ᱪᱟᱪᱳ ᱪᱷᱟᱹᱴᱤᱭᱟᱹᱨ

ᱪᱟᱪᱳ ᱪᱷᱟᱹᱴᱤᱭᱟᱹᱨ ᱫᱚ ᱥᱟᱱᱛᱟᱞ ᱦᱚᱯᱚᱱ ᱠᱚᱣᱟᱜ ᱢᱤᱫ ᱴᱮᱱ ᱡᱟᱹᱛ ᱪᱷᱩᱛ ᱥᱚᱝᱥᱠᱟᱨ ᱠᱟᱱᱟ᱾ ᱱᱤᱭᱟᱹ ᱫᱚ ᱵᱟᱯᱞᱟ ᱞᱟᱦᱟᱨᱮ ᱠᱚ ᱠᱚᱨᱟᱣᱟᱹ ᱱᱤᱭᱟᱹ ᱚᱠᱟ ᱡᱚᱠᱷᱚᱡ ᱨᱮᱭᱟᱝ ᱡᱚᱛᱷᱟᱛ ᱚᱠᱛᱮ ᱫᱚ ᱵᱟᱹᱱᱩᱜᱼᱟ᱾ ᱢᱮᱱᱠᱷᱟᱱ ᱪᱟᱪᱳ ᱪᱷᱟᱹᱴᱤᱭᱟᱨ ᱟᱹᱣᱨᱤ ᱦᱩᱭᱩᱜ ᱨᱮ ᱵᱟᱠᱚ ᱵᱟᱯᱞᱟᱜᱼᱟ᱾ ᱢᱮᱱᱚᱜᱼᱟ ᱢᱤᱫ ᱴᱮᱱ ᱜᱤᱫᱽᱨᱟᱹ ᱡᱮᱭ ᱦᱟᱨᱟ ᱡᱚᱣᱟᱹᱱ ᱮᱱ ᱟᱨ ᱥᱚᱢᱟᱡᱽ ᱨᱮᱱ ᱢᱮᱢᱵᱟᱨ ᱮ ᱦᱩᱭᱮᱱ ᱚᱱᱟ ᱨᱮᱱᱟᱜ ᱨᱮᱱᱟᱜ ᱥᱟᱨᱴᱤᱯᱷᱤᱠᱮᱴ ᱠᱟᱱᱟ ᱪᱟᱪᱳ ᱪᱷᱟᱹᱴᱤᱭᱟᱹᱨ᱾ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱵᱟᱝ ᱦᱩᱭ ᱟᱠᱟᱱ ᱵᱟᱞᱮ ᱜᱤᱫᱽᱨᱟᱹ ᱫᱚ ᱜᱚᱡ ᱞᱮᱱ ᱠᱷᱟᱱ ᱵᱟᱠᱚ ᱱᱟᱹᱭ ᱛᱮᱭᱮᱭᱟ᱾

ᱪᱟᱪᱳ ᱪᱷᱟᱹᱴᱤᱭᱟᱹᱨ ᱠᱟᱹᱢᱤ

ᱪᱟᱪᱳ ᱪᱷᱟᱹᱴᱤᱭᱟᱹᱨ ᱨᱮ ᱡᱟᱸᱦᱟᱸᱭ ᱨᱮᱱ ᱟᱹᱰᱤ ᱜᱤᱽᱨᱟᱹ ᱢᱮᱱᱟᱜ ᱠᱚ ᱠᱷᱟᱱ, ᱩᱱᱤ ᱫᱚ ᱚᱱᱠᱚ ᱡᱚᱛᱚ ᱢᱤᱫ ᱫᱷᱟᱣ ᱛᱮᱭ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱠᱚᱣᱟ᱾ ᱚᱠᱚᱭ ᱜᱤᱫᱽᱨᱟᱹ ᱟᱹᱣᱨᱤᱭᱮ ᱪᱟᱪᱳ ᱪᱷᱟᱹᱴᱤᱭᱟᱹᱨᱚᱜ ᱨᱮᱠᱚ ᱜᱚᱡ ᱞᱮᱱ ᱠᱷᱟᱱ ᱵᱟᱠᱚ ᱨᱟᱯᱟᱜ ᱠᱚᱣᱟ ᱟᱨ ᱡᱟᱝ ᱱᱟᱹᱭ ᱛᱮ ᱵᱟᱠᱚ ᱤᱫᱤᱭᱟ᱾ ᱡᱟᱸᱦᱟᱸᱭ ᱦᱚᱲ ᱟᱡ ᱨᱮᱱ ᱜᱤᱫᱽᱨᱟᱹ ᱠᱚ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱠᱚᱣᱟ ᱩᱱᱤ ᱫᱚ ᱦᱟᱱᱰᱤᱭ ᱫᱚᱭᱚᱭᱟ᱾ ᱠᱷᱟᱱᱱ ᱜᱮ ᱢᱟᱹᱧᱡᱽᱦᱤ ᱟᱨ ᱯᱟᱨᱟᱱᱤᱠ ᱮ ᱦᱚᱦᱚ ᱟᱠᱟᱤᱱᱟ᱾ ᱦᱟᱹᱱᱰᱤᱭᱮ ᱮᱢᱟᱠᱤᱱᱟ᱾ ᱟᱫᱚᱠᱤᱱ ᱠᱩᱞᱤᱭᱮᱭᱟ, "ᱦᱮᱱᱫᱟ ᱦᱚ, ᱱᱚᱣᱟ ᱫᱚ ᱪᱮᱫ ᱦᱟᱹᱱᱰᱤᱢ ᱮᱢᱟᱜ ᱞᱤᱧᱟᱹ?

ᱟᱫᱚᱭ ᱢᱮᱱ ᱨᱩᱣᱟᱹᱲᱟ, " ᱱᱚᱣᱟ ᱫᱚ ᱵᱟᱵᱟ ᱡᱟᱱ ᱦᱟᱹᱱᱰᱤ᱾"

ᱟᱫᱚ ᱱᱤᱭᱟᱹ ᱛᱮᱜᱤ ᱠᱤᱱ ᱵᱩᱡᱷᱟᱣᱟ ᱵᱟᱝᱢᱟ ᱜᱤᱫᱽᱨᱟᱹᱭ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱠᱚ ᱞᱟᱹᱜᱤᱫ᱾ ᱱᱚᱣᱟ ᱫᱚ ᱥᱮᱛᱟᱜ ᱨᱮ ᱦᱩᱭᱩᱜᱼᱟ᱾ ᱟᱫᱚ ᱢᱟᱹᱧᱡᱽᱦᱤ ᱟᱨ ᱯᱟᱨᱟᱱᱤᱠ ᱦᱟᱹᱱᱰᱤ ᱧᱩ ᱠᱟᱛᱮᱜ ᱟᱛᱚᱨᱮᱱ ᱦᱚᱲ ᱦᱚᱦᱚ ᱟᱠᱚ ᱞᱟᱹᱜᱤᱫ ᱜᱚᱰᱮᱛ ᱠᱤᱱ ᱠᱩᱞᱮᱭᱟ᱾ ᱟᱫᱚ ᱟᱛᱚ ᱦᱚᱲ ᱠᱚ ᱡᱟᱨᱣᱟᱜᱼᱟ᱾ ᱡᱟᱨᱣᱟ ᱠᱟᱛᱮᱜ ᱟᱛᱚ ᱨᱮᱱ ᱠᱩᱲᱤ ᱯᱟᱹᱦᱤᱞ ᱫᱚ ᱱᱟᱭᱠᱮ ᱟᱨ ᱱᱟᱭᱠᱮ ᱮᱨᱟ ᱯᱟᱹᱴᱤᱭᱟᱹ ᱨᱮ ᱫᱩᱲᱩᱵ ᱠᱟᱛᱮᱜ ᱥᱩᱱᱩᱢ ᱥᱟᱥᱟᱝ ᱠᱚ ᱚᱡᱚᱜ ᱟᱹᱠᱤᱱᱟ᱾ ᱚᱱᱟ ᱠᱟᱛᱮᱜ ᱠᱩᱰᱟᱹᱢ ᱱᱟᱭᱠᱮ ᱟᱨ ᱠᱩᱰᱟᱹᱢ ᱱᱟᱭᱠᱮ ᱮᱨᱟ ᱠᱚ ᱚᱡᱚᱜ ᱟᱠᱤᱱᱟ᱾ ᱚᱱᱟ ᱛᱟᱭᱚᱢ ᱢᱟᱹᱧᱡᱽᱦᱤ ᱦᱟᱲᱟᱢ–ᱵᱩᱰᱦᱤ, ᱚᱱᱟ ᱠᱟᱛᱮᱜ ᱯᱟᱨᱟᱱᱤᱠ ᱦᱟᱲᱟᱢ–ᱵᱩᱰᱦᱤ, ᱚᱱᱟ ᱛᱟᱭᱚᱢ ᱡᱚᱜᱽ ᱢᱟᱹᱧᱡᱽᱦᱤ ᱦᱟᱲᱟᱢ–ᱵᱩᱰᱦᱤ, ᱚᱱᱟ ᱛᱟᱭᱚᱢ ᱡᱚᱜᱽ ᱯᱟᱨᱟᱱᱤᱠ ᱛᱟᱹᱠᱤᱱ, ᱚᱱᱟ ᱛᱟᱭᱚᱢ ᱜᱚᱰᱮᱛ ᱛᱟᱹᱠᱤᱱ ᱠᱚ ᱚᱡᱚᱜ ᱟᱹᱠᱤᱱᱟ᱾ ᱚᱱᱟ ᱛᱟᱭᱚᱢ ᱫᱚ ᱟᱛᱚ ᱨᱮᱱ ᱦᱮᱡ ᱟᱠᱟᱱ ᱮᱴᱟᱜ ᱜᱚᱜᱚ ᱵᱟᱵᱟ ᱠᱚ ᱚᱡᱚᱜ ᱟᱠᱚᱣᱟ᱾ ᱚᱝᱠᱟ ᱛᱮ ᱟᱛᱚ ᱡᱚᱛᱚ ᱦᱚᱲ ᱠᱚ ᱚᱡᱚᱜ ᱯᱩᱨᱟᱹᱜᱼᱟ᱾ ᱟᱫᱚ ᱦᱟᱹᱱᱰᱤ ᱠᱚ ᱯᱟᱨᱥᱟᱣᱟ᱾ ᱢᱟᱹᱧᱡᱽᱦᱤ ᱟᱨ ᱯᱟᱨᱟᱱᱤᱠ ᱠᱚ ᱮᱢᱟ ᱢᱟᱲᱟᱝ ᱟᱠᱟᱤᱱᱟ᱾ ᱚᱱᱟ ᱠᱟᱛᱮᱜ ᱡᱚᱛᱚ ᱦᱚᱲ᱾ ᱟᱫᱚ ᱛᱤᱱᱟᱹᱜ ᱜᱤᱫᱽᱨᱟ ᱠᱚ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱠᱚᱣᱟ ᱩᱱᱟᱹᱜ ᱪᱟᱨ ᱜᱮ ᱯᱚᱯᱚᱱ ᱯᱷᱩᱬᱩᱜ ᱠᱟᱛᱮᱜ ᱦᱟᱹᱱᱰᱤ ᱠᱚ ᱮᱢ ᱟᱹᱪᱩᱨᱟᱠᱚᱣᱟ᱾ ᱚᱱᱟ ᱛᱟᱭᱚᱢ ᱜᱤᱫᱽᱨᱟ ᱠᱚᱨᱮᱱ ᱟᱯᱟᱛ ᱫᱚ ᱚᱠᱟᱠᱚᱨᱮ ᱜᱤᱫᱽᱨᱟ ᱠᱚ ᱨᱮᱱ ᱜᱚᱲᱚᱢ ᱛᱮᱫ ᱠᱚ ᱢᱮᱱᱟᱜ ᱠᱚᱣᱟ ᱚᱱᱟ ᱫᱤᱥᱟᱹᱢᱮ ᱞᱟᱹᱭᱟ᱾ ᱟᱫᱚ ᱜᱚᱲᱚᱢ ᱦᱟᱹᱱᱰᱤ ᱠᱚ ᱠᱷᱚᱡᱟ᱾ ᱠᱷᱟᱱ ᱜᱮ ᱜᱤᱫᱽᱨᱟ ᱠᱚ ᱨᱮᱱ ᱜᱚᱲᱚᱢ ᱛᱮᱫ ᱠᱚ ᱫᱚ ᱚᱲᱟᱜ ᱠᱷᱚᱱ ᱠᱚ ᱟᱹᱜᱩ ᱛᱟᱨᱟ ᱟᱠᱟᱫ ᱦᱟᱹᱱᱰᱤ ᱟᱛᱚ ᱢᱚᱬᱮ ᱦᱚᱲ ᱠᱚ ᱮᱢᱟ ᱠᱚᱣᱟ᱾

ᱵᱤᱱᱛᱤ ᱟᱨ ᱱᱮᱦᱚᱨ

ᱠᱷᱟᱱᱜᱮ ᱵᱤᱱᱛᱤ ᱡᱚᱝ ᱠᱚ ᱮᱦᱚᱵᱟ᱾ ᱫᱷᱟᱹᱨᱤᱛ ᱪᱮᱫ ᱞᱮᱠᱟᱛᱮ ᱵᱮᱱᱟᱣ ᱞᱮᱱᱟ ᱟᱨ ᱦᱚᱲ ᱦᱚᱯᱚᱱ ᱞᱩᱢᱟᱹᱢ ᱞᱮᱠᱟ ᱩᱱ ᱠᱷᱚᱱ ᱚᱠᱟ ᱠᱚ ᱫᱤᱥᱟᱹᱢ ᱠᱚ ᱟᱹᱛᱤᱧ ᱟᱹᱜᱩ ᱟᱠᱟᱫ ᱚᱱᱟ ᱡᱚᱛᱚ ᱠᱚ ᱞᱟᱹᱭᱟ᱾ ᱡᱟᱸᱦᱟᱸ ᱞᱮᱠᱟ ᱛᱮ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱟᱞᱚ ᱠᱚ ᱦᱤᱲᱤᱧ ᱢᱟ᱾ ᱟᱫᱚ ᱪᱟᱪᱳ ᱪᱷᱟᱹᱴᱤᱭᱟᱹᱨ ᱜᱤᱫᱽᱨᱟ ᱵᱟᱠᱷᱨᱟ ᱢᱟᱨᱟᱝ ᱵᱩᱨᱩ, ᱪᱟᱸᱫᱚ ᱵᱟᱵᱟ, ᱴᱷᱟᱹᱠᱩᱨ ᱡᱤᱣ, ᱴᱷᱟᱹᱠᱨᱟᱹᱱ ᱟᱨ ᱥᱟᱱᱟᱢ ᱵᱚᱸᱜᱟ ᱵᱩᱨᱩ ᱴᱷᱮᱱ ᱠᱚ ᱱᱮᱦᱚᱨ ᱥᱮ ᱠᱚᱭ ᱡᱚᱝᱟ᱾