ᱥᱚᱦᱨᱟᱭ ᱵᱚᱝᱜᱟ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search

ᱥᱚᱦᱨᱟᱭ ᱨᱮᱱᱟᱜ ᱡᱟᱭ ᱛᱮᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱚᱦᱨᱟᱭ ᱵᱚᱝᱜᱟ ᱫᱚ ᱥᱮᱨᱢᱟ ᱨᱮᱱᱟᱜ ᱜᱮᱞᱟᱜ ᱵᱚᱝᱜᱟ ᱥᱮ ᱪᱟᱸᱫᱚ ᱠᱟᱱᱟ ᱾ ᱢᱮᱱᱟᱠᱚ "ᱦᱟᱹᱛᱤ" ᱞᱮᱠᱟᱱ ᱥᱚᱦᱨᱟᱭ ᱾ ᱦᱟᱹᱛᱤ ᱞᱮᱠᱟ ᱥᱮᱬᱟᱦᱟᱸ, ᱦᱟ.ᱛᱤ ᱞᱮᱠᱟ ᱜᱩᱱ, ᱦᱟᱹᱛᱤ ᱞᱮᱠᱟ ᱫᱟᱲᱮ ᱾ ᱟᱵᱚ ᱥᱟᱨᱱᱟ ᱫᱷᱚᱨᱚᱢ ᱥᱟᱱᱛᱟᱲ ᱠᱚᱫᱚ ᱦᱟᱹᱛᱤ ᱜᱩᱱᱫᱚ "ᱟᱭᱳ" ᱫᱟᱲᱮ ᱟᱨ ᱥᱟᱫᱚᱢ ᱜᱩᱱᱫᱚ "ᱵᱟᱵᱟ" ᱫᱟᱲᱮ ᱞᱮᱠᱟ ᱵᱚ ᱢᱟᱱᱟᱣᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱫᱚ ᱦᱚᱲ ᱦᱚᱸ ᱵᱚ ᱦᱟᱹᱛᱤ ᱥᱟᱫᱚᱢᱚᱜ ᱜᱮᱭᱟ ᱾

ᱥᱚᱦᱨᱟᱭ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱧᱩᱛᱩᱢᱚᱜ ᱨᱮᱱᱟᱜ ᱢᱮᱱᱮᱛ ᱫᱚ "ᱥᱟᱦᱟᱨᱟᱭ" ᱠᱷᱚᱱ ᱜᱮ ᱨᱚᱲ ᱨᱚᱲ ᱛᱮ "ᱥᱚᱦᱨᱟᱭ" ᱧᱩᱛᱩᱢ ᱟᱠᱟᱱᱟ, ᱦᱩᱲᱩ, ᱪᱟᱣᱞᱮ, ᱠᱟᱣᱰᱤ, ᱢᱤᱸᱭᱦᱩᱸ, ᱢᱮᱨᱚᱢ, ᱜᱟᱭ, ᱠᱟᱰᱟ, ᱥᱟᱶ ᱢᱟᱹᱱᱢᱤ ᱦᱚᱸᱠᱚ ᱥᱟᱦᱟᱨᱚᱜ-ᱟ ᱾ ᱚᱱᱟ ᱞᱟᱹᱜᱤᱫ ᱛᱮᱜᱮ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱾ ᱚᱱᱟ ᱥᱟᱦᱟᱨ ᱨᱮᱱᱟᱜ ᱫᱟᱲᱮ ᱢᱮᱱᱟᱜ-ᱟ ᱜᱟᱹᱭ ᱴᱷᱮᱱ ᱾ ᱜᱟᱹᱭ ᱵᱚ ᱪᱟᱨᱦᱟᱣ ᱮᱭᱟ ᱟᱨ ᱵᱚ ᱥᱟᱨᱦᱟᱣ ᱮᱭᱟ ᱥᱚᱦᱨᱟᱭ ᱵᱚᱝᱜᱟ ᱠᱩᱱᱟᱹᱢᱤᱨᱮ ᱾ ᱪᱮᱫᱟᱜ ᱥᱮ ᱜᱟᱹᱭ ᱟᱭᱳ ᱜᱮ ᱦᱤᱦᱤᱲᱤ ᱯᱤᱯᱤᱲᱤ ᱠᱷᱚᱱ ᱦᱩᱲᱩ ᱜᱮᱞᱮ ᱫᱚᱭ ᱫᱤᱯᱤᱞ ᱟᱹᱜᱩ ᱞᱮᱫ-ᱟᱭ ᱾ ᱚᱱᱟᱛᱮ ᱥᱚᱦᱨᱟᱭ ᱨᱮᱫᱚ ᱜᱟᱹᱭ ᱵᱚᱦᱚᱜ ᱨᱮ ᱦᱩᱲᱩ ᱜᱮᱞᱮ ᱨᱮᱱᱟᱜ ᱫᱷᱟᱶᱟ ᱵᱮᱱᱟᱣ ᱠᱟᱛᱮ ᱵᱚ ᱛᱚᱞ ᱟᱠᱚᱣᱟ ᱾ ᱨᱟᱹᱥᱠᱟᱹᱛᱮ ᱵᱚ ᱥᱟᱨᱦᱟᱣ ᱮᱭᱟ ᱟᱨ ᱵᱚ ᱪᱟᱨᱦᱟᱣ ᱮᱭᱟ ᱾ ᱚᱱᱟᱛᱮ ᱜᱟᱭ ᱵᱚ ᱚᱦᱬᱮ ᱮᱭᱟ ᱜᱟᱹᱭ ᱵᱚ ᱪᱩᱢᱟᱣᱲᱟ ᱮᱭᱟ ᱾ ᱥᱚᱦᱨᱟᱭ ᱯᱟᱨᱟᱵᱽ ᱫᱚ ᱢᱚᱬᱮ ᱢᱟᱦᱟ ᱠᱚ ᱢᱟᱱᱟᱣᱟ ᱾ ᱱᱚᱝᱠᱟ ᱢᱟᱱᱟᱣ ᱠᱚ ᱫᱚ- ᱑-ᱜᱚᱴ ᱵᱚᱝᱜᱟ ᱒-ᱜᱚᱲᱟ ᱵᱚᱝᱜᱟ ᱓-ᱟᱲᱟᱜ/ᱠᱷᱩᱱᱴᱟᱣ [ᱜᱟᱹᱭ ᱠᱚ] ᱔-ᱟᱲᱟᱜ/ᱠᱷᱩᱱᱴᱟᱣ [ᱠᱟᱰᱟ ᱠᱚ] ᱕-ᱡᱟᱡᱽᱞᱮ ᱾ ᱟᱹᱰᱤ ᱨᱟᱹᱥᱠᱟᱹ ᱜᱮ ᱾

ᱱᱮ ᱠᱩᱱᱟᱹᱢᱤ ᱫᱚ ᱜᱚᱴ ᱵᱚᱝᱜᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱚᱴ ᱵᱚᱝᱜᱟ ᱦᱤᱞᱚᱜ ᱫᱚ ᱥᱮᱛᱟᱜ ᱨᱮ ᱥᱟᱱᱟᱢ ᱦᱚᱲ ᱨᱤᱱ ᱜᱟᱹᱭ ᱠᱟᱰᱟ ᱠᱚ ᱛᱩᱯᱩ ᱯᱷᱟᱨᱪᱟ ᱠᱚᱣᱟ ᱾ ᱫᱮᱨᱮᱧ ᱠᱚᱨᱮ ᱥᱩᱱᱩᱢ ᱠᱚ ᱚᱡᱚᱜ ᱟᱠᱚᱛᱮ ᱜᱩᱯᱤᱠᱚ ᱤᱫᱤ ᱠᱚᱣᱟ ᱾ ᱱᱟᱭᱠᱮ ᱫᱚ ᱥᱮᱛᱟᱜ ᱵᱮᱲᱟ ᱜᱚᱴ ᱴᱟᱺᱰᱤ ᱨᱮ ᱜᱚᱴᱮ ᱵᱚᱝᱜᱟᱭᱟ ᱾ ᱜᱚᱴ ᱵᱚᱝᱜᱟ ᱨᱮᱫᱚ ᱱᱟᱭᱠᱮ ᱯᱮᱭᱟ ᱥᱤᱢ ᱮ ᱵᱚᱝᱜᱟ ᱠᱚᱣᱟ ᱾ ᱢᱟᱨᱟᱝ ᱵᱳᱨᱳ ᱧᱩᱛᱩᱢ ᱛᱮ ᱯᱩᱸᱰ ᱥᱤᱢ ᱥᱟᱺᱰᱤ, ᱡᱟᱦᱮᱨ ᱟᱭᱳ ᱧᱩᱛᱩᱢ ᱛᱮ ᱦᱮᱲᱟᱜ ᱠᱟᱞᱚᱴ, ᱢᱚᱬᱮᱠᱚ ᱛᱩᱨᱩᱭᱠᱚ ᱞᱟᱹᱜᱤᱫ ᱟᱨᱟᱜ ᱥᱟᱺᱰᱤ ᱾ ᱵᱚᱝᱜᱟ ᱦᱩᱭ ᱛᱟᱭᱚᱢ ᱢᱟᱨᱟᱝ ᱵᱳᱨᱳ ᱠᱷᱚᱸᱰ ᱨᱮ ᱱᱟᱭᱠᱮ ᱢᱤᱫᱴᱟᱹᱝ ᱵᱤᱞᱤ ᱫᱚᱲᱚᱢᱟᱸᱭ ᱾ ᱥᱚᱲᱮᱠᱚ ᱤᱥᱤᱱ ᱡᱚᱢ ᱵᱟᱲᱟ ᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱜᱟᱹᱭ ᱰᱟᱝᱜᱽᱨᱟ ᱠᱚ ᱡᱚᱛᱚ ᱦᱚᱲ ᱠᱚ ᱞᱟᱜᱟ ᱥᱩᱨ ᱟᱹᱜᱩᱠᱚᱣᱟ ᱟᱨ ᱚᱱᱟ ᱵᱤᱞᱤ ᱠᱚ ᱞᱮᱵᱮᱫ ᱦᱚᱪᱚ ᱠᱚᱣᱟ ᱾ ᱡᱟᱦᱟᱸᱭᱤᱡ ᱰᱟᱹᱝᱜᱽᱜᱨᱤ ᱚᱱᱟ ᱵᱤᱞᱤᱭ ᱞᱮᱵᱮᱫᱟ ᱩᱱᱤᱠᱚ ᱥᱤᱫᱩᱨ ᱟᱭᱟ ᱾ ᱟᱫᱚ ᱩᱱᱤ ᱰᱟᱹᱝᱜᱽᱨᱤ ᱠᱤᱥᱟᱹᱬ ᱫᱚ ᱟᱹᱰᱤ ᱥᱟᱦᱟᱨᱟᱹᱱᱤᱡ ᱠᱟᱱᱟᱭ ᱢᱮᱱᱛᱮᱭ ᱵᱟᱰᱟᱭᱚᱜ-ᱟ ᱾ ᱚᱱᱟ ᱨᱟᱹᱥᱠᱟᱹᱛᱮ ᱫᱚᱥᱟᱨ ᱥᱮᱨᱢᱟ ᱜᱚᱴ ᱵᱚᱝᱜᱟ ᱞᱟᱹᱜᱤᱫ ᱢᱤᱫ ᱴᱩᱠᱩᱡ ᱦᱟᱺᱰᱤ ᱟᱨ ᱜᱟᱹᱭᱫᱟᱬᱟᱱ ᱠᱩᱲᱤ ᱠᱚᱲᱟᱠᱚ ᱡᱚᱢᱧᱩᱭ ᱮᱢᱟ ᱠᱚᱣᱟ ᱾ ᱜᱚᱴ ᱞᱮᱵᱮᱫ ᱛᱟᱭᱚᱢ ᱚᱸᱰᱮ ᱠᱷᱚᱱ ᱜᱮ ᱠᱚᱲᱟᱠᱚ ᱱᱟᱭᱠᱮ ᱚᱲᱟᱜ ᱛᱮ ᱠᱚ ᱤᱫᱤ ᱦᱚᱴᱚ ᱠᱟᱭᱟ ᱾ ᱱᱟᱭᱠᱮ ᱚᱲᱟᱜ ᱠᱷᱚᱱ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱠᱚ ᱪᱟᱞᱟᱜ-ᱟ ᱾ ᱚᱸᱰᱮ ᱫᱚ ᱠᱩᱲᱤ ᱠᱚᱦᱚᱸ ᱠᱚ ᱦᱮᱡ ᱠᱚᱜ-ᱟ ᱾ ᱡᱚᱜᱽᱢᱟᱹᱡᱷᱤ ᱚᱲᱟᱜ ᱛᱮ ᱦᱤᱡᱩᱜ ᱡᱚᱠᱷᱟᱜ ᱠᱩᱲᱤ ᱠᱚᱲᱟ ᱠᱚ ᱾

ᱱᱚᱝᱠᱟ ᱠᱚ ᱥᱮᱨᱮᱧᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱩᱢ ᱱᱟᱲᱠᱟ ᱜᱷᱟᱹᱨᱱᱤ ᱛᱤᱠᱤ ᱥᱚᱵᱚᱫ, ᱚᱲᱟᱜ ᱫᱩᱣᱟᱨ ᱥᱩᱥᱟᱹᱨ ᱟᱞᱚᱢ ᱦᱤᱲᱤᱧᱟ ᱾ ᱫᱩᱣᱟᱨ ᱯᱤᱪᱷᱤ ᱜᱷᱟᱹᱨᱱᱤ ᱵᱟᱹᱛᱤ ᱞᱟᱜᱟᱣ ᱢᱮ, ᱞᱩᱠᱷᱤ ᱫᱷᱚᱨᱚᱱ ᱧᱩᱛᱩᱢ ᱜᱚᱰ ᱟᱹᱪᱩᱨ ᱢᱮ ᱾ ᱥᱤᱢᱠᱚ ᱨᱟᱜᱽᱛᱮ ᱜᱟᱛᱮᱧ ᱵᱮᱨᱮᱫ ᱛᱟᱞᱟᱝ ᱢᱮ, ᱵᱷᱤᱛᱟᱹᱨ ᱫᱩᱣᱟᱨ ᱪᱩᱞᱦᱟᱹ ᱞᱩᱸᱰᱟᱹ ᱚᱰᱚᱠ ᱢᱮ ᱾ ᱫᱷᱚᱱ ᱦᱚᱯᱚᱱ ᱞᱟᱹᱜᱤᱫ ᱫᱮᱞᱟᱝ ᱱᱮᱦᱚᱨ ᱠᱤᱱ, ᱞᱩᱠᱷᱤ ᱫᱷᱚᱨᱚᱢ ᱜᱮᱞᱟᱝ ᱥᱮᱵᱟ ᱵᱮᱵᱷᱟᱨ ᱠᱤᱱ ᱾ ᱢᱟᱨᱟᱝ ᱵᱳᱨᱳ ᱫᱷᱚᱨᱚᱢ ᱡᱤᱣᱤ ᱫᱚᱭ ᱠᱷᱚᱸᱡᱟ ᱟᱢ, ᱡᱟᱦᱮᱨ ᱟᱭᱳ ᱞᱩᱠᱷᱤ ᱫᱷᱚᱱ ᱫᱚᱭ ᱯᱩᱨᱩᱱ ᱠᱟᱢ ᱾ ᱫᱷᱚᱱ ᱠᱚᱠᱚᱭ ᱨᱮᱛᱚ ᱫᱷᱚᱱ ᱠᱤᱱ ᱮᱢᱟᱢᱟ, ᱫᱷᱚᱨᱚᱢ ᱫᱷᱟᱹᱨᱛᱤ ᱦᱟᱭᱨᱮ ᱪᱮᱫ ᱠᱤᱱ ᱪᱤᱠᱟᱹ ᱦᱟᱢ ᱾ ᱫᱷᱚᱱ ᱦᱚᱯᱚᱱ ᱦᱟᱭᱨᱮ ᱚᱠᱚᱭ ᱵᱟᱭ ᱧᱟᱢ ᱠᱟᱱ, ᱫᱷᱚᱱ ᱦᱚᱯᱚᱱ ᱨᱮᱫᱚ ᱪᱟᱜ ᱵᱚ ᱦᱟᱹᱱᱩᱜ ᱠᱟᱱ ᱾ ᱫᱮᱵᱟ ᱥᱮᱵᱟᱢ ᱜᱟᱱᱟ ᱫᱷᱚᱨᱢᱚᱭ ᱩᱨᱩᱢ ᱠᱟᱢ, ᱟᱪᱟᱨ ᱵᱮᱵᱷᱟᱨ ᱞᱩᱠᱷᱤ ᱫᱷᱚᱱ ᱫᱚᱭ ᱯᱩᱨᱩᱱ ᱠᱟᱢ ᱾ ᱱᱚᱝᱠᱟ ᱥᱮᱨᱮᱧ ᱥᱮᱨᱮᱧ ᱛᱮ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱠᱚ ᱪᱟᱞᱟᱜ-ᱟ ᱾ ᱡᱚᱜᱽ ᱢᱟᱹᱡᱷᱤ ᱚᱲᱟᱜ ᱨᱮ ᱡᱚᱢ ᱧᱩ ᱵᱟᱲᱟ ᱠᱟᱛᱮ, ᱡᱚᱜᱽᱢᱟᱹᱡᱷᱤ ᱫᱚ ᱠᱩᱲᱤ ᱠᱚᱲᱟ ᱠᱚ ᱱᱟᱶᱟ ᱦᱟᱴᱟᱜ, ᱫᱮᱣᱦᱮ ᱵᱟᱹᱛᱤ, ᱟᱫᱽᱣᱟ ᱪᱟᱣᱞᱮ, ᱫᱷᱩᱵᱤ ᱜᱟᱥ ᱮᱢᱟᱱᱮ ᱟᱛᱮ ᱜᱟᱹᱭ ᱫᱟᱬᱟᱱ ᱞᱟᱹᱜᱤᱫ ᱮ ᱥᱚᱡᱽ ᱜᱚᱫ ᱠᱟᱠᱚᱣᱟ ᱾ ᱟᱫᱚ ᱠᱩᱲᱤ ᱠᱚᱲᱟ ᱠᱚᱫᱚ ᱚᱲᱟᱜ ᱚᱲᱟᱜ ᱜᱟᱹᱭ ᱠᱚ ᱫᱟᱬᱟ ᱟᱠᱚᱣᱟ ᱨᱤᱸᱡᱟ ᱠᱚ ᱮᱱᱮᱡ-ᱟ ᱟᱨ ᱜᱟᱹᱭ ᱠᱚ ᱪᱩᱢᱟᱲᱟ ᱠᱚᱣᱟ ᱜᱚᱲᱟᱨᱮ ᱵᱚᱞᱚ ᱠᱟᱛᱮ ᱾ ᱟᱫᱚ ᱠᱚ ᱥᱮᱨᱮᱧᱟ- " ᱛᱚ~ᱠᱚᱭ ᱨᱤᱱ ᱜᱟᱹᱭ ᱠᱚ, ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ, ᱛᱚ~ᱠᱚᱭ ᱨᱤᱱ ᱵᱤᱛᱠᱤᱞ, ᱵᱤᱛᱠᱤᱞ ᱧᱟᱹᱦᱩᱢ ᱫᱟᱹᱨᱩᱢ, ᱯᱷᱟ~ᱨᱱᱟ ᱨᱤᱱ ᱜᱟᱹᱭ ᱠᱚ, ᱦᱚ ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ, ᱯᱷᱟ~ᱨᱱᱟ ᱨᱤᱱ ᱵᱤᱛᱠᱤᱞ, ᱦᱚ ᱵᱤᱛᱠᱤᱞ ᱧᱟᱹᱦᱩᱢ ᱫᱟᱹᱨᱩᱢ ᱾ ᱪᱮ~ᱫ ᱜᱟᱥ ᱠᱚ ᱱᱟᱺᱛᱤᱧ, ᱪᱮ~ᱫ ᱡᱟᱝ ᱠᱚ ᱦᱟᱞᱟᱝ, ᱫᱷᱩᱵᱤ ᱜᱟᱥ ᱠᱚ ᱱᱟᱺᱛᱤᱧ, ᱨᱟᱹ~ᱭ ᱡᱟᱝ ᱛᱚ ᱦᱟᱞᱟᱝ, ᱪᱮ~ᱫ ᱫᱟᱜ ᱠᱚ ᱧᱩ~ᱭᱟᱸ ᱦᱚ ᱪᱷᱟᱯᱟᱨ ᱫᱟᱜ ᱠᱚ ᱧᱩ~ᱭᱟᱸ, ᱦᱚ ᱞᱚᱫᱽᱢᱟ ᱞᱚᱭᱚᱝ ᱨᱮ ᱾" ᱱᱚᱝᱠᱟ ᱠᱚ ᱥᱮᱨᱮᱧᱟ ᱟᱨ ᱥᱚᱦᱨᱟᱭ ᱨᱤᱧᱟᱹᱠᱚ ᱥᱮᱨᱮᱧᱟ ᱟᱨᱠᱚ ᱮᱱᱮᱡ ᱤᱫᱤᱭᱟ ᱡᱚᱛᱚ ᱚᱲᱟᱜ ᱜᱚᱴᱟ ᱟᱹᱛᱩ ᱾

ᱵᱩᱨᱩ ᱠᱩᱱᱟᱹᱢᱤ ᱫᱚ ᱜᱚᱲᱟ ᱵᱚᱝᱜᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱣᱟ ᱦᱩᱞᱚᱜ ᱜᱟᱹᱭᱫᱟᱬᱟ ᱢᱩᱪᱟᱹᱫ ᱠᱚᱜ-ᱟ ᱾ ᱜᱚᱲᱟ ᱠᱚ ᱯᱷᱟᱨᱪᱟ ᱯᱷᱟᱹᱨᱪᱤ ᱠᱟᱛᱮ ᱜᱚᱲᱟ ᱨᱮᱵᱚ ᱵᱚᱝᱜᱟᱜ-ᱟ ᱾ ᱜᱟᱹᱭ ᱰᱟᱝᱜᱽᱨ ᱵᱤᱛᱠᱤᱞ ᱠᱟᱰᱟ ᱠᱚ ᱱᱟᱯᱟᱭ ᱨᱮᱠᱚ ᱛᱟᱦᱮᱱ ᱞᱟᱹᱜᱤᱫ ᱜᱚᱲᱟ ᱫᱚᱵᱚ ᱵᱚᱝᱜᱟᱜ-ᱟ ᱾ ᱥᱮᱨᱣᱟ ᱟᱨ ᱫᱟᱬᱮ ᱠᱚᱫᱚ ᱯᱟᱹᱨᱤᱥ ᱡᱟᱹᱱᱤᱡ ᱡᱩᱡᱟᱹ ᱡᱩᱫᱟᱹ ᱜᱮᱭᱟ ᱾

ᱠᱩᱱᱟᱹᱢᱤ ᱦᱤᱞᱚᱜ ᱟᱲᱟᱜ/ᱠᱷᱩᱱᱴᱟᱣ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱩᱱᱟᱹᱢᱤ ᱦᱤᱞᱚᱜ ᱫᱚ ᱟᱲᱟᱜ ᱵᱟᱝ ᱠᱷᱩᱱᱴᱟᱣ ᱾ ᱠᱷᱩᱱᱴᱟᱣ ᱨᱮᱫᱚ ᱟᱹᱰᱤ ᱨᱟᱹᱥᱠᱟ ᱥᱟᱨᱥᱟᱣᱜ-ᱟ ᱾ ᱤᱱᱟ ᱦᱤᱞᱚᱜ ᱫᱚ ᱜᱩᱛᱤ ᱠᱚᱲᱟ ᱟᱨ ᱠᱟᱹᱲᱢᱤ ᱠᱩᱲᱤ ᱠᱚᱣᱟᱜ ᱨᱚᱢᱚᱡ ᱟᱠᱷᱲᱟ ᱾ ᱠᱩᱞᱦᱤ ᱱᱩᱪᱟᱹᱫ ᱠᱮᱱᱟᱜ ᱜᱟᱹᱭ ᱜᱚᱴ ᱰᱟᱺᱰᱤ ᱵᱟᱝᱠᱷᱟᱱ ᱛᱟᱞᱟ ᱠᱩᱞᱦᱤᱨᱮ ᱰᱟᱝᱜᱽᱨᱟ ᱠᱚ ᱠᱷᱩᱱᱴᱟᱣ ᱠᱚᱣᱟ ᱾ ᱠᱩᱞᱦᱤᱨᱮ ᱰᱷᱚᱰᱟ ᱞᱟ ᱠᱟᱛᱮ ᱢᱤᱫᱴᱟᱹᱝ ᱠᱮᱴᱮᱡ ᱠᱷᱩᱱᱴᱤ ᱵᱟᱝᱠᱷᱟᱱ ᱠᱟᱭᱨᱟ ᱫᱟᱨᱮ ᱠᱚ ᱵᱤᱫᱟ ᱾ ᱚᱱᱟ ᱠᱷᱩᱱᱤᱨᱮ ᱫᱟᱲᱮ ᱟᱨ ᱪᱚᱴᱠᱟᱨ ᱧᱚᱜ ᱰᱟᱝᱜᱽᱨᱟ ᱠᱚ ᱛᱚᱞᱮᱭᱟ ᱾ ᱩᱱᱤ ᱟᱝᱜᱽᱨᱟᱭᱤᱡ ᱠᱤᱥᱟᱹᱬ ᱜᱷᱟᱹᱨᱱᱤ ᱚᱲᱟᱜ ᱠᱷᱚᱱ ᱛᱷᱟᱹᱨᱤᱨᱮ ᱟᱫᱽᱣᱟ ᱪᱟᱣᱞᱮ ᱫᱷᱩᱵᱤ ᱜᱟᱥ ᱫᱮᱣᱦᱮ ᱵᱟᱹᱛᱤ ᱟᱨ ᱛᱟᱝ ᱦᱟᱺᱰᱤ ᱟᱜᱩᱭᱟᱭ ᱾ ᱩᱱᱤ ᱰᱟᱝᱜᱽᱨᱟ ᱪᱩᱢᱟᱺᱬᱟ ᱠᱟᱛᱮ ᱠᱤᱥᱟᱹᱬ ᱛᱮᱫ ᱠᱷᱩᱴᱤ ᱥᱩᱨ ᱨᱮ ᱛᱟᱝ ᱦᱟᱺᱰᱤ ᱵᱚᱝᱜᱟᱭᱟᱭ ᱾ ᱵᱚᱝᱜᱟ ᱥᱟᱨᱮᱡ ᱧᱩ ᱵᱟᱲᱟ ᱠᱟᱛᱮ ᱰᱟᱝᱜᱽᱨᱟ ᱠᱚ ᱥᱮᱨᱮᱧ ᱟᱭᱟ ᱟᱨᱠᱚ ᱪᱟᱨᱦᱟᱣ ᱮᱭᱟ ᱾ ᱪᱟᱨᱦᱟᱣ ᱫᱚ ᱦᱟᱨᱛᱟ ᱛᱮᱠᱚ ᱪᱟᱨᱦᱟᱣ ᱠᱚᱣᱟ ᱾ ᱪᱟᱨᱦᱟᱣ ᱨᱮᱱᱟᱜ ᱢᱮᱱᱮᱛ ᱫᱚ ᱜᱚᱴᱨᱮ ᱟᱹᱛᱤᱧ ᱡᱚᱠᱷᱟᱜ ᱦᱤᱸᱥᱠᱤᱫ ᱡᱟᱱᱣᱟᱨ ᱠᱚ ᱟᱞᱚ ᱠᱚ ᱛᱟᱬᱜᱚᱢ ᱠᱚᱢᱟ ᱟᱨ ᱠᱚ ᱦᱩᱴᱤᱡ ᱫᱟᱨᱟᱢ ᱠᱚᱢᱟ ᱾ ᱜᱟᱹᱭᱠᱚ ᱢᱤᱸᱭᱦᱩᱸ ᱠᱚ ᱠᱩᱞ, ᱛᱟᱹᱨᱩᱵ,ᱦᱟᱰᱜᱟᱨ,ᱦᱟᱹᱨᱫᱩᱲ ᱪᱮᱴᱨᱟ ᱮᱢᱟᱱ ᱠᱚᱨᱮ ᱠᱷᱚᱱ ᱠᱚ ᱫᱩᱜ ᱫᱟᱲᱮ ᱟᱠᱚᱢᱟ ᱾ ᱦᱟᱨᱛᱟ ᱨᱮᱱᱟᱜ ᱢᱮᱱᱮᱛ ᱫᱚ, ᱡᱟᱱᱣᱟᱨ ᱡᱟᱱᱣᱟᱨ ᱥᱚ ᱠᱚᱢᱟ ᱾ ᱪᱟᱨᱦᱟᱣ ᱡᱚᱠᱷᱟᱜ ᱠᱷᱩᱱᱴᱤ ᱯᱚᱴᱚᱡ ᱞᱮᱱᱠᱷᱟᱱ ᱵᱟᱝ ᱡᱚᱲᱟ ᱛᱚᱯᱟᱜ ᱞᱮᱱᱠᱷᱟᱱ ᱠᱤᱥᱟᱹᱬ ᱛᱮᱫ ᱢᱤᱫ ᱴᱩᱠᱩᱡ ᱦᱟᱺᱰᱤ ᱠᱚ ᱰᱟᱸᱰᱚᱢᱮᱭᱟ ᱾ ᱱᱚᱝᱠᱟ ᱢᱟᱱᱟᱣᱜ-ᱟ ᱠᱷᱩᱱᱴᱟᱣ ᱫᱚ ᱾

ᱡᱟᱡᱽᱞᱮ/ᱯᱮᱴᱮᱡ ᱞᱟᱹᱯᱩᱜ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱡᱟᱡᱽᱞᱮ ᱠᱷᱩᱱᱴᱟᱣ ᱫᱚᱥᱟᱨ ᱦᱤᱞᱚᱜ ᱾ ᱱᱚᱶᱟ ᱫᱚ ᱢᱩᱪᱟᱹᱫ ᱥᱚᱦᱨᱟᱭ ᱠᱟᱱᱟ ᱾ ᱠᱷᱟᱨᱟᱹᱭ ᱨᱮ ᱡᱟᱦᱟᱸ ᱠᱮᱠᱟ ᱦᱳᱲᱳ ᱫᱟᱞ ᱠᱟᱛᱮ, ᱯᱮᱴᱮᱡ ᱛᱮᱫ ᱠᱚ ᱞᱟᱹᱯᱩᱜᱟ ᱥᱟᱨᱮᱡ ᱢᱟᱨᱮᱡ ᱦᱳᱲᱳ ᱠᱚ ᱵᱚ ᱞᱟᱹᱯᱩᱜ ᱚᱰᱚᱠᱟ, ᱚᱱᱠᱟᱜᱮ ᱯᱟᱨᱟᱵ ᱥᱟᱨᱮᱡ ᱠᱚ ᱥᱮᱨᱮᱧ ᱚᱰᱚᱠᱟ ᱾ ᱞᱮᱴᱚᱠᱚ, ᱯᱤᱴᱷᱟᱹᱠᱚ, ᱠᱷᱟᱹᱡᱟᱹᱲᱤᱠᱚ, ᱥᱤᱴᱷᱟᱹᱦᱟᱺᱰᱤᱠᱚ, ᱟᱲᱟᱜ, ᱥᱟᱠᱟᱢ, ᱡᱚ, ᱵᱤᱞᱤ ᱮᱢᱟᱱ ᱠᱚᱠᱚ ᱠᱚᱭ ᱟᱹᱪᱩᱨᱟ ᱾ ᱠᱩᱲᱤ, ᱠᱚᱲᱟ, ᱥᱮᱨᱮᱧ ᱟᱠᱚ ᱮᱱᱮᱡ ᱟᱠᱚ ᱚᱲᱟᱜ ᱚᱲᱟᱜ ᱠᱚ ᱫᱟᱬᱟᱱᱟ ᱾ ᱟᱹᱭᱩᱵ ᱫᱚ ᱫᱚᱢᱮ ᱞᱟᱜᱽᱬᱮ ᱠᱚ ᱮᱱᱮᱡ-ᱟ ᱾ ᱱᱚᱝᱠᱟ ᱥᱚᱦᱨᱟᱭ ᱯᱟᱨᱟᱵ ᱵᱚ ᱢᱟᱱᱟᱣ ᱯᱟᱨᱚᱢᱟ ᱾

ᱥᱚᱦᱨᱟᱭ ᱥᱮᱨᱮᱧ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  • ᱩᱢ ᱱᱟᱲᱠᱟ ᱜᱷᱟᱹᱨᱱᱤ ᱛᱤᱠᱤ ᱥᱚᱵᱚᱫ,

ᱚᱲᱟᱜ ᱫᱩᱣᱟᱨ ᱥᱩᱥᱟᱨ ᱟᱞᱚᱢ ᱦᱤᱲᱤᱧᱟ, ᱫᱩᱣᱟᱨ ᱯᱤᱪᱷᱤ ᱜᱷᱟᱹᱨᱱᱤ ᱵᱟᱹᱛᱤ ᱞᱟᱜᱟᱣ ᱢᱮ, ᱞᱩᱠᱷᱤ ᱫᱷᱚᱨᱚᱢ ᱧᱩᱛᱩᱢ ᱜᱚᱰ ᱟᱹᱪᱩᱨ ᱢᱮ ᱾ ᱥᱤᱢᱠᱚ ᱨᱟᱜᱽᱛᱮ ᱜᱟᱛᱮᱧ ᱵᱮᱨᱮᱫ ᱛᱟᱞᱟᱝ ᱢᱮ, ᱵᱷᱤᱛᱟᱹᱨ ᱫᱩᱣᱟᱨ ᱪᱩᱞᱦᱟᱹ ᱞᱩᱸᱰᱟᱹ ᱚᱰᱚᱠ ᱢᱮ, ᱫᱷᱚᱱ ᱦᱚᱯᱚ ᱞᱟᱹᱜᱤᱫ ᱫᱮᱞᱟᱝ ᱱᱮᱦᱚᱨ ᱠᱤᱱ, ᱞᱩᱠᱷᱤ ᱫᱷᱚᱨᱚᱢ ᱜᱮᱞᱟᱝ ᱥᱮᱵᱟ ᱵᱮᱵᱷᱟᱨ ᱠᱤᱱ ᱾ ᱢᱟᱨᱟᱝ ᱵᱳᱨᱳ ᱫᱷᱚᱨᱚᱢ ᱡᱤᱣᱤ ᱫᱚᱭ ᱠᱷᱚᱸᱡᱟ ᱟᱢ, ᱡᱟᱦᱮᱨ ᱟᱭᱳ ᱞᱩᱠᱷᱤ ᱫᱷᱚᱱ ᱫᱚᱭ ᱯᱮᱨᱮᱡ ᱠᱟᱢ, ᱫᱷᱚᱱ ᱠᱷᱚᱡᱚᱜ ᱨᱮᱛᱚ ᱫᱷᱚᱱ ᱠᱤᱱ ᱮᱢᱟᱢ ᱟᱢ, ᱫᱷᱚᱨᱚ ᱫᱷᱟᱹᱨᱛᱤ ᱦᱟᱭᱨᱮ ᱪᱮᱫ ᱠᱤᱱ ᱪᱤᱠᱟᱹᱦᱟᱢ ᱾ ᱫᱷᱚᱱ ᱦᱚᱯᱚᱱ ᱦᱟᱭᱨᱮ ᱚᱠᱚᱭ ᱵᱟᱭ ᱧᱟᱢ ᱠᱟᱱ, ᱫᱷᱚᱱ ᱦᱚᱯᱚᱱ ᱫᱚᱨᱮ ᱪᱟᱜ ᱵᱚ ᱦᱟᱹᱱᱩᱜ ᱠᱟᱱ, ᱫᱮᱵᱟ ᱥᱮᱵᱟᱢ ᱜᱟᱱᱟ ᱫᱷᱚᱨᱢᱚᱭ ᱩᱨᱩᱢ ᱠᱟᱢ, ᱟᱪᱟᱨ ᱵᱮᱵᱷᱟᱨ ᱞᱩᱠᱷᱤ ᱫᱷᱚᱱᱫᱚᱭ ᱯᱮᱨᱮᱡ ᱠᱟᱢ ᱾


  • ᱱᱟᱶᱟ ᱦᱟᱴᱟᱜ ᱱᱟᱭᱚ ᱠᱤᱨ~ᱧᱟᱧ ᱢᱮ,

ᱱᱤᱧ ᱦᱚᱧ ᱪᱟᱞᱟᱜ ᱱᱟᱭᱚ ᱠᱩᱞᱦᱤ ᱫᱟᱬᱟᱱ, ᱱᱤᱧ ᱦᱚᱧ ᱪᱟᱞᱟᱜ ᱱᱟᱭᱚ ᱜᱟᱹᱭᱠᱚ ᱪᱩᱢᱟᱺᱲᱟ,

  • ᱢᱟᱹᱡᱷᱤ ᱠᱚᱣᱟᱜ ᱪᱷᱟᱴᱠᱟ ᱨᱮ,

ᱡᱚᱲᱟ ᱠᱩᱸᱥᱵᱤ ᱵᱟᱦᱟ ᱟᱠᱟᱱ ᱫᱚ ᱾ ᱛᱟᱨ ᱛᱮᱠᱚ ᱮᱴᱮᱫ ᱟᱠᱟᱫ, ᱡᱟᱹᱱᱩᱢ ᱛᱮᱠᱚ ᱨᱟᱢᱯᱷᱟ ᱟᱠᱟᱫ, ᱡᱟᱨᱮ ᱠᱩᱸᱥᱵᱤ ᱡᱟᱨᱮ ᱠᱩᱸᱥᱵᱤ, ᱪᱤᱠᱟᱹᱛᱤᱧ ᱵᱟᱦᱟᱢᱮ ᱾

  • ᱢᱟᱹᱡᱷᱤ ᱠᱚᱭᱤᱡ ᱦᱚᱯᱚᱱ ᱮᱨᱟ,

ᱵᱟᱹᱛᱤ ᱥᱮᱸᱜᱮᱞ ᱡᱩᱞᱩᱜ ᱞᱮᱠᱟ, ᱡᱩᱞᱩᱜ ᱞᱮᱠᱟᱜᱚᱭ ᱡᱷᱟᱨ ᱡᱷᱟᱨᱟᱣᱜ ᱠᱟᱱ ᱾ ᱵᱟᱝᱫᱚ ᱵᱟᱝᱫᱩᱧ ᱪᱚᱴᱨᱮᱠᱟᱭ, ᱵᱟᱝᱫᱚ ᱵᱟᱝᱫᱩᱧ ᱯᱷᱮᱰᱨᱮᱠᱟᱭ, ᱵᱟᱹᱛᱤ ᱥᱮᱸᱜᱮᱞ ᱡᱩᱞᱩᱜ ᱞᱮᱠᱟᱜᱚᱭ, ᱡᱷᱟᱨ ᱡᱷᱟᱨᱟᱣᱜ ᱠᱟᱱ ᱾

  • ᱛᱮᱦᱮᱧ ᱧᱤᱫᱟᱹᱧ ᱠᱩᱠᱢᱩ ᱠᱟᱱ,

ᱨᱩᱥᱩᱱᱤ ᱠᱟᱹᱠᱤᱹᱹ ᱛᱟᱝ ᱦᱟᱺᱰᱤᱨᱤᱧ ᱯᱟᱭᱨᱟ ᱵᱟᱲᱟᱭ ᱠᱟᱱ, ᱨᱩᱥᱩᱱᱤ ᱠᱟᱹᱠᱤᱹᱹᱹᱹ ᱞᱮᱴᱚ ᱨᱮᱜᱤᱧ ᱛᱷᱟᱹᱞᱤ ᱟᱠᱟᱱ ᱫᱚ ᱾

  • ᱛᱤᱨᱤᱞ ᱯᱩᱨ ᱨᱮᱫᱚ ᱪᱤᱞᱤᱜᱚ ᱢᱮᱱᱟᱭᱟ,

ᱢᱮᱱᱟᱭ ᱢᱮᱱᱟᱭ ᱦᱟᱞᱮ ᱜᱚᱜᱚᱨ ᱥᱟ~ᱞᱚ, ᱢᱮᱱᱟᱭ ᱢᱮᱱᱟᱭ ᱥᱟᱹᱨᱤ ᱯᱟᱹᱱᱤᱨ ᱯᱤ~ᱭᱳ ᱾

  • ᱦᱟᱺᱰᱤ ᱦᱟ:ᱰᱤ ᱵᱩᱰᱷᱤ

ᱥᱚ ᱠᱟᱱ ᱫᱚ, ᱥᱩᱭ ᱥᱩᱛᱟᱹᱢ ᱵᱩᱰᱷᱤ ᱤᱢᱟᱹᱧ ᱢᱮᱥᱮ, ᱦᱟᱺᱰᱤ ᱧᱩᱧᱩ ᱢᱚᱪᱟᱧ ᱨᱚᱜ ᱠᱟᱜ-ᱟ ᱾

  • ᱵᱩᱨᱩ ᱠᱷᱚᱱ ᱞᱮ ᱟᱬᱜᱚ ᱟᱠᱟᱱ,

ᱵᱟᱲᱜᱮ ᱨᱮᱞᱮ ᱠᱩᱸᱵᱟᱹ ᱟᱠᱟᱫ, ᱛᱚᱠᱚᱭ ᱡᱟᱯᱮ ᱦᱚᱦᱚ ᱟᱞᱮᱠᱟᱱ ᱾ ᱫᱷᱟᱫᱽᱨᱟ ᱦᱟᱴᱟᱜ ᱥᱤᱞᱯᱤᱧ ᱛᱟᱞᱮ, ᱡᱚᱱᱚᱜ ᱴᱷᱩᱴᱠᱤ ᱦᱩᱨᱠᱟᱹᱬ ᱛᱟᱞᱮ, ᱛᱚᱠᱚᱭ ᱡᱟᱯᱮᱹᱹᱹ ᱛᱚᱠᱚᱭ ᱡᱟᱯᱮ ᱫᱷᱟᱨᱯᱟᱲ ᱫᱷᱟᱨᱯᱟᱲ ᱮᱫ ᱾

  • ᱥᱤᱞᱤ ᱵᱩᱨᱩ ᱨᱮᱢᱟ ᱛᱨᱤᱭᱟᱹᱣ ᱥᱟᱰᱮ ᱠᱟᱱ,

ᱤᱧ ᱢᱟ ᱢᱤᱱᱟᱧ ᱦᱟᱞᱮ ᱫᱟᱜ ᱞᱩᱞᱩ ᱜᱷᱟᱴ ᱨᱮ ᱾ ᱴᱷᱤᱞᱤᱧ ᱵᱟᱹᱜᱤᱭᱟᱜ ᱢᱟ ᱦᱚᱲᱠᱚ ᱨᱚᱨᱚᱲᱟ, ᱵᱟᱹᱧ ᱵᱟᱹᱜᱤᱭᱟᱜ-ᱟ ᱜᱟᱛᱮᱧ ᱠᱟᱺᱦᱤᱸᱥᱚᱜ ᱾

  • ᱛᱚᱠᱚᱭ ᱠᱚᱫᱚᱯᱮ ᱡᱟᱹᱯᱤᱫ ᱟᱠᱟᱫ,

ᱛᱚᱠᱚᱭ ᱠᱚᱫᱚᱯᱮ ᱵᱮᱸᱜᱮᱫ ᱟᱠᱟᱫ, ᱟᱞᱮ ᱠᱟᱹᱭᱫᱷᱤ, ᱟᱞᱮ ᱠᱟᱹᱭᱫᱷᱤ, ᱡᱚᱵᱟᱵᱽ ᱟᱞᱮᱯᱮ ᱾

  • ᱨᱩᱱ ᱛᱩᱠᱩᱱ ᱵᱩᱰᱷᱤ

ᱦᱚᱞᱚᱝ ᱦᱩᱲᱩᱝ ᱞᱮᱫ, ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ ᱯᱤᱴᱷᱟᱧ ᱨᱟᱯᱟᱜ ᱞᱮᱫ, ᱡᱚᱡᱚᱢ ᱵᱤᱫᱟᱹᱞ ᱨᱮᱫᱚ ᱱᱮᱸᱭᱟᱶ ᱡᱚᱲᱟᱣ ᱮᱱ ᱾

  • ᱛᱚᱠᱚᱭ ᱠᱚ ᱫᱚ ᱥᱩᱭᱟᱹ ᱥᱚᱦᱨᱟᱭ,

ᱛᱚᱠᱚᱭ ᱠᱚ ᱫᱚ ᱥᱟᱦᱟᱨ ᱥᱚᱦᱨᱟᱭ, ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ ᱾ ᱥᱚᱲᱚ ᱠᱚᱫᱚ ᱥᱩᱭᱟᱹ ᱥᱚᱦᱨᱟᱭ, ᱥᱩᱞᱩᱠ ᱠᱚᱫᱚ ᱥᱟᱦᱟᱨ ᱥᱚᱦᱨᱟᱭ, ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ ᱾ ᱥᱚᱲᱚ ᱠᱚᱫᱚ ᱫᱟᱬᱟ ᱥᱟᱨᱮᱡ, ᱥᱩᱞᱩᱠ ᱠᱚᱫᱚ ᱪᱮᱨᱮᱡ ᱯᱮᱨᱮᱡ, ᱟᱞᱮ ᱠᱟᱹᱭᱫᱷᱤᱹᱹᱹᱹ ᱟᱞᱮ ᱠᱟᱹᱭᱫᱷᱤ ᱠᱷᱟᱸᱰᱮᱨᱤᱭᱟᱹ ᱠᱚ ᱾

  • ᱦᱚᱲ ᱨᱤᱱ ᱟᱭᱳ ᱵᱟᱵᱟ

ᱡᱟᱹᱬᱤ ᱯᱩᱨᱩᱫᱷᱩᱞ, ᱤᱧ ᱨᱤᱱ ᱟᱭᱳ ᱵᱟᱵᱟ ᱢᱟᱺᱬ ᱜᱷᱟᱹᱴᱤ ᱨᱮ ᱾

  • ᱱᱚᱶᱟ ᱢᱤᱨᱛᱷᱤ ᱠᱟᱫᱚ ᱵᱤᱞ ᱟᱠᱟᱱᱟ,

ᱱᱚᱶᱟ ᱢᱤᱨᱛᱷᱤᱠᱟ ᱫᱚ ᱟᱴᱮᱫ ᱟᱠᱟᱱᱟ, ᱜᱤᱫᱤ ᱠᱩᱲᱤᱫ ᱵᱟᱲᱮᱧ ᱡᱟᱱᱟᱢ ᱞᱮᱱ ᱠᱷᱟᱱ, ᱱᱚᱶᱟ ᱢᱤᱨᱛᱷᱤᱠᱟ ᱫᱩᱧ ᱦᱟᱞᱚ ᱟᱹᱪᱩᱨ ᱠᱮ, ᱱᱚᱶᱟ ᱢᱤᱨᱛᱷᱤᱠᱟ ᱫᱚ ᱞᱚᱠᱟ ᱟᱹᱪᱩᱨ ᱠᱮ ᱾

  • ᱛᱚ~ᱠᱚᱭ ᱨᱤᱱ ᱜᱟᱹᱭ ᱠᱚ,

ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ, ᱛᱚ~ᱠᱚᱭ ᱨᱤᱱ ᱵᱤᱛᱠᱤᱞ, ᱦᱚ ᱵᱤᱛᱠᱤᱞ ᱧᱟᱺᱦᱩᱢ ᱫᱟᱹᱨᱩᱢ ᱾ ᱯᱷᱟᱨᱱᱟ ᱨᱤᱱ ᱜᱟᱹᱭ ᱠᱚ, ᱜᱟᱹᱭ ᱠᱚ ᱵᱩᱨᱩᱫ ᱵᱩᱨᱩᱫ, ᱛᱩ~ᱥᱠᱟᱹ ᱨᱤᱱ ᱵᱤᱛᱠᱤᱞ, ᱦᱚ ᱵᱤᱛᱠᱤᱞ ᱧᱟᱺᱦᱩᱢ ᱫᱟᱹᱨᱩᱢ, ᱛᱚᱠᱟ ᱵᱤᱨ ᱠᱚ ᱵᱚ~ᱞᱟ, ᱢᱟᱱ ᱵᱤᱨ ᱠᱚ ᱵᱚ~ᱞᱟ, ᱪᱮᱫ ᱥᱟᱫ ᱠᱚ ᱱᱟᱺᱛᱤᱧ, ᱩᱵᱤ ᱥᱟᱫ ᱠᱚ ᱱᱟᱺᱛᱤᱧ, ᱪᱮᱫ ᱫᱟᱜ ᱠᱚ ᱧᱩ~ᱭᱟᱸ, ᱪᱷᱟᱯᱟᱨ ᱫᱟᱜ ᱠᱚ ᱧᱩ~ᱭᱟ, ᱴᱟᱯᱟᱨ ᱰᱟᱺᱰᱤ ᱴᱟᱯᱟᱨ ᱴᱟᱺᱰᱤ, ᱦᱚ ᱞᱚᱫᱽᱢᱟ ᱞᱚᱭᱚᱝ ᱨᱮ ᱾

ᱥᱚᱦᱨᱟᱭ ᱨᱮᱱᱟᱜ ᱨᱚᱲ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  • ᱞᱟᱹᱴᱤᱡ ᱥᱤᱢ ᱯᱤᱴᱷᱟᱹ,

ᱵᱩᱰᱷᱤ ᱢᱟᱞᱦᱟᱱ ᱞᱮᱴᱚ ᱾

  • ᱵᱟᱲᱜᱮ ᱨᱮ ᱯᱮ ᱛᱟᱯᱟᱢᱟ,

ᱤᱧ ᱜᱮ ᱯᱮ ᱫᱚᱥᱤᱧᱟ, ᱞᱟᱹᱭᱟᱹᱧ ᱞᱟᱹᱭᱟᱹᱧ, ᱜᱟᱯᱟ ᱜᱟᱯᱟ ᱯᱟᱯᱟ ᱾

  • ᱦᱚᱛᱚᱫ ᱫᱚ ᱠᱚ ᱦᱮᱲᱟ,

ᱠᱚᱸᱦᱰᱟ ᱫᱚ ᱠᱚ ᱞᱚᱲᱟ, ᱦᱚᱭ~ᱭᱟ ᱦᱚᱭ~ᱭᱟ ᱦᱚᱭ~ᱭᱟ ᱾

ᱯᱟᱨᱟᱵᱽ ᱯᱩᱱᱟᱹᱭ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱟᱨᱟᱵ ᱫᱚ ᱵᱟᱨᱞᱮᱠᱟᱛᱮ ᱢᱟᱱᱟᱣᱜ ᱠᱟᱱᱟ ᱑-ᱵᱟᱵᱟ ᱫᱟᱲᱮ ᱱᱮᱦᱚᱨ ᱯᱟᱨᱟᱵ ᱒-ᱟᱭᱳ ᱫᱟᱲᱮ ᱱᱮᱦᱚᱨ ᱯᱟᱨᱟᱵ ᱾ ᱥᱚᱦᱨᱟᱭ ᱯᱟᱨᱟᱵ ᱫᱚ ᱟᱭᱳ ᱫᱟᱲᱮ ᱱᱮᱦᱚᱨ ᱯᱟᱨᱟᱵ ᱠᱟᱱᱟ ᱾

ᱱᱚᱶᱟ ᱯᱟᱨᱟᱵ ᱫᱚ ᱠᱷᱮᱨᱣᱟᱲ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱯᱟᱨᱟᱵ ᱠᱟᱱᱟ ᱾ ᱚᱱᱟᱛᱮ ᱢᱮᱱᱟᱠᱚ ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱯᱟᱨᱟᱵ ᱾ ᱦᱟᱹᱛᱤ ᱫᱚ ᱫᱷᱟᱹᱨᱛᱤ ᱨᱮ ᱢᱟᱨᱟᱝ ᱡᱟᱹᱱᱤ ᱠᱟᱱᱟᱭ ᱾ ᱵᱚᱝᱜᱟᱭᱤ ᱜᱚᱱᱤᱡ [ᱜᱚᱜ ᱜᱚ ᱜᱤᱡ] ᱠᱟᱱᱟᱭ ᱾ ᱦᱟᱹᱛᱤ ᱢᱮᱱ ᱞᱮᱠᱷᱟᱱ ᱠᱩᱱᱟᱝ [ᱠᱩᱲᱤ ᱡᱟᱱᱟᱝ] ᱢᱮᱱᱛᱮ ᱟᱹᱭᱠᱟᱹᱣᱜ-ᱟ ᱾ ᱵᱤᱱᱛᱤ ᱠᱚᱨᱮ ᱠᱷᱚᱱ ᱵᱟᱰᱟᱭᱚᱜ-ᱟ, ᱜᱟᱹᱭ ᱟᱭᱳ ᱜᱮ ᱦᱤᱦᱤᱲᱤ ᱯᱤᱯᱤᱲᱤ ᱠᱷᱚᱱ ᱦᱳᱲᱳᱭ ᱫᱤᱯᱤᱞ ᱟᱹᱜᱩ ᱞᱮᱫ-ᱟ ᱾ ᱚᱱᱟ ᱛᱮ ᱜᱟᱹᱭ ᱦᱚᱸᱭ ᱠᱩᱡᱟᱝ ᱠᱟᱱᱛᱮ ᱜᱟᱹᱭ ᱧᱩᱛᱩᱢ ᱛᱮᱜᱮ ᱠᱚ ᱯᱟᱨᱟᱵᱚᱜ-ᱟ ᱾ ᱥᱚᱦᱨᱟᱭ ᱵᱚᱝᱜᱟ ᱨᱮᱱᱟᱜ ᱡᱚᱥ ᱵᱟᱝ ᱴᱷᱤᱠᱟᱹ ᱦᱟᱠᱟᱱᱛᱮ ᱟᱹᱰᱤ ᱴᱷᱟᱶ ᱨᱮ ᱟᱹᱰᱤ ᱞᱮᱠᱟᱵᱚ ᱯᱟᱨᱟᱵᱚᱜ ᱠᱟᱱᱟ ᱾ ᱚᱠᱚᱭ ᱠᱚᱫᱚ ᱥᱚᱦᱨᱟᱭ ᱵᱚᱝᱜᱟ ᱵᱟᱞᱮ ᱢᱩᱞᱩᱜ, ᱚᱠᱚᱭ ᱠᱚᱫᱚ ᱥᱚᱦᱨᱟᱭ ᱵᱚᱝᱜᱟ ᱠᱩᱱᱟᱹᱢᱤ, ᱚᱠᱚᱭ ᱠᱚᱫᱚ ᱯᱩᱥ ᱵᱚᱝᱜᱟ ᱠᱚ ᱥᱚᱦᱨᱟᱭᱚᱜ ᱠᱟᱱᱟ ᱾ ᱱᱚᱝᱠᱟ ᱟᱯᱟᱱ ᱟᱹᱯᱤᱱ ᱵᱟᱝ ᱠᱛᱮ ᱢᱤᱫᱩᱜ ᱦᱩᱭ ᱟᱵᱚᱱᱟ ᱾

ᱵᱚᱸᱜᱟ ᱵᱩᱨᱩ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱚᱦᱨᱟᱭ ᱨᱮ ᱫᱚ ᱜᱚᱴ ᱵᱚᱝᱜᱟ, ᱜᱚᱲᱟ ᱵᱚᱝᱜᱟ ᱠᱚ ᱯᱮᱨᱮᱡ ᱩᱢᱟᱬᱚᱜ-ᱟ ᱾ ᱜᱚᱴ ᱨᱮ ᱫᱚ ᱢᱟᱨᱟᱝ ᱵᱳᱨᱳ, ᱡᱟᱦᱮᱨ ᱟᱭᱳ, ᱢᱚᱬᱮ ᱠᱚ, ᱛᱩᱨᱩᱭ ᱠᱚ ᱾ ᱜᱚᱲᱟ ᱨᱮ ᱫᱚ ᱯᱟᱹᱨᱤᱥ ᱡᱟᱹᱱᱤᱡ ᱟᱯᱟᱱ ᱟᱹᱯᱤᱱ ᱜᱮᱭᱟ ᱾ ᱠᱷᱩᱱᱴᱟᱣ ᱴᱟᱺᱰᱤ ᱨᱮ ᱫᱚ ᱢᱟᱨᱟᱝ ᱵᱳᱨᱳ, ᱦᱟᱯᱲᱟᱢ ᱠᱚ, ᱟᱯᱟᱱ ᱟᱹᱯᱤᱱ ᱨᱤᱱ ᱾