ᱢᱟᱭᱱᱚ ᱴᱩᱰᱩ
| ᱢᱟᱭᱱᱚ ᱴᱩᱰᱩ (ᱦᱟᱸᱥᱫᱟᱜ) | |
|---|---|
 | |
| ᱡᱟᱱᱟᱢ | ᱢᱟᱭᱱᱚ ᱴᱩᱰᱩ (᱑᱑.᱐᱓.᱑᱙᱘᱕ ) 1985 (age 38–39) ᱟᱺᱫᱷᱟᱹᱨᱤᱭᱟᱹ, ᱢᱚᱭᱩᱨᱵᱷᱚᱸᱡᱽ, ᱳᱰᱤᱥᱟ |
| ᱠᱟᱹᱢᱤ | ᱚᱱᱚᱞᱤᱭᱟᱹ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱤᱨᱯᱷᱟᱹ | ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱡᱩᱣᱟᱹᱱ ᱥᱤᱨᱯᱷᱟᱹ (᱒᱐᱑᱗)[᱑] |
| ᱜᱟᱛᱮ | ᱨᱟᱢ ᱪᱚᱸᱫᱽᱨᱚ ᱴᱩᱰᱩ |
| ᱦᱚᱯᱚᱱ | ᱞᱚᱢᱵᱳᱫᱷᱚᱨ, ᱠᱚᱨᱚᱱ |
ᱢᱟᱭᱱᱚ ᱴᱩᱰᱩ (ᱦᱟᱸᱥᱫᱟᱜ) (ᱤᱝᱞᱤᱥ: Maina Tudu (Hansdah), ᱡᱟᱱᱟᱢ : ᱑᱑ ᱢᱟᱨᱪ ᱑᱙᱘᱕) ᱫᱚ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱠᱟᱱᱟᱭ ᱾ ᱟᱡᱟᱜ ᱚᱱᱚᱬᱦᱮ ᱯᱩᱛᱷᱤ ᱢᱟᱨᱥᱟᱞ ᱰᱟᱦᱟᱨ ᱞᱟᱹᱜᱤᱫ ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱒᱐᱑᱗ ᱥᱟᱞᱮ ᱨᱮ ᱡᱩᱣᱟᱹᱱ ᱥᱤᱨᱯᱷᱟᱹ ᱛᱮᱭ ᱢᱟᱹᱱ ᱥᱟᱨᱦᱟᱣ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ ᱥᱟᱱᱛᱟᱲ ᱥᱟᱶᱛᱟ ᱞᱟᱹᱜᱤᱫ ᱟᱡᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱮᱱᱮᱢ ᱫᱚ ᱥᱟᱱᱛᱟᱲᱤ ᱰᱤᱠᱥᱱᱟᱨᱤ (SANTALI DICTIONARY), ᱥᱟᱱᱛᱟᱲᱤ-ᱥᱟᱱᱛᱟᱲᱤ-ᱤᱝᱞᱤᱥ ᱯᱟᱹᱨᱥᱤ ᱛᱮ ᱚᱞ ᱛᱚᱞ ᱟᱠᱟᱱᱟ ᱟᱨ ᱡᱟᱦᱟᱸ ᱨᱮᱫᱚ ᱑᱐᱐᱘ ᱜᱚᱴᱟᱝ ᱥᱟᱦᱴᱟ ᱴᱷᱟᱶ ᱮ ᱧᱟᱢ ᱟᱠᱟᱫᱼᱟ ᱾ ᱟᱡ ᱫᱚ ᱱᱤᱛᱚᱜ ᱫᱷᱟᱹᱵᱤᱡ ᱛᱮ ᱢᱚᱬᱮ ᱜᱚᱴᱟᱝ ᱯᱩᱛᱷᱤᱭ ᱯᱟᱨᱥᱟᱞ ᱦᱩᱭ ᱟᱠᱟᱫᱼᱟ ᱾ ᱚᱱᱟ ᱯᱩᱛᱷᱤ ᱠᱚ ᱨᱮᱭᱟᱜ ᱧᱩᱛᱩᱢ ᱫᱚ ᱦᱩᱭᱩᱜ ᱠᱟᱱᱟ, ᱚᱞ ᱪᱤᱠᱤ ᱟᱹᱲᱟᱹ ᱜᱟᱵᱟᱱ, ᱥᱟᱱᱛᱟᱲᱤ ᱟᱹᱲᱟᱹ ᱵᱟᱜᱟᱱ, ᱢᱟᱨᱥᱟᱞ ᱰᱟᱦᱟᱨ, ᱟᱹᱨᱩᱯᱷᱮᱨᱟᱣ ᱟᱨ ᱨᱟᱢ ᱠᱟᱛᱷᱟ ᱾
ᱡᱟᱱᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱢᱟᱭᱱᱚ ᱴᱩᱰᱩ ᱫᱚ ᱑᱑.᱓.᱑᱙᱘᱕ ᱥᱟᱞᱮ ᱨᱮ ᱱᱟᱥᱮ ᱪᱚᱲᱟᱣᱜ ᱦᱟᱸᱥᱫᱟᱜ ᱵᱟᱹᱠᱷᱳᱞ ᱨᱮᱭ ᱡᱟᱱᱟᱢ ᱟᱠᱟᱱᱟ ᱾ ᱡᱟᱱᱟᱢ ᱟᱹᱛᱩ ᱧᱩᱛᱩᱢ ᱫᱚ ᱟᱺᱫᱷᱟᱹᱨᱤᱭᱟᱹ (ᱮᱫᱮᱞᱜᱷᱩᱴᱩ), ᱠᱩᱞᱤᱟᱱᱟ ᱵᱞᱚᱠ, ᱦᱚᱱᱚᱛ : ᱢᱚᱭᱩᱨᱵᱷᱚᱸᱡᱽ ᱟᱨ ᱯᱚᱱᱚᱛ ᱫᱚ ᱳᱰᱤᱥᱟ ᱾ ᱡᱟᱱᱟᱢ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱠᱚᱨᱚᱱ ᱦᱟᱸᱥᱫᱟᱜ ᱾ ᱡᱟᱦᱟᱸᱭ ᱫᱚ ᱢᱤᱫ ᱟᱹᱰᱤ ᱠᱷᱟᱹᱴᱟᱹᱲᱤ ᱪᱟᱹᱥᱤ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱥᱟᱶᱛᱮ ᱥᱟᱶᱛᱟ ᱨᱮᱭᱟᱜ ᱨᱟᱭᱨᱤᱛ, ᱞᱟᱹᱭ ᱞᱟᱠᱪᱟᱨ ᱟᱨ ᱵᱚᱸᱜᱟ ᱵᱳᱨᱳ ᱫᱟᱲᱮ ᱛᱮ ᱢᱤᱫ ᱥᱟᱝ ᱯᱮᱨᱮᱡ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱟᱨ ᱟᱭᱳ ᱣᱟᱜ ᱧᱩᱛᱩᱢ ᱫᱚ ᱠᱟᱹᱨᱢᱤ ᱦᱟᱸᱥᱫᱟᱜ ᱾ ᱡᱟᱦᱟᱸᱭ ᱫᱚ ᱢᱤᱫ ᱟᱹᱰᱤ ᱥᱚᱱᱚᱛ, ᱱᱮᱢᱚᱥ, ᱟᱨ ᱠᱷᱟᱹᱴᱟᱹᱲᱤ ᱠᱩᱲᱤ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾ ᱢᱟᱭᱱᱚ ᱴᱩᱰᱩ ᱨᱤᱱ ᱵᱚᱭᱦᱟ ᱫᱚ ᱟᱡ ᱢᱮᱥᱟ ᱠᱟᱛᱮ ᱑᱐ ᱦᱚᱲ ᱟᱠᱚ ᱾ ᱟᱡ ᱥᱮᱞᱮᱫ ᱠᱟᱛᱮ ᱘ ᱦᱚᱲ ᱠᱩᱲᱤ ᱵᱚᱭᱦᱟ ᱟᱨ ᱵᱟᱨ ᱦᱚᱲ ᱫᱚ ᱠᱚᱲᱟ ᱵᱚᱭᱦᱟ ᱟᱡ ᱫᱟᱫᱟ ᱛᱤᱠᱤᱱ ᱢᱮᱱᱟᱜ ᱠᱤᱱᱟ ᱾ ᱟᱡᱤᱡ ᱢᱟᱨᱟᱝ ᱫᱟᱫᱟ ᱥᱳᱢᱱᱟᱛᱷ ᱦᱟᱸᱥᱫᱟᱜ ᱫᱚ ᱢᱤᱫ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱟᱨ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱠᱟᱱᱟᱭ ᱾ ᱱᱩᱱᱟᱹᱝ ᱵᱚᱭᱦᱟ ᱠᱚ ᱛᱟᱞᱟᱨᱮ ᱟᱡ ᱫᱚ ᱡᱚᱛᱚ ᱠᱷᱚᱱ ᱦᱩᱰᱤᱧ ᱠᱩᱲᱤ ᱠᱟᱱᱟᱭ ᱾ ᱢᱟᱭᱱᱚ ᱛᱤᱱ ᱡᱚᱦᱚᱜ ᱵᱟᱨ ᱯᱮ ᱥᱮᱨᱢᱟ ᱩᱢᱮᱨ ᱛᱟᱭ ᱛᱟᱦᱮᱸ ᱠᱟᱱᱟ, ᱩᱱ ᱡᱚᱦᱚᱜ ᱨᱮᱜᱮ ᱟᱡ ᱟᱭᱳ ᱫᱚᱭ ᱵᱚᱸᱜᱟ ᱫᱤᱥᱚᱢ ᱞᱮᱱᱟ ᱾ ᱤᱠᱷᱟᱹᱱ ᱥᱟᱸᱜᱮ ᱵᱚᱭᱦᱟ ᱠᱚᱣᱟᱜ ᱫᱩᱞᱟᱹᱲ ᱛᱟᱞᱟ ᱨᱮᱭ ᱦᱟᱨᱟ ᱟᱠᱟᱱ ᱠᱷᱟᱹᱛᱤᱨ ᱟᱭᱳ ᱫᱩᱞᱟᱹᱲ ᱨᱮᱭᱟᱜ ᱟᱱᱟᱴ ᱵᱟᱭ ᱟᱹᱭᱠᱟᱹᱣ ᱟᱠᱟᱜᱼᱟ ᱟᱨ ᱨᱮᱸᱜᱮᱡ ᱨᱮᱭᱟᱜ ᱦᱚᱸ ᱟᱹᱰᱤ ᱡᱟᱞᱟ ᱫᱚ ᱵᱟᱭ ᱵᱩᱡᱷᱟᱹᱣ ᱧᱟᱢ ᱟᱠᱟᱫᱼᱟ ᱾[᱒]
ᱥᱮᱪᱮᱫ ᱟᱨ ᱜᱷᱟᱨᱚᱸᱡᱽ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱢᱟᱭᱱᱚ ᱴᱩᱰᱩ ᱨᱤᱱ ᱟᱡ ᱫᱟᱹᱭ ᱛᱮᱠᱚ ᱮᱭᱟᱭ ᱦᱚᱲ ᱠᱚ ᱛᱟᱦᱮᱸ ᱠᱟᱱᱟ, ᱤᱠᱷᱟᱹᱱ ᱚᱠᱚᱭ ᱦᱚᱸ ᱤᱛᱩᱱ ᱟᱥᱲᱟ ᱫᱚ ᱵᱟᱠᱚ ᱞᱮᱵᱮᱫ ᱟᱠᱟᱫ ᱛᱟᱦᱮᱸᱫ ᱾ ᱟᱡ ᱱᱟᱥᱮᱭ ᱦᱟᱨᱟ ᱵᱟᱲᱟᱜ ᱛᱮ ᱟᱡ ᱫᱟᱫᱟ ᱛᱤᱠᱤᱱ ᱫᱚ ᱱᱟᱥᱮ ᱠᱤᱱ ᱚᱞ ᱯᱟᱲᱦᱟᱣ ᱟᱠᱟᱱ ᱛᱟᱦᱮᱸᱫ ᱾ ᱚᱱᱟᱛᱮ ᱟᱡ ᱵᱟᱵᱟ ᱜᱮᱭ ᱢᱮᱱ ᱠᱮᱜᱼᱟ ᱦᱚᱯᱚᱱ ᱢᱟᱹᱭ ᱦᱚᱸ ᱤᱛᱩᱱ ᱟᱥᱲᱟ ᱛᱮ ᱫᱚ ᱵᱚᱱ ᱵᱷᱮᱡᱟ ᱮ ᱜᱮᱭᱟ ᱾
ᱡᱟᱦᱟᱸ ᱠᱷᱟᱹᱛᱤᱨ ᱑᱙᱙᱐ ᱥᱟᱞᱮᱨᱮ ᱚᱱᱫᱷᱟᱨᱤ ᱭᱩ.ᱯᱤ. ᱟᱥᱲᱟ ᱨᱮᱜᱮ ᱟᱡᱟᱜ ᱥᱮᱪᱮᱫ ᱫᱚᱭ ᱮᱛᱚᱦᱚᱵ ᱞᱮᱫ ᱛᱟᱦᱮᱸᱫ ᱾ ᱚᱸᱰᱮ ᱕ ᱪᱟᱱᱚᱪ ᱫᱷᱟᱹᱵᱤᱡ ᱥᱟᱹᱛ ᱠᱟᱛᱮ ᱖ ᱟᱨ ᱗ ᱪᱟᱱᱚᱪ ᱫᱚ ᱚᱥᱚᱱᱡᱚᱰᱟ ᱠᱚᱱᱭᱟᱥᱨᱚᱢ ᱠᱷᱚᱱ ᱮ ᱥᱟᱹᱛ ᱠᱮᱜᱼᱟ ᱾ ᱤᱱᱟᱹ ᱛᱟᱭᱚᱢ ᱢᱮᱴᱨᱤᱠ ᱯᱟᱲᱦᱟᱣᱜ ᱞᱟᱹᱜᱤᱫ ᱛᱮᱫᱚ ᱠᱮᱯᱤᱴᱟᱞ ᱜᱟᱞᱥ ᱦᱟᱭᱥᱠᱩᱞ, ᱵᱷᱩᱵᱽᱱᱮᱥᱚᱨ, ᱭᱩᱱᱤᱴ - ᱒ ᱦᱚᱥᱴᱮᱞ ᱨᱮᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱾ ᱚᱸᱰᱮ ᱵᱟᱨ ᱥᱮᱨᱢᱟ ᱘ ᱟᱨ ᱙ ᱪᱟᱱᱚᱪ ᱯᱟᱲᱦᱟᱣ ᱥᱟᱹᱛ ᱛᱟᱭᱚᱢ ᱚᱲᱟᱜ ᱦᱚᱲ ᱟᱠᱚ ᱠᱩᱥᱤ ᱛᱮ ᱑᱙᱙᱘ ᱥᱟᱞᱮ ᱨᱮᱠᱚ ᱡᱟᱶᱟᱭ ᱠᱟᱫᱮᱭᱟ ᱾ ᱟᱡᱟᱜ ᱫᱚ ᱟᱹᱰᱤ ᱵᱟᱹᱲᱛᱤ ᱟᱸᱥ ᱛᱟᱦᱮᱸ ᱠᱟᱱᱟ ᱡᱟᱶᱟᱭ ᱢᱟᱬᱟᱝ ᱨᱮ ᱜᱮᱞ ᱪᱟᱱᱚᱪ ᱥᱟᱹᱛ ᱨᱮᱭᱟᱜ ᱾ ᱤᱠᱷᱟᱹᱱ ᱠᱚᱯᱟᱲ ᱵᱟᱭ ᱜᱚᱲᱚ ᱟᱫᱮᱭᱟ ᱾ ᱚᱱᱟᱛᱮ ᱡᱟᱶᱟᱭ ᱚᱲᱟᱜ ᱠᱷᱚᱱ ᱜᱮ ᱑᱐ ᱪᱟᱱᱚᱪ ᱮ ᱥᱟᱹᱛ ᱞᱮᱜᱼᱟ ᱒᱐᱐᱑ ᱥᱟᱞᱮ ᱨᱮ ᱢᱩᱱᱤᱥᱤ ᱯᱟᱞᱤᱴᱤ ᱦᱟᱭᱥᱠᱩᱞ ᱜᱟᱱᱫᱷᱤᱜᱨᱟᱢ, ᱥᱤᱱᱫᱷᱤᱭᱟ, ᱵᱤᱥᱟᱠᱷᱟᱯᱟᱴᱱᱟᱢ ᱠᱷᱚᱱ ᱾ ᱱᱤᱭᱟᱹ ᱚᱠᱛᱚ ᱨᱮᱜᱮ ᱟᱡᱤᱡ ᱢᱟᱨᱟᱝ ᱠᱚᱲᱟ ᱜᱤᱫᱽᱨᱟᱹᱭ ᱡᱟᱱᱟᱢ ᱮᱱᱟ ᱾ ᱤᱱᱟᱹ ᱛᱟᱭᱚᱢ ᱒᱐᱐᱔ ᱥᱟᱞᱮᱨᱮ ᱥᱩᱱᱟᱵᱮᱰᱟ ᱛᱤᱨᱞᱟᱹ ᱵᱤᱨᱫᱟᱹᱜᱟᱲ, ᱥᱩᱱᱟᱵᱮᱰᱟ, ᱳᱰᱤᱥᱟ ᱠᱷᱚᱱ ᱪᱮᱛᱟᱱ ᱛᱟᱱᱟᱞᱟ ᱫᱚᱭ ᱥᱟᱹᱛ ᱞᱮᱫ ᱛᱟᱦᱮᱸᱫ ᱾ ᱤᱱᱟᱹ ᱛᱟᱭᱚᱢ ᱜᱨᱟᱡᱩᱣᱮᱥᱳᱱ ᱞᱟᱹᱜᱤᱫ ᱫᱚ ᱵᱤ.ᱟᱨ. ᱟᱢᱵᱮᱫᱽᱠᱚᱨ ᱳᱯᱮᱱ ᱭᱩᱱᱤᱵᱷᱚᱨᱥᱤᱴᱤ ᱨᱮᱭ ᱚᱞ ᱠᱮᱜᱼᱟ ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱹᱜᱤᱫ ᱚᱞ ᱪᱤᱠᱤ ᱚᱞ ᱫᱚ ᱜᱤᱫᱽᱨᱟᱹ ᱠᱷᱚᱱ ᱜᱮᱭ ᱥᱮᱬᱟ ᱟᱠᱟᱫ ᱛᱟᱦᱮᱸᱫ ᱾ ᱤᱠᱷᱟᱹᱱ ᱡᱟᱶᱟᱭ ᱠᱟᱛᱮ ᱵᱤᱥᱟᱠᱷᱟᱯᱟᱴᱱᱟᱢ ᱨᱮ ᱛᱟᱦᱮᱸᱱ ᱚᱠᱛᱚ ᱨᱮ ᱚᱞ ᱪᱤᱠᱤ ᱚᱞᱚᱜ ᱨᱮᱭᱟᱜ ᱛᱟᱠ ᱮ ᱧᱟᱢ ᱠᱮᱫ ᱠᱷᱟᱱ ᱚᱸᱰᱮ ᱠᱷᱚᱱ ᱜᱮ ᱥᱚᱱᱮᱨ ᱫᱷᱟᱹᱵᱤᱡ ᱮ ᱚᱞ ᱥᱟᱹᱛ ᱠᱮᱫᱼᱟ ᱾ ᱢᱟᱭᱱᱚ ᱴᱩᱰᱩ ᱞᱟᱹᱜᱤᱫ ᱥᱮᱪᱮᱫ ᱨᱮᱭᱟᱜ ᱢᱤᱢᱤᱫ ᱥᱤᱬᱤ ᱜᱷᱟᱱᱮ ᱜᱮ ᱮᱥᱮᱫ ᱛᱟᱦᱮᱸ ᱠᱟᱱᱟ, ᱤᱠᱷᱟᱹᱱ ᱟᱡᱤᱡ ᱡᱤᱛᱟᱹ ᱟᱡ ᱥᱟᱶᱨᱮ ᱟᱡᱤᱡ ᱡᱟᱱᱟᱢ ᱵᱟᱵᱟ ᱞᱮᱠᱟ ᱜᱷᱟᱱᱮ ᱜᱮᱭ ᱛᱤᱸᱜᱩ ᱛᱟᱦᱮᱸ ᱟᱠᱟᱱᱟ ᱾ ᱟᱨ ᱵᱟᱝ ᱜᱟᱱᱚᱜᱟᱜ ᱠᱚᱭ ᱜᱟᱱ ᱤᱫᱤ ᱚᱪᱚ ᱟᱠᱟᱜᱼᱟ ᱾ ᱟᱨ ᱡᱤᱭᱚᱱ ᱨᱮ ᱥᱮᱪᱮᱫ ᱨᱮᱭᱟᱜ ᱥᱤᱬᱤ ᱫᱚ ᱵᱟᱹᱲᱛᱤ ᱠᱷᱚᱱ ᱵᱟᱹᱲᱛᱤ ᱫᱮᱡᱚᱜ ᱨᱮᱭᱟᱜ ᱟᱡᱟᱜ ᱟᱸᱥ ᱾
ᱟᱡᱤᱡ ᱡᱤᱛᱟᱹ, ᱨᱟᱢ ᱪᱚᱸᱫᱽᱨᱚ ᱴᱩᱰᱩ ᱫᱚ ᱢᱤᱫ ᱥᱚᱨᱠᱟᱨᱤ ᱪᱟᱹᱠᱤᱨᱤᱭᱟᱹ ᱥᱟᱶ-ᱥᱟᱶ ᱛᱮ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱟᱨ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱠᱟᱱᱟᱭ ᱾ ᱟᱡ ᱨᱤᱱ ᱫᱚ ᱵᱟᱨᱭᱟ ᱦᱚᱯᱚᱱ, ᱞᱚᱢᱵᱳᱫᱷᱚᱨ ᱴᱩᱰᱩ ᱟᱨ ᱠᱚᱨᱚᱱ ᱴᱩᱰᱩ ᱾
ᱥᱟᱶᱦᱮᱫ ᱮᱱᱮᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱟᱡ ᱫᱚ ᱜᱤᱫᱽᱨᱟᱹ ᱠᱷᱚᱱ ᱥᱮᱨᱮᱧ, ᱜᱟᱭᱟᱱ ᱮᱢᱟᱱ ᱠᱚ ᱟᱥᱲᱟ ᱚᱞᱚᱜ ᱡᱚᱦᱚᱜ ᱮ ᱚᱞ ᱛᱟᱦᱮᱸᱫ ᱾ ᱟᱡ ᱵᱟᱵᱟ ᱫᱚ ᱥᱟᱱᱛᱟᱲᱤ ᱥᱟᱶᱛᱟ ᱨᱮᱭᱟᱜ ᱨᱟᱭ ᱨᱤᱛ, ᱟᱹᱨᱤᱪᱟᱹᱞᱤ, ᱞᱟᱹᱭ ᱞᱟᱠᱪᱟᱨ ᱛᱮ ᱥᱚᱝ ᱯᱩᱨᱩᱱ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱚᱱᱟ ᱠᱚ ᱚᱞ ᱛᱚᱞ ᱫᱚᱦᱚᱭ ᱞᱟᱹᱜᱤᱫ ᱛᱮᱜᱮ ᱢᱟᱭᱱᱚ ᱛᱤᱱ ᱡᱚᱦᱚᱜ ᱓ ᱪᱟᱱᱚᱪ ᱮ ᱚᱞᱚᱜ ᱠᱟᱱ ᱛᱟᱦᱮᱸᱫ, ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱟᱡ ᱵᱟᱵᱟ ᱫᱚ ᱚᱱᱟ ᱠᱚ ᱚᱞ ᱛᱚᱞ ᱫᱚᱦᱚ ᱠᱟᱛᱮ ᱯᱚᱛᱚᱵ ᱯᱩᱛᱷᱤ ᱵᱮᱱᱟᱣ ᱨᱮᱭᱟᱜ ᱮ ᱢᱮᱛᱟ ᱟᱫᱮ ᱛᱟᱦᱮᱸᱫ ᱾ ᱟᱨ ᱤᱱᱟᱹ ᱠᱟᱛᱷᱟ ᱠᱷᱚᱱ ᱜᱮ ᱚᱱᱚᱞ, ᱚᱱᱚᱬᱦᱮ, ᱠᱟᱛᱷᱟ, ᱠᱟᱹᱦᱱᱤ ᱠᱚ ᱚᱞ-ᱛᱚᱞ ᱨᱮᱭᱟᱜ ᱫᱟᱲᱮᱭ ᱧᱟᱢ ᱞᱮᱜᱼᱟ ᱾ ᱤᱠᱷᱟᱹᱱ ᱟᱡ ᱵᱟᱵᱟ ᱴᱷᱮᱱ ᱠᱷᱚᱱ ᱥᱟᱶᱛᱟ ᱠᱟᱛᱷᱟ ᱛᱩᱢᱟᱹᱞ ᱫᱚᱦᱚ ᱠᱟᱛᱮ ᱵᱟᱭ ᱚᱞ ᱫᱚᱦᱚ ᱫᱟᱲᱮᱭᱟᱫ ᱨᱮᱭᱟᱜ ᱫᱩᱠᱷ ᱫᱚ ᱟᱡ ᱴᱷᱮᱱ ᱡᱟᱭᱡᱩᱜᱽ ᱞᱟᱹᱜᱤᱫ ᱪᱷᱟᱯᱟ ᱠᱟᱛᱮ ᱛᱟᱦᱮᱸ ᱫᱚᱦᱚ ᱮᱱᱟ ᱾
ᱥᱟᱶᱛᱟ ᱨᱮᱭᱟᱜ ᱛᱤᱱᱟᱹᱝ ᱜᱟᱱ ᱨᱩᱯ ᱨᱚᱝ ᱢᱟᱭᱱᱚ ᱫᱚ ᱵᱟᱝ ᱥᱚᱵᱷᱟᱜ ᱞᱮᱠᱟᱭ ᱧᱮᱞ ᱠᱷᱟᱹᱛᱤᱨ ᱜᱮ ᱚᱱᱟ ᱠᱟᱛᱷᱟ ᱠᱚᱜᱮ ᱟᱡᱟᱜ ᱚᱱᱚᱞ, ᱚᱱᱚᱬᱦᱮ, ᱟᱨ ᱠᱟᱹᱦᱱᱤ ᱯᱩᱛᱷᱤ ᱠᱚᱨᱮ ᱫᱚᱭ ᱚᱞ ᱟᱠᱟᱫᱼᱟ ᱾ ᱞᱟᱹᱠᱛᱤ ᱠᱷᱚᱱ ᱵᱟᱹᱲᱛᱤ ᱦᱟᱺᱰᱤ ᱯᱟᱹᱨᱩᱣᱟᱹ ᱧᱩ ᱟᱨ ᱚᱞᱚᱜ ᱯᱚᱲᱦᱚᱱ ᱵᱟᱹᱜᱤ ᱠᱟᱛᱮ ᱵᱟᱡᱟᱨ ᱱᱟᱞᱦᱟ ᱱᱟᱢᱟᱞ ᱠᱟᱹᱢᱤ ᱥᱮᱱᱚᱜ ᱫᱚ ᱟᱹᱰᱤ ᱜᱮ ᱵᱤᱨᱩᱫᱷ ᱟᱹᱜᱩ ᱟᱠᱟᱜ ᱟᱭ ᱾ ᱪᱟᱥ ᱠᱟᱹᱢᱤ, ᱚᱞᱚᱜ ᱯᱚᱲᱦᱚᱱ ᱵᱟᱹᱜᱤ ᱠᱟᱛᱮ ᱥᱤᱧ ᱧᱤᱫᱟᱹ ᱯᱟᱛᱟ ᱡᱟᱛᱨᱟ ᱮᱱᱮᱡ ᱫᱚ ᱟᱹᱰᱤ ᱛᱮᱫ ᱮ ᱵᱤᱨᱩᱫᱷᱼᱟ ᱾ ᱢᱤᱫ ᱱᱟᱥᱮ ᱪᱚᱲᱟᱣᱜ ᱚᱲᱟᱜ ᱨᱮ ᱡᱟᱱᱟᱢ ᱠᱟᱛᱮ ᱨᱮᱦᱚᱸ ᱜᱤᱫᱽᱨᱟᱹ ᱠᱷᱚᱱ ᱜᱮ ᱥᱟᱸᱶᱦᱮᱫ ᱠᱟᱹᱢᱤᱨᱮ ᱟᱹᱰᱤᱭ ᱨᱟᱹᱥᱠᱟᱹᱜ ᱛᱟᱦᱮᱸᱫᱚᱜ ᱾ ᱚᱱᱟᱛᱮ ᱨᱮᱸᱜᱮᱡ ᱱᱟᱪᱟᱨ ᱦᱚᱲ ᱠᱚ ᱥᱮᱪᱮᱫ ᱠᱟᱛᱮ ᱞᱟᱦᱟᱱᱛᱤᱜ ᱞᱟᱹᱜᱤᱫ ᱚᱱᱚᱬᱦᱮ, ᱠᱟᱹᱦᱱᱤ ᱯᱚᱛᱚᱵ ᱦᱚᱛᱮᱛᱮ ᱦᱚᱲ ᱠᱚ ᱞᱟᱹᱭ ᱟᱠᱚ ᱠᱟᱱᱟ ᱾
ᱱᱚᱝᱠᱟᱱ ᱪᱤᱨᱜᱟᱹᱞ ᱟᱲᱟᱝ ᱫᱚ All India Radio ᱦᱚᱛᱮ ᱛᱮᱦᱚᱸ ᱚᱱᱚᱬᱦᱮ ᱞᱮᱠᱟᱛᱮ ᱯᱟᱥᱱᱟᱣ ᱮᱫ ᱟᱭ ᱾ ᱥᱟᱱᱛᱟᱲ ᱟᱲᱟᱝ ᱟᱞᱚ ᱟᱫᱚᱜ ᱢᱟ ᱫᱤᱥᱟᱹᱠᱟᱛᱮ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱠᱮᱴᱮᱡᱽ ᱞᱟᱹᱜᱤᱫ ᱥᱟᱱᱛᱟᱲᱤ ᱟᱹᱲᱟᱹ ᱵᱟᱜᱟᱱ ᱯᱩᱛᱷᱤ (Santali Dictionary,1008 pages ᱨᱮᱱᱟᱜ)[᱓]ᱦᱚᱸᱭ ᱚᱞ ᱛᱚᱞ ᱟᱠᱟᱜᱼᱟ ᱾ ᱥᱟᱱᱛᱟᱲ ᱟᱲᱟᱝ ᱨᱮᱱᱟᱜ ᱯᱚᱱᱚᱛ ᱵᱟᱹᱱᱩᱜ ᱛᱮ ᱱᱟᱞᱦᱟ ᱛᱩᱢᱟᱹᱞ ᱞᱟᱹᱜᱤᱫ ᱪᱷᱤᱛᱭᱟᱹᱣ ᱟᱠᱟᱱ ᱥᱟᱱᱛᱟᱲ ᱠᱚ ᱡᱩᱢᱤᱫᱽ ᱠᱚ ᱞᱟᱹᱜᱤᱫ ᱥᱮᱨᱮᱧ ᱠᱚᱭ ᱚᱞᱟ ᱾ ᱚᱱᱟ ᱥᱮᱨᱮᱧ ᱠᱚ ᱫᱚ ᱫᱤᱥᱚᱢ ᱡᱟᱠᱟᱛ ᱞᱮᱠᱟᱱ ᱞᱮᱠᱟᱱ ᱥᱮᱱᱮᱞᱮᱫ ᱨᱮ ᱥᱮᱨᱮᱧ ᱟᱹᱜᱩᱜ ᱠᱟᱱᱟ ᱾ ᱚᱱᱟ ᱥᱮᱨᱮᱧ ᱠᱚ ᱞᱟᱹᱜᱤᱫ ᱦᱚᱸ ᱟᱹᱰᱤ ᱜᱮ ᱥᱟᱨᱦᱟᱣᱱᱟᱭ ᱧᱟᱢ ᱟᱹᱜᱩ ᱟᱠᱟᱜᱼᱟ ᱾ ᱫᱷᱟᱹᱨᱛᱤ ᱡᱟᱠᱟᱛ ᱯᱟᱥᱱᱟᱣ ᱟᱠᱟᱱ ᱥᱟᱱᱛᱟᱲ ᱠᱚ ᱩᱥᱟᱹᱨᱟᱛᱮ ᱚᱞ ᱪᱤᱠᱤ ᱛᱮ ᱥᱮᱪᱮᱫ ᱠᱚ ᱞᱟᱹᱜᱤᱫ ᱭᱩᱴᱩᱵᱽ ᱪᱟᱱᱮᱞ (Youtube) ᱨᱮ ᱥᱟᱱᱛᱟᱲᱤ ᱮᱡᱩᱠᱮᱥᱚᱱ ᱯᱨᱚᱜᱨᱟᱢ ᱮ ᱩᱪᱷᱟᱹᱱ ᱮᱫᱼᱟ ᱾ ᱚᱱᱟ ᱥᱮᱪᱮᱫ ᱦᱚᱨ ᱟᱹᱰᱤ ᱜᱟᱱ ᱦᱚᱲ ᱯᱟᱸᱡᱟ ᱠᱟᱛᱮ ᱟᱹᱰᱤ ᱥᱟᱨᱦᱟᱣᱱᱟᱭ ᱧᱟᱢ ᱟᱠᱟᱜᱼᱟ ᱾ ᱱᱚᱝᱠᱟᱱ ᱥᱟᱶᱛᱟ ᱥᱩᱥᱟᱹᱨ ᱠᱟᱹᱢᱤ ᱟᱨ ᱥᱟᱶᱛᱟ ᱞᱟᱦᱟᱱᱛᱤᱭᱟᱱ ᱚᱱᱚᱞ ᱠᱷᱟᱹᱛᱤᱨ ᱥᱤᱧᱚᱛ ᱫᱤᱥᱚᱢ ᱯᱟᱦᱴᱟ ᱠᱷᱚᱱ ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱡᱩᱣᱟᱹᱱ ᱥᱤᱨᱯᱷᱟᱹ ᱒᱐᱑᱗, ᱛᱮᱠᱚ ᱥᱚᱢᱢᱟᱱ ᱟᱠᱟᱫᱮᱭᱟ ᱾ ᱵᱷᱟᱨᱚᱛ ᱡᱟᱠᱟᱛ ᱚᱱᱚᱞᱤᱭᱟᱹ ᱜᱟᱶᱛᱟ (AISWA)ᱯᱟᱦᱟᱴᱟ ᱠᱷᱚᱱ ᱦᱚᱸ ᱟᱡᱟᱜ ᱥᱟᱶᱛᱟ ᱥᱩᱥᱟᱹᱨ ᱚᱞ ᱠᱚ ᱧᱮᱞ ᱠᱟᱛᱮ ᱢᱟᱹᱱ ᱥᱟᱠᱟᱢ ᱮᱢ ᱠᱟᱛᱮ ᱠᱚ ᱥᱟᱨᱦᱟᱣ ᱟᱠᱟᱫᱮᱭᱟ ᱾
ᱯᱟᱨᱥᱟᱞ ᱟᱠᱟᱱ ᱯᱩᱛᱷᱤ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ᱑. ᱚᱞ ᱪᱤᱠᱤ ᱟᱹᱲᱟᱹ ᱜᱟᱵᱟᱱ (ᱨᱚᱱᱚᱲ) - ᱒᱐᱑᱔ [᱔]
- ᱒. ᱥᱟᱱᱛᱟᱲᱤ ᱟᱹᱲᱟᱹ ᱵᱟᱜᱟᱱ (SANTALI DICTIONARY), Ol chiki - Ol chiki - English script, pages - 1008. - ᱒᱐᱑᱕
- ᱓. ᱢᱟᱨᱥᱟᱞ ᱰᱟᱦᱟᱨ (ᱚᱱᱚᱬᱦᱮ) - ᱒᱐᱑᱖ (ᱥᱟᱦᱤᱛᱭᱚ ᱮᱠᱟᱰᱮᱢᱤ ᱡᱩᱣᱟᱹᱱ ᱥᱤᱨᱯᱷᱟᱹ ᱟᱢᱮᱴ ᱯᱩᱛᱷᱤ) ᱾
- ᱔. ᱟᱹᱨᱩᱯᱷᱮᱨᱟᱣ (ᱚᱱᱚᱞ) - ᱒᱐᱑᱖
- ᱕. ᱨᱟᱢ ᱠᱟᱛᱷᱟ (ᱦᱤᱱᱫᱤ ᱯᱩᱛᱷᱤ - ᱵᱟᱞ ᱨᱟᱢ ᱠᱚᱛᱷᱟ ᱠᱷᱚᱱ ᱛᱚᱨᱡᱚᱢᱟ) - ᱒᱐᱑᱗ ᱾
ᱱᱚᱣᱟ ᱠᱚ ᱥᱟᱶᱛᱮ ᱟᱭᱢᱟ ᱯᱚᱛᱚᱵ, ᱯᱩᱛᱷᱤ ᱯᱟᱨᱥᱟᱞ ᱛᱟᱺᱜᱤ ᱨᱮ ᱢᱮᱱᱟᱜᱼᱟ ᱾
ᱢᱟᱹᱱ ᱥᱤᱨᱯᱷᱟᱹ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ᱑. "ᱡᱩᱣᱟᱹᱱ ᱥᱤᱨᱯᱷᱟᱹ" - ᱒᱐᱑᱗ (ᱠᱮᱸᱫᱽᱨᱚ ᱥᱟᱦᱤᱛᱭᱚ ᱮᱠᱟᱰᱮᱢᱤ, ᱱᱟᱣᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ)[᱕]
- ᱒. ᱥᱤᱫᱽ ᱥᱟᱠᱟᱢ - ᱒᱐᱑᱗ (ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹᱜᱟᱶᱛᱟ ᱯᱟᱦᱴᱟ ᱠᱷᱚᱱ)
- ᱓. "ᱜᱚᱨᱚᱵᱟᱱ ᱦᱚᱯᱚᱱ ᱮᱨᱟ" ᱢᱟᱹᱱ ᱦᱟᱞᱟᱝ - ᱒᱐᱑᱘ (ᱠᱤᱥᱩᱱ ᱵᱟᱜᱟᱱ ᱜᱟᱶᱛᱟ, ᱥᱩᱠᱟᱹᱯᱩᱰᱟᱹ, ᱢᱚᱭᱩᱨᱵᱷᱚᱸᱡᱽ, ᱳᱰᱤᱥᱟ ᱯᱟᱦᱴᱟ ᱠᱷᱚᱱ ᱾)
ᱡᱩᱦᱩᱲᱟᱹᱣ ᱨᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱢᱟᱭᱱᱚ ᱴᱩᱰᱩ ᱫᱚ ᱵᱷᱟᱨᱚᱛ ᱡᱟᱠᱟᱛ ᱨᱮᱭᱟᱜ ᱟᱭᱢᱟ ᱜᱟᱶᱛᱟ ᱥᱟᱶ ᱦᱚᱸ ᱡᱩᱦᱩᱲᱟᱹᱣᱨᱮ ᱢᱮᱱᱟᱭᱟ ᱾
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱤᱱᱤᱡ ᱡᱤᱵᱚᱱ ᱵᱷᱳᱨ ᱥᱚᱦᱮᱛ ᱾
- ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱳᱰᱤᱥᱟ ᱪᱟᱸᱜᱟ ᱨᱤᱱᱤᱡ ᱡᱤᱵᱚᱱ ᱵᱷᱳᱨ ᱥᱚᱦᱮᱛ ᱾
- ᱡᱩᱣᱟᱹᱱ ᱚᱱᱚᱞᱤᱭᱟᱹ ᱜᱟᱶᱛᱟ, ᱡᱟᱢᱥᱮᱫᱽᱯᱩᱨ, ᱡᱷᱟᱨᱠᱷᱚᱸᱰ ᱨᱤᱱᱤᱡ ᱡᱤᱵᱚᱱ ᱵᱷᱳᱨ ᱥᱚᱦᱮᱛ ᱾
- ᱥᱟᱶᱦᱮᱫ ᱟᱲᱟᱝ ᱯᱟᱛᱷᱟᱢ ᱨᱤᱱᱤᱡ ᱡᱤᱵᱚᱱ ᱵᱷᱳᱨ ᱥᱚᱦᱮᱛ ᱾
ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ↑ "..:: SAHITYA Akademi". Yuva Puraskar ::.. (in ᱠᱨᱚᱮᱥᱤᱭᱟᱹᱱ). Retrieved 2019-04-16.
- ↑ "Maina Tudu — The Internet Health Report 2020". Internet Health Report 2020 (in ᱟᱢᱮᱨᱤᱠᱟᱱ ᱟᱝᱜᱽᱨᱮᱡᱤ). Archived from the original on 2023-01-31. Retrieved 2023-01-31.
- ↑ "Santali Dictionary (Olchiki-Olchiki-English) by Mrs. Maina Tudu (Hansdah) – Disomart". Disomart. Archived from the original on 2019-04-03. Retrieved 2019-04-16.
- ↑ https://gatewaylitfest.com/4282-2/ Archived ᱒᱐᱑᱙-᱐᱔-᱐᱓ at the Wayback Machine. Books by Maina tudu
- ↑ "Literary award for 24 young writers". Tribuneindia News Service. December 23, 2017. Retrieved April 16, 2019.
  | This article about an Indian writer or poet is a stub. You can help Wikipedia by expanding it. |