ᱯᱷᱩᱨᱜᱟᱹᱞ ᱢᱟᱦᱟᱸ (ᱥᱤᱧᱚᱛ)

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱯᱷᱩᱨᱜᱟᱹᱞ ᱢᱟᱦᱟᱸ
The national flag of India hoisted on a wall adorned with domes and minarets.
ᱫᱤᱞᱞᱤ ᱨᱮᱭᱟᱜ ᱟᱨᱟᱜ ᱠᱮᱞᱞᱟ ᱨᱮ ᱥᱤᱧᱚᱛ ᱨᱮᱭᱟᱜ ᱪᱤᱨ ᱩᱰᱟᱹᱣ ᱥᱟᱹᱜᱩᱱ; ᱯᱷᱩᱨᱜᱟᱹᱞ ᱢᱟᱦᱟᱸ ᱨᱮ ᱡᱟᱹᱛᱤᱭᱟᱹᱨᱤ ᱪᱤᱨ ᱩᱰᱟᱹᱣ ᱥᱟᱹᱜᱩᱱ ᱫᱚ ᱢᱤᱫ ᱥᱟᱫᱷᱟᱨᱚᱱ ᱟᱹᱨᱤᱼᱪᱟᱹᱞᱤ ᱠᱟᱱᱟ ᱾
ᱢᱟᱱᱟᱣᱠᱩ  ᱥᱤᱧᱚᱛ
ᱞᱮᱠᱟᱱᱡᱟᱹᱛᱤᱭᱟᱹᱨᱤ
ᱢᱳᱦᱚᱴᱣᱚᱥᱤᱧᱚᱛ ᱨᱮᱭᱟᱜ ᱯᱷᱩᱨᱜᱟᱹᱞ ᱠᱟᱛᱷᱟ ᱫᱤᱥᱟᱹ ᱨᱩᱣᱟᱹᱲ
ᱢᱟᱱᱟᱣ ᱠᱟᱹᱢᱤᱠᱩᱪᱤᱨ ᱩᱰᱟᱹᱣ ᱥᱟᱹᱜᱩᱱ, ᱯᱮᱨᱮᱰ, ᱫᱤᱥᱩᱣᱟᱹᱨᱤ ᱟᱨ ᱡᱟᱹᱛᱤᱭᱟᱹᱨᱤ ᱡᱚᱱᱚ ᱜᱚᱱᱚ ᱢᱚᱱᱚ ᱥᱮᱨᱮᱧ ᱠᱚ ᱥᱮᱨᱮᱧ, ᱫᱤᱥᱚᱢ ᱦᱚᱲ ᱠᱚ ᱞᱟᱹᱜᱤᱫ ᱢᱟᱨᱟᱝ ᱢᱚᱱᱛᱨᱤ ᱟᱨ ᱫᱤᱥᱚᱢ ᱜᱚᱢᱠᱮ ᱟᱜ ᱵᱷᱟᱥᱚᱱ
ᱢᱟᱹᱦᱤᱛ15 August
ᱛᱤᱱᱟᱹ ᱢᱟᱦᱟᱸ ᱛᱟᱭᱚᱢAnnual
ᱯᱩᱭᱞᱩ ᱫᱷᱟᱣ᱑᱕ ᱚᱜᱚᱥᱴ ᱑᱙᱔᱗ (᱗᱔ ᱥᱮᱨᱢᱟ ᱞᱟᱦᱟ ᱨᱮ)
ᱥᱟᱹᱜᱟᱹᱭ  ᱢᱮᱱᱟᱜᱼᱟᱫᱤᱥᱩᱣᱟᱹ ᱢᱟᱦᱟᱸ

ᱥᱤᱧᱚᱛ ᱨᱮᱭᱟᱜ ᱯᱷᱩᱨᱜᱟᱹᱞ ᱢᱟᱦᱟᱸ ᱫᱚ ᱥᱟᱱᱟᱢ ᱠᱚ ᱜᱮᱠᱚ ᱥᱟᱹᱜᱩᱱ ᱫᱟᱨᱟᱢᱟ ᱾ ᱢᱤᱫ ᱦᱚᱲᱟᱜ ᱡᱤᱭᱚᱱ ᱨᱮ ᱱᱚᱶᱟ ᱨᱮᱭᱟᱜ ᱞᱟᱹᱠᱛᱤ ᱡᱟᱦᱟᱸ ᱛᱤᱱᱟᱹᱜ ᱛᱟᱦᱮᱸᱱᱟ, ᱫᱤᱥᱚᱢ ᱞᱟᱹᱜᱤᱫ ᱦᱚᱸ ᱱᱚᱶᱟ ᱫᱚ ᱚᱱᱠᱟ ᱜᱮ ᱞᱟᱹᱠᱛᱤ ᱯᱟᱲᱟᱣ ᱜᱚᱫᱚᱜᱼᱟ ᱾ ᱡᱚᱛᱚ ᱥᱮᱨᱢᱟ ᱜᱮ ᱑᱕ ᱚᱜᱚᱥᱴ ᱱᱚᱶᱟ ᱫᱚᱠᱚ ᱢᱟᱱᱟᱣᱟ ᱾ ᱑᱙᱔᱗ ᱥᱟᱞᱮᱨᱮ ᱱᱚᱶᱟ ᱢᱟᱦᱟᱸ ᱦᱤᱞᱚᱜ ᱤᱸᱜᱽᱨᱟᱹᱡᱽ ᱠᱚᱣᱟᱜ ᱜᱚᱵᱚᱞ ᱠᱷᱚᱱ ᱵᱷᱟᱨᱚᱛᱤᱭᱟᱹ ᱟᱨᱵᱟᱝ ᱥᱤᱧᱚᱛ ᱫᱤᱥᱩᱣᱟᱹ ᱠᱚ ᱨᱟᱲᱟ ᱫᱩᱜ ᱠᱟᱛᱮ ᱯᱷᱩᱨᱜᱟᱹᱞ ᱡᱤᱭᱚᱱ ᱡᱤᱣᱤᱫᱚᱜ ᱨᱮᱭᱟᱜ ᱛᱟᱠ ᱠᱚ ᱧᱟᱢ ᱞᱮᱜᱼᱟ ᱾ ᱱᱚᱶᱟ ᱫᱚ ᱵᱷᱟᱨᱚᱛ ᱨᱮᱭᱟᱜ ᱢᱤᱫ ᱫᱤᱥᱚᱢ ᱯᱟᱨᱟᱵᱽ ᱠᱟᱱᱟ ᱾ ᱡᱚᱛᱚ ᱥᱮᱨᱢᱟ ᱜᱮ ᱱᱚᱶᱟ ᱢᱟᱦᱟᱸᱨᱮ ᱵᱷᱟᱨᱚᱛ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱞᱟᱞ ᱠᱤᱞᱟ ᱨᱮᱭᱟᱜ ᱵᱮᱲᱦᱟᱭ ᱠᱷᱚᱱ ᱫᱤᱥᱚᱢ ᱦᱚᱲ ᱮ ᱥᱟᱹᱜᱩᱱ ᱫᱟᱨᱟᱢ ᱥᱟᱨᱦᱟᱣ ᱠᱚᱣᱟ ᱾

᱑᱕ ᱚᱜᱚᱥᱴ ᱑᱙᱔᱗ ᱦᱤᱞᱚᱜ ᱵᱷᱟᱨᱚᱛ ᱨᱤᱱᱤᱡ ᱯᱩᱭᱞᱩ ᱢᱟᱨᱟᱝ ᱢᱚᱱᱛᱨᱤ ᱡᱚᱵᱟᱦᱚᱨ ᱞᱟᱞ ᱱᱮᱦᱨᱩ ᱫᱚ ᱫᱤᱞᱞᱤ ᱨᱮ ᱞᱟᱞ ᱠᱤᱞᱞᱟ ᱨᱮᱭᱟᱜ ᱞᱟᱦᱚᱨ ᱜᱮᱴ ᱪᱮᱛᱟᱱ ᱨᱮ ᱵᱷᱟᱨᱚᱛᱤᱭᱟᱹ ᱦᱟᱜ ᱪᱤᱨ ᱮ ᱦᱤᱯᱤᱲ ᱞᱮᱜᱼᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱛᱤᱠᱤᱱᱟᱜ ᱟᱹᱭᱩᱨ ᱛᱮ ᱵᱷᱟᱨᱚᱛ ᱯᱷᱩᱨᱜᱟᱹᱞ ᱦᱩᱞ ᱨᱮ ᱦᱚᱲ ᱠᱚ ᱟᱹᱰᱤ ᱜᱟᱺᱦᱤᱨ ᱫᱷᱟᱹᱵᱤᱡ ᱵᱟᱝ ᱦᱤᱸᱥᱟᱹ ᱟᱨ ᱱᱮᱢᱚᱸᱥ ᱦᱚᱨ ᱛᱮ ᱢᱤᱪᱷᱤᱞ ᱠᱚ ᱪᱟᱹᱞᱩ ᱠᱮᱜᱼᱟ ᱾ ᱯᱷᱩᱨᱜᱟᱹᱞ ᱛᱟᱭᱚᱹᱢ ᱤᱸᱜᱽᱨᱟᱹᱡᱽ ᱠᱚ ᱵᱷᱟᱨᱚᱛ ᱫᱚ ᱫᱷᱚᱨᱚᱢ ᱫᱟᱨᱟᱭ ᱛᱮ ᱠᱚ ᱠᱮᱪᱟᱜ ᱦᱟᱴᱤᱧ ᱠᱮᱜᱼᱟ, ᱡᱟᱦᱟᱸ ᱫᱚ ᱵᱷᱟᱨᱚᱛ ᱟᱨ ᱯᱟᱠᱤᱥᱛᱟᱱ ᱞᱮᱠᱟᱛᱮ ᱥᱟᱢᱟᱝ ᱛᱮ ᱦᱮᱡ ᱮᱱᱟ ᱾ ᱦᱟᱹᱴᱤᱧ ᱮᱱ ᱛᱟᱭᱚᱢ ᱵᱟᱱᱟᱨ ᱫᱤᱥᱚᱢ ᱨᱮ ᱦᱤᱸᱥᱟᱹ ᱥᱩᱭᱟᱹ ᱨᱮᱭᱟᱜ ᱥᱮᱸᱜᱮᱞ ᱡᱩᱞ ᱨᱟᱠᱟᱵ ᱮᱱᱟ ᱟᱨ ᱱᱚᱶᱟ ᱫᱟᱨᱟᱭ ᱛᱮ ᱟᱹᱰᱤ ᱜᱟᱱ ᱵᱮᱼᱜᱷᱚᱴᱚᱱ ᱡᱟᱱᱟᱢ ᱮᱱᱟ ᱾ ᱫᱤᱥᱚᱢ ᱠᱮᱪᱟᱜ ᱦᱟᱹᱴᱤᱧ ᱮᱱ ᱠᱷᱟᱹᱛᱤᱨ ᱢᱟᱹᱱᱢᱤ ᱡᱟᱹᱛᱤᱭᱟᱜ ᱱᱟᱜᱟᱢ ᱨᱮ ᱱᱩᱱᱟᱹᱜ ᱵᱟᱹᱲᱛᱤ ᱦᱚᱲ ᱠᱚᱣᱟᱜ ᱢᱤᱫ ᱴᱷᱟᱶ ᱠᱷᱚᱱ ᱟᱨ ᱢᱤᱫ ᱴᱷᱟᱶ ᱥᱮᱱᱚᱜ ᱨᱮᱭᱟᱜ ᱫᱚ ᱛᱤᱥ ᱦᱚᱸ ᱵᱟᱝ ᱧᱮᱞ ᱟᱠᱟᱱᱟ ᱾ ᱱᱚᱶᱟ ᱮᱞᱮᱞ ᱫᱚ ᱞᱟᱹᱭ ᱞᱟᱵᱟᱲ ᱑. ᱔᱕ ᱠᱚᱨᱚᱲ ᱛᱟᱦᱮᱸ ᱠᱟᱱᱟ ᱾ ᱑᱙᱕᱑ ᱥᱟᱞ ᱨᱮᱭᱟᱜ ᱦᱚᱲ ᱦᱤᱥᱟᱹᱵᱽ ᱫᱟᱨᱟᱭ ᱛᱮ ᱵᱟᱰᱟᱭ ᱧᱟᱢᱚᱜᱼᱟ, ᱫᱤᱥᱚᱢ ᱠᱮᱪᱟᱜ ᱦᱟᱹᱴᱤᱧ ᱥᱚᱸᱜᱮ ᱗᱒,᱒᱖,᱐᱐᱐ ᱢᱩᱥᱚᱞᱢᱟᱱ ᱵᱷᱟᱨᱚᱛ ᱵᱟᱹᱜᱤ ᱠᱟᱛᱮ ᱯᱟᱠᱤᱥᱛᱟᱱ ᱠᱚ ᱥᱮᱱ ᱮᱱᱟ ᱟᱨ ᱗᱒,᱔᱙,᱐᱐᱐ ᱦᱤᱸᱫᱩ ᱟᱨ ᱥᱤᱠᱷ ᱯᱟᱠᱤᱥᱛᱟᱱ ᱵᱟᱹᱜᱤ ᱠᱟᱛᱮ ᱵᱷᱟᱨᱚᱛ ᱠᱚ ᱦᱮᱡ ᱟᱠᱟᱱᱟ ᱾

ᱱᱚᱶᱟ ᱫᱤᱱᱨᱮ ᱪᱤᱨ ᱦᱤᱯᱤᱲ ᱠᱟᱹᱢᱤᱦᱚᱨᱟ, ᱯᱟᱨᱮᱰ ᱟᱨ ᱛᱤᱱᱟᱹᱝ ᱜᱟᱱ ᱨᱟᱹᱥᱠᱟᱹ ᱨᱚᱢᱚᱡᱽ ᱥᱟᱶᱛᱮ ᱯᱩᱨᱟᱹ ᱵᱷᱟᱨᱚᱛ ᱫᱤᱥᱚᱢ ᱨᱮ ᱢᱟᱱᱟᱣ ᱦᱩᱭᱩᱜᱼᱟ ᱾ ᱥᱤᱧᱚᱛᱤᱭᱟᱹ ᱠᱚ ᱱᱤᱭᱟᱹ ᱫᱤᱱᱨᱮ ᱟᱠᱚᱣᱟᱜ ᱦᱚᱨᱚᱜ ᱵᱟᱸᱫᱮ, ᱥᱟᱢᱟᱱ, ᱚᱲᱟᱜ ᱟᱨ ᱜᱟᱹᱰᱤ ᱢᱚᱴᱚᱨ ᱠᱚᱨᱮ ᱫᱤᱥᱚᱢ ᱫᱩᱞᱟᱹᱲ ᱪᱤᱛᱟᱹᱨ ᱥᱚᱫᱚᱨ ᱠᱟᱛᱮ ᱱᱚᱶᱟ ᱠᱩᱥᱤ ᱨᱟᱹᱥᱠᱟᱹ ᱫᱤᱱ ᱠᱚ ᱢᱟᱱᱟᱣ ᱵᱟᱛᱟᱣᱟ ᱟᱨ ᱜᱷᱟᱨᱚᱸᱡᱤᱭᱟᱹ ᱟᱨ ᱜᱟᱛᱮ ᱠᱚ ᱥᱟᱶ ᱥᱮᱞᱮᱫ ᱠᱟᱛᱮ ᱫᱤᱥᱚᱢ ᱫᱩᱞᱟᱹᱲ ᱜᱟᱭᱟᱱ ᱠᱚ ᱧᱮᱞᱟ, ᱟᱨ ᱫᱤᱥᱚᱢ ᱫᱩᱞᱟᱹᱲ ᱥᱮᱨᱮᱧ ᱠᱚᱠᱚ ᱟᱸᱡᱚᱢᱟ ᱾

ᱪᱮᱫᱟᱜ ᱢᱟᱱᱟᱣ ᱦᱩᱭᱩᱜᱼᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱷᱩᱨᱜᱟᱹᱞ ᱫᱚ ᱟᱵᱚᱣᱟᱜ ᱡᱟᱱᱟᱢ ᱚᱫᱷᱤᱠᱟᱨ ᱠᱟᱱᱟ ᱾ ᱢᱟᱹᱱᱢᱤ ᱪᱤᱨᱜᱟᱹᱞ ᱡᱤᱭᱚᱱ ᱡᱤᱣᱤᱫᱚᱜ ᱮ ᱠᱷᱚᱡᱚᱜᱼᱟ ᱾ ᱡᱟᱦᱟᱸᱱᱟᱜ ᱮᱛᱮᱫ ᱠᱷᱟᱹᱛᱤᱨ ᱯᱷᱩᱨᱜᱟᱹᱞ ᱡᱤᱭᱚᱱ ᱮ ᱟᱫ ᱞᱮᱠᱷᱟᱱ, ᱟᱡᱟᱜ ᱡᱤᱭᱚᱱ ᱜᱚᱵᱚᱞ ᱨᱮ ᱛᱟᱦᱮᱸᱱᱟ ᱾ ᱯᱷᱩᱨᱜᱟᱹᱞ ᱡᱤᱭᱚᱱ ᱠᱷᱚᱱ ᱥᱟᱺᱜᱤᱧ ᱨᱮ ᱛᱟᱦᱮᱸ ᱠᱟᱛᱮ ᱩᱱᱤ ᱱᱟᱦᱟᱪᱟᱨ ᱠᱚᱪᱚᱞᱚᱸᱰ ᱛᱟᱞᱟᱨᱮ ᱡᱤᱭᱚᱱ ᱠᱷᱮᱢᱟᱣ ᱦᱩᱭ ᱟᱭᱟ ᱾ ᱯᱷᱩᱨᱜᱟᱹᱞᱚᱜ ᱞᱟᱹᱜᱤᱫ ᱩᱱᱤ ᱦᱟᱹᱛᱭᱟᱹᱨ ᱟᱯᱱᱟᱨ ᱦᱩᱭ ᱟᱭᱟ ᱾ ᱫᱤᱥᱚᱢ ᱨᱮᱭᱟᱜ ᱱᱚᱝᱠᱟᱱ ᱟᱱᱟᱴ ᱚᱠᱛᱚᱨᱮ ᱚᱯᱮᱞᱚᱜᱼᱟ ᱠᱚ ᱢᱤ-ᱢᱤᱫᱴᱟᱹᱝ ᱵᱤᱨ ᱵᱷᱟᱱᱴᱟ ᱾ ᱯᱷᱩᱨᱜᱟᱹᱞ ᱡᱤᱭᱚᱱ ᱞᱟᱹᱜᱤᱫ ᱩᱱᱠᱩ ᱫᱤᱥᱩᱣᱟᱹ ᱠᱚ ᱪᱤᱨᱜᱟᱹᱞ ᱠᱚᱣᱟ ᱾ ᱯᱷᱩᱨᱜᱟᱹᱞ ᱟᱢᱮᱴ ᱞᱟᱹᱜᱤᱫ ᱟᱹᱰᱤ-ᱟᱹᱰᱤ ᱫᱤᱥᱚᱢ ᱫᱩᱞᱟᱹᱲᱤᱭᱟᱹ ᱡᱤᱣᱤ ᱠᱚ ᱟᱞᱟᱭ ᱛᱟᱠᱚᱣᱟ ᱾ ᱯᱷᱩᱨᱜᱟᱹᱞ ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱟᱭᱢᱟ ᱵᱤᱨ ᱵᱷᱟᱱᱴᱟ ᱫᱤᱥᱚᱢ ᱞᱟᱹᱜᱤᱫ ᱠᱚ ᱫᱟᱬᱮᱜᱼᱟ ᱾ ᱩᱱᱠᱩᱣᱟᱜ ᱛᱩᱯᱤᱥᱟ, ᱟᱞᱟᱭ ᱟᱨ ᱥᱚᱱᱚᱛ ᱡᱤᱭᱚᱱ ᱩᱭᱦᱟᱹᱨ ᱠᱟᱛᱮ ᱜᱮ ᱟᱵᱚ ᱯᱷᱩᱨᱜᱟᱹᱞ ᱢᱟᱦᱟᱸ ᱫᱚᱵᱚᱱ ᱢᱟᱱᱟᱣ ᱵᱟᱛᱟᱣᱟ ᱾ ᱯᱷᱩᱨᱜᱟᱹᱞ ᱦᱩᱞ ᱨᱮᱭᱟᱜ ᱱᱟᱜᱟᱢ, ᱧᱟᱢ ᱟᱠᱟᱱ ᱯᱷᱩᱨᱜᱟᱹᱞ ᱨᱮᱭᱟᱜ ᱯᱟᱨᱟᱝᱜᱚᱛ, ᱟᱨ ᱫᱤᱥᱚᱢ ᱪᱤᱨ ᱨᱮᱭᱟᱜ ᱢᱟᱹᱱ ᱵᱟᱹᱲᱛᱤ ᱦᱚᱪᱚᱭ ᱨᱮᱭᱟᱜ ᱩᱭᱦᱟᱹᱨ ᱪᱮᱛᱟᱱ ᱨᱮ ᱯᱷᱩᱨᱜᱟᱹᱞ ᱢᱟᱦᱟᱸ ᱛᱟᱠ ᱮ ᱮᱢᱚᱜᱼᱟ ᱾ ᱫᱤᱥᱚᱢ ᱟᱨ ᱫᱤᱥᱚᱢ ᱨᱮᱭᱟᱜ ᱥᱟᱱᱟᱢ ᱯᱟᱲᱟ ᱠᱷᱚᱱ ᱱᱟᱯᱟᱭ ᱞᱟᱹᱜᱤᱫ ᱥᱟᱱᱟᱢ ᱫᱤᱥᱚᱢ ᱦᱚᱲ ᱠᱤᱨᱤᱭᱟᱹ ᱛᱮᱠᱚ ᱛᱚᱞ ᱨᱩᱣᱟᱹᱲᱚᱜᱼᱟ ᱾

ᱯᱷᱩᱨᱜᱟᱹᱞ ᱢᱤᱪᱷᱤᱞ ᱨᱮᱭᱟᱜ ᱠᱷᱟᱴᱚ ᱢᱟᱪᱷᱟ ᱱᱟᱜᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱹᱰᱤ ᱥᱮᱨᱢᱟ ᱫᱷᱟᱹᱵᱤᱡ ᱮᱴᱟᱜ ᱫᱤᱥᱚᱢ ᱨᱤᱱ ᱜᱚᱵᱚᱞᱤᱭᱟᱹ ᱵᱷᱟᱨᱚᱛ ᱨᱮᱠᱚ ᱛᱟᱦᱮᱸᱭᱮᱱ ᱠᱷᱟᱹᱛᱤᱨ ᱵᱷᱟᱨᱚᱛᱤᱭᱟᱹ ᱠᱚ ᱱᱟᱦᱟᱪᱟᱨ, ᱠᱚᱪᱚᱞᱚᱸᱰ ᱟᱨ ᱚᱱᱦᱮᱲᱟ ᱨᱮᱠᱚ ᱛᱟᱦᱮᱸ ᱠᱟᱱᱟ ᱾ ᱑᱘᱕᱗ ᱥᱟᱞᱮᱨᱮ ᱵᱷᱟᱨᱚᱛᱤᱭᱟᱹ ᱯᱟᱭᱠᱚ ᱠᱚᱫᱚ ᱤᱸᱜᱽᱨᱟᱹᱡᱽ ᱥᱚᱨᱠᱟᱨ ᱵᱤᱨᱩᱫᱷᱨᱮ ᱢᱤᱪᱷᱤᱞ ᱮ ᱫᱚᱦᱚ ᱠᱮᱜᱼᱟ ᱾ ᱵᱷᱟᱨᱚᱛᱤᱭᱟᱹ ᱠᱚᱣᱟᱜ ᱢᱚᱱᱮᱨᱮ ᱯᱷᱩᱨᱜᱟᱹᱞ ᱞᱟᱹᱜᱤᱫ ᱪᱤᱨᱜᱟᱹᱞᱚᱜ ᱨᱮᱭᱟᱜ ᱧᱮᱞ ᱧᱟᱢᱮᱱᱟ ᱾ ᱠᱚᱸᱜᱽᱨᱮᱥ ᱠᱚᱣᱟᱜ ᱯᱩᱭᱞᱩ ᱫᱩᱯᱲᱩᱵ ᱑᱘᱘᱕ ᱥᱟᱞᱮᱨᱮ ᱵᱚᱢᱵᱮ ᱨᱮ ᱛᱚᱨᱟᱣ ᱦᱩᱭ ᱮᱱᱟ ᱾ ᱜᱳᱯᱟᱞ ᱠᱨᱩᱥᱱᱚ ᱜᱳᱠᱷᱞᱮ, ᱵᱟᱞ ᱜᱚᱝᱜᱟᱫᱷᱚᱨ ᱛᱤᱞᱚᱠ, ᱫᱟᱫᱟᱵᱷᱟᱭᱤ ᱱᱟᱨᱳᱡᱤ ᱟᱹᱰᱤ ᱦᱚᱲ ᱱᱚᱶᱟ ᱢᱤᱪᱷᱤᱞ ᱨᱮ ᱞᱟᱹᱠᱛᱤᱭᱟᱱ ᱴᱷᱟᱶ ᱠᱚ ᱦᱟᱛᱟᱣ ᱠᱮᱜᱼᱟ ᱾ ᱑᱙᱑᱙ ᱥᱟᱞᱨᱮ ᱡᱟᱞᱤᱭᱟᱱᱟᱣᱟᱞᱟᱵᱟᱜᱽ ᱨᱮ ᱡᱟᱦᱟᱸ ᱢᱤᱫ ᱚᱜᱷᱚᱴᱚᱱ ᱜᱚᱯᱚᱡ ᱦᱩᱭ ᱞᱮᱱᱟ, ᱚᱱᱟᱨᱮ ᱟᱹᱰᱤᱜᱟᱱ ᱢᱟᱥᱩᱢ, ᱵᱤᱱ-ᱦᱟᱹᱛᱭᱟᱹᱨ ᱠᱩᱲᱤ-ᱠᱚᱲᱟ ᱟᱨ ᱜᱤᱫᱽᱨᱟᱹ-ᱯᱤᱫᱽᱨᱟᱹ ᱠᱚᱣᱟᱜ ᱡᱤᱭᱚᱱ ᱢᱩᱪᱟᱹᱫ ᱞᱮᱱᱟ ᱾ ᱱᱚᱝᱠᱟᱱ ᱜᱷᱚᱴᱚᱱ ᱠᱷᱚᱱ ᱫᱩᱜ ᱛᱟᱦᱮᱸᱱ ᱞᱟᱹᱜᱤᱫ ᱵᱷᱟᱨᱚᱛᱤᱭᱟᱹ ᱠᱚᱣᱟᱜ ᱦᱩᱞ ᱩᱭᱦᱟᱹᱨ ᱫᱚ ᱟᱨᱦᱚᱸᱭ ᱨᱤᱦᱤᱴ ᱠᱮᱜᱼᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱭᱟᱜ ᱧᱮᱞ-ᱟᱹᱭᱩᱨ ᱛᱮ ᱱᱚᱶᱟ ᱫᱩᱜᱚᱜ ᱦᱩᱞ ᱫᱚ ᱞᱟᱦᱟ ᱤᱫᱤᱭᱮᱱᱟ ᱾ ᱑᱙᱒᱑ ᱥᱟᱞᱮᱨᱮ ᱵᱷᱟᱨᱚᱛᱤᱭᱟᱹ ᱠᱚ ᱵᱟᱝ-ᱥᱚᱦᱚᱫ ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱵᱷᱟᱨᱚᱛ ᱨᱮ ᱤᱸᱜᱽᱨᱟᱹᱡᱽ ᱥᱚᱨᱠᱟᱨᱟᱜ ᱜᱚᱵᱚᱞ ᱠᱚ ᱵᱷᱟᱺᱰᱩᱣᱟᱹᱭ ᱨᱮᱭᱟᱜ ᱠᱚ ᱠᱩᱨᱩᱢᱩᱴᱩ ᱠᱮᱜᱼᱟ ᱾ ᱫᱤᱥᱩᱣᱟᱹ ᱠᱚ ᱵᱟᱦᱨᱮ ᱫᱤᱥᱚᱢ ᱨᱮᱭᱟᱜ ᱡᱤᱱᱤᱥ ᱠᱚ ᱵᱟᱠᱚ ᱦᱟᱛᱟᱣ ᱞᱮᱜᱼᱟ ᱾ ᱫᱤᱥᱚᱢᱨᱮ ᱥᱚᱛᱭᱟᱜᱨᱚᱦᱚ ᱢᱤᱪᱷᱤᱞ ᱟᱨ ᱦᱚᱸ ᱨᱤᱦᱤᱴ ᱛᱮ ᱞᱟᱦᱟ ᱤᱫᱤᱭᱮᱱᱟ ᱾ ᱢᱚᱦᱚᱛᱢᱟ ᱜᱟᱱᱫᱷᱤ ᱵᱤᱱ-ᱦᱤᱸᱥᱟᱹ ᱰᱟᱦᱟᱨ ᱛᱮ ᱢᱤᱪᱷᱤᱞ ᱮ ᱞᱟᱦᱟ ᱤᱫᱤ ᱠᱮᱜᱼᱟ ᱾

ᱵᱷᱟᱨᱚᱛ ᱵᱟᱹᱜᱤ ᱢᱤᱪᱷᱤᱞ ᱨᱮᱭᱟᱜ ᱠᱟᱹᱠᱞᱟᱹ ᱮᱢ ᱥᱟᱶᱛᱮ ᱤᱸᱜᱽᱨᱟᱹᱡᱽ ᱥᱚᱨᱠᱟᱨ ᱵᱷᱟᱨᱚᱛ ᱠᱷᱚᱱ ᱞᱟᱜᱟ ᱠᱚ ᱨᱮᱭᱟᱜ ᱠᱩᱨᱩᱢᱩᱴᱩ ᱛᱚᱸᱜᱮ ᱛᱟᱦᱮᱸᱭᱮᱱᱟ ᱾ ᱯᱚᱸᱰᱤᱛ ᱡᱚᱵᱟᱦᱚᱨ ᱞᱟᱞ ᱱᱮᱦᱨᱩ, ᱥᱚᱨᱫᱟᱨ ᱵᱚᱞᱞᱚᱵᱷᱵᱷᱟᱭᱤ ᱯᱚᱴᱮᱞ, ᱱᱮᱛᱟᱡᱤ ᱥᱩᱵᱷᱟᱥ ᱪᱚᱸᱫᱽᱨᱚ ᱵᱳᱥ, ᱟᱨ ᱜᱟᱱᱫᱷᱤᱡᱤ ᱱᱚᱝᱠᱟ ᱜᱮ ᱟᱹᱰᱤᱜᱟᱱ ᱱᱮᱛᱟ ᱫᱟᱨᱟᱭ ᱛᱮ ᱵᱷᱟᱨᱚᱛ ᱯᱷᱩᱨᱜᱟᱹᱞ ᱨᱮᱭᱟᱜ ᱵᱟᱝ ᱛᱷᱤᱨ ᱠᱩᱨᱩᱢᱩᱴᱩ ᱞᱟᱦᱟ ᱤᱫᱤᱭᱮᱱᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱵᱟᱝᱼᱦᱤᱸᱥᱟᱹ ᱦᱚᱨᱛᱮᱭ ᱛᱟᱲᱟᱢ ᱟᱠᱟᱫ ᱵᱮᱲᱟᱨᱮ ᱱᱮᱛᱟᱡᱤ ᱢᱤᱫ ᱟᱡᱟᱫᱽᱼᱦᱤᱸᱫᱽ ᱯᱟᱭᱠᱚ ᱜᱟᱫᱮᱞ ᱮ ᱛᱤᱸᱜᱩ ᱠᱮᱜᱼᱟ ᱾ ᱡᱚᱛᱚ ᱦᱩᱞᱜᱟᱹᱨᱤᱭᱟᱹ ᱦᱟᱜ ᱜᱮ ᱢᱤᱫᱴᱟᱹᱝ ᱡᱚᱥ ᱛᱟᱦᱮᱸ ᱠᱟᱱᱟ ᱵᱷᱟᱨᱚᱛ ᱯᱷᱩᱨᱜᱟᱹᱞ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱭᱟᱜ ᱧᱮᱞ ᱟᱹᱭᱩᱨ ᱛᱮ ᱫᱤᱥᱚᱢ ᱫᱤᱥᱩᱣᱟᱹ ᱯᱷᱩᱨᱜᱟᱹᱞ ᱢᱤᱪᱷᱤᱞ ᱨᱮᱠᱚ ᱥᱮᱞᱮᱫ ᱮᱱᱟ ᱾ ᱜᱟᱱᱫᱷᱤᱡᱤ ᱭᱟᱜ ᱵᱟᱝᱼᱦᱤᱸᱥᱟᱹ ᱦᱟᱹᱛᱭᱟᱹᱨ ᱵᱮᱵᱷᱟᱨ ᱯᱷᱩᱨᱜᱟᱹᱞ ᱞᱟᱹᱜᱤᱫ ᱟᱹᱰᱤᱜᱟᱱ ᱜᱚᱲᱚ ᱥᱚᱦᱚᱫ ᱦᱩᱭ ᱮᱱᱟ ᱾

ᱪᱮᱫ ᱞᱮᱠᱟ ᱢᱟᱱᱟᱣ-ᱵᱟᱛᱟᱣ ᱦᱩᱭᱩᱜᱼᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱩᱨᱟᱹ ᱡᱮᱜᱮᱛ ᱨᱮ ᱵᱷᱟᱨᱚᱛᱤᱭᱟᱹ ᱠᱚ ᱫᱟᱨᱟᱭ ᱛᱮ ᱱᱚᱶᱟ ᱥᱟᱹᱜᱩᱱ ᱢᱟᱸᱦᱟ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜᱼᱟ ᱾ᱞᱟᱠᱷᱭᱟᱫᱤᱯ, ᱟᱱᱰᱟᱢᱟᱱ ᱟᱨ ᱱᱤᱠᱳᱵᱚᱨ ᱰᱷᱤᱯ ᱨᱮᱦᱚᱸ ᱱᱚᱶᱟ ᱢᱟᱦᱟᱸ ᱫᱚ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜᱼᱟ ᱾ ᱵᱟᱦᱨᱮ ᱫᱤᱥᱚᱢ ᱨᱮᱠᱚ ᱛᱟᱦᱮᱸᱱ ᱠᱟᱱ ᱵᱷᱟᱨᱚᱛᱤᱭᱟᱹ ᱠᱚᱦᱚᱸ ᱯᱷᱩᱨᱜᱟᱹᱞ ᱢᱟᱦᱟᱸ ᱫᱚᱠᱚ ᱢᱟᱱᱟᱣ ᱵᱟᱛᱟᱣ ᱜᱮᱭᱟ ᱾ ᱟᱥᱲᱟ, ᱵᱤᱨᱫᱟᱹᱜᱟᱲ ᱟᱨᱵᱟᱝ ᱞᱮᱠᱟᱱ ᱞᱮᱠᱟᱱ ᱥᱚᱨᱠᱟᱨᱤ ᱵᱟᱝ-ᱥᱚᱨᱠᱟᱨᱤ ᱜᱟᱶᱛᱟ ᱠᱚᱦᱚᱸ ᱯᱷᱩᱨᱜᱟᱹᱞ ᱢᱟᱦᱟᱸ ᱵᱟᱵᱚᱫᱽ ᱥᱟᱡᱟᱣ ᱥᱟᱯᱲᱟᱣ ᱦᱩᱭ ᱠᱚᱜᱼᱟ ᱾

ᱢᱟᱱᱟᱣ ᱨᱮᱭᱟᱜ ᱨᱟᱹᱥᱠᱟᱹ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱞᱮᱠᱟᱱ-ᱞᱮᱠᱟᱱ ᱨᱚᱝ ᱠᱟᱜᱚᱡᱽ, ᱵᱟᱦᱟ, ᱟᱨ ᱵᱤᱡᱽᱞᱤ ᱢᱟᱨᱥᱟᱞ ᱛᱮ ᱥᱟᱡᱟᱣ ᱟᱠᱟᱱᱟᱜ ᱟᱹᱰᱤ ᱞᱟ~ᱥᱟᱬᱦᱮᱫ ᱜᱮ ᱧᱮᱞᱚᱜᱼᱟ ᱾ ᱪᱮᱛᱮᱫᱤᱭᱟᱹ ᱠᱚ ᱟᱥᱲᱟ ᱫᱚᱛᱚᱼᱯᱮᱸᱴ ᱦᱚᱨᱚᱜ ᱠᱟᱛᱮ ᱟᱥᱲᱟ ᱵᱟᱹᱠᱷᱩᱞ ᱨᱮᱠᱚ ᱥᱮᱴᱮᱨ ᱢᱤᱫᱩᱜᱼᱟ ᱾ ᱪᱮᱛᱮᱫᱤᱭᱟᱹ ᱠᱚᱣᱟᱜ ᱟᱲᱟᱝ ᱠᱷᱚᱱ ᱵᱚᱸᱫᱮ ᱢᱟᱛᱚᱨᱚᱢ, ᱯᱷᱩᱨᱜᱟᱹᱞ ᱵᱷᱟᱨᱚᱛ ᱨᱮᱭᱟᱜ ᱡᱤᱛᱠᱟᱹᱨ, ᱟᱨ ᱢᱚᱦᱟᱛᱢᱟ ᱜᱟᱱᱫᱷᱤᱭᱟᱜ ᱡᱤᱛᱠᱟᱹᱨ ᱟᱲᱟᱝ ᱛᱟᱨᱠᱚ ᱠᱟᱛᱮ ᱚᱛ-ᱥᱮᱨᱢᱟ ᱨᱮ ᱛᱟᱹᱠᱤᱡ ᱢᱤᱫᱩᱜᱼᱟ ᱟᱨ ᱥᱩᱨ ᱥᱩᱯᱩᱨ ᱨᱮ ᱢᱮᱱᱟᱜ ᱠᱚ ᱦᱚᱲ ᱦᱚᱯᱚᱱ ᱠᱚᱣᱟᱜ ᱨᱟᱹᱥᱠᱟᱹ ᱥᱟᱨᱥᱟᱣᱜᱼᱟ ᱾ ᱮᱱ. ᱥᱤ. ᱥᱤ., ᱥᱠᱟᱣᱴ, ᱟᱨ ᱨᱮᱰ ᱠᱨᱚᱥ ᱜᱤᱫᱽᱨᱟᱹ ᱠᱚᱣᱟᱜ ᱫᱚ ᱢᱚᱱᱮ ᱨᱤᱡᱷᱟᱹᱣ ᱜᱚᱫᱚᱜ ᱞᱮᱠᱟᱱ ᱯᱟᱨᱮᱰ ᱦᱚᱸ ᱦᱩᱭᱩᱜᱼᱟ ᱾ ᱱᱮᱣᱛᱟ ᱟᱠᱟᱱ ᱢᱟᱨᱟᱝ ᱯᱮᱲᱟ ᱠᱚ ᱫᱟᱨᱟᱭ ᱛᱮ ᱪᱤᱨ ᱦᱤᱯᱤᱲ ᱦᱩᱭᱩᱜᱼᱟ ᱾ ᱪᱮᱛᱮᱫᱤᱭᱟᱹ ᱠᱚᱣᱟᱜ ᱟᱲᱟᱝ ᱨᱟᱦᱟ ᱠᱷᱚᱱ ᱟᱸᱡᱚᱢ ᱦᱮᱡ ᱜᱚᱫᱚᱜᱼᱟ, "ᱡᱚᱱᱚ ᱜᱚᱬᱚ ᱢᱚᱱᱚ ᱚᱫᱷᱤᱱᱟᱭᱚᱠᱚ ᱡᱚᱭᱚ ᱦᱮ ᱵᱷᱟᱨᱚᱛᱚ ᱵᱷᱟᱜᱽᱭᱚ ᱵᱤᱫᱷᱟᱛᱟ" ᱾ ᱤᱱᱟᱹ ᱛᱟᱭᱚᱢ ᱥᱮᱴᱮᱨ ᱟᱠᱟᱱ ᱢᱟᱨᱟᱝ ᱯᱮᱲᱟ ᱠᱚ ᱯᱷᱩᱨᱜᱟᱹᱞ ᱢᱟᱦᱟᱸ ᱵᱟᱵᱚᱫᱽ ᱜᱟᱞᱚᱪ ᱠᱚ ᱮᱢ ᱵᱟᱲᱟ ᱠᱟᱛᱮ ᱞᱮᱠᱟᱱ-ᱞᱮᱠᱟᱱ ᱠᱟᱹᱢᱤᱦᱚᱨᱟ ᱨᱮ ᱡᱤᱛᱠᱟᱹᱨ ᱟᱠᱟᱱ ᱪᱮᱛᱮᱫᱤᱭᱟᱹ ᱠᱚ ᱥᱤᱨᱯᱷᱟᱹ ᱪᱟᱯᱟᱞ ᱦᱩᱭᱩᱜᱼᱟ ᱾

ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Independence_Day_(India)