ᱡᱟᱠᱤᱨ ᱦᱩᱥᱮᱸᱱ (ᱨᱟᱡᱽᱟᱹᱨᱤᱭᱟᱹ)
ᱰᱨᱹ ᱡᱟᱠᱤᱨ ᱦᱩᱥᱮᱸᱱ (᱘ ᱯᱷᱮᱵᱽᱨᱩᱣᱟᱨᱤ, ᱑᱘᱙᱗ - ᱓ ᱢᱮ, ᱑᱙᱖᱙[᱒]) ᱫᱚ ᱯᱷᱩᱨᱜᱟᱹᱞ ᱥᱮᱱᱟ ᱟᱨ ᱥᱤᱧᱚᱛ ᱨᱤᱱᱤᱡ ᱛᱮᱥᱟᱨ ᱫᱤᱥᱚᱢ ᱜᱚᱢᱠᱮ ᱟᱨ ᱯᱩᱭᱞᱩ ᱛᱩᱲᱩᱠ ᱫᱤᱥᱚᱢ ᱜᱚᱢᱠᱮ ᱛᱟᱦᱮᱸ ᱠᱟᱱᱟᱭ ᱾ ᱡᱟᱦᱟᱸᱭᱟᱜ ᱠᱟᱹᱢᱤᱠᱛᱚ ᱫᱚ ᱑᱓ ᱢᱮ ᱑᱙᱖᱗ ᱠᱷᱚᱱ ᱓ ᱢᱮ ᱑᱙᱖᱙ ᱫᱷᱟᱹᱵᱤᱡ ᱛᱟᱦᱮᱸ ᱠᱟᱱᱟ ᱾
ᱰᱨ. ᱡᱟᱠᱤᱨ ᱦᱩᱥᱮᱸᱱ ᱟᱜ ᱡᱟᱱᱟᱢ ᱫᱚ ᱘ ᱯᱷᱮᱵᱽᱨᱩᱣᱟᱨᱤ, ᱑᱘᱙᱗ ᱨᱮ ᱦᱟᱭᱫᱨᱟᱵᱟᱫᱽ, ᱛᱮᱞᱮᱝᱜᱟᱱᱟ ᱨᱮᱱᱟᱜ ᱢᱤᱫ ᱠᱤᱥᱟᱹᱬ ᱯᱟᱴᱷᱟᱬ ᱜᱷᱟᱨᱚᱸᱡᱽ ᱨᱮ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱛᱤᱱᱟᱹᱝ ᱚᱠᱛᱚ ᱛᱟᱭᱚᱢ ᱫᱚ ᱟᱡ ᱵᱟᱵᱟ ᱩᱛᱚᱨ ᱯᱨᱚᱫᱮᱥ ᱨᱮ ᱛᱟᱦᱮᱸᱱ ᱮ ᱦᱮᱡ ᱞᱮᱱ ᱛᱟᱦᱮᱸᱫ ᱾ [᱓] ᱥᱩᱢᱩᱝ ᱒᱓ ᱵᱚᱨᱥᱚ ᱵᱚᱭᱚᱥ ᱨᱮᱱᱟᱜ ᱚᱵᱚᱥᱛᱟ ᱨᱮ ᱟᱡ ᱫᱚ ᱡᱟᱢᱤᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱ ᱛᱷᱟᱯᱚᱱᱤᱭᱟᱹ ᱜᱟᱫᱮᱞ ᱨᱤᱱ ᱥᱚᱦᱮᱛ ᱮ ᱵᱮᱱᱟᱣ ᱮᱱᱟ ᱾ ᱡᱟᱠᱤᱨ ᱦᱩᱥᱮᱸᱱ ᱫᱚ ᱥᱤᱧᱚᱛ ᱨᱤᱱᱤᱡ ᱛᱮᱥᱟᱨ ᱫᱤᱥᱚᱢ ᱜᱚᱢᱠᱮ ᱟᱨ ᱧᱩᱛᱩᱢᱟᱱ ᱥᱮᱪᱮᱫᱤᱭᱟᱹᱛ ᱮ ᱛᱟᱦᱮᱸ ᱠᱟᱱᱟ ᱾ ᱟᱡ ᱫᱚ ᱠᱟᱹᱣᱰᱤ-ᱟᱹᱨᱤ ᱨᱮ ᱯᱤᱦᱮᱪᱹ ᱰᱤᱹ ᱨᱮᱱᱟᱜ ᱰᱤᱜᱽᱨᱤ ᱞᱟᱹᱜᱤᱫ ᱡᱚᱨᱢᱟᱱᱤ ᱨᱮᱱᱟᱜ ᱵᱚᱨᱞᱤᱱ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱮ ᱪᱟᱞᱟᱣᱮᱱᱟ ᱾ ᱟᱨ ᱨᱩᱣᱟᱹᱲ ᱦᱮᱡ ᱠᱟᱛᱮ ᱡᱟᱢᱤᱭᱟ ᱨᱤᱱᱤᱡ ᱰᱮᱯᱭᱩᱴᱤ ᱵᱷᱟᱭᱤᱥ ᱪᱟᱱᱥᱮᱞᱳᱨ ᱟᱜ ᱛᱷᱟᱱᱚᱛ ᱨᱮᱭ ᱫᱩᱲᱩᱵ ᱮᱱᱟ ᱾ ᱑᱙᱒᱐ ᱨᱮ ᱟᱡ ᱫᱚ ᱡᱟᱢᱤᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱛᱷᱟᱯᱚᱱ ᱨᱮ ᱮᱱᱮᱢ ᱮ ᱮᱢ ᱠᱮᱫ-ᱟ ᱟᱨ ᱚᱱᱟ ᱨᱤᱱᱤᱡ ᱰᱮᱯᱭᱩᱴᱤ ᱵᱷᱟᱭᱤᱥ ᱪᱟᱱᱥᱮᱞᱚᱨ ᱦᱚᱸᱭ ᱵᱮᱱᱟᱣ ᱮᱱᱟ ᱾ ᱟᱡᱟᱜ ᱛᱟᱹᱨᱤ ᱨᱮ ᱡᱟᱢᱤᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱨᱮᱱᱟᱜ ᱡᱟᱹᱛᱤᱭᱟᱹᱨᱤᱛ ᱠᱟᱹᱢᱤ ᱟᱨ ᱯᱷᱩᱨᱜᱟᱹᱞ ᱦᱩᱞᱥᱟᱹᱭ ᱨᱮ ᱛᱤᱨᱩᱵ ᱮ ᱛᱟᱦᱮᱸ ᱮᱱᱟ ᱾ ᱯᱷᱩᱨᱜᱟᱹᱞ ᱟᱢᱮᱴ ᱠᱮᱫ ᱛᱟᱭᱢ ᱟᱡ ᱫᱚ ᱚᱞᱤᱜᱚᱰ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱵᱷᱟᱭᱮᱥ ᱴᱟᱱᱥᱮᱞᱚᱨ ᱮ ᱵᱮᱱᱟᱣ ᱮᱱᱟ ᱟᱨ ᱟᱡᱟᱜ ᱪᱮᱭᱟᱨᱢᱮᱱᱥᱤᱯ ᱨᱮ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱥᱮᱪᱮᱫ ᱠᱩᱢᱩᱴ ᱦᱚᱸ ᱛᱷᱟᱯᱚᱱ ᱦᱩᱭ ᱮᱱᱟ ᱾ ᱱᱚᱶᱟ ᱥᱟᱶᱛᱮ ᱟᱡ ᱫᱚ ᱥᱤᱧᱚᱛᱤᱭᱟᱹ ᱯᱨᱮᱥ ᱠᱚᱢᱤᱥᱚᱱ, ᱡᱮᱜᱮᱛ ᱵᱤᱨᱫᱟᱹᱜᱟᱲ ᱜᱽᱨᱟᱸᱴ ᱠᱚᱢᱤᱥᱚᱱ (ᱥᱤᱧᱚᱛ), ᱭᱩᱱᱮᱥᱠᱳ, ᱡᱮᱡᱟᱹᱛᱤᱭᱟᱹᱨᱤ ᱥᱮᱪᱮᱫ ᱥᱮᱵᱟ ᱟᱨ ᱥᱮᱱᱴᱨᱟᱞ ᱯᱨᱟᱭᱢᱮᱨᱤ ᱮᱡᱩᱠᱮᱥᱚᱱ ᱵᱚᱨᱰ ᱥᱟᱶ ᱦᱚᱸ ᱡᱩᱲᱟᱹᱭ ᱮ ᱛᱟᱦᱮᱸ ᱟᱠᱟᱱᱟ ᱾ ᱑᱙᱖᱒ ᱨᱮ ᱟᱡ ᱫᱚ ᱥᱤᱧᱚᱛ ᱨᱤᱱᱤᱡ ᱡᱚᱜᱚ ᱫᱤᱥᱚᱢ ᱜᱚᱢᱠᱮᱭ ᱵᱮᱱᱟᱣᱮᱱᱟ ᱾ ᱟᱡ ᱫᱚ ᱥᱮᱨᱢᱟ ᱑᱙᱖᱓ ᱨᱮ ᱵᱷᱟᱨᱚᱛ ᱨᱚᱛᱱᱚ ᱛᱮᱭ ᱢᱟᱹᱱ ᱥᱟᱨᱵᱟᱣ ᱟᱠᱟᱱᱟ ᱾ ᱑᱙᱖᱙ ᱨᱮ ᱵᱮᱚᱠᱛᱚ ᱜᱩᱨ ᱠᱸᱟᱹᱛᱤᱨ ᱟᱡ ᱫᱚ ᱟᱡᱟᱜ ᱫᱤᱥᱚᱢ ᱜᱚᱢᱠᱮ ᱠᱟᱹᱢᱤᱠᱛᱚ ᱵᱟᱭ ᱯᱩᱨᱟᱹᱣ ᱫᱟᱲᱮᱭᱟᱫ-ᱟ ᱾
ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱥᱤᱧᱚᱛ ᱨᱮ ᱦᱟᱹᱞᱤᱭᱟᱹᱛ ᱥᱮᱪᱮᱫ ᱨᱤᱱᱤᱫ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱚᱲᱚᱱᱤᱭᱟᱹ ᱠᱷᱚᱱ ᱢᱤᱫ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱟᱨ ᱩᱱᱤ ᱫᱚ ᱟᱡᱟᱜ ᱛᱟᱹᱨᱤ ᱨᱮ ᱫᱟᱢᱤᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱨᱮᱱᱟᱜ ᱧᱩᱛᱩᱢ ᱠᱷᱚᱱ ᱢᱤᱫ ᱛᱟᱞᱢᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱞᱮᱠᱟᱛᱮ ᱱᱟᱶᱟ ᱫᱤᱞᱞᱤ ᱨᱮᱭ ᱛᱷᱟᱯᱚᱱ ᱠᱮᱫ-ᱟ, ᱡᱟᱦᱟᱸ ᱠᱷᱚᱱ ᱜᱮᱥᱟᱭ ᱟᱪᱮᱛᱤᱭᱟᱹ ᱡᱚᱛᱚ ᱥᱮᱨᱢᱟ ᱟᱹᱰᱤᱜᱟᱱ ᱥᱟᱛᱟᱢ ᱨᱮ ᱥᱮᱪᱮᱫ ᱠᱚ ᱟᱢᱮᱴ ᱮᱫ-ᱟ ᱾ ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱵᱤᱦᱟᱨ ᱨᱤᱱᱤᱡ ᱨᱟᱡᱽᱯᱟᱞ ᱞᱮᱠᱟᱛᱮ ᱦᱚᱸᱭ ᱠᱟᱹᱢᱤ ᱟᱠᱟᱫ-ᱟ ᱟᱨ ᱤᱱᱟᱹ ᱛᱟᱭᱚᱢ ᱟᱡ ᱫᱚ ᱫᱤᱥᱚᱢ ᱨᱤᱱᱤᱡ ᱡᱚᱜᱚ ᱫᱤᱥᱚᱢ ᱜᱚᱢᱠᱮᱭ ᱛᱟᱦᱮᱸ ᱮᱱᱟ ᱾ ᱟᱨ ᱤᱱᱟᱹ ᱛᱟᱭᱚᱢ ᱟᱡ ᱫᱚ ᱥᱤᱧᱚᱛ ᱨᱤᱱᱤᱡ ᱛᱮᱥᱟᱨ ᱟᱨ ᱯᱩᱭᱞᱩ ᱢᱩᱥᱞᱤᱢ ᱫᱤᱥᱚᱢ ᱜᱚᱢᱠᱮᱭ ᱵᱮᱱᱟᱣ ᱮᱱᱟ ᱾ ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱢᱤᱫ ᱱᱚᱝᱠᱟᱱ ᱢᱩᱥᱞᱤᱢ ᱯᱷᱩᱨᱜᱟᱹᱞ ᱥᱮᱱᱟ ᱠᱟᱱᱟᱭ ᱡᱟᱦᱟᱸᱭ ᱫᱚ ᱫᱤᱥᱚᱢ ᱜᱚᱢᱠᱮ ᱛᱷᱟᱱᱚᱛ ᱦᱟᱹᱵᱤᱡ ᱥᱮᱴᱮᱨᱚᱜ ᱨᱮᱭ ᱡᱤᱛᱠᱟᱹᱨ ᱟᱠᱟᱱᱟ ᱾
ᱠᱟᱹᱢᱤᱴᱷᱟᱶ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱨᱹ ᱡᱟᱠᱤᱨ ᱦᱩᱥᱮᱸᱱ ᱫᱚ ᱥᱤᱧᱚᱛ ᱨᱤᱱᱤᱡ ᱫᱤᱥᱚᱢ ᱜᱚᱢᱠᱮ ᱵᱮᱱᱟᱣ ᱟᱠᱟᱱᱤᱡ ᱯᱩᱭᱞᱩ ᱢᱩᱥᱞᱤᱢ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱚᱞᱤᱜᱚᱰ ᱨᱮ ᱢᱩᱥᱞᱤᱢ ᱡᱟᱹᱛᱤᱭᱟᱹᱨᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ (ᱛᱟᱭᱚᱢ ᱛᱮ ᱫᱤᱞᱞᱤ ᱤᱫᱤᱭᱮᱱᱟ) ᱨᱮᱱᱟᱜ ᱛᱷᱟᱯᱚᱱ ᱨᱮ ᱜᱚᱲᱚᱭ ᱮᱢ ᱠᱮᱫ-ᱟ ᱟᱨ ᱑᱙᱒᱖ ᱠᱷᱚᱱ ᱑᱙᱔᱘ ᱦᱟᱹᱵᱤᱡ ᱚᱱᱟ ᱨᱤᱱᱤᱡ ᱪᱟᱱᱥᱮᱞᱚᱨ ᱮ ᱛᱟᱦᱮᱸ ᱮᱱᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱭᱟᱜ ᱱᱮᱶᱛᱟ ᱨᱮ ᱩᱱᱤ ᱫᱚ ᱮᱛᱚᱦᱚᱵ ᱥᱮᱪᱮᱫ ᱨᱮ ᱱᱮᱥᱱᱟᱞ ᱠᱚᱢᱤᱥᱚᱱ ᱨᱤᱱᱤᱡ ᱪᱮᱭᱟᱨᱢᱮᱱ ᱦᱚᱸᱭ ᱵᱮᱱᱟᱣ ᱮᱱᱟ, ᱡᱟᱦᱟᱸ ᱨᱮᱱᱟᱜ ᱛᱷᱟᱯᱚᱱ ᱫᱚ ᱑᱙᱓᱗ ᱨᱮ ᱟᱥᱲᱟ ᱞᱟᱹᱜᱤᱫ ᱜᱟᱱᱫᱷᱤᱭᱟᱹ ᱯᱚᱲᱦᱚᱱ ᱦᱚᱨᱟ ᱵᱮᱱᱟᱣ ᱞᱟᱹᱜᱤᱫ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱑᱙᱔᱘ ᱨᱮ ᱦᱩᱥᱮᱸᱱ ᱫᱚ ᱚᱞᱤᱜᱚᱰ ᱢᱩᱥᱞᱤᱢ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱪᱟᱱᱥᱮᱞᱚᱨ ᱮ ᱵᱮᱱᱟᱣᱮᱱᱟ ᱟᱨ ᱯᱩᱱ ᱥᱮᱨᱢᱟ ᱛᱟᱭᱚᱢ ᱩᱱᱤ ᱫᱚ ᱨᱟᱡᱽᱡᱚᱥᱚᱵᱷᱟ ᱨᱮᱭ ᱵᱚᱞᱚᱭᱮᱱᱟ ᱾ ᱑᱙᱕᱖ - ᱕᱘ ᱨᱮ ᱭᱩᱱᱟᱭᱴᱮᱰ ᱱᱮᱥᱚᱱᱥ ᱮᱡᱩᱠᱮᱥᱚᱱ, ᱥᱟᱬᱮᱥ ᱟᱨ ᱞᱟᱠᱪᱟᱨ (ᱭᱩᱱᱮᱥᱠᱳ) ᱠᱟᱹᱢᱤᱦᱚᱨᱟ ᱥᱚᱢᱤᱛᱤ ᱨᱮᱭ ᱛᱟᱦᱮᱸ ᱮᱱᱟ ᱾ ᱑᱙᱕᱗ ᱨᱮ ᱟᱡ ᱫᱚ ᱵᱤᱦᱟᱨ ᱨᱤᱱᱤᱡ ᱨᱟᱡᱽᱯᱟᱞ ᱞᱮᱠᱟ ᱠᱚ ᱛᱤᱸᱜᱩ ᱠᱮᱫᱮᱭᱟ ᱟᱨ ᱑᱙᱖᱒ ᱨᱮ ᱩᱱᱤ ᱫᱚ ᱥᱤᱧᱚᱛ ᱨᱤᱱᱤᱡ ᱡᱚᱜᱚ ᱫᱤᱥᱚᱢ ᱜᱚᱢᱠᱮ ᱞᱮᱠᱟᱛᱮᱭ ᱵᱟᱪᱷᱚᱱ ᱮᱱᱟ ᱾ ᱑᱙᱖᱗ ᱨᱮ ᱠᱚᱸᱜᱽᱨᱮᱥ ᱯᱟᱴᱤ ᱨᱤᱱᱤᱡ ᱟᱹᱢᱟᱹᱞᱮᱛ ᱩᱢᱤᱫᱽᱵᱟᱨ ᱞᱮᱠᱟᱛᱮ ᱩᱱᱤ ᱫᱚ ᱥᱤᱧᱚᱛ ᱨᱤᱱᱤᱡ ᱫᱤᱥᱚᱢ ᱜᱚᱢᱠᱮ ᱛᱷᱟᱱᱚᱛ ᱞᱟᱹᱜᱤᱫ ᱮ ᱵᱟᱪᱷᱚᱱ ᱮᱱᱟ ᱟᱨ ᱑᱙᱖᱙ ᱨᱮ ᱜᱩᱨᱚᱜ ᱦᱟᱹᱵᱤᱡ ᱥᱮᱵᱟᱨᱮᱭ ᱛᱟᱦᱮᱸ ᱠᱟᱱᱟ ᱾
ᱟᱯᱚᱱᱟᱛ (Personality)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱟᱹᱰᱤ ᱜᱮ ᱥᱟᱶᱟᱨ ᱵᱮᱵᱷᱟᱨ ᱜᱚᱨᱚᱡᱟᱱ ᱟᱯᱚᱱᱟᱛ ᱛᱮ ᱠᱤᱥᱟᱹᱬ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱟᱡᱟᱜ ᱥᱟᱶᱟᱨ ᱵᱮᱵᱷᱟᱨ ᱜᱚᱨᱚᱡᱟᱱ ᱫᱚ ᱞᱟᱛᱟᱨ ᱨᱮ ᱮᱢ ᱟᱠᱟᱱ ᱥᱟᱛᱟᱢ ᱠᱷᱚᱱ ᱜᱮ ᱵᱩᱡᱷᱟᱹᱣ ᱜᱟᱱᱚᱜ-ᱟ ᱾ ᱱᱚᱶᱟ ᱥᱟᱛᱟᱢ ᱫᱚ ᱩᱱ ᱡᱚᱦᱚᱜᱟᱜ ᱠᱟᱱᱟ, ᱛᱤᱱ ᱡᱚᱦᱚᱜ ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱡᱟᱢᱤᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱨᱤᱱᱤᱡ ᱪᱟᱱᱥᱮᱞᱚᱨ ᱮ ᱛᱟᱦᱮᱸ ᱠᱟᱱᱟ ᱾ ᱟᱡ ᱫᱚᱭ ᱠᱷᱚᱡᱚᱜ ᱠᱟᱱ ᱛᱟᱦᱮᱸᱫ ᱡᱮ ᱡᱟᱢᱟᱭᱟ ᱢᱤᱞᱤᱭᱟ ᱤᱥᱞᱟᱢᱤᱭᱟ ᱨᱤᱱ ᱟᱪᱮᱛᱤᱭᱟᱹ ᱠᱚᱫᱚ ᱟᱹᱰᱤ ᱜᱮ ᱥᱟᱶᱟᱨ ᱵᱮᱵᱷᱟᱨᱟᱱ ᱠᱚ ᱛᱟᱦᱮᱸᱱ ᱢᱟ, ᱡᱟᱦᱟᱸᱨᱮ ᱥᱟᱯᱷᱟ ᱥᱟᱹᱯᱷᱤ ᱞᱩᱜᱽᱲᱤ, ᱟᱨ ᱯᱟᱹᱞᱤᱥ ᱛᱮ ᱡᱷᱟᱞᱠᱟᱣᱜ ᱡᱩᱛᱟᱹ ᱫᱚ ᱡᱚᱛᱚ ᱠᱷᱚᱱ ᱪᱮᱛᱟᱱ ᱨᱮ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱫ ᱾ ᱱᱚᱶᱟ ᱞᱟᱹᱜᱤᱫ ᱰᱨ. ᱡᱟᱠᱤᱨ ᱦᱩᱥᱮᱸᱱ ᱫᱚ ᱢᱤᱫ ᱚᱞᱛᱚᱞ ᱩᱱᱩᱫᱩᱜ ᱦᱚᱸᱭ ᱚᱰᱚᱠ ᱠᱮᱫ-ᱟ, ᱤᱠᱷᱟᱹᱱ ᱟᱪᱮᱛᱤᱭᱟᱹ ᱠᱚᱫᱚ ᱚᱱᱟ ᱪᱮᱛᱟᱱ ᱨᱮ ᱵᱟᱹᱲᱛᱤ ᱫᱷᱮᱭᱟᱱ ᱵᱟᱠᱚ ᱮᱢ ᱞᱮᱫ-ᱟ ᱾ ᱟᱪᱮᱛᱤᱭᱟᱹ ᱠᱚ ᱟᱠᱚᱣᱟᱜ ᱢᱚᱱᱠᱩᱥᱤ ᱛᱮᱜᱮ ᱞᱟᱦᱟ ᱟᱠᱟ ᱠᱚ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱫ, ᱡᱟᱦᱟᱸ ᱠᱷᱟᱹᱛᱤᱨ ᱡᱟᱢᱤᱭᱟ ᱢᱤᱞᱤᱭᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱥᱟᱶᱟᱨ ᱵᱮᱵᱷᱟᱨ ᱫᱚ ᱦᱩᱡᱩᱲᱚᱜ ᱮᱛᱚᱦᱚᱵ ᱮᱱᱟ ᱾ ᱱᱚᱶᱟ ᱧᱮᱞ ᱠᱟᱛᱮ ᱰᱨ. ᱦᱩᱥᱮᱸᱱ ᱫᱚ ᱟᱪᱮᱛᱤᱭᱟᱹ ᱠᱚ ᱵᱷᱮᱜᱟᱨ ᱞᱮᱠᱟᱛᱮ ᱥᱩᱫᱷᱨᱟᱹᱣ ᱨᱮᱱᱟᱜ ᱮ ᱩᱭᱦᱟᱹᱨ ᱠᱮᱫ-ᱟ ᱾ ᱢᱤᱫ ᱫᱤᱱ ᱫᱚ ᱩᱱᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱫᱩᱣᱟᱹᱨ ᱨᱮ ᱵᱩᱨᱩᱥ ᱟᱨ ᱯᱟᱹᱞᱤᱥ ᱤᱫᱤ ᱠᱟᱛᱮᱭ ᱫᱩᱲᱩᱵ ᱮᱱᱟ ᱟᱨ ᱢᱤ-ᱢᱤᱫ ᱦᱤᱡᱩᱜ ᱥᱮᱱᱚᱜ ᱠᱟᱱ ᱟᱪᱮᱛᱤᱭᱟᱹ ᱠᱚᱣᱟᱜ ᱡᱩᱛᱟᱹ ᱵᱩᱨᱩᱥ ᱮ ᱫᱷᱩᱨᱟᱹᱣᱮᱱᱟ ᱾ ᱱᱚᱶᱟ ᱧᱮᱞ ᱠᱟᱛᱮ ᱡᱚᱛᱚ ᱟᱪᱮᱛᱤᱭᱟᱹ ᱠᱚ ᱟᱹᱰᱤ ᱠᱚ ᱞᱟᱡᱟᱣᱮᱱᱟ ᱾ ᱩᱱᱠᱩ ᱠᱚ ᱟᱠᱚᱣᱟᱜ ᱵᱷᱩᱞ ᱢᱟᱱᱟᱣ ᱛᱩᱞᱩᱡ ᱰᱨ. ᱦᱩᱥᱮᱸᱱ ᱴᱷᱮᱱ ᱠᱷᱚᱱ ᱤᱠᱟᱹ ᱠᱚ ᱠᱚᱭ ᱠᱮᱫ-ᱟ ᱟᱨ ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱫᱚ ᱡᱚᱛᱚ ᱟᱪᱮᱛᱤᱭᱟᱹ ᱠᱚ ᱥᱟᱯᱷᱟ ᱥᱟᱹᱯᱷᱤ ᱞᱩᱜᱽᱲᱤ ᱥᱟᱶ ᱟᱨ ᱡᱩᱛᱟᱹ ᱠᱚ ᱯᱟᱹᱞᱤᱥ ᱠᱟᱛᱮ ᱠᱚ ᱦᱮᱡ ᱮᱱᱟ ᱾ ᱱᱚᱝᱠᱟ ᱛᱮ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱥᱟᱶᱟᱨ ᱵᱮᱵᱷᱟᱨ ᱫᱚ ᱟᱨ ᱦᱚᱸ ᱛᱚᱸᱜᱮ ᱛᱟᱦᱮᱸᱭᱮᱱᱟ ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ Zakir Husain, Encyclopædia Britannica Online, 12 February 2012, retrieved 13 May 2012
- ↑ Dr. Zakir Husain (1897-1969), indiapress.org ᱨᱮ ᱥᱤᱧᱚᱛ ᱨᱤᱱ ᱟᱭᱟᱨ ᱫᱤᱥᱚᱢ ᱜᱚᱢᱠᱮ ᱠᱚᱣᱟᱜ ᱡᱤᱭᱚᱱᱤ
- ↑ "ᱰᱨᱹ ᱡᱟᱠᱤᱨ ᱦᱩᱥᱮᱸᱱ ᱟᱜ ᱡᱤᱭᱚᱱᱤ". cultural india. Retrieved 26/11/2015.
{{cite web}}: Check date values in:|accessdate=(help)
ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ] |
ᱣᱤᱠᱤᱢᱤᱰᱤᱭᱟ ᱠᱚᱢᱚᱱᱥ ᱨᱮ Zakir Husain (politician) ᱵᱟᱵᱚᱛᱫᱽ ᱛᱮ ᱨᱮᱫ ᱢᱮᱱᱟᱜᱼᱟ ᱾. |
 |
ᱣᱤᱠᱤᱠᱩᱣᱚᱴ ᱨᱮ ᱡᱟᱠᱤᱨ ᱦᱩᱥᱮᱸᱱ (ᱨᱟᱡᱽᱟᱹᱨᱤᱭᱟᱹ) ᱥᱟᱶ ᱡᱚᱲᱟᱣᱟᱱᱟᱜ ᱠᱟᱛᱷᱟ ᱠᱚ ᱾ |