᱚᱨᱚᱧᱤᱭᱟᱹ ᱟᱨ ᱵᱟᱝ ᱡᱚᱥᱤᱯᱩᱨ ᱥᱚᱡᱷᱮ ᱵᱚᱥ ᱛᱮ ᱥᱴᱮᱨ ᱠᱟᱛᱮᱫ ᱠᱮᱥᱚᱱᱟᱭ ᱥᱮᱴᱮᱨ ᱫᱟᱲᱮᱭᱟᱜᱼᱟ ᱟᱨ ᱵᱟᱝ ᱵᱟᱞᱮᱥᱚᱨ ᱠᱷᱚᱱ ᱵᱟᱹᱨᱯᱟᱫᱟ ᱟᱨ ᱚᱱᱰᱮ ᱠᱷᱚᱱ ᱠᱮᱥᱚᱱᱟ ᱥᱮᱴᱮᱨᱚᱜ ᱮ ᱵᱮᱵᱚᱥᱛᱟ ᱫᱟᱲᱮ ᱭᱟᱜᱼᱟ ᱾[᱓] ᱡᱷᱟᱨᱠᱷᱚᱸᱰ ᱫᱤᱥᱚᱢ ᱨᱮᱱᱟᱜ ᱨᱟᱺᱪᱤ ᱟᱨ ᱡᱟᱢᱥᱮᱫᱽᱯᱩᱨ ᱠᱷᱳᱱ ᱦᱚᱸ ᱱᱚᱣᱟ ᱥᱩᱨ ᱜᱮᱭᱟ ᱾ ᱨᱟᱺᱪᱤ ᱠᱷᱚᱱ ᱒᱓᱖ ᱠᱤᱞᱚᱢᱤᱴᱚᱨ ᱦᱩᱭᱩᱜ ᱠᱟᱱ ᱚᱠᱛᱚᱨᱮ ᱡᱟᱢᱥᱮᱫᱽᱯᱩᱨ ᱠᱷᱚᱱ ᱑᱓᱑ ᱠᱤᱞᱚᱢᱤᱴᱚᱨ ᱦᱩᱭᱩᱜᱼᱟ ᱾ ᱡᱟᱢᱥᱮᱫᱽᱯᱩᱨ ᱟᱨ ᱨᱟᱺᱪᱤ ᱠᱷᱚᱱ ᱠᱮᱥᱚᱱᱟ ᱪᱟᱞᱟᱜ ᱦᱩᱭᱩᱜ ᱠᱷᱟᱱ ᱪᱟᱸᱭᱵᱟᱥᱟ ᱥᱮᱫ ᱛᱮ ᱠᱮᱶᱡᱷᱚᱨ ᱴᱟᱴᱟ ᱰᱟᱦᱟᱨ ᱠᱷᱚᱱ ᱵᱟᱹᱨᱯᱟᱫᱟ ᱦᱚᱨ ᱥᱟᱵ ᱞᱮᱠᱷᱟᱱ ᱞᱟᱜᱮ ᱥᱮᱴᱮᱨᱼᱟ ᱾
ᱩᱯᱩᱨᱩᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱱᱚᱣᱟ ᱟᱹᱛᱩ ᱨᱤᱱ ᱥᱟᱱᱟᱢ ᱦᱚᱲ ᱟᱨ ᱥᱟᱱᱟᱢ ᱜᱷᱟᱨᱚᱸᱡᱽ ᱨᱮ ᱢᱩᱜᱩᱱᱤ ᱫᱷᱤᱨᱤ ᱨᱤᱱ ᱵᱟᱰᱚᱦᱤ ᱢᱮᱱᱟᱜ ᱠᱚᱣᱟ ᱾ ᱢᱩᱜᱩᱱᱤ ᱫᱷᱤᱨᱤ ᱛᱮ ᱢᱩᱴᱷᱟᱹᱱ ᱵᱮᱱᱟᱣ ᱟᱨ ᱚᱱᱟ ᱤᱫᱤ ᱠᱟᱛᱮᱫ ᱵᱮᱣᱥᱟᱭ ᱫᱚ ᱥᱟᱱᱟᱢ ᱦᱚᱲᱼᱟ ᱠᱟᱹᱢᱤ ᱠᱟᱱᱟ ᱾ ᱱᱚᱣᱟ ᱠᱟᱹᱢᱤ ᱫᱚ ᱟᱹᱰᱤ ᱥᱮᱫᱟᱭ ᱨᱟᱡ ᱨᱟᱯᱟᱡ ᱚᱢᱚᱲ ᱠᱷᱚᱱ ᱠᱚ ᱪᱷᱩᱴᱟᱹᱣ ᱦᱮᱡ ᱟᱠᱟᱱᱟ ᱾ ᱯᱟᱹᱦᱤᱞ ᱫᱚ ᱫᱷᱤᱨᱤ ᱠᱷᱩᱫᱟᱹᱭ ᱥᱩᱢᱩᱝ ᱛᱮ ᱠᱚ ᱠᱟᱹᱢᱤ ᱛᱟᱦᱮᱸᱫ ᱾ ᱡᱩᱜᱽ ᱵᱚᱫᱚᱞ ᱥᱟᱶ ᱛᱮ ᱱᱮᱛᱟᱨ ᱢᱮᱥᱤᱱ ᱛᱮᱦᱚᱸᱠᱚ ᱠᱟᱹᱢᱤ ᱠᱟᱱᱟ ᱾ ᱚᱱᱟ ᱠᱷᱟᱹᱛᱤᱨ ᱱᱮᱛᱟᱨ ᱫᱚ ᱟᱹᱰᱤ ᱠᱚᱢ ᱫᱤᱱ ᱨᱮ ᱟᱹᱰᱤᱜᱟᱱ ᱠᱚ ᱠᱟᱹᱢᱤ ᱫᱟᱲᱮᱭᱟᱜ ᱠᱟᱱᱟ ᱾ ᱡᱟᱦᱟᱸᱭ ᱡᱮ ᱡᱟᱦᱟᱨ ᱡᱟᱦᱟᱸ ᱞᱮᱠᱟ ᱜᱚᱲᱦᱚᱱ ᱨᱮᱱᱟᱜ ᱱᱟ ᱱᱟ ᱦᱩᱱᱟᱹᱨ ᱡᱩᱛ ᱥᱟᱱᱟ ᱮᱭᱟ ᱚᱱᱠᱟ ᱠᱟᱹᱢᱤ ᱞᱟᱹᱜᱤᱫᱽ ᱦᱚᱸ ᱠᱚ ᱡᱩᱛ ᱜᱮᱭᱟ ᱾ ᱟᱠᱚᱣᱟᱜ ᱵᱮᱯᱟᱨ ᱳᱫᱤᱥᱟ ᱯᱚᱱᱚᱛ ᱥᱟᱶ ᱯᱩᱲᱥᱟᱹ ᱵᱮᱸᱜᱚᱞ ᱡᱷᱟᱨᱠᱷᱚᱸᱰ ᱫᱷᱟᱹᱵᱤᱡ ᱱᱚᱣᱟ ᱟᱹᱛᱩ ᱨᱮᱱᱟᱜ ᱵᱮᱯᱟᱨ ᱥᱮᱴᱮᱨ ᱟᱠᱟᱱᱟ ᱾ ᱡᱟᱹᱥᱛᱤ ᱠᱟᱭ ᱛᱮ ᱢᱟᱹᱱᱢᱤ ᱢᱩᱴᱷᱟᱹᱱ, ᱢᱩᱱᱫᱨᱤ ᱠᱚᱨᱮ ᱫᱳᱲᱚᱢ ᱞᱟᱹᱜᱤᱫ ᱵᱚᱸᱜᱟ ᱢᱩᱴᱷᱟᱹᱱ, ᱟᱨ ᱜᱩᱲᱜᱩ ᱨᱤᱫ ᱫᱷᱤᱨᱤ, ᱦᱮᱢ ᱫᱚᱥᱛᱟ ᱟᱨ ᱚᱲᱟᱜ ᱠᱚᱨᱮ ᱥᱟᱡᱟᱣ ᱞᱮᱠᱟᱱᱟᱜ ᱥᱟᱯᱟᱵ ᱠᱚ ᱦᱚᱸ ᱢᱩᱜᱩᱱᱤ ᱫᱷᱤᱨᱤ ᱛᱮ ᱠᱚ ᱡᱩᱛ ᱮᱫᱼᱟ ᱾[᱔]
ᱜᱮᱞᱮᱨᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱠᱮᱥᱚᱱᱟ ᱟᱹᱛᱩ ᱵᱚᱞᱚ ᱛᱟᱨᱟ ᱜᱮ ᱫᱷᱤᱨᱤ ᱠᱷᱩᱫᱟᱹᱭ ᱠᱟᱹᱢᱤ ᱧᱮᱞ ᱧᱟᱢᱚᱜᱼᱟ, ᱚᱱᱟ ᱟᱹᱛᱩ ᱠᱷᱚᱱ ᱨᱟᱠᱟᱵ ᱟᱹᱜᱩ ᱟᱠᱟᱱ ᱛᱤᱱᱟᱹᱜ ᱜᱟᱱ ᱪᱤᱛᱟᱹᱨ ᱱᱚᱰᱮ ᱞᱟᱫᱮᱭᱮᱱᱟ ᱾
ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ↑ "Kesana Village | Map of Kesana Village in Raruan Tehsil, Mayurbhanj of Orissa". www.mapsofindia.com. Retrieved 2023-01-09.
- ↑ "Tourism in Khiching: Things to do in Khiching". www.tourism-of-india.com (in ᱟᱝᱜᱽᱨᱮᱡᱤ). Retrieved 2023-01-09.
- ↑ "Khiching | Mayurbhanj District, Government of Odisha | India" (in ᱟᱢᱮᱨᱤᱠᱟᱱ ᱟᱝᱜᱽᱨᱮᱡᱤ). Retrieved 2023-01-09.
- ↑ "Odisha: Stone carvers struggle to make ends meet". The New Indian Express. Retrieved 2023-01-09.
ᱵᱟᱦᱨᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ᱳᱰᱤᱥᱟ ᱯᱚᱱᱚᱛ ᱨᱮ ᱫᱷᱤᱨᱤ ᱠᱷᱩᱫᱟᱹᱭ ᱠᱟᱹᱢᱤ Archived ᱒᱐᱑᱖-᱐᱓-᱑᱕ at the Wayback Machine.
- ᱠᱷᱤᱪᱤᱝ