ᱣᱤᱠᱤᱯᱤᱰᱤᱭᱟ:ᱪᱟᱸᱫᱚ ᱨᱮᱱᱟᱜ ᱵᱟᱪᱷᱟᱣ ᱚᱱᱚᱞ/ᱚᱠᱴᱚᱵᱚᱨ ᱒᱐᱒᱒
ᱫᱟᱥᱟᱸᱭ ᱮᱱᱮᱡ ᱥᱮᱨᱮᱧ ᱦᱚᱸ ᱥᱟᱱᱛᱟᱲᱟᱜ ᱥᱮᱨᱼᱳᱭᱟ ᱥᱮ ᱞᱟᱭ ᱞᱟᱠᱪᱟᱨ ᱜᱮ ᱾ ᱢᱮᱱᱠᱷᱟᱱ ᱥᱟᱱᱛᱟᱲ ᱡᱟᱹᱛᱤ ᱠᱷᱮᱨᱣᱟᱲ ᱦᱚᱯᱚᱱᱟᱜ ᱢᱤᱫ ᱫᱩᱠ ᱨᱮᱭᱟᱜ ᱱᱟᱜᱟᱢ ᱫᱚ ᱫᱟᱥᱟᱸᱭ ᱵᱚᱸᱜᱟ ᱨᱮ ᱫᱟᱥᱟᱸᱭ ᱮᱱᱮᱡ ᱥᱮ ᱫᱟᱥᱟᱸᱭ ᱫᱚᱱ ᱾ ᱱᱤᱭᱟᱹ ᱫᱚ ᱫᱤᱠᱩ ᱟᱜ ᱫᱩᱨᱜᱟᱹ ᱯᱩᱡᱟᱹ ᱚᱠᱛᱮ (ᱥᱚᱯᱛᱚᱢᱤ, ᱚᱥᱴᱚᱢᱤ, ᱱᱚᱵᱚᱢᱤ ᱟᱨ ᱵᱤᱡᱚᱭᱟ) ᱱᱤᱭᱟᱹ ᱯᱳᱱ ᱫᱤᱱ ᱟᱹᱛᱩ ᱟᱹᱛᱩ ᱦᱟᱭ ᱦᱟᱭ ᱟᱲᱟᱝᱛᱮ ᱮᱱᱮᱡ ᱥᱮᱨᱮᱧ ᱛᱟᱞᱟᱛᱮ ᱫᱩᱣᱟᱹᱨ ᱫᱩᱣᱟᱹᱨ ᱠᱚ ᱠᱷᱚᱭ ᱟ ᱾ ᱱᱤᱣᱟ ᱨᱮᱭᱟᱜ ᱟᱭᱢᱟ ᱜᱟᱱ ᱠᱟᱹᱦᱤᱱᱤ ᱢᱮᱱᱟᱜ ᱜᱮᱭᱟ ᱾ ᱚᱠᱚᱭ ᱠᱚ ᱫᱚ ᱠᱚ ᱞᱟᱹᱭᱟ ᱦᱩᱫᱩᱬ ᱫᱩᱨᱜᱟᱹ ᱧᱩᱛᱩᱢᱟᱱ ᱢᱤᱫ ᱵᱤᱨ ᱨᱟᱡ ᱮ ᱛᱟᱦᱮ ᱠᱟᱱᱟ ᱥᱟᱱᱛᱟᱲ ᱡᱟᱹᱛᱤ ᱨᱮᱱ, ᱟᱨᱡᱚ ᱨᱮᱱ ᱫᱮᱵᱽᱨᱟᱡᱽ ᱤᱱᱫᱨᱚ ᱦᱟᱹᱵᱤᱡ ᱚᱠᱚᱭ ᱦᱚᱸ ᱵᱟᱠᱚ ᱫᱟᱲᱮᱜ ᱛᱟᱦᱮᱸᱫ, ᱩᱱᱤ ᱵᱤᱨ ᱨᱟᱡ ᱦᱩᱫᱩᱬ ᱫᱩᱨᱜᱟᱹ ᱥᱟᱶ ᱾ ᱵᱤᱨ ᱨᱟᱡᱽ ᱦᱩᱫᱩᱬ ᱫᱩᱨᱜᱟᱹ ᱠᱩᱲᱤ ᱦᱚᱯᱚᱱ ᱥᱟᱞᱟᱜ ᱵᱟᱭ ᱞᱟᱹᱲᱦᱟᱹᱭ ᱟ ᱱᱚᱣᱟ ᱠᱟᱛᱷᱟ ᱫᱤᱠᱩ ᱨᱮᱱ ᱫᱮᱵᱚᱛᱟ ᱠᱚ ᱵᱟᱰᱟᱭ ᱧᱟᱢ ᱠᱮᱫᱟ ᱟᱨ ᱫᱮᱵᱤ ᱢᱚᱦᱟᱢᱟᱭᱟ ᱥᱟᱞᱟᱜ ᱵᱟᱯᱞᱟ ᱠᱚ ᱴᱷᱟᱹᱠᱭᱟᱹᱞᱮᱫ ᱛᱟᱭᱟ ᱾ ᱟᱨ ᱢᱚᱦᱟᱢᱟᱭᱟ ᱠᱚ ᱢᱮᱛᱟᱫᱮᱭᱟ ᱩᱱᱤᱢ ᱜᱚᱡ ᱞᱮᱠᱷᱟᱱ ᱟᱨᱡᱚ ᱥᱚᱢᱟᱡ ᱨᱮ ᱯᱩᱡᱟᱹᱢ ᱧᱟᱢ ᱟ ᱾ ᱚᱱᱟ ᱛᱟᱭᱚᱢ ᱪᱷᱚᱞᱚᱱᱟ ᱠᱟᱛᱮ ᱵᱟᱯᱞᱟ ᱧᱩᱛᱩᱢ ᱛᱮ ᱮᱠᱞᱟ ᱨᱮ ᱤᱫᱤ ᱠᱟᱛᱮ ᱮ ᱜᱚᱡ ᱠᱮᱫᱮᱭᱟ, ᱥᱟᱱᱛᱟᱲ ᱦᱚᱲ ᱨᱮᱱ ᱵᱤᱨ ᱨᱟᱡᱽ ᱦᱩᱫᱩᱬ ᱫᱩᱨᱜᱟᱹ ᱾