ᱵᱷᱟᱸᱰᱟᱱ ᱵᱤᱱᱛᱤ

ᱵᱷᱟᱸᱰᱟᱱ ᱵᱤᱱᱛᱤ ᱫᱚ ᱥᱮᱫᱟᱭ ᱦᱟᱯᱲᱟᱢ ᱠᱚᱨᱮ ᱠᱷᱚᱱ ᱢᱚᱪᱟ ᱛᱮ ᱞᱟᱹᱭ ᱟᱹᱜᱩ ᱟᱨ ᱞᱩᱛᱩᱨ ᱛᱮ ᱟᱸᱧᱡᱚᱢ ᱦᱤᱡᱩᱜ ᱠᱟᱱ ᱜᱤᱭᱟ ᱾ ᱱᱚᱣᱟ ᱠᱚ ᱫᱚ ᱴᱷᱟᱹᱣ ᱟᱠᱟᱱ ᱴᱷᱟᱶ ᱨᱮ ᱚᱠᱛᱚ ᱡᱟᱹᱱᱤᱡ ᱫᱩᱲᱩᱵ ᱠᱟᱛᱮ ᱟᱨ ᱵᱟᱝ ᱟᱹᱪᱩᱨ ᱠᱟᱛᱮ ᱠᱚ ᱵᱤᱱᱛᱤᱭᱟ ᱾ ᱵᱤᱱᱛᱤ ᱨᱮᱱᱟᱜ ᱡᱚᱥ ᱫᱚ ᱢᱤᱫ ᱜᱮᱭᱟ ᱾ ᱥᱤᱨᱡᱚᱱ ᱥᱟᱨᱦᱟᱣ ᱟᱨ ᱱᱟᱜᱟᱢ ᱩᱭᱦᱟᱹᱨ ᱞᱟᱹᱜᱤᱫ ᱜᱮ ᱵᱤᱱᱛᱤ ᱫᱚ ᱾ ᱵᱤᱱᱛᱤ ᱞᱟᱹᱜᱤᱫ ᱫᱚ ᱵᱤᱱᱛᱤ ᱜᱩᱨᱩ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱛᱟᱨᱮ ᱱᱤᱛ ᱫᱚ ᱜᱚᱡ ᱜᱩᱨ ᱚᱠᱛᱚ ᱨᱮᱱᱟᱜ ᱵᱷᱟᱸᱰᱟᱱ ᱵᱤᱱᱛᱤ ᱵᱚ ᱟᱸᱡᱚᱢᱟ ᱾

ᱥᱮᱨᱮᱧ

ᱵᱷᱟᱸᱰᱟᱱ ᱵᱤᱱᱛᱤ ᱥᱮ ᱵᱤᱱᱛᱤ ᱠᱚ ᱫᱚ ᱜᱟᱹᱛᱷᱱᱤ ᱨᱩᱯ ᱨᱮ ᱛᱟᱦᱮᱱᱟ ᱚᱱᱟ ᱵᱤᱱᱛᱤ ᱠᱚ ᱠᱟᱹᱛᱷᱱᱤ ᱨᱩᱯ ᱨᱮ ᱯᱷᱤᱫᱽᱞᱤ ᱠᱟᱛᱮ ᱠᱚ ᱨᱚᱲ-ᱟ ᱾

ᱨᱚᱲᱮ ,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱛᱟᱨᱱᱟ~,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱡᱮ~,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱦᱳ~ ᱾

ᱨᱚᱲᱮ ,

ᱥᱤᱧᱮ ᱥᱟᱱᱟᱢ ᱪᱟᱸᱫᱚ ᱵᱚᱝᱜᱟ,

ᱢᱚᱬᱮ ᱵᱩᱨᱩ ᱢᱚᱬᱮ ᱵᱚᱝᱜᱟ,

ᱡᱮᱜᱮ ᱡᱚᱛᱚ ᱡᱚᱦᱟᱨ ᱦᱟᱯᱲᱟᱢ ᱠᱚ ᱾

ᱨᱚᱲᱮ,

ᱟᱹᱛᱩ ᱥᱟᱱᱟᱢ ᱢᱟᱹᱡᱷᱤ ᱵᱟᱵᱟ,

ᱟᱹᱭᱩᱨ ᱥᱟᱱᱟᱢ ᱱᱟᱹᱯᱤᱛ ᱵᱟᱵᱟ,

ᱡᱮᱜᱮ ᱡᱚᱛᱚ ᱡᱚᱦᱟᱨ ᱯᱮᱲᱟ ᱠᱚ ᱾

ᱨᱚᱲᱮ,

ᱛᱚᱠᱚᱭ ᱦᱚᱨ ᱞᱟᱜ ᱦᱚᱨ ᱫᱚ ᱱᱚᱝᱠᱟ,

ᱛᱚᱠᱚᱭ ᱰᱟᱦᱟᱨ ᱰᱟᱦᱟᱨ ᱱᱚᱝᱠᱟ,

ᱛᱚᱠᱟ ᱫᱚᱵᱚ ᱯᱟᱸᱡᱟ ᱠᱮᱫᱼᱟ ᱦᱳ ᱾

ᱨᱚᱲᱮ,

ᱦᱟᱯᱲᱟᱢ ᱠᱚ ᱦᱚᱨ ᱞᱟᱜ ᱱᱚᱝᱠᱟ,

ᱦᱟᱯᱲᱟᱢ ᱠᱚ ᱰᱟᱦᱟᱨ ᱱᱚᱝᱠᱟ,

ᱭᱚᱱᱟ ᱜᱮ ᱵᱚ ᱯᱟᱸᱡᱟ ᱠᱮᱫᱼᱟ ᱦᱳ ᱾

ᱨᱚᱲᱮ,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱛᱟᱨᱱᱟ,

ᱛᱟ~ᱦᱟ~ ᱨᱮᱛᱟ ᱱᱟ~ᱱᱟ~ ᱡᱮ,

ᱛᱟ~ᱦᱟᱸ ᱨᱮᱛᱟ ᱱᱟ~ᱱᱟ~ ᱦᱳ ᱾

ᱮᱨᱮ ᱧᱟᱢᱮᱱ

ᱦᱚᱭ ᱛᱚᱵᱮ ᱵᱟᱯ ᱨᱮ ᱫᱷᱚᱱ ᱨᱮ ᱛᱤᱛᱮ ᱛᱤᱛᱮ ᱠᱟᱹᱢᱤ ᱟᱹᱜᱩ ᱟᱠᱟᱫ, ᱢᱮᱫᱛᱮ ᱢᱮᱫᱛᱮ ᱧᱮᱞ ᱛᱤᱭᱩᱜᱟᱜ, ᱞᱩᱛᱩᱨᱛᱮ ᱞᱩᱛᱩᱨᱛᱮ ᱟᱸᱡᱚᱢ ᱧᱟᱢᱟᱜ ᱠᱟᱱᱟ ᱱᱚᱶᱟ ᱫᱚ ᱾ ᱥᱮᱫᱟᱭ ᱵᱩᱨᱩ ᱢᱚᱬᱮ ᱟᱹᱜᱤᱞ ᱦᱟᱯᱲᱟᱢ ᱠᱚ ᱛᱤᱱ ᱛᱤᱛᱨᱤᱡ ᱦᱚᱲ ᱪᱚᱝ ᱠᱚ ᱛᱟᱦᱮᱸ ᱠᱟᱱ , ᱢᱮᱬᱦᱮᱫ ᱞᱮᱠᱟᱱ ᱛᱤ ᱡᱟᱸᱜᱟ ᱛᱟᱦᱮᱸ ᱠᱟᱱ ᱛᱟᱠᱚᱣᱟ ᱾ ᱛᱟᱲᱟᱢ ᱦᱚᱸ ᱛᱟᱲᱟᱢ ᱥᱟᱹᱨᱤ , ᱠᱟᱹᱢᱤ ᱦᱚᱸ ᱠᱟᱹᱢᱤ ᱥᱟᱹᱨᱤ ᱾ ᱮᱛᱚᱢ ᱛᱮ ᱫᱷᱩᱵᱤ ᱜᱟᱥ ᱠᱚᱧᱮᱛᱮ ᱯᱟᱴᱣᱟ ᱜᱟᱥ ᱞᱮᱵᱮᱫ ᱞᱟᱸᱰᱷᱚ ᱠᱟᱛᱮ ᱦᱚᱨ ᱞᱮᱫ ᱰᱟᱦᱟᱨ ᱞᱮᱫ-ᱟ ᱠᱚ ᱯᱚᱫᱽ ᱞᱮᱫ ᱯᱟᱭᱬᱟ ᱞᱮᱫ-ᱟ ᱠᱚ ᱾ ᱚᱱᱟ ᱦᱚ~ᱨᱟᱜ ᱰᱟᱦᱟᱨᱟᱜ ᱜᱮᱵᱚ ᱯᱟᱸᱡᱟ ᱟᱠᱟᱫᱼᱟ ᱾ ᱜᱮᱞᱵᱟᱨ ᱥᱤᱧ ᱜᱮᱞᱵᱟᱨ ᱧᱤᱫᱟᱹ ᱟᱪᱟᱨ ᱞᱮᱫ ᱵᱤᱪᱟᱹᱨ ᱞᱮᱫ-ᱟ ᱠᱚ ᱾ ᱮᱨᱮ ᱟᱛᱱᱟᱜ, ᱠᱷᱚᱫᱮ ᱢᱟᱛᱠᱚᱢ, ᱞᱮᱯᱮᱡ ᱛᱤᱨᱤᱞ, ᱯᱮᱴᱮᱨ ᱵᱟᱲᱮ ᱫᱟᱨᱮ ᱵᱩᱴᱟᱹ ᱨᱮ ᱵᱤᱪᱟᱹᱨ ᱞᱮᱫᱼᱟ ᱠᱚ ᱟᱪᱟᱨ ᱞᱮᱫᱼᱟ ᱠᱚ ᱾ ᱠᱟᱛᱷᱟ ᱮᱨᱮ ᱞᱮᱱᱟ ᱠᱟᱛᱷᱟ ᱠᱷᱚᱫᱮ ᱞᱮᱱᱟ ᱵᱤᱪᱟᱹᱨ ᱞᱮᱯᱮᱡ ᱞᱮᱱᱟ ᱨᱚᱯᱚᱲ ᱯᱮᱴᱮᱨ ᱞᱮᱱᱟ ᱨᱟᱭ ᱨᱤᱛ ᱵᱟᱠᱚ ᱥᱟᱹᱨᱤ ᱫᱟᱲᱮᱭᱟᱫ ᱛᱟᱸᱦᱮᱫ ᱾ ᱠᱟᱛᱷᱟ ᱵᱟᱝ ᱥᱟᱹᱨᱤ ᱞᱮᱱᱛᱮ ᱫᱚᱞᱫᱩᱞᱤ ᱵᱟᱦᱟ ᱵᱟᱸᱫᱮᱞᱟᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱪᱮᱛᱟᱱ ᱛᱮ ᱥᱤᱠᱟᱹᱴ ᱛᱤᱡᱩ ᱞᱮᱠᱟ ᱴᱩᱸᱰᱟᱹᱝ ᱴᱩᱸᱰᱟᱹᱝ ᱛᱮ ᱯᱟᱨᱚᱢ ᱠᱟᱛᱮ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱮᱲᱦᱟᱭ ᱨᱮ ᱟᱴᱮᱫ ᱟᱠᱟᱱ ᱞᱮᱧᱚᱜ ᱞᱮᱠᱟᱱ ᱞᱮᱧ ᱵᱚᱧ ᱞᱮᱸᱡᱮᱨ ᱫᱷᱤᱨᱤ ᱪᱮᱛᱟᱱ ᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱟᱴᱮᱫ ᱠᱟᱛᱮ ᱵᱤᱪᱟᱹᱨ ᱞᱮᱫ ᱟᱪᱟᱨ ᱞᱮᱫᱼᱟ ᱠᱚ ᱾ ᱠᱟᱛᱷᱟ ᱥᱟᱹᱨᱤᱭᱮᱱᱟ, ᱦᱚᱨ ᱰᱟᱦᱟᱨ ᱠᱚ ᱧᱟᱢ ᱠᱮᱫᱼᱟ ᱾ ᱠᱟᱛᱷᱟ ᱥᱟᱹᱨᱤ ᱜᱮᱭᱟ ᱢᱮᱱᱠᱟᱛᱮ ᱵᱟᱦᱟ ᱵᱟᱸᱫᱮᱞᱟ ᱨᱮ ᱜᱩᱲᱜᱩ ᱫᱷᱤᱨᱤ ᱠᱚ ᱞᱮᱵᱽᱫᱟ ᱞᱮᱫᱼᱟ ᱚᱱᱟ ᱫᱚ ᱪᱟᱯᱮᱭᱮᱱᱟ ᱾ ᱵᱟᱦᱟ ᱛᱩᱞᱟᱹᱢ ᱠᱚ ᱪᱟᱯᱟᱫ ᱞᱮᱫᱼᱟ ᱚᱱᱟ ᱫᱚ ᱩᱱᱩᱢᱮᱱᱟ ᱾ ᱠᱟᱛᱷᱟ ᱥᱟᱹᱨᱤ ᱜᱮᱭᱟ ᱢᱮᱱᱛᱮ ᱠᱚ ᱵᱟᱰᱟᱭ ᱠᱮᱫ-ᱟ ᱾ᱟᱫᱚ ᱫᱷᱚᱨᱚᱢ ᱧᱩᱢ ᱠᱟᱛᱮ ᱡᱚᱦᱟᱨ ᱠᱟᱛᱮ ᱡᱚᱦᱟᱨ ᱢᱤᱫ ᱠᱟᱛᱮ ᱟᱯᱟᱱ ᱟᱹᱯᱤᱱ ᱜᱟᱲ ᱛᱮ ᱠᱚ ᱨᱩᱣᱟᱲ ᱮᱱᱟ ᱾

ᱵᱟᱯ ᱨᱮ ᱫᱷᱚᱱ ᱨᱮ ᱦᱮᱡ ᱞᱮᱱᱠᱷᱟᱱ ᱨᱩᱣᱟᱹᱲ ᱦᱩᱭᱩᱜ ᱜᱮᱭᱟ , ᱨᱩᱣᱟᱹᱲ ᱠᱟᱛᱮᱦᱚᱸ ᱦᱤᱡᱩᱜ ᱦᱩᱭᱩᱜ ᱜᱮᱭᱟ ᱾ ᱦᱤᱡᱩᱜ ᱥᱮᱱᱚᱜ ᱦᱚᱨ ᱨᱮ ᱥᱩᱦᱤ ᱢᱩᱦᱤᱢ ᱮᱨᱮ ᱧᱮᱞᱚᱜᱼᱟ ᱾ ᱚᱠᱟᱨᱮ ᱪᱚ ᱨᱚᱦᱚᱲ ᱫᱟᱨᱮ ᱥᱟᱜᱮᱱ ᱟᱠᱟᱱᱟ ᱾ ᱟᱹᱰᱤ ᱠᱚ ᱨᱟᱹᱥᱠᱟᱹ ᱡᱚᱝ ᱠᱟᱱᱟ ᱾ ᱚᱠᱟ ᱨᱮᱪᱚ ᱨᱚᱦᱚᱲ ᱫᱟᱨᱮ ᱵᱷᱤᱸᱫᱟᱹᱲ ᱟᱠᱟᱣᱟᱫ ᱠᱚᱣᱟ ᱦᱚᱨ ᱠᱚ ᱮᱥᱮᱫ ᱟᱠᱟᱱ ᱛᱮ ᱠᱚ ᱨᱟᱜ ᱡᱚᱝ ᱠᱟᱱᱟ ᱾ ᱛᱮᱦᱮᱧ ᱚᱱᱟ ᱦᱚᱨ ᱚᱱᱟ ᱰᱟᱦᱟᱨ ᱨᱮᱜᱮ ᱟᱵᱚ ᱦᱚᱸ ᱮᱥᱮᱫ ᱟᱠᱟᱱ ᱛᱮᱵᱚ ᱛᱤᱸᱜᱩ ᱟᱠᱟᱱᱟ ᱾ ᱨᱚᱦᱚᱲ ᱫᱟᱨᱮ ᱵᱷᱤᱸᱫᱟᱹᱲ ᱟᱠᱟᱱ ᱛᱮ, ᱨᱟᱜ ᱡᱚᱝ ᱦᱚᱲ ᱵᱚ ᱧᱟᱢ ᱟᱠᱟᱫᱮᱭᱟ ᱾

ᱥᱮᱨᱮᱧ

ᱨᱚᱲᱮ,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱛᱟᱨᱱᱟ,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱡᱮ,

ᱛᱟ~ᱦᱟᱸ~ ᱨᱮᱛᱟ ᱱᱟ~ᱱᱟ~ ᱦᱳ ᱾

ᱨᱚᱲᱮ,

ᱛᱚᱠᱚᱭ ᱨᱟᱜᱮ ᱪᱮᱛᱮ ᱞᱟᱹᱜᱤᱫ,

ᱛᱚᱠᱚᱭ ᱜᱚᱝ ᱮ ᱪᱤᱠᱟᱹᱭ ᱞᱟᱹᱜᱤᱫ,

ᱛᱚᱠᱚᱭ ᱫᱩᱲᱩᱵ ᱚᱠᱟ ᱞᱟᱹᱜᱤᱫ ᱦᱳ ᱾

ᱨᱚᱲᱮ,

ᱯᱷᱟᱨᱱᱟ ᱨᱟᱜᱮ ᱥᱟᱨᱪᱟᱜ ᱞᱟᱹᱜᱤᱫ,

ᱢᱟᱹᱡᱷᱤ ᱜᱚᱝ ᱮ ᱧᱮᱞᱠᱟᱭ ᱞᱟᱹᱜᱤᱫ,

ᱟᱨ ᱠᱚ ᱫᱩᱲᱩᱵ ᱵᱟᱨᱛᱮ ᱞᱟᱹᱜᱤᱫ ᱦᱳ ᱾

ᱦᱚᱭ ᱛᱚᱵᱮ ᱵᱟᱯ ᱨᱮ ᱫᱷᱚᱱ ᱨᱮ ᱯᱷᱟᱨᱱᱟ [ᱟᱹᱛᱩ ᱧᱩᱛᱩᱢ] ᱟᱹᱛᱩ ᱢᱟᱹᱡᱷᱤ ᱦᱚᱯᱚᱱ ᱯᱷᱟᱨᱱᱟ [ᱯᱟᱹᱨᱤᱥ ᱧᱩᱛᱩᱢ] ᱦᱚᱲᱮ ᱨᱟᱜ ᱡᱚᱝ ᱠᱟᱱ ᱛᱟᱦᱮᱸᱫ ᱾ ᱜᱮᱞ ᱥᱮᱨᱢᱟ ᱢᱟᱲᱟᱝ ᱨᱮᱪᱚ ᱜᱮᱞ ᱵᱟᱨ ᱥᱮᱨᱢᱟ ᱢᱟᱲᱟᱝ ᱨᱮᱪᱚ, ᱜᱮᱞ ᱪᱟᱸᱫᱚ ᱢᱟᱲᱟᱝ ᱨᱮᱪᱚ ᱜᱮᱞ ᱵᱟᱨ ᱪᱟᱸᱫᱚ ᱢᱟᱲᱟᱲ ᱨᱮᱪᱚ, ᱜᱮᱞ ᱢᱟᱦᱟ ᱢᱟᱲᱟᱝ ᱨᱮᱪᱚ ᱜᱮᱞ ᱵᱟᱨ ᱢᱟᱦᱟ ᱢᱟᱲᱟᱝ ᱨᱮᱪᱚ ᱜᱚᱡ ᱞᱮᱱᱟ ᱠᱚ ᱜᱩᱨ ᱞᱮᱱᱟ ᱠᱚ ᱾ ᱚᱱᱟᱛᱮ ᱵᱟᱯ ᱨᱮ ᱫᱷᱚᱱ ᱨᱮ ᱱᱩᱠᱩ ᱫᱚ ᱫᱩᱠ ᱮᱱᱟ ᱠᱚ ᱦᱩᱠ ᱮᱱᱟ ᱠᱚ, ᱪᱷᱩᱛ ᱮᱱᱟ ᱠᱚ ᱵᱩᱠᱩᱛ ᱮᱱᱟ ᱠᱚ, ᱥᱚ ᱭᱮᱱᱟ ᱠᱚ ᱥᱤᱸᱲᱤᱡ ᱮᱱᱟ ᱠᱚ, ᱵᱚᱦᱚᱜ ᱯᱮᱨᱮᱡ ᱡᱚᱵᱽᱨᱟ, ᱞᱩᱛᱩᱨ ᱯᱮᱨᱮᱡ ᱢᱟᱸᱭᱟᱢ, ᱫᱮᱭᱟ ᱯᱮᱨᱮᱡ ᱛᱚᱨᱚᱡ ᱞᱟᱴᱷᱟᱦᱟᱫ ᱠᱚᱣᱟ ᱾

ᱟᱹᱛᱩ ᱦᱚᱲ ᱫᱤᱥᱚᱢ ᱦᱚᱲ ᱟᱨ ᱵᱚᱝᱜᱟ ᱵᱳᱨᱳ ᱠᱚ ᱥᱟᱦᱟ ᱵᱟᱹᱜᱤᱭᱟᱫ ᱠᱚᱣᱟ ᱾ ᱟᱹᱰᱤ ᱫᱩᱠ ᱥᱟᱥᱮᱛ ᱨᱮᱠᱚ ᱛᱟᱦᱮᱸ ᱭᱮᱱᱟ ᱾ ᱫᱩᱠ ᱫᱚ ᱱᱚᱝᱠᱟ ᱦᱤᱡᱩᱜᱼᱟ ᱱᱚᱝᱠᱟ ᱥᱮᱱᱚᱜᱼᱟ ᱾

ᱦᱳᱲᱳ ᱥᱚᱝ

ᱚᱱᱟᱛᱮ ᱱᱩᱠᱩ ᱦᱚᱲ ᱫᱚ ᱱᱤᱨᱟᱹᱭ ᱨᱮ ᱵᱟᱠᱚ ᱛᱟᱦᱮᱸ ᱫᱟᱲᱮᱭᱟᱜᱼᱟ ᱾ ᱧᱤᱫᱟᱹ ᱚᱲᱟᱜ ᱥᱟᱰᱮᱭᱮᱱᱟ, ᱥᱤᱢ ᱠᱚ ᱪᱚᱨ ᱪᱚᱨ ᱮᱱᱟ, ᱪᱟᱜᱟᱢ ᱪᱟᱜᱟᱢ ᱛᱟᱲᱟᱢ ᱠᱚ ᱟᱸᱡᱚᱢ ᱠᱮᱫᱼᱟ ᱥᱚᱝ ᱦᱩᱲᱩ ᱵᱟᱝ ᱥᱟᱦᱟᱨ ᱞᱮᱱᱟ, ᱥᱟᱸᱵᱟᱜ ᱵᱷᱩᱨᱟᱹᱜ ᱠᱚ ᱠᱩᱠᱢᱩ ᱠᱮᱫᱼᱟ ᱾

ᱟᱫᱚ ᱢᱟᱹᱡᱷᱤ ᱵᱟᱵᱟ ᱴᱷᱮᱱ ᱠᱩᱞᱤ ᱡᱚᱝ ᱮ ᱥᱮᱱ ᱮᱱᱟ ᱟᱨ ᱱᱚᱶᱟ ᱠᱚ ᱠᱟᱛᱷᱟᱭ ᱞᱟᱹᱭ ᱟᱫᱮᱭᱟ ᱾ ᱢᱟᱹᱡᱷᱤ ᱵᱟᱵᱟ ᱦᱚᱸᱭ ᱞᱟᱹᱭ ᱨᱩᱣᱟᱹᱲ ᱟᱫᱮᱭᱟ ᱾ ᱵᱟᱯᱫᱷᱚᱱ ᱟᱯᱮ ᱢᱟ ᱜᱚᱡ ᱜᱩᱨ ᱨᱮᱱᱟᱜ ᱵᱷᱟᱸᱰᱟᱱ ᱠᱟᱹᱢᱤ ᱥᱟᱨᱮᱡ ᱟᱠᱟᱱ ᱛᱟᱯᱮᱭᱟ ᱾ ᱚᱱᱟᱛᱮ ᱱᱚᱝᱠᱟ ᱮᱨᱮ ᱫᱚᱢ ᱟᱹᱭᱠᱟᱣ ᱮᱫᱼᱟ ᱾ ᱢᱟ ᱥᱚᱡᱚᱜ ᱯᱮ ᱵᱷᱟᱸᱰᱟᱱ ᱵᱚ ᱩᱢ ᱯᱷᱟᱨᱪᱟ ᱠᱟᱯᱮᱭᱟ ᱾ ᱜᱚᱰᱮᱛ ᱤᱧ ᱞᱟᱹᱭ ᱟᱭᱟ ᱟᱹᱛᱩᱨᱮ ᱦᱚᱦᱚᱭᱟᱭ ᱾

ᱢᱟᱹᱡᱷᱤ ᱵᱟᱵᱟ ᱜᱚᱰᱮᱛᱮ ᱞᱟᱹᱭ ᱟᱫᱮᱭᱟ ᱢᱚᱬᱮ ᱢᱟᱦᱟᱸ ᱛᱟᱭᱚᱢ ᱾ ᱜᱚᱰᱮᱛ ᱫᱚ ᱟᱹᱛᱩ ᱨᱮ ᱚᱲᱟᱜ ᱚᱲᱟᱜ ᱮ ᱦᱚᱦᱚ ᱠᱮᱫᱼᱟ ᱾ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱯᱷᱟᱨᱱᱟ ᱚᱲᱟᱜ ᱪᱟᱞᱟᱜ ᱞᱟᱹᱜᱤᱫ ᱾ ᱡᱚᱛᱚ ᱦᱚᱲ ᱠᱚ ᱥᱮᱴᱮᱨ ᱮᱱᱟ ᱾ ᱚᱲᱟᱜ ᱢᱩᱱᱤᱵ ᱫᱚ ᱯᱟᱨᱠᱚᱢ ᱠᱚ ᱯᱟᱹᱴᱭᱟᱹ ᱠᱚ ᱜᱟᱸᱰᱚ ᱠᱚ ᱫᱩᱲᱩᱵ ᱞᱟᱹᱜᱤᱫᱼᱮ ᱵᱤᱞᱟᱫ ᱠᱚᱣᱟ ᱾ ᱫᱩᱲᱩᱵ ᱮᱱᱟ ᱠᱚ, ᱟᱫᱚ ᱢᱤᱢᱤᱫ ᱯᱷᱩᱲᱩᱜ ᱛᱟᱝ ᱦᱟᱺᱰᱤ ᱦᱚᱸ ᱜᱷᱟᱹᱨᱱᱤᱭ ᱮᱢᱟᱫ ᱠᱚᱣᱟ ᱾ ᱧᱩ ᱵᱟᱲᱟ ᱠᱟᱛᱮ ᱟᱫᱚ ᱦᱚᱯᱚᱱ ᱠᱚ ᱠᱚ ᱢᱮᱱᱮᱫᱼᱟ ᱾ ᱵᱟᱯᱫᱷᱚᱱ ᱱᱚᱶᱟ ᱫᱚ ᱪᱮᱫ ᱦᱟᱺᱰᱤᱢ ᱮᱢᱟᱫ ᱞᱮᱭᱟ ᱢᱮᱨᱟ ᱜᱮ ᱵᱟᱞᱮ ᱧᱟᱢ ᱞᱮᱫ ᱫᱚ ᱾ ᱜᱟᱨᱡᱚᱱᱮ ᱢᱮᱱ ᱠᱮᱫᱼᱟ, ᱢᱚᱬᱮ ᱢᱟᱦᱟ ᱢᱟᱬᱟᱝ ᱨᱮ ᱨᱚᱞ ᱡᱟᱝ ᱪᱟᱣᱞᱮᱡᱟᱝ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱞᱮ ᱤᱫᱤ ᱦᱚᱴᱚ ᱟᱠᱟᱫᱼᱟ ᱾ ᱟᱠᱚ ᱚᱲᱟᱜ ᱨᱟᱹᱱᱩ ᱛᱮᱜᱮ ᱦᱟᱺᱰᱤ ᱞᱮ ᱦᱟᱹᱨ ᱟᱠᱟᱫᱼᱟ, ᱢᱮᱨᱟ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱨᱮᱜᱮ ᱢᱮᱱᱟᱜᱼᱟ ᱾ ᱟᱹᱠᱤᱱ ᱜᱮ ᱠᱤᱱ ᱞᱟᱹᱭ ᱢᱟ ᱪᱮᱫ ᱞᱮᱠᱟᱱ ᱢᱮᱨᱟ ᱠᱟᱱᱟ ᱾ ᱟᱫᱚ ᱢᱟᱹᱡᱷᱤ ᱵᱟᱵᱟᱭ ᱞᱟᱹᱭ ᱠᱮᱫᱼᱟ ᱾ ᱦᱚᱭ ᱵᱟᱯᱫᱷᱚᱱ ᱱᱚᱶᱟ ᱫᱚ ᱢᱩᱪᱩ ᱨᱮᱠᱚ ᱪᱟᱞᱟ ᱟᱠᱟᱫᱼᱟ ᱾ ᱚᱱᱟᱛᱮ ᱢᱮᱨᱟ ᱫᱚ ᱵᱟᱹᱱᱩᱜ ᱟᱱᱟ, ᱱᱟᱹᱨᱲᱤ ᱨᱮᱦᱚᱸ ᱵᱟᱝ ᱰᱷᱟᱝ ᱚᱜ ᱠᱟᱱᱟ ᱾ ᱢᱟᱹᱡᱷᱤ ᱵᱟᱵᱟᱭ ᱢᱮᱱᱟ, ᱦᱚᱭ ᱵᱟᱯᱫᱷᱚᱱ ᱢᱮᱨᱟ ᱵᱟᱝ ᱰᱷᱟᱝ ᱚᱜᱼᱟ, ᱯᱷᱟᱨᱱᱟ ᱚᱲᱟᱜ ᱨᱤᱱ ᱢᱟᱨᱮ ᱦᱟᱯᱲᱟᱢ ᱠᱚ ᱜᱮ ᱯᱟᱞᱮ ᱠᱚ ᱰᱷᱟᱝ ᱚᱜ ᱠᱟᱱᱟ ᱾ ᱚᱱᱟᱛᱮ ᱵᱟᱝ ᱰᱷᱟᱝ ᱚᱜ ᱞᱟᱹᱜᱤᱫ, ᱵᱷᱟᱸᱰᱟᱱ ᱠᱟᱹᱢᱤ ᱵᱚ ᱠᱟᱹᱢᱤ ᱛᱟᱠᱚ ᱨᱮᱱᱟᱜ ᱦᱮᱲᱮ ᱦᱩᱲᱩ ᱵᱚ ᱥᱚᱝ ᱟ ᱾ ᱢᱟ ᱪᱮᱫ ᱯᱮ ᱢᱮᱱᱮᱫᱼᱟ ?

ᱦᱚᱭ ᱛᱚᱵᱮ ᱵᱟᱯᱫᱷᱚᱱ ᱚᱱᱟ ᱫᱚ ᱵᱚ ᱠᱟᱹᱢᱤ ᱠᱟᱜ ᱜᱮᱭᱟ ᱾ ᱫᱮ ᱥᱚᱡᱽ ᱠᱚ ᱥᱟᱢᱟᱝ ᱯᱮ ᱾ ᱟᱫᱚ ᱜᱟᱨᱡᱚᱱ ᱫᱚ ᱦᱩᱲᱩ ᱜᱩᱦᱬᱤ ᱥᱟᱠᱟᱢ ᱪᱟᱨᱮᱡ ᱥᱟᱥᱟᱝ ᱥᱩᱛᱟᱹᱢ ᱫᱩᱵᱤᱜᱟᱥ ᱟᱫᱽᱣᱟ ᱪᱟᱣᱞᱮᱭ ᱧᱟᱢ ᱚᱰᱚᱠ ᱠᱮᱫᱼᱟ ᱾

ᱯᱮ ᱴᱩᱠᱩᱡ ᱦᱟᱺᱰᱤ ᱨᱮᱱᱟᱜ ᱦᱩᱲᱩ ᱠᱚ ᱥᱚᱝ ᱠᱮᱫᱼᱟ, ᱢᱤᱫ ᱴᱩᱠᱩᱡ ᱨᱮ ᱜᱮᱞ ᱵᱟᱨ ᱠᱟᱴᱷᱟ ᱠᱟᱛᱮ ᱾ ᱯᱮ ᱴᱩᱠᱩᱡ ᱫᱚ ᱢᱟᱨᱟᱝ ᱵᱳᱨᱳ, ᱦᱟᱯᱲᱟᱢ ᱠᱚ ᱟᱨ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱞᱟᱹᱜᱤᱫ ᱾

ᱜᱤᱨᱟᱹ ᱠᱚ ᱛᱚᱞ ᱠᱮᱫᱼᱟ, ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ ᱛᱚᱣᱟ ᱵᱟᱞᱮ ᱛᱮ ᱾ ᱪᱟᱞ ᱟᱠᱚᱣᱟ ᱠᱚ ᱦᱚᱯᱚᱱ ᱮᱨᱟ ᱢᱤᱥᱨᱟ ᱦᱟᱛᱚᱢ ᱠᱟᱹᱠᱤ ᱯᱷᱩᱞ ᱨᱟᱹᱱᱤ ᱯᱮᱲᱟ ᱾

ᱢᱩᱪᱟᱹᱫ ᱪᱟᱨ ᱧᱩ ᱠᱟᱛᱮ ᱟᱹᱛᱩ ᱦᱚᱲ ᱥᱮᱨᱮᱧ ᱡᱚᱝ ᱠᱟᱱᱟ -

ᱜᱤᱨᱟᱹᱛᱚᱞ

ᱨᱚᱲᱮ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ ᱾

ᱛᱚᱠᱚᱭ ᱠᱚᱫᱚ ᱠᱚ ᱜᱤᱨᱟᱹ ᱭᱮᱱᱟ ᱦᱳ,

ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ,

ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱨᱟ~ᱨᱟᱜ ᱫᱚ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱛᱚᱠᱚᱭ ᱠᱚᱫᱚ ᱠᱚ ᱜᱤᱨᱟᱹ ᱭᱮᱱᱟ ᱦᱳ,

ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ,

ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱦᱚᱜᱢᱚᱨ ᱫᱚ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱦᱚᱯᱚᱱ ᱮᱨᱟ ᱢᱤᱥᱨᱟ ᱦᱟᱛᱚᱢ ᱠᱟᱹᱠᱤ ,

ᱯᱷᱩᱞ ᱯᱮᱲᱟ ᱠᱚ ᱜᱤᱨᱟᱹ ᱭᱮᱱᱟ ᱦᱳ,

ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ,

ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱨᱟ~ᱨᱟᱜ ᱫᱚ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱵᱟᱞᱟ ᱥᱟᱠᱟ ᱠᱚ ᱜᱤᱨᱟᱹ ᱭᱮᱱᱟ ᱦᱳ,

ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ,

ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱦᱚᱜᱢᱚᱨ ᱫᱚ,

ᱦᱤᱨᱞᱟᱹ ᱢᱟᱨᱟᱝ ᱵᱩᱨᱩ ᱦᱤᱨᱞᱟᱹ ᱨᱮ ᱾

ᱱᱚᱝᱠᱟ ᱜᱤᱨᱟᱹ ᱠᱚ ᱛᱚᱞ ᱵᱟᱲᱟ ᱠᱟᱛᱮ ᱜᱟᱛᱮ ᱜᱟᱛᱮ ᱦᱟᱹᱴᱤᱧ ᱵᱟᱲᱟ ᱟᱱ ᱛᱮ ᱠᱚ ᱟᱯᱟᱱ ᱟᱹᱯᱤᱱ ᱚᱲᱟᱜ ᱠᱚ ᱨᱩᱣᱟᱹᱲ ᱮᱱᱟ ᱾ ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱜᱤᱨᱟᱹ ᱞᱟᱹᱭ ᱠᱚ ᱫᱟᱬᱟ ᱠᱮᱫᱼᱟ ᱾

ᱜᱤᱨᱟᱹ ᱪᱟᱞ

ᱮᱛᱚᱢ ᱠᱚᱧᱮ ᱥᱟᱢᱟᱝ ᱯᱟᱪᱮ,

ᱵᱮᱲᱟ ᱨᱟᱠᱟᱵ ᱵᱮᱲᱟ ᱠᱚᱪᱮ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱫᱟ~ᱟᱜ ᱛᱮᱛᱟᱝ ᱫᱟᱠᱟ ᱨᱮᱸᱜᱮᱡ,

ᱜᱚ~ᱚᱰ ᱡᱚᱦᱟᱨ ᱞᱮᱜᱮᱡ ᱞᱮᱜᱮᱡ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱫᱟ~ᱬᱟ ᱠᱮᱫᱼᱟ ᱠᱚ ᱡᱚᱲᱟ ᱡᱚᱲᱟ,

ᱱᱮ~ᱶᱛᱟ ᱠᱚᱣᱟ ᱠᱚ ᱡᱚᱛᱚ ᱯᱮᱲᱟ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱯᱟ~ᱨᱚᱢ ᱮᱱᱟ ᱜᱮᱭᱟᱭ ᱢᱟᱦᱟᱸ,

ᱥᱮ~ᱴᱮᱨ ᱮᱱᱟ ᱱᱮᱸᱰᱟ ᱢᱟᱦᱟᱸ,

ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱨᱮ ᱾

ᱵᱤᱱᱛᱤ

ᱥᱮᱴᱮᱨ ᱮᱱᱟ ᱠᱚ ᱯᱮᱲᱟ ᱯᱟᱹᱦᱬᱟ, ᱠᱩᱞᱦᱤ ᱢᱩᱪᱟᱹᱫ ᱫᱚᱵᱟᱹᱴᱤ ᱠᱷᱚᱱᱟᱜ ᱜᱮᱠᱚ ᱨᱟᱜ ᱦᱚᱢᱚᱨ ᱟᱹᱜᱩ ᱠᱮᱫᱼᱟ ᱾ ᱠᱚᱭᱚᱜ ᱫᱟᱨᱟᱢ ᱠᱮᱫ ᱠᱚᱣᱟ ᱠᱚ ᱟᱹᱛᱩ ᱢᱟᱸᱯᱟᱧᱡᱤ ᱵᱩᱰᱤ ᱮᱨᱟ ᱟᱨ ᱚᱲᱟᱜ ᱦᱚᱲ ᱥᱟᱶᱛᱮ ᱾ ᱦᱚᱭᱚ ᱢᱩᱰᱨᱟᱹ ᱵᱟᱲᱟᱭᱮᱱᱟ ᱠᱚ ᱾ ᱱᱟᱹᱯᱤᱛ ᱵᱟᱵᱟ ᱡᱚᱛᱚ ᱜᱟᱬᱟᱭ ᱦᱚᱭᱚ ᱯᱩᱨᱟᱣ ᱠᱮᱫ ᱠᱚᱣᱟ ᱾ ᱢᱩᱪᱟᱹᱫ ᱩᱛᱟᱹᱨ ᱨᱮ ᱫᱚ ᱠᱤᱥᱟᱹᱬ ᱟᱨ ᱱᱟᱹᱯᱤᱛ ᱠᱤᱱ ᱦᱚᱯᱚᱭᱚ ᱭᱮᱱᱟ ᱾ ᱚᱱᱟ ᱛᱟᱭᱚᱢ ᱠᱤᱥᱟᱹᱬ ᱟᱨ ᱱᱟᱹᱯᱤᱛ ᱚᱲᱟᱜ ᱠᱤᱱ ᱵᱚᱞᱚ ᱭᱮᱱᱟ ᱾ ᱚᱲᱟᱜ ᱠᱷᱚᱱ ᱡᱟᱹᱴᱤ ᱦᱟᱥᱟ ᱠᱟᱲᱮ ᱥᱩᱱᱩᱢ ᱥᱟᱨᱡᱚᱢ ᱥᱟᱠᱟᱢ ᱫᱟᱹᱛᱟᱹᱣᱱᱤ ᱥᱟᱵ ᱥᱮᱯᱮᱧ ᱠᱟᱛᱮ ᱠᱤᱱ ᱚᱰᱚᱠ ᱮᱱᱟ ᱾ ᱱᱟᱹᱯᱤᱛ ᱵᱟᱵᱟ ᱛᱩᱯᱩᱱᱟᱺᱭ ᱜᱷᱟᱴ ᱥᱮᱫᱼᱮ ᱟᱹᱭᱩᱨ ᱠᱮᱫ ᱠᱚᱣᱟ ᱾

ᱨᱚᱲᱮ,

ᱛᱟ~ᱦᱟᱸ~ᱨᱮᱛᱟ ᱱᱟ~ᱱᱟ~ᱛᱟᱨᱱᱟ,

ᱛᱟ~ᱦᱟᱸ~ᱨᱮᱛᱟ ᱱᱟ~ᱱᱟ~ᱡᱮ,

ᱛᱟ~ᱦᱟᱸ~ᱨᱮᱛᱟ ᱱᱟ~ᱱᱟ~ᱦᱳ ᱾

ᱫᱟᱬᱟ ᱫᱟᱬᱟ ᱪᱤᱭᱟᱹ ᱭᱟᱹᱠᱤᱱ ᱥᱟᱹᱨᱤ ᱫᱟᱜ ᱦᱳ,

ᱯᱟᱸᱡᱟ ᱯᱟᱸᱡᱟ ᱯᱟᱱᱛᱮ ᱭᱟᱹᱠᱤᱱ ᱥᱟᱹᱛᱤᱧ ᱫᱟᱜ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱱᱟᱺᱜᱭᱩᱨ ᱦᱳ ᱾᱾

ᱱᱟᱹᱭ ᱱᱟᱹᱭ ᱢᱟ ᱜᱟᱝ ᱱᱟᱹᱭ ᱦᱳ,

ᱫᱟᱜ ᱫᱚ ᱯᱷᱟᱨᱪᱟ ᱫᱟᱜ ᱫᱚ ᱥᱟᱨᱪᱟ,

ᱜᱟᱺᱜᱤ ᱪᱟᱶᱨᱤᱡ ᱪᱟᱯᱮ ᱟᱠᱟᱱ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱨᱩᱜᱣᱟᱹᱲ ᱦᱳ ᱾᱾

ᱱᱟᱹᱭ ᱱᱟᱹᱭ ᱢᱟ ᱥᱩᱲᱟᱹ ᱱᱟᱹᱭ ᱦᱳ,

ᱫᱟᱜ ᱫᱚ ᱯᱷᱟᱨᱪᱟ ᱫᱟᱜ ᱫᱚ ᱥᱟᱨᱪᱟ,

ᱫᱟᱜ ᱠᱟᱰᱟᱭ ᱯᱷᱩᱴᱟᱜ ᱟᱠᱟᱱ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱨᱩᱣᱟᱹᱲ ᱫᱚ ᱾᱾

ᱱᱟᱹᱭ ᱱᱟᱹᱭ ᱢᱟ ᱠᱩᱨᱠᱩᱴ ᱱᱟᱹᱭ ᱦᱳ,

ᱫᱟᱜ ᱫᱚ ᱯᱷᱟᱨᱪᱟ ᱫᱟ ᱫᱚ ᱥᱟᱨᱪᱟ,

ᱫᱟᱜ ᱥᱤᱢ ᱥᱟᱺᱰᱤᱭ ᱪᱟᱯᱮ ᱟᱠᱟᱱ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱨᱩᱣᱟᱹᱲ ᱦᱳ ᱾᱾

ᱱᱟᱹᱭ ᱱᱟᱹᱭ ᱢᱟ ᱜᱤᱨᱩ ᱱᱟᱹᱭ ᱦᱳ,

ᱫᱟᱜ ᱫᱚ ᱥᱮᱭᱟ ᱫᱟᱜ ᱫᱚ ᱥᱤᱬᱤᱡ,

ᱜᱤᱨᱩᱞ ᱢᱟᱭᱟᱢ ᱯᱚᱨᱮᱫ ᱟᱠᱟᱱ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱨᱩᱣᱟᱹᱲ ᱦᱳ ᱾᱾

ᱱᱟᱹᱭ ᱱᱟᱹᱭ ᱢᱟ ᱴᱟᱹᱴᱤ ᱡᱷᱟᱹᱨᱤ ᱦᱳ,

ᱫᱟᱜ ᱫᱚ ᱥᱟᱥᱟᱝ ᱫᱟᱜ ᱫᱚ ᱱᱤᱨᱟᱹᱭ,

ᱢᱟᱹᱱᱢᱤ ᱚᱲᱚᱝ ᱡᱷᱟᱞᱠᱟᱣ ᱨᱟᱠᱟᱵ ᱫᱚ,

ᱱᱟᱹᱭ ᱱᱟᱹᱯᱤᱛ ᱵᱟᱵᱟᱭ ᱛᱤᱸᱜᱩᱭᱮᱱᱟ,

ᱜᱷᱟᱴᱠᱤᱱ ᱠᱤᱨᱤᱧ ᱜᱷᱟᱴᱠᱤᱱ ᱱᱟᱬᱜᱚᱱ,

ᱱᱩᱢᱮ ᱨᱟᱠᱟᱵ ᱥᱚᱱᱮᱨ ᱥᱤᱫᱷᱚᱜ ᱦᱚ ᱾᱾

ᱱᱚᱝᱠᱟ ᱱᱟᱺᱭ ᱫᱟᱜ ᱯᱟᱱᱛᱮ ᱨᱮᱱᱟᱜ ᱚᱡᱮ ᱫᱚ ᱱᱚᱶᱟ ᱠᱟᱱᱟ ᱦᱟᱯᱮᱱ ᱦᱟ ᱨᱮ ᱱᱚᱶᱟ ᱡᱤᱣᱤ ᱢᱟᱹᱱᱢᱤ ᱨᱩᱯᱛᱮ ᱟᱵᱚ ᱛᱟᱞᱟ ᱨᱮ ᱡᱟᱱᱟᱢ ᱨᱩᱣᱟᱲᱚᱜ ᱨᱮᱱᱟᱜ ᱯᱟᱹᱛᱭᱟᱣ ᱢᱮᱱᱟᱜᱼᱟ ᱾ ᱚᱱᱟᱛᱮ ᱥᱟᱹᱨᱤ ᱫᱟᱜ ᱥᱚᱱᱚᱛ ᱜᱷᱟᱴ ᱨᱮ ᱛᱩᱯᱩ ᱞᱮᱱᱠᱷᱟᱱ ᱢᱟᱹᱱᱢᱤ ᱡᱟᱱᱟᱢ ᱧᱟᱢᱚᱜᱼᱟ ᱾ ᱵᱟᱝ ᱠᱷᱟᱱ ᱡᱟᱹᱡᱟᱱᱟᱢ ᱮᱴᱟᱜᱚᱜᱼᱟ ᱾ ᱥᱮᱫᱟᱭ ᱟᱹᱜᱤᱞ ᱢᱟᱨᱮ ᱦᱟᱯᱲᱟᱢ ᱠᱤᱱ ᱪᱮᱬᱮ ᱠᱟᱱ ᱛᱟᱦᱮᱫ ᱠᱤᱱ, ᱩᱱᱠᱤᱱ ᱜᱚᱴᱟ ᱚᱜᱚᱢ ᱫᱚᱨᱭᱟ ᱵᱤᱡ ᱵᱤᱞᱤ ᱠᱤᱱ ᱵᱮᱡ ᱞᱮᱫᱼᱟ ᱾ ᱫᱟᱜ ᱯᱤᱪᱷᱤ ᱜᱮ ᱵᱤᱡ ᱠᱷᱚᱱ ᱡᱩᱫᱟᱹ ᱡᱩᱫᱟᱹ ᱡᱟᱹᱱᱤ ᱠᱚ ᱵᱩᱥᱟᱹᱲ ᱞᱮᱱᱟ ᱾ ᱯᱩᱭᱞᱩ ᱫᱚ ᱢᱤᱫ ᱠᱩᱪᱤ ᱩᱱᱠᱩ ᱫᱚ ᱵᱟᱠᱚ ᱦᱚᱯᱚᱱᱚᱜᱼᱟ ᱦᱚᱲᱢᱚ ᱜᱮᱠᱚ ᱠᱮᱪᱟᱜᱚᱜᱼᱟ ᱾ ᱤᱱᱟᱹ ᱛᱟᱭᱚᱢ ᱵᱤᱱ ᱵᱤᱥᱤ ᱡᱟᱝ ᱟᱱᱠᱚ ᱠᱚ, ᱩᱱᱠᱩ ᱫᱚ ᱵᱤᱞᱤ ᱠᱟᱛᱮ ᱠᱚ ᱵᱩᱥᱟᱹᱲᱚᱜᱼᱟ ᱾ ᱤᱱᱟᱹ ᱛᱟᱭᱚᱢ ᱵᱤᱥᱤ ᱡᱟᱝ ᱟᱱ ᱠᱚ ᱵᱟᱨ ᱡᱟᱸᱜᱟ ᱯᱩᱱ ᱡᱟᱸᱜᱟ ᱥᱟᱸᱜᱮ ᱡᱟᱜᱟ ᱟᱱᱠᱚ ᱵᱤᱞᱤ ᱠᱷᱚᱱ ᱠᱚ ᱵᱩᱥᱟᱹᱲ ᱞᱮᱱᱟ ᱾ ᱫᱟᱬᱟ ᱫᱟᱬᱟ ᱟᱹᱛᱤᱧ ᱟᱹᱛᱤᱧ ᱱᱚᱝᱠᱟᱱ ᱫᱟᱜ ᱠᱤᱱ ᱧᱟᱢ ᱠᱮᱫᱼᱟ ᱚᱱᱟ ᱨᱮ ᱟᱹᱛᱤᱧ ᱠᱟᱛᱮ ᱠᱟᱨᱟᱢ ᱫᱟᱨᱮ ᱨᱮ ᱠᱤᱱ ᱵᱤᱡ ᱠᱮᱫᱼᱟ, ᱚᱱᱟ ᱠᱷᱚᱱ ᱢᱟᱹᱱᱢᱤ ᱠᱤᱱ ᱵᱩᱥᱟᱹᱲ ᱞᱮᱱᱟ ᱾ ᱛᱮᱦᱮᱧ ᱚᱱᱠᱟᱱ ᱫᱟᱜ ᱴᱟᱹᱴᱤ ᱡᱷᱟᱹᱨᱤ ᱥᱟᱥᱟᱝ ᱫᱟᱨᱦᱟ ᱥᱚᱱᱟ ᱛᱚᱞ ᱥᱚᱱᱚᱛ ᱢᱮᱨᱟᱞ ᱜᱷᱟᱴ ᱨᱮ ᱱᱩᱠᱩ ᱯᱷᱟᱨᱱᱟ ᱯᱟᱹᱨᱤᱥ ᱦᱚᱲ ᱫᱚ ᱱᱟᱹᱭ ᱫᱟᱜ ᱡᱟᱹᱴᱤ ᱦᱟᱥᱟ ᱛᱮ ᱩᱢ ᱠᱮᱫ ᱱᱟᱲᱠᱟ ᱠᱮᱫ ᱠᱚᱛᱮ ᱵᱚ ᱥᱚᱱᱮᱨ ᱥᱤᱫᱷᱚ ᱠᱮᱫ ᱠᱚᱣᱟ ᱾

ᱛᱮᱦᱮᱧ ᱠᱷᱚᱱ ᱱᱩᱠᱩ ᱯᱷᱟᱨᱱᱟ ᱯᱟᱹᱨᱤᱥ ᱦᱚᱲ ᱫᱚ ᱥᱮᱸᱫᱽᱨᱟ ᱨᱮ ᱠᱟᱨᱠᱟ ᱨᱮ ᱵᱚᱝᱜᱟᱜ ᱨᱮ ᱵᱩᱨᱩᱜ ᱨᱮ ᱦᱟᱺᱰᱤ ᱵᱚᱰᱚᱡ ᱫᱟᱜ ᱜᱚᱜ ᱡᱚᱛᱚᱣᱟᱜ ᱨᱮᱜᱮ ᱵᱚ ᱫᱩ ᱫᱮᱞᱟ ᱟᱠᱚᱣᱟ ᱾ ᱚᱱᱟ ᱛᱮᱠᱚ ᱞᱟᱹᱭᱟ ᱱᱟᱦᱮᱞ ᱜᱟᱰᱠᱮ ᱫᱚ ᱠᱚ ᱠᱚᱞᱥᱟᱭᱟ ᱠᱟᱛᱷᱟ ᱜᱟᱸᱠᱮ ᱫᱚ ᱵᱟᱠᱚ ᱫᱚᱱ ᱯᱟᱨᱚᱢᱟ ᱾ ᱦᱩᱰᱤᱧᱟᱜ ᱦᱚᱸ ᱥᱟᱨᱡᱚᱢ ᱜᱮ ᱢᱟᱨᱟᱝ ᱟᱜ ᱦᱚᱸ ᱥᱟᱨᱡᱚᱢ ᱜᱮ ᱡᱚᱦᱟᱨ ᱾

ᱥᱮᱨᱮᱧ

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ,ᱛᱚᱠᱚᱭ ᱠᱚᱫᱚ ᱯᱮᱲᱟ ᱪᱷᱟᱢᱰᱟ ᱞᱟᱛᱟᱨ ?

ᱛᱚᱠᱚᱭ ᱠᱚᱫᱚ ᱯᱮᱲᱟ,

ᱡᱷᱟᱹᱴᱤ ᱴᱟᱹᱴᱤ ᱵᱟᱵᱚ ᱵᱚᱞᱟ,

ᱛᱚᱠᱚᱭ ᱠᱚᱫᱚ ᱯᱮᱲᱟ ᱫᱚᱵᱟᱹᱴᱤ ᱨᱮ ?

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ,

ᱦᱚᱯᱚᱱ ᱮᱨᱟ ᱢᱤᱥᱨᱟ,

ᱦᱟᱛᱚᱢ ᱠᱟᱹᱠᱤ ᱯᱷᱩᱞ ᱯᱮᱲᱟ,

ᱱᱩᱠᱩ ᱠᱚᱫᱚ ᱯᱮᱲᱟ ᱪᱷᱟᱢᱰᱟ ᱞᱟᱛᱟᱨ,

ᱵᱟᱞᱟ ᱯᱮᱲᱟ ᱠᱚᱫᱚ ᱫᱚᱵᱟᱹᱴᱤ ᱨᱮ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ,

ᱛᱚᱠᱚᱭ ᱠᱚ ᱫᱚ ᱯᱮᱲᱟ,

ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ,

ᱛᱚᱠᱚᱭ ᱠᱚᱫᱚ ᱯᱮᱲᱟ ᱥᱤᱥᱤᱨ ᱰᱚᱞᱟᱣ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ,

ᱟᱛᱩ ᱢᱟᱯᱟᱧᱡᱤ ᱠᱚ ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ,

ᱠᱩᱢᱟᱝ ᱡᱟᱶᱟᱭ ᱠᱚ ᱫᱚ ᱥᱤᱥᱤᱨ ᱰᱚᱞᱟᱣ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ,

ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ,

ᱯᱟᱭ ᱠᱩᱲᱟᱹᱭ ᱪᱷᱟᱢᱰᱟ ᱦᱟᱺᱰᱤ,

ᱥᱤᱥᱤᱨ ᱰᱚᱞᱟᱣ ᱠᱚ ᱫᱚ ᱥᱤᱥᱤᱨ ᱦᱟᱺᱰᱤ,

ᱨᱟᱢᱟ ᱨᱮᱰᱮᱫ ᱨᱮᱫᱚ ᱥᱟᱢᱮᱞᱟᱭ ᱜᱮ ᱾

ᱥᱤᱢ ᱠᱩᱴᱟᱹᱢ

ᱥᱤᱢ ᱫᱚ ᱪᱷᱟᱢᱰᱟ ᱞᱟᱛᱟᱨ ᱨᱮᱠᱚ ᱠᱩᱴᱟᱹᱢ ᱠᱚᱣᱟ ᱾ ᱚᱱᱟ ᱪᱷᱟᱢᱰᱟ ᱫᱚ ᱢᱚᱬᱮ ᱦᱚᱲ ᱠᱚ ᱵᱟᱱᱟᱣᱟ ᱾ ᱥᱟᱛᱮ ᱵᱷᱤᱲᱟᱣ ᱨᱮ ᱥᱟᱨᱡᱚᱢ ᱠᱷᱩᱱᱴᱤ ᱥᱟᱨᱡᱚᱢ ᱯᱟᱹᱲ ᱛᱮ ᱠᱚ ᱵᱮᱱᱟᱣᱟ ᱾ ᱡᱟᱦᱮᱨ ᱥᱟᱹᱲᱤᱢ ᱞᱮᱠᱟ ᱾ ᱚᱸᱰᱮ ᱜᱮ ᱦᱟᱯᱲᱟᱢ ᱠᱚ ᱧᱩᱛᱩᱢ ᱛᱮ ᱢᱟᱨᱟᱝ ᱵᱳᱨᱳ ᱧᱩᱛᱩᱢ ᱛᱮ ᱯᱩᱸᱰ ᱥᱟ:ᱰᱤ ᱦᱟᱯᱲᱟᱢ ᱠᱚ ᱧᱩᱛᱩᱢ ᱛᱮ ᱟᱨᱟᱜ ᱥᱟᱺᱰᱤ ᱟᱨ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱧᱩᱛᱩᱢ ᱛᱮ ᱢᱤᱫ ᱜᱩᱞᱤ ᱯᱟᱹᱴᱷᱤ ᱠᱚ ᱠᱩᱴᱟᱹᱢ ᱮᱭᱟ ᱾ ᱪᱷᱟᱢᱰᱟ ᱞᱟᱛᱟᱨ ᱨᱮ ᱵᱤᱞᱤ ᱞᱮᱠᱟ ᱜᱩᱞᱟᱹᱭ ᱠᱚ ᱜᱩᱨᱤᱡᱟ ᱾ ᱚᱲᱟᱜ ᱠᱷᱚᱱ ᱵᱚᱝᱜᱟᱜ ᱠᱚ ᱚᱰᱚᱠ ᱦᱤᱡᱩᱜᱼᱟ ᱾ ᱦᱟᱴᱟᱜ ᱨᱮ ᱢᱤᱫ ᱠᱟᱴᱷᱟ ᱛᱤᱠᱤ ᱦᱩᱲᱩ ᱪᱟᱣᱞᱮ ᱯᱮᱭᱟ ᱥᱟᱨᱡᱚᱢ ᱥᱟᱠᱟᱢ ᱯᱟᱛᱲᱟ, ᱠᱟᱸᱥᱟ ᱵᱟᱹᱴᱤᱨᱮ ᱛᱟᱝ ᱦᱟᱺᱰᱤ, ᱞᱟᱹᱠᱛᱤ ᱡᱟᱹᱱᱤᱡ ᱵᱷᱟᱹᱱᱛᱩᱡ ᱯᱷᱩᱲᱩᱜ ᱾ ᱢᱤᱫ ᱴᱟᱹᱝ ᱵᱩᱰᱤᱭᱟᱹ ᱡᱟᱶᱟᱭ ᱜᱚᱝᱠᱮ ᱠᱚ ᱥᱟᱵ ᱫᱟᱨᱟᱭᱟ ᱾ ᱟᱫᱚ ᱪᱷᱟᱢᱰᱟ ᱞᱟᱛᱟᱨ ᱨᱮ ᱯᱮᱭᱟ ᱯᱟᱛᱲᱟ ᱠᱚ ᱟᱴᱮᱫᱟ, ᱮᱛᱚᱢ ᱠᱷᱚᱱ ᱠᱚᱧᱮ ᱥᱮᱫ ᱯᱮᱭᱟ ᱯᱟᱛᱲᱟᱭ ᱠᱚ ᱫᱚᱦᱚ ᱤᱫᱤᱭᱟ ᱾ ᱮᱛᱚ ᱯᱟᱛᱲᱟ ᱨᱮ ᱢᱤᱫ ᱪᱩᱯᱩᱫ ᱛᱤᱠᱤ ᱪᱟᱣᱞᱮᱭ ᱪᱩᱨᱩᱡᱟ ᱾ ᱛᱟᱞᱟ ᱯᱟᱛᱲᱟ ᱨᱮ ᱯᱮ ᱪᱩᱯᱩᱫ ᱦᱟᱯᱲᱟᱢ ᱠᱚ ᱧᱩᱛᱩᱢ ᱛᱮ, ᱢᱩᱪᱟᱹᱫ ᱯᱷᱩᱲᱩᱜ ᱨᱮ ᱢᱤᱫ ᱪᱩᱯᱩᱫ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱧᱩᱛᱩᱢ ᱛᱮ ᱾

ᱠᱟᱸᱫᱽ ᱚᱰᱚᱠ

ᱞᱟᱹᱠᱛᱤᱭᱟᱱᱟᱜ ᱠᱚ;

ᱛᱟᱝ ᱦᱟᱺᱰᱤᱧᱩᱭ ᱞᱟᱹᱜᱤᱫ , ᱦᱟᱺᱰᱤ ᱴᱩᱠᱡ , ᱯᱷᱟᱹᱛᱭᱟᱹᱜ ᱪᱟᱣᱞᱮ , ᱪᱟᱹᱴᱤᱡ ᱯᱷᱟᱹᱲᱤ , ᱯᱮᱭᱟ ᱥᱟᱦᱟᱱ ᱯᱟᱛᱲᱟᱜ , ᱫᱟᱜ ᱪᱩᱠᱟᱹᱜ . ᱥᱮᱸᱜᱮᱞ ᱴᱷᱩᱴᱠᱟᱹᱫ , ᱥᱟᱥᱟᱝ , ᱵᱩᱞᱩᱝ , ᱢᱟᱹᱨᱤᱪ , ᱫᱟᱹᱞ , ᱫᱚᱠᱛᱟ , ᱪᱩᱱ ᱾

ᱨᱚᱲᱮ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ

ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ

ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ ᱾

ᱨᱚᱲᱮ,

ᱮ ᱵᱟᱵᱟ ᱢᱟᱹᱡᱷᱤ ᱵᱟᱵᱟ, ᱯᱟᱨᱟᱱᱤᱠ ᱵᱟᱵᱟ,

ᱡᱚᱜᱚ ᱵᱟᱵᱟ, ᱡᱚᱜᱽ ᱯᱟᱨᱟᱱᱤᱠ ᱵᱟᱵᱟ,

ᱜᱚᱰᱮᱛ ᱵᱟᱵᱟ,

ᱠᱟᱸᱫᱽ ᱠᱟᱴᱷᱤ ᱨᱚᱫᱚᱱ ᱠᱟᱹᱴᱷᱤ

ᱨᱚᱫᱚᱱ ᱠᱟᱹᱴᱤᱧ ᱵᱤᱫᱟᱹᱭ ᱵᱟᱦᱮᱨᱟ ᱾

ᱮ~ᱵᱟᱹᱵᱩ ᱯᱷᱟᱨᱱᱟ ᱵᱟᱹᱵᱩ

ᱠᱟᱸᱫᱷ ᱠᱟᱹᱴᱷᱤ ᱨᱚᱫᱚᱱ ,

ᱨᱚᱫᱚᱱ ᱠᱟᱹᱴᱷᱤᱢ ᱵᱤᱫᱟᱹᱭ ᱵᱟᱦᱮᱨᱟᱹᱹᱹ

ᱵᱷᱟᱸᱰᱟᱹᱨᱤ

ᱢᱩᱬ ᱚᱱᱚᱞ: ᱵᱷᱟᱸᱰᱟᱱ ᱵᱷᱟᱸᱰᱟᱹᱨᱤ

ᱞᱟᱹᱠᱛᱤᱭᱟᱱᱟᱜ ᱠᱚ;

ᱠᱟᱴᱷᱟ/ᱯᱟᱹᱭᱞᱟᱹ ᱪᱟᱣᱞᱮ , ᱦᱟᱺᱰᱤ ᱴᱩᱠᱩᱡ , ᱞᱩᱜᱽᱲᱤ , ᱪᱩᱱ , ᱫᱚᱠᱛᱟ , ᱵᱩᱞᱩᱝ ᱾ᱥᱟᱥᱟᱝ , ᱩᱛᱟᱹᱱ ,ᱟᱱᱟ ᱠᱟᱣᱰᱤ ᱟᱨ ᱧᱩ ᱞᱟᱹᱜᱤᱫ ᱛᱟᱝ ᱦᱟᱺᱰᱤ ᱥᱮᱨᱮᱧ ᱠᱚ ᱠᱚᱭᱟ ᱾

ᱨᱚᱲᱮ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ

ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ,

ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱮ ᱵᱟᱵᱟ ᱢᱟᱹᱡᱷᱤ ᱵᱟᱵᱟ,

ᱮ ᱵᱟᱵᱟ ᱯᱟᱨᱟᱱᱤᱠ ᱵᱟᱵᱟ,

ᱮ ᱵᱟᱵᱟ ᱡᱚᱜᱽ ᱢᱟᱹᱡᱷᱤ ᱵᱟᱵᱟ, ᱡᱚᱜᱽ ᱯᱟᱨᱟᱱᱤᱠ ᱵᱟᱵᱟ, ᱜᱚᱰᱮᱛ ᱵᱟᱵᱟ, ᱵᱷᱟᱹᱜᱤ ᱵᱷᱟᱸᱰᱟᱹᱨᱤᱧ ᱵᱤᱫᱟᱹᱭ ᱵᱟᱦᱮᱨ ᱠᱤᱱ ᱾

ᱮ ᱵᱟᱹᱵᱩ ᱯᱷᱟᱨᱱᱟ ᱵᱟᱹᱵᱩ

ᱱᱚᱣᱟ ᱦᱚᱸ ᱧᱮᱞ ᱢᱮ

• ᱵᱤᱱᱛᱤ
• ᱠᱟᱨᱟᱢ ᱵᱤᱱᱛᱤ

ᱯᱩᱛᱷᱤ ᱠᱚ

• ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ (1939). ᱦᱚᱨ ᱥᱮᱨᱮᱧ.