ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ
| ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ | |
|---|---|
| ᱨᱮᱫ:Gamosta Prasad Soren.jpg ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ | |
| ᱡᱟᱱᱟᱢ | ᱑᱙᱔᱓ ᱩᱫᱟᱞᱵᱳᱱᱤ ᱟᱹᱛᱩ, ᱯᱩᱨᱩᱞᱤᱭᱟᱹ ᱦᱚᱱᱚᱛ, ᱯᱚᱪᱷᱤᱢ ᱵᱟᱝᱞᱟ, ᱥᱤᱧᱚᱛ |
| ᱠᱟᱹᱢᱤ | ᱚᱱᱚᱞᱤᱭᱟᱹ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱟᱛᱟᱢ | ᱥᱟᱱᱛᱟᱲᱤ ᱚᱱᱚᱞᱤᱭᱟᱹ |
ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ (ᱡᱟᱱᱟᱢ : ᱒ ᱡᱩᱱ ᱑᱙᱔᱓ – ᱘ ᱟᱯᱨᱤᱞ ᱒᱐᱒᱓) ᱫᱚ ᱢᱤᱫ ᱥᱟᱱᱛᱟᱲᱤ ᱢᱟᱪᱮᱛ ᱟᱨ ᱚᱱᱚᱞᱤᱭᱟᱹ ᱠᱟᱱᱟᱭ ᱾[᱑][᱒] ᱩᱱᱤᱭᱟᱜ ᱧᱩᱛᱩᱢᱟᱱ ᱚᱱᱚᱞ ᱠᱚᱫᱚ ᱦᱩᱭᱩᱜ ᱠᱟᱱᱟ ᱟᱠᱷᱲᱟ ᱴᱷᱟᱶ (᱑᱙᱖᱕), ᱠᱟᱹᱦᱤᱥ ᱟᱲᱟᱝ, ᱱᱚᱝᱠᱟᱱ ᱜᱮᱭᱟᱵᱚᱱ ᱦᱚᱲ, ᱱᱚᱝᱠᱟᱱ ᱜᱮᱛᱟᱵᱚᱱ ᱥᱚᱢᱟᱡᱽ ᱮᱢᱟᱱ ᱾
ᱮᱛᱚᱦᱚᱵ ᱡᱤᱭᱚᱱ ᱟᱨ ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ ᱫᱚ ᱑᱙᱔᱓ ᱥᱮᱨᱢᱟ ᱨᱮ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱨᱮᱭᱟᱜ ᱩᱫᱟᱞᱵᱳᱱᱤ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ ᱾[᱒] ᱟᱡ ᱵᱟᱵᱟ ᱫᱚ ᱜᱳᱵᱤᱱᱫᱚ ᱥᱚᱨᱮᱱ ᱟᱨ ᱟᱭᱚ ᱫᱚ ᱢᱳᱱᱩᱵᱟᱞᱟ ᱥᱚᱨᱮᱱ ᱾ ᱜᱳᱢᱚᱥᱛᱟ ᱯᱨᱚᱥᱟᱫᱽ ᱫᱚ ᱩᱱᱠᱤᱱ ᱨᱮᱱ ᱫᱚᱥᱟᱨ ᱜᱤᱫᱽᱨᱟᱹ ᱠᱟᱱᱟᱭ ᱾ ᱩᱱᱤ ᱨᱮᱱ ᱵᱟᱨᱭᱟ ᱵᱚᱠᱚᱧ ᱠᱩᱲᱤ ᱟᱨ ᱯᱮᱭᱟ ᱵᱚᱠᱚᱧ ᱠᱚᱲᱟ ᱢᱮᱱᱟᱜ ᱠᱚᱣᱟ ᱾ ᱯᱩᱱ-ᱢᱚᱬᱮ ᱪᱟᱱᱟᱪ ᱨᱮ ᱯᱟᱲᱦᱟᱣ ᱚᱠᱛᱚ ᱥᱚᱨᱮᱱᱟᱜ ᱵᱟᱯᱞᱟ ᱦᱩᱭ ᱞᱮᱱ ᱛᱟᱭᱟ ᱾[᱒]
ᱩᱱᱤ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱠᱮᱥᱲᱟ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱ ᱮ ᱮᱛᱚᱦᱚᱵ ᱞᱮᱫᱟ ᱾ ᱨᱮᱸᱜᱮᱡ ᱠᱷᱟᱹᱛᱤᱨ ᱧᱤᱫᱟᱹ ᱫᱤᱶᱦᱟᱹ ᱵᱟᱝ ᱛᱟᱦᱮᱸ ᱠᱟᱱ ᱛᱮ ᱜᱟᱛᱮ ᱠᱚᱣᱟᱜ ᱯᱟᱲᱦᱟᱣ ᱥᱟᱰᱮ ᱟᱸᱡᱚᱢ ᱛᱮᱭ ᱯᱟᱲᱦᱟᱜ ᱠᱟᱱ ᱛᱟᱦᱮᱸᱱᱟ ᱾[᱒] ᱯᱨᱟᱭᱢᱟᱨᱤ ᱥᱠᱩᱞ ᱨᱮ ᱯᱟᱲᱦᱟᱣ ᱢᱩᱪᱟᱹᱫ ᱛᱟᱭᱚᱢ ᱰᱨ. ᱚᱢᱚᱨᱱᱟᱛᱷ ᱡᱷᱟ ᱩᱥᱩᱞ ᱵᱤᱨᱫᱟᱹᱜᱟᱲ ᱠᱷᱚᱱ ᱦᱤᱱᱫᱤ ᱢᱤᱰᱤᱭᱟᱢ ᱛᱮ ᱩᱱᱤ ᱟᱡᱟᱜ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ ᱾[᱒] ᱵᱚᱨᱫᱷᱚᱢᱟᱱ ᱨᱮᱭᱟᱜ ᱞᱟᱣᱫᱚᱦᱚ ᱡᱩᱱᱤᱭᱟᱨ ᱵᱮᱥᱤᱠ ᱴᱨᱮᱱᱤᱝ ᱤᱱᱥᱴᱤᱴᱤᱭᱩᱰ ᱠᱷᱚᱱ ᱩᱱᱤ ᱡᱩᱱᱤᱭᱟᱨ ᱵᱮᱥᱤᱠ ᱢᱟᱪᱮᱛ ᱛᱟᱹᱞᱤᱢ ᱮ ᱦᱟᱛᱟᱣ ᱞᱮᱫᱟ ᱾
ᱠᱟᱹᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤ ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱑᱙᱖᱑ ᱨᱮ ᱯᱩᱨᱩᱞᱤᱭᱟᱹ ᱨᱮᱭᱟᱜ ᱢᱚᱫᱷᱩᱯᱩᱨ ᱯᱨᱟᱭᱢᱟᱨᱤ ᱥᱠᱩᱞ ᱨᱮ ᱢᱤᱫ ᱢᱟᱪᱮᱛ ᱞᱮᱠᱟᱛᱮᱭ ᱮᱛᱚᱦᱚᱵ ᱞᱮᱫᱟ ᱟᱨ ᱑᱙᱘᱐ ᱫᱷᱟᱹᱵᱤᱡ ᱚᱸᱰᱮ ᱢᱟᱪᱮᱛ ᱞᱮᱠᱟ ᱛᱮᱜᱮᱭ ᱛᱟᱦᱮᱸ ᱠᱟᱱᱟ ᱾ ᱟᱨ ᱛᱟᱭᱚᱢ ᱛᱮ ᱥᱤᱨᱤᱥᱜᱳᱰᱟ ᱡᱩᱱᱤᱭᱟᱨ ᱵᱮᱥᱤᱠ ᱨᱮ ᱯᱟᱲᱦᱟᱣ ᱮ ᱪᱟᱞᱟᱣ ᱮᱱᱟ ᱾ ᱚᱸᱰᱮ ᱠᱷᱚᱱ ᱩᱱᱤ ᱒᱐᱐᱓ ᱥᱮᱨᱢᱟ ᱢᱩᱬᱩᱛ ᱢᱟᱪᱮᱛ ᱞᱮᱠᱟᱛᱮ ᱟᱡᱟᱜ ᱢᱟᱪᱮᱛ ᱠᱟᱹᱢᱤ ᱠᱷᱚᱱ ᱮ ᱛᱷᱩᱠᱩᱢ ᱦᱟᱛᱟᱣ ᱞᱮᱫᱟ ᱾[᱒]
ᱥᱟᱥᱟᱯᱨᱟᱣᱤᱡ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ ᱫᱚ ᱑᱙᱘᱑ ᱥᱮᱨᱢᱟ ᱠᱷᱚᱱ ᱯᱩᱸᱰᱜᱳᱰᱟ ᱪᱟᱸᱫᱚᱠᱤᱭᱟᱹ ᱯᱟᱛᱷᱟᱢ ᱨᱮᱱ ᱥᱟᱥᱟᱯᱨᱟᱣᱤᱡ ᱞᱮᱠᱟᱛᱮ ᱢᱮᱱᱟᱭᱟ ᱾[᱒]
ᱥᱟᱶᱛᱟ ᱠᱟᱹᱢᱤᱭᱟᱹ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤ ᱫᱚ ᱢᱤᱫ ᱢᱟᱨᱟᱝ ᱚᱱᱚᱞᱤᱭᱟᱹ ᱥᱟᱶᱛᱮ ᱧᱩᱛᱩᱢᱟᱱ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱦᱚᱸ ᱠᱟᱱᱟᱭ ᱾ ᱩᱱᱤ ᱫᱚ ᱟᱹᱰᱤ ᱵᱷᱟᱜᱮ ᱞᱮᱠᱟᱜᱮ ᱥᱟᱱᱛᱟᱲ ᱥᱟᱶᱛᱟ ᱨᱮ ᱰᱟᱹᱱ ᱟᱨ ᱟᱸᱫᱷᱟ ᱯᱟᱹᱛᱭᱟᱹᱣ ᱨᱮᱭᱟᱜ ᱮ ᱵᱤᱨᱩᱫᱽ ᱟᱠᱟᱫᱟ ᱾ ᱩᱱᱤ ᱧᱩᱛᱩᱢᱟᱱ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱟᱨ ᱚᱱᱚᱞᱤᱭᱟᱹ ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ ᱥᱟᱶᱛᱮ ᱫᱤᱥᱚᱢ ᱦᱚᱲ ᱠᱚ ᱪᱮᱸᱜᱷᱟᱣ ᱞᱟᱹᱜᱤᱫ ᱱᱚᱣᱟ ᱟᱸᱫᱷᱟ ᱯᱟᱹᱛᱭᱟᱹᱣ ᱵᱤᱨᱩᱫᱽ ᱨᱮ ᱟᱭᱢᱟ ᱡᱟᱭᱜᱟ ᱨᱮ ᱫᱩᱯᱩᱲᱩᱵ ᱠᱟᱹᱢᱤᱦᱚᱨᱟ ᱠᱚᱸᱭ ᱥᱟᱯᱲᱟᱣ ᱟᱠᱟᱫᱟ ᱾[᱒] ᱩᱱᱤᱭ ᱵᱩᱡᱷᱟᱹᱣ ᱧᱟᱢ ᱞᱮᱫᱟ ᱡᱮ ᱥᱟᱱᱛᱟᱲ ᱠᱚ ᱚᱞᱚᱜᱼᱯᱟᱲᱦᱟᱣ ᱵᱟᱝ ᱠᱚ ᱵᱟᱲᱟᱭ ᱛᱮ ᱱᱚᱣᱟ ᱟᱸᱫᱷᱟ ᱯᱟᱹᱛᱭᱟᱹᱣ ᱨᱮᱠᱚ ᱡᱷᱟᱹᱞᱤ ᱟᱠᱟᱱᱟ ᱾ ᱥᱮᱪᱮᱫ ᱜᱮ ᱱᱚᱣᱟ ᱠᱷᱚᱱ ᱵᱟᱨᱦᱮ ᱚᱰᱚᱜ ᱨᱮᱭᱟᱜ ᱢᱩᱬ ᱩᱯᱟᱹᱭ ᱫᱚ ᱠᱟᱱᱟ ᱾[᱒]
᱑᱙᱗᱑ ᱥᱮᱨᱢᱟ ᱨᱮ ᱩᱱᱤ ᱫᱚ ᱟᱹᱫᱤᱵᱟᱹᱥᱤ ᱥᱟᱶᱛᱟ ᱥᱮᱞᱮᱫ ᱞᱟᱠᱪᱟᱨ ᱥᱮᱢᱞᱮᱫ ᱨᱮᱭ ᱥᱮᱞᱮᱫ ᱞᱮᱱᱟ ᱾ ᱩᱱᱤ ᱫᱚ ᱒᱐᱐᱙ ᱫᱷᱟᱹᱵᱤᱡ ᱯᱩᱨᱩᱞᱤᱭᱟᱹ ᱦᱚᱱᱚᱛ ᱨᱮᱭᱟᱜ ᱟᱥᱮᱠᱟ ᱨᱮᱱ ᱯᱟᱨᱥᱮᱛ ᱮ ᱛᱟᱦᱮᱸ ᱠᱟᱱᱟ ᱾[᱒] ᱩᱱᱤ ᱫᱚ ᱯᱩᱨᱩᱞᱤᱭᱟᱹ ᱡᱤᱞᱞᱟᱹ ᱥᱩᱥᱟᱹᱨ ᱜᱟᱶᱛᱟ ᱟᱨ ᱢᱟᱱᱵᱟᱡᱟᱨ ᱵᱚᱨᱫᱷᱚᱢᱟᱱ ᱛᱷᱟᱱᱟ ᱟᱹᱫᱤᱵᱟᱹᱥᱤ ᱥᱩᱫᱷᱟᱹᱨ ᱥᱚᱢᱤᱛᱤ ᱨᱮᱱ ᱥᱩᱛᱨᱮᱛ ᱮ ᱛᱟᱦᱮᱸ ᱠᱟᱱᱟ ᱾ ᱜᱳᱢᱚᱥᱛᱟ ᱯᱨᱚᱥᱟᱫᱽ ᱫᱚ ᱯᱩᱨᱩᱞᱤᱭᱟᱹ ᱥᱟᱱᱛᱟᱲᱤ ᱥᱟᱶᱦᱮᱫ ᱢᱟᱰᱮᱨ ᱥᱟᱶ ᱦᱚᱸ ᱡᱚᱯᱲᱟᱣ ᱮ ᱛᱟᱦᱮᱸ ᱠᱟᱱᱟ ᱾
ᱥᱟᱶᱦᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱳᱢᱚᱥᱛᱟ ᱯᱨᱚᱥᱟᱫᱽ ᱥᱚᱨᱮᱱ ᱫᱚ ᱯᱮᱼᱯᱩᱱ ᱪᱟᱱᱟᱪ ᱨᱮ ᱜᱤᱫᱽᱨᱟᱹ ᱚᱠᱛᱚ ᱯᱟᱲᱦᱟᱣ ᱡᱚᱠᱷᱮᱡ ᱠᱷᱚᱱ ᱮ ᱚᱞ ᱫᱚᱭ ᱮᱛᱚᱦᱚᱵ ᱞᱮᱫᱟ ᱾ ᱩᱱᱤᱭ ᱧᱮᱞ ᱞᱮᱫᱟ ᱫᱤᱠᱩ ᱯᱩᱥᱤ ᱠᱚ ᱴᱷᱮᱱ ᱪᱮᱫ ᱞᱮᱠᱟ ᱥᱟᱱᱛᱟᱲ ᱠᱚᱣᱟᱜ ᱱᱟᱦᱟᱪᱟᱨ ᱦᱩᱭᱩᱜ ᱠᱟᱱᱟ ᱾ ᱩᱱᱤ ᱫᱚ ᱚᱱᱟ ᱠᱚ ᱵᱟᱭ ᱧᱮᱞ ᱥᱟᱦᱟᱣ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱱᱟ ᱾ ᱚᱱᱟᱛᱮ ᱩᱱᱤ ᱟᱡᱟᱜ ᱚᱞ ᱠᱚ ᱛᱟᱞᱟ ᱛᱮ ᱟᱡᱟᱜ ᱨᱟᱸᱜᱟᱣ ᱮ ᱥᱚᱫᱚᱨᱮᱫ ᱠᱟᱱ ᱛᱟᱦᱮᱸᱱᱟ ᱾ ᱑᱙᱖᱐ ᱥᱮᱨᱢᱟ ᱟᱡᱟᱜ ᱯᱩᱭᱞᱩ ᱥᱮᱨᱮᱧ ᱛᱩᱢᱟᱹᱞ ᱯᱩᱛᱷᱤ ᱦᱚᱲ ᱥᱮᱨᱮᱧ ᱯᱩᱛᱷᱤ ᱯᱟᱨᱥᱟᱞ ᱞᱮᱱᱟ ᱾ ᱩᱱᱤᱭᱟᱜ ᱠᱷᱟᱹᱞᱤ ᱢᱤᱫᱴᱟᱹᱝ ᱠᱷᱟᱴᱚ ᱠᱟᱹᱦᱱᱤ ᱛᱩᱢᱟᱹᱞ ᱯᱩᱛᱷᱤ ᱢᱮᱬᱦᱮᱫ ᱥᱟᱠᱚᱢ ᱡᱤᱣᱤ ᱨᱟᱨᱮᱡ ᱑᱙᱘᱘ ᱥᱮᱨᱢᱟ ᱨᱮ ᱯᱟᱨᱥᱟᱞ ᱟᱠᱟᱱᱟ ᱾[᱒]
ᱩᱱᱤᱭ ᱚᱞ ᱟᱠᱟᱫ ᱛᱩᱨᱩᱭ ᱜᱚᱴᱟᱱ ᱯᱩᱛᱷᱤ ᱫᱚ ᱦᱩᱭᱩᱜ ᱠᱟᱱᱟ ᱠᱟᱨᱟᱢ ᱵᱤᱱᱛᱤ, ᱫᱟᱲᱮᱜᱮ ᱫᱷᱚᱱ, ᱛᱚᱡᱽᱵᱤᱡᱽ, ᱟᱫᱤ ᱛᱷᱟᱱ, ᱱᱚᱝᱠᱟᱱ ᱜᱮᱭᱟᱵᱚᱱ ᱦᱚᱲ ᱱᱚᱝᱠᱟᱜᱮ ᱛᱟᱵᱚᱱᱟ ᱥᱚᱢᱟᱡᱽ ᱟᱨ ᱥᱟᱨᱵᱷᱳᱶᱛᱤᱠ ᱾ ᱩᱱᱤ ᱵᱟᱝᱞᱟ ᱯᱟᱹᱨᱥᱤ ᱛᱮᱦᱚᱸ ᱟᱭᱢᱟ ᱜᱟᱱ ᱚᱱᱚᱞ ᱟᱨ ᱯᱩᱛᱷᱤ ᱠᱚᱸᱭ ᱚᱞ ᱟᱠᱟᱫᱟ ᱾ ᱩᱱᱤᱭᱟᱜ ᱟᱫᱚᱢ ᱚᱱᱚᱞ ᱠᱚ ᱯᱟᱨᱥᱟᱞ ᱨᱮᱭᱟᱜ ᱛᱟᱺᱜᱤ ᱨᱮ ᱢᱮᱱᱟᱜᱼᱟ ᱾ ᱚᱞ ᱡᱤᱭᱚᱱ ᱨᱮᱭ ᱯᱩᱭᱞᱩ ᱨᱮ ᱩᱱᱤ ᱨᱮᱱ ᱪᱤᱞᱤ ᱜᱩᱨᱩ ᱥᱮ ᱩᱫᱜᱟᱹᱣᱟᱱ ᱦᱚᱲ ᱵᱟᱝ ᱠᱚ ᱛᱟᱦᱮᱸᱠᱟᱱ ᱨᱮᱦᱚᱸ ᱛᱟᱭᱚᱢ ᱛᱮ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱟᱨ ᱮᱴᱟᱜ ᱯᱟᱹᱨᱥᱤ ᱨᱮᱱ ᱚᱱᱚᱞᱤᱭᱟᱹ ᱠᱚᱣᱟᱜ ᱟᱹᱰᱤᱜᱟᱱ ᱚᱨᱥᱚᱝ ᱞᱟᱜᱟᱣ ᱞᱮᱫᱮᱭᱟ ᱾ ᱩᱱᱤ ᱫᱚ ᱥᱟᱹᱫᱷᱩ ᱨᱟᱢᱪᱟᱸᱫᱽ ᱢᱩᱨᱢᱩ, ᱢᱟᱺᱡᱷᱤ ᱨᱟᱢᱫᱟᱥ ᱴᱩᱰᱩ, ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ, ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ, ᱱᱟᱨᱟᱭᱚᱱ ᱥᱚᱨᱮᱱ ᱟᱨ ᱰᱚᱢᱟᱱ ᱥᱟᱹᱦᱩ ᱛᱟᱠᱚᱣᱟᱜ ᱚᱞ ᱟᱨ ᱠᱟᱹᱢᱤᱦᱚᱨᱟ ᱛᱮ ᱟᱹᱰᱤ ᱜᱟᱱ ᱮ ᱚᱨᱥᱚᱝ ᱞᱮᱱᱟ ᱾[᱒]
ᱨᱟᱡᱽᱟᱹᱨᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤ ᱑᱙᱖᱘ ᱥᱮᱨᱢᱟ ᱵᱷᱟᱨᱚᱛ ᱡᱟᱠᱟᱛ ᱡᱷᱟᱨᱠᱷᱚᱸᱰ ᱯᱟᱨᱴᱤ ᱨᱮᱭ ᱥᱮᱞᱮᱫ ᱞᱮᱱᱟ ᱾ ᱒᱐᱑᱔ ᱨᱮᱭᱟᱜ ᱯᱚᱪᱷᱤᱢ ᱵᱟᱝᱞᱟ ᱞᱳᱠᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱡᱷᱟᱲᱜᱨᱟᱢ ᱛᱟᱞᱢᱟ ᱠᱷᱚᱱ ᱮ ᱛᱤᱸᱜᱩ ᱞᱮᱱᱟ ᱾[᱓]
ᱢᱟᱹᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱟᱨ ᱞᱟᱠᱪᱟᱨ ᱨᱮ ᱩᱱᱤᱭᱟᱜ ᱮᱱᱮᱢ ᱠᱷᱟᱹᱛᱤᱨ ᱩᱱᱤ ᱫᱚ ᱟᱭᱢᱟ ᱥᱟᱶᱦᱮᱫ ᱟᱨ ᱞᱟᱠᱪᱟᱨ ᱜᱟᱶᱛᱟ ᱦᱚᱛᱮᱛᱮ ᱠᱚ ᱢᱟᱹᱱ ᱵᱮᱵᱷᱟᱨ ᱟᱠᱟᱫᱮᱭᱟ᱾
- ᱒᱐᱐᱔ ᱥᱮᱨᱢᱟ ᱨᱮ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱟᱜ ᱑᱗ ᱟᱱ ᱥᱮᱢᱞᱮᱫ ᱨᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱯᱷᱮᱞᱳᱥᱤᱯ᱾[᱒]
- ᱒᱐᱐᱐ ᱨᱮ ᱯᱚᱪᱷᱤᱢ ᱵᱟᱝᱞᱟ ᱵᱮᱼᱞᱟᱦᱟᱱᱛᱤ ᱵᱷᱟᱹᱞᱟᱹᱭ ᱵᱤᱵᱷᱟᱜᱽ ᱦᱚᱛᱮᱛᱮ ᱜᱤᱱᱤᱡᱚᱱ ᱥᱚᱢᱵᱚᱨᱫᱷᱚᱱᱟ ᱢᱟᱹᱱ᱾[᱒]