ᱡᱤᱨᱟᱹᱱ ᱪᱤᱱᱦᱟᱹ

ᱦᱚᱲ ᱡᱟᱦᱟᱱᱟᱜ ᱞᱟᱹᱭ ᱡᱚᱠᱷᱮᱡ ᱚᱠᱟ ᱨᱮᱫᱚ ᱴᱷᱟᱠᱮᱫ ᱴᱷᱟᱠᱮᱫ ᱮ ᱞᱟᱹᱭᱟ, ᱚᱠᱟ ᱨᱮᱫᱚ ᱦᱟᱦᱟᱲᱟ ᱥᱟᱶᱛᱮᱭ ᱞᱟᱹᱭᱟ, ᱚᱠᱟ ᱨᱮᱫᱚᱭ ᱠᱩᱠᱞᱤᱭᱟ ᱾ ᱚᱞ ᱨᱮ ᱱᱚᱶᱟᱠᱚ ᱥᱚᱫᱚᱨ ᱞᱟᱹᱜᱤᱫ ᱫᱚ ᱛᱤᱱᱟᱹᱜ ᱜᱟᱱ ᱪᱤᱱᱦᱟᱹ ᱵᱮᱵᱷᱟᱨᱚᱜ-ᱟ ᱾ ᱚᱱᱟᱠᱚ ᱜᱮ ᱡᱤᱨᱟᱹᱱ ᱪᱤᱱᱦᱟᱹ (en:Punctuation)ᱫᱚᱵᱚ ᱢᱮᱛᱟᱜ ᱠᱟᱱᱟ ᱾ ᱚᱱᱟ ᱠᱚᱜᱮ ᱞᱟᱛᱟᱨ ᱨᱮ ᱮᱢ ᱮᱱᱟ᱾

1. ᱢᱩᱪᱟᱹᱫ (᱾)
2. ᱠᱚᱢᱟ/ᱡᱤᱨᱟᱹᱣ (,)
3. ᱥᱮᱢᱤᱠᱚᱞᱚᱱ/ᱛᱚᱯᱟᱜ (;)
4. ᱠᱩᱠᱞᱤ ᱪᱤᱱᱦᱟᱹ (?)
5. ᱦᱟᱦᱟᱲᱟ ᱪᱤᱱᱦᱟᱹ (!)
6. ᱪᱮᱛᱮᱫ ᱪᱤᱱᱦᱟᱹ ("")
7. ᱯᱷᱟᱨᱠᱟ/ᱰᱮᱥ (-)
8. ᱠᱚᱞᱚᱱ (:)
9. ᱦᱟᱹᱲᱩᱵ [()]

ᱢᱩᱪᱟᱹᱫ

ᱟᱹᱭᱟᱹᱛ ᱢᱩᱪᱟᱹᱫ ᱞᱮᱱᱠᱷᱟᱱ ᱢᱩᱪᱟᱹᱫ ᱪᱤᱱᱦᱟᱹ ᱫᱚᱠᱚ ᱞᱟᱜᱟᱣᱟ᱾ ᱡᱮᱢᱚᱱ-

1. ᱥᱤᱧ ᱪᱟᱸᱫᱚ ᱯᱩᱨᱩᱵᱽ ᱱᱟᱠᱷᱟ ᱨᱮ ᱨᱟᱠᱟᱵ-ᱟ ᱾
2. ᱜᱟᱹᱭ ᱠᱚ ᱟᱹᱛᱤᱧ ᱠᱟᱱᱟ᱾

ᱡᱤᱨᱟᱹᱣ

ᱟᱹᱰᱤ ᱜᱟᱱ ᱥᱚᱢᱟᱱ ᱡᱟᱹᱛᱤᱭᱟᱱ ᱟᱹᱲᱟᱹ ᱢᱤᱫᱴᱟᱹᱝ ᱟᱹᱭᱟᱹᱛ ᱨᱮ ᱛᱟᱦᱮᱸᱱ ᱠᱷᱟᱱ ᱡᱤᱨᱟᱹᱣ ᱪᱤᱱᱦᱟᱹ ᱵᱮᱵᱷᱟᱨᱚᱜ-ᱟ ᱾ ᱡᱮᱢᱚᱱ -

1. ᱦᱚᱲᱮᱡ, ᱢᱩᱜᱽ, ᱨᱟᱸᱵᱽᱲᱟ, ᱢᱟᱹᱥᱨᱤ ᱡᱚᱛᱚ ᱫᱟᱹᱞ ᱜᱮ ᱤᱧ ᱫᱚᱹᱧ ᱡᱚᱢᱟ ᱾

ᱛᱚᱯᱟᱜ

ᱢᱤᱫᱴᱟᱹᱝ ᱵᱷᱟᱵᱽ ᱨᱮᱭᱟᱜ ᱯᱮᱭᱟ ᱯᱩᱱᱭᱟᱹ ᱟᱹᱭᱟᱹᱛ ᱛᱟᱦᱮᱸᱱ ᱠᱷᱟᱱ ᱮᱴᱟᱜ ᱢᱮᱱ ᱞᱮᱠᱷᱟᱱ ᱫᱚ ᱢᱤᱫᱴᱟᱹᱝ ᱠᱟᱛᱷᱟ ᱨᱮᱜᱮ ᱯᱮᱭᱟ ᱯᱩᱱᱭᱟᱹ ᱟᱹᱭᱟᱹᱛ ᱛᱟᱦᱮᱸᱱ ᱠᱷᱟᱱ ᱚᱸᱰᱮ ᱫᱚ ᱢᱩᱪᱟᱹᱫ ᱪᱤᱱᱦᱟᱹ ᱵᱟᱝ ᱠᱟᱛᱮ ᱛᱚᱯᱟᱜ ᱪᱤᱱᱦᱟᱹ ᱵᱮᱣᱦᱟᱨᱚᱜ-ᱟ ᱾ ᱡᱮᱢᱚᱱ -

1. ᱡᱟᱦᱟᱸᱭ ᱦᱚᱲ ᱡᱟᱦᱟᱸᱱᱟᱜ ᱦᱩᱭ ᱮᱢᱟᱱᱚᱜ-ᱟ ᱵᱚᱛᱚᱨ ᱠᱟᱛᱮ ᱠᱟᱹᱢᱤ ᱵᱟᱠᱚ ᱮᱦᱚᱵᱟ, ᱩᱱᱠᱩ ᱫᱚ ᱱᱟᱯᱟᱭ ᱦᱚᱲ; ᱡᱟᱦᱟᱸᱭ ᱦᱚᱲ ᱡᱟᱦᱟᱸᱱᱟᱜ ᱦᱩᱭ ᱞᱮᱱᱠᱷᱟᱱ ᱠᱟᱹᱢᱤ ᱠᱚ ᱵᱟᱹᱜᱤᱭᱟᱜ-ᱟ, ᱩᱱᱠᱩ ᱫᱚ ᱚᱫᱷᱚᱢ; ᱡᱟᱦᱟᱸᱭ ᱦᱚᱲ ᱡᱟᱦᱟᱸᱱᱟᱜ ᱦᱩᱭᱩᱜ ᱨᱮᱦᱚᱸ ᱠᱟᱹᱢᱤ ᱵᱟᱠᱚ ᱵᱟᱹᱜᱤᱭᱟᱜ-ᱟ ᱩᱱᱠᱩ ᱫᱚ ᱵᱩᱫᱷᱤᱢᱟᱱ ᱦᱚᱲ ᱠᱟᱱᱟ ᱠᱚ ᱾

ᱠᱩᱠᱞᱤ ᱪᱤᱱᱦᱟᱹ

ᱡᱟᱦᱟᱸᱱᱟᱜ ᱵᱟᱵᱚᱛ ᱠᱩᱠᱞᱤ ᱛᱟᱦᱮᱸᱱ ᱠᱷᱟᱱ ᱫᱚ ᱠᱩᱠᱞᱤ ᱪᱤᱱᱦᱟᱹ ᱵᱮᱣᱦᱟᱨᱚᱜ-ᱟ᱾ ᱡᱮᱢᱚᱱ

1. ᱚᱠᱟ ᱛᱮᱢ ᱥᱮᱱᱚᱜ ᱠᱟᱱᱟ ?
2. ᱩᱱᱤ ᱪᱮᱫ ᱮ ᱪᱮᱠᱟᱭᱮᱜ-ᱟ ?

ᱦᱟᱦᱟᱲᱟ ᱪᱤᱱᱦᱟᱹ

ᱡᱟᱦᱟᱸ ᱟᱹᱭᱟᱹᱛ ᱨᱮ ᱦᱟᱦᱟᱲᱟ, ᱵᱚᱛᱚᱨ, ᱨᱟᱹᱥᱠᱟᱹ, ᱦᱤᱨᱠᱟᱹ, ᱥᱚᱫᱚᱨ ᱠᱚᱜ-ᱟ ᱚᱱᱰᱮ ᱫᱚ ᱦᱟᱦᱟᱲᱟ ᱪᱤᱱᱦᱟᱹ ᱵᱮᱣᱦᱟᱨᱚᱜ-ᱟ ᱾ ᱡᱮᱢᱚᱱ-

1. ᱟᱹᱰᱤ ᱪᱚᱨᱚᱠ ᱵᱟᱦᱟ ᱫᱚᱭᱟ !
2. ᱟᱹᱣ ! ᱵᱚᱨᱚ ᱚᱪᱚ ᱠᱮᱫᱤᱧᱟᱢ ᱾

ᱪᱮᱛᱮᱫ ᱪᱤᱱᱦᱟᱹ

ᱚᱠᱚᱭ ᱪᱮᱫ ᱮ ᱨᱚᱲ ᱟᱠᱟᱫ-ᱟ ᱚᱱᱟ ᱚᱞ ᱫᱚ ᱱᱚᱶᱟ ᱪᱮᱛᱮᱫ ᱪᱤᱱᱦᱟᱹ ᱵᱷᱤᱛᱨᱤ ᱨᱮᱠᱚ ᱫᱚᱦᱚᱭᱟ ᱾ ᱡᱮᱢᱚᱱ-

1. ᱜᱩᱨᱩ ᱜᱚᱢᱠᱮᱭ ᱞᱟᱹᱭ ᱟᱠᱟᱫ-ᱟ, "ᱡᱟᱱᱟᱢ ᱟᱭᱳ ᱫᱚ ᱡᱟᱦᱟᱸ ᱛᱤᱱᱟᱹᱜ ᱮ ᱱᱤᱫᱷᱟᱹᱱ ᱨᱮᱦᱚᱸ ᱩᱱᱤ ᱜᱮ ᱦᱟᱨᱟ ᱢᱮᱭᱟᱭ, ᱡᱟᱱᱟᱢ ᱚᱞ ᱫᱚ ᱡᱟᱦᱟᱸ ᱛᱤᱱᱟᱹᱜ ᱱᱟᱪᱟᱨ ᱨᱮᱦᱚᱸ ᱚᱱᱟ ᱛᱮᱜᱮ ᱢᱟᱜᱨᱟᱝ-ᱟ᱾"

ᱯᱷᱟᱨᱠᱟ

ᱡᱟᱦᱟᱸᱭᱟᱜ ᱪᱤᱱᱛᱟᱹ ᱠᱚ ᱥᱚᱡᱷᱮ ᱵᱟᱝ ᱠᱟᱛᱮ indirectly ᱚᱞ ᱥᱚᱫᱚᱨ ᱠᱷᱟᱱ ᱫᱚ ᱯᱷᱟᱨᱠᱟ ᱪᱤᱱᱦᱟᱹ ᱞᱟᱜᱟᱣ ᱦᱩᱭᱩᱜ-ᱟ ᱾ ᱡᱮᱢᱚᱱ-

1. ᱢᱟᱪᱮᱫ ᱮ ᱢᱮᱱ ᱠᱮᱜ-ᱟ- ᱢᱚᱱ ᱮᱢ ᱠᱟᱛᱮᱢ ᱚᱞᱚᱜ ᱠᱷᱟᱱ ᱫᱚ ᱵᱤᱱᱤᱰ ᱨᱮ ᱱᱤᱦᱟᱹᱛᱤ ᱵᱷᱟᱹᱜᱤ ᱮᱞᱮᱢ ᱟᱹᱜᱩᱭᱟ᱾

ᱠᱚᱞᱚᱱ

ᱢᱤᱫᱴᱟᱝ ᱥᱟᱛᱟᱢ ᱨᱮᱭᱟᱜ ᱧᱩᱛᱩᱢ ᱵᱟᱨ ᱞᱮᱠᱟ ᱚᱞ ᱠᱚᱜ ᱠᱷᱟᱱ ᱫᱚ ᱛᱟᱞᱟ ᱨᱮ ᱠᱚᱞᱚᱱ ᱪᱤᱱᱦᱟᱹ ᱵᱮᱣᱦᱟᱨᱚᱜ-ᱟ᱾ ᱡᱮᱢᱚᱱ

1. ᱥᱟᱨᱱᱟ ᱟᱨ ᱦᱤᱱᱫᱩ ᱫᱷᱚᱨᱚᱢ : ᱢᱤᱫ ᱥᱚᱜ ᱥᱮᱴᱮᱡ
2. ᱫᱤᱠᱩ ᱥᱟᱶ ᱵᱮᱦᱟ ᱵᱟᱯᱞᱟ : ᱵᱩᱜᱤ ᱟᱨ ᱵᱟᱹᱲᱤᱡ ᱾

ᱦᱟᱹᱲᱩᱵ

ᱡᱟᱦᱟᱸ ᱠᱟᱛᱷᱟ ᱜᱮ ᱴᱷᱟᱹᱣᱠᱟᱹ ᱥᱟᱹᱦᱤᱡ ᱵᱟᱰᱟᱭ ᱞᱟᱹᱜᱤᱫ ᱚᱱᱟ ᱵᱟᱵᱚᱛ ᱵᱟᱹᱲᱛᱤ ᱠᱟᱛᱷᱟ ᱠᱚᱫᱚ ᱦᱟᱹᱲᱩᱵ ᱵᱷᱤᱛᱨᱤ ᱨᱮ ᱫᱚᱦᱚᱜ-ᱟ᱾ ᱡᱮᱢᱚᱱ-

1. ᱨᱟᱢᱚᱭᱤᱡ ᱦᱚᱯᱚᱱ (ᱢᱟᱨᱟᱝ ᱦᱚᱯᱚᱱ ᱠᱩᱥᱟᱹᱞ) ᱫᱚ ᱚᱠᱟ ᱥᱮᱫ ᱪᱚᱭ ᱥᱮᱱ ᱟᱠᱟᱱᱟ᱾
2. ᱨᱟᱱ (ᱯᱟᱨᱟᱥᱤᱴᱟᱢᱚᱞ) ᱵᱟᱡᱟᱨ ᱠᱷᱚᱱ ᱟᱹᱜᱩ ᱛᱟᱨᱟᱭ ᱢᱮ᱾

ᱵᱟᱦᱨᱮ ᱡᱚᱱᱚᱲ

• Larry Trask: Guide to Punctuation A helpful online resource
• History of Punctuation, in French Helpful photographs of early punctuation
• Punctuation Marks in English: Clarity in Expression
• Unicode reference tables:
  • "General punctuation U2000" (PDF).
  • "CJK Symbols and Punctuation U3000" (PDF).
  • "CJK Compatibility Forms UFE30" (PDF).
  • "Small Form Variants UFE50" (PDF).
  • "Halfwidth and Fullwidth Forms UFF00" (PDF).
• Ethiopic script
• Automatic Recovery of Capitalization and Punctuation of Automatic Speech Transcripts
• English Punctuation Rules
• Punctuation marks with independent clauses, by Jennifer Frost