ᱥᱤᱫᱚ ᱟᱨ ᱠᱟᱹᱱᱦᱩ ᱢᱩᱨᱢᱩ
| ᱥᱤᱫᱚ ᱟᱨ ᱠᱟᱹᱱᱦᱩ ᱢᱩᱨᱢᱩ | |
|---|---|
 | |
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱑᱘᱒᱕ (ᱠᱟᱹᱱᱦᱩ) |
ᱥᱤᱫᱚ ᱢᱩᱨᱢᱩ ᱟᱨ ᱠᱟᱹᱱᱦᱩ ᱢᱩᱨᱢᱩ ᱥᱟᱱᱛᱟᱲ ᱦᱩᱞ ᱨᱤᱱ ᱢᱩᱬ ᱟᱹᱭᱩᱨᱤᱭᱟᱹ ᱠᱟᱱᱟ ᱠᱤᱱ ᱾ ᱱᱩᱠᱤᱱ ᱫᱚ ᱪᱩᱱᱩ ᱢᱩᱨᱢᱩ ᱨᱤᱱ ᱦᱚᱯᱚᱱ ᱠᱟᱱᱟ ᱠᱤᱱ ᱾ ᱡᱟᱱᱟᱢ ᱟ.ᱛᱩ ᱫᱚ ᱵᱤᱦᱟᱨ ᱯᱚᱱᱚᱛ ᱨᱮᱱᱟᱜ ᱥᱟᱱᱛᱟᱲ ᱯᱟᱨᱜᱟᱱᱟ ᱦᱚᱱᱚᱛ ᱨᱮ ᱢᱮᱱᱟᱜ ᱵᱷᱚᱜᱽᱱᱟᱰᱤ ᱟᱹᱛᱩ ᱾ ᱥᱤᱫᱚ ᱫᱚ ᱑᱘᱒᱕ ᱥᱟᱞ ᱨᱮᱭ ᱡᱟᱱᱟᱢ ᱞᱮᱱᱟ ᱟᱨ ᱦᱩᱞ ᱚᱠᱛᱮ ᱩᱱᱤᱭᱟᱜ ᱩᱢᱮᱨ ᱫᱚ ᱓᱐ ᱵᱚᱪᱷᱚᱨ ᱞᱮᱠᱟ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱡᱩᱣᱟᱹᱱ ᱠᱚᱲᱟ ᱠᱟᱱᱟᱭ᱾ ᱧᱮᱞᱚᱜ ᱛᱮ ᱟᱹᱰᱤ ᱰᱟᱴᱢᱟᱴ ᱮ ᱛᱟᱦᱮᱸ ᱠᱟᱱᱟ ᱾ ᱦᱩᱰᱤᱧ ᱢᱟᱨᱟᱝ ᱡᱚᱛᱚ ᱠᱚ ᱛᱩᱞᱩᱡ ᱜᱮ ᱟᱹᱰᱤ ᱱᱟᱯᱟᱭ ᱫᱩᱞᱟᱹᱲ ᱵᱮᱵᱷᱟᱨ ᱛᱟᱦᱮᱸ ᱠᱟᱱ ᱛᱟᱭᱟ ᱾
ᱵᱚᱭᱦᱟ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱡᱤᱡ ᱵᱚᱭᱦᱟ ᱠᱟᱹᱱᱦᱩ ᱫᱚ ᱟᱹᱠᱤᱱ ᱧᱮᱧᱮᱞ ᱠᱚ ᱦᱤᱡᱩᱜ ᱠᱟᱱ ᱡᱚᱛᱚ ᱜᱮ ᱠᱤᱱ ᱥᱟᱨᱦᱟᱣ ᱟᱠᱚ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱠᱷᱟᱸᱰᱟ ᱵᱷᱟᱱᱰᱟ ᱠᱚ ᱥᱟᱯᱲᱟᱣ ᱡᱚᱝ ᱟᱨ ᱦᱩᱞᱩᱧ ᱠᱚ ᱧᱮᱞ ᱦᱚᱲ ᱾ ᱞᱟᱹᱭ ᱟᱠᱚ ᱠᱟᱱ ᱛᱟᱦᱮᱸ ᱠᱟᱱᱟ ᱠᱤᱱ ᱵᱟᱝ ᱢᱟ ᱪᱮᱫ ᱞᱮᱠᱟ ᱡᱟᱦᱮᱨ ᱮᱨᱟ ᱫᱚ ᱧᱤᱫᱟᱹᱭ ᱦᱚᱦᱚ ᱵᱮᱨᱮᱫ ᱠᱮᱫ ᱠᱤᱱᱟ ᱟᱨ ᱧᱩᱛᱩᱢ ᱧᱩᱢ ᱠᱟᱛᱮᱭ ᱦᱚᱦᱚᱣᱟᱫ ᱠᱤᱱᱟ ᱟᱨᱮ ᱢᱮᱛᱟᱫ ᱠᱤᱱᱟ - ᱤᱧ ᱫᱚᱧ ᱡᱟᱦᱮᱨ ᱮᱨᱟ ᱠᱟᱱᱟ ᱾ ᱦᱚᱲ ᱦᱚᱯᱚᱱ ᱨᱮᱱ ᱛᱩᱛᱩᱱᱠᱷᱤᱭᱤᱡ ᱠᱟᱹᱱᱟᱹᱧ ᱾ ᱟᱹᱰᱤ ᱵᱟᱹᱲᱤᱡ ᱦᱟᱨᱠᱮᱛ ᱥᱟᱥᱮᱛ ᱟᱯᱮ ᱥᱟᱢᱟᱝ ᱨᱮ ᱢᱮᱱᱟᱜᱼᱟ ᱾ ᱟᱹᱵᱤᱱ ᱫᱚ ᱩᱱᱠᱩ ᱨᱮᱱ ᱵᱚᱦᱚᱜ ᱠᱤᱱ ᱤᱧ ᱫᱚᱦᱚᱣᱟᱫ ᱵᱤᱱᱟ ᱾ ᱟᱨ ᱚᱱᱟ ᱨᱮᱭᱟᱜ ᱪᱤᱱᱦᱟᱹᱧ ᱮᱢᱟᱫ ᱵᱤᱱᱟ ᱟᱨ ᱚᱱᱟ ᱵᱤᱱ ᱧᱟᱢ ᱞᱮᱠᱷᱟᱱ ᱵᱩᱡᱷᱟᱹᱣ ᱵᱤᱱ ᱞᱟᱹᱲᱦᱟᱹᱭ ᱚᱠᱛᱮ ᱫᱚ ᱥᱮᱴᱮᱨ ᱟᱠᱟᱱ ᱛᱟᱹᱵᱤᱱᱟ ᱾ ᱚᱱᱠᱟ ᱞᱮᱠᱟ ᱡᱟᱦᱮᱨ ᱮᱨᱟ ᱫᱚ ᱮᱭᱟᱭ ᱫᱷᱟᱣ , ᱮᱭᱟᱜ ᱨᱩᱯ ᱛᱮ ᱩᱱᱠᱤᱱ ᱴᱷᱮᱱ ᱮ ᱚᱯᱮᱞ ᱞᱮᱱᱟ ᱾ ᱯᱟᱹᱦᱤᱞ ᱫᱷᱟᱣ ᱫᱚ ᱥᱮᱨᱢᱟ ᱠᱷᱚᱱ ᱟᱬᱜᱚᱱ ᱠᱟᱱ ᱨᱤᱢᱤᱞ ᱢᱩᱴᱷᱟᱹᱱ ᱛᱮ, ᱫᱚᱥᱟᱨ ᱫᱷᱟᱣ ᱫᱚ ᱴᱩᱴᱩᱨᱤ ᱟᱠᱟᱱ ᱟᱨ ᱢᱮᱫᱦᱟ ᱫᱚ — ᱠᱩᱦᱲᱟᱹ ᱛᱮ ᱴᱚᱯᱟᱨ ᱟᱠᱟᱱ ᱞᱮᱠᱟᱛᱮ, ᱯᱩᱱᱟᱜ ᱫᱷᱟᱣ ᱫᱚ ᱡᱷᱚᱞ ᱡᱷᱚᱞ ᱥᱤᱛᱩᱝ ᱨᱮ ᱢᱤᱫᱴᱟᱹᱝ ᱩᱢᱩᱞ ᱞᱮᱠᱟᱛᱮ, ᱢᱚᱬᱮᱭᱟᱜ ᱫᱷᱟᱣ ᱫᱚ ᱚᱛ ᱠᱷᱚᱱ ᱯᱷᱩᱴᱟᱹᱜ ᱛᱩᱫ ᱮᱱ ᱵᱩᱨᱩ ᱞᱮᱠᱟ, ᱛᱩᱨᱩᱭ ᱟᱜ ᱫᱷᱟᱣ ᱫᱚ ᱵᱤᱞᱟᱹᱱ ᱴᱟ:ᱰᱤ ᱨᱮ ᱚᱢᱚᱱ ᱨᱟᱠᱟᱵ ᱜᱚᱫ ᱮᱱ ᱥᱟᱨᱡᱚᱢ ᱫᱟᱨᱮ ᱞᱮᱠᱟ ᱟᱨ ᱢᱩᱪᱟᱹᱫ ᱫᱷᱟᱣ ᱨᱮ ᱫᱚ ᱥᱟᱱᱛᱟᱲ ᱞᱮᱠᱟ ᱠᱟᱪᱟ ᱛᱮᱭ ᱰᱮᱸᱜᱟ ᱟᱠᱟᱱ ᱢᱤᱫᱴᱟᱹᱝ ᱯᱩᱸᱰ ᱦᱚᱲ ᱨᱩᱯ ᱞᱮᱠᱟ ᱾ ᱱᱚᱝᱠᱟ ᱠᱟᱛᱷᱟ ᱠᱤᱱ ᱜᱟᱞᱢᱟᱨᱟᱣ ᱠᱟᱱ ᱛᱟᱦᱮᱸ ᱠᱟᱱ ᱨᱮᱜᱮ ᱯᱮ ᱦᱚᱲ ᱫᱚ ᱦᱮᱡ ᱠᱟᱛᱮ ᱠᱚ ᱢᱮᱱ ᱠᱮᱫᱼᱟ ᱵᱟᱝ ᱢᱟ ᱥᱟᱢ ᱯᱟᱨᱜᱟᱱᱟᱭ ᱠᱳᱞ ᱟᱠᱟᱫ ᱠᱚᱣᱟ ᱾ ᱠᱷᱚᱵᱚᱨ ᱮᱢᱟ ᱠᱚ ᱞᱟᱹᱜᱤᱫ ᱮᱱᱛᱮ ᱫᱚᱨᱚᱜᱟ ᱫᱚ ᱦᱟᱲᱢᱟ, ᱪᱟᱹᱢᱯᱟᱹᱭ, ᱞᱚᱠᱷᱚᱱ ᱟᱨ ᱜᱟᱹᱨᱵᱷᱩ ᱛᱮᱠᱚ ᱛᱚᱞ ᱠᱟᱛᱮ ᱵᱷᱟᱜᱚᱞᱯᱩᱨ ᱛᱮᱭ ᱤᱫᱤᱭᱮᱫ ᱠᱚᱣᱟ ᱟᱨ ᱛᱮᱦᱮᱧ ᱧᱤᱸᱫᱟ ᱫᱚ ᱵᱟᱰᱷᱮᱛ ᱨᱮᱠᱚ ᱰᱮᱨᱟᱜ ᱠᱟᱱᱟ ᱾ ᱠᱷᱚᱵᱚᱨ ᱧᱟᱢ ᱛᱚᱨᱟ ᱥᱤᱫᱚ ᱠᱟᱹᱱᱦᱩ ᱛᱤᱠᱤᱱ ᱫᱚ, ᱟᱹᱛᱩ – ᱟᱹᱛᱩ ᱠᱷᱚᱵᱚᱨ ᱠᱤᱱ ᱠᱳᱞ ᱠᱮᱫᱼᱟ, ᱡᱮᱢᱚᱱ ᱦᱚᱲ ᱫᱚ ᱠᱟᱹᱯᱤ ᱛᱟᱨᱣᱟᱲᱮ, ᱟᱜ – ᱥᱟᱨ ᱢᱩᱛᱟᱹᱠ ᱟᱱᱛᱮ ᱛᱟᱞᱟ ᱧᱤᱫᱟᱹ ᱵᱷᱤᱛᱨᱤ ᱛᱮ ᱯᱟᱸᱪᱠᱟᱹᱴᱷᱤᱭᱟᱹ ᱨᱮᱠᱚ ᱡᱟᱨᱣᱟᱜ ᱢᱟ, ᱮᱱᱛᱮ ᱚᱱᱟ ᱦᱚᱨ ᱛᱮᱜᱮ ᱫᱚᱨᱚᱜᱟ ᱫᱚ ᱱᱷᱟᱜ ᱠᱟᱹᱭᱫᱤᱭ ᱤᱫᱤ ᱠᱚᱣᱟ ᱾ ᱤᱱ ᱦᱤᱞᱚᱜ ᱥᱤᱫᱚ ᱫᱚ ᱠᱟᱹᱱᱦᱩ ᱟᱨ ᱟᱡ ᱥᱚᱸᱜᱮ ᱛᱮ ᱛᱤᱱᱟᱹᱝ ᱜᱟᱱ ᱦᱚᱲ ᱱᱤᱭᱟᱹᱛᱮ ᱞᱟᱦᱟ ᱨᱮᱜᱮ ᱯᱟᱸᱪᱠᱟᱹᱴᱷᱤᱭᱟ ᱛᱮᱭ ᱪᱟᱞᱟᱣ ᱞᱟᱦᱟ ᱮᱱᱟ ᱾ ᱤᱱᱟᱹ ᱠᱟᱛᱮ ᱫᱚᱨᱚᱜᱟ ᱟᱨ ᱠᱮᱱᱟᱨᱟᱢ ᱫᱚ ᱯᱤᱭᱟᱹᱝ ᱯᱤᱭᱟᱹᱝ ᱡᱚᱠᱷᱮᱡ ᱠᱟᱹᱭᱫᱤ ᱟᱱᱛᱮ ᱚᱸᱰᱮ ᱠᱤᱱ ᱥᱮᱴᱮᱨᱮᱱ ᱠᱷᱟᱱ ᱯᱷᱟᱹᱫᱽ ᱫᱚᱠᱚ ᱮᱥᱮᱫ ᱠᱮᱫ ᱠᱤᱱᱟ ᱾ ᱫᱚᱨᱚᱜᱟ ᱫᱚ ᱫᱷᱚᱢᱠᱟᱣ ᱟᱲᱟᱝ ᱛᱮ ᱵᱷᱟᱹᱭᱟᱹᱫᱽ ᱠᱤᱱᱮ ᱠᱩᱞᱤ ᱠᱮᱫ ᱠᱤᱱᱟ ᱚᱠᱚᱭ ᱦᱩᱠᱩᱢ ᱛᱮ ᱦᱚᱲ ᱵᱤᱱ ᱡᱟᱣᱨᱟ ᱟᱠᱟᱫ ᱠᱚᱣᱟ ᱟᱨ ᱟᱹᱵᱤᱱ ᱫᱚ ᱵᱤᱱ ᱚᱠᱚᱭ ᱠᱟᱱᱟ ᱾ ᱥᱤᱫᱚ ᱫᱚ ᱩᱱᱨᱮᱭ ᱡᱚᱵᱟᱵᱽ ᱞᱮᱫᱼᱟ - ᱤᱧ ᱫᱚᱧ ᱥᱤᱫᱚ ᱠᱟᱱᱟ ᱟᱨ ᱱᱚᱶᱟ ᱫᱚ ᱤᱧᱟᱜ ᱫᱤᱥᱚᱢ ᱠᱟᱱᱟ ᱾ ᱤᱧᱟᱜ ᱵᱮᱜᱚᱨ ᱦᱩᱠᱩᱢ ᱛᱮ ᱤᱧᱟᱜ ᱫᱤᱥᱚᱢ ᱠᱷᱚᱱ ᱢᱤᱫᱴᱟᱹᱝ ᱦᱚᱸ ᱦᱚᱲ ᱵᱟᱢ ᱥᱟᱵ ᱤᱫᱤ ᱫᱟᱲᱮ ᱟᱠᱚᱣᱟ ᱾ ᱱᱚᱝᱠᱟ ᱨᱮᱴᱮᱯᱮᱴᱮᱜ ᱛᱩᱞᱩᱡ ᱜᱮ ᱮᱫᱽᱨᱮ ᱟᱠᱟᱱ ᱦᱚᱲ ᱫᱚ ᱠᱟᱹᱭᱫᱤ ᱠᱚ ᱨᱟᱲᱟ ᱠᱮᱫ ᱠᱚᱣᱟ ᱟᱨ ᱠᱮᱱᱟᱨᱟᱢ ᱟᱨ ᱫᱚᱨᱚᱜᱟ ᱫᱚ ᱥᱟᱫᱚᱢ ᱠᱷᱚᱱ ᱠᱚ ᱚᱨ ᱯᱷᱮᱰ ᱠᱮᱫ ᱠᱤᱱᱟ ᱟᱨ ᱠᱚ ᱜᱚᱡ ᱠᱮᱫ ᱠᱤᱱᱟ ᱾ ᱤᱱᱟᱹ ᱛᱟᱭᱚᱢ ᱥᱤᱫᱚ ᱫᱚ ᱦᱩᱞ ᱮᱦᱚᱵ ᱮᱱᱟ ᱢᱮᱱᱛᱮᱭ ᱞᱟᱹᱭ ᱥᱟᱰᱮ ᱠᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱵᱷᱟᱹᱭᱟᱹᱫᱤ ᱠᱤᱱ ᱫᱚ ᱫᱩᱯᱲᱩᱵ ᱠᱤᱱ ᱦᱚᱦᱚ ᱠᱮᱫᱼᱟ ᱟᱨ ᱡᱚᱛᱚ ᱴᱚᱴᱷᱟ ᱠᱷᱚᱱ ᱦᱚᱲ ᱫᱚ ᱟᱯᱟᱱ ᱟᱹᱯᱤᱱ ᱯᱷᱟᱹᱫᱽ ᱟᱱᱛᱮ ᱩᱱᱠᱤᱱ ᱴᱷᱮᱱ ᱦᱤᱡᱩᱜ ᱠᱚ ᱮᱦᱚᱵ ᱮᱱᱟ ᱾ ᱥᱤᱫᱚ – ᱠᱟᱹᱱᱦᱩ ᱫᱚ ᱡᱚᱛᱚ ᱠᱤᱱ ᱧᱮᱞᱮᱫ ᱠᱚᱣᱟ ᱟᱨ ᱠᱟᱹᱢᱤ ᱠᱤᱱ ᱵᱷᱟᱹᱨᱭᱟᱹ ᱟᱠᱚ ᱠᱟᱱ ᱛᱟᱦᱮᱸᱫ ᱾
ᱜᱩᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱤᱫᱚ ᱫᱚ ᱟᱹᱰᱤ ᱠᱚᱢ ᱠᱟᱛᱷᱟᱭ ᱨᱚᱲᱮᱫ ᱛᱟᱦᱮᱸ ᱠᱟᱱᱟ ᱾ ᱠᱟᱹᱱᱦᱩ ᱟᱜ ᱠᱟᱛᱷᱟ ᱜᱮᱭ ᱥᱟᱹᱦᱤᱭᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱵᱟᱱᱟᱨ ᱵᱚᱭᱦᱟ ᱜᱮ ᱨᱟᱡᱽ ᱞᱮᱠᱟ ᱠᱤᱱ ᱛᱟᱦᱮᱸᱱ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱢᱚᱸᱡᱽ ᱠᱤᱪᱨᱤᱡ ᱠᱤᱱ ᱦᱚᱨᱚᱜ ᱱᱟᱫᱮᱭᱮᱫ ᱛᱟᱦᱮᱸ ᱠᱟᱱᱟ ᱾ ᱠᱟᱛᱷᱟ ᱠᱚ, ᱵᱮᱵᱷᱟᱨ ᱠᱚ ᱦᱚᱸ ᱨᱟᱡᱽ ᱞᱮᱠᱟ ᱜᱮ ᱛᱟᱦᱮᱸ ᱠᱟᱱ ᱛᱟᱹᱠᱤᱱᱟ ᱾ ᱩᱱᱠᱤᱱ ᱫᱚ ᱢᱤᱢᱤᱫ ᱴᱚᱴᱷᱟ ᱛᱮ ᱞᱟᱹᱲᱦᱟᱹᱭ ᱯᱷᱟᱹᱫᱽ ᱠᱤᱱ ᱠᱳᱞᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾ ᱪᱟᱞᱟᱜ ᱡᱚᱠᱷᱚᱱ ᱡᱟᱦᱟᱸ ᱟᱹᱛᱩ ᱨᱮᱜᱮ ᱠᱤᱱ ᱡᱤᱨᱟᱹᱣᱜ ᱠᱟᱱ ᱛᱟᱦᱮᱸᱫ ᱚᱸᱰᱮ ᱫᱚ ᱠᱚᱲᱟ – ᱠᱩᱲᱤ ᱠᱤᱱ ᱮᱱᱮᱡ ᱚᱪᱚ ᱠᱚᱣᱟ ᱾ ᱥᱤᱫᱚ ᱠᱟᱹᱱᱦᱩ ᱠᱤᱱ ᱢᱮᱱ ᱞᱮᱫᱼᱟ – ᱢᱤᱫ ᱪᱷᱟᱹᱛᱨᱤ ᱛᱤᱥ ᱵᱚᱱ ᱦᱩᱭᱩᱜᱼᱟ ᱩᱱ ᱟᱹᱱᱤᱡ ᱜᱮ ᱫᱤᱥᱚᱢ ᱫᱚ ᱥᱩᱞᱩᱠᱚᱜᱼᱟ ᱾ ᱠᱮᱱᱟᱨᱟᱢ ᱟᱨ ᱫᱚᱨᱚᱜᱟ ᱠᱚ ᱜᱚᱡ ᱠᱮᱫ ᱠᱤᱱ ᱛᱟᱭᱚᱢ ᱵᱟᱫᱷᱮᱛ ᱛᱟᱯᱚᱞ ᱨᱮᱱ ᱠᱚ ᱢᱟᱦᱟᱡᱚᱱ ᱠᱚ ᱫᱚ ᱢᱚᱡᱽ ᱫᱟᱢᱟᱱ ᱥᱟᱸᱫᱮᱥ ᱟᱛᱮ ᱥᱤᱫᱩ ᱠᱟᱹᱱᱦᱩ ᱛᱤᱠᱤᱱ ᱴᱷᱮᱱ ᱠᱚ ᱦᱮᱡ ᱮᱱᱟ, ᱟᱨ ᱡᱚᱲᱛᱤ ᱟᱛᱮ ᱠᱚ ᱱᱮᱦᱚᱸᱨ ᱮᱱᱟ ᱾ ᱟᱨ ᱠᱚ ᱟᱨᱚᱸᱡᱽ ᱮᱱᱟ ᱡᱮᱢᱚᱱ ᱡᱤᱣᱤ ᱫᱚ ᱵᱟᱧᱪᱟᱣᱜ ᱛᱟᱠᱚ, ᱟᱫᱚ ᱤᱠᱟᱹ ᱫᱚᱠᱚ ᱧᱟᱢ ᱠᱮᱫ ᱜᱮᱭᱟ, ᱢᱮᱱᱠᱷᱟᱱ ᱩᱱᱠᱩᱣᱟᱜ ᱦᱤᱥᱟᱹᱵᱽ ᱯᱩᱛᱷᱤ ᱟᱨ ᱮᱢᱟᱱ ᱛᱮᱭᱟᱜ, ᱫᱟᱹᱞᱤᱞ ᱠᱟᱜᱚᱡᱽ ᱫᱚᱠᱚ ᱡᱮᱨᱮᱫ ᱜᱤᱰᱤ ᱠᱮᱫ ᱛᱟᱠᱚᱣᱟ ᱟᱨ ᱩᱱᱠᱩᱣᱟᱜ ᱫᱷᱚᱱ ᱫᱩᱨᱤᱵᱽ ᱫᱚ ᱞᱟᱹᱲᱦᱟᱹᱭ ᱯᱷᱟᱹᱫᱽ ᱞᱟᱹᱜᱤᱫ ᱠᱷᱚᱨᱚᱪ ᱢᱮᱱᱛᱮ ᱠᱚ ᱮᱢ ᱚᱪᱚ ᱠᱮᱫ ᱠᱚᱣᱟ ᱾
ᱫᱚᱠᱷᱚᱞ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱤᱫᱚ - ᱠᱟᱹᱱᱦᱩ ᱫᱚ ᱨᱟᱡᱽ ᱢᱚᱦᱚᱞ ᱫᱚᱠᱷᱚᱞ ᱨᱮᱭᱟᱜ ᱟᱹᱰᱤ ᱠᱤᱱ ᱡᱤᱫᱽ ᱞᱮᱫᱼᱟ ᱟᱨ ᱯᱷᱟᱹᱫᱽ (ᱦᱤᱱ) ᱥᱟᱦᱮᱵᱽ ᱮ ᱰᱮᱨᱟᱭᱮ ᱠᱟᱱ ᱵᱟᱰᱟᱭ ᱠᱟᱛᱮ ᱦᱟᱯᱮ ᱛᱮᱠᱚ ᱨᱩᱣᱟᱹᱲ ᱮᱱᱟ ᱾ ᱮᱱᱛᱮ ᱥᱟᱢ ᱯᱟᱨᱜᱟᱱᱟ ᱦᱚᱛᱮᱛᱮ ᱦᱚᱲ ᱦᱚᱯᱚᱱ ᱫᱚ ᱦᱤᱱ ᱥᱟᱦᱮᱵᱽ ᱠᱚ ᱩᱨᱩᱢ ᱟᱠᱟᱫᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱩᱱᱤ ᱢᱮᱱᱟᱭ ᱛᱩᱞᱩᱡ ᱞᱩᱴ ᱟᱨ ᱞᱟᱹᱲᱦᱟᱹᱭ ᱫᱚ ᱵᱟᱠᱚ ᱨᱮᱵᱮᱱ ᱞᱮᱱᱟ ᱾ ᱛᱚᱵᱮ ᱑᱒ ᱡᱩᱞᱟᱭ ᱑᱘᱕᱕ (12th July,1855) ᱢᱟᱹᱦᱤᱛ ᱦᱤᱞᱚᱜ ᱥᱤᱫᱚ ᱫᱚ ᱯᱟᱠᱳᱲ ᱨᱮᱭᱟᱜ ᱨᱟᱡᱽ ᱚᱲᱟᱜ ᱟᱡ ᱨᱮᱱ - ᱯᱷᱟᱹᱫᱽ ᱠᱚ ᱟᱱᱛᱮᱭ ᱞᱩᱴ ᱠᱮᱫᱼᱟ ᱟᱨ ᱦᱚᱸ ᱢᱩᱨᱥᱤᱫᱟᱵᱟᱫᱽ ᱨᱮᱱ ᱢᱮᱡᱤᱥᱴᱨᱮᱴ ᱴᱩᱜᱩᱰ (Megistrate - Tugud) ᱫᱚ ᱒᱙ ᱜᱚᱴᱮᱡ ᱦᱟᱹᱛᱤ, ᱟᱹᱰᱤ ᱟᱭᱢᱟ ᱥᱟᱫᱚᱢ ᱟᱨ ᱵᱟᱨ ᱥᱟᱭ (᱒᱐᱐) ᱥᱤᱯᱟᱹᱦᱤ ᱟᱛᱮ ᱢᱚᱦᱮᱥᱯᱩᱨ ᱴᱚᱴᱷᱟᱨᱮ ᱦᱩᱞ ᱫᱚᱢᱲᱟᱣ ᱞᱟᱹᱜᱤᱫ - ᱮ ᱪᱟᱞᱟᱣ ᱞᱮᱱᱟ ᱾ ᱥᱤᱫᱚ ᱫᱚ ᱟᱡ ᱵᱚᱭᱦᱟ ᱛᱮᱠᱚ ᱥᱮᱞᱮᱫ ᱟᱡ ᱨᱤᱱ ᱯᱷᱟᱹᱫᱽ ᱟᱛᱮ ᱥᱤᱯᱟᱹᱦᱤ ᱠᱚ ᱥᱚᱸᱜᱮ ᱑᱕.᱗.᱑᱘᱕᱕ (25.07.1855) ᱦᱤᱞᱚᱜ ᱜᱷᱟᱴᱟ ᱢᱟᱹᱨᱠᱚ ᱞᱟᱹᱲᱦᱟᱹᱭ ᱮᱱᱟ ᱾ ᱥᱤᱫᱚ ᱨᱤᱱ ᱯᱷᱟᱹᱫᱽ ᱫᱚ ᱟᱹᱰᱤ ᱟᱭᱢᱟ ᱠᱚ ᱜᱚᱡ ᱮᱱᱟ ᱾ ᱛᱚᱵᱮ ᱚᱱᱟ ᱞᱟᱹᱲᱦᱟᱹᱭ ᱨᱮ ᱥᱤᱫᱚ ᱜᱮ ᱢᱩᱪᱟᱹᱫ ᱦᱚᱲ ᱫᱚᱭ ᱛᱟᱦᱮᱸ ᱠᱟᱱᱟ, ᱚᱱᱮ ᱚᱠᱟ ᱫᱚ ᱞᱟᱹᱲᱦᱟᱹᱭ ᱴᱷᱟ:ᱭ ᱮ ᱵᱟᱹᱜᱤ ᱟᱫ ᱛᱟᱦᱮᱸ ᱠᱟᱱᱟ ᱾ ᱥᱤᱫᱚ ᱠᱟᱹᱱᱦᱩ ᱫᱚ ᱨᱟᱡᱽ ᱞᱮᱠᱟ ᱠᱤᱱ ᱛᱟᱦᱮᱸ ᱠᱟᱱ ᱛᱟᱦᱮᱸ ᱠᱟᱱ ᱨᱮᱦᱚᱸ ᱥᱟᱜᱽᱨᱟᱢᱯᱩᱨ ᱞᱟᱹᱲᱦᱟᱹᱭ ᱨᱮ ᱫᱚ ᱠᱤᱱ ᱡᱩᱫᱟᱹᱭᱮᱱᱟ ᱾ ᱞᱟᱹᱲᱦᱟᱹᱭ ᱞᱮᱦᱟ ᱞᱤᱦᱤᱭᱮᱱ ᱠᱷᱟᱱ ᱠᱤᱱ ᱱᱚᱨᱚᱢ ᱮᱱᱟ ᱾ ᱨᱟᱡᱽ ᱫᱚᱨᱵᱟᱨ ᱨᱮᱭᱟᱜ ᱡᱟᱠ ᱡᱚᱢᱚᱠ ᱫᱚᱠᱤᱱ ᱫᱮᱭᱟ ᱜᱤᱰᱤ ᱠᱮᱫᱼᱟ ᱾ ᱮᱠᱷᱮᱱ ᱥᱮᱱᱟᱯᱟᱹᱛᱤ ᱴᱩᱯᱨᱤ ᱟᱨ ᱥᱚᱱᱟ ᱵᱟᱹᱡᱩ ᱯᱷᱤᱨᱤᱛᱮ ᱮᱴᱟᱜ ᱦᱚᱲ ᱠᱷᱚᱱ ᱫᱚ ᱵᱷᱮᱜᱟᱨ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱥᱤᱫᱚ ᱫᱚ ᱵᱷᱟᱪ ᱵᱷᱟᱪᱟᱣ ᱫᱚ ᱚᱠᱟᱭᱮᱱ ᱛᱟᱭ ᱪᱚ ᱾ ᱮᱱ ᱦᱤᱞᱚᱜ ᱛᱟᱨᱟᱥᱤᱧ ᱵᱮᱲᱟ ᱥᱤᱯᱟᱹᱦᱤ ᱠᱚ ᱥᱮᱴᱮᱨᱮᱱ ᱠᱷᱟᱱ ᱜᱮ ᱦᱩᱞᱟᱹᱥ ᱵᱷᱟᱸᱜᱟᱣ ᱮᱱᱟ ᱠᱤᱱ ᱟᱨ ᱵᱟᱹᱭᱨᱤ ᱠᱚ ᱥᱟᱺᱜᱤᱧ ᱨᱮᱠᱚ ᱛᱟᱦᱮᱸ ᱠᱟᱱ ᱨᱮ ᱡᱮᱞᱮᱠᱟ ᱱᱤᱦᱟᱹᱛ ᱜᱮᱠᱤᱱ ᱢᱮᱛᱟ ᱠᱚ ᱠᱟᱱ ᱛᱟᱦᱮᱸ ᱠᱟᱱᱟ, ᱚᱱᱠᱟ ᱟᱫᱚᱯ ᱫᱚ ᱥᱟᱱᱟᱢ ᱚᱴᱟᱝ ᱮᱱ ᱛᱟᱹᱠᱤᱱᱟ ᱱᱩᱠᱩ ᱯᱷᱟᱹᱫᱽ ᱚᱠᱚᱭ ᱛᱩᱞᱩᱡ ᱵᱷᱤᱲᱟᱣᱜ ᱦᱩᱭᱩᱜ ᱛᱟᱠᱚ, ᱩᱱᱠᱩ ᱫᱚ ᱵᱷᱟᱹᱭᱟᱫᱤ ᱠᱤᱱ ᱮᱠᱟᱞᱛᱮ ᱵᱟᱹᱠᱤᱱ ᱩᱨᱩᱢ ᱟᱠᱟᱫ ᱠᱚ ᱛᱟᱦᱮᱸ ᱠᱟᱱᱟ ᱾ ᱮᱱᱦᱚᱸ ᱞᱟᱦᱟ ᱠᱷᱚᱱ ᱜᱚᱴᱟᱣᱟᱠᱟᱫ ᱞᱮᱠᱟ ᱯᱷᱟᱹᱫᱽ ᱫᱚ ᱟᱭᱢᱟ ᱛᱷᱚᱠ ᱨᱮᱠᱤᱱ ᱦᱟᱹᱴᱤᱧ ᱠᱮᱫ ᱠᱚᱣᱟ ᱟᱨ ᱯᱟᱞᱴᱚᱱ ᱥᱚᱸᱜᱮ ᱠᱚ ᱞᱟᱹᱲᱦᱟᱹᱭ ᱮᱱᱟ ᱾ ᱚᱱᱠᱟᱛᱮ ᱥᱟᱜᱽᱨᱟᱢᱯᱩᱨ ᱨᱮᱭᱟᱜ ᱞᱟᱹᱲᱦᱟᱹᱭ ᱨᱮ ᱫᱚᱠᱚ ᱡᱤᱛᱠᱟᱹᱨ ᱮᱱᱟ ᱾ ᱥᱟᱜᱽᱨᱟᱢ ᱯᱩᱨ ᱨᱮᱭᱟᱜ ᱞᱟᱹᱲᱦᱟᱹᱭ ᱛᱟᱭᱚᱢ ᱥᱤᱫᱚ - ᱠᱟᱹᱱᱦᱩ ᱫᱚ ᱟᱹᱠᱤᱱ ᱨᱮᱱ ᱡᱚᱛᱚ ᱯᱷᱟᱹᱫᱽ ᱠᱚ ᱵᱟᱰᱷᱮᱫ ᱛᱮᱠᱤᱱ ᱟᱹᱜᱩ ᱥᱟᱢᱴᱟᱣ ᱠᱮᱫ ᱠᱚᱣᱟ ᱾ ᱚᱸᱰᱮ ᱞᱟᱹᱲᱦᱟᱹᱭ ᱟᱨ ᱵᱮᱡᱷᱟ ᱛᱩᱧ ᱠᱚ ᱦᱮᱣᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱟᱭᱢᱟ ᱯᱷᱟᱹᱫᱽ ᱠᱚ ᱛᱟᱦᱮᱸ ᱠᱟᱱᱛᱮ ᱡᱚᱢ ᱧᱩ ᱫᱚᱠᱚ ᱴᱟᱱᱴᱟᱭᱮᱱᱟ ᱾ ᱩᱱᱨᱮ ᱥᱤᱫᱚ ᱫᱚ ᱠᱮᱱᱟᱨᱟᱢ ᱵᱷᱚᱜᱚᱛ ᱨᱮᱱ ᱠᱟᱹᱢᱤᱭᱟᱹ ᱠᱚᱭ ᱥᱟᱵ ᱠᱮᱫ ᱠᱚᱣᱟ, ᱚᱠᱚᱭ ᱫᱚ ᱠᱩᱸᱵᱽᱲᱩ, ᱰᱟᱹᱠᱩ ᱟᱨ - ᱞᱩᱴᱯᱟᱴ ᱨᱮᱠᱚ ᱦᱮᱣᱟ ᱟᱠᱟᱱᱟ ᱾ ᱩᱱᱠᱩ ᱫᱚ ᱚᱱᱛᱮ ᱱᱚᱛᱮ ᱚᱰᱚᱠ ᱥᱮᱱ ᱠᱟᱛᱮ ᱩᱠᱩ ᱫᱚᱦᱚ ᱟᱠᱟᱫ ᱫᱟᱹᱞ, ᱪᱟᱣᱞᱮ, ᱮᱢᱟᱱ ᱨᱮᱭᱟᱜ ᱜᱚᱞᱟ ᱠᱚ ᱥᱮᱸᱫᱽᱨᱟ ᱧᱟᱢ ᱠᱮᱫᱼᱟ, ᱤᱱᱟᱹᱛᱮ ᱯᱷᱟᱹᱫᱽ ᱠᱚ ᱡᱚᱢᱟᱜ ᱠᱚ ᱧᱟᱢ ᱤᱫᱤ ᱠᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱯᱮᱭᱟᱞᱟᱯᱩᱨ ᱨᱮᱭᱟᱜ ᱞᱟᱹᱲᱦᱟᱹᱭ ᱨᱮᱦᱚᱸ ᱯᱷᱟᱹᱫᱽ ᱠᱤᱱ ᱥᱟᱯᱲᱟᱣ ᱤᱫᱤ ᱠᱮᱫ ᱠᱚᱣᱟ ᱟᱨ ᱜᱷᱟᱴᱟᱢᱟᱹᱨ ᱠᱚ ᱞᱟᱹᱲᱦᱟᱹᱭ ᱮᱱᱟ ᱾ ᱢᱮᱱᱠᱷᱟᱱ ᱚᱸᱰᱮ ᱫᱚ ᱯᱟᱹᱦᱤᱞ ᱯᱷᱟᱹᱫᱽ ᱟᱹᱜᱼᱭᱩᱨᱤᱡ ᱪᱟᱸᱫᱽᱨᱟᱭ ᱠᱚ ᱴᱷᱩ ᱵᱷᱤᱸᱫᱟᱹᱲ ᱠᱮᱫᱮ ᱠᱷᱟᱱ ᱟᱨ ᱠᱟᱹᱱᱦᱩ ᱦᱚᱸᱠᱚ ᱜᱷᱟᱹᱞ ᱠᱮᱫᱮ ᱠᱷᱟᱱ ᱥᱤᱫᱚ ᱫᱚᱭ ᱮᱫᱽᱨᱮ ᱥᱮᱸᱜᱮᱞ ᱮᱱᱟ ᱟᱨ ᱴᱩᱧ ᱜᱷᱩᱲᱤᱛᱮ, ᱢᱤᱫ ᱨᱤᱯᱤᱫ ᱨᱮ ᱦᱚᱭ ᱞᱮᱠᱟ ᱯᱟᱞᱴᱚᱱ ᱠᱚ ᱴᱷᱮᱱ ᱮ ᱧᱤᱨ ᱵᱤᱨᱟᱹᱣᱮᱱᱟ ᱾ ᱟᱪᱠᱟ ᱜᱮ ᱢᱤᱫᱴᱟᱹᱝ ᱜᱩᱞᱤᱛᱮ ᱥᱤᱫᱚ ᱫᱚᱭ ᱴᱩᱴᱤ ᱡᱚᱥ ᱮᱱᱟ ᱾ ᱛᱟᱨᱣᱟᱲᱮᱭ ᱥᱟᱵ ᱟᱠᱟᱫ ᱛᱟᱦᱮᱸ ᱠᱟᱱ ᱛᱤ ᱫᱚ ᱞᱟᱹᱵᱽᱲᱩᱡ ᱮᱱ ᱛᱟᱭᱟ, ᱫᱷᱟᱱ ᱢᱟᱱᱟᱶ ᱜᱚᱫ ᱮᱱᱟᱭ, ᱮᱱᱛᱮ ᱥᱳᱯᱳ ᱠᱚ ᱴᱩᱴᱤ ᱜᱮᱡᱮᱨ ᱠᱮᱫ ᱛᱟᱭᱟ ᱾ ᱥᱤᱫᱚ ᱫᱚ ᱛᱤᱨᱮ ᱜᱩᱞᱤ ᱵᱟᱡᱟᱣ ᱟᱫᱮᱛᱮ ᱨᱟᱹᱯᱩᱫ ᱮᱱ ᱛᱟᱭᱟ ᱟᱨ ᱟᱹᱰᱤ ᱢᱩᱥᱠᱤᱞ ᱨᱮᱭ ᱯᱟᱲᱟᱣ ᱮᱱᱟ ᱾ ᱠᱷᱟᱱ, ᱥᱤᱝᱨᱟᱹᱭ ᱟᱨ ᱵᱟᱨ ᱯᱮ ᱦᱚᱲ ᱫᱚ ᱯᱤᱯᱲᱟᱹ ᱛᱮᱠᱚ ᱟᱹᱛᱠᱤᱨ ᱤᱫᱤ ᱠᱮᱫᱮᱭᱟ ᱾ ᱢᱮᱱᱠᱷᱟᱱ ᱫᱤᱩ ᱮᱢᱟᱱ ᱦᱚᱛᱮᱛᱮ ᱥᱟᱵ ᱚᱪᱚᱜ ᱵᱚᱛᱚᱨ ᱛᱮ ᱚᱸᱰᱮ ᱦᱚᱸ ᱵᱟᱠᱚ ᱛᱟᱦᱮᱸ ᱞᱮᱱᱟ ᱾ ᱥᱤᱫᱚ ᱥᱟᱵᱮ ᱞᱟᱹᱜᱤᱫ ᱵᱟᱹᱭᱨᱤ ᱦᱚᱲ ᱫᱚᱠᱚ ᱯᱟᱸᱡᱟ ᱵᱟᱲᱟᱭᱮ ᱛᱟᱦᱮᱸ ᱠᱟᱱᱟ ᱾ ᱮᱱᱛᱮ ᱥᱤᱫᱚ ᱥᱟᱵᱮ ᱞᱟᱹᱜᱤᱫ ᱵᱷᱟᱜᱚᱞᱯᱩᱨ ᱨᱮᱱ ᱠᱚᱢᱤᱥᱚᱱᱟᱨ ᱫᱚ ᱕᱐᱐᱐ ᱴᱟᱠᱟ ᱵᱟᱹᱠᱥᱤᱥ ᱮ ᱞᱟᱹᱭ ᱡᱟᱹᱦᱤᱨ ᱟᱠᱟᱫ ᱛᱟᱦᱮᱸ ᱠᱟᱱᱟ ᱾ ᱯᱤᱯᱲᱟᱹ ᱠᱷᱚᱱ ᱩᱱᱠᱩ ᱫᱚ ᱵᱟᱨᱟᱠᱚᱨ ᱜᱟᱰᱟ ᱚᱱᱟ ᱯᱟᱨᱚᱢ ᱠᱚ ᱫᱟᱹᱲ ᱯᱟᱨᱚᱢ ᱡᱚᱝ ᱠᱟᱱ ᱛᱟᱦᱮᱸ ᱠᱟᱱ ᱨᱮ ᱵᱤᱨ ᱵᱷᱤᱛᱨᱤ ᱨᱮ ᱢᱤᱫᱴᱟᱹᱝ ᱠᱩᱸᱵᱟᱹ ᱨᱮᱠᱚ ᱥᱮᱸᱫᱽᱨᱟ ᱧᱟᱢ ᱠᱮᱫ ᱠᱚᱣᱟ ᱾ ᱦᱚᱲ ᱦᱚᱯᱚᱱ, ᱥᱩᱭᱠᱟᱹᱨᱫᱟᱨ ᱦᱚᱛᱮ ᱛᱮᱜᱮ ᱠᱚ ᱥᱟᱵ ᱠᱮᱫ ᱠᱚᱣᱟ ᱾ ᱥᱤᱫᱚ ᱫᱚ ᱑᱙ ᱹ ᱘ ᱹ ᱑᱘᱕᱕ (29.8.1855 ) ᱢᱟᱹᱦᱤᱛ ᱦᱤᱞᱚᱜ ᱠᱚ ᱥᱟᱵ ᱠᱮᱫᱮᱭᱟ ᱾ ᱥᱟᱵ ᱚᱪᱚᱭᱮᱱ ᱛᱟᱭᱚᱢ ᱥᱤᱫᱚ ᱫᱚ ᱱᱤᱡᱟᱢᱟᱛ ᱟᱫᱟᱞᱚᱛ ᱨᱮᱠᱚ ᱵᱤᱪᱟᱹᱨ ᱠᱮᱫᱮᱭᱟ ᱟᱨ ᱨᱟᱡᱽ ᱵᱤᱨᱩᱫᱽ ᱞᱟᱹᱲᱦᱟᱹᱭ ᱞᱩᱴ ᱟᱨ ᱫᱟᱨᱚᱜᱟ ᱢᱚᱦᱮᱥᱞᱟᱞ ᱫᱚᱠᱚ ᱜᱚᱡ ᱞᱮᱫᱮ ᱨᱮᱭᱟᱜ ᱫᱳᱥ ᱠᱟᱛᱮ ᱠᱚ ᱵᱤᱪᱟᱹᱨ ᱫᱩᱥᱤ ᱠᱮᱫᱮᱭᱟ ᱾ ᱑᱘᱕᱕ ᱥᱟᱞ ᱨᱮᱭᱟᱜ ᱕ ᱰᱤᱥᱮᱢᱵᱚᱨ ᱦᱤᱞᱚᱜ ᱫᱚ ᱯᱟᱹᱥᱤ ᱮ ᱨᱮᱭᱟᱜ ᱨᱟᱭ ᱚᱚᱠ ᱮᱱᱟ ᱾ ᱜᱚᱴᱟ ᱠᱮᱫᱼᱟ ᱠᱚ ᱵᱟᱝᱢᱟ ᱚᱠᱟ ᱡᱟᱭᱜᱟ ᱨᱮ ᱫᱟᱨᱚᱜᱟ ᱠᱚ ᱜᱚᱡ ᱞᱮᱫᱮ ᱛᱟᱦᱮᱸᱫ, ᱚᱱᱟ ᱡᱟᱭᱜᱟ ᱨᱮᱜᱮ ᱥᱤᱫᱚ ᱫᱚᱠᱚ ᱯᱟᱹᱥᱤ ᱮᱭᱟ ᱾ ᱟᱨ ᱦᱚᱸᱠᱚ ᱜᱚᱴᱟ ᱠᱮᱫᱼᱟ, ᱵᱟᱝᱢᱟ ᱥᱤᱫᱚ ᱯᱟᱹᱥᱤᱭᱮ ᱠᱷᱚᱵᱚᱨ ᱫᱚ ᱡᱮᱢᱚᱱ ᱰᱷᱳᱞ ᱯᱤᱴᱟᱹᱣ ᱠᱟᱛᱮ ᱜᱚᱴᱟ ᱴᱟ:ᱰᱤ ᱞᱟᱹᱭ ᱯᱟᱥᱱᱟᱣᱜ ᱢᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱞᱚᱪᱚᱫ ᱞᱚᱪᱚᱫ ᱦᱚᱲ ᱥᱟᱢᱟᱝ ᱨᱮ ᱯᱟᱹᱞᱴᱤᱱ (Pontet) ᱥᱟᱦᱮᱵᱽ ᱫᱚ ᱥᱤᱫᱚ ᱟᱨ ᱥᱤᱝᱨᱟᱹᱭ ᱮ ᱯᱟᱹᱥᱤ ᱚᱪᱚ ᱠᱮᱫ ᱠᱮᱫ ᱠᱤᱱᱟ, ᱵᱤᱨᱵᱽᱟᱱᱴᱟ ᱦᱚᱲ ᱞᱮᱠᱟ ᱠᱷᱟᱹᱛᱤᱨᱡᱚᱢᱟ ᱢᱚᱨᱚᱱ ᱠᱤᱱ ᱦᱚᱵᱚᱨᱟᱱᱟ ᱾ ᱥᱤᱫᱚ ᱫᱚ ᱢᱟᱹ ᱕.᱑᱒.᱑᱘᱕᱕ ᱦᱤᱛ ᱨᱮᱠᱚ ᱯᱟᱹᱥᱤ ᱜᱚᱡ ᱠᱮᱫᱮᱭᱟ ᱾ ᱴᱩᱜᱩᱰ ᱥᱟᱦᱮᱵᱽ ᱫᱚ ᱵᱷᱚᱜᱽᱱᱟᱰᱤ ᱨᱮ ᱦᱮᱡ ᱠᱟᱛᱮ ᱥᱤᱫᱚᱣᱟᱜ ᱚᱲᱟᱜ ᱠᱷᱚᱱ ᱔᱘ ᱜᱚᱴᱟᱝ ᱪᱤᱴᱷᱤᱭ ᱧᱟᱢ ᱠᱮᱫᱼᱟ ᱾ ᱚᱱᱟ ᱠᱚ ᱪᱤᱴᱷᱤ ᱠᱚᱨᱮ ᱫᱚ ᱟᱹᱰᱤ ᱟᱭᱢᱟ ᱦᱚᱲ ᱦᱚᱛᱮᱛᱮ, ᱦᱟᱱᱛᱮ ᱱᱷᱟᱛᱮ ᱠᱷᱚᱱ ᱱᱮᱦᱚᱸᱨ ᱟᱠᱟᱱᱟ ᱵᱟᱝ ᱢᱟ ᱠᱚᱪᱞᱚᱱ ᱟᱨ ᱥᱤᱵᱚᱲ ᱚᱪᱚᱜ ᱠᱷᱚᱱ ᱡᱮᱢᱚᱱ ᱩᱥᱟᱹᱨᱟ ᱪᱷᱟᱰᱟᱣᱮ ᱧᱟᱢ ᱚᱪᱚ ᱠᱚ ᱢᱟ ᱾ ᱥᱤᱫᱚ ᱫᱚᱭ ᱠᱩᱠᱢᱩ ᱞᱮᱫ ᱛᱟᱦᱮᱸ ᱠᱟᱱᱟ ᱵᱟᱝ ᱢᱟ ᱠᱩᱥᱤ - ᱨᱟᱹᱥᱠᱟᱹ ᱟᱨ ᱞᱟᱦᱟᱱᱛᱤ ᱟᱠᱟᱱ ᱢᱤᱫᱴᱟᱹᱝ ᱥᱟᱱᱛᱟᱲ ᱥᱟᱶᱛᱟ ᱵᱮᱱᱟᱣ ᱨᱟᱠᱟᱵ ᱨᱮᱭᱟᱜ ᱾ ᱱᱚᱶᱟ ᱠᱩᱠᱢᱩ ᱯᱩᱨᱟᱹᱣ ᱚᱪᱚᱭ ᱞᱟᱹᱜᱤᱫ ᱩᱱᱤ ᱫᱚ ᱫᱟᱲᱮᱭᱟᱜ ᱵᱷᱳᱨ ᱮ ᱠᱩᱨᱩᱢᱩᱴᱩ ᱞᱮᱫᱼᱟ, ᱢᱮᱱᱠᱷᱟᱱ ᱵᱟᱝ ᱯᱩᱨᱟᱹᱣ ᱞᱮᱱ ᱛᱟᱭᱟ ᱾ ᱢᱮᱱᱠᱷᱟᱱ ᱠᱚᱪᱚᱞᱚᱱ ᱟᱨ ᱥᱤᱵᱚᱲ ᱚᱪᱚᱜ ᱵᱤᱨᱩᱫᱽᱨᱮ ᱛᱤᱸᱜᱩ ᱫᱟᱨᱟᱢ ᱨᱮᱭᱟᱜ ᱚᱠᱟ ᱥᱤᱠᱷᱟᱹᱣᱱᱟᱭ ᱫᱚᱦᱚ ᱚᱴᱚ ᱟᱠᱟᱫᱼᱟ, ᱚᱱᱟ ᱯᱟᱸᱡᱟ ᱠᱟᱛᱮ ᱡᱩᱜᱽ ᱡᱩᱜᱽ ᱦᱟᱹᱵᱤᱡ ᱥᱟᱭ ᱥᱟᱭ ᱢᱟᱭᱟᱢ ᱜᱚᱦᱟᱠᱚ ᱫᱚ ᱠᱚᱪᱞᱚᱱ ᱚᱪᱚᱜ ᱵᱤᱨᱩᱫᱽ ᱨᱮ ᱛᱤᱸᱜᱩ ᱫᱟᱨᱟᱢ ᱠᱟᱛᱮ ᱡᱤᱣᱤ ᱠᱚ ᱟᱞᱟᱭ ᱠᱮᱫ ᱛᱟᱠᱚᱣᱟ ᱾ ᱚᱱᱟᱛᱮ ᱥᱟᱱᱛᱟᱲ ᱦᱩᱞ ᱨᱮ ᱦᱚᱲ ᱦᱚᱯᱚᱱ ᱵᱟᱠᱚ ᱡᱤᱛᱠᱟᱹᱨ ᱞᱮᱱ ᱨᱮᱦᱚᱸ ᱥᱤᱫᱚᱣᱟᱜ ᱡᱤᱣᱤ ᱟᱞᱟᱭ ᱫᱚ ᱵᱟᱝ ᱟᱹᱣᱲᱤᱭᱟᱜ ᱟᱠᱟᱱ ᱛᱟᱭᱟ ᱾
ᱪᱟᱸᱫᱽ ᱢᱩᱨᱢᱩ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱟᱸᱫᱽ ᱢᱩᱨᱢᱩ ᱫᱚ ᱪᱩᱱᱩ ᱢᱩᱨᱢᱩ ᱭᱤᱡ ᱛᱮᱥᱟᱨ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱥᱟᱱᱛᱟᱲ ᱦᱩᱞ ᱨᱮᱱ ᱟᱹᱜᱼᱭᱩᱨ ᱠᱤᱱ ᱥᱤᱫᱚ - ᱠᱟᱹᱱᱦᱩ ᱨᱮᱱ ᱵᱚᱭᱦᱟᱭ ᱛᱟᱦᱮᱸ ᱠᱟᱱᱟ ᱾ ᱟᱢᱫᱟᱡᱽ ᱑᱘᱓᱑ ᱥᱟᱞ ᱠᱚᱨᱮ ᱪᱟᱸᱫᱽ ᱢᱩᱨᱢᱩ ᱫᱚᱭ ᱡᱟᱱᱟᱢ ᱞᱮᱱ ᱛᱟᱦᱮᱸ ᱠᱟᱱᱟ ᱾ ᱦᱩᱞ ᱚᱠᱛᱚ ᱨᱮ ᱩᱱᱤᱭᱟᱜ ᱩᱢᱮᱨ ᱫᱚ ᱵᱟᱨ ᱜᱮᱞ ᱯᱩᱱ (᱒᱔) ᱵᱚᱪᱷᱚᱨ ᱞᱮᱠᱟ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱡᱟᱦᱮᱨ ᱮᱨᱟ ᱫᱚ ᱚᱠᱟ ᱫᱷᱚᱨᱚᱢ ᱠᱟᱜᱚᱡᱽ ᱥᱤᱫᱚ – ᱠᱟᱹᱱᱦᱩ ᱛᱟᱹᱠᱤᱱ ᱮ ᱮᱢᱟᱫ ᱠᱤᱱ ᱛᱟᱦᱮᱸ ᱠᱟᱱᱟ, ᱚᱱᱟ ᱫᱚ ᱪᱟᱸᱫᱽ ᱜᱮᱭ ᱯᱟᱲᱦᱟᱣ ᱟᱸᱡᱚᱢ ᱟᱫ ᱠᱤᱱ ᱛᱟᱦᱮᱸ ᱠᱟᱱᱟ, ᱚᱱᱟᱨᱮ ᱚᱞ ᱛᱟᱦᱮᱸ ᱠᱟᱱᱟ : - ᱡᱩᱫᱤ ᱡᱚᱛᱷᱟᱛ ᱵᱤᱪᱟᱹᱨᱮᱢ ᱧᱟᱢ ᱠᱟᱱ ᱠᱷᱟᱱ, ᱢᱟᱦᱟᱡᱚᱱ ᱠᱚ ᱛᱩᱞᱩᱡ ᱞᱟᱹᱲᱦᱟᱹᱭ ᱢᱮ ᱾ ᱟᱨᱦᱚᱸ ᱦᱚᱲ ᱦᱚᱯᱚᱱ ᱠᱚ ᱜᱤᱨᱟᱹ ᱵᱟᱹᱥᱤ ᱟᱠᱟᱱ ᱟᱹᱰᱤ ᱟᱹᱰᱤ ᱴᱚᱴᱷᱟ ᱠᱷᱚᱱ ᱦᱚᱲ ᱫᱚ ᱥᱤᱫᱚ - ᱠᱟᱹᱱᱦᱩ ᱛᱤᱠᱤᱱ, ᱪᱤᱴᱷᱤ ᱠᱚ ᱚᱞ ᱟᱹᱠᱤᱱ ᱠᱟᱱ ᱛᱟᱦᱮᱸ ᱠᱟᱱᱟ, ᱵᱟᱝᱢᱟ ᱤᱝᱨᱟᱹᱡᱽ ᱨᱮᱱ ᱥᱤᱯᱟᱹᱦᱤ ᱠᱚᱣᱟᱜ ᱠᱚᱪᱞᱚᱱ ᱛᱮᱠᱚ ᱡᱟᱞᱮ — ᱛᱷᱟᱞᱮ ᱪᱟᱵᱟ ᱟᱠᱟᱱᱟ ᱾ ᱡᱮᱢᱚᱱ ᱩᱱᱠᱩ ᱫᱚ ᱩᱥᱟᱹᱨᱟ ᱠᱚ ᱚᱣᱟᱨ ᱚᱪᱚᱜ ᱾ ᱱᱚᱶᱟ ᱠᱚ ᱡᱚᱛᱚ ᱪᱤᱴᱷᱤ ᱫᱚ ᱪᱟᱸᱫᱽ ᱜᱮᱭ ᱯᱟᱲᱦᱟᱣ ᱟᱸᱡᱚᱢ ᱟᱹᱠᱤᱱ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱨᱚᱲ ᱨᱩᱣᱟᱹᱲ ᱦᱚᱸ ᱪᱟᱸᱫᱽ ᱜᱮᱭ ᱚᱞᱮᱫ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱛᱮᱵᱚᱱ ᱵᱟᱰᱟᱭ ᱫᱟᱲᱮᱭᱟᱜ ᱠᱟᱱᱟ, ᱵᱟᱝ ᱢᱟ ᱯᱩᱱ ᱵᱚᱭᱦᱟ ᱢᱟᱹᱫᱽ ᱨᱮ ᱪᱟᱸᱫᱽ ᱫᱚ ᱚᱞᱚᱜ - ᱯᱟᱲᱦᱟᱣ ᱮ ᱵᱟᱰᱟᱭ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱪᱟᱸᱫᱽ ᱫᱚ ᱥᱟᱱᱛᱟᱲ ᱦᱩᱞ ᱨᱮ ᱯᱷᱟᱹᱫᱽ ᱪᱟᱹᱞᱟᱹᱣᱟ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱥᱟᱜᱽᱨᱟᱢᱯᱩᱨ ᱟᱨ ᱯᱮᱭᱟᱞᱟ ᱯᱩᱨ ᱨᱮᱭᱟᱜ ᱵᱟᱱᱟᱨ ᱞᱟᱹᱲᱦᱟᱹᱭ ᱨᱮᱜᱮ ᱟᱡ ᱨᱮᱱ ᱯᱷᱟᱹᱫᱮ ᱟᱹᱭᱩᱨ ᱞᱮᱫ ᱠᱚᱣᱟ ᱾ ᱞᱟᱹᱲᱦᱟᱹᱭ ᱵᱟᱝ ᱦᱩᱭᱩᱜ ᱡᱚᱠᱷᱮᱡ ᱟᱡ ᱨᱤᱱ ᱯᱷᱟᱹᱫᱽ ᱫᱚ ᱟᱹᱰᱤ ᱞᱮᱠᱟᱛᱮ ᱞᱟᱹᱲᱦᱟᱹᱭ ᱞᱟᱹᱜᱤᱫ - ᱮ ᱮᱛᱳᱭᱮᱫ ᱠᱚ ᱛᱟᱦᱮᱸ ᱠᱟᱱᱟ, ᱡᱮᱞᱮᱠᱟ ᱵᱮᱡᱷᱟ ᱛᱩᱧ ᱮᱢᱟᱱ ᱾ ᱦᱩᱞ ᱪᱟᱵᱟ ᱠᱟᱛᱮ ᱤᱝᱨᱮᱡᱽ ᱠᱚ ᱫᱚ ᱪᱟᱸᱫᱽ ᱠᱚ ᱥᱟᱵ - ᱠᱮᱫᱮᱭᱟ ᱟᱨ ᱵᱤᱪᱟᱹᱨ ᱫᱩᱥᱤ ᱠᱟᱛᱮ ᱦᱟᱡᱚᱛ ᱨᱮᱠᱚ ᱥᱟᱸᱵᱟᱣ ᱠᱮᱫᱮᱭᱟ ᱾ ᱦᱟᱡᱚᱛ ᱨᱮᱜᱮ ᱪᱟᱸᱫᱽ ᱫᱚᱭ ᱵᱮᱸᱰᱟᱣ ᱮᱱᱟ ᱾
ᱵᱷᱟᱭᱨᱚ ᱢᱩᱨᱢᱩ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱪᱩᱱᱩ ᱢᱩᱨᱢᱩᱭᱤᱡ ᱦᱩᱰᱤᱧ ᱩᱛᱟᱹᱨᱤᱡ ᱦᱚᱯᱚᱱᱟᱜ ᱧᱩᱛᱩᱢ ᱜᱮ ᱵᱷᱚᱭᱨᱚ ᱢᱩᱨᱢᱩ ᱫᱚ ᱾ ᱩᱱᱤ ᱫᱚ ᱥᱟᱱᱛᱟᱲ ᱦᱩᱞ ᱨᱤᱱ ᱟᱹᱜᱼᱭᱩᱨ ᱠᱤᱱ ᱥᱤᱫᱚ - ᱠᱟᱹᱱᱦᱩ ᱥᱚᱸᱜᱮᱭ ᱛᱟᱦᱮᱸᱱ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱯᱷᱟᱹᱫᱽ ᱮ ᱟᱹᱭᱩᱨᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱢᱫᱟᱡᱽ - ᱑᱘᱓᱕ ᱥᱟᱞ ᱠᱚᱨᱮ ᱵᱷᱚᱭᱨᱚ ᱫᱚᱭ ᱡᱟᱱᱟᱢ ᱞᱮᱱᱟ ᱾ ᱦᱩᱞ ᱦᱩᱭᱩᱜ ᱚᱠᱛᱮ ᱵᱷᱚᱭᱨᱚ ᱫᱚ ᱮᱠᱷᱮᱱ ᱒᱐ ᱥᱮᱨᱢᱟ ᱩᱢᱮᱨ ᱛᱟᱭ ᱛᱟᱦᱮᱸ ᱠᱟᱱᱟ ᱾ ᱱᱩᱱᱟᱹᱜ ᱦᱩᱰᱤᱧ ᱩᱢᱮᱨ ᱨᱮᱦᱚᱸ ᱵᱷᱭᱨᱚ ᱫᱚ ᱫᱤᱞ ᱟᱨ ᱫᱟᱲᱮ ᱛᱮᱫᱚ ᱯᱩᱨᱩᱱ ᱜᱮᱭ ᱛᱟᱦᱮᱸ ᱠᱟᱱᱟ ᱾ ᱦᱚᱲᱢᱚ ᱫᱚ ᱰᱟᱴᱢᱚᱴ ᱠᱮᱴᱮᱡ ᱛᱟᱦᱮᱸ ᱠᱟᱱ ᱛᱟᱭᱟ, ᱦᱚᱲ ᱦᱚᱯᱚᱱ ᱠᱚᱠᱚ ᱠᱚᱪᱚᱞᱚᱸᱰ ᱚᱪᱚᱜ ᱨᱮᱭᱟᱜ ᱠᱟᱛᱷᱟ ᱠᱚ ᱫᱚ ᱟᱡ ᱫᱟᱫᱟ ᱛᱤᱠᱤᱱ ᱴᱷᱮᱱ ᱮ ᱟᱸᱡᱚᱢ ᱡᱚᱝ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱦᱩᱞ ᱟᱹᱣᱨᱤ ᱮᱦᱚᱵᱚᱜ ᱨᱮ ᱥᱟᱦᱮᱵᱽ ᱠᱚ ᱫᱚ ᱨᱮᱞ ᱥᱚᱲᱚᱠ ᱵᱮᱱᱟᱣ ᱠᱚ ᱮᱦᱚᱵ ᱟᱠᱟᱱ ᱛᱟᱦᱮᱸ ᱠᱟᱱᱟ ᱾ ᱴᱷᱤᱠᱟᱹᱫᱟᱨ ᱠᱚ ᱫᱚ ᱦᱚᱲ ᱟᱹᱛᱩ ᱯᱷᱮᱰ ᱠᱚᱨᱮ ᱜᱮᱠᱚ ᱰᱮᱨᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱫᱚ ᱟᱹᱛ ᱠᱚ ᱧᱟᱢ ᱞᱮᱠᱷᱟᱱ ᱜᱮ ᱦᱚᱲ ᱨᱮᱱ ᱥᱤᱢ, ᱜᱮᱰᱮ, ᱢᱮᱨᱚᱢ ᱠᱚ ᱩᱴᱷᱟᱹᱣ ᱤᱫᱤᱭᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾ ᱩᱱ ᱚᱠᱛᱚ ᱨᱮᱫᱚ ᱠᱩᱲᱤ ᱦᱚᱯᱚᱱ ᱠᱚ ᱦᱚᱸᱠᱚ ᱪᱷᱤᱱᱜᱟᱹᱣ ᱤᱫᱤᱭᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾ ᱢᱚᱱ ᱢᱚᱱᱛᱮᱭ ᱦᱩᱫᱤᱥᱮᱫ ᱛᱟᱦᱮᱸ ᱠᱟᱱᱟ, ᱛᱤᱥ ᱦᱤᱡᱩᱜᱼᱟ ᱚᱱᱟ ᱫᱤᱱ, ᱚᱱᱮ ᱩᱱᱨᱮ ᱱᱩᱠᱩ ᱦᱟᱲᱢᱟᱫᱤᱭᱟᱹ ᱠᱚᱣᱟᱜ ᱢᱟᱭᱟᱢ ᱛᱮ ᱦᱚᱲ ᱦᱚᱯᱚᱱ ᱫᱚᱠᱚ ᱰᱟᱹᱵᱽᱨᱟᱹᱣᱜᱼᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱯᱟᱸᱪᱠᱟᱹᱴᱷᱤᱭᱟᱹ ᱨᱮ ᱦᱩᱞ ᱫᱚ ᱮᱦᱚᱵ ᱞᱮᱱᱟ ᱾ ᱵᱷᱟᱭᱨᱚ ᱦᱚᱸ ᱚᱸᱰᱮ ᱫᱚᱭ ᱛᱟᱦᱮᱸ ᱠᱟᱱᱟ ᱠᱮᱱᱟᱨᱟᱢ ᱟᱨ ᱫᱟᱨᱚᱜᱟ ᱫᱚ ᱵᱷᱟᱭᱨᱚᱣᱟᱜ ᱢᱮᱫ ᱥᱟᱢᱟᱝ ᱨᱮᱠᱤᱱ ᱜᱚᱡ ᱚᱪᱚᱭᱮᱱᱟ ᱾ ᱚᱱᱟ ᱧᱮᱞ ᱛᱮ ᱵᱷᱟᱭᱨᱚ ᱫᱚ ᱦᱮᱲᱟᱱ ᱨᱟᱹᱥᱠᱟᱹᱭ ᱟᱴᱠᱟᱨ ᱞᱮᱫᱼᱟ, ᱮᱱᱛᱮ ᱠᱚᱪᱞᱚᱱ ᱟᱨ ᱥᱤᱜᱼᱵᱚᱲ ᱠᱚ ᱞᱟᱹᱜᱤᱫ ᱫᱚ ᱱᱚᱝᱠᱟᱱ ᱥᱟᱡᱟ ᱜᱮᱭ ᱠᱷᱚᱡᱽ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱯᱮᱭᱟᱞᱟᱯᱩᱨ ᱨᱮᱭᱟᱜ ᱞᱟᱹᱲᱦᱟᱹᱭ ᱨᱮ ᱫᱚ ᱥᱤᱫᱚ ᱫᱚᱭ ᱡᱚᱠᱷᱚᱢᱮᱱ ᱛᱟᱭᱚᱢ ᱦᱚᱲ ᱫᱚ ᱩᱱᱤ ᱠᱚ ᱯᱷᱟᱨᱚᱠ ᱞᱮᱫᱮᱭᱟ ᱾ ᱵᱷᱟᱭᱨᱚ ᱫᱚ ᱟᱡ ᱫᱟᱫᱟ ᱥᱚᱸᱜᱮ ᱜᱮᱭ ᱛᱟᱦᱮᱸ ᱤᱫᱤ ᱮᱱᱟ ᱾ ᱥᱤᱫᱚ ᱫᱚ ᱫᱟᱢᱳᱫᱚᱨ ᱜᱟᱰᱟ ᱦᱟᱱᱟ ᱥᱟᱦᱟ ᱫᱟᱹᱲ ᱞᱟᱹᱜᱤᱫ ᱮ ᱜᱚᱴᱟ ᱠᱮᱫᱼᱟ ᱾ ᱟᱫᱚ ᱢᱤᱫᱴᱟᱹᱝ ᱵᱤᱨ ᱨᱮᱠᱚ ᱰᱮᱨᱟ ᱟᱠᱟᱱ ᱛᱟᱦᱮᱸ ᱠᱟᱱ ᱡᱚᱠᱷᱮᱡ ᱢᱤᱫᱴᱟᱹᱝ ᱦᱚᱲ ᱦᱚᱯᱚᱱ ᱦᱚᱛᱮ ᱛᱮᱜᱮ ᱠᱚ ᱥᱟᱵ ᱚᱪᱚ ᱮᱱᱟ ᱾ ᱵᱷᱟᱭᱨᱚ ᱦᱚᱸ ᱠᱚ ᱥᱟᱵ ᱠᱮᱫᱮᱭᱟ ᱾ ᱩᱱᱨᱮ ᱵᱷᱟᱭᱨᱚ ᱫᱚᱭ ᱜᱚᱴᱟ ᱠᱮᱫᱼᱟ, ᱡᱚᱛᱚ ᱦᱚᱲ ᱞᱮ ᱥᱟᱵ ᱚᱪᱚ ᱞᱮᱱᱠᱷᱟᱱ ᱫᱤᱥᱚᱢ ᱦᱚᱲ ᱟᱹᱭᱩᱨ ᱠᱚ ᱥᱮ ᱤᱝᱨᱮᱡᱽ ᱟᱨ ᱢᱟᱦᱟᱡᱚᱱ ᱠᱚ ᱵᱤᱨᱩᱫᱷ ᱨᱮ ᱞᱟᱹᱲᱦᱟᱹᱭ ᱪᱟᱞᱟᱣ ᱤᱫᱤ ᱞᱟᱹᱜᱤᱫ ᱦᱚᱲ ᱫᱚ ᱵᱟᱠᱚ ᱛᱟᱦᱮᱸᱱᱟ ᱾ ᱚᱱᱟᱛᱮ ᱡᱟᱦᱟᱸ ᱩᱯᱟᱹᱭ ᱛᱮᱜᱮ - ᱦᱟᱡᱚᱛᱚᱜ ᱠᱷᱚᱱ ᱫᱚ ᱵᱟᱧᱪᱟᱣᱜ ᱦᱩᱭᱩᱜᱼᱟ ᱾ ᱩᱱᱨᱮ ᱵᱷᱟᱭᱨᱚ ᱫᱚ ᱯᱷᱳᱨᱯᱷᱩᱱᱫᱤ ᱠᱟᱛᱮᱭ ᱢᱮᱱ ᱠᱮᱫᱼᱟ, “ ᱤᱧ ᱫᱚ ᱴᱷᱟᱹᱠᱩᱨ ᱫᱚᱹᱧ ᱵᱟᱝ ᱠᱟᱱᱟ, ᱞᱟᱹᱲᱦᱟᱹᱭ ᱦᱚᱸ ᱵᱟᱹᱧ ᱞᱟᱹᱲᱦᱟᱹᱭ ᱟᱠᱟᱱᱟ, ᱞᱩᱴ, ᱦᱚᱸ ᱵᱟᱹᱧ ᱞᱩᱴ ᱟᱠᱟᱫᱼᱟ ᱾ ᱤᱧ ᱫᱟᱫᱟ ᱛᱮᱠᱚ ᱜᱮᱠᱚ ᱞᱩᱴ ᱵᱟᱲᱟ ᱞᱮᱫ-ᱟ, ᱚᱱᱟᱜᱮ ᱤᱧ ᱦᱚᱸᱠᱚ ᱦᱟᱹᱴᱤᱧ ᱟᱹᱫᱤᱧ ᱛᱟᱦᱮᱸ ᱠᱟᱱᱛᱮ, ᱤᱧ ᱴᱷᱮᱱ ᱫᱚ ᱡᱤᱱᱤᱥ ᱠᱚ ᱧᱟᱢ ᱟᱠᱟᱱᱟ ᱾” ᱥᱟᱦᱮᱵᱽ ᱫᱚ ᱵᱷᱟᱭᱨᱚᱣᱟᱜ ᱠᱟᱛᱷᱟᱭ ᱯᱟᱹᱛᱭᱟᱹᱣ ᱟᱫᱼᱟ, ᱮᱱᱛᱮ ᱥᱟᱹᱨᱤ ᱜᱮ ᱱᱩᱱᱟᱹᱜ ᱦᱩᱰᱤᱧ ᱜᱤᱫᱽᱨᱟᱹ ᱫᱚ ᱪᱮᱠᱟᱛᱮ ᱠᱷᱩᱱ ᱥᱮ ᱞᱩᱴ ᱞᱮᱠᱟᱱ ᱠᱟᱹᱢᱤ ᱫᱚᱭ ᱠᱟᱹᱢᱤ ᱫᱟᱲᱮᱭᱟᱜᱼᱟ ᱾ ᱚᱱᱟᱛᱮ ᱵᱟᱨᱰ (ᱵᱚᱬᱫ) ᱥᱟᱦᱮᱵᱽ ᱫᱚ ᱥᱚᱨᱠᱟᱨ ᱴᱷᱮᱱ ᱙ ᱹ ᱑᱒ ᱹ ᱑᱘᱕᱕ ᱢᱟᱺᱦᱤᱛ ᱦᱤᱞᱚᱜ ᱵᱷᱚᱭᱨᱚ ᱵᱟᱵᱚᱫᱽ ᱪᱤᱴᱷᱤᱭ ᱚᱞ ᱠᱮᱫᱼᱟ :-( ᱦᱩᱞ ᱨᱮ ᱱᱩᱭ ᱦᱩᱰᱤᱧ ᱜᱤᱫᱽᱨᱟᱹ ᱥᱮᱞᱮᱫ ᱛᱟᱦᱮᱸᱱ ᱫᱚ ᱚᱦᱚ ᱜᱮ ᱦᱩᱭ ᱞᱮᱱᱟ) ᱾ ᱢᱮᱠᱷᱟᱱ ᱠᱚᱢᱤᱥᱚᱱᱟᱨ ᱫᱚ ᱮᱱᱛᱮ ᱨᱮᱦᱚᱸ ᱵᱟᱭ ᱯᱟᱹᱛᱭᱟᱹᱣ ᱞᱮᱱᱟ ᱾ ᱵᱤᱪᱚᱠᱚᱢ ᱫᱤᱥᱚᱢ ᱵᱤᱨᱩᱫᱟᱹᱦᱤ ᱠᱷᱩᱱ ᱟᱨ ᱞᱩᱴ ᱮᱢᱟᱱ ᱛᱮᱭᱟᱜ ᱫᱚᱥ ᱞᱟᱫᱮ ᱠᱟᱛᱮ ᱵᱷᱟᱭᱨᱚ ᱫᱚᱭ ᱵᱤᱪᱟᱹᱨ ᱚᱪᱚ ᱠᱮᱫᱮᱭᱟ ᱾ ᱵᱤᱜᱪᱟᱹᱨᱤᱡ ᱮᱞᱤᱣᱴ (Eliot) ᱥᱟᱦᱮᱵᱽ ᱫᱚ ᱑᱘ ᱹ ᱑ ᱹ᱑᱘᱕᱕ ᱥᱟᱞᱨᱮ ᱟᱡᱟᱜ ᱨᱟᱭ ᱨᱮᱭ ᱢᱮᱱ ᱠᱮᱫᱼᱟ, ᱵᱷᱟᱭᱨᱚ ᱫᱚᱭ ᱟᱸᱜᱚᱪ ᱟᱠᱟᱫᱼᱟ ᱵᱟᱝᱢᱟ ᱯᱟᱸᱪᱠᱟᱹᱴᱷᱤᱭᱟ ᱨᱮᱭᱟᱜ ᱜᱚᱯᱚᱡ ᱡᱚᱠᱷᱮᱡ ᱮ ᱛᱟᱦᱮᱸ ᱠᱟᱱᱟ ᱟᱨ ᱛᱟᱠ ᱛᱟᱠ ᱨᱮ ᱵᱷᱚᱜᱽᱱᱟᱰᱤ ᱛᱮ ᱟᱡ ᱫᱟᱫᱟ ᱛᱮᱠᱚ ᱴᱷᱮᱱ ᱧᱟᱯᱟᱢᱚᱜ ᱮ ᱥᱮᱱᱚᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱯᱷᱟᱹᱨ ᱛᱮ ᱫᱚ ᱨᱟᱡᱽ ᱵᱤᱨᱩᱫᱷ ᱞᱟᱹᱲᱦᱟᱹᱭ ᱟᱨ ᱥᱟᱫᱷᱟᱨᱚᱱ ᱦᱚᱲᱟᱜ ᱡᱤᱭᱟᱱ ᱡᱟᱛᱨᱟᱭ ᱟᱠᱚᱴ ᱮᱫ ᱛᱟᱠᱚ ᱛᱟᱦᱮᱸ ᱠᱟᱱ ᱫᱚ ᱥᱟᱹᱵᱩᱫᱽ - ᱪᱩᱠᱟᱹᱣ ᱟᱠᱟᱱᱟ ᱾ ᱚᱱᱟᱛᱮ ᱤᱧ ᱫᱚ ᱥᱤᱠᱲᱤ ᱛᱮ ᱛᱚᱞ ᱦᱟᱞᱚᱛ ᱨᱮᱜᱮ ᱡᱟᱞᱟᱯᱩᱨᱤ ᱦᱟᱱᱟ ᱥᱟᱦᱟ ᱨᱮ ᱡᱟᱭᱡᱩᱜᱽ ᱦᱟᱡᱚᱛ ᱨᱮ ᱛᱟᱦᱮᱸᱱ ᱦᱩᱭᱩᱜ ᱛᱟᱭ ᱨᱮᱭᱟᱜ ᱥᱟᱡᱟᱹᱧ ᱮᱢᱟᱭ ᱠᱟᱱᱟ ᱾ ᱢᱮᱛᱟᱜ ᱢᱮ ᱟᱱᱰᱟᱢᱟᱱ ᱴᱟᱹᱯᱩ ᱨᱮᱭᱟᱜ ᱦᱟᱡᱚᱛ ᱛᱮᱠᱚ ᱤᱫᱤ ᱠᱮᱫᱮᱭᱟ ᱾ ᱢᱤᱫᱴᱟᱹᱝ ᱦᱟᱨᱟ ᱜᱚᱫᱚᱜ ᱠᱚᱲᱟ ᱫᱚ ᱠᱩᱥᱤ ᱨᱟᱹᱥᱠᱟᱹ ᱟᱨ ᱫᱷᱚᱱ ᱫᱟᱹᱣᱞᱟᱹᱛ ᱛᱮ ᱥᱟᱨᱮᱲᱚᱜ ᱠᱟᱱ ᱢᱤᱫᱴᱟᱹᱝ ᱥᱟᱱᱛᱟᱲ ᱥᱟᱶᱛᱟ ᱵᱮᱱᱟᱣ ᱨᱮᱭᱟᱜ ᱮ ᱠᱩᱨᱩᱢᱩᱴᱩ ᱞᱮᱫ ᱛᱟᱦᱮᱸ ᱠᱟᱱᱟ ᱾ ᱦᱩᱞ ᱪᱟᱵᱟ ᱠᱟᱛᱮ ᱫᱷᱮᱹᱨ ᱵᱚᱪᱷᱚᱨ ᱛᱟᱭᱚᱢ ᱦᱚᱸ ᱯᱟᱞᱮᱫ ᱵᱷᱟᱭᱨᱚ ᱫᱚ ᱡᱟᱞᱟᱯᱩᱨᱤ ᱦᱟᱱᱟ ᱥᱟᱦᱟ ᱨᱮᱭᱟᱜ ᱦᱟᱡᱚᱛ ᱚᱲᱟᱜ ᱨᱮ ᱥᱤᱠᱲᱤ ᱛᱮ ᱛᱚᱞ ᱟᱠᱟᱱ ᱛᱩᱞᱩᱡ ᱦᱚᱸ ᱯᱟᱞᱮ ᱤᱱᱟᱹ ᱠᱩᱠᱢᱩ ᱜᱮ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱢᱮᱱᱠᱷᱟᱱ ᱩᱱᱤᱭᱟᱜ ᱠᱩᱠᱢᱩ ᱫᱚ ᱠᱩᱠᱢᱩ ᱨᱮᱜᱮ ᱛᱟᱦᱮᱸ ᱮᱱᱟ ᱾ ᱵᱷᱟᱭᱨᱚ ᱫᱚ ᱦᱟᱡᱚᱛ ᱨᱮᱜᱮᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾