ᱵᱟᱦᱟ ᱵᱚᱝᱜᱟ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search

ᱵᱟᱦᱟ ᱵᱚᱝᱜᱟ ᱵᱟᱝ ᱯᱷᱟᱹᱜᱩᱱ ᱵᱚᱝᱜᱟ ᱫᱚ ᱥᱮᱨᱢᱟ ᱨᱮᱱᱟᱜ ᱫᱚᱥᱟᱨ ᱪᱟᱸᱫᱚ ᱠᱟᱱᱟ ᱾ ᱱᱚᱶᱟ ᱪᱟᱸᱫᱚ ᱫᱚ ᱟᱹᱰᱤ ᱥᱟᱹᱜᱩᱱ ᱪᱟᱸᱫᱚ ᱠᱟᱱᱟ ᱾ ᱡᱚᱛᱚ ᱞᱮᱠᱟᱱ ᱥᱟᱹᱜᱩᱱ ᱠᱟᱹᱢᱤ ᱱᱚᱶᱟ ᱪᱟᱸᱫᱚ ᱨᱮᱫᱚ ᱠᱚ ᱠᱟᱹᱢᱤᱭᱟ ᱾

ᱠᱟᱹᱢᱤᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱶᱟ ᱪᱟᱸᱫᱚ ᱨᱮᱫᱚ ᱵᱟᱦᱟ ᱪᱤᱭᱟᱹ ᱥᱮ ᱵᱟᱹᱦᱩ ᱧᱮᱞ, ᱵᱟᱯᱞᱟ, ᱯᱷᱩᱞ, ᱚᱲᱟᱜ ᱡᱚᱠᱷᱟ, ᱥᱮᱸᱫᱽᱨᱟ ᱮᱢᱟᱱ ᱾ ᱥᱤᱨᱡᱚᱱᱤᱭᱟᱺ ᱫᱷᱟᱹᱨᱛᱤ ᱥᱟᱡᱟᱣᱟᱭ ᱾ ᱦᱟᱹᱨᱭᱟᱹᱲ ᱛᱟᱥᱟᱫ ᱛᱮ ᱚᱛ ᱟᱹᱰᱤ ᱪᱚᱨᱚᱠ ᱧᱮᱞᱚᱜᱼᱟ ᱾ ᱫᱟᱨᱮ ᱱᱟᱹᱬᱤ ᱠᱚ ᱥᱟᱜᱮᱱ ᱦᱟᱹᱨᱭᱟᱹᱲ ᱥᱟᱠᱟᱢ ᱱᱟᱱᱟ ᱦᱩᱱᱟᱹᱨ ᱨᱚᱝ ᱨᱮᱱᱟᱜ ᱵᱟᱦᱟ ᱟᱨ ᱡᱚ ᱛᱮ ᱥᱟᱡᱟᱣ ᱠᱚᱜᱼᱟ ᱾ ᱥᱤᱛᱩᱝ ᱛᱟᱨᱟᱥ ᱠᱚᱨᱮ ᱡᱩᱡᱩᱞᱟᱝ ᱜᱮ ᱧᱮᱞᱚᱜᱼᱟ ᱾ ᱱᱚᱝᱠᱟᱱ ᱧᱮᱢᱮᱞ ᱨᱮ ᱵᱚᱞᱚ ᱦᱮᱡ ᱠᱚᱜᱼᱟ ᱵᱟᱦᱟ ᱵᱚᱝᱜᱟ ᱾

ᱵᱟᱦᱟ ᱵᱚᱝᱜᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱷᱟᱹᱜᱩᱱ ᱵᱚᱝᱜᱟ ᱢᱩᱞᱩᱜ ᱢᱚᱬᱮ ᱢᱟᱦᱟ ᱨᱮᱫᱚ ᱵᱟᱦᱟ ᱵᱚ ᱵᱚᱝᱜᱟᱭᱟ ᱾ ᱢᱩᱞᱩᱜ ᱯᱩᱱ ᱢᱟᱦᱟ ᱦᱤᱞᱚᱜ ᱫᱚ ᱠᱩᱲᱤ ᱠᱚ ᱥᱮᱛᱟᱜ ᱜᱮᱡ ᱜᱩᱨᱤᱡ ᱛᱤᱠᱤ ᱥᱚᱵᱚᱫ ᱩᱢ ᱱᱟᱲᱠᱟ ᱠᱟᱹᱢᱤ ᱾ ᱠᱚᱲᱟ ᱠᱚᱫᱚ ᱡᱟᱦᱮᱨ ᱜᱟᱲ ᱯᱷᱟᱨᱪᱟ ᱯᱷᱟᱹᱨᱪᱤ ᱟᱨ ᱪᱷᱟᱢᱰᱟ ᱛᱚᱞ, ᱡᱟᱦᱮᱨ ᱥᱟᱹᱲᱤᱢ ᱫᱟᱞᱚᱵ ᱾ ᱟᱹᱭᱩᱵ ᱵᱮᱲᱟ ᱫᱚ ᱠᱩᱲᱤ ᱠᱚᱲᱟ ᱥᱟᱶ ᱥᱟᱶ ᱱᱟᱭᱠᱮ ᱚᱲᱟᱜ ᱨᱮ ᱠᱚ ᱡᱟᱹᱛᱩᱨᱟᱠᱚ ᱾ ᱡᱟᱹᱛᱩᱨ ᱨᱮᱫᱚ ᱠᱚᱲᱟ ᱠᱚ ᱡᱚᱛᱚ ᱠᱚ ᱥᱮᱨᱮᱧᱟ ᱾ ᱠᱚᱲᱟ ᱠᱚᱫᱚ ᱢᱚᱬᱮᱠᱚ ᱞᱮᱠᱟᱛᱮ ᱟᱨ ᱠᱩᱲᱤ ᱠᱚᱫᱚ ᱛᱩᱨᱩᱭ ᱠᱚ ᱞᱮᱠᱟ ᱛᱮᱠᱚ ᱥᱮᱨᱮᱧᱟ ᱾ ᱵᱚᱝᱜᱟ ᱠᱚ ᱨᱩᱢ ᱠᱟᱛᱮ ᱠᱚ ᱦᱤᱡᱩᱜᱼᱟ ᱾ ᱵᱚᱝᱜᱟ ᱠᱚ ᱦᱮᱡ ᱞᱮᱱ ᱠᱷᱟᱱ, ᱟᱹᱛᱩ ᱡᱟᱦᱮᱨ ᱨᱮᱱᱟᱜ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱠᱚ ᱠᱩᱞᱤ ᱠᱚᱣᱟ ᱾ ᱚᱱᱟ ᱛᱟᱭᱚᱢ ᱫᱚ ᱢᱤᱫ ᱧᱤᱫᱟᱹ ᱡᱟᱹᱛᱩᱨ ᱠᱚ ᱮᱱᱮᱡ ᱟᱸᱜᱟᱭᱟ ᱾ ᱫᱚᱥᱟᱨ ᱦᱤᱞᱚᱜ ᱟᱬᱜᱟᱛ ᱨᱮ ᱥᱟᱱᱟᱢ ᱛᱩᱯᱩ ᱯᱷᱟᱨᱪᱟ ᱠᱟᱛᱮ ᱵᱚᱝᱜᱟᱜ ᱠᱚ ᱥᱚᱡᱚᱜᱼᱟ ᱾ ᱱᱟᱭᱠᱮ ᱨᱟᱪᱟ ᱨᱮ ᱫᱚᱦᱲᱟ ᱵᱚᱝᱜᱟ ᱠᱚ ᱦᱚᱦᱚ ᱟᱠᱚᱣᱟ ᱾ ᱥᱟᱯᱟᱵ ᱠᱚ ᱪᱟᱞ ᱟᱠᱚᱣᱟ ᱾ ᱥᱟᱯᱟᱵ ᱠᱚ ᱧᱟᱢ ᱪᱟᱵᱟ ᱞᱮᱠᱷᱟᱱ, ᱵᱚᱝᱜᱟ ᱠᱚ ᱟᱯᱟᱱ ᱟᱹᱯᱤᱱ ᱥᱟᱯᱟᱵ ᱠᱚ ᱧᱮᱞᱟ ᱱᱟᱯᱟᱭᱟᱥᱮ ᱵᱟᱝ ᱟ ᱾ ᱚᱱᱟ ᱛᱟᱭᱚᱢ ᱫᱚ ᱡᱟᱦᱮᱨ ᱜᱟᱲ ᱟᱨ ᱟᱹᱛᱩ ᱴᱚᱞᱟ ᱨᱮᱱᱟᱜ ᱵᱩᱜᱤ ᱵᱟᱹᱲᱤᱡ ᱦᱚᱸ ᱟᱹᱛᱩ ᱦᱚᱲ ᱠᱚᱠᱚ ᱠᱩᱞᱤ ᱡᱚᱝ ᱟ ᱾ ᱱᱟᱯᱟᱭ ᱠᱷᱟᱱ ᱱᱟᱯᱟᱭ ᱜᱮ ᱵᱟᱹᱲᱤᱡ ᱠᱷᱟᱱ, ᱵᱚᱝᱜᱟ ᱠᱚᱣᱟᱣᱜ ᱠᱟᱛᱷᱟ ᱞᱮᱠᱟᱛᱮ ᱠᱚ ᱥᱚᱡᱷᱮ ᱠᱟᱜᱼᱟ ᱾ ᱢᱤᱫ ᱧᱤᱫᱟᱹ ᱠᱚ ᱮᱱᱮᱡ ᱟᱸᱜᱟᱭᱟ ᱾ ᱫᱚᱥᱟᱨ ᱦᱤᱞᱚᱜ ᱫᱚ ᱱᱟᱭᱠᱮ ᱠᱚ ᱫᱟᱨᱟᱢ ᱫᱟᱜ ᱤᱫᱤ ᱭᱮᱭᱟ ᱡᱟᱦᱮᱨ ᱛᱮ ᱾ ᱡᱟᱦᱮᱨ ᱨᱮ ᱥᱮᱴᱮᱨ ᱠᱟᱛᱮ ᱢᱚᱬᱮ ᱛᱩᱨᱩᱭ ᱟᱠᱷᱲᱟ ᱮᱱᱮᱡ ᱵᱟᱲᱟ ᱠᱟᱛᱮ ᱠᱚ ᱵᱚᱝᱜᱟᱭᱟ ᱾ ᱵᱚᱝᱜᱟ ᱪᱟᱵᱟ ᱠᱟᱛᱮ ᱦᱚᱸ ᱠᱚ ᱮᱱᱮᱡᱼᱟ ᱾ ᱨᱚ~ ᱜᱮᱫ ᱪᱚᱸᱫᱟ ᱵᱟᱥᱟᱝ ᱠᱚ ᱮᱭᱦᱚᱵ ᱞᱮᱠᱷᱟᱱ, ᱥᱮᱛᱟᱜ ᱵᱮᱲᱟ ᱞᱟᱹᱜᱤᱫ ᱫᱚ ᱮᱱᱮᱡ ᱫᱚ ᱠᱚ ᱢᱩᱪᱟᱹᱫᱟ ᱾ ᱜᱤᱰᱤ ᱛᱟᱨᱟ ᱵᱚᱝᱜᱟ ᱵᱟᱲᱟ ᱠᱟᱛᱮ ᱛᱟᱨᱟᱥᱤᱧ ᱫᱚᱦᱲᱟ ᱟᱨᱦᱚᱸ ᱠᱚ ᱮᱱᱮᱡᱼᱟ ᱾ ᱮᱱᱮᱡ ᱯᱚᱴᱟᱣ ᱠᱟᱛᱮ ᱱᱟᱭᱠᱮ ᱚᱲᱟᱜ ᱛᱮᱠᱚ ᱫᱟᱨᱟᱢ ᱫᱟᱜ ᱤᱫᱤ ᱭᱮᱭᱟ ᱾

ᱟᱜ ᱨᱟᱲᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱫᱚᱥᱟᱨ ᱦᱤᱞᱚᱜ ᱫᱚ ᱟᱜ ᱨᱟᱲᱟ ᱠᱚ ᱢᱮᱛᱟᱜᱼᱟ ᱾ ᱤᱱᱟᱹᱦᱤᱞᱚᱜ ᱫᱚ ᱠᱚᱲᱟ ᱠᱚ ᱠᱚᱫᱚ ᱥᱮᱸᱫᱽᱨᱟ ᱠᱚ ᱪᱟᱞᱟᱜᱼᱟ ᱾ ᱥᱮᱛᱟᱜ ᱵᱮᱲᱟ ᱱᱟᱭᱠᱮ ᱚᱲᱟᱜ ᱠᱚ ᱥᱮᱱ ᱡᱟᱣᱨᱟᱜᱼᱟ ᱾ ᱚᱸᱰᱮ ᱠᱷᱚᱱ ᱱᱟᱭᱠᱮᱭᱟ ᱛᱩᱢ ᱟᱛᱟᱝ ᱠᱟᱛᱮ ᱵᱤᱨ ᱵᱟᱝ ᱵᱩᱨᱩ ᱥᱮᱸᱫᱽᱨᱟ ᱠᱚ ᱪᱟᱞᱟᱜᱼᱟ ᱾ ᱛᱤᱠᱤᱱ ᱥᱮᱸᱫᱽᱨᱟ ᱠᱷᱚᱱ ᱨᱩᱣᱟᱲ ᱠᱟᱛᱮ ᱥᱮᱸᱫᱽᱟ ᱡᱤᱞ ᱠᱚ ᱥᱚᱲᱮᱭᱟ ᱾ ᱵᱚᱦᱚᱜ ᱡᱤᱞ ᱟᱨ ᱜᱩᱸᱰ ᱡᱤᱞ ᱡᱩᱫᱟᱹ ᱡᱩᱫᱟᱹ ᱠᱚ ᱥᱚᱲᱮᱭᱟ ᱾ ᱵᱚᱦᱚᱜ ᱡᱤᱞ ᱥᱚᱲᱮ ᱫᱚ ᱱᱟᱭᱠᱮ ᱜᱤᱰᱤᱛᱟᱨᱟᱭ ᱵᱚᱝᱜᱟᱭᱟ ᱾ ᱤᱱᱟᱹᱛᱟᱭᱚᱢ ᱮᱱᱟᱝ ᱡᱤᱞ ᱟᱨ ᱵᱚᱦᱚᱜ ᱥᱚᱲᱮ ᱡᱚᱢ ᱫᱚ ᱜᱟᱱᱚᱜᱼᱟ ᱾

ᱯᱩᱭᱞᱩ ᱟᱜ ᱥᱟᱵ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱜ ᱨᱟᱲᱟ ᱦᱤᱞᱚᱜ ᱜᱮ ᱯᱩᱭᱞᱩ ᱛᱮ ᱠᱚᱲᱟ ᱜᱤᱫᱽᱨᱟ ᱟᱜ ᱠᱚ ᱥᱟᱵᱟ ᱾ ᱵᱟᱦᱟ ᱵᱟᱥᱠᱮ ᱥᱮᱸᱫᱽᱨᱟ ᱠᱷᱚᱱ ᱠᱚᱲᱟ ᱠᱚ ᱨᱩᱣᱟᱲ ᱠᱟᱛᱮ ᱱᱟᱭᱠᱮ ᱚᱲᱟᱜ ᱛᱮ ᱥᱮᱸᱫᱽᱨᱟ ᱟᱠᱟᱫ ᱠᱚ ᱡᱤᱞ ᱥᱟᱹᱞ ᱠᱚ ᱤᱫᱤ ᱠᱚᱣᱟ ᱾ ᱩᱱᱠᱩᱣᱟᱜ ᱵᱚᱦᱚ ᱫᱚ ᱱᱟᱭᱠᱮ ᱠᱚ ᱮᱢᱟᱭᱟᱸ ᱾ ᱱᱟᱭᱠᱮ ᱫᱚ ᱚᱱᱟ ᱵᱚᱦᱚᱜ ᱠᱚᱭ ᱥᱚᱲᱮᱭᱟ ᱟᱨᱮ ᱵᱚᱝᱜᱟ ᱭᱟ ᱨᱟᱪᱟ ᱨᱮ ᱾ ᱡᱟᱦᱟᱸ ᱨᱮ ᱯᱟᱹᱴᱭᱟᱹ ᱟᱴᱮᱫ ᱟᱨ ᱫᱩᱲᱩᱵ ᱠᱟᱛᱮ ᱵᱚᱝᱜᱟ ᱠᱚ ᱦᱚᱦᱚ ᱟᱠᱚᱣᱟ ᱚᱸᱰᱮ ᱾ ᱥᱚᱲᱮ ᱵᱚᱝᱜᱟᱭ ᱢᱟᱬᱟᱝ ᱨᱮ ᱟᱭᱳ ᱵᱟᱵᱟ ᱠᱚᱭ ᱠᱩᱞᱤ ᱠᱚᱣᱟ , ᱚᱠᱚᱭ ᱨᱤᱱ ᱠᱚᱲᱟ ᱜᱤᱫᱽᱨᱟᱹ ᱠᱚ ᱛᱚᱣᱟ ᱰᱟᱴᱟ ᱧᱩᱨ ᱟᱠᱟᱱ ᱛᱟᱠᱚᱣᱟ ᱾ ᱩᱱᱠᱩ ᱫᱤᱫᱽᱨᱟᱹ ᱥᱟᱢᱟᱝ ᱨᱮᱠᱚ ᱫᱩᱲᱩᱵ ᱠᱚᱣᱟ ᱾ ᱟᱫᱚ ᱵᱚᱦᱚᱜ ᱥᱚᱲᱮ ᱠᱚ ᱵᱚᱝᱜᱟᱭᱟ ᱾ ᱚᱱᱟ ᱵᱚᱝᱜᱟ ᱥᱟᱨᱮᱡ ᱫᱚ ᱱᱟᱭᱠᱮ ᱥᱮᱸᱫᱽᱨᱟ ᱠᱚᱲᱟ ᱟᱨ ᱤᱱᱟᱹ ᱥᱮᱨᱢᱟ ᱡᱟᱦᱟᱸᱭ ᱠᱚᱲᱟ ᱜᱤᱫᱽᱨᱟᱹ ᱠᱚᱣᱟᱜ ᱛᱚᱣᱟ ᱰᱟᱴᱟ ᱧᱩᱨ ᱟᱠᱟᱱ ᱛᱟᱠᱚᱣᱟ , ᱩᱱᱠᱩ ᱜᱤᱫᱽᱨᱟᱹ ᱠᱚ ᱟᱭᱳ ᱵᱟᱵᱟ ᱠᱩᱞᱤ ᱠᱟᱛᱮ ᱵᱚᱦᱚᱜ ᱥᱚᱲᱮ ᱠᱚ ᱮᱢᱟ ᱠᱚᱣᱟᱭ ᱾ ᱩᱱᱠᱩ ᱜᱤᱫᱽᱨᱟᱹ ᱤᱱᱟᱹ ᱦᱤᱞᱚᱜ ᱠᱷᱚᱱ ᱥᱮᱸᱫᱽᱨᱟ ᱠᱚ ᱜᱟᱱᱚᱜ-ᱟ ᱾

ᱵᱟᱦᱟ ᱟᱛᱟᱝ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱟᱦᱟ ᱵᱚᱝᱜᱟ ᱨᱮᱫᱚ ᱱᱟᱭᱠᱮ ᱴᱷᱮᱱ ᱠᱷᱚᱱ ᱵᱟᱦᱟ ᱠᱚ ᱟᱛᱟᱝ ᱛᱮ ᱚᱲᱟᱜ ᱠᱚ ᱟᱹᱜᱩᱭᱟ ᱾ ᱚᱱᱟ ᱫᱚ ᱥᱟᱛᱮ ᱨᱮ ᱥᱟᱹᱲᱤᱢ ᱨᱮ ᱠᱚ ᱨᱮᱵᱮᱫᱟ ᱾ ᱱᱟᱶᱟ ᱛᱮ ᱫᱟᱜ ᱥᱩᱯᱟᱹᱲᱤ ᱟᱠᱟᱱ ᱠᱩᱲᱤ ᱜᱤᱫᱽᱨᱟᱹ ᱦᱚᱸ ᱮᱱ ᱥᱮᱨᱢᱟ ᱜᱮ ᱱᱟᱭᱠᱮ ᱴᱷᱮᱱ ᱠᱷᱚᱱ ᱵᱟᱦᱟ ᱠᱚ ᱟᱛᱟᱝ ᱟᱹᱜᱩᱭᱟ ᱟᱨ ᱥᱩᱫ ᱠᱚᱨᱮ ᱦᱚᱸᱠᱚ ᱨᱮᱵᱮ ᱫᱟ ᱾ ᱜᱟᱛᱮ ᱠᱚᱲᱟ ᱠᱩᱲᱤ ᱠᱚᱫᱚ ᱥᱮᱸᱫᱽᱨᱟ ᱨᱮᱱᱟᱜ ᱡᱷᱟᱨᱱᱟ ᱟᱠᱟᱲ ᱵᱟᱦᱟ ᱮᱱᱮᱡ ᱟᱠᱷᱲᱟ ᱨᱮᱠᱚ ᱮᱯᱮᱢᱟ ᱜᱚᱨᱚᱡᱽ ᱵᱟᱦᱟ ᱾