ᱥᱟᱞᱠᱷᱟᱱ ᱢᱩᱨᱢᱩ

ᱣᱤᱠᱤᱯᱤᱰᱤᱭᱟ ᱠᱷᱚᱱ
Jump to navigation Jump to search
 ᱜᱚᱢᱠᱮᱥᱟᱞᱠᱷᱟᱱ ᱢᱩᱨᱢᱩ ᱛᱤᱠᱤᱱᱟᱜ ᱡᱟᱱᱟᱢ ᱫᱚ ᱡᱟᱢᱥᱮᱫᱽᱯᱩᱨ ᱨᱮᱭᱟᱜ ᱠᱚᱨᱚᱱᱰᱤ [ᱵᱚᱫᱽᱨᱟᱴᱚᱞᱟ] ᱨᱮ ᱤᱝᱨᱟᱹᱡᱤ ᱢᱟᱹᱦᱤᱛ ᱐᱒ ᱡᱩᱱ ᱑᱙᱕᱒ ᱥᱟᱞᱮ ᱨᱮᱭ ᱡᱟᱱᱟᱢ ᱞᱮᱱ ᱛᱟᱦᱮᱱ ᱾ ᱜᱚᱢᱠᱮ ᱢᱩᱨᱢᱩ ᱛᱤᱠᱤᱱ ᱨᱤᱱ ᱟᱭᱚ ᱵᱟᱵᱟ ᱛᱤᱠᱤᱱᱟᱜ ᱧᱩᱛᱩᱢ ᱫᱚ ᱛᱟᱸᱦᱮᱸ ᱠᱟᱱᱟ ᱵᱚᱝᱜᱟ ᱟᱠᱟᱱ  ᱵᱟᱵᱟ ᱨᱟᱢᱨᱟᱭ ᱢᱩᱨᱢᱩ ᱟᱨ ᱟᱭᱳᱣᱟᱜ ᱧᱩᱛᱩᱢ ᱫᱚ ᱛᱟᱸᱦᱮᱸ ᱠᱟᱱᱟ ᱟᱭᱳ ᱪᱷᱤᱛᱟᱹ ᱢᱩᱨᱢᱩ

ᱥᱮᱪᱮᱫ ᱮᱛᱚᱦᱚᱵ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱚᱢᱠᱮ ᱛᱤᱠᱤᱱ ᱯᱩᱭᱞᱩ ᱥᱮᱪᱮᱫ ᱫᱚ ᱟᱹᱛᱩ ᱟᱥᱲᱟ ᱠᱷᱚᱱ ᱜᱮᱠᱤᱱ ᱮᱦᱚᱵ ᱞᱮᱜᱼᱟ ᱾ ᱪᱮᱛᱟᱱ ᱫᱷᱟᱯ ᱥᱮᱪᱮᱫ ᱛᱟᱞᱢᱟ ᱪᱟᱱᱚᱪ ᱤᱛᱩᱱᱚᱜ ᱞᱟᱹᱜᱤᱱᱛᱮᱫᱚ ᱞᱩᱯᱩᱝ ᱜᱷᱩᱴᱩ ᱪᱟᱸᱭᱵᱟᱥᱟ ᱨᱮ ᱢᱮᱱᱟᱜ ᱟᱠᱟᱫ ᱥᱚᱸᱛ ᱡᱟᱵᱤᱭᱚᱨ ᱛᱟᱱᱟᱞᱟ ᱟᱥᱲᱟ ᱠᱷᱚᱱ ᱛᱟᱱᱟᱞᱟ ᱪᱟᱱᱚᱪ [Matric] ᱫᱚᱠᱤᱱ ᱥᱟᱹᱛ ᱞᱮᱜᱼᱟ ᱾ ᱤᱱᱟᱹ ᱛᱟᱭᱚᱢ ᱛᱮ ᱞᱟᱞᱟ ᱵᱟᱦᱟᱫᱩᱨ ᱥᱟᱥᱛᱨᱤ ᱢᱮᱢᱚᱨᱤᱭᱟᱞ ᱠᱚᱞᱮᱡ ᱠᱷᱚᱱ ᱵᱟᱹᱱᱤᱡ ᱫᱟᱹᱨ ᱛᱮ [I.Com] ᱛᱮ ᱜᱮᱼᱵᱟᱨ ᱪᱟᱱᱚᱪ ᱠᱤᱱ ᱥᱟᱹᱛ ᱠᱮᱫ ᱥᱟᱸᱣᱛᱮ [B.Com] ᱫᱚ ᱠᱚᱼᱚᱯᱚᱨᱮᱴᱤᱵ ᱠᱚᱞᱮᱡ, ᱡᱟᱢᱥᱮᱫᱯᱩᱨ ᱠᱷᱚᱱ ᱟᱨ [M.Com] ᱮᱢᱹᱠᱚᱢ ᱫᱚ ᱨᱟᱹᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱤᱱ ᱥᱟᱹᱛ ᱞᱮᱫ ᱛᱟᱸᱦᱮᱱ ᱾ ᱤᱱᱟᱹ ᱛᱟᱭᱚᱢ ᱩᱠᱤᱞᱟᱹᱛᱤ ᱫᱚ ᱥᱚᱢᱵᱚᱞᱯᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱮᱞᱹᱮᱞᱹᱵᱤ [LLB] ᱠᱤᱱ ᱥᱟᱹᱛ ᱠᱮᱜᱼᱟ ᱾ ᱟᱨᱦᱚᱸ ᱟᱭᱢᱟ ᱜᱮᱭᱟᱱ ᱟᱨᱡᱟᱣ ᱞᱟᱹᱜᱤᱱᱛᱮ ᱜᱚᱢᱠᱮ ᱛᱤᱠᱤᱱ ᱫᱚ ᱥᱤᱧᱚᱛ ᱟᱨ ᱵᱤᱫᱮᱥ ᱠᱚᱨᱮᱱᱟᱜ ᱧᱩᱛᱩᱢᱟᱱ ᱥᱮᱪᱮᱫ ᱴᱷᱟᱸᱣ ᱠᱚᱨᱮ ᱠᱷᱚᱱ ᱟᱭᱢᱟ ᱥᱟᱛᱟᱢ ᱪᱮᱛᱟᱱ ᱨᱮ ᱡᱮᱞᱮᱠᱼ ᱵᱤᱡᱤᱱᱮᱥ ᱢᱮᱱᱮᱡᱢᱮᱱᱴ, ᱯᱨᱚᱥᱟᱥᱚᱠᱤᱭᱚ ᱯᱨᱚᱵᱚᱱᱫᱷᱚᱱ ᱜᱨᱟᱢᱤᱬ ᱵᱤᱠᱟᱥ ᱥᱟᱸᱣ ᱟᱭᱢᱟ ᱥᱟᱛᱟᱢ ᱪᱮᱛᱟᱱ ᱨᱮ ᱥᱮᱪᱮᱫ ᱥᱮᱪᱮᱫ ᱠᱷᱚᱱᱫᱽᱨᱚᱫ ᱠᱤᱱ ᱥᱟᱯᱲᱟᱣ ᱞᱮᱜᱼᱟ ᱾ ᱱᱟᱱᱟ ᱦᱩᱱᱟᱹᱨ ᱥᱟᱛᱟᱢ ᱪᱮᱛᱟᱱ ᱨᱮ ᱟᱹᱠᱤᱞ ᱟᱨᱡᱟᱣ ᱥᱟᱸᱣ ᱠᱷᱚᱱᱫᱽᱨᱚᱫ ᱞᱟᱹᱜᱤᱱᱛᱮ ᱵᱟᱦᱟᱨᱮ ᱫᱤᱥᱚᱢ ᱞᱮᱠᱟᱛᱮ ᱤᱝᱞᱚᱸᱰ, ᱯᱷᱨᱟᱸᱥ, ᱡᱚᱨᱢᱟᱱᱤ, ᱵᱮᱞᱡᱤᱭᱚᱝ, ᱰᱮᱱᱢᱟᱨᱠ, ᱚᱥᱴᱨᱮᱞᱤᱭᱟ, ᱥᱟᱸᱣ ᱟᱭᱢᱟ ᱫᱤᱥᱚᱢ ᱠᱤᱱ ᱫᱟᱬᱟ ᱞᱮᱜᱼᱟ ᱾

ᱪᱟᱹᱠᱨᱤ ᱟᱨ ᱨᱟᱡᱽᱼᱟᱹᱨᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

    ᱚᱞ ᱯᱟᱲᱦᱟᱣ ᱥᱟᱹᱛᱮᱱ ᱛᱟᱭᱚᱢ ᱥᱚᱨᱚᱠᱟᱨᱤ ᱟᱨ ᱵᱤᱱ ᱥᱚᱨᱚᱠᱟᱨᱤ ᱴᱷᱟᱸᱣ ᱠᱚᱨᱮ ᱡᱮᱞᱮᱠᱼ ᱮᱞᱹᱟᱤᱹᱥᱤ, ᱴᱟᱴᱟ ᱥᱴᱤᱞ ᱞᱤᱢᱤᱴᱮᱰ, ᱢᱤᱱᱮᱨᱟᱞ ᱮᱸᱰ ᱢᱮᱴᱟᱞ ᱴᱨᱮᱰᱤᱝ ᱠᱚᱨᱯᱚᱨᱮᱥᱚᱱ ᱚᱯ ᱤᱱᱰᱤᱭᱟ ᱞᱮᱠᱟᱱ ᱧᱩᱛᱩᱢᱟᱱ ᱴᱷᱟᱸᱣ ᱠᱚᱨᱮ ᱵᱟᱼᱜᱮ [᱒᱐] ᱥᱟᱞ ᱜᱟᱱ ᱢᱟᱨᱟᱝ ᱢᱟᱹᱱ ᱟᱱᱟᱜ ᱯᱚᱫ ᱠᱚᱨᱮ ᱠᱤᱱ ᱠᱟᱹᱢᱤ ᱟᱹᱜᱩ ᱞᱮᱜᱼᱟ ᱾ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱡᱤᱣᱤ ᱜᱷᱟᱸᱭ ᱥᱩᱫᱷᱟᱹᱨ ᱥᱟᱸᱣᱛᱮ ᱥᱟᱱᱟᱢ ᱞᱮᱠᱟᱱᱟᱜ ᱦᱚᱠᱼᱟᱹᱭᱫᱟᱹᱨ ᱵᱟᱧᱪᱟᱣ ᱞᱟᱹᱜᱤᱱᱛᱮ ᱜᱷᱟᱱ ᱟᱹᱠᱤᱱ ᱫᱚ ᱨᱟᱡᱽᱼᱟᱹᱨᱤ ᱜᱮ ᱢᱟᱨᱟᱝ ᱫᱷᱚᱱ ᱢᱮᱱᱛᱮ ᱠᱤᱱ ᱢᱚᱱᱮᱭᱟ ᱾ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱦᱚᱠᱼᱟᱹᱭᱫᱟᱹᱨ ᱡᱟᱭ ᱡᱩᱜ ᱡᱤᱭᱟᱹᱲ ᱵᱟᱧᱪᱟᱣ ᱫᱤᱥᱟᱹ ᱠᱟᱛᱮ ᱜᱚᱢᱠᱮ ᱛᱤᱠᱤᱱ ᱫᱚ ᱟᱭᱢᱟ ᱨᱟᱡᱽᱼᱟᱹᱨᱤ ᱜᱟᱸᱣᱛᱟ ᱥᱟᱸᱣ ᱡᱚᱲᱟᱣ ᱠᱤᱱ ᱛᱟᱸᱦᱮ ᱞᱮᱱᱟ ᱾ ᱚᱱᱟ ᱠᱚ ᱢᱩᱫ ᱠᱚᱨᱮ ᱠᱷᱚᱱ ᱵᱷᱟᱨᱚᱛᱤᱭᱚ ᱡᱷᱟᱨᱠᱷᱚᱸᱰ ᱯᱟᱨᱴᱤ, ᱡᱷᱟᱨᱠᱷᱚᱸᱰ ᱞᱤᱵᱮᱨᱮᱥᱚᱱ ᱯᱷᱨᱟᱸᱴ, ᱡᱚᱱᱛᱟ ᱫᱚᱲ, ᱵᱷᱟᱨᱚᱛᱤᱭᱚ ᱡᱚᱱᱛᱟ ᱯᱟᱨᱴᱤ ᱟᱨ ᱠᱚᱝᱜᱨᱮᱥ ᱞᱮᱠᱟᱱ ᱨᱟᱡᱽᱼᱟᱹᱨᱤ ᱜᱟᱸᱣᱛᱟ ᱥᱟᱸᱣ ᱡᱚᱯᱚᱲᱟᱣ ᱨᱮᱠᱤᱱ ᱛᱟᱸᱦᱮᱸ ᱠᱟᱱᱟ ᱾ ᱚᱱᱟ ᱥᱟᱸᱣ ᱵᱤᱱ ᱨᱟᱡᱽᱼᱟᱹᱨᱤ ᱥᱟᱸᱣᱛᱟᱹᱨᱤ ᱜᱟᱸᱣᱛᱟ ᱡᱷᱟᱨᱠᱷᱚᱱᱰ ᱵᱤᱪᱟᱨ ᱢᱚᱱᱪ, ᱡᱷᱟᱨᱠᱷᱚᱱᱰ ᱥᱚᱢᱚᱱᱭᱚ ᱥᱚᱢᱤᱛᱤ, ᱟᱫᱤᱵᱟᱹᱥᱤ ᱡᱷᱟᱨᱠᱷᱚᱱᱰ ᱡᱚᱱᱟᱫᱷᱤᱠᱟᱨ ᱢᱚᱱᱪ, ᱟᱹᱫᱤᱵᱟᱹᱥᱤ ᱚᱫᱷᱤᱠᱟᱨ ᱢᱚᱨᱪᱟ, ᱱᱚᱣᱟ ᱞᱮᱠᱟᱱ ᱢᱟᱨᱟᱝ ᱧᱩᱛᱩᱢᱟᱱ ᱥᱟᱸᱣᱛᱟᱹᱨᱤ ᱜᱟᱸᱣᱛᱟ ᱠᱚ ᱛᱩᱞᱩᱡ ᱡᱚᱯᱚᱲᱟᱣ ᱠᱤᱱ ᱛᱟᱸᱦᱮᱭᱟ ᱾ ᱜᱚᱢᱠᱮ ᱛᱤᱠᱤᱱ ᱫᱤ ᱡᱷᱟᱨᱠᱷᱚᱱᱰ ᱧᱩᱛᱩᱢᱟᱱ ᱜᱟᱸᱣᱛᱟ ᱥᱟᱣᱸ ᱵᱟᱹᱲᱛᱤ ᱡᱚᱯᱚᱲᱟᱣ ᱠᱤᱱ ᱛᱟᱸᱦᱮᱹ ᱠᱟᱱᱟ ᱪᱮᱫᱟᱜ ᱥᱮ, ᱜᱚᱢᱠᱮ ᱛᱤᱠᱤᱱ ᱫᱚ ᱵᱟᱹᱲᱛᱤ ᱡᱷᱟᱨᱠᱷᱚᱱᱰ ᱠᱤᱱ ᱜᱚᱨᱚᱡᱟᱜᱼᱟ ᱾

ᱥᱟᱸᱣᱛᱟ ᱞᱟᱹᱜᱤᱱᱛᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

     ᱱᱤᱛ ᱦᱟᱹᱞᱤ ᱜᱚᱢᱠᱮ ᱢᱩᱨᱢᱩ ᱛᱤᱠᱤᱱ ᱫᱚ, ᱥᱤᱧᱚᱛ ᱫᱤᱥᱚᱢ ᱨᱮ ᱪᱟᱹᱞᱩᱣᱟᱠᱟᱱ ᱥᱟᱱᱛᱟᱲᱤ ᱥᱮᱪᱮᱫ ᱢᱟᱰᱣᱟ ᱡᱟᱸᱦᱟᱸ ᱫᱚ 'ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱥᱮᱪᱮᱫ ᱢᱟᱰᱣᱟ' [AISEC] ᱨᱤᱱᱤᱡ ᱪᱮᱭᱟᱨᱢᱮᱱ ᱞᱮᱠᱟᱛᱮ ᱱᱤᱛᱚᱜ ᱢᱮᱱᱟᱜ ᱠᱤᱱᱟ ᱾ ᱚᱱᱟ ᱥᱟᱸᱣᱛᱮ ᱵᱷᱟᱨᱚᱛ ᱥᱚᱨᱠᱟᱨᱟᱜ ᱜᱮᱼᱢᱤᱫ ᱟᱱᱟᱜ ᱢᱚᱬᱮ ᱥᱮᱨᱢᱟ ᱠᱤᱭᱟᱹ ᱡᱚᱡᱚᱱᱟ ᱟᱭᱚᱜ [᱒᱐᱐᱗ᱼ᱒᱐᱑᱒] ᱦᱟᱹᱵᱤᱡ ᱟᱹᱫᱤᱵᱟᱹᱥᱤ ᱵᱷᱟᱜ [Tribal Department] ᱨᱤᱱᱤᱡ ᱥᱚᱦᱮᱫ ᱞᱮᱠᱟᱛᱮᱠᱤᱱ ᱛᱟᱸᱦᱮᱸ ᱠᱟᱱᱟ ᱾ ᱑᱙᱙᱘ ᱠᱷᱚᱱ ᱒᱐᱐᱔ ᱥᱟᱞ ᱫᱷᱟᱹᱨᱤᱡ ᱵᱟᱼᱜᱮ ᱟᱨ ᱯᱮᱼᱜᱮ ᱞᱚᱠᱥᱚᱵᱷᱟ ᱥᱟᱝᱥᱚᱫ [12-13 Loksabha] ᱞᱮᱠᱟᱛᱮᱦᱚᱸ ᱠᱤᱱ ᱛᱟᱸᱦᱮᱸ ᱞᱮᱱᱟ ᱾ ᱟᱹᱠᱤᱱ ᱥᱟᱝᱥᱚᱫ ᱛᱟᱸᱦᱮᱸᱠᱟᱱ ᱚᱠᱛᱚ ᱨᱮ ᱟᱹᱠᱤᱱᱟᱜ ᱠᱮᱴᱮᱡ ᱠᱩᱴᱱᱤᱛᱤ ᱥᱟᱸᱣ ᱫᱤᱥᱚᱢ ᱦᱚᱲ ᱠᱚᱣᱟᱜ ᱜᱚᱲᱚ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱥᱤᱧᱚᱛ ᱥᱚᱢᱵᱤᱫᱷᱟᱱ ᱨᱮᱭᱟᱜ ᱤᱨᱟᱹᱞ ᱫᱷᱟᱯ ᱨᱮ ᱤᱝᱨᱟᱹᱡᱤ ᱢᱟᱹᱦᱤᱛ ᱒᱒ᱼ᱑᱒ᱼ᱒᱐᱐᱓ ᱦᱤᱞᱚᱜ ᱠᱤᱱ ᱟᱝᱜᱚᱪ ᱚᱪᱚ ᱠᱮᱜᱼᱟ ᱾ ᱡᱟᱸᱦᱟᱸ ᱫᱟᱨᱟᱭ ᱛᱮ ᱛᱮᱦᱮᱧ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱤᱥᱚᱢ ᱛᱟᱞᱟ ᱨᱮ ᱪᱷᱟᱨᱟᱣ ᱟᱠᱟᱱᱟ ᱾ ᱱᱤᱛᱚᱜ ᱚᱱᱠᱟ ᱜᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱡᱤᱛᱠᱟᱹᱨᱮᱱ ᱞᱮᱠᱟ, ᱥᱟᱨᱱᱟ ᱫᱷᱚᱨᱚᱢ ᱥᱚᱨᱚᱠᱟᱨᱤ ᱢᱟᱱᱚᱛ, ᱟᱞᱟᱜ ᱫᱷᱚᱨᱚᱢ ᱠᱚᱰ ᱠᱚᱞᱚᱢ ᱞᱟᱹᱜᱤᱱᱛᱮ ᱦᱩᱞᱥᱟᱹᱭ ᱠᱟᱹᱢᱤᱦᱚᱨᱟ ᱠᱤᱱ ᱥᱟᱵ ᱨᱟᱠᱟᱵ ᱟᱠᱟᱫᱼᱟ ᱾ ᱜᱚᱢᱠᱮ ᱥᱟᱞᱠᱷᱟᱱ ᱢᱩᱨᱢᱩ ᱛᱤᱠᱤᱱᱟᱜ ᱟᱹᱭᱩᱨ ᱛᱮᱜᱮ, ᱤᱝᱨᱟᱹᱡᱤ ᱢᱟᱹᱦᱤᱛ ᱐᱖ᱼ᱐᱔ᱼ᱒᱐᱐᱔ ᱦᱤᱞᱚᱜ ᱵᱤᱨ ᱥᱤᱫᱚ ᱢᱩᱨᱢᱩ ᱠᱟᱹᱱᱦᱩ ᱢᱩᱨᱢᱩ ᱛᱤᱠᱤᱱᱟᱜ ᱧᱩᱛᱩᱢ ᱪᱤᱛᱟᱹᱨ ᱥᱤᱧᱚᱛ ᱰᱟᱠ ᱴᱤᱠᱚᱴ ᱨᱮ ᱥᱚᱨᱠᱞᱟᱨ ᱴᱷᱟᱸᱣ ᱮ ᱮᱢᱟᱫᱼᱟ ᱾ ᱱᱤᱛ ᱦᱟᱹᱞᱤ ᱜᱚᱢᱠᱮ ᱥᱟᱞᱠᱷᱟᱱ ᱢᱩᱨᱢᱩ ᱛᱤᱠᱤᱱ ᱫᱚ, ᱥᱤᱧᱚᱛ ᱨᱮᱭᱟᱜ ᱮᱭᱟᱭ ᱯᱚᱱᱚᱛ ᱨᱤᱱ ᱟᱹᱫᱤᱵᱟᱹᱥᱤ ᱠᱚ ᱡᱩᱢᱤᱫ ᱠᱟᱛᱮᱱ ᱡᱤᱛᱠᱟᱹᱨ ᱠᱚ ᱞᱟᱹᱜᱤᱱᱛᱮ ᱟᱹᱫᱤᱵᱟᱹᱥᱤ ᱥᱮᱝᱜᱮᱞ ᱚᱵᱷᱤᱭᱟᱱ ᱟᱨ ᱡᱷᱟᱨᱠᱷᱚᱱᱰ ᱫᱤᱥᱚᱢ ᱯᱟᱨᱴᱤ ᱨᱤᱱᱤᱡ ᱢᱩᱬᱩᱛ ᱥᱩᱛᱨᱮᱛ ᱞᱮᱠᱟᱛᱮ ᱢᱮᱱᱟᱜ ᱠᱤᱱᱟ ᱾ ᱱᱚᱝᱠᱟ ᱜᱮ ᱜᱚᱢᱠᱮ ᱥᱟᱞᱠᱷᱟᱱ ᱢᱩᱨᱢᱩ ᱛᱤᱠᱤᱱ ᱫᱚ ᱟᱵᱚ ᱥᱚᱢᱟᱡ ᱞᱟᱜᱤᱱᱛᱮ ᱟᱹᱰᱤ ᱟᱭᱢᱟ ᱜᱚᱱᱚᱝ ᱟᱱᱟᱜ ᱮᱱᱮᱢ ᱠᱤᱱ ᱪᱟᱞ ᱟᱠᱟᱣᱟ ᱠᱟᱫ ᱵᱚᱱᱟ ᱾ ᱟᱜᱟᱢ ᱞᱟᱹᱜᱤᱱᱛᱮ ᱜᱚᱢᱠᱮ ᱢᱩᱨᱢᱩ ᱛᱤᱠᱤᱱ ᱴᱷᱮᱱ ᱠᱦᱚᱱ ᱥᱟᱱᱛᱟᱲ ᱥᱚᱢᱟᱡ ᱟᱨᱦᱚᱸᱭ ᱟᱥᱟᱜ ᱠᱟᱱᱟ, ᱱᱚᱝᱠᱟ ᱜᱚᱱᱚᱝ ᱟᱱᱟᱜ ᱮᱱᱮᱢ ᱟᱨᱦᱚᱸᱭ ᱪᱟᱞ ᱟᱵᱚᱱ ᱢᱟ ᱟᱵᱚᱠᱚ ᱛᱞᱟ ᱛᱮ ᱾