ᱯᱩᱥ ᱵᱚᱝᱜᱟ

ᱯᱩᱥ ᱵᱚᱝᱜᱟ ᱫᱚ ᱥᱮᱨᱢᱟ ᱨᱮᱱᱟᱜ ᱜᱮᱵᱟᱨᱟᱜ ᱵᱚᱝᱜᱟ ᱥᱮ ᱪᱟᱸᱫᱚ ᱠᱟᱱᱟ ᱾ ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱜ ᱥᱮᱨᱣᱟ ᱞᱮᱠᱟᱛᱮ ᱱᱩᱭ ᱪᱟᱸᱫᱚ ᱨᱮᱫᱚ ᱤᱨᱥᱤᱫ ᱠᱚ ᱵᱚᱝᱜᱟᱭᱟ ᱾ ᱪᱟᱹᱥᱤ ᱠᱚ ᱤᱱᱟᱹᱜ ᱛᱮᱫᱚ ᱤᱨᱩᱜ ᱠᱚᱠᱚ ᱪᱟᱵᱟ ᱠᱟᱜᱼᱟ ᱾ ᱱᱚᱶᱟ ᱫᱚ ᱪᱟᱥ ᱨᱮᱱᱟᱜ ᱢᱩᱪᱟᱹᱫ ᱵᱚᱝᱜᱟ ᱠᱟᱱᱟ ᱾ ᱱᱚᱶᱟ ᱫᱚ ᱥᱮᱨᱢᱟ ᱨᱮᱱᱟᱜ ᱢᱩᱪᱟᱹᱫ ᱪᱟᱸᱫᱚ ᱠᱟᱱᱟ ᱾ ᱯᱩᱥ ᱢᱮᱱ ᱞᱮᱠᱷᱟᱱ ᱦᱟᱯᱲᱟᱢ ᱠᱚ ᱢᱮᱱᱛᱮ ᱟᱸᱜᱚᱪᱚᱜᱼᱟ ᱾ ᱱᱚᱶᱟ ᱪᱟᱸᱫᱚ ᱨᱮᱫᱚ ᱵᱚᱝᱜᱟ ᱛᱟᱞᱟ ᱟᱠᱟᱱ ᱦᱟᱯᱲᱟᱢ ᱠᱚ ᱯᱮᱨᱮᱡ ᱩᱢᱟᱺᱬ ᱠᱚ ᱨᱮᱱᱟᱜ ᱥᱮᱨᱣᱟ ᱢᱮᱱᱟᱜᱼᱟ ᱾ ᱚᱱᱟ ᱛᱮ ᱟᱠᱚ ᱥᱮᱵᱟ ᱠᱚ ᱱᱟᱹᱯᱤᱛ ᱯᱟᱨᱟᱵ ᱠᱚ ᱢᱟᱱᱟᱶ ᱨᱮᱱᱟᱜ ᱱᱮᱸᱰᱟ ᱢᱮᱱᱟᱜᱼᱟ ᱾ ᱚᱱᱟ ᱫᱚ ᱯᱩᱥ ᱵᱚᱝᱜᱟ ᱠᱩᱱᱟᱹᱢᱤ ᱠᱮᱪᱟᱜ ᱛᱮᱥᱟᱨ ᱵᱟᱞᱮ ᱢᱟᱦᱟ ᱠᱷᱚᱱ ᱦᱩᱭᱩᱜᱼᱟ ᱾ ᱱᱚᱶᱟ ᱫᱚ ᱥᱟᱠᱨᱟᱛ ᱵᱚ ᱢᱮᱛᱟᱜ ᱠᱟᱱᱟ ᱾ ᱢᱮᱱᱟᱠᱚ ᱜᱚᱡ ᱵᱟᱧᱪᱟᱣ ᱥᱟᱠᱨᱟᱛ ᱾

ᱥᱟᱠᱨᱟᱛ ᱯᱟᱨᱟᱵᱽ

ᱢᱮᱱᱟ ᱠᱚ ᱜᱚᱡ ᱵᱟᱧᱪᱟᱣ ᱥᱟᱠᱨᱟᱛ ᱾ ᱱᱚᱶᱟ ᱥᱟᱠᱨᱟᱛ ᱯᱟᱨᱟᱵᱽ ᱫᱚᱥᱟᱨ ᱫᱚᱥᱟᱨ ᱜᱮ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱠᱚ ᱡᱤᱞᱤᱧ ᱰᱟᱦᱟᱨ ᱠᱚ ᱤᱫᱤ ᱠᱚᱣᱟ ᱟᱨ ᱥᱮᱨᱢᱟ ᱯᱩᱨᱟᱹᱣ ᱠᱟᱛᱮ ᱦᱟᱨᱠᱮᱛ ᱥᱟᱥᱮᱛ ᱠᱟᱛᱮ ᱵᱟᱧᱪᱟᱣ ᱛᱟᱦᱮᱸ ᱠᱟᱛᱮ ᱢᱟᱱᱟᱣᱜ ᱠᱟᱱ ᱯᱟᱨᱟᱵᱽ ᱜᱮ ᱥᱟᱠᱨᱟᱛ ᱯᱟᱨᱟᱵᱽ ᱫᱚᱵᱚ ᱢᱮᱛᱟᱜ ᱠᱟᱱᱟ ᱾ ᱥᱟᱠᱨᱟᱛ ᱮᱭᱟᱭ ᱢᱟᱦᱟᱸ ᱢᱟᱱᱟᱣᱜᱼᱟ ᱾ [᱑] ᱪᱟᱶᱰᱤ/ᱵᱟᱶᱰᱤ [᱒] ᱥᱟᱠᱨᱟᱛ [᱓] ᱜᱟᱺᱬᱤ ᱟᱥᱮᱱ [᱔] ᱵᱩᱰᱷᱤ ᱜᱟᱺᱬᱤ ᱟᱥᱮᱱ [᱕] ᱯᱟᱛᱟ [᱖] ᱡᱤᱞᱤᱧ ᱰᱟᱦᱟᱨ ᱚᱰᱚᱠᱚᱜ [᱗] ᱡᱟᱹᱛᱨᱤ ᱠᱚ ᱧᱮᱞᱫᱟᱨᱟᱢ ᱾ ᱱᱚᱶᱟ ᱢᱟᱱᱟᱣ ᱢᱟᱦᱟᱸ ᱠᱚᱫᱚ ᱴᱚᱴᱷᱟ ᱡᱟᱹᱱᱤᱡ ᱱᱟᱥᱮ ᱟᱹᱨᱩ ᱜᱮᱭᱟ ᱾ ᱚᱱᱟ ᱛᱮ ᱡᱚᱛᱚ ᱴᱚᱴᱷᱟ ᱨᱮᱫᱚ ᱮᱭᱟᱭ ᱢᱟᱦᱟᱸ ᱫᱚ ᱵᱟᱠᱚ ᱢᱟᱱᱟᱣᱟ ᱾ ᱤᱱᱟᱹᱦᱤᱞᱚᱜ ᱫᱚ ᱥᱮᱛᱟᱜ ᱵᱮᱲᱟ ᱠᱩᱲᱤ ᱦᱚᱯᱚᱱ ᱠᱚᱫᱚ ᱚᱲᱟᱜ ᱫᱩᱣᱟᱹᱨ ᱜᱮᱡ ᱜᱩᱨᱤᱡ ᱟᱨ ᱞᱩᱜᱽᱲᱤ ᱞᱟᱯᱚ ᱮᱢᱟᱱ ᱯᱷᱟᱨᱪᱟ ᱯᱷᱟᱹᱨᱪᱤ ᱠᱟᱹᱢᱤᱨᱮ ᱡᱚᱲᱟᱣ ᱠᱚ ᱛᱟᱦᱮᱸᱱᱟ ᱾ ᱠᱚᱲᱟ ᱦᱚᱯᱚᱱ ᱠᱚᱫᱚ ᱡᱤᱞ ᱟᱨ ᱦᱟᱹᱠᱩ ᱥᱮᱸᱫᱽᱨᱟ ᱠᱚ ᱫᱟᱬᱟ ᱵᱟᱲᱟᱭᱟ ᱾ ᱟᱹᱭᱩᱵ ᱫᱚ ᱡᱤᱞ ᱟᱨ ᱦᱟᱹᱠᱩ ᱡᱩᱫᱟᱹ ᱡᱩᱫᱟᱹ ᱩᱛᱩ ᱠᱟᱛᱮ ᱫᱟᱠᱟ ᱥᱟᱞᱟᱜ ᱯᱟᱛᱲᱟ ᱟᱨ ᱯᱷᱩᱲᱩᱜ ᱨᱮᱠᱚ ᱡᱚᱢᱟ ᱾ ᱠᱟᱹᱴᱤᱡ ᱠᱟᱹᱴᱤᱡ ᱠᱚ ᱤᱛᱟᱹᱫ ᱠᱟᱜ ᱜᱮᱭᱟ ᱾ ᱪᱮᱫᱟᱜ ᱥᱮ ᱥᱟᱠᱨᱟᱛ ᱵᱩᱰᱷᱤ ᱤᱱᱟᱹ ᱦᱤᱞᱚᱜ ᱫᱚ ᱯᱟᱛᱲᱟᱭ ᱞᱮᱠᱷᱟᱭᱟ ᱚᱠᱟ ᱜᱷᱟᱨᱚᱸᱡᱽ ᱨᱮ ᱛᱤᱱᱟᱹᱜ ᱦᱚᱲ ᱢᱮᱱᱟᱜ ᱠᱚᱣᱟ ᱾ ᱩᱱᱠᱩ ᱡᱚᱢ ᱧᱩ ᱠᱚ ᱠᱩᱲᱟᱹᱣᱜ ᱠᱟᱱᱟ ᱥᱮ ᱵᱟᱝ ᱟ ᱾ ᱠᱩᱲᱟᱣᱜ ᱠᱷᱟᱱᱠᱚ ᱫᱤᱱ ᱜᱮᱠᱚ ᱠᱩᱲᱟᱣᱜᱼᱟ ᱾ ᱵᱟᱝ ᱠᱷᱟᱱ ᱫᱤᱱ ᱜᱮᱠᱚ ᱨᱮᱸᱜᱮ ᱡᱚᱜᱼᱟ ᱾ ᱚᱱᱟᱛᱮ ᱤᱱᱟᱹᱦᱤᱞᱚᱜ ᱫᱚᱠᱚ ᱠᱩᱲᱟᱹᱣ ᱠᱟᱜ ᱜᱮᱭᱟ ᱾

ᱪᱟᱶᱰᱤ/ᱵᱟᱶᱰᱤ

ᱪᱟᱶᱰᱤ ᱫᱚ ᱥᱟᱠᱨᱟᱛ ᱢᱟᱬᱟᱝ ᱦᱤᱞᱚᱜ ᱠᱚ ᱢᱟᱱᱟᱶᱟ ᱾ ᱤᱱᱟᱹ ᱦᱤᱞᱚᱜ ᱦᱟᱹᱠᱩ ᱠᱟᱴᱠᱚᱢ ᱟᱨ ᱡᱤᱞ ᱢᱤᱫ ᱛᱮᱠᱚ ᱡᱚᱢᱟ ᱾ ᱟᱵᱚ ᱫᱚ ᱫᱟᱜ ᱡᱤᱣᱤ ᱠᱷᱚᱱ ᱚᱛᱮᱛ ᱛᱮᱵᱚ ᱦᱮᱡ ᱟᱠᱟᱱ ᱦᱟᱹᱠᱩ ᱠᱟᱴᱠᱚᱢ ᱥᱟᱶ ᱡᱤᱞᱵᱚ ᱡᱚᱢᱟ ᱾ ᱮᱴᱟᱜ ᱡᱚᱠᱷᱟᱜ ᱡᱚᱠᱷᱟᱜ ᱫᱚ ᱡᱤᱞ ᱟᱨ ᱦᱟᱹᱠᱩ ᱫᱚ ᱵᱟᱠᱚ ᱡᱚᱢᱟ ᱾ ᱥᱩᱢᱟᱹᱫ ᱜᱚᱡ ᱛᱟᱭᱚᱢ ᱵᱟᱜ ᱨᱚᱶᱟ ᱫᱟᱠᱟ ᱥᱟᱞᱟᱜ ᱠᱚ ᱜᱮᱠᱚ ᱡᱚᱢᱟ ᱾ ᱥᱟᱠᱨᱟᱛ ᱫᱚ ᱜᱚᱡ ᱜᱩᱨ ᱦᱚᱲᱟᱜ ᱯᱟᱨᱟᱵ ᱠᱟᱱᱟ ᱾ ᱚᱱᱟᱛᱮ ᱦᱟᱹᱠᱩ ᱠᱟᱴᱠᱚᱢ ᱟᱨ ᱡᱤᱞ ᱠᱚ ᱡᱚᱢᱟ ᱾ ᱜᱚᱡ ᱠᱚ ᱵᱟᱧ ᱨᱩᱣᱟᱹᱲ ᱵᱟᱝ ᱡᱟᱱᱟᱢ ᱨᱩᱣᱟᱹᱲ ᱠᱚ ᱞᱟᱹᱜᱤᱫ ᱱᱮᱦᱚᱨ ᱵᱟᱠᱷᱮᱬ ᱨᱮᱱᱟᱜ ᱯᱟᱨᱟᱵ ᱜᱮ ᱥᱟᱠᱨᱟᱛ ᱯᱟᱨᱟᱵ ᱫᱚ ᱾

ᱥᱟᱠᱨᱟᱛ

ᱪᱟᱶᱰᱤ ᱫᱚᱥᱟᱨ ᱦᱤᱞᱚᱜ ᱫᱚ ᱥᱟᱠᱨᱟᱛ ᱾ ᱥᱟᱠᱨᱟᱛ ᱦᱤᱞᱚᱜ ᱫᱚ ᱥᱤᱢ ᱨᱟᱜ ᱛᱮ ᱠᱚ ᱛᱩᱯᱩᱱᱟ ᱾ ᱛᱩᱯᱩ ᱨᱟᱠᱟᱵ ᱠᱟᱛᱮ ᱢᱟᱬᱟᱝ ᱨᱮ ᱵᱮᱱᱟᱶ ᱟᱠᱟᱱ ᱵᱩᱰᱷᱤ ᱠᱩᱸᱵᱟᱹ ᱠᱚ ᱟᱛᱟᱨᱟ ᱾ ᱚᱸᱰᱮ ᱠᱚ ᱡᱩᱨᱩᱜ ᱠᱮᱴᱮᱡᱚᱜᱼᱟ ᱾ ᱠᱩᱸᱵᱟᱹ ᱟᱛᱟᱨ ᱠᱷᱚᱱ ᱦᱮᱡ ᱠᱟᱛᱮ ᱫᱚ ᱚᱲᱟᱜ ᱨᱮ ᱦᱮᱡ ᱠᱟᱛᱮ ᱢᱤᱫᱴᱟᱹᱝ ᱥᱤᱢ ᱫᱩᱣᱟᱹᱨ ᱨᱮᱠᱚ ᱛᱷᱟᱯᱟ ᱮᱭᱟ ᱾ ᱤᱱᱟᱹ ᱛᱟᱭᱚᱢ ᱟᱭᱳ ᱛᱮᱠᱚ ᱵᱮᱱᱟᱣ ᱟᱠᱟᱫ ᱡᱤᱞ ᱯᱤᱴᱷᱟᱹ ᱠᱚ ᱡᱚᱢᱟ ᱥᱟᱶᱛᱮ ᱠᱷᱟᱹᱡᱟᱹᱲᱤ ᱛᱟᱵᱮᱱ ᱜᱩᱲ ᱥᱟᱞᱟᱜ ᱠᱚ ᱡᱚᱢᱟ ᱾ ᱤᱱᱟ ᱦᱤᱞᱚᱜ ᱫᱚ ᱥᱮᱛᱟᱜ ᱵᱮᱲᱟ ᱫᱚ ᱫᱟᱠᱟ ᱫᱚ ᱯᱟᱞᱮ ᱵᱟᱠᱚ ᱡᱚᱢᱟ ᱾ ᱛᱤᱠᱤᱱ ᱠᱩᱲᱤ ᱦᱚᱯᱚᱱ ᱠᱚ ᱛᱩᱯᱩ ᱦᱮᱡ ᱠᱟᱛᱮ ᱫᱟᱠᱟ ᱪᱚᱸᱫᱟ ᱠᱟᱛᱮ ᱠᱚ ᱡᱚᱢᱟ ᱾ ᱤᱱᱟ ᱦᱤᱞᱚᱜ ᱫᱚ ᱴᱚᱞᱟ ᱨᱤᱱ ᱥᱟᱱᱟᱢ ᱠᱩᱲᱤ ᱠᱚ ᱢᱤᱫ ᱛᱮ ᱛᱩᱯᱩᱱ ᱠᱚ ᱪᱟᱞᱟᱜᱼᱟ ᱾ ᱟᱨ ᱛᱩᱯᱩᱱ ᱜᱷᱟᱴ ᱨᱮ ᱵᱤᱨ ᱠᱚ ᱥᱮᱨᱮᱧᱟ ᱾ ᱠᱚᱲᱟ ᱠᱚᱫᱚ ᱛᱟᱨᱟᱥᱤᱧ ᱠᱷᱟᱱ ᱜᱮ ᱵᱮᱡᱷᱟ ᱛᱩᱧ ᱠᱚ ᱪᱟᱞᱟᱜᱼᱟ ᱾ ᱵᱮᱡᱷᱟ ᱟᱹᱛᱩ ᱨᱤᱱᱤᱡ ᱱᱟᱭᱠᱮᱭ ᱵᱤᱫᱟ ᱾ ᱟᱹᱛᱩ ᱢᱟᱯᱟᱧᱡᱤ ᱥᱟᱶᱛᱮ ᱟᱹᱛᱩ ᱦᱚᱲ ᱠᱚ ᱱᱟᱭᱠᱮ ᱚᱲᱟᱜ ᱠᱷᱚᱱᱠᱚ ᱫᱟᱨᱟᱢ ᱫᱟᱜ ᱟᱹᱜᱩᱭᱮᱭᱟ ᱵᱮᱡᱷᱟ ᱴᱟᱺᱰᱤᱛᱮ ᱾ ᱥᱟᱶᱨᱮ ᱢᱤᱫᱴᱟᱹᱝ ᱠᱟᱭᱨᱟ ᱫᱟᱨᱮ ᱠᱚ ᱟᱹᱜᱩ ᱛᱟᱨᱟᱭᱟ ᱾ ᱚᱱᱟ ᱠᱟᱭᱨᱟ ᱫᱟᱨᱮᱜᱮ ᱱᱟᱭᱠᱮᱫᱚ ᱵᱮᱡᱷᱟ ᱴᱟᱺᱰᱤᱨᱮ ᱵᱚᱝᱜᱟ ᱵᱳᱨᱳ ᱵᱟᱲᱟ ᱠᱟᱛᱮᱭ ᱵᱤᱫᱟ ᱾ ᱟᱫᱚ ᱯᱷᱟᱨᱟᱠ ᱧᱚᱜ ᱠᱷᱚᱱᱠᱚ ᱛᱩᱧᱟ ᱟᱹᱛᱩ ᱡᱷᱟᱠ ᱦᱚᱲ ᱛᱮ ᱾ ᱵᱮᱡᱷᱟ ᱛᱩᱧ ᱨᱮ ᱫᱚ ᱠᱩᱲᱤ ᱟᱨ ᱵᱤᱱ ᱛᱚᱣᱟ ᱰᱟᱴᱟ ᱧᱩᱨ ᱜᱤᱫᱽᱨᱟᱹ ᱫᱚ ᱵᱟᱠᱚ ᱢᱮᱥᱟ ᱠᱚᱣᱟ ᱾ ᱵᱮᱡᱷᱟ ᱛᱩᱧ ᱨᱮ ᱡᱟᱦᱟᱭᱮ ᱵᱟᱡᱟᱣᱟ ᱩᱱᱤ ᱫᱚ, ᱠᱟᱭᱨᱟ ᱫᱟᱨᱮ ᱠᱷᱟᱺᱰᱨᱟ ᱠᱟᱛᱮ ᱥᱟᱨ ᱢᱮᱥᱟᱜᱮ ᱱᱟᱭᱠᱮ ᱚᱲᱟᱜ ᱛᱮ ᱱᱟᱭᱠᱮ ᱢᱮᱥᱟᱜᱮ ᱱᱟᱭᱠᱮ ᱚᱲᱟᱜ ᱛᱮᱠᱚ ᱜᱷᱚᱬᱟ ᱠᱟᱛᱮ ᱠᱚ ᱫᱟᱨᱟᱢ ᱫᱟᱜ ᱤᱫᱤᱭᱮᱭᱟ ᱾ ᱥᱤᱨᱯᱷᱟᱹ ᱞᱮᱠᱟᱛᱮᱫᱚ ᱡᱟᱸᱜᱟ ᱟᱹᱨᱩᱵ ᱠᱟᱛᱮ ᱚᱲᱟᱜ ᱵᱷᱤᱛᱨᱤ ᱨᱮ ᱡᱚᱢᱟᱜ ᱧᱩᱣᱟᱜ ᱠᱚ ᱮᱢᱟᱸᱭᱟ ᱾ ᱱᱤᱝᱠᱟᱹ ᱠᱟᱹᱢᱤ ᱵᱟᱲᱟ ᱠᱟᱛᱮ ᱥᱟᱠᱨᱟᱛ ᱦᱤᱞᱚᱜ ᱫᱚ ᱯᱟᱨᱚᱢᱚᱜᱼᱟ ᱾

ᱵᱮᱡᱷᱟᱛᱩᱧ

ᱥᱟᱠᱨᱟᱛ ᱦᱤᱞᱚᱜ ᱛᱟᱨᱟᱥᱤᱧ ᱫᱚ ᱵᱮᱡᱷᱟ ᱠᱚ ᱛᱩᱧᱟ ᱾

ᱜᱟᱹᱬᱤ ᱟᱥᱮᱱ

ᱥᱟᱠᱨᱟᱛ ᱫᱚᱥᱟᱨ ᱦᱤᱞᱚᱜ ᱫᱚ ᱜᱟᱹᱬᱤ ᱟᱥᱮᱱ ᱠᱟᱱᱟ ᱾ ᱤᱱᱟᱹ ᱦᱤᱞᱚᱜ ᱫᱚ ᱯᱤᱴᱷᱟ, ᱞᱮᱴᱚ,ᱠᱷᱟᱹᱡᱟᱹᱲᱤ ᱛᱟᱵᱮᱱ ᱠᱚ ᱱᱟᱥᱮ ᱵᱟᱥᱠᱮ ᱠᱚᱜᱼᱟ ᱾ ᱜᱩᱸᱫᱽᱞᱤ ᱵᱩᱥᱩᱵ, ᱡᱟᱱᱦᱮ ᱵᱩᱥᱩᱵ, ᱦᱳᱲᱳ ᱵᱩᱥᱩᱵ ᱨᱤᱱ ᱜᱟᱹᱬᱤ, ᱦᱟᱹᱬᱩ ᱠᱚ ᱵᱮᱱᱟᱣ ᱠᱚᱣᱟ ᱾ ᱟᱫᱚ ᱩᱱᱠᱩ ᱜᱮ ᱚᱲᱟᱜ ᱚᱲᱟᱜ ᱠᱚ ᱟᱥᱮᱱ ᱠᱚᱣᱟ ᱟᱨ ᱯᱤᱴᱟᱹ, ᱞᱮᱴᱚ, ᱠᱷᱟᱹᱡᱟᱹᱲᱤ ᱛᱟᱵᱮᱱ ᱥᱟᱶ ᱪᱟᱣᱞᱮ ᱠᱚ ᱠᱚᱭ ᱠᱚᱣᱟ ᱾ ᱱᱟᱱᱟ ᱦᱩᱱᱟᱹᱨ ᱠᱚ ᱥᱮᱨᱮᱧᱟ ᱡᱮᱞᱮᱠ---- " ᱫᱤᱧ ᱫᱟᱝ ᱫᱤᱧ ᱞᱩᱴᱠᱩ ᱞᱩᱴᱩᱢ, ᱵᱷᱮᱸᱫᱟᱝ ᱫᱟᱝ ᱵᱷᱮᱸᱫᱟᱝ ᱫᱟᱞ ᱠᱟᱠᱲᱟ ᱨᱟᱥᱮ, ᱮᱢ ᱠᱷᱟᱱ ᱫᱚ ᱮᱢᱟ ᱞᱮᱯᱮ ᱜᱳ, ᱵᱟᱝ ᱠᱷᱟᱱ ᱫᱚ, ᱢᱚᱬᱮ ᱢᱟᱦᱟ ᱞᱮ ᱵᱟᱥᱟ ᱟᱯᱮᱭᱟ, ᱠᱚᱪᱟ ᱨᱤᱱᱤᱡ ᱯᱩᱸᱰ ᱥᱟᱺᱰᱤ ᱞᱮ ᱡᱚᱢᱮ ᱛᱟᱯᱮᱭᱟ ᱾ ᱫᱤᱧ ᱫᱟᱝ ᱫᱤᱧ ᱞᱩᱴᱠᱩ ᱞᱩᱴᱩᱢ ᱾" ᱱᱚᱝᱠᱟ ᱛᱟᱨᱟᱥᱤᱧ ᱫᱷᱟᱹᱨᱤᱡ ᱠᱚ ᱫᱟᱬᱟᱱᱟ ᱾ ᱛᱟᱨᱟᱥᱤᱧ ᱫᱚ ᱚᱠᱟ ᱠᱚᱨᱮᱪᱚ ᱪᱟᱛᱚᱢ ᱵᱩᱨᱩ, ᱞᱮᱴᱚ ᱵᱩᱨᱩ, ᱮᱢᱟᱱ ᱠᱚ ᱮᱱᱮᱡ ᱡᱚᱝ ᱟ ᱯᱟᱛᱟ ᱞᱮᱠᱟ ᱾ ᱟᱹᱭᱩᱵ ᱫᱚ ᱫᱷᱚᱨᱚᱢ ᱟᱠᱷᱲᱟᱨᱮ ᱞᱟᱜᱽᱬᱮ ᱠᱚ ᱮᱱᱮᱡᱼᱟ ᱾

ᱵᱩᱰᱷᱤ ᱜᱟᱹᱬᱤ ᱟᱥᱮᱱ

ᱜᱟᱹᱬᱤ ᱟᱥᱮᱱ ᱫᱚᱥᱟᱨ ᱦᱤᱞᱚᱜ ᱫᱚ ᱵᱩᱰᱷᱤ ᱜᱟᱹᱬᱤ ᱟᱥᱮᱱ ᱾ ᱵᱩᱰᱷᱤ ᱜᱟᱹᱬᱤ ᱢᱮᱱ ᱞᱮᱠᱷᱟᱱ ᱰᱟᱱᱴᱟ, ᱠᱩᱲᱤ ᱰᱟᱱᱴᱟ ᱠᱚ ᱮᱱᱮᱡ ᱟᱹᱪᱩᱨᱟ ᱾ ᱜᱟᱹᱬᱤ ᱟᱥᱮᱱ ᱞᱮᱠᱟᱜᱮ ᱠᱷᱟᱹᱡᱟᱹᱲᱤ, ᱛᱟᱵᱮᱱ, ᱯᱤᱴᱷᱟ, ᱪᱟᱣᱞᱮ ᱮᱢᱟᱱ ᱠᱚ ᱠᱚᱭ ᱟᱹᱪᱩᱨᱟ ᱾

ᱯᱟᱛᱟ/ᱪᱟᱛᱚᱢ ᱵᱩᱨᱩ/ᱞᱮᱴᱚ ᱵᱩᱨᱩ

ᱤᱱᱟᱹ ᱵᱩᱰᱷᱤ ᱜᱟᱹᱬᱤ ᱟᱥᱮᱱ ᱦᱤᱞᱚᱜ ᱜᱮ ᱛᱟᱨᱟ ᱥᱤᱧ ᱵᱮᱲᱟ ᱠᱩᱞᱦᱤ ᱢᱩᱪᱟᱹᱫ ᱨᱮ ᱯᱟᱛᱟ/ᱪᱟᱛᱚᱢ ᱵᱩᱨᱩ/ᱞᱮᱴᱚ ᱵᱩᱨᱩ ᱧᱩᱛᱩᱢ ᱛᱮᱠᱚ ᱮᱱᱮᱡᱼᱟ ᱾ ᱚᱱᱟ ᱫᱚ ᱯᱟᱨᱟᱵ ᱨᱮᱱᱟᱜ ᱵᱤᱫᱟᱹᱭ ᱮᱱᱮᱡ ᱠᱟᱱᱟ ᱾

ᱡᱤᱞᱤᱧ ᱰᱟᱦᱟᱨ/ᱱᱟᱺᱭᱛᱮ ᱪᱟᱞᱟᱜ

ᱥᱟᱠᱨᱟᱛ ᱯᱟᱨᱟᱵ ᱨᱮᱱᱟᱜ ᱢᱩᱪᱟᱹᱫ ᱠᱟᱹᱢᱤ ᱫᱚ ᱡᱤᱞᱤᱧ ᱰᱟᱦᱟᱨ ᱵᱟᱝ ᱱᱟᱺᱭ ᱛᱮ ᱪᱟᱞᱟᱜ ᱾ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱠᱚ ᱥᱟᱠᱨᱟᱛ ᱫᱚᱥᱟᱨ ᱡᱤᱞᱤᱧ ᱰᱟᱦᱟᱨ ᱛᱮᱠᱚ ᱤᱫᱤ ᱠᱚᱣᱟ ᱾ ᱢᱟᱬᱟᱝ ᱫᱚ ᱛᱷᱩᱞᱤ ᱠᱚ ᱨᱚᱜᱟ ᱾ ᱛᱷᱩᱞᱤ ᱨᱚᱜ ᱛᱟᱭᱚᱢ ᱠᱚ ᱨᱩᱢ ᱵᱚᱝᱜᱟ ᱠᱚᱣᱟ ᱾ ᱨᱩᱢ ᱵᱚᱝᱜᱟ ᱨᱮ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱠᱚ ᱠᱩᱞᱤ ᱮᱭᱟ, ᱚᱠᱚᱭ ᱥᱟᱞᱟᱜ ᱛᱮ ᱛᱩᱯᱩ ᱱᱟᱺᱭ ᱜᱷᱟᱴᱮ ᱪᱟᱞᱟᱜᱼᱟ ᱾ ᱪᱮᱫ ᱪᱮᱫ ᱥᱟᱸᱜᱚᱪ [ᱡᱤᱱᱤᱥ] ᱠᱚ ᱤᱫᱤ ᱥᱟᱱᱟᱭᱮ ᱠᱟᱱᱟ ᱾ ᱚᱱᱟᱠᱚ ᱵᱟᱰᱟᱭ ᱠᱟᱛᱮ ᱩᱱᱤ ᱚᱱᱟ ᱠᱚᱠᱚ ᱮᱢᱠᱟᱜ ᱛᱟᱭᱟ ᱾ ᱩᱱ ᱡᱚᱠᱷᱟᱜ ᱜᱮ ᱯᱮᱲᱟ ᱦᱚᱯᱚᱱ ᱠᱚ ᱡᱟᱦᱟᱱᱟᱜ ᱮᱢᱚᱜ ᱨᱮᱱᱟᱜ ᱛᱟᱦᱮᱱ ᱠᱷᱟᱱ ᱩᱱᱤ ᱨᱩᱢᱩᱜᱤᱡ ᱜᱮᱠᱚ ᱮᱢᱟᱭᱟ ᱾ ᱟᱨᱵᱟᱝ ᱠᱷᱟᱱ ᱡᱟᱹᱛᱨᱤ ᱛᱤᱱ ᱡᱚᱠᱷᱟᱜ ᱠᱚ ᱚᱡᱚᱜ ᱡᱟᱯᱟᱜ ᱮᱭᱟ ᱩᱱ ᱡᱚᱠᱷᱟᱜ ᱦᱚᱸ ᱡᱟᱹᱛᱨᱤ ᱫᱟᱱ ᱞᱟᱹᱜᱤᱫ ᱥᱟᱯᱟᱵ ᱠᱚ ᱠᱚ ᱮᱢᱟᱭᱟ ᱾ ᱱᱚᱝᱠᱟ ᱦᱩᱭᱩᱜᱼᱟ , ᱢᱤᱫ ᱦᱟ ᱨᱮ ᱠᱟᱹᱢᱤ ᱵᱟᱝ ᱪᱟᱵᱟᱜ ᱠᱷᱟᱱ ᱫᱚᱥᱟᱨ ᱦᱤᱞᱚᱜ ᱦᱚᱸ ᱡᱟᱹᱛᱨᱤ ᱠᱚ ᱚᱰᱚᱠᱮᱭᱟ ᱾ ᱥᱩᱱᱩᱢ ᱥᱟᱥᱟᱝ ᱚᱡᱚᱜ ᱮᱭᱟ ᱟᱨ ᱫᱷᱩᱛᱤ ᱫᱟᱦᱲᱤ ᱠᱟᱛᱮ ᱚᱲᱟᱜ ᱠᱷᱚᱱ ᱠᱚ ᱚᱰᱚᱠᱮᱭᱟ ᱾ ᱚᱰᱚᱠ ᱠᱟᱛᱮ ᱪᱟᱸᱜᱚᱨ ᱨᱮ ᱠᱚ ᱤᱫᱤ ᱮᱭᱟ ᱾ ᱚᱸᱰᱮ ᱜᱮ ᱟᱹᱨᱩᱵ ᱞᱟᱹᱜᱤᱫ ᱛᱚᱯᱟ ᱟᱠᱟᱱ ᱡᱟᱝ ᱵᱟᱦᱟ ᱟᱹᱨᱩᱵ ᱞᱟᱹᱜᱤᱫ ᱠᱚ ᱩᱴᱠᱟᱹᱣ ᱟᱹᱜᱩᱭᱟ ᱟᱨ ᱡᱟᱹᱛᱨᱤ ᱚᱱᱟ ᱡᱟᱝ ᱵᱟᱦᱟᱭ ᱟᱹᱨᱩᱵᱟ ᱾ ᱯᱮᱭᱟ ᱛᱤᱨᱤᱞ ᱛᱤᱨᱤᱞ ᱪᱟᱸᱜᱟ ᱠᱚ ᱵᱮᱱᱟᱣᱟ ᱾ ᱚᱱᱟ ᱪᱟᱸᱜᱟ ᱨᱮ ᱡᱟᱝ ᱵᱟᱦᱟ ᱫᱚᱦᱚᱞᱟᱱ ᱪᱩᱠᱟᱜ ᱠᱚ ᱫᱚᱦᱚᱭᱟ ᱾ ᱚᱱᱟ ᱪᱩᱠᱟᱜ ᱪᱚᱴ ᱨᱮ ᱥᱟᱥᱟᱝ ᱫᱟᱜ ᱟᱨ ᱵᱮᱨᱮᱞ ᱫᱟᱜ ᱛᱮ ᱚᱲᱟᱜ ᱦᱚᱲ ᱟᱨ ᱟᱹᱛᱩ ᱦᱚᱲ ᱛᱮ ᱡᱟᱝ ᱵᱟᱦᱟ ᱠᱚ ᱟᱹᱨᱩᱵᱟ ᱾ ᱯᱷᱟᱨᱪᱟ ᱜᱟᱢᱪᱷᱟ ᱪᱚᱴ ᱨᱮ ᱡᱟᱹᱛᱨᱤ ᱠᱚᱲᱟ ᱡᱟᱝ ᱵᱟᱦᱟᱭ ᱟᱹᱨᱩᱵᱟ ᱾ ᱡᱟᱝ ᱵᱟᱦᱟ ᱟᱹᱨᱩᱵ ᱪᱟᱵᱟ ᱠᱟᱛᱮ ᱡᱟᱹᱛᱨᱤ ᱵᱟᱹᱲᱛᱤ ᱟᱠᱟᱱ ᱛᱤᱨᱤᱞ ᱦᱟᱯᱟ ᱞᱮᱸᱜᱟᱛᱤᱛᱮ ᱥᱟᱵ ᱠᱟᱛᱮ ᱮᱛᱚᱢ ᱛᱮ ᱯᱮ ᱫᱷᱟᱣ ᱟᱹᱪᱩᱨ ᱠᱟᱛᱮ ᱵᱚᱝᱜᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱪᱟᱸᱜᱟ ᱪᱚᱴ ᱨᱮᱱᱟᱜ ᱪᱩᱠᱟᱹᱜᱼᱮ ᱫᱟᱞ ᱨᱟᱹᱯᱩᱫ ᱦᱚᱴᱚ ᱠᱟᱜᱼᱟ ᱾ ᱟᱫᱚ ᱪᱟᱞᱟᱜ ᱦᱚᱨ ᱥᱮᱫᱼᱮ ᱟᱹᱪᱩᱨ ᱪᱟᱞᱟᱜᱼᱟ ᱾ ᱤᱱᱟᱹ ᱛᱟᱭᱚᱢ ᱫᱚ ᱵᱟᱹᱴᱤ ᱥᱮᱫ ᱠᱚ ᱪᱟᱞᱟᱜᱼᱟ ᱾ ᱪᱟᱸᱜᱚᱨ ᱨᱮ ᱚᱡᱷᱟ ᱥᱤᱢ ᱵᱩᱥᱟᱜ ᱛᱮ ᱪᱷᱟᱰᱟᱣ ᱠᱚᱣᱟ ᱡᱟᱹᱛᱨᱤ ᱢᱩᱴᱷᱤᱭᱟ ᱟᱨ ᱟᱹᱭᱩᱨᱤᱭᱟᱹ ᱠᱚ ᱾ ᱟᱫᱚ ᱡᱤᱞᱤᱧ ᱰᱟᱦᱟᱨ ᱦᱚᱨ ᱛᱮᱠᱚ ᱵᱤᱫᱟᱹᱭ ᱜᱚᱫ ᱠᱟᱠᱚᱣᱟ ᱢᱟᱯᱟᱧᱡᱤ ᱟᱛᱮ ᱾ ᱪᱟᱞᱟᱜ ᱡᱚᱠᱷᱟᱜ " ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ " ᱠᱚ ᱨᱟᱹᱲ ᱤᱫᱤᱭᱟ ᱾ ᱚᱱᱠᱟ ᱨᱟᱹᱲ ᱨᱟᱹᱲ ᱛᱮ ᱱᱟᱺᱭ ᱜᱷᱟᱴ ᱫᱷᱟᱹᱨᱤᱡ ᱠᱚ ᱪᱟᱞᱟᱜᱼᱟ ᱾ ᱢᱩᱠᱟᱹᱢ ᱠᱚ ᱟᱦᱮᱱ ᱠᱷᱟᱱ ᱚᱱᱟ ᱠᱚᱨᱮᱠᱚ ᱡᱤᱨᱟᱞ ᱛᱟᱨᱟᱜᱼᱟ ᱾ ᱱᱟᱺᱭ ᱨᱮ ᱥᱮᱴᱮᱨ ᱠᱟᱛᱮ ᱦᱚᱭᱚ ᱢᱩᱰᱨᱟᱹᱜ ᱟᱠᱚ ᱾ ᱦᱚᱭᱚ ᱢᱩᱰᱨᱟᱹ ᱛᱟᱭᱚᱢ ᱡᱟᱹᱛᱨᱤ ᱠᱚᱲᱟ ᱱᱟᱹᱭ ᱫᱟᱜ ᱨᱮ ᱯᱮ ᱫᱷᱟᱣ ᱩᱱᱩᱢ ᱠᱟᱛᱮ ᱡᱟᱝ ᱵᱟᱦᱟᱭ ᱵᱚᱦᱮᱞᱟ ᱾ ᱡᱟᱝ ᱵᱟᱦᱟ ᱵᱚᱦᱮᱞ ᱡᱚᱠᱷᱟᱜ ᱯᱮ ᱫᱷᱟᱣ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱢᱮᱱ ᱠᱟᱛᱮ ᱡᱟᱝ ᱵᱟᱦᱟᱭ ᱟᱲᱟᱜ ᱜᱚᱫ ᱠᱟᱜᱼᱟ ᱾ ᱟᱫᱚ ᱢᱤᱫ ᱟᱸᱡᱽᱞᱮ ᱵᱟᱹᱞᱤ ᱟᱹᱜᱩ ᱛᱟᱨᱟ ᱠᱟᱛᱮ ᱜᱷᱩᱴᱩ ᱨᱮ ᱯᱮᱸᱰᱮ ᱵᱮᱱᱟᱣᱟᱭ ᱾ ᱚᱸᱰᱚ ᱯᱮᱸᱰᱮ ᱨᱮ ᱯᱮᱭᱟ ᱥᱟᱨᱡᱚᱢ ᱰᱟᱹᱨ ᱠᱚ ᱵᱤᱫᱟ ᱾ ᱛᱟᱞᱟ ᱨᱮᱱᱟᱜ ᱥᱟᱨᱡᱚᱢ ᱰᱟᱹᱨ ᱫᱚ ᱠᱟᱣᱰᱤ ᱟᱨ ᱥᱚᱞᱚᱝ ᱛᱟᱞᱟ ᱨᱮ ᱠᱚ ᱵᱤᱫᱟ ᱾ ᱯᱮ ᱴᱷᱮᱱ ᱠᱷᱤᱸᱰ ᱠᱟᱛᱮ ᱠᱚ ᱵᱚᱝᱜᱟᱭᱟ ᱾ ᱮᱛᱚᱢ ᱨᱮᱫᱚ ᱢᱟᱨᱟᱝ ᱵᱳᱨᱳ, ᱛᱟᱞᱟᱨᱮ ᱫᱚ ᱦᱟᱯᱲᱟᱢ ᱠᱚ, ᱠᱚᱧᱮ ᱩᱛᱟᱹᱨ ᱨᱮᱫᱚ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱧᱩᱛᱩᱢ ᱛᱮ ᱡᱚ ᱵᱤᱞᱤ ᱠᱚᱠᱚ ᱵᱚᱝᱜᱟᱭᱟ ᱾ ᱵᱚᱝᱜᱟ ᱦᱩᱭ ᱠᱟᱛᱮ ᱫᱚᱦᱲᱟ ᱡᱚᱵᱮ ᱠᱟᱛᱮ ᱥᱩᱱᱩᱢ ᱠᱚᱠᱚ ᱚᱡᱚᱜ ᱯᱷᱟᱨᱪᱟᱜᱼᱟ ᱾ ᱟᱫᱚ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱠᱟᱛᱮ ᱠᱚ ᱨᱟᱠᱟᱵᱼᱟ ᱾ ᱥᱟᱸᱜᱚᱪ ᱠᱚᱠᱚ ᱫᱟᱱᱟ ᱟᱨ ᱠᱚ ᱟᱹᱨᱩᱭᱟ ᱾ ᱫᱟᱱ ᱟᱨ ᱟᱹᱨᱩ ᱠᱟᱹᱢᱤ ᱪᱟᱵᱟ ᱞᱮᱱ ᱠᱷᱟᱱ ᱟᱨ ᱦᱚᱸ ᱚᱲᱟᱜ ᱢᱚᱦᱰᱟ ᱠᱚ ᱨᱩᱣᱟᱲ ᱦᱤᱡᱩᱜᱼᱟ ᱾ ᱢᱩᱠᱟᱹᱢ ᱠᱚ ᱛᱟᱦᱮᱱ ᱠᱷᱟᱱ ᱚᱱᱟ ᱠᱚᱨᱮᱠᱚ ᱫᱩᱲᱩᱵ ᱛᱟᱨᱟᱜᱼᱟ ᱾ ᱟᱹᱛᱩᱨᱮ ᱦᱮᱡ ᱠᱟᱛᱮ ᱠᱚ ᱠᱷᱟᱹᱨᱟᱹᱭ ᱠᱩᱸᱵᱟᱹᱭᱟ ᱾ ᱠᱷᱟᱹᱨᱟᱹᱭ ᱠᱩᱸᱵᱟᱹᱨᱮ ᱟᱹᱨᱩ ᱟᱹᱜᱩ ᱟᱠᱟᱱ ᱥᱤᱢ ᱢᱮᱨᱚᱢ ᱠᱚᱠᱚ ᱠᱩᱴᱟᱹᱢ ᱠᱚᱣᱟ ᱾ ᱚᱸᱰᱮ ᱜᱤᱰᱤ ᱛᱟᱨᱟ ᱫᱟᱠᱟ ᱵᱚᱝᱜᱟ ᱠᱟᱛᱮ ᱡᱚᱢ ᱥᱟᱭ ᱠᱟᱛᱮ ᱚᱲᱟᱜ ᱠᱚ ᱦᱤᱡᱩᱜᱼᱟ ᱾ ᱚᱲᱟᱜ ᱠᱚ ᱦᱮᱡ ᱞᱮᱱ ᱠᱷᱟᱱ ᱟᱹᱛᱩ ᱵᱩᱰᱤ ᱮᱨᱟ ᱠᱚ ᱡᱟᱸᱜᱟ ᱟᱹᱨᱩᱵ ᱠᱚ ᱦᱤᱡᱩᱜᱼᱟ ᱾ ᱚᱲᱟᱜ ᱠᱚ ᱵᱚᱞᱚ ᱞᱮᱱ ᱠᱷᱟᱱ ᱟᱹᱜᱩ ᱟᱠᱟᱫ ᱠᱷᱟᱹᱡᱟᱹᱲᱤ ᱛᱟᱵᱮᱱ ᱠᱚ ᱠᱚ ᱵᱚᱝᱜᱟᱭᱟ ᱾ ᱵᱚᱝᱜᱟ ᱥᱟᱨᱮᱡ ᱫᱚ ᱡᱟᱸᱜᱟ ᱟᱹᱨᱩᱵ ᱦᱮᱡ ᱠᱚᱜ ᱵᱩᱰᱤ ᱮᱨᱟ ᱦᱟᱲᱟᱢ ᱦᱚᱲ ᱥᱟᱶ ᱥᱟᱱᱟᱢ ᱠᱚᱜᱮ ᱠᱚ ᱦᱟᱹᱴᱤᱧ ᱵᱟᱲᱟ ᱟᱠᱚᱣᱟ ᱾ ᱞᱮᱜᱮᱡ ᱞᱮᱜᱮᱡ ᱜᱚᱰ ᱡᱚᱦᱟᱨ ᱠᱚ ᱟᱛᱟᱝ ᱡᱚᱝᱼᱟ ᱾ ᱛᱟᱭᱚᱢ ᱦᱟ [ᱢᱟᱦᱟᱸ/ᱫᱤᱱ] ᱨᱮ ᱡᱟᱹᱛᱨᱤ ᱫᱚ ᱯᱮᱲᱟ ᱦᱚᱯᱚᱱ ᱠᱚ ᱡᱤᱣᱤ ᱨᱟᱲᱮᱡ ᱠᱚ ᱤᱫᱤᱭᱮᱭᱟ ᱾

ᱡᱤᱞᱤᱧ ᱰᱟᱦᱟᱨ ᱥᱮᱨᱮᱧ

• ᱛᱟᱦᱟᱸ~ ᱨᱮᱛᱟ ᱱᱟ~ᱱᱟ~ ᱛᱟᱨᱱᱟ,

ᱛᱟᱦᱟᱸ ᱨᱮᱛᱟ ᱱᱟ~ᱱᱟ~ ᱡᱟ, ᱛᱟᱦᱟᱸ ᱨᱮᱛᱟ ᱱᱟ~ ᱱᱟ~ ᱦᱚ ᱾ ᱮᱛᱚᱢ ᱵᱩᱨᱩ ᱠᱚᱧᱮ ᱵᱩᱨᱩ, ᱥᱟᱢᱟᱝ ᱵᱩᱨᱩ ᱯᱟᱪᱮ ᱵᱩᱨᱩ, ᱛᱚᱠᱟ ᱵᱩᱨᱩ ᱱᱤᱧ ᱫᱩᱧ ᱥᱟᱢᱟᱝ ᱟ ᱾ ᱮᱛᱚᱢ ᱵᱩᱨᱩ ᱠᱚᱧᱮ ᱵᱩᱨᱩ, ᱥᱟᱢᱟᱝ ᱵᱩᱨᱩ ᱯᱟᱪᱮ ᱵᱩᱨᱩ, ᱢᱟᱨᱟᱝ ᱵᱳᱨᱳ ᱱᱟᱢ ᱫᱚ ᱥᱟᱢᱟᱝ ᱢᱮ ᱾

• ᱵᱟᱝ ᱫᱚ ᱵᱟᱝ ᱫᱚ ᱵᱟ~ᱵᱟ ᱫᱚ,

ᱵᱟᱝ ᱫᱚ ᱵᱟᱝ ᱫᱚ ᱡᱟᱹᱱᱩᱢ ᱫᱷᱩᱸᱫᱽ ᱨᱮ, ᱵᱟᱝ ᱫᱚ ᱵᱟᱝ ᱫᱚ ᱵᱟ~ᱵᱟ ᱫᱚ, ᱵᱟᱝ ᱫᱚ ᱵᱟᱝ ᱫᱚ ᱛᱤᱨᱤᱞ ᱫᱷᱩᱫᱽᱨᱮ, ᱵᱟᱝ ᱫᱚ ᱵᱟᱝ ᱫᱚ ᱵᱟ~ᱵᱟ ᱫᱚ, ᱵᱟᱝ ᱫᱚ ᱵᱟᱝ ᱫᱚ ᱥᱟᱨᱡᱚᱢ ᱵᱩᱴᱟᱹᱨᱮ, ᱵᱟᱵᱟ ᱫᱚᱞᱟᱝ ᱫᱚᱦᱟᱭ ᱦᱚᱴᱚ ᱠᱟᱭ ᱾

• ᱵᱟᱹ~ᱵᱩ~ ᱫᱩ~ᱠᱮᱢ ᱥᱮᱱ ᱞᱮᱱ,

ᱵᱟᱹ~ᱵᱩ~ ᱥᱩ~ᱠᱮᱢ ᱨᱩ~ᱣᱟᱹᱲ ᱮᱣ ᱾ ᱵᱟ~ᱵᱩ~ ᱮ~ᱛᱚᱢ ᱦᱚᱨ ᱛᱮ, ᱵᱟᱹ~ᱵᱩ~ ᱫᱮᱥᱠᱚ ᱨᱩᱣᱟᱹᱲ ᱠᱟᱱ, ᱵᱟ~ᱵᱩ~ ᱠᱚ~ᱧᱮ ᱦᱚᱨ ᱛᱮ, ᱵᱟᱹ~ᱵᱩ~ ᱵᱚᱝᱜᱟ ᱠᱚ ᱨᱩᱣᱟᱲ ᱠᱟᱱ ᱾ ᱵᱟᱹ~ᱵᱩ~ ᱛᱟ~ᱞᱟ ᱨᱟᱪᱟ ᱨᱮ, ᱵᱟᱹ~ᱵᱩ~ ᱫᱮᱥᱫᱚ ᱫᱩᱲᱩᱵ ᱠᱚᱢ, ᱵᱟᱹ~ᱵᱩ ᱛᱟ~ᱞᱟ ᱚᱲᱟᱜ ᱨᱮ, ᱵᱟᱹ~ᱵᱩ~ ᱵᱚᱝᱜᱟ ᱫᱚ ᱥᱮᱵᱟ ᱠᱚᱱ ᱾

• ᱟᱭᱳ ᱥᱟᱨᱟ ᱡᱩᱞᱩᱜ ᱠᱚᱲᱟᱢ ᱯᱚᱥᱟᱜᱚᱜᱼᱟ,

ᱵᱟᱵᱟ ᱥᱟᱨᱟ ᱡᱩᱞᱩᱜ ᱢᱮᱫ ᱫᱟᱜ ᱡᱚᱨᱚᱜ ᱾ ᱟᱭᱳ ᱥᱟᱨᱟ ᱡᱩᱞᱩᱜ ᱥᱮᱸᱜᱮᱞ ᱰᱤᱜᱤᱨ ᱰᱤᱜᱤᱨ, ᱵᱟᱵᱟ ᱥᱟᱨᱟ ᱡᱩᱞᱩᱜ ᱢᱮᱫ ᱫᱟᱜ ᱦᱤᱰᱤᱨ ᱦᱤᱰᱤᱨ ᱾

ᱛᱤᱱᱟᱜ ᱜᱟᱱ ᱠᱩᱠᱞᱤ ᱟᱨ ᱚᱱᱟ ᱨᱮᱱᱟᱜ ᱞᱟᱹᱱᱟᱹᱭ

• ᱠᱩᱠᱞᱤ-ᱥᱟᱠᱨᱟᱛ ᱨᱮᱱᱟᱜ ᱢᱮᱱᱮᱛ ᱫᱚ ᱪᱮᱫ ᱠᱟᱟ ?

ᱞᱟᱹᱱᱟᱺᱭ-ᱥᱟᱠᱨᱟᱛ ᱨᱮᱱᱟᱜ ᱢᱮᱱᱮᱛ ᱫᱚ, ᱥᱟᱥ + ᱨᱟᱛ = ᱥᱟᱠᱨᱟᱛ ᱾ ᱢᱮᱱᱫᱚ, ᱦᱟᱯᱲᱟᱢ ᱠᱚᱣᱟᱜ ᱛᱟᱨᱟᱥ ᱵᱟᱝ ᱚᱨᱥᱚᱝ ᱾

• ᱠᱩᱠᱞᱤ-ᱥᱟᱠᱨᱟᱛ ᱫᱚ ᱚᱠᱚᱭᱟᱜ ?

ᱞᱟᱹᱱᱟᱺᱭ-ᱥᱟᱠᱨᱟᱛ ᱫᱚ ᱠᱷᱮᱨᱣᱟᱲ ᱜᱟᱫᱮᱞ ᱦᱚᱲ ᱠᱚᱣᱟᱜ ᱠᱟᱱᱟ ᱾ ᱢᱮᱱᱫᱚ ᱟᱹᱫᱤᱵᱟᱹᱥᱤ ᱦᱚᱲ ᱠᱚᱣᱟᱜ ᱠᱟᱱᱟ ᱾ ᱡᱟᱦᱟᱸᱭ ᱦᱚᱲ ᱠᱚ ᱦᱟᱯᱲᱟᱢ ᱠᱚ ᱧᱩᱢ ᱨᱩᱣᱟᱹᱲ ᱠᱚ ᱨᱮᱱᱟᱜ ᱥᱮᱨᱣᱟ ᱢᱮᱱᱟᱜ ᱛᱟᱠᱚᱣᱟ ᱥᱟᱠᱨᱟᱛ ᱯᱟᱨᱟᱵ ᱫᱚ ᱩᱱᱠᱩᱣᱟᱜ ᱠᱟᱱᱟ ᱾ ᱤᱠᱷᱟᱹᱱ ᱥᱟᱶ ᱛᱮᱫᱚ ᱡᱚᱛᱚ ᱜᱮᱠᱚ ᱢᱟᱱᱟᱣᱟ ᱾

• ᱠᱩᱠᱞᱤ-ᱪᱟᱶᱰᱤ ᱨᱮ ᱪᱮᱫᱟᱜ ᱦᱟᱹᱠᱩ,ᱡᱤᱞ ᱢᱤᱫ ᱛᱮᱠᱚ ᱡᱚᱢᱟ ?
• ᱞᱟᱹᱱᱟᱹᱭ-ᱥᱟᱠᱨᱟᱛ ᱫᱚ ᱜᱚᱡ ᱜᱩᱨ ᱦᱚᱲᱟᱜ ᱠᱚ ᱥᱮᱵᱟ ᱠᱚ ᱨᱮᱱᱟᱜ ᱯᱟᱨᱟᱵ ᱠᱟᱱᱟ ᱾ ᱚᱱᱟᱛᱮ ᱜᱚᱡ ᱜᱩᱨ ᱡᱚᱠᱷᱟᱜ ᱵᱟᱜ ᱨᱚᱶᱟ ᱫᱟᱠᱟ ᱡᱚᱢ ᱞᱮᱠᱟ ᱦᱟᱹᱠᱩ ᱠᱟᱹᱴᱠᱚᱢ ᱡᱤᱞ ᱢᱤᱫ ᱛᱮ ᱠᱚ ᱡᱚᱢᱟ ᱾ ᱱᱚᱝᱠᱟ ᱡᱚᱢ ᱞᱮᱠᱷᱟᱱ ᱦᱟᱯᱲᱟᱢ ᱠᱚ ᱫᱚᱦᱲᱟ ᱠᱚ ᱡᱟᱱᱟᱢ ᱨᱩᱣᱟᱲᱚᱜᱼᱟ ᱾
• ᱠᱩᱠᱞᱤ-ᱥᱟᱠᱨᱟᱛ ᱫᱚ ᱛᱤᱥ ?

ᱞᱟᱹᱱᱟᱺᱭ-ᱥᱟᱠᱨᱟᱛ ᱫᱚ ᱯᱩᱥ ᱵᱚᱝᱜᱟ ᱠᱩᱱᱟᱹᱢᱤ ᱠᱮᱪᱟᱜ ᱢᱚᱬᱮ ᱢᱟᱦᱟ ᱛᱟᱭᱚᱢ ᱾

• ᱠᱩᱠᱞᱤ-ᱪᱮᱫᱟᱜ ᱵᱩᱰᱷᱤ ᱠᱩᱸᱵᱟᱹᱠᱚ ᱟᱛᱟᱨᱟ ?
• ᱞᱟᱹᱱᱟᱹᱭ-ᱥᱟᱠᱨᱟᱛ ᱫᱚ ᱜᱚᱡ ᱜᱩᱨ ᱟᱠᱟᱱ ᱦᱟᱯᱲᱟᱢ ᱠᱚ ᱞᱟᱹᱜᱤᱫ ᱯᱟᱨᱟᱵ ᱠᱟᱱᱟ ᱾ ᱚᱱᱟᱛᱮ ᱦᱟᱯᱲᱟᱢ ᱠᱚ ᱚᱲᱟᱜ ᱛᱟᱞᱟ ᱛᱮ ᱟᱹᱜᱩᱠᱚ ᱞᱟᱹᱜᱤᱫ ᱩᱱᱠᱩᱣᱟᱜ ᱩᱢᱩᱞ ᱟᱫᱮᱨ ᱦᱩᱭᱩᱜᱼᱟ ᱾ ᱚᱱᱟᱛᱮ ᱵᱩᱰᱷᱤ ᱠᱩᱸᱵᱟᱹ ᱫᱚ ᱠᱚ ᱟᱛᱟᱨᱟ ᱾
• ᱠᱩᱠᱞᱤ-ᱪᱮᱫᱟᱜ ᱫᱩᱣᱟᱹᱨ ᱨᱮ ᱥᱤᱢᱠᱚ ᱛᱷᱟᱯᱟ ᱠᱚᱣᱟ ?
• ᱞᱟᱹᱱᱟᱹᱭ-ᱥᱤᱢ ᱛᱷᱟᱯᱟ ᱫᱚ ᱦᱟᱯᱲᱟᱢ ᱠᱚ ᱵᱷᱤᱛᱟᱹᱨ ᱟᱫᱮᱨ ᱠᱟᱛᱮ ᱥᱤᱢ ᱠᱩᱴᱟᱢ ᱟᱠᱚ ᱞᱮᱠᱟᱱ ᱠᱟᱹᱢᱤ ᱠᱟᱱᱟ ᱾ ᱥᱚᱶᱟ ᱫᱚ ᱜᱚᱡ ᱚᱲᱟᱜ ᱨᱮ ᱞᱮᱠᱟᱱᱟᱜ ᱥᱮᱨᱣᱟ ᱠᱟᱱᱟ ᱾
• ᱠᱩᱠᱞᱤ-ᱡᱤᱞᱤᱧ ᱰᱟᱦᱟᱨ ᱨᱮᱱᱟᱜ ᱢᱮᱱᱮᱛ ᱫᱚ ᱪᱮᱫ ?
• ᱞᱟᱹᱱᱟᱺᱭ-ᱡᱤᱞᱤᱧ ᱰᱟᱦᱟᱨ ᱨᱮᱱᱟᱜ ᱢᱮᱱᱮᱛ ᱫᱚ "ᱡᱤᱣᱤ ᱞᱤᱧᱤᱱ ᱰᱟᱦᱟᱨ" ᱠᱟᱱᱟ ᱾
• ᱠᱩᱠᱞᱤ-ᱪᱮᱫᱟᱜ ᱜᱟᱹᱬᱤ ᱠᱚ ᱟᱥᱮᱱ ᱠᱚᱣᱟ ?
• ᱞᱟᱹᱱᱟᱹᱭ-ᱜᱟᱹᱬᱤ ᱫᱚ ᱜᱟᱬᱟ ᱨᱚᱲ ᱠᱷᱚᱱᱜᱮ ᱯᱟᱞᱮ ᱦᱮᱡ ᱟᱠᱟᱱᱟ ᱾ ᱢᱟᱹᱱᱢᱤᱭᱟᱜ ᱢᱟᱨᱮ ᱚᱲᱚᱝ ᱦᱚᱸ ᱠᱟᱱᱟ ᱾ ᱢᱟᱨᱮ ᱚᱲᱚᱝ ᱢᱮᱱᱮᱛ ᱢᱟᱨᱮ ᱦᱟᱯᱲᱟᱢ ᱠᱚᱣᱟᱜ ᱚᱲᱚᱝ ᱢᱮᱱᱛᱮ ᱵᱚ ᱩᱭᱦᱟᱹᱨᱮᱜᱼᱟ ᱾ ᱟᱫᱚ ᱚᱱᱟᱛᱮ ᱟᱯᱟᱱ ᱟᱹᱯᱤᱱ ᱯᱟᱹᱨᱤᱥ ᱨᱤᱱ ᱵᱚᱝᱜᱟ ᱛᱟᱞᱟ ᱟᱠᱟᱱ ᱦᱟᱯᱲᱟᱢ ᱠᱚ ᱟᱹᱛᱩ ᱫᱟᱬᱟᱱ ᱵᱚ ᱤᱫᱤ ᱠᱚᱣᱟ ᱾ ᱟᱠᱚᱦᱚᱸ ᱟᱠᱚᱨᱤᱱ ᱜᱟᱛᱮ ᱯᱮᱲᱟ ᱥᱟᱶ ᱧᱮᱯᱮᱞ ᱨᱚᱯᱚᱲ ᱠᱟᱛᱮ ᱜᱟᱛᱮ ᱯᱮᱲᱟ ᱚᱲᱟᱜ ᱠᱚᱨᱮ ᱠᱷᱚᱱ ᱯᱤᱴᱷᱟᱹ ᱞᱮᱴᱚ ᱠᱷᱟᱹᱡᱟᱹᱲᱤ ᱛᱟᱵᱮᱱ ᱠᱚ ᱡᱚᱢ ᱛᱟᱨᱟ ᱡᱚᱝ ᱟ ᱟᱨ ᱛᱷᱩᱢ ᱠᱚ ᱪᱟᱞ ᱦᱚᱴᱚ ᱠᱟᱜᱼᱟ ᱾ ᱚᱱᱟᱛᱮ ᱜᱟᱹᱬᱤ ᱟᱥᱮᱱ ᱫᱚ ᱾
• ᱠᱩᱠᱞᱤ-ᱡᱤᱞᱤᱧ ᱰᱟᱦᱟᱨ ᱫᱚ ᱛᱤᱥ ᱠᱚ ᱪᱟᱞᱟᱜᱼᱟ ?
• ᱞᱟᱹᱱᱟᱹᱭ ᱡᱤᱞᱤᱧ ᱰᱟᱦᱟᱨ ᱫᱚ ᱥᱮᱨᱢᱟ ᱨᱮᱱᱟᱜ ᱢᱤᱫ ᱚᱠᱛᱚ ᱜᱮᱠᱚ ᱪᱟᱞᱟᱜᱼᱟ ᱾ ᱚᱱᱟᱫᱚ ᱥᱤᱥᱤᱨ ᱧᱩᱨᱩᱜ ᱚᱠᱛᱚ ᱾ ᱟᱜᱷᱟᱬ ᱟᱨ ᱯᱩᱥ ᱵᱚᱝᱜᱟ ᱾ ᱟᱜᱷᱟᱬ ᱫᱚ ᱦᱩᱲᱩ ᱠᱚ ᱥᱟᱢᱴᱟᱣᱜ ᱠᱷᱟᱹᱛᱤᱨ, ᱯᱩᱥ ᱵᱚᱝᱜᱟ ᱠᱩᱱᱟᱹᱢᱤ ᱠᱮᱪᱟᱜ ᱱᱟᱯᱟᱭᱟ ᱾ ᱚᱱᱟᱫᱚ ᱞᱤᱧᱡᱤᱱ ᱫᱟᱜ ᱨᱮ ᱡᱟᱝ ᱵᱟᱦᱟ ᱫᱚ ᱠᱚ ᱵᱚᱦᱮᱞᱟ ᱾ ᱥᱤᱥᱤᱨ ᱞᱮᱠᱟᱛᱮ ᱥᱮᱨᱢᱟ ᱛᱮ ᱫᱟᱜ ᱦᱚᱸ ᱞᱤᱧᱡᱤᱱ ᱜᱮᱭᱟ ᱾ ᱯᱩᱥ ᱵᱚᱝᱜᱟ ᱫᱚ ᱦᱟᱯᱲᱟᱢ ᱠᱚ ᱞᱟᱹᱜᱤᱫ ᱪᱟᱸᱫᱚ ᱠᱟᱱᱟ ᱾ ᱚᱱᱟᱛᱮ ᱦᱟᱯᱲᱟᱢ ᱠᱚᱣᱟᱜ ᱠᱟᱹᱢᱤᱫᱚ ᱚᱱᱟ ᱪᱟᱸᱫᱚ ᱨᱮᱜᱮ ᱱᱟᱯᱟᱭᱟ ᱾