ᱰᱚᱢᱟᱱ ᱥᱟᱹᱦᱩ

ᱰᱚᱢᱟᱱ ᱥᱟᱹᱦᱩ Doman Sahu
ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ  ᱟᱨ  ᱡᱟᱱᱟᱢ ᱴᱷᱟᱶ	ᱡᱩᱱ ᱓᱐, ᱑᱙᱒᱔(1924-06-30) ᱯᱟᱱᱰᱟ, ᱜᱚᱰᱰᱟ ᱦᱚᱱᱚᱛ, ᱥᱟᱱᱛᱟᱞ ᱯᱟᱨᱜᱟᱱᱟ, ᱡᱷᱟᱨᱠᱷᱚᱸᱰ
ᱜᱩᱨ	᱐᱖ ᱮᱯᱨᱤᱞ ᱒᱐᱐᱕ (᱘᱐ ᱵᱚᱭᱚᱥ) ᱫᱮᱣᱜᱷᱚᱨ ᱡᱷᱟᱨᱠᱷᱚᱸᱰ
ᱫᱤᱥᱚᱢᱤᱭᱟᱹ	ᱥᱤᱧᱚᱛᱤᱭᱟᱹ
ᱠᱟᱹᱢᱤ	ᱚᱱᱚᱞᱤᱭᱟᱹ, ᱥᱟᱥᱟᱯᱲᱟᱣᱤᱡ
ᱟᱯᱟᱛ ᱮᱸᱜᱟᱛ	ᱫᱚᱭᱟᱞ ᱥᱟᱹᱦᱩ (ᱵᱟᱵᱟ) ᱯᱤᱭᱟᱥᱤ ᱫᱮᱣᱤ (ᱟᱭᱳ)
ᱥᱤᱨᱯᱷᱟᱹ	ᱵᱷᱟᱥᱟ ᱥᱚᱢᱢᱟᱱ (ᱯᱟᱹᱨᱥᱤ ᱢᱟᱱᱚᱛ)

ᱰᱨ. ᱰᱚᱢᱟᱱ ᱥᱟᱹᱦᱩ 'ᱥᱟᱹᱢᱤᱨ' ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱯᱲᱮᱫ, ᱯᱩᱨᱩᱫᱷᱩᱞ ᱚᱱᱚᱬᱦᱤᱭᱟᱹ, ᱜᱟᱹᱠᱷᱩᱲ ᱚᱱᱚᱞᱤᱭᱟᱹ ᱟᱨ ᱠᱷᱚᱸᱫᱽᱨᱚᱫᱤᱭᱟᱹ ᱠᱟᱱᱟᱭ᱾ ᱱᱩᱭ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱛᱮ ᱦᱤᱱᱫᱤ, ᱟᱝᱜᱤᱠᱟ, ᱵᱷᱳᱡᱽᱯᱩᱨᱤ, ᱢᱳᱹᱭᱛᱷᱤᱞᱤ, ᱠᱷᱚᱨᱴᱷᱟ ᱮᱢᱟᱱ ᱯᱟᱹᱨᱥᱤ ᱨᱮᱭᱟᱜ ᱥᱟᱶᱦᱮᱫ ᱮ ᱪᱟᱨᱪᱟ ᱟᱠᱟᱫᱟ᱾ ᱰᱚᱢᱟᱱ ᱥᱟᱹᱦᱩ ᱜᱚᱢᱠᱮ ᱫᱚ ᱑᱙᱔᱗ ᱥᱮᱨᱢᱟ ᱠᱷᱚᱱ ᱑᱙᱘᱓ ᱥᱮᱨᱢᱟ ᱫᱷᱟᱹᱵᱤᱡ ᱦᱚᱲ ᱥᱚᱢᱵᱟᱫᱽ ᱯᱟᱛᱷᱟᱢ ᱨᱮᱱ ᱥᱟᱥᱟᱯᱲᱟᱣᱤᱡ ᱮ ᱛᱟᱦᱮᱸ ᱠᱟᱱᱟ᱾

ᱮᱛᱚᱦᱚᱵ ᱡᱤᱭᱚᱱ

ᱰᱨ. ᱰᱚᱢᱟᱱ ᱥᱟᱹᱦᱩ ᱫᱚ ᱱᱤᱛᱚᱜᱟᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱭᱟᱜ ᱜᱚᱰᱰᱟ ᱦᱚᱱᱚᱛ ᱨᱮᱭᱟᱜ ᱯᱟᱱᱰᱟ ᱧᱩᱛᱩᱢᱟᱱ ᱟᱹᱛᱩ ᱨᱮ ᱓᱐ ᱡᱩᱱ ᱑᱙᱒᱔ ᱥᱮᱨᱢᱟ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱟᱭᱳ ᱫᱚ ᱯᱤᱭᱟᱥᱤ ᱫᱮᱣᱤ ᱟᱨ ᱵᱟᱵᱟ ᱧᱩᱛᱩᱢ ᱫᱚ ᱫᱚᱭᱟᱞ ᱥᱟᱹᱦᱩ ᱛᱟᱦᱮᱸ ᱠᱟᱱᱟ᱾ ᱯᱟᱱᱰᱟ ᱫᱚ ᱢᱤᱫ ᱥᱟᱱᱛᱟᱲ ᱟᱹᱛᱩ ᱛᱟᱦᱮᱸ ᱠᱟᱱ ᱛᱮ, ᱰᱚᱢᱟᱱ ᱥᱟᱹᱦᱩ ᱫᱚ ᱜᱤᱫᱽᱨᱟᱹ ᱩᱢᱮᱨ ᱠᱷᱚᱱ ᱜᱮ ᱥᱟᱱᱛᱟᱲ ᱜᱤᱫᱽᱨᱟᱹ ᱠᱚ ᱥᱟᱶ ᱠᱷᱤᱞᱰᱩᱜ ᱮᱱᱮᱡ ᱟᱛᱮᱭ ᱦᱟᱨᱟ ᱟᱠᱟᱱᱟ᱾ ᱟᱨ ᱚᱱᱟ ᱛᱮ ᱥᱟᱱᱛᱟᱲᱤ ᱨᱚᱲ ᱟᱨ ᱥᱟᱱᱛᱟᱲ ᱞᱟᱠᱪᱟᱨ ᱵᱷᱟᱜᱮ ᱥᱟᱺᱦᱤᱡ ᱮ ᱥᱮᱬᱟ ᱞᱮᱫᱟ᱾

ᱚᱞᱚᱜ ᱯᱟᱲᱦᱟᱜ

ᱚᱞᱚᱜ ᱯᱟᱲᱦᱟᱜ ᱡᱤᱭᱚᱱ ᱫᱚ ᱑᱙᱓᱑ ᱥᱮᱨᱢᱟ ᱨᱮ ᱟᱹᱛᱩ ᱨᱮᱱᱟᱜ ᱞᱚᱠᱥᱤᱢᱤ ᱟᱯᱟᱨ ᱯᱨᱟᱭᱢᱟᱨᱤ ᱥᱠᱩᱞ ᱨᱮ ᱵᱷᱩᱨᱛᱤ ᱛᱟᱞᱟ ᱛᱮ ᱮᱦᱚᱵ ᱞᱮᱱ ᱛᱟᱭᱟ᱾ ᱦᱤᱱᱫᱤ ᱟᱨ ᱥᱟᱱᱛᱟᱲᱤ ᱵᱟᱱᱟᱨ ᱯᱟᱹᱨᱥᱤ ᱛᱮᱜᱮ ᱯᱟᱲᱦᱟᱣ ᱨᱮᱭᱟᱜ ᱵᱮᱵᱚᱥᱛᱟ ᱛᱟᱦᱮᱸ ᱠᱟᱱ ᱛᱮ ᱰᱚᱢᱟᱱ ᱥᱟᱹᱦᱩ ᱫᱚ ᱵᱟᱱᱟᱨ ᱥᱟᱛᱟᱢ ᱤᱫᱤ ᱠᱟᱛᱮ ᱯᱟᱲᱦᱟᱣ ᱮ ᱮᱦᱚᱵ ᱠᱮᱫᱟ᱾ ᱑᱙᱓᱕ ᱥᱮᱨᱢᱟ ᱨᱮ ᱞᱟᱥᱮᱨ ᱦᱟᱛᱟᱝ ᱰᱚᱢᱟᱱ ᱥᱟᱹᱦᱩ ᱫᱚ ᱚᱱᱟ ᱥᱠᱩᱞ ᱠᱷᱚᱱ ᱜᱮ ᱥᱠᱚᱞᱟᱨᱥᱤᱯ ᱥᱟᱶᱛᱮ ᱟᱯᱟᱨ ᱯᱨᱟᱭᱢᱟᱨᱤ ᱥᱠᱩᱞ ᱮ ᱯᱟᱥ ᱠᱮᱫᱟ᱾ ᱱᱚᱣᱟ ᱛᱟᱭᱚᱢ ᱟᱡᱟᱜ ᱵᱷᱩᱨᱛᱤ ᱦᱩᱭᱮᱱᱟ ᱯᱟᱛᱷᱨᱟ ᱨᱮᱱᱟᱜ ᱢᱤᱥᱚᱱ ᱥᱠᱩᱞ ᱨᱮ᱾ ᱑᱙᱓᱗ ᱥᱮᱨᱢᱟ ᱨᱮ ᱱᱚᱰᱮ ᱠᱷᱚᱱ ᱢᱮᱴᱨᱤᱠ ᱥᱠᱚᱞᱟᱨᱥᱤᱯ ᱥᱟᱶᱛᱮ ᱢᱤᱰᱤᱞ ᱮ ᱯᱟᱥ ᱠᱮᱫᱟ᱾ ᱩᱱ ᱚᱠᱛᱚ ᱥᱟᱱᱛᱟᱲᱤ ᱥᱟᱛᱟᱢ ᱞᱮᱠᱟᱛᱮ ᱫᱚᱦᱚ ᱠᱟᱛᱮ ᱢᱮᱴᱨᱤᱠ ᱮᱢ ᱨᱮᱱᱟᱜ ᱥᱚᱨᱠᱟᱨ ᱦᱚᱛᱮᱛᱮ ᱵᱮᱵᱚᱥᱛᱟ ᱛᱟᱦᱮᱸ ᱠᱟᱱ ᱛᱮ, ᱰᱚᱢᱟᱱ ᱥᱟᱹᱦᱩ ᱫᱚ ᱥᱟᱱᱛᱟᱲᱤ ᱥᱟᱛᱟᱢ‌ ᱤᱫᱤ ᱠᱟᱛᱮ ᱵᱤᱱᱤᱰ ᱮ ᱮᱢ ᱠᱮᱫᱟ᱾ ᱑᱙᱔᱒ ᱥᱮᱨᱢᱟ ᱨᱮ ᱜᱚᱰᱰᱟ ᱦᱟᱭ ᱥᱠᱩᱞ ᱠᱷᱚᱱ ᱢᱟᱬᱟᱝ ᱫᱷᱟᱯ ᱛᱮ ᱢᱮᱴᱨᱤᱠ ᱮ ᱯᱟᱥ ᱠᱮᱫᱟ᱾ ᱚᱱᱟ ᱛᱟᱭᱚᱢ ᱱᱩᱭ ᱫᱚ ᱟᱭ.ᱮ. ᱯᱟᱲᱦᱟᱣ ᱞᱟᱹᱜᱤᱫ ᱑᱙᱔᱒ ᱥᱮᱨᱢᱟ ᱨᱮ ᱵᱷᱟᱜᱟᱞᱯᱩᱨ ᱨᱮᱱᱟᱜ ᱛᱮᱡ ᱱᱟᱨᱟᱭᱚᱱ ᱡᱩᱵᱽᱞᱤ ᱠᱚᱞᱮᱡᱽ ᱨᱮ ᱵᱷᱩᱨᱛᱤ ᱮᱱᱟᱭ᱾ ᱚᱱᱟ ᱚᱠᱛᱚ ᱢᱟᱦᱟᱛᱢᱟ ᱜᱟᱱᱫᱷᱤ ᱟᱜ ᱟᱹᱭᱩᱨ ᱛᱮ ᱤᱝᱜᱽᱨᱟᱡᱽ ᱠᱚ ᱵᱷᱟᱨᱚᱛ ᱠᱷᱚᱱ ᱞᱟᱜᱟ ᱠᱚ ᱞᱟᱹᱜᱤᱫ ᱟᱸᱫᱳᱲ ᱪᱟᱞᱟᱜ ᱠᱟᱱ ᱛᱟᱦᱮᱸᱫ᱾ ᱚᱱᱠᱟᱱ ᱚᱠᱛᱚ ᱨᱮ ᱱᱩᱭ ᱦᱚᱸ ᱛᱷᱤᱨ ᱵᱟᱝ ᱛᱟᱦᱮᱸ ᱠᱟᱛᱮ ᱟᱸᱫᱳᱲ ᱨᱮ ᱫᱚᱱ ᱠᱷᱟᱸᱡᱚ ᱮᱱᱟᱭ᱾ ᱚᱱᱟᱛᱮ ᱯᱟᱲᱦᱟᱣ ᱦᱚᱸ ᱵᱟᱹᱜᱤ ᱦᱩᱭᱮᱱ ᱛᱟᱭᱟ᱾ ᱛᱟᱭᱚᱢ ᱛᱮ ᱥᱟᱥᱟᱯᱲᱟᱣ ᱠᱟᱹᱢᱤ ᱚᱠᱛᱚ ᱯᱨᱟᱭᱵᱷᱮᱴ ᱛᱮ ᱵᱷᱟᱜᱟᱞᱯᱩᱨ ᱵᱤᱨᱫᱟᱹᱜᱟᱲ ᱠᱷᱚᱱ ᱟᱭ.ᱮ., ᱵᱤ.ᱮ. (ᱚᱱᱟᱨᱥ), ᱮᱢ.ᱮ. ᱟᱨ ᱵᱤ.ᱮᱞ.ᱮ. ᱥᱟᱹᱛ ᱞᱮᱫᱟᱭ᱾

ᱠᱟᱹᱢᱤ

ᱫᱤᱥᱚᱢ ᱯᱷᱨᱜᱟᱹᱞ ᱞᱟᱲᱟᱣᱱᱟ ᱨᱮ ᱥᱮᱞᱮᱫ ᱠᱷᱟᱹᱛᱤᱨ ᱠᱚᱞᱮᱡᱽ ᱵᱟᱹᱜᱤ ᱛᱟᱭᱚᱢ ᱚᱲᱟᱜ ᱮ ᱦᱮᱡ ᱮᱱᱟ᱾ ᱚᱸᱰᱮ ᱜᱮ ᱵᱟᱵᱟ ᱟᱜ ᱥᱟᱱᱟ ᱞᱮᱠᱟᱛᱮ ᱪᱟᱥᱼᱵᱟᱥ ᱧᱮᱞ ᱮ ᱮᱦᱚᱵ ᱠᱮᱫᱟ᱾ ᱑᱙᱔᱔ ᱥᱮᱨᱢᱟ ᱨᱮᱱᱟᱜ ᱡᱩᱞᱟᱭ ᱪᱟᱸᱫᱚ ᱨᱮ ᱥᱟᱹᱦᱩ ᱜᱚᱢᱠᱮ ᱫᱚ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱱᱟᱜ ᱰᱮᱯᱩᱴᱤ ᱠᱚᱢᱤᱥᱚᱱᱟᱨ ᱚᱯᱷᱤᱥ ᱨᱮ ᱠᱟᱨᱱᱤᱠ ᱦᱩᱫᱟᱹ ᱨᱮ ᱵᱚᱦᱟᱞ ᱮᱱᱟᱭ᱾ ᱱᱚᱣᱟ ᱦᱩᱫᱟᱹ ᱨᱮᱜᱮ ᱱᱩᱭ ᱫᱚ ᱯᱟᱹᱠᱩᱲ ᱟᱨ ᱫᱩᱢᱠᱟᱹ ᱨᱮ ᱢᱮᱥᱟ ᱠᱟᱛᱮ ᱯᱮ ᱥᱮᱨᱢᱟᱭ ᱠᱟᱹᱢᱤ ᱞᱮᱫᱟ᱾ ᱞᱟᱹᱭ ᱛᱚᱨᱟ ᱜᱟᱱᱚᱜᱼᱟ, ᱩᱱ ᱚᱠᱛᱚ ᱰᱮᱯᱩᱴᱤ ᱠᱚᱢᱤᱥᱚᱱᱟᱨ ᱞᱮᱠᱟᱛᱮᱭ ᱛᱟᱦᱮᱸ ᱠᱟᱱᱟᱭ W.G. Archer᱾ ᱑᱙᱔᱘ ᱥᱮᱨᱢᱟ ᱨᱮ ᱯᱟᱨᱥᱟᱞ ᱟᱠᱟᱱ ᱟᱨᱪᱟᱨ ᱟᱜ "Tribal law and Justice" (ᱴᱨᱟᱭᱵᱟᱞ ᱞᱚ ᱮᱱᱰ ᱡᱟᱥᱴᱤᱥ) ᱯᱚᱛᱚᱵ ᱥᱟᱯᱲᱟᱣ ᱨᱮ ᱰᱚᱢᱟᱱ ᱥᱟᱹᱦᱩ ᱟᱜ ᱟᱹᱰᱤ ᱢᱟᱨᱟᱝ ᱜᱚᱲᱚ ᱛᱟᱦᱮᱸ ᱠᱟᱱ ᱛᱟᱭᱟ᱾ ᱟᱨᱪᱟᱨ ᱟᱜ ᱫᱤᱥᱼᱦᱩᱫᱤᱥ ᱛᱮ ᱑᱙᱔᱗ ᱥᱮᱨᱢᱟ ᱨᱮᱱᱟᱜ ᱡᱩᱱ ᱪᱟᱸᱫᱚ ᱠᱷᱚᱱ ᱰᱚᱢᱟᱱ ᱥᱟᱹᱦᱩ ᱫᱚ ᱵᱤᱦᱟᱨ ᱠᱷᱚᱱ ᱯᱟᱨᱥᱟᱞᱚᱜ ᱠᱟᱱ ᱦᱚᱲ ᱥᱚᱢᱵᱟᱫᱽ ᱯᱟᱛᱷᱟᱢ ᱨᱮᱱ ᱥᱟᱥᱟᱯᱲᱟᱣᱤᱡ ᱠᱟᱹᱢᱤ ᱮ ᱮᱦᱚᱵ ᱠᱮᱫᱟ᱾ ᱓᱖ ᱥᱮᱨᱢᱟ ᱠᱟᱹᱢᱤ ᱛᱟᱭᱚᱢ, ᱑᱙᱘᱓ ᱥᱮᱨᱢᱟ ᱨᱮᱱᱟᱜ ᱡᱩᱱ ᱪᱟᱸᱫᱚ ᱨᱮ ᱱᱚᱣᱟ ᱠᱟᱹᱢᱤ ᱠᱷᱚᱱ ᱮ ᱡᱤᱨᱟᱹᱣ ᱮᱱᱟ᱾ ᱟᱡᱟᱜ ᱓᱖ ᱥᱮᱨᱢᱟ ᱥᱟᱥᱟᱯᱲᱟᱣ ᱠᱟᱹᱢᱤ ᱨᱮ ᱒᱐᱙᱘ ᱜᱚᱴᱟᱝ ᱚᱱᱚᱬᱦᱮᱸ, ᱑᱐᱓᱔ ᱜᱚᱴᱟᱝ ᱚᱱᱚᱞ, ᱕᱔᱖ ᱜᱚᱴᱟᱝ ᱠᱟᱹᱦᱱᱤ, ᱘᱒ ᱜᱚᱴᱟᱝ ᱨᱤᱯᱚᱴᱡᱽ, ᱓ ᱭᱟ ᱥᱠᱮᱪ ᱟᱨ ᱒ ᱭᱟ ᱜᱟᱢ ᱠᱟᱹᱦᱱᱤ ᱩᱪᱷᱟᱹᱱ ᱞᱮᱱᱟ ᱟᱨ ᱱᱚᱣᱟ ᱚᱱᱚᱞ ᱠᱚᱨᱮ ᱕᱑ ᱦᱚᱲ ᱜᱟᱱ ᱚᱱᱚᱞᱤᱭᱟᱹ ᱠᱚᱣᱟᱜ ᱮᱱᱮᱢ ᱛᱟᱦᱮᱸ ᱠᱟᱱᱟ᱾

ᱚᱞ ᱵᱮᱞ

ᱰᱨ. ᱰᱚᱢᱟᱱ ᱥᱟᱹᱦᱩ 'ᱥᱟᱹᱢᱤᱨ' ᱫᱚ ᱢᱮᱴᱨᱤᱠ ᱯᱟᱲᱦᱟᱜ ᱚᱠᱛᱚ ᱠᱷᱚᱱ ᱜᱮ ᱚᱱᱚᱞ, ᱚᱱᱚᱬᱦᱮᱸ, ᱠᱟᱹᱦᱱᱤ ᱚᱞ ᱮ ᱮᱦᱚᱵ ᱞᱮᱫᱟ᱾ ᱩᱱᱤ ᱠᱷᱟᱹᱞᱤ ᱥᱟᱱᱛᱟᱲᱤ ᱥᱩᱢᱩᱝ ᱫᱚ ᱵᱟᱝ ᱦᱤᱱᱫᱤ, ᱵᱷᱳᱡᱽᱯᱩᱨᱤ, ᱟᱝᱜᱤᱠᱟ, ᱢᱳᱹᱭᱛᱷᱤᱞᱤ ᱟᱨ ᱠᱚᱨᱴᱷᱟ ᱮᱢᱟᱱ ᱯᱟᱹᱨᱥᱤ ᱛᱮᱦᱚᱸ ᱟᱭᱢᱟ ᱚᱱᱚᱬᱦᱮᱸ, ᱠᱟᱹᱦᱱᱤ, ᱚᱱᱚᱞ ᱮ ᱚᱞ ᱟᱠᱟᱫᱟ᱾ ᱥᱟᱱᱛᱟᱲᱤ ᱥᱟᱶᱦᱮᱫ ᱪᱟᱪᱚ ᱠᱮᱴᱮᱪ ᱨᱮ ᱰᱚᱢᱟᱱ ᱥᱟᱹᱦᱩ ᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ᱾

ᱱᱩᱭ ᱚᱞᱟᱜ ᱯᱚᱛᱚᱵ ᱠᱚᱫᱚ ᱦᱩᱭᱩᱜ ᱠᱟᱱᱟ:

ᱥᱟᱱᱟᱛᱲᱤ ᱯᱚᱛᱚᱵ

1. "ᱜᱤᱫᱽᱨᱟᱹ ᱠᱚ ᱨᱟᱹᱥᱠᱟᱹᱜ ᱯᱩᱛᱷᱤ" - ᱑᱙᱔᱑ (ᱯᱮ ᱦᱟᱹᱴᱤᱧ)
2. "ᱥᱮᱫᱟᱭ ᱜᱟᱛᱮ" - ᱑᱙᱔᱘
3. "ᱢᱟᱦᱟᱛᱢᱟ ᱜᱟᱱᱫᱷᱤ" - ᱑᱙᱕᱓
4. "ᱟᱹᱠᱤᱞ ᱢᱟᱨᱥᱟᱞ" ᱑᱙᱕᱕ (ᱯᱮ ᱦᱟᱹᱴᱤᱧ)
5. "ᱟᱠᱷᱳᱲ ᱳᱨᱳᱢ" - ᱑᱙᱕᱕
6. "ᱥᱟᱱᱛᱟᱞᱤ ᱥᱟᱦᱤᱛᱭᱚ" (ᱠᱟᱹᱛᱷᱱᱤ-ᱜᱟᱹᱛᱷᱱᱤ) - ᱑᱙᱕᱖
7. "ᱯᱳᱸᱰ ᱜᱟᱰᱟ ᱨᱮ" - ᱑᱙᱕᱙
8. "ᱵᱩᱞ ᱢᱩᱱᱰᱟ" - ᱑᱙᱕᱙
9. "ᱟᱹᱠᱤᱞ ᱦᱚᱨ" - ᱑᱙᱘᱔
10. "ᱯᱟᱹᱨᱥᱤ ᱱᱟᱹᱭ" - ᱑᱙᱘᱘ (ᱯᱩᱭᱞᱩ ᱟᱨ ᱛᱮᱥᱟᱨ ᱦᱟᱹᱴᱤᱧ)
11. "ᱯᱟᱹᱨᱥᱤ ᱱᱟᱹᱭ" - ᱑᱙᱙᱐ (ᱯᱩᱱᱟᱜ ᱦᱟᱹᱴᱤᱧ)
12. "ᱯᱟᱹᱨᱥᱤ ᱱᱟᱹᱭ" - ᱑᱙᱘᱙ (ᱛᱩᱨᱩᱭ ᱦᱟᱹᱴᱤᱧ)
13. "ᱥᱮᱛᱟᱜ" - ᱑᱙᱘᱘
14. "ᱢᱟᱛᱟᱞ" - ᱑᱙᱘᱙

ᱥᱤᱨᱯᱷᱟᱹ ᱟᱨ ᱢᱟᱹᱱ

ᱰᱚᱢᱟᱱ ᱥᱟᱹᱦᱩ 'ᱥᱚᱢᱤᱨ' ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱦᱟᱨᱟ ᱵᱩᱨᱩ ᱥᱟᱶ ᱡᱚᱯᱲᱟᱣ ᱟᱭᱢᱟ ᱥᱚᱨᱠᱟᱨᱤ ᱟᱨ ᱵᱮᱼᱥᱚᱨᱠᱟᱨᱤ ᱜᱚᱱᱚᱴᱷᱚᱱ ᱥᱟᱶ ᱡᱚᱯᱲᱟᱣ ᱮ ᱛᱟᱦᱮᱸ ᱠᱟᱱᱟ᱾ ᱥᱟᱶᱦᱮᱫ ᱥᱮᱵᱟ ᱞᱟᱹᱜᱤᱫ ᱱᱩᱭ ᱫᱚ ᱟᱹᱰᱤ ᱟᱭᱢᱟ ᱥᱤᱨᱯᱷᱟᱹ ᱟᱨ ᱢᱟᱹᱱ ᱮ ᱧᱟᱢ ᱟᱠᱟᱫᱟ᱾ ᱑᱙᱙᱘ ᱥᱮᱨᱢᱟ ᱩᱱᱤ ᱫᱚ ᱛᱟᱞᱢᱟ ᱥᱟᱶᱦᱮᱫ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱠᱷᱚᱱ "ᱵᱷᱟᱥᱟ ᱥᱚᱢᱢᱟᱱ" (ᱯᱟᱹᱨᱥᱤ ᱢᱟᱱᱚᱛ) ᱛᱮᱠᱚ ᱢᱟᱹᱱ ᱞᱮᱫᱮᱭᱟ᱾

ᱵᱚᱸᱜᱟ ᱛᱟᱞᱟ

ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱱ ᱟᱭᱢᱟ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱠᱚᱨᱮᱱ ᱩᱫᱽᱜᱟᱹᱣ ᱮᱢᱚᱜᱤᱡ ᱰᱨ. ᱰᱚᱢᱟᱱ ᱥᱟᱹᱦᱩ 'ᱥᱟᱹᱢᱤᱨ' ᱫᱚ ᱖ ᱮᱯᱨᱤᱞ ᱒᱐᱐᱕ ᱥᱮᱨᱢᱟ ᱨᱮ, ᱫᱮᱣᱜᱷᱚᱨ ᱨᱮᱭᱟᱜ ᱟᱡᱟᱜ ᱴᱤ. ᱵᱤᱞᱟᱥᱤ ᱵᱟᱥᱟ ᱚᱲᱟᱜ ᱨᱮᱭ ᱵᱚᱸᱜᱟ ᱛᱟᱞᱟᱭᱮᱱᱟ᱾