ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
(ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱠᱷᱚᱱ ᱟᱹᱪᱩᱨ ᱦᱮᱡᱠᱟᱱᱟ)
Jump to navigation Jump to search
ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ
Raghunath Murmu.JPG
ᱵᱷᱩᱵᱚᱱᱮᱥᱚᱨ ᱨᱮᱱᱟᱜ ᱟᱹᱫᱤᱵᱟᱹᱥᱤ ᱞᱟᱦᱟᱱᱛᱤ ᱥᱚᱢᱤᱛᱤ ᱨᱮ ᱢᱮᱱᱟᱜ ᱜᱩᱨᱩ ᱜᱚᱢᱠᱮ ᱢᱩᱴᱷᱟᱹᱱ
ᱡᱟᱱᱟᱢ ᱕ ᱢᱮ ᱑᱙᱐᱕(1905-05-05) (ᱵᱟᱹᱭᱥᱟᱹᱠ)
(ᱰᱟᱦᱟᱨᱰᱤ) ᱰᱟᱸᱰᱵᱳᱥ, ᱨᱟᱭᱨᱚᱢᱯᱩᱨ, ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟᱹ
ᱜᱩᱨ ᱑ ᱯᱷᱮᱵᱽᱨᱩᱣᱟᱨᱤ ᱑᱙᱘᱒ (᱗᱖ ᱵᱚᱭᱚᱥ)
ᱢᱟᱹᱱ ᱧᱩᱢ ᱜᱩᱨᱩ ᱜᱚᱢᱠᱮ
ᱠᱟᱹᱢᱤ ᱜᱟᱹᱠᱷᱩᱲ ᱜᱚᱢᱠᱮ, ᱚᱱᱚᱬᱦᱤᱭᱟᱹ, ᱚᱱᱚᱞᱤᱭᱟᱹ, ᱥᱟᱱᱟᱥᱤᱭᱟᱹ, ᱠᱷᱮᱞᱚᱸᱰᱤᱭᱟᱹ
ᱡᱟᱹᱛᱤᱭᱟᱹᱛ ᱥᱤᱧᱚᱛᱤᱭᱟᱹ
ᱡᱟᱹᱛ ᱥᱟᱱᱛᱟᱲ
ᱥᱟᱛᱟᱢ ᱥᱟᱶᱦᱮᱫ
ᱥᱟᱶᱦᱮᱫ ᱨᱮᱱᱟᱜ ᱞᱟᱲᱟᱣᱱᱟ ᱚᱞ ᱪᱤᱠᱤ ᱨᱮᱱᱟᱜ ᱜᱚᱲᱦᱚᱱ
ᱥᱟᱶᱦᱮᱫ ᱮᱱᱮᱢ ᱫᱟᱲᱮᱜᱮ ᱫᱷᱚᱱ''
ᱥᱤᱫᱩ ᱠᱟᱹᱱᱦᱩ
ᱵᱤᱫᱩ ᱪᱟᱸᱫᱟᱱ
ᱠᱷᱮᱨᱣᱟᱲ ᱵᱤᱨ
"ᱦᱤᱛᱟᱹᱞ"
ᱨᱟᱹᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱢᱩᱨᱛᱤ, ᱜᱚᱦᱤᱨᱟᱯᱟᱲ

ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ About this soundᱩᱪᱟᱨᱚᱱSpoken content icon ᱟᱨ ᱵᱟᱝᱠᱷᱟᱱ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ,[᱑][᱒] ᱡᱟᱸᱦᱟᱸᱭ ᱫᱚ ᱚᱞ ᱪᱤᱠᱤ ᱵᱮᱱᱟᱣ ᱞᱮᱫ ᱟᱭ ᱾ ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱭᱟᱜ ᱨᱟᱭᱨᱟᱝᱯᱩᱨ ᱩᱯᱳᱡᱤᱞᱟ ᱨᱮᱭᱟᱜ ᱰᱟᱸᱰᱵᱩᱥ ᱟ.ᱛᱩᱨᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱑᱙᱐᱕ ᱥᱟᱞ ᱨᱮᱱᱟᱜ ᱤᱝᱨᱮᱡᱤ ᱢᱮ ᱪᱟᱸᱫᱚ ᱨᱮᱱᱟᱜ ᱢᱚᱬᱮ ᱢᱟ.ᱦᱤᱛ ᱨᱮᱭ ᱡᱟᱱᱟᱢ ᱞᱮᱱᱟ ᱾ᱠᱟᱹᱢᱤ ᱠᱟᱡᱽ ᱨᱮᱫᱚ ᱩᱱᱤ ᱫᱚ ᱩᱱᱩᱥᱩᱞ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱢᱟᱪᱮᱛ ᱮ ᱛᱟᱸᱦᱮ ᱠᱟᱱᱟ ᱾ ᱟᱡᱟᱜ ᱯᱩᱨᱟᱹ ᱡᱤᱭᱚᱱ ᱨᱮ ᱟᱡ ᱫᱚ ᱟᱹᱰᱤ ᱜᱟᱱ ᱯᱚᱛᱚᱵ ᱯᱩᱛᱷᱤ, ᱥᱮᱨᱮᱧ ᱟᱨ ᱜᱟᱭᱟᱱ ᱯᱩᱛᱷᱤ ᱮᱢᱟᱱ ᱠᱚᱭ ᱚᱞ ᱟᱠᱟᱫ-ᱟ ᱾ ᱟᱡᱟᱜ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱯᱟᱲᱦᱟᱣ ᱟᱠᱟᱱ ᱯᱚᱛᱚᱵ ᱫᱚ ᱦᱩᱭᱩᱜ ᱠᱟᱱᱟ "ᱦᱤᱛᱟ.ᱞ" ᱾[᱓]

ᱡᱟᱱᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱩᱨᱩ ᱜᱚᱢᱠᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱟᱹᱛᱩ ᱨᱮ ᱵᱟᱹᱭᱥᱟᱹᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱢᱤᱫ ᱢᱩᱨᱢᱩ ᱵᱟᱹᱠᱷᱳᱞ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱡᱟᱦᱟᱸ ᱫᱚ ᱢᱟᱦᱟᱸ ᱢᱟᱺᱦᱤᱛ ᱞᱮᱠᱟᱛᱮ ᱫᱚ ᱕/᱕/᱑᱙᱐᱕ ᱥᱟᱞᱮ ᱢᱮᱱᱛᱮ ᱵᱚᱱ ᱢᱮᱛᱟᱜ ᱠᱟᱱᱟ ᱾ ᱟᱡᱟᱜ ᱡᱟᱱᱟᱢ ᱟᱹᱛᱩ ᱫᱚ ᱳᱰᱤᱥᱟ ᱯᱚᱱᱚᱛ ᱟᱨ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮ ᱢᱟᱬᱫᱟ ᱯᱤᱲ ᱨᱮᱱᱟᱜ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱟᱹᱛᱩ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱥᱤᱫᱚ ᱢᱩᱨᱢᱩ ᱟᱨᱵᱟᱝ ᱱᱮᱱᱫᱚᱞᱟᱞ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱟᱨ ᱡᱟᱱᱟᱢ ᱟᱭᱳᱣᱟᱜ ᱧᱩᱛᱩᱢ ᱫᱚ ᱥᱚᱞᱢᱟ ᱢᱩᱨᱢᱩ ᱥᱮ ᱥᱩᱢᱤ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱾

ᱜᱤᱫᱽᱨᱟᱹ ᱚᱠᱛᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱧᱩᱛᱩᱢ ᱫᱚ ᱪᱷᱟᱹᱴᱭᱟᱹᱨ ᱧᱩᱛᱩᱢ ᱞᱮᱠᱟᱛᱮ ᱫᱚ ᱪᱩᱱᱩ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱪᱮᱫᱟᱜ ᱪᱚᱝ ᱵᱟᱞᱮ ᱵᱮᱠᱮᱨ ᱜᱤᱫᱽᱨᱟᱹ ᱟᱹᱰᱤ ᱵᱟᱹᱲᱛᱤ ᱜᱮᱭ ᱨᱟᱜ ᱠᱮᱫ-ᱟ ᱾ ᱜᱤᱫᱽᱨᱟᱹ ᱨᱟᱜ ᱜᱮ ᱵᱟᱭ ᱛᱷᱤᱨ ᱞᱮᱱ ᱠᱷᱟᱱ ᱚᱲᱟᱜ ᱦᱚᱲ ᱠᱚ ᱟᱹᱰᱤ ᱜᱮᱠᱚ ᱠᱟᱹᱦᱤᱞ ᱪᱟᱵᱟ ᱮᱱᱟ ᱾ ᱟᱭᱳ ᱵᱟᱵᱟ ᱦᱚᱸ ᱢᱤᱫᱨᱟᱦᱟ ᱜᱤᱫᱽᱨᱟᱦᱟᱜ ᱨᱟᱜ ᱟᱹᱡᱚᱢ ᱛᱮ ᱠᱤᱱ ᱠᱟᱹᱨᱤᱜᱷᱟᱢ ᱪᱟᱵᱟ ᱮᱱᱟ ᱾ ᱱᱩᱭ ᱜᱤᱫᱽᱨᱟᱹᱦᱟᱜ ᱨᱟᱜ ᱟᱹᱡᱚᱢ ᱛᱮ ᱫᱤᱥᱟᱹ ᱜᱮ ᱛᱟᱹᱠᱤᱱ ᱟᱫ ᱪᱟᱵᱟ ᱮᱱᱟ ᱾ ᱪᱮᱫ ᱠᱤᱱ ᱪᱤᱠᱟᱹᱭᱟ ᱪᱮᱫ ᱫᱚ ᱵᱟᱝ-ᱟ, ᱪᱮᱫ ᱦᱚᱸ ᱵᱟᱹᱠᱤᱱ ᱫᱤᱥᱟᱹ ᱧᱟᱢ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫ ᱾ ᱟᱫᱚ ᱚᱡᱷᱟ ᱠᱚ ᱴᱷᱮᱱ ᱠᱷᱟᱹᱲᱤ ᱢᱟᱹᱲᱤ ᱵᱟᱲᱟ ᱠᱟᱛᱮ ᱱᱚᱶᱟ ᱧᱟᱢ ᱮᱱᱟ ᱡᱮ, ᱱᱩᱭ ᱜᱤᱫᱽᱨᱟᱹᱦᱟᱜ ᱫᱚ ᱧᱩᱛᱩᱢ ᱜᱮ ᱵᱟᱝ ᱜᱟᱱ ᱟᱠᱟᱱᱟ ᱾ ᱱᱩᱭ ᱜᱤᱫᱽᱨᱟᱹᱦᱟᱜ ᱧᱩᱛᱩᱢ ᱫᱚ ᱟᱹᱨᱩ ᱞᱮ ᱮᱱᱟᱝ ᱜᱮ ᱵᱟᱝᱠᱷᱟᱱ ᱨᱟᱜ ᱜᱮ ᱵᱟᱭ ᱛᱷᱤᱨᱩᱜ-ᱟ ᱾ ᱚᱱᱟ ᱞᱮᱠᱟᱛᱮ ᱢᱤᱫ ᱫᱤᱱ ᱫᱚ ᱡᱟᱦᱮᱨ ᱴᱚᱞᱟ ᱨᱤᱱᱤᱡ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱹᱱᱤᱡ ᱢᱤᱫ ᱚᱡᱷᱟ ᱴᱷᱮᱱ ᱵᱚᱸᱜᱟ ᱵᱳᱨᱳ ᱵᱟᱲᱟ ᱦᱚᱪᱚ ᱠᱟᱛᱮ ᱩᱱᱤ ᱚᱡᱷᱟ ᱴᱷᱮᱱ ᱜᱮ ᱟᱭᱳ ᱵᱟᱵᱟ ᱫᱚ ᱜᱤᱫᱽᱨᱟᱹ ᱠᱤᱱ ᱟᱹᱠᱷᱨᱤᱧ ᱠᱟᱫᱮᱭᱟ ᱾ ᱚᱱᱟ ᱞᱮᱠᱟᱛᱮ ᱩᱱᱤ ᱚᱡᱷᱟ ᱦᱚᱸ ᱟᱡᱟᱜ ᱧᱩᱛᱩᱢ ᱪᱟᱞ ᱠᱟᱛᱮ ᱜᱮ ᱨᱚᱜᱷᱩᱱᱟᱛᱷ ᱢᱮᱱᱛᱮᱭ ᱧᱩᱛᱩᱢ ᱟᱹᱨᱩ ᱠᱟᱫᱮᱭᱟ ᱾ ᱚᱡᱷᱟ ᱠᱚᱣᱟᱜ ᱠᱷᱟᱹᱲᱤ ᱢᱟᱹᱴᱤ ᱞᱮᱠᱟᱛᱮ ᱠᱟᱛᱷᱟ ᱫᱚ ᱟᱹᱰᱤ ᱜᱮ ᱥᱟᱹᱨᱤ ᱮᱱᱟ ᱾ ᱪᱩᱱᱩ ᱵᱚᱫᱚᱞ ᱛᱮ ᱨᱚᱜᱷᱩ ᱢᱮᱱᱛᱮ ᱧᱩᱛᱩᱢ ᱛᱟᱭ ᱟᱹᱨᱩ ᱮᱱ ᱠᱷᱟᱱ ᱜᱮ ᱜᱤᱫᱽᱨᱟᱹ ᱨᱟᱜ ᱦᱚᱸᱭ ᱦᱟᱹᱯᱤ ᱮᱱᱟ ᱾

ᱚᱞᱚᱜ ᱮᱛᱚᱦᱚᱵ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱙᱑᱒ ᱥᱟᱞᱮ ᱨᱮ ᱜᱟᱹᱢᱵᱷᱟᱹᱨᱤᱭᱟᱹ ᱭᱩ.ᱯᱤ. ᱟᱥᱲᱟ ᱨᱮ ᱚᱞᱚᱜ ᱫᱚᱭ ᱮᱛᱚᱦᱚᱵ ᱠᱮᱫ-ᱟ ᱾ ᱚᱲᱟᱜ ᱨᱮᱢᱟ ᱢᱤᱫ ᱞᱮᱠᱟ ᱵᱚᱱ ᱨᱚᱲ ᱠᱟᱱᱟ ᱤᱠᱷᱟᱹᱱ ᱚᱞᱚᱜ ᱟᱥᱲᱟ ᱨᱮᱫᱚ ᱪᱮᱫᱟᱜ ᱮᱴᱟᱜ ᱟᱲᱟᱝ ᱨᱚᱲ ᱛᱮᱠᱚ ᱨᱚᱲ ᱠᱟᱱᱟ, ᱱᱚᱶᱟ ᱠᱚ ᱧᱮᱞ ᱵᱟᱲᱟ ᱠᱟᱛᱮ ᱨᱚᱜᱷᱩ ᱫᱚ ᱚᱞᱚᱜ ᱯᱟᱲᱦᱟᱣ ᱫᱚ ᱟᱹᱰᱤ ᱜᱮ ᱦᱟᱨᱠᱮᱛ ᱮ ᱵᱩᱡᱷᱟᱹᱣ ᱠᱮᱫ-ᱟ ᱾ ᱡᱟᱱᱟᱢ ᱚᱲᱟᱜ ᱨᱮᱢᱟ ᱡᱟᱱᱟᱢ ᱟᱲᱟᱝ ᱥᱟᱱᱛᱟᱲᱤ ᱛᱮ ᱨᱚᱲ ᱦᱩᱭᱩᱜ ᱠᱟᱱᱟ ᱤᱠᱷᱟᱹᱱ ᱚᱞᱚᱜ ᱟᱥᱲᱟ ᱨᱮᱫᱚ ᱫᱤᱠᱩ ᱟᱲᱟᱝ ᱳᱰᱤᱭᱟᱹ ᱛᱮᱠᱚ ᱨᱚᱲ ᱠᱟᱱᱟ ᱾ ᱨᱚᱲ ᱠᱚᱢᱟ ᱢᱚᱴᱷᱮ ᱜᱮ ᱵᱟᱝ ᱵᱩᱡᱷᱟᱹᱣ ᱧᱟᱢᱚᱜ ᱠᱟᱱ ᱫᱚ ᱾ ᱱᱚᱶᱟ ᱠᱚ ᱧᱮᱞ ᱠᱟᱛᱮ ᱨᱚᱜᱷᱩ ᱫᱚ ᱟᱹᱰᱤ ᱜᱮᱭ ᱠᱟᱺᱦᱤᱥᱚᱜ ᱠᱟᱱ ᱛᱟᱦᱮᱸᱫ ᱾ ᱢᱤᱫ ᱫᱤᱱ ᱫᱚ ᱚᱱᱟᱛᱮ ᱟᱡ ᱵᱟᱵᱟᱭ ᱢᱮᱛᱟ ᱫᱮᱭᱟ, ᱤᱧ ᱫᱚ ᱵᱟ ᱚᱞᱚᱜ ᱵᱟᱹᱧ ᱪᱟᱞᱟᱜ-ᱟ ᱾ ᱚᱞ ᱨᱚᱲ ᱜᱮ ᱪᱮᱫ ᱦᱚᱸ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱢᱟᱪᱮᱛ ᱠᱚ ᱮᱠᱟᱞ ᱜᱮ ᱥᱟᱱᱛᱟᱲᱤ ᱛᱮ ᱵᱟᱠᱚ ᱨᱚᱲ ᱠᱟᱱᱟ ᱾ ᱪᱮ ᱚᱞ ᱦᱚᱸ ᱵᱟᱝ ᱠᱚ ᱚᱞᱚᱜ ᱠᱟᱱᱟ ᱾ ᱤᱧ ᱢᱟ ᱪᱮᱫ ᱦᱚᱸ ᱵᱟᱹᱧ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱤᱱᱟᱹᱜ ᱠᱷᱟᱱ ᱜᱮ ᱟᱡ ᱵᱟᱵᱟᱭ ᱵᱩᱡᱷᱟᱹᱣ ᱟᱫᱮᱭᱟ ᱪᱤ ᱵᱮᱴᱟ ᱚᱞᱚᱜ ᱟᱥᱲᱟ ᱫᱚ ᱥᱮᱱᱚᱜ ᱢᱮᱜᱮ ᱾ ᱫᱤᱱ ᱫᱤᱞᱚᱜ ᱚᱞᱚᱜ ᱟᱥᱲᱟᱢ ᱥᱮᱱ ᱞᱮᱱ ᱠᱷᱟᱱ ᱡᱚᱛᱚ ᱠᱟᱛᱷᱟᱢ ᱵᱩᱡᱷᱟᱹᱣ ᱫᱟᱲᱮᱭᱟᱜ-ᱟ ᱾ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱟᱹᱲᱤᱥ ᱟᱹᱲᱤᱥ ᱛᱮ ᱪᱮᱫ ᱦᱚᱸ ᱵᱟᱭ ᱢᱮᱱ ᱨᱩᱣᱟᱹᱲ ᱫᱟᱲᱮᱭᱟᱫ-ᱟ ᱾ ᱵᱟᱵᱟ ᱥᱤᱫᱚ ᱦᱚᱸ ᱦᱚᱯᱚᱱᱟᱜ ᱜᱚᱥᱚ ᱢᱮᱫᱦᱟ ᱧᱮᱞ ᱠᱟᱛᱮ ᱟᱹᱰᱤ ᱫᱩᱠ ᱮ ᱵᱩᱡᱷᱟᱹᱣ ᱠᱮᱫ-ᱟ ᱾ ᱤᱠᱷᱟᱹᱱ ᱵᱟᱵᱟ ᱫᱚ ᱫᱩᱞᱟᱹᱲ ᱟᱲᱟᱝ ᱛᱮ ᱦᱚᱯᱚᱱ ᱛᱟᱭ ᱮ ᱢᱮᱛᱟ ᱫᱮᱭᱟ, ᱵᱟᱵᱟ ᱛᱤᱧ, ᱫᱷᱚᱱ ᱛᱤᱧ ᱪᱮᱫ ᱮᱢ ᱠᱷᱚᱡᱚᱜ ᱠᱟᱱᱟ, ᱱᱟᱶᱟ ᱫᱚᱛᱚ ᱥᱮ ᱱᱟᱶᱟ ᱯᱮᱸᱴ ᱪᱮ ᱥᱤᱵᱤᱞ ᱥᱤᱵᱤᱞ ᱡᱚᱢᱟᱜ ᱠᱚᱢ ᱧᱟᱢ ᱠᱟᱱᱟ ᱾ ᱩᱱᱨᱮ ᱨᱚᱜᱷᱩᱱᱟᱛᱷ ᱮ ᱢᱮᱱ ᱨᱩᱣᱟᱹᱲ ᱠᱮᱫ-ᱟ, ᱤᱧ ᱫᱚ ᱪᱮᱫ ᱦᱚᱸ ᱵᱟᱹᱧ ᱧᱟᱢ ᱠᱟᱱᱟ ᱾ ᱤᱧ ᱫᱩᱧ ᱧᱟᱢ ᱠᱟᱱᱟ ᱟᱵᱚ ᱟᱲᱟᱝ ᱛᱮ ᱚᱞ ᱨᱚᱲ ᱦᱩᱭᱩᱜ ᱢᱟ ᱾ ᱵᱟᱵᱟ ᱫᱚ ᱫᱩᱞᱟᱹᱲ ᱟᱲᱟᱝ ᱛᱮ ᱦᱚᱯᱚᱱ ᱮ ᱢᱮᱛᱟᱭ ᱠᱟᱱᱟ, ᱫᱤᱱᱟᱹᱢ ᱦᱤᱞᱚᱜ ᱚᱞᱚᱜ ᱟᱥᱲᱟ ᱛᱮᱢ ᱥᱮᱱ ᱞᱮᱱ ᱠᱷᱟᱱ ᱟᱵᱚᱣᱟᱜ ᱟᱲᱟᱝ ᱛᱮ ᱚᱞ ᱨᱚᱲ ᱦᱚᱸᱢ ᱧᱟᱢ ᱫᱟᱲᱮᱭᱟᱜ ᱜᱮᱭᱟ ᱾ ᱱᱚᱣᱟ ᱠᱟᱛᱷᱟ ᱢᱤᱫ ᱫᱷᱟᱣ ᱵᱟᱵᱟᱭ ᱢᱮᱱ ᱠᱮᱫ-ᱟ ᱤᱠᱷᱟᱹᱱ ᱨᱚᱜᱷᱩᱣᱟᱜ ᱢᱚᱱᱮ ᱨᱮᱫᱚ ᱟᱹᱰᱤ ᱠᱮᱴᱮᱡ ᱛᱮ ᱵᱟᱹᱭᱥᱟᱹᱣ ᱛᱟᱦᱮᱸ ᱮᱱᱟ ᱾

᱑᱙᱐᱐ ᱑᱔-᱑᱕ ᱨᱮ ᱥᱟᱶᱱᱟ ᱢᱩᱨᱢᱩ ᱦᱚᱸ ᱚᱱᱟ ᱜᱟᱺᱵᱷᱟᱹᱨᱤᱭᱟᱹ ᱤᱛᱩᱱ ᱟᱥᱲᱟ ᱨᱮᱜᱮᱭ ᱚᱞᱚᱜ ᱠᱟᱱ ᱛᱟᱦᱮᱸᱫ ᱾ ᱥᱟᱹᱜᱟᱹᱭ ᱛᱟᱹᱠᱤᱱ ᱫᱚ ᱢᱟᱢᱚ ᱵᱷᱟᱹᱜᱽᱱᱟᱹ ᱢᱮᱱᱮᱛ ᱥᱟᱶᱱᱟ ᱢᱩᱨᱢᱩ ᱫᱚ ᱨᱚᱜᱷᱩ ᱴᱷᱮᱱ ᱮ ᱢᱟᱢᱚ ᱦᱚᱪᱚᱜ ᱠᱟᱱ ᱛᱟᱦᱮᱸᱫ ᱾ ᱨᱚᱜᱷᱩ ᱥᱟᱶ ᱫᱚ ᱢᱤᱫ ᱪᱟᱱᱚᱪ ᱜᱮ ᱪᱮᱛᱟᱱ ᱞᱟᱛᱟᱨ ᱠᱤᱱ ᱚᱞᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟᱛᱮ ᱵᱟᱵᱟ ᱫᱚ ᱵᱟᱱᱟ ᱦᱚᱲ ᱮ ᱡᱚᱴᱟᱣ ᱠᱟᱫ ᱠᱤᱱᱟ ᱾ ᱢᱟᱢᱚ ᱥᱟᱶᱱᱟ ᱢᱩᱨᱢᱩ ᱫᱚ ᱫᱤᱱᱟᱹᱢ ᱦᱤᱞᱚᱜ ᱠᱟᱫᱩᱣᱟᱬᱤ ᱟᱹᱛᱩ ᱠᱷᱚᱱ ᱮ ᱦᱤᱡᱩᱜ ᱥᱮᱱᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱠᱟ ᱜᱮ ᱨᱚᱜᱷᱩ ᱦᱚᱸ ᱫᱤᱱ ᱜᱮᱭ ᱦᱤᱡᱩᱜ ᱥᱮᱱᱚᱜ ᱠᱟᱱ ᱛᱟᱦᱮᱸᱫ ᱾ ᱟᱹᱠᱤᱱᱟᱜ ᱢᱚᱱᱮ ᱨᱮᱫᱚ ᱢᱤᱫᱴᱟᱹᱝ ᱜᱮ ᱟᱸᱥ ᱛᱟᱦᱮᱸ ᱠᱟᱱᱟ ᱚᱠᱟᱨᱮ ᱟᱨ ᱪᱮᱫ ᱞᱮᱠᱟᱨᱮ ᱚᱞ ᱪᱤᱠᱤ ᱫᱚ ᱠᱤᱱ ᱧᱟᱢᱟ ᱾ ᱚᱱᱟᱛᱮ ᱚᱞᱚᱜ ᱟᱥᱲᱟ ᱨᱮ ᱩᱞᱯᱷᱟᱹ ᱚᱠᱛᱚ ᱠᱚᱨᱮ ᱜᱤᱫᱽᱨᱟᱹ ᱠᱚ ᱥᱟᱶ ᱵᱟᱝ ᱡᱚᱴᱟᱣ ᱠᱟᱛᱮ ᱜᱟᱰᱟ ᱟᱲᱮ ᱨᱮ ᱫᱩᱲᱩᱵ ᱠᱟᱛᱮ ᱠᱟᱰᱮᱡ ᱠᱚᱛᱮ ᱪᱮᱫ ᱠᱚᱪᱚ ᱱᱟᱱᱟ ᱦᱩᱱᱟᱹᱨ ᱵᱷᱚᱲᱚᱠ ᱜᱮᱭ ᱵᱮᱱᱟᱣ ᱵᱟᱲᱟᱭ ᱛᱟᱦᱮᱸᱫ ᱾

ᱱᱚᱝᱠᱟ ᱜᱮ ᱫᱤᱱ ᱛᱟᱭᱚᱢ ᱫᱤᱱ ᱯᱟᱨᱚᱢ ᱤᱫᱤ ᱮᱱᱟ ᱾ ᱢᱤᱫ ᱫᱤᱢ ᱫᱚ ᱥᱟᱶᱱᱟ ᱢᱩᱨᱢᱩ ᱫᱚ ᱨᱚᱜᱷᱩ ᱢᱩᱨᱢᱩ ᱴᱷᱮᱱ ᱥᱮᱱ ᱠᱟᱛᱮᱭ ᱢᱮᱛᱟᱭ ᱠᱟᱱᱟ, ᱵᱷᱚᱬᱡᱟ ᱜᱳ ᱟᱢ ᱫᱚ ᱦᱟᱯᱮᱱ ᱫᱤᱱ ᱨᱮ ᱟᱹᱰᱤ ᱢᱟᱨᱟᱝ ᱵᱟᱰᱚᱦᱤᱭᱟᱹᱢ ᱵᱮᱱᱟᱣᱜ-ᱟ ᱾ ᱱᱚᱝᱠᱟ ᱛᱮᱜᱮ ᱚᱸᱰᱮ ᱠᱷᱚᱱ ᱚᱞᱚᱜ ᱫᱚ ᱠᱤᱱ ᱥᱟᱹᱛ ᱠᱮᱫ-ᱟ ᱾

ᱵᱚᱦᱚᱲᱫᱟ ᱨᱮ ᱚᱞᱚᱜ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱟᱺᱵᱷᱟᱹᱨᱤᱭᱟᱹ ᱠᱷᱚᱱ ᱚᱞᱚᱜ ᱥᱟᱹᱛ ᱠᱟᱛᱮ ᱨᱚᱜᱷᱩ ᱟᱨ ᱥᱟᱶᱱᱟ ᱫᱚ ᱵᱚᱦᱚᱲᱫᱟ ᱚᱞᱚᱜ ᱟᱥᱲᱟ ᱠᱤᱱ ᱥᱮᱱ ᱮᱱᱟ ᱾ ᱑᱙᱒᱐ ᱥᱟᱞᱮᱨᱮ ᱵᱚᱦᱚᱲᱫᱟ ᱨᱮ ᱚᱞᱚᱜ ᱚᱠᱛᱚ ᱨᱚᱜᱷᱩᱱᱟᱛᱷ ᱟᱨ ᱥᱟᱶᱱᱟ ᱛᱤᱠᱤᱱ ᱫᱚ ᱵᱚᱦᱚᱲᱫᱟ ᱡᱟᱯᱟᱜ ᱵᱟᱱᱟ ᱰᱩᱸᱜᱽᱨᱤ ᱨᱮ ᱰᱮᱨᱟ ᱵᱟᱥᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱵᱟᱱᱟ ᱰᱩᱸᱜᱽᱨᱤ ᱰᱮᱨᱟ ᱵᱟᱥᱟ ᱫᱚ ᱪᱩᱱᱩ ᱰᱮᱨᱟ ᱢᱮᱱᱛᱮ ᱠᱚ ᱧᱩᱛᱩᱢ ᱞᱮᱫ ᱛᱟᱦᱮᱸᱫ ᱾ ᱯᱟᱲᱦᱟᱣ ᱚᱠᱛᱚ ᱨᱮᱦᱚᱸ ᱨᱚᱜᱷᱩᱱᱟᱛᱷ ᱟᱨ ᱥᱟᱶᱱᱟ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱠᱟᱛᱷᱟ ᱠᱚ ᱜᱮ ᱠᱤᱱ ᱩᱭᱦᱟᱹᱨ ᱵᱟᱲᱟ ᱮᱫ ᱛᱟᱦᱮᱸᱫ ᱾ ᱚᱞᱚᱜ ᱯᱟᱲᱦᱟᱣ ᱚᱠᱛᱚ ᱨᱮᱦᱚᱸ ᱡᱟᱹᱛᱤ ᱥᱟᱶᱛᱟ ᱜᱮ ᱟᱹᱨᱥᱤ ᱞᱮᱠᱟ ᱡᱷᱟᱞᱠᱟᱣ ᱟᱹᱠᱤᱱ ᱠᱟᱱ ᱛᱟᱦᱮᱸᱫ ᱾ ᱨᱚᱜᱷᱩᱱᱟᱛᱷ ᱟᱡ ᱵᱟᱵᱟ ᱫᱚ ᱚᱡᱷᱟ ᱴᱷᱮᱱ ᱠᱷᱚᱱ ᱮ ᱟᱸᱡᱚᱢ ᱞᱮᱫ ᱛᱟᱦᱮᱸᱫ, ᱨᱚᱜᱷᱩᱱᱟᱛᱷ ᱫᱚ ᱠᱟᱹᱯᱤ ᱵᱳᱨᱳ ᱵᱚᱸᱜᱟ ᱛᱷᱩᱢ ᱛᱮᱜᱮᱭ ᱚᱯᱮᱞ ᱟᱠᱟᱱᱟ ᱾ ᱚᱱᱟᱛᱮ ᱚᱞᱚᱜ ᱡᱚᱦᱚᱜ ᱦᱚᱸ ᱞᱮᱛᱟᱲ ᱜᱮ ᱚᱠᱚᱭ ᱪᱚᱭ ᱞᱟᱹᱭ ᱟᱭ ᱞᱮᱠᱟᱭ ᱵᱩᱡᱷᱟᱹᱣ ᱮᱫ ᱛᱟᱦᱮᱸᱫ ᱾ ᱵᱟᱱᱟ ᱰᱩᱸᱜᱽᱨᱤ ᱪᱩᱱᱩ ᱰᱮᱨᱟ ᱨᱮ ᱫᱤᱱᱟᱹᱢ ᱚᱞᱚᱜ ᱵᱮᱲᱟ ᱨᱮ ᱚᱠᱟ ᱞᱮᱠᱟᱱ ᱫᱟᱲᱮ ᱪᱚᱝ ᱟᱹᱭᱠᱟᱹᱣ ᱠᱟᱛᱮ ᱟᱡᱟᱜ ᱦᱚᱲᱢᱚ ᱠᱚ ᱦᱟᱢᱟᱞ ᱜᱮᱭ ᱵᱩᱡᱷᱟᱹᱣ ᱛᱟᱦᱮᱸᱫ ᱾ ᱚᱱᱟ ᱫᱟᱲᱮ ᱫᱚ ᱵᱤᱫᱩ ᱪᱟᱸᱫᱟᱱ ᱚᱞ ᱵᱤᱨᱫᱟᱹ ᱜᱩᱱ ᱫᱟᱲᱮ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱠᱟ ᱛᱮᱜᱮ ᱮᱢ.ᱤ. ᱚᱞᱚᱜ ᱫᱚ ᱑᱙᱒᱒ ᱥᱟᱞᱮ ᱨᱮᱭ ᱥᱟᱹᱛ ᱠᱮᱫ-ᱟ ᱾

ᱤᱱᱟᱹ ᱛᱟᱭᱚᱢ ᱛᱤᱱᱟᱹᱝ ᱫᱤᱱ ᱜᱟᱱ ᱫᱚ ᱚᱞ ᱯᱟᱲᱦᱟᱣ ᱠᱟᱹᱢᱤ ᱠᱚ ᱰᱤᱜᱟᱹ ᱧᱚᱜ ᱠᱟᱛᱮ ᱠᱟᱰᱮᱡ ᱠᱚᱛᱮ ᱦᱟᱱᱟ ᱱᱷᱟᱣᱟᱭ ᱵᱮᱱᱟᱣ ᱛᱟᱦᱮᱸᱫ, ᱟᱨ ᱚᱱᱟ ᱠᱚ ᱧᱮᱞ ᱠᱟᱛᱮ ᱜᱮ ᱥᱟᱶᱱᱟ ᱢᱩᱨᱢᱩ ᱫᱚ ᱩᱱ ᱡᱚᱦᱚᱜ ᱨᱮᱜᱮᱭ ᱢᱮᱱ ᱞᱮᱫ ᱛᱟᱦᱮᱫ, ᱱᱩᱭ ᱫᱚ ᱦᱟᱯᱮᱱ ᱫᱤᱱ ᱨᱮ ᱟᱹᱰᱤ ᱢᱟᱨᱟᱝ ᱠᱟᱹᱨᱤᱠᱚᱞ ᱜᱮᱭ ᱵᱮᱱᱟᱣᱜ-ᱟ ᱾

ᱵᱟᱹᱨᱯᱟᱫᱟ ᱨᱮ ᱚᱞᱚᱜ ᱚᱠᱛᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱙᱒᱔ ᱥᱟᱞᱮ ᱨᱮ ᱢᱮᱴᱨᱤᱠ ᱯᱟᱲᱦᱟᱣ ᱞᱟᱹᱜᱤᱫ ᱫᱚ ᱵᱟᱹᱨᱯᱟᱫᱟ ᱩᱱᱩᱥᱩᱞ ᱟᱥᱲᱟ ᱨᱮ ᱵᱷᱩᱨᱛᱤᱭ ᱦᱟᱛᱟᱣ ᱠᱮᱫ-ᱟ ᱾ ᱚᱸᱰᱮ ᱚᱞᱚᱜ ᱚᱠᱛᱚ ᱨᱮᱦᱚᱸ ᱟᱡ ᱫᱚ ᱵᱟᱹᱲᱛᱤ ᱚᱠᱛᱚ ᱫᱚ ᱱᱤᱪᱚᱞ ᱚᱠᱛᱚ ᱨᱮ ᱫᱩᱲᱩᱵ ᱠᱟᱛᱮ ᱪᱮᱫ ᱠᱚᱪᱚᱭ ᱩᱭᱦᱟᱹᱨ ᱵᱟᱲᱟᱭ ᱛᱟᱦᱮᱸᱫ ᱾ ᱨᱚᱜᱷᱩᱱᱟᱛᱷ ᱵᱟᱹᱨᱯᱟᱫᱟ ᱨᱮᱭ ᱚᱞᱚᱜ ᱠᱟᱱ ᱵᱮᱲᱟ ᱨᱮᱫᱚ ᱥᱟᱶᱱᱟ ᱢᱩᱨᱢᱩ ᱫᱚ ᱵᱟᱹᱨᱯᱟᱫᱟ ᱨᱮᱜᱮ ᱢᱟᱪᱮᱛ ᱴᱨᱮᱱᱤᱝ ᱮ ᱮᱢᱮᱫ ᱛᱟᱦᱮᱸ ᱠᱟᱱᱟ ᱾ ᱚᱱᱠᱟ ᱛᱮ ᱢᱤᱫ ᱫᱤᱱ ᱫᱚ ᱴᱟᱴᱠᱟ ᱜᱮ ᱠᱤᱱ ᱧᱟᱯᱟᱢ ᱮᱱᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱨᱚᱜᱷᱩᱱᱟᱛᱷ ᱫᱚ ᱵᱤᱱᱤᱰ ᱮᱢ ᱥᱟᱹᱛ ᱠᱟᱛᱮ ᱚᱲᱟᱜ ᱮ ᱨᱩᱣᱟᱹᱲ ᱮᱱᱟ ᱾ ᱢᱮᱴᱨᱤᱠ ᱥᱟᱹᱛ ᱠᱟᱛᱮ ᱨᱮᱦᱚᱸ ᱵᱟᱹᱨᱯᱟᱫᱟ ᱨᱮᱜᱮ ᱟᱯᱨᱮᱱᱴᱤᱥ ᱴᱨᱮᱱᱤᱝ ᱥᱮᱱᱴᱚᱨ ᱨᱮᱭ ᱵᱷᱩᱨᱛᱤ ᱮᱱᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱟᱯᱨᱮᱱᱴᱤᱥ ᱦᱚᱸᱭ ᱯᱩᱨᱟᱹᱣ ᱠᱮᱫ-ᱟ ᱾ ᱚᱱᱟ ᱪᱟᱞᱟᱣ ᱨᱮᱜᱮ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱚᱞ ᱪᱤᱠᱤ ᱦᱚᱸᱭ ᱵᱮᱱᱟᱣ ᱥᱟᱹᱛ ᱞᱮᱫ ᱛᱟᱦᱮᱸᱫ ᱾ ᱚᱱᱟ ᱜᱮ ᱢᱟᱢᱚ ᱥᱟᱶᱱᱟ ᱢᱩᱨᱢᱩᱭ ᱫᱮᱠᱷᱟᱣ ᱧᱚᱜ ᱟᱫᱮᱛᱮ ᱑᱙᱒᱕ ᱥᱟᱞᱮ ᱨᱮᱫᱚ ᱚᱞ ᱪᱤᱠᱤ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮᱭ ᱩᱫᱩᱜ ᱥᱚᱫᱚᱨ ᱠᱮᱫ-ᱟ ᱾ ᱩᱱ ᱡᱚᱦᱚᱜ ᱜᱮ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱥᱟᱶᱱᱟ ᱢᱩᱨᱢᱩ ᱴᱷᱮᱱ ᱮ ᱞᱟᱹᱭ ᱥᱚᱫᱚᱨ ᱞᱮᱫ ᱛᱟᱦᱮᱸᱫ ᱚᱱᱟ ᱪᱤᱠᱤ ᱠᱚᱫᱚ ᱡᱚᱛᱚ ᱫᱷᱟᱹᱨᱛᱤ ᱟᱨᱵᱟᱝ ᱫᱷᱟᱹᱨᱛᱤ ᱨᱮ ᱢᱮᱱᱟᱜ ᱡᱟᱭ ᱠᱚᱨᱮ ᱠᱷᱚᱱ ᱜᱮᱭ ᱵᱮᱱᱟᱣ ᱡᱩᱛ ᱟᱠᱟᱫ-ᱟ ᱾

ᱪᱟᱹᱠᱨᱤ ᱟᱨ ᱥᱟᱶᱛᱟ ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱯᱨᱮᱱᱴᱤᱥ ᱥᱟᱹᱛ ᱠᱟᱛᱮ ᱠᱟᱹᱢᱤ ᱠᱚ ᱜᱮ ᱵᱟᱹᱠᱤᱱ ᱧᱟᱢ ᱴᱷᱤᱠ ᱞᱮᱫ ᱠᱷᱟᱱ ᱞᱩᱜᱽᱲᱤ ᱵᱮᱱᱟᱣ ᱠᱟᱹᱨᱜᱟᱲ ᱨᱮ ᱠᱟᱹᱢᱤ ᱠᱤᱱ ᱫᱷᱩᱨᱟᱹᱣ ᱮᱱᱟ ᱾ ᱱᱚᱝᱠᱟ ᱜᱮ ᱡᱚᱛᱚᱣᱟᱜ ᱠᱟᱹᱢᱤ ᱨᱮᱜᱮ ᱟᱡᱟᱜ ᱫᱟᱲᱮ ᱫᱚ ᱦᱟᱦᱟᱲᱟ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱠᱷᱟᱹᱛᱤᱨ ᱜᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱠᱟᱛᱷᱟ ᱫᱚ ᱢᱚᱭᱩᱨᱵᱷᱚᱸᱡᱽ ᱨᱤᱱᱤᱡ ᱢᱚᱦᱟᱨᱟᱡᱟ ᱴᱷᱮᱱ ᱥᱮᱴᱮᱨ ᱮᱱᱟ ᱾ ᱚᱱᱟ ᱠᱷᱟᱹᱛᱤᱨ ᱢᱤᱫ ᱫᱤᱱ ᱥᱮᱛᱟᱜ ᱨᱮ ᱰᱨ. ᱯᱤ.ᱠᱮ. ᱥᱮᱱ ᱟᱨ ᱵᱷᱚᱸᱡᱽ ᱨᱟᱡᱟᱭᱤᱡ ᱫᱮᱣᱟᱱ ᱨᱚᱜᱷᱩᱱᱟᱛᱷ ᱢᱩᱨᱢᱩᱣᱟᱜ ᱠᱟᱹᱢᱤ ᱧᱮᱞ ᱠᱤᱱ ᱦᱮᱡ ᱮᱱᱟ ᱾ ᱨᱚᱜᱷᱩᱱᱟᱛᱷ ᱟᱜ ᱠᱟᱹᱢᱤ ᱧᱮᱞᱛᱮ ᱰᱨ. ᱥᱮᱱ ᱟᱨ ᱨᱟᱡᱟᱭᱤᱡ ᱫᱮᱣᱟᱱ ᱟᱹᱰᱤ ᱡᱩᱨ ᱠᱤᱱ ᱠᱩᱥᱤ ᱮᱱᱟ ᱾ ᱟᱡᱟᱜ ᱠᱟᱹᱢᱤᱦᱚᱨᱟ ᱥᱮᱬᱟᱭ ᱢᱟ ᱢᱮᱱᱛᱮ ᱩᱱᱤ ᱫᱚ ᱠᱚᱞᱠᱟᱛᱟ ᱥᱮᱨᱟᱢᱯᱩᱨ ᱟᱨ ᱜᱚᱥᱟᱵᱟ ᱥᱮᱪᱮᱫ ᱛᱟᱞᱢᱟᱭ ᱵᱷᱮᱡᱟ ᱞᱮᱫᱮ ᱛᱟᱦᱮᱸᱫ ᱾

᱑᱙᱓᱐-᱓᱑ ᱨᱮ ᱵᱟᱹᱨᱯᱟᱫᱟ ᱨᱮ ᱠᱞᱟᱨᱠ ᱪᱟᱹᱠᱨᱤᱭ ᱪᱟᱹᱠᱨᱤ ᱠᱮᱫ-ᱟ ᱾ ᱠᱚᱞᱠᱟᱛᱟ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱯᱩᱨᱱᱚ ᱪᱚᱸᱫᱽᱨᱚ ᱤᱱᱰᱚᱥᱴᱨᱤᱭᱮᱞ ᱤᱱᱥᱴᱤᱪᱩᱴ ᱵᱟᱹᱨᱯᱟᱫᱟ ᱨᱮ ᱢᱤᱫ ᱩᱫᱩᱜᱤᱭᱟᱹ ᱞᱮᱠᱟᱛᱮᱭ ᱠᱷᱚᱸᱡᱟ ᱮᱱᱟ ᱾ ᱖ ᱪᱟᱸᱫᱚ ᱛᱟᱭᱚᱢ ᱠᱷᱟᱱ ᱜᱮ ᱟᱡᱤᱡ ᱡᱟᱱᱟᱢ ᱵᱟᱵᱟ ᱫᱚᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱠᱷᱟᱱ ᱜᱮ ᱜᱩᱨᱩ ᱜᱚᱢᱠᱮ ᱫᱚ ᱤᱱᱥᱴᱤᱪᱩᱴ ᱵᱟᱹᱜᱤ ᱛᱮ ᱦᱩᱭ ᱟᱫᱮᱭᱟ ᱾ ᱫᱟᱭᱟ ᱛᱮ ᱫᱮᱣᱟᱱ ᱥᱟᱦᱮᱵᱽ ᱫᱚ ᱟᱡᱟᱜ ᱵᱟᱡᱟᱨ ᱥᱩᱨ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱱᱟᱞᱟ ᱟᱥᱲᱟ ᱨᱮ ᱢᱩᱬᱩᱛ ᱢᱟᱪᱮᱛ ᱞᱮᱠᱟᱛᱮ ᱚᱸᱰᱮᱭ ᱩᱪᱟᱹᱲ ᱠᱟᱫᱮᱭᱟ ᱾ ᱑᱙᱓᱓ ᱥᱟᱞᱮ ᱨᱮ ᱡᱚᱠᱷᱚᱱ ᱵᱟᱹᱨᱯᱟᱫᱟ ᱨᱮ ᱟᱯᱨᱮᱱᱴᱤᱥ ᱛᱟᱞᱢᱟ ᱨᱮᱭ ᱛᱟᱦᱮᱸ ᱠᱟᱱᱟ ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱚᱞ ᱪᱤᱠᱤ ᱤᱫᱤ ᱠᱟᱛᱮ ᱢᱚᱱ ᱫᱚᱭ ᱠᱮᱴᱮᱡ ᱞᱮᱫ ᱛᱟᱦᱮᱸᱫᱚᱜ ᱾ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱞᱢᱟ ᱟᱥᱲᱟ ᱨᱮ ᱛᱟᱦᱮᱸ ᱠᱟᱛᱮ ᱜᱮ ᱚᱞ ᱪᱤᱠᱤ ᱛᱮᱫᱚ ᱦᱚᱲ ᱠᱚᱭ ᱥᱮᱪᱮᱫ ᱵᱟᱲᱟ ᱞᱮᱫ ᱠᱚ ᱛᱟᱦᱮᱸᱫ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱫᱚ ᱫᱷᱟᱲᱟᱯ ᱢᱤᱥᱤᱱ ᱮ ᱵᱮᱱᱟᱣ ᱠᱮᱫ-ᱟ ᱾ ᱟᱨ ᱫᱤᱥᱚᱢ ᱦᱚᱲ ᱠᱚ ᱥᱟᱢᱟᱝ ᱨᱮᱭ ᱥᱟᱢᱟᱝ ᱞᱮᱫ-ᱟ ᱾ ᱱᱚᱶᱟ ᱧᱮᱞ ᱠᱟᱛᱮ ᱫᱤᱥᱚᱢ ᱦᱚᱲ ᱠᱚ ᱟᱹᱰᱤ ᱜᱮ ᱠᱚ ᱢᱟᱹᱱ ᱥᱟᱨᱦᱟᱣ ᱞᱮᱫᱮᱭᱟ ᱾ ᱵᱚᱰᱟᱢᱛᱟᱹᱲᱤᱭᱟᱹ ᱟᱥᱲᱟ ᱨᱮᱜᱮ ᱢᱟᱪᱮᱛ ᱮ ᱛᱟᱦᱮᱸ ᱠᱟᱱ ᱚᱠᱛᱚ ᱨᱮᱜᱮᱭ ᱵᱷᱟᱹᱵᱤ ᱞᱮᱫ ᱛᱟᱦᱮᱸᱫ ᱡᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱵᱟᱹᱭ ᱵᱟᱹᱭ ᱛᱮ ᱢᱟᱞᱚᱴ ᱤᱫᱤᱜ ᱠᱟᱱᱟ ᱾ ᱚᱠᱟ ᱞᱮᱠᱟᱨᱮ ᱵᱟᱧᱪᱟᱣ ᱛᱟᱦᱮᱸᱱᱟ ᱚᱱᱟ ᱜᱮ ᱜᱷᱟᱱᱮᱭ ᱩᱭᱦᱟᱹᱨ ᱵᱟᱲᱟᱭᱮᱫ ᱛᱟᱦᱮᱸᱫ ᱾ ᱚᱱᱟᱛᱮ ᱑᱙᱓᱖ ᱨᱮ ᱢᱤᱫᱴᱟᱹᱝ ᱦᱚᱨ ᱥᱮᱨᱮᱧ ᱮ ᱚᱞ ᱠᱮᱫ-ᱟ ᱾

ᱚᱱᱟ ᱛᱟᱭᱚᱢ ᱑᱙᱓᱘ ᱥᱟᱞᱮ ᱨᱮ ᱫᱚ ᱵᱟᱹᱨᱯᱟᱫᱟ ᱩᱫᱮᱞᱟ ᱨᱮ ᱨᱚᱜᱷᱩ, ᱥᱟᱣᱱᱟ ᱟᱨ ᱥᱩᱱᱟᱹᱨᱟᱢ ᱢᱮᱥᱟ ᱠᱟᱛᱮ ᱪᱷᱟᱯᱟ ᱠᱚᱲ ᱢᱤᱥᱤᱱ ᱠᱚ ᱩᱫᱩᱜ ᱥᱚᱫᱚᱨ ᱞᱮᱫ-ᱟ ᱾ ᱟᱡᱟᱜ ᱢᱟᱬᱟᱝ ᱚᱞ ᱜᱟᱭᱟᱱ ᱯᱚᱛᱚᱵ ᱫᱚ ᱵᱤᱫᱩ ᱪᱟᱸᱫᱟᱱ ᱯᱚᱛᱚᱵ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱨᱮ ᱫᱚ ᱢᱤᱫ ᱵᱚᱸᱜᱟ ᱫᱟᱲᱮ ᱦᱚᱸ ᱛᱟᱦᱮᱸ ᱠᱟᱱᱟ ᱾ ᱱᱚᱶᱟ ᱜᱟᱭᱟᱱ ᱯᱚᱛᱚᱵ ᱫᱚ ᱑᱙᱔᱒ ᱥᱟᱞᱮ ᱨᱮ ᱰᱟᱦᱟᱨᱰᱤ, ᱰᱟᱸᱰᱵᱩᱥ ᱨᱮ ᱯᱩᱭᱞᱩ ᱛᱮᱠᱚ ᱩᱫᱩᱜ ᱥᱚᱫᱚᱨ ᱞᱮᱫ-ᱟ ᱾ ᱚᱱᱟ ᱜᱮ ᱥᱟᱱᱛᱟᱲ ᱠᱚᱣᱟᱜ ᱯᱩᱭᱞᱩ ᱢᱮᱞᱟᱝᱠᱤ ᱜᱟᱭᱟᱱ ᱫᱚᱠᱚ ᱢᱮᱛᱟᱜ-ᱟ ᱾ ᱚᱱᱠᱟ ᱜᱮ ᱢᱟᱪᱮᱛ ᱠᱟᱹᱢᱤ ᱛᱩᱞᱩᱡ ᱟᱡ ᱫᱚ ᱟᱹᱰᱤ ᱜᱟᱱ ᱦᱟᱦᱟᱲᱟᱱ ᱠᱟᱹᱢᱤ ᱠᱚᱭ ᱠᱟᱹᱢᱤᱭᱮᱫ-ᱟ ᱢᱮᱱᱛᱮ ᱟᱥᱲᱟ ᱨᱤᱱᱤᱡ ᱥᱮᱪᱮᱫ ᱪᱟᱪᱟᱞᱤᱭᱟᱹ ᱚᱱᱟ ᱠᱚᱭ ᱟᱸᱡᱚᱢ ᱠᱮᱫ-ᱟ ᱾ ᱚᱱᱟᱛᱮ ᱢᱤᱫ ᱫᱤᱱ ᱫᱚ ᱟᱥᱲᱟ ᱦᱤᱨᱤ ᱞᱮᱠᱟᱭ ᱦᱮᱡ ᱞᱮᱱᱟ ᱾ ᱟᱥᱲᱟ ᱦᱤᱨᱤ ᱠᱟᱛᱮᱭ ᱧᱮᱞ ᱠᱮᱫ-ᱟ ᱟᱥᱲᱟ ᱦᱚᱸ ᱵᱷᱟᱹᱜᱤ ᱜᱮᱭᱟ ᱟᱨ ᱟᱪᱮᱛᱤᱭᱟᱹ ᱠᱚᱦᱚᱸ ᱟᱹᱰᱤ ᱵᱷᱟᱹᱜᱤ ᱜᱮᱠᱚ ᱚᱞᱚᱜ ᱠᱟᱱᱟ ᱢᱮᱱᱛᱮᱭ ᱵᱟᱰᱟᱭ ᱤᱫᱤ ᱠᱮᱫ-ᱟ ᱾ ᱤᱱᱟᱹ ᱛᱟᱭᱚᱢ ᱑᱙᱔᱒ ᱥᱟᱞᱮ ᱨᱮ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱟᱨ ᱥᱟᱣᱱᱟ ᱢᱩᱨᱢᱩ ᱫᱚ ᱵᱚᱰᱟᱢᱛᱟᱹᱲᱤᱭᱟᱹ ᱨᱮ ᱢᱤᱫ ᱚᱞ ᱪᱤᱠᱤ ᱪᱷᱟᱨᱟᱣ ᱢᱤᱫᱩᱱ ᱠᱤᱱ ᱵᱮᱨᱮᱫ ᱠᱮᱫ-ᱟ ᱾ ᱚᱞ ᱪᱤᱠᱤ ᱟᱨ ᱜᱩᱨᱩ ᱜᱚᱢᱠᱮ ᱭᱟᱜ ᱵᱮᱱᱟᱣ ᱫᱷᱟᱲᱟᱯ ᱢᱤᱥᱤᱱ ᱧᱮᱞ ᱛᱮ ᱟᱥᱲᱟ ᱪᱟᱪᱞᱟᱣᱤᱭᱟᱹ ᱫᱚ ᱟᱹᱰᱤ ᱜᱮᱭ ᱨᱟᱹᱥᱠᱟᱹ ᱮᱱᱟ ᱾ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮ ᱩᱫᱩᱜ ᱥᱚᱫᱚᱨ ᱚᱪᱚᱭ ᱨᱮᱱᱟᱜ ᱡᱤᱢᱟᱹ ᱦᱚᱸ ᱫᱮᱣᱟᱱ ᱥᱟᱦᱮᱵᱽ ᱜᱮᱭ ᱜᱚᱜ ᱠᱮᱫ-ᱟ ᱾

ᱥᱟᱱᱟᱢᱟᱜ ᱠᱟᱹᱢᱤ ᱧᱮᱞ ᱛᱮ ᱢᱤᱫ ᱫᱤᱱ ᱫᱚ ᱯᱨᱚᱛᱟᱯ ᱪᱚᱸᱫᱽᱨᱚ ᱵᱷᱚᱸᱡᱽ ᱫᱮᱣ, ᱵᱷᱚᱸᱡᱽ ᱫᱤᱥᱚᱢ ᱨᱤᱱᱤᱡ ᱢᱟᱦᱟᱨᱟᱡᱟ ᱨᱚᱜᱷᱩ ᱢᱩᱨᱢᱩ ᱛᱮᱫ ᱮ ᱫᱮᱞᱟ ᱟᱫᱮᱭᱟ ᱾ ᱡᱮᱢᱚᱱ ᱚᱱᱟ ᱠᱚ ᱨᱟᱡᱟ ᱥᱟᱢᱟᱝ ᱨᱮ ᱯᱟᱨᱦᱟᱲ ᱥᱟᱺᱦᱤᱡ ᱨᱚᱲ ᱠᱟᱛᱮᱭ ᱵᱩᱡᱷᱟᱹᱣ ᱟᱭ ᱢᱟ ᱢᱮᱱᱛᱮᱫ ᱮ ᱠᱩᱞᱤ ᱵᱩᱴᱟᱹ ᱠᱮᱫᱮᱭᱟ ᱾ ᱨᱚᱜᱷᱩ ᱢᱩᱨᱢᱩ ᱦᱚᱸ ᱜᱟᱛᱮ ᱠᱚ ᱥᱟᱶ ᱥᱮᱱ ᱠᱟᱛᱮ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱮ ᱵᱩᱡᱷᱟᱹᱣ ᱟᱫᱮᱭᱟ ᱾ ᱚᱱᱟ ᱠᱚ ᱠᱟᱛᱷᱟ ᱢᱟᱦᱟᱨᱟᱡᱟ ᱦᱚᱸ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱜᱮᱭ ᱵᱩᱡᱷᱟᱹᱣ ᱮᱱᱟ ᱟᱨ ᱜᱩᱨᱩ ᱜᱚᱢᱠᱮᱭᱟᱜ ᱠᱟᱹᱢᱤ ᱫᱤᱥᱚᱢ ᱡᱟᱠᱟᱛ ᱨᱮ ᱥᱟᱨ ᱥᱟᱹᱜᱩᱱ ᱠᱚᱜ ᱢᱟ ᱢᱮᱱᱛᱮᱭ ᱢᱮᱱ ᱠᱮᱫ-ᱟ ᱾ ᱛᱤᱱᱟᱹᱝ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱨᱚᱜᱷᱩᱱᱟᱛᱷ ᱫᱚ ᱵᱚᱰᱟᱢᱛᱟᱹᱲᱤᱭᱟᱹ ᱛᱟᱞᱢᱟ ᱟᱥᱲᱟ ᱠᱷᱚᱱᱟᱜ ᱨᱟᱭᱨᱚᱝᱯᱩᱨ ᱩᱱᱩᱥᱩᱞ ᱟᱥᱲᱟ ᱛᱮᱭ ᱩᱪᱟᱹᱲ ᱠᱟᱫᱮᱭᱟ ᱾ ᱤᱠᱷᱟᱹᱱ ᱱᱤᱭᱟᱹ ᱚᱠᱛᱚ ᱨᱮ ᱨᱚᱜᱷᱩᱱᱟᱛᱷ ᱤᱡ ᱵᱟᱵᱟ ᱫᱚᱭ ᱵᱚᱸᱜᱟᱛᱟᱞᱟ ᱮᱱ ᱠᱷᱟᱱ ᱜᱷᱟᱨᱚᱸᱡᱽ ᱨᱮᱱᱟᱜ ᱡᱚᱛᱚ ᱟᱺᱜᱤᱵᱷᱟᱨ ᱟᱡ ᱪᱮᱛᱟᱱ ᱨᱮ ᱞᱟᱫᱮ ᱮᱱᱟ ᱾ ᱚᱲᱟᱜ ᱠᱚᱨᱮᱱᱟᱜ ᱟᱹᱰᱤ ᱜᱟᱱ ᱮᱴᱠᱮᱴᱚᱬᱮ ᱠᱚ ᱵᱟᱭ ᱥᱟᱢᱟᱝ ᱫᱟᱲᱮᱭᱟᱫ ᱠᱷᱟᱱ ᱖.᱒.᱑᱙᱔᱖ ᱨᱮ ᱪᱟᱹᱠᱨᱤ ᱠᱷᱚᱱ ᱫᱚ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫ-ᱟ ᱾ ᱚᱱᱟ ᱥᱟᱞᱮ ᱨᱮᱜᱮ ᱚᱲᱟᱜ ᱨᱮ ᱛᱟᱦᱮᱸᱱ ᱛᱩᱞᱩᱡ ᱠᱷᱮᱨᱣᱟᱲ ᱵᱤᱨ ᱧᱩᱛᱩᱢ ᱟᱱᱟᱜ ᱢᱤᱫ ᱜᱟᱭᱟᱱ ᱯᱩᱛᱷᱤᱭ ᱚᱞ ᱡᱩᱛ ᱠᱮᱫ-ᱟ ᱾ ᱚᱲᱟᱜ ᱨᱮ ᱮᱴᱠᱮᱴᱚᱬᱮ ᱪᱟᱞᱟᱜ ᱠᱟᱱ ᱛᱩᱞᱩᱡ ᱦᱚᱸ ᱚᱞ ᱥᱚᱢᱤᱛᱤ ᱞᱟᱹᱜᱤᱫ ᱑᱙᱔᱖ ᱥᱟᱞᱮ ᱨᱮ ᱵᱚᱫᱽᱲᱟ ᱨᱮ ᱢᱤᱫ ᱢᱟᱨᱟᱝ ᱢᱤᱫᱩᱱ ᱮ ᱦᱚᱦᱚ ᱠᱮᱫ-ᱟ ᱾

᱑᱙᱔᱗ ᱨᱮ ᱥᱤᱧᱚᱛ ᱫᱤᱥᱚᱢ ᱟᱹᱯᱱᱟᱹᱛ ᱮᱱᱟ ᱾ ᱨᱟᱡᱽᱟᱹᱨᱤ ᱦᱚᱲ ᱠᱚ ᱵᱷᱚᱸᱡᱽ ᱫᱤᱥᱚᱢ ᱡᱟᱠᱟᱛ ᱜᱚᱴᱟ ᱦᱩᱞᱩᱠ ᱫᱷᱩᱞᱩᱠ ᱨᱮᱠᱚ ᱛᱟᱦᱮᱸᱭᱮᱱᱟ ᱾ ᱚᱱᱟ ᱛᱟᱞᱟ ᱨᱮ ᱵᱤᱨᱟᱹᱫᱽ ᱯᱚᱱᱚᱛ ᱨᱮᱱᱟᱜ ᱠᱷᱮᱨᱣᱟᱲ ᱡᱟᱨᱯᱟ ᱥᱚᱢᱤᱛᱤ ᱨᱮᱭ ᱥᱮᱞᱮᱫ ᱮᱱᱟ ᱾ ᱟᱨ ᱨᱟᱡᱽᱟᱹᱨᱤ ᱨᱮ ᱡᱷᱟᱹᱞᱤᱜ ᱠᱷᱚᱱ ᱮ ᱵᱟᱧᱪᱟᱣ ᱮᱱᱟ ᱾ ᱟᱹᱰᱤ ᱫᱤᱱ ᱛᱟᱭᱚᱢ ᱨᱚᱜᱷᱩᱱᱟᱛᱷ ᱫᱚ ᱠᱚᱞᱠᱟᱛᱟ ᱨᱮᱱᱟᱜ ᱥᱚᱣᱜᱮᱥᱤ ᱪᱷᱟᱯᱟ ᱠᱷᱟᱱᱟ ᱨᱮ ᱛᱟᱦᱮᱸ ᱠᱟᱛᱮ ᱟᱡᱟᱜ ᱛᱤᱱᱟᱹᱝ ᱜᱟᱱ ᱯᱚᱛᱚᱵ ᱠᱚ ᱵᱤᱫᱩ ᱪᱟᱸᱫᱟᱱ , ᱠᱷᱮᱨᱣᱟᱲ ᱵᱤᱨ, ᱚᱞ ᱪᱮᱢᱮᱫ, ᱮᱞᱠᱷᱟ, ᱞᱟᱠᱪᱟᱨ ᱥᱮᱨᱮᱧ, ᱦᱤᱛᱟᱹᱞ, ᱫᱟᱲᱮᱜᱮ ᱫᱷᱚᱱ, ᱯᱟᱹᱨᱥᱤ ᱤᱛᱩᱱ, ᱟᱨ ᱯᱟᱹᱨᱥᱤ ᱫᱟᱨᱮ ᱯᱚᱛᱚᱵ ᱠᱚᱭ ᱪᱷᱟᱯᱟ ᱯᱟᱨᱥᱟᱞ ᱞᱮᱫ-ᱟ ᱾ ᱟᱡᱟᱜ ᱦᱟᱱᱟ ᱱᱷᱟᱣᱟ ᱦᱟᱦᱟᱲᱟᱱ ᱠᱟᱹᱢᱤ ᱠᱚ ᱧᱮᱞ ᱛᱮ ᱮᱢ. ᱮᱢ. ᱡᱩᱞᱤᱭᱟᱥ ᱯᱷᱤᱞ ᱦᱚᱸ ᱟᱡ ᱫᱚ ᱜᱩᱨᱩ ᱜᱚᱢᱠᱮ ᱢᱮᱱᱛᱮᱭ ᱜᱩᱱ ᱢᱟᱱᱟᱣ ᱞᱮᱫᱮ ᱛᱟᱦᱮᱸᱫ ᱾ ᱵᱤᱦᱟᱨ ᱨᱮᱱᱟᱜ ᱨᱟᱡᱽᱜᱟᱲ ᱯᱟᱴᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱯᱟᱦᱴᱟ ᱠᱷᱚᱱ ᱦᱚᱸ ᱰᱚᱠᱴᱚᱨᱮᱴ ᱤᱱ ᱞᱤᱴᱮᱨᱮᱪᱚᱨ ᱟᱨ ᱥᱟᱱᱛᱟᱲᱤ ᱞᱤᱴᱮᱨᱮᱪᱚᱨ ᱩᱯᱟᱫᱷᱤᱭ ᱧᱟᱢ ᱞᱮᱫ ᱛᱟᱦᱮᱸᱫ ᱾ ᱚᱱᱟ ᱞᱮᱠᱟᱛᱮ ᱢᱟᱱᱚᱛᱟᱱ ᱡᱚᱭᱯᱟᱞ ᱥᱤᱝ ᱟᱨ ᱨᱚᱧᱡᱤᱛ ᱥᱤᱝ ᱵᱟᱨᱦᱟ ᱟᱨ ᱢᱟᱨᱴᱤᱱ ᱩᱨᱟᱝ ᱱᱩᱠᱩ ᱡᱚᱛᱚ ᱢᱮᱥᱟ ᱠᱟᱛᱮ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱚᱞ ᱜᱩᱨᱩ ᱢᱮᱱᱛᱮ ᱢᱟᱹᱱ ᱠᱚ ᱮᱢᱟ ᱦᱟᱫᱮ ᱛᱟᱦᱮᱸᱫ ᱾ ᱚᱞ ᱜᱩᱨᱩ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱑᱙᱗᱘ ᱥᱟᱞᱮ ᱨᱮ ᱳᱰᱤᱥᱟ ᱥᱚᱨᱠᱟᱨ ᱫᱚ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱢᱮᱱᱛᱮᱭ ᱢᱟᱱᱟᱣ ᱞᱮᱫᱮ ᱛᱟᱦᱮᱸᱫ ᱾ ᱥᱟᱶᱛᱮ ᱢᱟᱹᱱ ᱥᱟᱠᱟᱢ ᱦᱚᱸᱭ ᱪᱟᱞ ᱟᱫᱮ ᱛᱟᱦᱮᱸᱫ ᱾ ᱚᱱᱟ ᱵᱮᱲᱟ ᱨᱮᱫᱚ ᱱᱤᱲᱚᱢᱚᱬᱤ ᱨᱟᱣᱩᱛ ᱨᱟᱭ ᱥᱤᱨᱟᱹ ᱢᱚᱱᱛᱨᱤ ᱞᱮᱠᱟᱛᱮ ᱫᱚᱭ ᱛᱟᱦᱮᱸ ᱠᱟᱱᱟ ᱾

ᱜᱩᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱗.᱑᱑.᱑᱙᱗᱙ ᱥᱟᱞᱮ ᱨᱮ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱨᱮᱱᱟᱜ ᱠᱮᱫᱽᱵᱚᱱᱟ ᱦᱟᱴᱨᱮ ᱜᱮᱥᱟᱭ ᱜᱮᱥᱟᱭ ᱦᱚᱲ ᱠᱚ ᱥᱟᱢᱟᱝ ᱨᱮ ᱜᱩᱨᱩ ᱜᱚᱢᱠᱮ ᱫᱚ ᱯᱩᱪᱷᱤᱢ ᱵᱟᱝᱞᱟ ᱥᱚᱨᱠᱟᱨ ᱥᱤᱨᱟᱹ ᱢᱚᱱᱛᱨᱤ ᱢᱟᱹᱱ ᱡᱽᱭᱚᱛᱤ ᱵᱚᱥᱩ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱞᱮᱠᱟᱛᱮ ᱵᱷᱟᱹᱜᱤ ᱥᱟᱺᱦᱤᱡ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱢᱤᱫ ᱛᱟᱸᱵᱟ ᱯᱟᱴᱟ ᱢᱟᱹᱱ ᱥᱟᱛᱞᱟᱜ ᱮ ᱪᱟᱞ ᱟᱫᱮᱭᱟ ᱾

ᱚᱞ ᱜᱩᱨᱩ ᱯᱚᱸᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱡᱟᱹᱥᱛᱤ ᱚᱠᱛᱚ ᱫᱚ ᱫᱤᱱᱟᱹᱢ ᱦᱤᱞᱚᱜ ᱜᱮ ᱵᱟᱹᱲᱛᱤ ᱫᱚ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮᱱᱟᱜ ᱜᱮᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱜᱩᱨᱩ ᱜᱚᱢᱠᱮ ᱫᱚ ᱡᱟᱹᱛᱤ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮᱱᱟᱜ ᱠᱟᱹᱢᱤ ᱠᱟᱹᱢᱤ ᱛᱮᱜᱮ ᱚᱞ ᱜᱩᱨᱩ ᱫᱚ ᱟᱡᱟᱜ ᱚᱲᱟᱜ ᱨᱮᱜᱮ ᱱᱟᱯᱟᱭ ᱛᱮᱜᱮ ᱑.᱒.᱑᱙᱘᱒ ᱦᱤᱞᱤᱜ ᱟᱵᱚ ᱥᱟᱱᱟᱢ ᱦᱚᱲ ᱠᱚ ᱥᱟᱢᱟᱝ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱜ ᱮ ᱪᱷᱟᱱ ᱥᱟᱹᱨᱤ ᱮᱱᱟ ᱾

ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱱᱟᱜ ᱪᱤᱠᱤ ᱵᱟᱝ ᱛᱟᱸᱦᱮ ᱠᱟᱱᱛᱮ ᱢᱤᱫ ᱡᱚᱠᱷᱮᱡ ᱫᱚ ᱵᱟᱝᱞᱟ, ᱫᱮᱵᱷᱱᱟᱜᱽᱨᱤ, ᱨᱳᱢᱟᱱ, ᱳᱰᱤᱭᱟᱹ ᱪᱤᱠᱤ ᱛᱮᱜᱮ ᱠᱚ ᱚᱞᱮᱫ ᱛᱟᱸᱦᱮᱫ ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱥᱟᱱᱛᱟᱲᱤ ᱥᱟᱶᱦᱮᱫ ᱵᱟᱝ ᱞᱟᱦᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱟᱭᱢᱟ ᱪᱤᱠᱤᱛᱮ ᱚᱞᱚᱜ ᱠᱷᱟᱹᱛᱤᱨ ᱪᱷᱟᱢ ᱪᱷᱟᱹᱛᱩᱨ ᱚᱵᱚᱥᱛᱷᱟ ᱨᱮ ᱛᱟᱸᱦᱮ ᱠᱟᱱᱟ ᱾ ᱮᱴᱟᱜ ᱪᱤᱠᱤ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱚᱞᱚᱜ ᱠᱷᱟᱹᱛᱤᱨ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱲᱟᱝ ᱫᱚ ᱯᱩᱥᱴᱟᱹᱣ ᱥᱟᱺᱦᱤᱡ ᱦᱚᱸ ᱵᱟᱝ ᱚᱞ ᱜᱟᱱᱚᱜ ᱠᱟᱱ ᱛᱟᱦᱮᱸᱫ ᱾ ᱚᱱᱟ ᱠᱚ ᱫᱤᱥᱟᱹ ᱠᱟᱛᱮ ᱜᱮ ᱱᱚᱶᱟ ᱫᱷᱟᱹᱨᱛᱤ ᱠᱷᱚᱱ ᱜᱮ ᱩᱱᱤ ᱫᱚ ᱤᱝᱨᱮᱡᱤ ᱑᱙᱒᱕ ᱥᱮᱨᱢᱟ ᱨᱮ ᱚᱞ ᱪᱤᱠᱤ ᱵᱮᱱᱟᱣ ᱥᱟᱹᱛ ᱠᱟᱛᱮ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮᱭ ᱩᱫᱩᱜ ᱥᱚᱫᱚᱨ ᱠᱮᱫ-ᱟ ᱾[᱔][᱕] ᱚᱞᱚᱜ ᱵᱚᱸᱜᱟ ᱵᱤᱫᱩ ᱪᱟᱸᱫᱟᱱ ᱩᱭᱦᱟᱹᱨ ᱛᱮ ᱚᱞ ᱪᱤᱠᱤ ᱫᱚᱭ ᱥᱤᱨᱡᱟ.ᱣ ᱟᱠᱟᱫ-ᱟ ᱢᱮᱱᱛᱮ ᱞᱟᱹᱭ ᱥᱚᱫᱚᱨ ᱟᱠᱟᱫ ᱟᱭ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱾ ᱢᱤᱫ ᱥᱟᱭ ᱜᱮᱞ ᱢᱚᱬᱮ ᱜᱚᱴᱟᱝ ᱯᱚᱛᱚᱵ ᱯᱩᱛᱷᱤ ᱠᱷᱚᱱ ᱦᱚᱢ ᱪᱮᱛᱟᱱ ᱯᱚᱛᱚᱵ ᱠᱚᱭ ᱚᱞ ᱟᱠᱟᱫ-ᱟ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱜᱚᱢᱠᱚ ᱫᱚ ᱾ ᱢᱚᱭᱩᱨᱵᱷᱚᱸᱡᱽ ᱢᱚᱦᱟᱥᱚᱵᱷᱟᱨᱮ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱜᱩᱨᱩ ᱜᱚᱢᱠᱮ ᱩᱯᱟᱹᱫᱷᱤ ᱦᱚᱸᱭ ᱧᱟᱢ ᱞᱮᱫ-ᱟ ᱾ ᱡᱷᱟᱨᱠᱷᱚᱸᱰ ᱨᱮᱭᱟᱜ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱰᱚᱠᱴᱚᱨ ᱚᱯᱷ ᱞᱤᱴᱟᱨᱮᱪᱟᱨ ᱩᱯᱟᱹᱫᱷᱤ ᱦᱚᱸ ᱠᱚ ᱮᱢ ᱟᱠᱟᱣᱟᱫᱮᱭᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱩᱨᱩ ᱢᱮᱱᱛᱮ ᱩᱱᱤ ᱫᱚᱠᱚ ᱢᱟᱱᱟᱣ ᱮᱭᱟ ᱾ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱤᱝᱨᱮᱡᱤ ᱑᱙᱘᱒ ᱥᱮᱨᱢᱟ ᱨᱮᱱᱟᱜ ᱒ ᱯᱷᱮᱵᱽᱨᱩᱣᱟᱨᱤ ᱨᱮᱭ ᱵᱚᱸᱜᱟ ᱛᱟᱞᱟ ᱮᱱᱟ ᱾

ᱯᱚᱛᱚᱵ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱡ ᱫᱚ ᱟᱡᱟᱜ ᱚᱞ ᱪᱤᱠᱤ ᱵᱮᱱᱟᱣ ᱥᱟᱶ ᱥᱟᱶᱛᱮ ᱟᱹᱰᱤ ᱜᱟᱱ ᱯᱚᱛᱚᱵ ᱯᱩᱛᱷᱤ, ᱥᱮᱨᱮᱧ ᱟᱨ ᱜᱟᱭᱟᱱ ᱯᱩᱛᱷᱤ ᱮᱢᱟᱱ ᱠᱚ ᱚᱞ ᱠᱷᱟ.ᱛᱤᱨ ᱦᱚᱸ ᱟᱹᱰᱤ ᱜᱟᱺᱦᱤᱨ ᱩᱯᱨᱩᱢ ᱡᱮᱜᱮᱛ ᱡᱟᱠᱟᱛ ᱨᱮ ᱢᱮᱱᱟᱜ ᱛᱟᱭᱟ ᱾ ᱩᱱᱤ ᱫᱚ ᱑᱕ ᱜᱚᱴᱟᱝ ᱜᱟᱱ ᱯᱚᱛᱚᱵ ᱮ ᱥᱳᱸᱯᱟᱫᱚᱠ ᱞᱮᱫ-ᱟ ᱾ ᱚᱱᱟ ᱠᱷᱚᱱ ᱫᱚ ᱦᱤᱛᱟ.ᱞ ᱵᱟᱹᱲᱛᱤ ᱦᱚᱲ ᱠᱚ ᱠᱩᱥᱤᱭᱟᱜ-ᱟ, ᱡᱟᱦᱟᱸ ᱥᱟᱱᱛᱟᱲ ᱥᱟᱶᱛᱟ ᱨᱮ ᱥᱟᱱᱛᱟᱲ "ᱫᱷᱚᱨᱚᱢ ᱯᱩᱛᱷᱤ" ᱢᱮᱱᱛᱮ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜ-ᱟ ᱾

ᱮᱞᱮᱞ ᱯᱚᱛᱚᱵ ᱠᱚ
ᱦᱚᱲ ᱥᱮᱨᱮᱧ
ᱧᱮᱞ ᱡᱚᱝ ᱞᱟᱹᱜᱤᱫ ᱚᱞ
ᱠᱷᱮᱨᱣᱟᱲ ᱵᱤᱨ
ᱵᱤᱫᱩ ᱪᱟᱸᱫᱟᱱ
ᱫᱟᱲᱮ ᱜᱮ ᱫᱷᱚᱱ
ᱚᱞ ᱪᱮᱢᱮᱫ
ᱮᱞᱠᱷᱟ
ᱵᱟᱠᱷᱮᱬ
ᱯᱟᱹᱨᱥᱤ ᱯᱚᱦᱟ
᱑᱐ ᱨᱚᱱᱚᱲ
᱑᱑ ᱦᱤᱛᱟ.ᱞ
᱑᱒ ᱚᱞ ᱩᱨᱩᱢ
᱑᱓ ᱯᱟᱹᱨᱥᱤ ᱤᱛᱩᱱ
᱑᱔ ᱞᱟᱠᱪᱮᱨ ᱥᱮᱨᱮᱧ
᱑᱕ ᱯᱟᱹᱨᱥᱤ ᱟᱯᱟᱫ

ᱢᱟᱹᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  • ᱢᱚᱭᱩᱨᱵᱷᱚᱸᱡᱽ ᱟᱹᱫᱤᱵᱟᱹᱥᱤ ᱢᱟᱦᱟᱥᱚᱵᱷᱟ ᱠᱷᱚᱱ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱜᱩᱨᱩ ᱜᱚᱢᱠᱮ ᱢᱮᱱᱛᱮ ᱩᱯᱟᱫᱷᱤ ᱧᱟᱢ ᱞᱮᱫ ᱟᱭ ᱾[᱖][᱗]
  • ᱵᱤᱦᱟᱨ ᱨᱮᱱᱟᱜ ᱨᱟᱡᱽᱜᱟᱲ ᱯᱟᱴᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱯᱟᱦᱴᱟ ᱠᱷᱚᱱ ᱰᱚᱠᱴᱚᱨᱮᱴ ᱤᱱ ᱞᱤᱴᱮᱨᱮᱪᱚᱨ ᱟᱨ ᱥᱟᱱᱛᱟᱲᱤ ᱞᱤᱴᱮᱨᱮᱪᱚᱨ ᱩᱯᱟᱫᱷᱤᱭ ᱪᱟᱞ ᱟᱫᱮ ᱛᱟᱦᱮᱸᱫ ᱾
  • ᱢᱟᱱᱚᱛᱟᱱ ᱡᱚᱭᱯᱟᱞ ᱥᱤᱝ, ᱨᱚᱧᱡᱤᱛ ᱥᱤᱝ ᱵᱟᱨᱦᱟ ᱟᱨ ᱢᱟᱨᱴᱤᱱ ᱩᱨᱟᱹᱝ ᱱᱩᱠᱩ ᱡᱚᱛᱚ ᱢᱮᱥᱟ ᱠᱟᱛᱮ "ᱚᱞ ᱜᱩᱨᱩ" ᱢᱮᱱᱛᱮ ᱢᱟᱹᱱ ᱠᱚ ᱮᱢᱟᱫᱮ ᱛᱟᱦᱮᱸᱫ ᱾
  • ᱑᱙᱗᱘ ᱥᱟᱞᱮ ᱨᱮ ᱳᱰᱤᱥᱟ ᱥᱚᱨᱠᱟᱨ ᱫᱚ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱢᱮᱱᱛᱮ ᱢᱟᱹᱱ ᱥᱟᱠᱟᱢ ᱪᱟᱞ ᱠᱟᱛᱮᱭ ᱥᱟᱨᱦᱟᱣ ᱞᱮᱫᱮᱭᱟ ᱾
  • ᱑᱗.᱑᱑.᱑᱙᱗᱙ ᱨᱮ ᱵᱮᱝᱜᱚᱞ ᱥᱚᱨᱠᱟᱨ ᱢᱟᱹᱱ ᱡᱽᱭᱚᱛᱤ ᱵᱚᱥᱩ ᱣᱟᱜ ᱛᱤᱛᱮ ᱚᱞ ᱪᱤᱠᱤ ᱡᱟᱱᱟᱢ ᱫᱟᱛᱟ ᱞᱮᱠᱟᱛᱮ ᱢᱟᱱᱟᱣ ᱠᱟᱛᱮ ᱢᱤᱫ ᱛᱟᱸᱵᱟ ᱯᱟᱴᱟ ᱪᱟᱞ ᱠᱟᱛᱮᱭ ᱢᱟᱹᱱ ᱥᱟᱨᱦᱟᱣ ᱞᱮᱫᱮᱭᱟ ᱾
  • ᱳᱰᱤᱥᱟ ᱥᱚᱨᱠᱟᱨ ᱫᱚ ᱵᱟᱹᱭᱥᱟᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱯᱩᱨᱟᱹ ᱯᱚᱱᱚᱛ ᱨᱮ ᱳᱯᱥᱚᱱᱟᱞ ᱪᱷᱩᱴᱤ ᱞᱮᱠᱟᱛᱮᱭ ᱜᱷᱚᱥᱱᱟ ᱟᱠᱟᱫ-ᱟ ᱾ ᱥᱮᱨᱢᱟ ᱯᱤᱪᱷᱤ ᱵᱟᱹᱭᱥᱟᱹᱠ ᱠᱩᱱᱟᱹᱢᱤ ᱨᱮ ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩ ᱫᱚ ᱟᱡᱟᱜ ᱚᱞ ᱪᱤᱠᱤ ᱥᱤᱨᱡᱚᱱ ᱠᱷᱟ.ᱛᱤᱨ ᱡᱮᱜᱮᱛ ᱡᱟᱠᱟᱛ ᱦᱚᱲ ᱠᱚ ᱩᱭᱦᱟᱹᱨ ᱨᱩᱣᱟᱹᱲ ᱮ ᱞᱟᱹᱜᱤᱫ ᱡᱮᱜᱮᱛ ᱡᱟᱠᱟᱛ ᱥᱟᱱᱛᱟᱲ ᱦᱚᱯᱚᱱ ᱠᱚ ᱟᱡᱟᱜ ᱡᱟᱱᱟᱢ ᱢᱟᱸᱦᱟ ᱫᱚ ᱵᱟᱹᱭᱥᱟᱹᱠ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱟᱹᱰᱤ ᱨᱚᱢᱡᱷᱚᱢ ᱛᱮᱠᱚ ᱢᱟᱱᱟᱣ ᱵᱟᱛᱟᱣ ᱮᱫ-ᱟ ᱾[᱘]

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  1. "History". Pandit Raghunath Murmu Medical College & Hospital. 2017-04-07. Retrieved 2020-04-01. 
  2. PeoplePill (1905-05-05). "Raghunath Murmu: Indian writer and linguist (1905-1982) - Biography and Life". PeoplePill. Retrieved 2020-04-01. 
  3. "SANTALI WRITERS". All India ASECA. Retrieved 2019-03-27. 
  4. "Naveen declares birthday of Raghunath Murmu a holiday". Times of India. ᱢᱮ 18, 2016. Archived from the original on 2016-05-22. Retrieved 2017-12-04. 
  5. "Odisha Government Portal" (PDF). Orissa.gov.in. Retrieved 3 ᱰᱤᱥᱮᱢᱵᱚᱨ 2017. 
  6. Pathy, J (1988). Ethnic Minorities in the Process of Development (in ᱟᱝᱜᱽᱨᱮᱡᱤ). Rawat Book Sellers. p. 174. ISBN 9788170330554. 
  7. "Indian Linguistics" (in ᱟᱝᱜᱽᱨᱮᱡᱤ). 47-50. 1987: 18. 
  8. "Naveen declares birthday of Raghunath Murmu a holiday - Times of India". The Times of India. 2016-05-18. Archived from the original on 2016-05-22. Retrieved 2019-03-27. 

ᱵᱟᱦᱨᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱡᱟᱜ ᱡᱤᱭᱚᱱ ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱯᱚᱛᱚᱵ ᱨᱮᱱᱟᱜ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ

ᱟᱡᱟᱜ ᱥᱟᱛᱟᱢ ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱯᱚᱛᱚᱵ ᱨᱮᱱᱟᱜ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ

ᱵᱟᱹᱠᱤ ᱥᱟᱹᱠᱷᱭᱟᱹᱛ ᱯᱟᱲᱦᱚᱣ ᱯᱮ